رواية ابيك في دروب المحبة تخاويني -7
علي ينافخ وبكل وقاحه: انا مو غلطان هو اللي لف علي و ارتبكت وقتها ... دفع وتصليح منب دافع
الشرطي يناظره بنظرات غريبه و مستحقره على حركاته
نواف: يالله بس قدامي ولك وجهه تتكلم بعد ..
في البيت ... محد يدري باللي صار الا الجده
ام خالد: السلام عليكم
الكل: وعليكم السلام
ام سلطان: هاه يمه لقيتي الناس
ام خالد: أي الحمدلله عطيتهم فرحوا مرره المساكين
ام سلطان: الله يجزاك الف خير
ام خالد تسال بنتها : الا انتى معطيه علي مفتاح السياره
ام علي: أي قال بيسمع شريط بالسياره وعطيته ليه
ام خالد: ما شفت السياره عند الباب
ام علي: يمكن راح ياخذ له لفه منا ومناك
ام خالد بضحكه استهزاء:لفه .. هههه ... وانا جايه شفنا حادث 3 سيارات و ولدك من ظمنهم
الكل شهق من الخبر اللي سمعه ..
كملت ام خالد: هذا اللي بيسمع شريط بالسياره راح وصدم له وخرب سياره ابوه ...
ام علي: لا يمه من جدك..صار فيه شئ
ام نواف تهدي: صلوا على النبي انشاءالله ما يكون فيه شئ
ام خالد: مدري عنه شفت الناس يطلعونه وخليت سعود عنده
شوي دخل احمد وكان داري بالسالفه
ام نواف: احمد شلون علي ... وينه فيه
احمد: بمركز الشرطه مع نواف .. تطمنوا ما فيه شئ
ام علي: حسبي الله عليه من ولد ..قالي يمه ابي المفتاح بسمع شريط بالسياره هنا عند الباب ومنب متحرك وش اللي خلاه يسوق ويمشي مدري عنه ... حسبي الله عليه
على صوتها طلعوا البنات وساره معهم
ساره بخوف : خير وش صار
ام خالد: علي صادم له سيارتين وبمركز الشرطه
ملاك: صار فيه شئ
ام علي: ليته ميت ... ليته ميت ومريحني حسبي الله عليه .. الحين وش اسوي هاه يالله لقينا هالسياره تودينا وتجيبنا وجا الحيوان و صدم فيها
مسكتها ام نواف: لا تقولين كذا لا تدعين عليه مهما كان هذا ولدك
ام علي: الا بدعي عليه .. الله ياخذه و لا يوفقه ... اللي مثله ما ينبغى
طلعت ساره و البنات الا ملاك قعدت مع امها ينتظرون اخر الاخبار عنه...
في الغرفه
ساره: عمى بعينه من ولد ما لقى يسوي هالشئ الا بيوم ملكتي نكد علينا الله ينكد عليه
عهود: الله لا يبلانا ... وجهه اصلا شؤوم على اللي يشوفه
هند: حرام عليك ... تلاقينه طلع يتمشى واحد دخل عليه
هديل: واللي يرحم والديك لا تدافعين عليه معروف انه ولد مطفوق و ارج منه مافي .
مشاعل: الله يعين خالتي تحززن
ساره: مشكلتها هي اللي ما عرفت تربي عيالها ... اووف احتريت شغلي المكيف
عهود: وحده غيري تشغله يديني فيها مناكير
هديل: ياااي يا المناكير .. اذا نشفت تعالي حطي لي
نرجع للدور اللي تحت ...
ام سلطان: كلمي ابوه خليه يجي
ملاك: عاااد كن بيهمه الامر والله لا يسكر بوجهنا التلفون
ام خالد: بنت .. عيب تتكلمين على ابوك كذا
ملاك: جده الله يعافيك لا تلوميني كلامي صح
ام خالد: ولو هذا ابوك .... قله حيا ..بنات اخر زمن يسبون اباءهم قدام الناس
ام علي: الحين وش اسوي قولوا لي وش اسوي .. تعبت اهاوش تعبت اضرب واسب لاكن مافي فايده زي الحيوان ما يفهم ... يدري ان ابوه مب مليونير حتى يغير السياره ويدري انه ولد مرجوج ليش يسوقها اجل.. ما اقول الا الله لا يرده من ولد ولا يرجعه للبيت ياااارب
ام نواف: استغفري لا تقولين كذا عليه ... الله يهديه
*******************************
في مركز الشرطه ...
علي و رجاليين صاحبين السيارات المصدومه ... ونواف معهم
الشرطي: انت اللي غلطان سرعتك عااااليه و المشكله الشارع مب سريع حتى تاخذ راحتك
علي: وش مسرع فيه اقولك هم وقف فجاءه قدامي
الشرطي: ولا تنسى ان رخصه ما عندك , يعني الغلط راكبك راكبك .. ما تدري انه ممنوع احد يسوق بلا رخصه قياده
علي: ادري بس كنت مضطر
الشرطي وبدا يعصب : وش مظطر فيه هاه... غلطان و تعلي صوتك على الاقل احترم اللي واقفين تراهم كبر ابوك
تكلم واحد من الرجال: على فكره انا بقولكم من البدايه تنازل منب متنازل غلط ويتحمل غلطه ... في شئ اوقعه لاني مستعجل
تكلم علي: خير انشاءالله ...
قاطعه نواف بصوت جامد : عـــلي...
التفت له ..وشافه يحط اصبعه على فمه "يعني اسكت"
علي: ما تسمع وش يقول
نواف: قلت لك اسكت
طلعوا الرجال وبقى علي ..اما انه ينحجز او يطلع بكفاله... بطبيعه الحال كلم نواف ابو علي علشان يدفع له و يكفله ويطلع .. لاكنه بكل ببساطه قال: فلوس ما عندي .. تعرف حالتي يا نواف
تفاجئ نواف من رده و حز بخاطره " وش ذا الابو " ... اظطر انه يكلم خالته ... وردت انه يقعد بالحجز وما يطلع ومحد بيدفع له لين يتادب
علي: من جدكم اقعد بالحجز
نواف: هذا اللي طلبته امك
الشرطي: اللي ما تربي حنا نربيه ... يا عسكري .. خذه للحجز الين ما يحلها ربي
علي: نواف من جدك بتخليني , اليوم ملكه خالتـــ .....
قاطعه وقال: توكل على الله واذا مكتوب انك بتطلع بتطلع .
بعد ما راح ..قال الشرطي: وش يقرب لك
نواف: ولد خالتي
الشرطي: انتبهوا له .. قول لابوه ينتبه له ويربيه من جديد والله ما راح يقدر يكمل حياته بهالاسلوب
نواف: ياما قلنا وياما نبهنا بس خلها على ربك
الشرطي: الله المستعان ... ما يربون عيالهم زين واذا غلطوا ومسكناهم " جاك الابو ينافخ طلعوا ولدي وانتوا بس تاخذون فلوس الناس بالكفاله اللي حاطينها "
نواف: الله يعينكم ... هذا رقمي واي شئ صار تقدرون تدقون باي وقت
الشرطي: انشاءالله .
ام سلطان: بتخلينه بالحجز يوم ملكه خالته
ام علي: خليه لين يخيس ومن محتاجه اصلا...
رجعوا العيال وطلعت ام نواف للحوش تكلم ولدها وتشوف وش سوى
نواف: كلمت ابوه علشان يكفله ويطلعه قال ماعندي فلوس
ام نواف: استغفر الله العظيم ... هو هذا مواله ما عندي فلوس طول عمره ما عنده ... اجل حجزوه عندهم
نواف: ايه ..لين ما يكفله احد
ام نواف: وكم المبلغ
نواف: 5 الاف.... زين شلون خالتي يوم كلمتها صوتها رايح فيها
ام نواف: الله يكون بعونها مررره متضايقه منه ..الله يهديه ابد ما يريح امه ..عله و العياذ بالله
خالك خالد درى
نواف: أي بيخلص شغله ويجي
ام نواف: زين اذا بغيت شئ دق علي او على مشاعل
**************************************
هديل: يختي خلصي بكوي ثوبي
مشاعل: زين حطيه بكويه مره وحده ...
عهود: هاكم حقي بعد ... تراني مشغوله
هديل: اجل لا صارت ملكتك وش بتكونين "سوبر مشغوله"
عهود :ياااارب الله يسمع منك
مشاعل: الله كل ذا تحمس
عهود: وفي احد ما يبي يتزوج
هديل ناظرت اختها وفيهم الضحكه .. ثم قالت: طيب اقولكم شئ ما تصدقونه
عهود + مشاعل: وشو ؟؟!!
هديل: احم ... اختى وحبيبتي هند انخطبت
الكل : وشوووووووووووو انخطبت
عهود: احلفي
مشاعل: اووووخص يا حركااااااااااات
هند بحيا: أي صدق
عهود: و توك تقولين يا الدبه ... مبرووووك عقبالي يارب
هند: الله يبارك فيك
مشاعل: هنا هنا ضمه يا اختاه .. مبروووووك يا قمر
هند: الله يبارك فيكم وعقبالكم
طلعت خالتهم ساره وكانت سامعه باللي صار
_ مبروك يا هند <<< قالتها ببرود
هند: الله يبارك فيك
كانت ساره حاسده هند بالحظ ... ما خلصت دراستها وانخطبت وهي اللي بالثلاثين توها تملك ... هذا اللي صار ولا تبينها ترفضه لخاطر عيونك ...والله !!
********************************************
مر الوقت وبعد العشا تجهز الكل ولبس .. الخاله ساره مع هند بالصالون تسوي التسريحه و الميك اب
قربوا يخلصون ويرجعون للبيت علشان توقع على العقد ..
في الحوش واقفين نواف وسلطان يدخن كالعاده .. جاهم احمد
_ يا شباب .. قولوا امين
نواف+ سلطان : امييين
احمد: عقبالكم يارب اشوفكم بمثل هاليوم بجمب الملاك توقعون على العقد
سلطان: الله يسمع منك
نواف وتذكر طلب امه ورد ببرود: يصير خير
سلطان: وشفيك تقولها كذا ما ودك تعرس
نواف: ااااايه قلت يصير خير
احمد: مسوي لي ثقل ومهب ميت على العرس .. وش وراك عندك شئ تسلي نفسك فيه سفر و رحلات .. اقلااع لابعد درجه
سلطان: هههههه وانت صادق ... مريح خوينا
نواف: ارحمونا تكفون سكروا ع الموضوع
احمد: ليش وش مضايقك فيه
بهاللحظه دق جوال ملاك وكانت حنان اللي داقه تبي تعرف موقع البيت بالضبط لانها معزومه ... عن الازعاج و الزحمه طلعت للحوش ترد عليها ...
ملا: أي حنان .. وينك الحين
حنان: انااا عند الشاطئ مول وين اروح يسر ولا يمين
ملاك: روحي يمين من بين المول و الفندق بعدين خذي .............
سكتت يوم شافت عيال خالتها الثلاثه واقفين يناظرونها وبينهم نواف ... دخلت بسرعه وقلبها بيطلعم من مكانه من الخوف , حتى نست صديقتها اللي على التلفون.. اكيد بتنساها شافت حبيب القلب بعد سنوااات من الغياب
حنان: الووووو .... ملاك وينك يابنت
ملاك: أي معك ..وين وصلتي
كملت لها الوصف و هي مو على بعضها مرتبكه من الموقف اللي صار .. اما الشباب متفاجئين منها
سلطان: منهي ذي
احمد: كنها ملاك
سلطان: وراها احلوووت كذا اذكرها متوحشه وهي صغيره
احمد: ههههههه اكيد بتتغير ولا تبيها على ماهي الله يرجك قال متوحشه اجل انت وشو أليف
نواف: ههههههههههههه والله انكم ما تستحون كليتوا البنت .. امشوا بس قبل لا يطلع احد غيرها
مسكينه هي في احلامها غارقه و مو مصدقه انها شافته وشافها واكيد الحين يفكر فيها و قلبه يدق مثلها و مو قادر يوقف على رجوله ..
ملاك وبخاطرها : اااااااااااااهـ يا قلبي ما بغيت اشوفه .. يا زينه وياحلوه بالثوب .. اخيرا كحلت عيني بشوفته فديتك والله يا نوااف الله لا يحرمني من شوفتك وعقبالنا يارب نكون بمثل هاليوم.
رجعت الخاله ساره من الصالون وتمت مراسيم الملكه .. صورت مع زوجها(مشاري) و مع امها و خواتها والبنات .. كانت ميته من الفرح الدنيا مو شايلتها من الوناسه حست انها ملكه العالم كله واسعد وحده في هاليوم , محد قدها بعد انتظار لسنوات اخيرا كتب لها ربي وتزوجت ...
مبرووكـ يا ساره .. الله يتمم عليك السعاده
هذا اللي صار بيوم ملكتها " فرح من جهه و ضيقه صدر لام علي على ولدها و اللي سواه و برود ابوه .. غير كذا سعاده ملاك بشوفه نواف .. وسعاده الباقي بخطبه هند "
عطني السعاده لو ثواني قليلات.. واعطيك انا عمري وباقي حياتي
عطني ولو لحظه من الذات للذات.. يعاده تمحي بها ذكرياتي
تعبت انا مليت من كثر الاهات.. وتعاستي خايف تعجل وفاتي
عمر البشر محسوب في بضع ساعات.. ولو فاتت الساعات فات الفواتي
الشاعر ناصر المري
الجزء (11)
ام سيف : على وين ..
سيف: بغيتي شئ طالع استقبل مهند اليوم بيرجع من استراليا
ام سيف بفرح : لااااا الحمدلله على سلامته ... يا حليله خلص دراسته
سيف: أي ماشاءالله عليه
ام سيف: الله يوفقه اجل سلملي عليه .. وانتبه لنفسك
سيف: اوكي بغيتي شئ يا الغاليه
ام سيف: لا كنت بروح للصالون بس اخذ " سفرجل " واروح مع شمس
يمديكم على اسم السواق "سفرجل" هع هع هع
سيف: اوكي فمان الله
ام سيف: مع السلامه
هذا مهند صديق سيف من ايام التمهيدي ... يتيم الام والابو وكان عايش مع عمه وماشاءالله عليه يوم خلص الثانوي طلع وكمل دراسته برا في استراليا.. وام سيف كانت له مثل الام والاخت تحبه مثل عيالها وتغليه علشان كذا فرحت مررره برجوعه على الاقل يكون مع سيف وقريب منهم.
نزلت شمس بعد ما قامت من النوم
ام سيف: صح النوم .. كان كملتي للصبح
شمس: لاااا خلاص شبعت نوم و اكتفيت من الاحلام... وين سيوووف الصرقوووع
ام سيف: راح يستقبل مهند من المطار
شمس: وااااااااااااو اخيرا رجع المغترب .. له وحشه الدب
ام سيف: أي والله يا حليله هالولد ... الله يوفقه ويبارك له بدراسته
شمس: بنروح الصالون اليوم
ام سيف: أي كلمي سفرجل قولي له يطلع الموتر بعد ما يصلي العشا
شمس: وترا بمر شوكلا متشهيه تشوكلت
ام سيف: عيل لا تجين وتقولين لي ابي اسوي دايت
شمس بضحكه شريره: هاهاها حسنا اماهـ
**************************************
ابو علي: قلنا لكم الف مره ما عندي فلوس و اليوم بسافر .. فكينا عاااد
ام علي: شلون تسافر وولدك بالحجز رامينه حرام عليك ... اجل سفرتك علشانه هذا ولدك اهم من الشغل
ابو علي: حسبي الله عليكم انتى و ولدك المعتوهـ .. وين خواله ليش ما يدفعون له مو ولد اختهم .... هذه اخر مره اتكلم فيها او خليه يخيس بالحجز لين ارجع من السفر مو ضاره شئ
ام علي وفقدت اعصابها : الله ياخذك وياخذ ولدك .. كرهتوني الحياه ذبحتوني .. خلاااص يكفي ..يكفي
طلعت ملاك تركض لامها ودقات قلبها سريعه .. خايفه لا يصير فيها شئ ...
قالت وهي ماسكتها: يمه خلااص هدي ... ريحي اعصابك يمه تكفين
ام علي: ذبحوني قتلوني وانا حيه ... حشى منب ام ولا انسانه
التفت ملاك وبعيونها دموع على جهه ابوها وشافته واقف زي الجدار حتى مافي قلبه رحمه يهدي زوجته وهي بهالحاله ... تافف من الموقف وطلع برا البيت
ملاك: يمه علشان خاطري هدي نفسك ما يسوي تسوين بنفسك كذا
ام علي: ااااااااهـ يا قلبي تعبت ... والله تعبت يا ملاك ابي اموت وارتاح من هالغثا
ملاك: لا تقولين كذا الله يطول بعمرك يمه ....خليهم بحريقه هو وياه انتى اهم .
****************************************
بمكان ثاني ونفس الحاله يتناقشون بسالفه حجز علي
ام سلطان: ومتى بيطلعونه للحين ابوه ما دفع الكفاله
سلطان: لا يقول ماعنده فلوس واليوم بيسافر
ام سلطان: نعم ؟! بيسافر و ولده يتركه كذا
سلطان: عاااد شفتي التفكير شلون
ابو سلطان: هالرجال معروف هو بطريق و الخير بطريق ... الله لا يبلانا ... الا متى طلعتكم للشاليه بكره
سلطان: لا الاحد
هند: لا يكون بناجلها علشانه
سعود: لا مستحيل ... عاد ما صدقنا نلاقي طلعه معتبره
سلطان: محنا ماجلين شئ علشان خاطر عيونه ... خالي خالد قال يمكن يدفعها له
ام سلطان: لا حول ولا قوه الا بالله ..
*******************************************
ام خالد: ومن متى هو عنده فلوس 24 ساعه مطفر
ابو عبدالله يهدي الوضع: خلاص انا بدفع له واطلعه ... لمتى يعني بيقعد بالحجز
ام خالد: الله يجزاك خير ويبارك فيك
ابو عبدالله: يقولون الشباب الاحد حاجزيين بالشاليهات
ام خالد: أي سمعت خلنا نروح نستانس ونغيير جو ... وبعد اختك تطلع من الضيقه اللي فيها عقب حركه ولدها
ابو عبدالله: يالله اجل انا طالع تبين شئ
ام خالد:سلامتك ... يعطيك الف عافيه
********************************************
وهم في السياره طربانيين على اغنيه محمد عبده
هلا بالطيب الغالي ..عزيز و شوفته منوه
ترا ما جا على بالي .. اشوف عيونك الحلوه
مهند: الله الله كل هذا لي
سيف: وكم مهند عندي انا .. ياخي والله لك وحشه من زمااااان عنك
مهند: وانت بعد وحشتني يا الدب ... وحشتني سواليفك
يكمل سيف: وحشتني شوفتك اكثر
مهند : ههههههههههههه وش عندك صاير شاعر لايكون تحب
سيف تغيرت ملامحه يوم سمع "تحب" ..قال: انا ..ههههه مدري والله بس ما اتوقع
مهند يغمز له : علييينا ..ما تتوقع ...
سيف:هههههههههههههااااي الله يرجك وش جاب هالسالفه في بالك
مهند: عيونك فاضحتك
سيف بجديه: احلف .. من جد
مهند مااات ضحك:ههههههههههههههههههههههههههههههههاااااي ... والله الحين ثبت لي انك تحب وشفيك ارتعت كذا
سيف: اقووول خوينا في الله ريحنا ... ولا تفضحنا قدام العالم , استعد لشوفت الوالده ازعجتني بالاتصال
مهند:انشاءالله عمي روميو ..ههههههههههههههههه
سيف:هههههه روميو بعينك
****************************************
معلقه السماعه باذنها وداخله جو مع مشاري
سارهـ:ههههههههه من جدك انت
مشاري: أي والله ...قلت لهم ابي وظيفه زينه انا على وجهه عرس قالوا مافي الا "حارس امن"
ساره: لا كله ولا حارس امن
مشاري:اقول عيوني دوامك بالمستشفى متى يخلص
ساره: 4 العصر اطلع
مشاري: الله!! من 8 الصبح لــ 4 العصر اجل نص يومك برى البيت
ساره: تقريبا أي
مشاري: اجل ما يصير كذا شوفي مديركم كلميه خليه يقصر من ساعات العمل.. ما يصير تكرفين للناس وزوجك بالبيت لوحده
ساره : أي انشاءالله بشوف
مشاري: تقولين بتطلعون يوم الاحد للشاليها
ساره:أي بتجي
مشاري: اكيد مو صرت من العائله
ساره :هههههههههه الله يحيك
دخلت عليها امها ... وتعذرت من مشاري وسكرت
ام خالد: هذا مشاري
ساره بخجل: أي ..يسلم عليك بعد
ام خالد: الله يسلمه ... وش سوى لقى شغل
ساره: يقول قاعد يدور ... يمه شفيك عليه الرجال طيب وما صدقت على الله لقيته تبينه يطير
ام خالد: وليش يطير شايفتني الحقه بعصا و اهججه منك ..لا يا قلبي انا ابي لك الخير انتى واخوانك.. اذا كان كلامي يزعلك ويضايقك العذر و السموحه , سوي اللي يعجبك والله يوفقك وياه
طلعت المسكينه ام خالد وتحس انها ثقل على عيالها وهم مو فاهمين انها تبي الخير لهم ..هي عاشت سنوات وايام بهالدنيا دارستها صح .. بحلوها وبمرها وما تبي عيالها او احفادها يطيحون بمشاكل و مصاعب الدنيا اللي ما تخلص ...
"افعل خير وقطه في البحر" <<< مدري المثل صح ولا لأ
**********************************************
في مركز الشرطه .. الساعه 6 يوم السبت ...
الشرطي لابو عبدالله: الله يبارك فيك ويكثر من امثالك
ابو عبدالله: تسلم والله ..خلاص يطلع معي الولد
الشرطي: أي يقدر يطلع دامه وقع على التعهد .. بس يكون بعلمكم اصحاب السيارات المتضرره للحين ما تنازلوا عن التعويض
ابو عبدالله:يصير خير
الشرطي: قلت ابوه مسافر ... متى بيرجع انشاءالله
ابو عبدالله يهز كتوفه : علمي علمك
الشرطي: اهااا ... الله يعينك يا خالد ويعطيك الف عافيه على اللي سويته.
في السياره
علي: اسف ادري اني الغلط راكبني .. وتعبتكم معاي ..
ابو عبدالله: تاسف لامك مو لي .. المسكينه اللي مالها احد بهالدنيا غيرك تطالع الله ثم انت .. تنزل الحين تتاسف لها وتحب راسها ..ياعلي انت منت بصغير حتى نكون وراك بكل شئ اللي مثلك رجال شايلين بيوت وعوايل ., فهمت وش اقولك
علي: انشاءالله
*******************************************
عهود داقتها سوالف مع مشاعل ومو راضيه تسكر
مشاعل: اقول يا بت اخليك الحين بروح اكل جوعانه
عهود : عنااد فيك ما بسكر بقعد ...
مشاعل: يعني عنااد .. طيب اوريك يا الدبه
عهود: اقول صديقتك شمس بتجي بكره
مشاعل: لا ..ليش تسالين
عهود: ابد سؤال وبس .. تدرين ان ابوي طلع علي من الحجز
مشاعل: زييين يعطيه العافيه ... احسن من غيره
عهود: من جد الله لا يقوله اتزوج واحد مثل ابو ملاك ..شري اعوذ بالله
مشاعل: عهود ..عهود يا مال العرس انشاءالله
عهود: خلااص فهمت اوكي روحي كلي بالعافيه ..واشوفك بكره
************************************************** ********
دخل علي البيت و منزل راسه .. لقى امه طالعه من غرفتها .. علطول اتجه لها وسحب يدها يبويها ويتاسف لها و الدموع على خده
علي: يمه انا اسف والله اسف تكفين سامحيني ... ما قصدت اسوي كذا ولا اسف
ام علي و ضايق صدرها على هالموقف المؤلم و دموع ولدها .. مسحت على راسه وقالت: مسموح يا علي والله يهديك ..انا يوم رفضت يطلعونك من الحجز وقتها كنت ابيك تاخذ درس باللي سويته و تتعلم ان اللي سويته اكبر غلط مو معناه اني اكرهك انت مهما تكون ولدي
رفع راسه وقال: اخر مرره اسويها بس تكفين سامحيني .. ادري اني غلطان واني تعبتك انتى واهلي كلهم بس سامحوني.
ام علي: الله يهديك يا علي و يصلح من شانك و يصبرني .. الله يهيدك.
************************************************** *****
طلعت من المطبخ مع صحن "كلوب ساندويتش" و قعدت مع امها بالصاله
مشاعل: ازيك يا الغاليه .. وين اخواني ما لهم حس
ام نواف: احمد و عبدالرحمن نايمين لانهم مواصلين من امس و نواف طلع مع فهد من ساعه يقول بيمر محل الكمبيوترات بيغير لاب توبه
مشاعل: هاه الطلعه بكره اكيدهـ .. ترا عهود متحمسه لابعد درجه
ام نواف: هههه يا حليلها قولي لها أي اكيد .. وعلي ولد خالتك طلع اليوم من الحجز والحمدلله
مشاعل: أي زين .. قالت لي عهود
صوت الباب تسكر ودخل فهد يركض بفرح
فهد: شريت قايم بوي جديد احسن من حق دحوووم
مشاعل: وين حقك القديم لا يكون رميته
فهد: لا خرب وعطيته علي الصغير <<< ولد ام سلطان
مشاعل: يعني غشيته
فهد: لااا وش تحسبيني مثلك
دخل نواف وهو يضحك على قوه فهد : تعجبني ... خلك شديد معها .. السلام عليكم جميعا
الكل: وعليكم السلام
مشاعل: ما جبت لي شئ
نواف: كنت بجيب لك فلاش مومري بس قلت لا خساره فيك تستاهلين شئ اكبر
مشاعل: أي اشوه على بالي بتتهزا فيني
ام نواف: الله جابك ... بكره وحنا رايحين للشاليه بتمر على خالتك نوره وتاخذهم لان ابوهم مسافر .. وسواق جدتك مهب رايح
نواف: اجل مع مين بتروح خالي خالد
ام نواف: أي ... خذ الرانج وبتروح معك مشاعل .. واحمد بياخذ المرسيدس
نواف: اوكي ترا بنمشي الساعه 9 و خليهم يجهزون من بدري
ام نواف: مشاعل كلمي السواق خليه يطلع السياره بعد العشا بروح لكارفور اخذ اغراض للطلعه
مشاعل: برووح معك بس ابي جيان
ام نواف: بلا جيان بلا خرابيط ادري فيك بتمرين على كليرز و طقته ..لا بنروح لكارفور
مشاعل: ومن قال بروح لكليرز انـــ ....
قاطعها فهد: الا بتلفين عليه وشوي بتلفين على المطاعم وتاخذين بوب كورن بالكرميل
مشاعل وكاتمه الضحكه: انت وش دخلك ... يالله مناك بس يا صاحب الراس الصغير
نواف: هيييه لا تغلطين على عمك فهد هذا شيخ البيت
ام نواف: والنعم فيه
فهد يطلع لسانه لمشاعل : احسسسسن فشلوكـ يا الدبه
قامت مشاعل وعطته ضربه خفيفه على راسه: لا يكثر بس
************************************************** *****
ام عبدالله تنادى عهود:عهوووووووووووود..عهوود وينك يا الصقهه
عهود: نعم نعم خير وش فيه
ام عبدالله : استحي على وجهك وتعالي ساعديني شوي ... على الاقل رتبي اغراض اخوانك للسباحه و طلعي ملابسهم
عهود: اوووف و بنتك وينها ما تسوي هالاشياء
ام عبدالله بعصبيه: قلت لك انتى تسوينها وما ابي اكرر اللي قلته .. ما تشوفيني حايسه بالمطبخ اسوي لاهلك شئ يبلعونه ولا تبينهم يلوموني مثل كل مره على تقصيري اوووف منكم
عهود: اجل اذا خلصتي رتبي اغراضك .. انا مو فاضيه
وطلعت لغرفتها تاركه زوجه ابوها تصارخ وتسب فيها
ام عبدالله تتحلطم: حسبي الله عليك من بنت ... ما فيك خير ابد
الجو تكهرب بين ام عبدالله وعهود وصاروا ما يكلمون بعض .. عهود مستمره على عنادها وما سوت الشئ اللي طلبته زوجه ابوها , وام عبدالله حاقده وزعلانه على حركاتها و وقاحتها معها .
************************************************** *****************
الجو هااادي و النفسيات مرتااااحه والحمدلله ... من بعد طلوع علي من الحجز و قعدته في البيت ما طلع كادته يدور بالشوارع و غيبه ابوهم وبعدهم عن الصراخ و الهواش ..
ام علي: ترا بكره بيمرنا نواف ونروح للشاليه .. ما قصرتك خالتكم الله يعطيها العافيه
ملاك وقلبها دق يوم سمعت اسمه وحست بالفرح خاصا انه بيمرهم
علي: اشوه اننا بنروح على بالي بيسحبون علينا
ام علي: فيهم الخير
ملاك: نواف و مين معه
ام علي: والله ما ادري ...
ملاك وتكلم نفسها : ياااااي وناااسه اخيرا بشوفه من قريب وبقعد معه في نفس المكان الحمدلله يارب ان ابوي سافر ولا ما كان صار هالشئ ... متى يجي بكره والله مشتااااااااااااقه لك يا نواف .
**************************************************
سعود نازل من الدرج بسرعه و حمااس ينادي الشغاله
سعود: ساااااااموو سااامو
سامو: نئم اس فيه
سعود: وين سروالي حق السباحه ...
سامو: ما ادري انتا اخر مره يروح نادي ما في انا يشوفه
سعود: يوم رجعت من النادي علقته وين وديتيه
هند: خير وش عندك تصارخ
سعود: ادور سروالي حق السباحه ضيعته ذي
هند: ما ضاع ولا شئ .. شفته بغرفه الغسيل روح شوفه هناك
سعود: وبعد تقول ما ادري ... يالله بس وخري عن وجههي
هند تتحلطم: الحمدلله والشكر من الوناسه مستخف و مسوي لي فيها .
في مكان ثاني غرفه هديل حوسه و اغراض مرميه بالغرفه ... فوق السرير شنطتها و حولها قرابيع ملابس سباحه ونظارات و زحمه اشياء اللي يشوفها يقول رايحه للغوص .. ومشغله المسجل على اغنيه
لــ b2k
دخلت هند على امها : هاه يمه وش تسوين
ام سلطان: ارتب اوراق المدرسه برمي اللي ما ابيه ... جهزتي لبكره
هند: أي وخلصت .. باقي هديل و سعود حايسين
ام سلطان: ترا بنقعد يومين خذي كل اللي تحتاجينه
مرت بينهم لحظه صمت ثم قالت ام سلطان وكنها تذكرت شئ
_ الا ما قلتي لي عن الناس اللي جوا قبل فتره شرايك بالولد واهله
هند بتردد: والله ما ادري بالضبط .. بس محتاره وخايفه
ام سلطان: انتى استخرتي اول
هند: أي
ام سلطان: خلاص دامك استخرتي انشاءالله بيبان لك ان كان خير ولا لأ ... انا من ناحيتي ما اجبرك على شئ الولد واهله طيبين وناس حلال بحكم قعدتي مع الام
هند: ..... سكووت
ام سلطان: ومحد بيجبرك على شئ انتى ما تبينه بس لا تحطين في بالك انك بترفضين علشان الدراسه ترا كثير ربي وفقهم بالدراسه وهم معرسين مع عيالهم
هند تتنهد : اوكي .. اللي تشوفينه
ام سلطان: ابي رايك انتي مو اللي انا اشوفه..
هند: طيب خلاص
ام سلطان: وشو خلاص يعني موافقه عليه
هند تهز راسها بهدوء "أي"
ام سلطان: الله يوفقك ويكتب لك الخير ... وبرضوا لا تنسين الدعاء و حسن النيه .
************************************************** *******
هذا اليوم الكل فرحاان ومتحمس لثاني يوم وطلعتهم للشاليه الجماعيه ...احمد وعبدالرحمن ما قاموا الا ساعه متاخره من الليل علشان يواصلون للصبح و سعود شاركهم السهر بس في بيته ومتواصلين بالمسن .. ملاك هي بعد من الفرحه و الانتظار لشوفه الحبيب ما جاها النوم وطول الليل تحلم وتفكر فيه ... اما سيف ومهند سهرانين ويسولفون ما خلوا شئ ما تكلموا فيه كل الاحداث اللي صارت لهم بالماضي وهم مو مع بعض من احزان ومن افراح وناسيين الوقت و الدنيا
الجزء (12)
الساعه 8 وصوت منبه الجوال يدق ..سكرته وشوي دق جوالها (كريزي قيرل يتصل بك) ردت وكانت هديل اللي داقه قامت قعدت على السرير تصحصح . كل ذا علشان عهود تقوم من نومها و تستقبل يوم الاحد من اوله ..تذكرت ان المسبح والشاليه ينتظرها وتخيلت لونه الازرق ..فزت من سريرها واتجهت على الحمام" وانتوا بكرامه" ..
*******************************************
احمد يدخل غرفه مشاعل ويصارخ : قومي قومي يا بت الحته الصباح جا و يالله بنروح الشاليه ..قومي يا الدبه
مشاعل بتافف: اووووووووف وش ذا الازعاج ما تعرف تقوم بهدوء
احمد ويفتح ستاير الغرفه : لا ما اعرف يالله فزي بلا كسل
من جهه ثانيه دخل عبدالرحمن على فهد يقومه : فهووووود قوم يالله بنسبح , قام فهد ونط على ظهر اخوه تعلق فيه وطلعوا من الغرفه
********************************************
سعود يطمر الدرجات ومعه المفتاح ..راح يشغل السياره و يحط الاغراض فيها و بكامل نشاطه .. هديل وبعد ما لبست وجهزت خذت كريم واقي الشمس وبتحطه على وجهها الا تدق عليها عهود
هديل: هااااه وش تبين
عهود: اسمعي جيبي كريمك واقي الشمس ..حقي خلص
هديل: استغفر الله العظيم الا تقلدين مع وجهك .. توني بحطه يوهـ
عهود: هههههههههه وش اسوي احبس يا بعد تسبدي
هديل: حبك برص ...
*****************************************
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك