رواية ابيك في دروب المحبة تخاويني -22
سيف: مشاعل ... مشاعل يا شمس مدري ليه احس الناس يشغلونها عني و ياخذونها بكل سهوله و انا هنا مشتاق لها و يحترق قلبي عليها
نزلت شمس اللاب توب من حظنها و التفت عليه حتى تستوعب كلامه وتشوفه هل هو صاحي ولا فيه شئ
قالت: وش هالكلام صاحي انت
سيف: أي صاحي واتكلم من جد .. شوفيها انشغلت بسالفه اخوها و نستني
شمس: سيف طبيعي هذا اخوها و اللي صار له مو سهل اكيد انها بتلهى معه لين يقوم بالسلامه
سيف: طيب تخيلي ترفضني و تشوفني شؤوم عليهم يوم خطبتها صار لاخوها حادث ..
شمس: هيه انت وش قاعد تقول .. أي شؤوم واي خرابيط , اصحى ياخوي و خل عنك الهواجيس و التخيلات الغبيه .. ما توقعت كذا طاير على البنت .. اصبر لين يقوم اخوها بالسلامه ويردون علينا البنت لو من نصيبك حتى لو بعد سنه بتكون لك
سيف: انتي ما تحسين باللي فيني .. يا شمس وحده احبها و اموت فيها و هي ولاهي داريه عني و مشغوله بغيري
شمس: ادري انك تحبها و تغار بس مو لهدرجه هذول اهلها و اخوها .. خير تلومها على اخوها .. اصحى
حس سيف انه بالفعل مو صاحي و افكاره الغريبه بسبب ضيقته و خوفه انها تبعد عنه .. طلع من عند شمس و باله مو معه محتار و خايف و ضايق وكل المشاعر الغريبه فيه .. يحس بأنه ضايع و محد من الناس حوله و حاسيين فيه .. اخته شمس وتلومه على كلامه وافكاره و مهند مشغول بشغله واكيد لو قاله ايضاً بيستنكر منه هالتصرف .. دعى ربه انه يريح باله و يكتب له الخير .
***********************************************
في انشغال الناس بموضوع نواف و تفكيرهم كله منصب عليه .. استغلت هالوقت و خذت راحتها .
رجعت ساره البيت و هي واصله معها وتعبانه حيل .. هذه المره الثالثه اللي تقابل سعيد غصباً عنها ومو برضاها بس علشان ما ينفذ تهديده و ينشر الصور .. محد حاس فيها و منتبه لها و لتغيرها المفاجئه لا تاكل ولا تنام زين .. انقلب وججها اصفر و مو بعيده حياتها كلها تنقلب ان استمرت بهالمشكله وما انقذت نفسها .
***********************************************
في هذه الدنيا و الحياه اللي عايشين فيها تمر علينا ايام تكون حلوهـ و نتمنى انها تطول و تنعاد كم مره بالعمر , و احياناً تمر ايام نتمنى اننا ما انولدنا حتى نعيشها و نذوق الهم و الضيقه ..
***********************************************
محد من العائله توقع ان حادث نواف بيؤدي الى تعب نفسيته وتغييره الكلــي .. حتى الدكاتره في بدايه الامر قالوا اكيد متاثر من الحادث بس بعد ما استمر الوضع و رفضه لزياره اهله استغربوا و اكدووا ان في شئ اكبر من الحادث ..
لا ليلهم ليل ولا نهارهم نهار في بيت ام نواف .. خوف و ضيقه صدر تحل على الجميع لدرجه ضعفهم و الاكل صار قليل , احتارت ام نواف بحاله ولدها و ما عرفت وش السبب و الحل وكانت الجده ام خالد مع بنتها في الحيره و الخوف .. فاقترحت ام سلطان انهم يجيبون شيخ يقرا على نواف يمكن يكون فيه عين لان العين حق و ممكن احد صابه .
**********************************************
في المستشفى و عند غرفه نواف طلع الشيخ مع احمد و وقفوا مع ام نواف و لميس
ام نواف: طمنا يا شيخ
الشيخ: هذه مويه مقري فيها تشربونه كل يوم على اذان المغرب و يغسل وجهه مره في اليوم .
احمد: انشاءالله
الشيخ: وفي البيت افتحوا سوره البقره كل يوم ..
ام نواف: انشاءالله .. يعني باذن الله بيتحسن
الشيخ: باذن الواحد الاحد .. بس بغيت اقولكم الولد معمول له عمل
القلوب الثلاثه , قلب ام نواف و لميس و احمد .. انهارت و شئ اكبر من الصدمه حل عليهم .. نسوا العالم اللي حولهم و ازعاج المستشفى كل تركيزهم على كلام الشيخ
الشيخ: و العمل من الاهل .. مثل ما تعرفون احيانا الاقارب عقارب , فخذوا حذركم من اللي حولكم و الله يسهل عليه و يقوم بالسلامه ... في امان الله
تبعه احمد لباب المستشفى حتى يوصله بينما ام نواف و لميس تجمد كل شئ فيهم حتى الدموع ضيعت طريقها في النزول و الحروف تاهت وما نطقوا بحرف .. وكأن الثنتين مسيرات لا مخيرات دخلوا لاستراحه النساء و قعدوا على اقرب كرسيين
قالت ام نواف بصوت خفيف: معقوله اللي قاله الشيخ .. نواف مسحور
ردت لميس بنفس درجه الصوت الخفيف: يعني زوجي كان مسحور .. خالتي نواف كان مسحور
ونزلت دمعه منها وتلتها دموع ام نواف ... ودخلوا في نوبه من البكى بصمت .. هاللي كان فيه نواف من عصبيه و غرابه كله من اثر السحر .. هواشه للميس و بروده معها واحيانا مع اهله سببه انه كان مسحور .. يالله من يصدق ومن يتوقع ان احد ومن الاهل يعني قريب يسحره و ليش طيب هل كره فيه ولا حقد . الله يكون بعونه و بعون اهله و زوجته .
في مكان اشبه بالصحراء
مربوط من رقبته بسلسله و ملاك تسحبه بقوه و ملامحها شريره و تضحك وهو على ركبه يمشي شوي وشوي يطيح .. الين ما شاف قدامه قفص كبير فتحت الباب ورمته داخله وهي تضحك .. يوم التفت حوله شاف لميس و الدم على وجهها و شكلها تعبان
صرخت: نواف ..نواف
باليالله قام على رجوله حتى يقرب منها .. فجأءه مر من قدامه غراب اسود وكبير يطير بينه وبين لميس و يمنع وصوله لها .. وهي مناك تصرخ تنادي اسمه ومن وراه صوت ملاك وهي تضحك .. خوف و ضياع يعيش فيه .
فز من نومه بسرعه و التفت حوله لقى نفسه بغرفه المستشفى و صوت الجهاز اللي جمبه و بيده مغروزه ابره المغذي .. اجل وش ذا اللي كان فيه كابوس ولا حلم مخيف .. وش جاب ملاك فيه وليش تسحبه للقفص و تضحك ..لميس ليش ما يقدر يوصل لها و بينهم غراب يمنع الوصول .. كل ذي اسئله تدور في باله من كم يوم وهو يحلم احلام غريبه تحوي لميس وملاك و هو بحاله خوف .
دخل عليه احمد وهو يحاول يبتسم حتى يخفف على اخوه
احمد: السلام عليكم
نواف: وعليكم السلام
احمد: شلونك اليوم ... وجهك منور انشاءالله احسن
نواف: الحمدلله بخير
حمد ربه احمد ان نواف ما عصب و صرخ عليه كالعاده بل استقبله و سلم عليه وهذه حالته من يومين متغير عن اول , كان الوقت على اذان المغرب فصب له المويه في كاس و عطاه يشرب
نواف: مو عطشان .. خليها بعدين
احمد: ما عليه .. المويه زينه ما تضر
وشرب منها بدون ما يقاوم اكثر و هاليوم بالذات كان اهدى عن قبل حتى سأل عن امه ليش ما جت
احمد: بالطريق بس انا سبقتهم حتى اسولف معك اعرف اذا جو ياخذون الجو كله
ابتسم نواف ببرود و بابتسامته انفجرت اسارير احمد و حمد ربه مليون مره في نفسه على تحسن حالته .
***********************************************
ما انتشر خبر السحر في العائله فقط اللي درى به ام نواف وابو نواف و احمد و مشاعل و لميس وامها و الجده وام سلطان و سلطان .. حتى ما يكثر الكلام و القيل و القال ..
طبعاً الكل خاف و استغرب من الخــبر .. شلون سحر ومن العائله لهدرجه في انســان يضر قريبه و يتمنى له الشر .
***********************************************
على التلفون عهود و مشاعل
عهود: الحمدلله على سلامه نواف .. سمعت جدتي تقول انه تحسن
مشاعل: الله يسلمك
عهود: الله يعينكم ويعين لميس و الله مسكينه اكيد طار قلبها على زوجها
مشاعل: الله يعين الجميع
كان اسلوب مشاعل متغيير مررره من بعد ما درت عن السحر , ضاق صدرها و انصدمت ان العمل يكون من اهلها .
عهود: وشفيك يالله تتكلمين .. كأن احد غاصبك
مشاعل: وش تبيني اسوي اضحك و اصرخ
عهود: لا
مشاعل: اجل خلاص .. لو اخوك اللي صاير له كذا تعرفين ليش صوتي كذا
حست عهود بعصبيه مشاعل و تغييرها فما طولت معها و سكرت التلفون
" ياربي على هالناس كنهم اول ناس ولدهم يسوي حادث كل العالم قاموا وقعدوا علشانه .. لو انا ولا واحد من اخواني اللي صار له اتحدى يفزون مثل الحين و الله كل واحد بيكبر مخدته وينام .. اااهـ بس لنا الله "
************************************************
في غرفه نواف كان فيه امه و جدته و احمد ومشاعل يزورونه .. شوي الا دخلت لميس مع امها سلموا على الجالسين و طلع احمد حتى ياخذون راحتهم
قربت لميس من سرير نواف حتى تسلم عليه .. وقفت عند راسه و قالت
_ الف الحمدلله على سلامتك ما تشوف شر
نواف: الله يسلمك
لمح بعيونها نظرت حزن و دمعه حايره تحاول لميس تتماسك و ما تنزل دموعها قدامه
لميس: شلونك اليوم انشاءالله احسن
نواف: بخير الله يسلمك .. انتي كيفك
لميس: بخير
بعدت عنه بسرعه قبل لا تطيح دمعتها و خذت منديل ومسحت عيونها قبل لا يشوفونها الكل و راحت قعدت جمب مشاعل تسولف و تبعد عنها الحزن .
بينما نواف من شاف لميس وحس ان قلبه زادت ضرباته و شاف شئ في لميس كان عمي عنه وما يشوفه .. حس بدفئ صوتها وهي تسلم عليه و بخوفها عليه و حنانها من الدمعه اللي في عيونها .. يا ان هالبنت عانت معاه و صبرت عليه وعلى تصرفاته على انها كانت مستاءه منه و تلومه بس يوم عرفت السبب ندمت على كل كلمه قالتها عنه عند امها و ردت عنها فكره الانفصال و دعت ربها انشاءالله يتحسن ويكون افضل من اول .
ام لميس: الله يقومه بالسلامه ويطلع انشاءالله سالم و يبعد عنه الشر
الكل: امــين
ام خالد: هالدنيا ما فيها خير .. اعوذ بالله في وسط محنا عايشين تطري علينا اشياء الله يستر منها بس محد يتوقعها .
عند لميس و مشاعل ..
مشاعل: اخبارك اليوم
لميس: الحمدلله بخير دام نواف بخير و ما يشكي شئ
مشاعل: بلوهـ و طحنا فيها اعوذ بالله
لميس: وانتي الصادقه .. حسبي الله ونعم الوكيل على اللي كان السبب
تحرك نواف من مكانه شوي و كأنه يبي شئ .. فز له امه ولميس بوقت واحد و قربوا منه يشوفون وش يبي ..
نواف: وين احمد ؟
ام نواف: برا تبيني اناديه
لميس: تبي شئ اسوي لك اياه
نواف: لا.. خلوا احمد يسأل الدكتور متى بطلع من المستشفى
ام نواف: اخاف تتعب برا خلك هنا تحت ملاحظتهم احسن و هم يقررون متى تطلع
نواف: لا يمه ماله داعي خلاص انا بخير و اقدر اطلع
لميس: متاكد .. يعني ما تحس بالم في راسك
نواف: مو مره الالم ... تكفون ابي اطلع تعبت من القعده
ام نواف: خلاص بشوف احمد و اقوله
التفت على مشاعل تقولها تطلع تكلم احمد و تقوله عن طلب نواف
لميس: نواف تبي شئ .. مويه او شئ تاكله
نواف: لا مشكورهـ
" يالله يارب انك تقوم نواف بالسلامه و تحسن حاله .. و الله تعبت و ضاقت بي الدنيا .. يارب طلبتك يسر اموري و حياتي و وفقني مع زوجي " << هذا اللي كان يدور ببال لميس و هي تلمح نواف راقد على السرير بوجه الاصفر و الضعيف بعد الحادث و نفسيته اللي كانت تعبانه.
**********************************************
بعيد عنهم كانت ساره تكلم سعيد و هي تترجاه و لو يطلب تحب رجوله بس يتركها بحالها
ساره: صدقني بكره ما اقدر عندي طلعه بزور ولد اختي بالمستشفى
سعيد:وانتي كل يوم طالعه لي بعذر
ساره: هذا الصدق ولــ ...
سعيد: خلاص اجل بكيفك روحي انتي بكره و زوري ولد اختك و انا بطلع للقهوه و ارسل الصور ما عندي أي مشكله
عصبت منه ساره و قالت: انت ما تفهم اقولك ما اقدر خله يوم ثاني .. ترا ما صارت كل ما طرى على بالك شئ قمت و قلت لي و لازم علي انفذه
سعيد: هيييه انتي و ش قاعده تقولين انا الحين صرت ما افهم .. طيب يا ساره اعلمك مين اللي ما يفهم
ساره: ما قــ ....
سكر التلفون بوجهها , ولا سمع كلامها خافت لا يكون بينفذ تهديده و بكره ينشر الصور .. احتارت بين امرين اما تطلع تزور ولد اختها و لا تطلع معه حفاظاً على صورها .. تعبت مرره و شايله هم كبير كيف تنهي هالمشكله الكبيرهـ .
************************************************** ******
في احد المطاعم دخل ابو نواف يطلب له عشاء خفيف ياكله قبل ما ينام .. وهو عند الكاشير يسوي الطلب .. سمع بشخص جمبه ينادي اسمه و هالصوت مو غريب عليه مرهـ .. التفت و لقى المفاجئه اللي ما توقعها
رد ابو نواف يرحب ببرود : هلا ابو عبدالله .. هلابك
مد ابو عبدالله يده يسلم و خاف لا يرده ابو نواف , لاكن اخلاقه ما تسمح له و مد يده الثاني وتصافحوا
ابو عبدالله: كيف الحال
ابو نواف: بخير و الحمدلله .. علومك انت
ابو عبدالله : ماشي حالنا
رجع ابو نواف يحاسب على طلبه و ينتظر لين يخلص
ابو عبدالله: ماشاءالله من متى وانت هنا
ابو نواف: لي تقريبا يومين .. جيت اشوف العيال تعرف بعد حادث نواف و خطبت مشاعل
ابو عبدالله مستغرب شوي : خطبت مشاعل !! ماشاءالله من متى هالكلام
ابو نواف: من فتره قبل حادث نواف .. ليه ما دريت
ابو عبدالله: لا والله
ابو نواف: أي يمكنك مشغول ولاهي ... الحمدلله البنت انخطبت من ولد حلال و ناس
ابو عبدالله: على البركه , الله يوفقها
ابونواف: الله يبارك فيك
ابو عبدالله وده يقعد مع طليق اخته و يتكلم معه شوي و هو متاكد انه ما بيرده بعد ما سلم عليه ودار بينهم حوار بسيط
ابو عبدالله: تجي نجلس شوي على ما يجي الطلب
ابو نواف: ولا يــ ...
ولاكن الطلب كان اسرع وصل لابو نواف
ابتسم على خفيف و قال: وهذا الطلب وصل
ابو عبدالله : ما يخالف اعطيك رقمي و نتقابل قريب
استغرب ابو نواف مرره من حركته , وهو اللي اول ما يطيق يشوفه و يسمع عنه شئ .. بس صحيح اللي قال الناس تتغير من طيبه لشر ومن شر لطيبه .. اخذ رقمه و سلم عليه و ودعه .
*************************************************
على حد الزمن واقف..واشاهد عبرة الأيام...
وشمس العمر تغرق..في بحرها لين يخفيها..
وشوف الليل يكبر...والنهار يذوب في ظلام..
حزينه لحظة المغرب!..وداع النور يطفيها...
وأشوف الموج يرقص..والدموع من السحاب رزام..
عجيبه رقصة الموج..؟!ودمع الغيم يبكيها..
واشاهد غربة الموجه..لقت عقب السفر مقام...
على رمل السهل تالي زبدها ما يوعيها...
سرى بي هاجس الذكرى.!على متن الخيال وهام
يرد الذهن لايام تعدتني لياليها.
..أضم الطيف بعيوني واعانق ساري الأنسام،،،
واردد نغمة الماضي على قلبي وأغنيها...
ألا ياليل..!؟ الغريب إلي سهر ما نام..!
تذكر له؟! على بعد المسافه عين يغليها..!!
أمانه يا قمر،،،
يا ساري بالليل خذ سلامي...
وصبه شوق!! في عين الذي عيني...معنيها؟!،
حنين الولف ياهل الولف يجلب للقلوب..هيام!!
ومن يجرج قلوب الحبايب لا بد يداويها....!
أغني للقلوب إلي عزاها بالحياة أحلام وارد الشان لأهل الشان باولها وتاليها
**********************************************
بعد اسبوعين من الالــم و المعاناهـ و الخوف .. ارتاح الجميع و رجعت البسمه و السعاده لــحياتهم .. ولله الحمد طلع نواف من المستشفى بخير فقط يصحب الجبس اللي بيده و شويه الم في راسه , كان قلق من لميس ان بقلبها يكون فيه شئ عليه من افعاله في السابق و تصرفاته معها لاكنها كانت العكس .. كانت قريبه منه وما يطلب شئ الا و تنفذه له و تخاف عليه اكثر من نفسها
اذن المغرب و قام نواف بيتوضا علشان يصلي .. فمسكته لميس تسنده حتى ما يدوخ
نواف: مشكورهـ تعبت معاي
لميس: لا تقول كذا .. تعبك راحه
بعد ما وقف زين التفت عليها يبتسم وقال: لميس انا اسف على اللي صار من قبل مالي وجهه اقابلك فيه , صدقيني متفشل بمعاملتي معك و تصرفاتي الغريبه وانتي مالك أي ذنب
لميس: مسموح يا نواف و عاذرتك اللي صار لك شئ مو سهل
نواف: اكيد مسامحتني
لميس: اكيد .. نواف اللي كنت فيه مو بيدك ولا بهواك وافعالك غصباً عنك .. صدقني عاذرتك
نواف: يســلم قلبك الطيب و يخليك لي
كل ما تذكرت تصرفاته معها في السابق و تعامله تحاول انها تمحي هالذكريات و لا تفكر فيها .. بين لها الحين انه طيب و قلبه حنون و اللي كان فيه من قبل من اثر السحر مو من اخلاقه .
**************************************************
بسعاده اكثر من نواف و لميس كان عايشها سيف بعد ما وافقت مشاعل عليه طار من الفرحه و الضحكه شاقه وجهه من اليسار لليمين.
مهند: ههههههههههه اخاف تشوف نفسك علينا ياخي
سيف: احم .. يمكن ترا مو اكيد تعرف انت لما الواحد يقرب من حبيبه خلاص ينسي الدنيا
مهند: افااااا هذه نهايتها يعني
سيف: تقدر تقول
حز بخاطر مهند شوي على صديق عمره و حس انه ممكن ينساهـ و يلهي بنفسه و زواجه القادم .. انتبه سيف لهدوء مهند و سكون ملامحه فـ عرف انه خذا على خاطره منه
سيف: من جدك بو هنود تزعل ترا والله امزح معك انت اخوي ومهما صار بالدنيا ما ابعد عنك وانساه
مهند: لا ما زعلت .. ولا يهمك اهم شئ راحتك وسعادتك
سيف: وانا سعادتي من سعادتك .. الا تعال شرايك انت بعد تخطب و نتزوج بيوم واحد
مهند: البركه فيك دور لي وحده زينه وانا مستعد
سيف: تدري مره فكرت انك تكون لاختي شمس بس هونت على الفكره لان كل واحد منكم اجن من الثاني و اذا اجتمعتوا الله يعين
مهند: ههههههههه و انت صادق اختك اتنافس معها ترا بالشطانه .. لا حبيبي انا ابي وحده هاديه و دلوعه
سيف: اووخص يا ابو دلوعه ههههههههههههههه
مهند: ههههههههههههههههه خلاص عاد لا تمسكها علينا
سيف: دلوعه .. دلوعه .. دلوعه
مهند: قسم بالله خساره اللي يقولك شئ .. خلاااااااااااااص
سيف: هههههههههههههههههههههاااااي
***********************************************
ام نواف: افكر بكره اسوي عشا بمناسبه طلعت نواف و سلامته
مشاعل: لا يمه الله يسلمك لا
ام نواف: ليش وشفيك رافضه وبقوه بعد
مشاعل: نسيتي يمه اللي صار لنا .. قالك الشيخ اللي سوا العمل من الاهل و بعد تبين تعزمينهم في البيت
ام نواف: وش هالكلام اللي تقولينه يعني اهلك ما ندخلهم البيت علشان هالسبب .. افرضي كانوا الاهل من طرف ابوك .. هاه
مشاعل: اهل ابوي مالهم دخل فينا ومن زمان عنهم
قاطعتها ام نواف و قالت بعصبيه: مشاعل... لا اسمع هالكلام منك مره ثانيه اهلك على العين و الراس و بيظلون اهل لو وش صار فهمتي
مشاعل: خلاص اللي تشوفينه
قامت مشاعل و تركت امها .. كانت متضايقه ومعصبه من بعد ما درت ان السحر من اهلها و ودها تعرف من الشخص اللي مسوي لاخوها كان والله ما تخليه ..
طلعت لغرفه احمد و لقته منسدح على سريره مدري وش يفكر فيه
مشاعل: نايم ؟!
احمد: لا بغيتي شئ
مشاعل: أي ... ما قالك الشيخ من الشخص الي مسوي العمل لنواف
احمد: سالته وما رضى يقولي , حتى جدتي ما ودها نعرف تقول حتى ما تصير مشاكل
مشاعل: تدري لو اعرف من اللي سوا السحر .. لا اخليه يندم على فعلته طول عمرهـ
احمد: يكفي عقاب ربك .. بيشوف بدنيته قبل اخرته
مشاعل: والله صعبه اهلك اللي حولك وسندك بالدنيا يطعنون من وراك .. صعبه
احمد: ااااااااهـ بس مالنا الا الدعاء على اللي كان السبب .. حسبي الله ونعم الوكيل .. اهم شئ قام نواف بالسلامه ورجع لبيته و حياته
مشاعل: وانت صادق الحمدلله
قام احمد و حب يغير السالفه
_ الا تعالي يا الشينه .. يعني كبرتي و انخطبتي هاه
استحت مشاعل من اخوها وما توقعت يفتح معها هالموضوع .. علطول نزلت راسها
احمد: حركتات والله وبعد تستحين ..هههههههههههههههه
مشاعل: يالله مناك بس ... يا ثقل دمك
احمد: هههههههههههههههههههههه يا حليلك , بس ترا الولد ما عليه كلام صح اني مره تصادمت وياه و تهاوشنا بس انه ولد حلال .. الله يوفقك وياهـ
مشاعل: وعقبالك
احمد: لاااا انا باقي لي مشوار , اخلص دراسه و اتوظف بعدين افكر بالزواج و ابيها على ذوقك
مشاعل: ابشر .. دامك تؤامي فاوعدك بذيك البنت اللي تطير قلبك
احمد: لا عاد قلبي ابيه لا تطيرهـ ومعد يرجع
مشاعل+ احمد: هههههههههههههههههههههههههااااي
************************************************** *********
بعد ما رفضت ساره طلب سعيد و طلعتها معه .. ما سمعت صوته ولا دق عليها ابد .. خافت لا يكون نشر الصور و فضحها ..
ذيك الليله ما مرت دقيقه الا وتحاول تتصل فيه لاكن محد يرد , استمرت حوالي ساعتين وهي كل شوي تعيد الاتصال عليه و نفس الاجابه يرن و يقطع ما يرد عليها .. تاكدت انه مسوي شئ و بيفاجئها به .. تمنت انها ما انولدت ولا جت على الدنيا حتى يصير لها هالشئ .. مو يكفي نظرت الناس لها عانس و محد يطالع فيها ويوم تقدم لها واحد و ملكت عليه تطلقت فتاكد للناس ان فيها بلى , و الحين بتصير علك بحلقهم و تنتشر صورها بين العالم .. انخربت حياتها و كل شئ حولها صار مرعب و يخوف ...
وهي بهالحاله من الرعب و القلق تذكرت زوجه اخوها جواهر ام عبدالله , كيف هالمسكينه تطلقت و بعدت عن عيالها و صارت تعاني بهالدنيا و كله ظلم ومن ورا راس ساره و افكارها .. سوت هالفعله حتى تبعد عنها الشكوك وما تنفضح مع حمد لاكن الله اقوى منها و هذه هي بتنفضح مع سعيد و حياتها بتنتهي .
تمنت الزمن يرجع لورا و ما تورط ام عبدالله ولا تتورط هي مثل الحين .. بس الندم و كلمه ياليت ما تنفع ..
************************************************** **
في بيت ام سلطان ..
كان سلطان يكلم بالجوال وبصوت شوي واطي :
_ لا انشاءالله بكلم اهلــي بس تعرفين مرينا بظروف صعبه شوي .. بس تهدى الامور بفتح الموضوع معهم ... أي ولا يهمك , انتي اخبارك كيف الاهل ...
ارتبك يوم دخلت عليه هند فـ صرف الموضوع
_ اوكي حبيبي اخليك الحين , يالله مع السلامه
هند: وش عندك تهذر بالجوال مو من عوايدك
سلطان: واحد من الشباب من زمان عنه و قعدت اسولف معه
هند: اها .. طيب بغيت اقولك تركي بيمر بعد شوي يقول بيسلم علي قبل ما نروح
سلطان: وين تروحون ... تو الاجازه ما خلصت
هند: لا بنروح لـماليزيا كم يوم و نرجع
سلطان: اهاااا يعني شهر عسل ثاني هههههههه
هند: هههههههههه تقدر تقول , اقل من شهر عسل
سلطان: الله يسهل عليكم , تروحون و ترجعون بالسلامه .. اجل الحين نازل بس ابدل ملابسي
هند: الله يسلمك ... يالله اخليك .
•يا ترى مين كان يكلم سلطان .. وكأن الشخص بنت !! .. بنعرف في الاجزاء القادمه
************************************************
بسرعه ما توقعوها تم تحديد ملكه العاشق سيف و حبيبته مشاعل و الزواج في نهايه شهر شعبان قبل الدراسه ما تبدا و قبل رمضان و بهالوقت راح يكون نواف تحسن اكثر و صار جسمه اقوى شوي .. بفضل الله يسر لهم الامور و وفقهم .
************************************************** ***
على طاوله المقهى .. ابو عبدالله و ابو نواف و قدامهم اكواب القهوه .. ابو نواف بهدوء يستمع لخال عياله و هو ملاحظ تغييره و ضعفه امامه
ابو عبدالله: والله يا خوي ما تدري شلون عانيت بهالدنيا بعد طلاق ام العيال .. حسيت اني ضعت و ما اقدر اوفق بحياتي و حياه العيال .. ما توقعت الامر بهالصعوبه .
ابو نواف: هذا وانت رجال .. اجل شلون الحرمه الضعيفه اللي تركض بالدنيا حتى تلحق تربي و ترضي عيالها
ابو عبدالله: وانت صادق ... ما ادري وش اقولك شايف شلون الدنيا وشايف شلون كنت معاملتي معك مو زينه ولا كأنك نسيبي .. حتى سلام ونظره ما اناظرك .. كان قلبي قاسي و ظالم .. وهذا جزاتي نفس ما سويت صار لي و تبهذلت بالدنيا .. و الله اني نادم يا ابو نواف نادم من كل قلبي
ابو نواف: ربك كريم .. دامك ندمت و تبت انشاءالله بيسامحك و يصفح عنك , هذه الدنيا يوم لك و يوم عليك .. الله يستر علينا و يبارك لنا باللي بقى من اعمارنا
ابو عبدالله: اللهم امين .
********************************************
مو عيب لما الواحد يعترف بغلطه و يبين ندمه و حسرته على الغلط اللي كان فيه .. كلنا نغلط ونطيح بس الشاطر فينا اللي يتعلم من غلطه و يكمل حياته و هو يتفادى الغلط ..
معظمنا ولا يفكر بالاعتراف مثل ابو عبدالله و يشوف ان هالشئ فشله او ينقص من قدره لو قال للناس اني غلطت و ندمت , ما يدري انه ممكن يكبر بعين الناس حتى لو ما بينوا له هالشئ و ان ممكن غيره يستفيد من غلطه و يفيدهـ ...
الجزء(29)
بعد منتصف الليل و الناس نايمه الا هي تصلي فوق سجادتها و تدعي ربها ان يغفر لها و يرحمها و يستر عليها .. لها عده ايام ما تنام و هي على هالحاله صلاه و دعاء في الليل .. سعيد للحين ما يرد ولا في أي خبر عنه اكيد انه نشر الصور ولا سوا شئ ثانــي يفضحها ...
وجهه ساره احمر و كله دموع و رافعه يدينها تدعي ربها و تطلب منه الستر و المغفره .. بهالوقت محد بيحس فيها و يدري باللي في قلبها الا هو خالقها , محد بيطلعها من مشكلتها و يرحمها الا هو الرحمن الرحيم ..
توها تصحى و تتذكر ان فوقها رب عظيم ما يغفى عن عباده و هو الرحمن يقبل التوبه و يغفر الذنوب, بصلواتها و خشوعها هدت نفسها شوي و قدرت على الاقل تنام بشويه راحه و هدوء انحرمت منهم عده ايام .
*******************************
نواف & لمــيس ...
تغيرت حياتــهم مليون درجه ... وين كانوا و وين صــاروا كله بفضل الله
لميس: نواف لا تفتح الفرن ترا تخرب الكيكه
نواف: والله ... طيب متى تخلص تراني مشتهيها ريحتها حلوهـ
لميس: دقايق بس
نواف: تلعبين علي من زمان وانتي تقولين دقايق
لميس: ياربي منك ... خلاص جهز الصحون و الشوك و تكون جاهزه
نواف: امرنا لله نسمع كلام الشيف
نادى نواف لميس اللي كانت معطيته ضهرها
نواف: لمو .. قلبي شوفيني
التفت لميس له و فجاءه جاها رذاذ مويه على وجهها و شهقت من برودته,, مات نواف ضحك على شكلها
لميس: ااااااااااااااهـ منك .. والله لا اوريك
ركضت بسرعه للمغسله و عبت يدها بالمويه حتى ترشه
نواف: لا ..لا حرام عليك مو لهدرجه عاد انا رشيت شوي .. لمو اعقلي
لميس: ولا تدري هونت ما ابي ارشك .. اصبر علي بشئ اكبر
نواف: وش بتسوين
لميس: دقيقه
كبت المويه من يدها وراحت للفريزر و خذت قطعه ثلج مكعبه
لميس: تعال تعال حبيبي عندي لك هديه
نواف بحذر و هو يبتعد عنها : وش عندك ..لموو حرام عليك انا حبيبك
لميس: أي عشان كذا عندي لك هديه
بسرعه قربت منه و حطت داخله الثلجه و هو يصرخ من برودتها
نواف: اااااي حرام عليك و الله بااااااااردهـ
لميس: هههههههههه ... شرايك حلوه الهديه صح
نواف: أي أي .. بارد بارد .. أي ما اقدر اشيلها
لميس: خلك تستااااهل .. بشوف كيكتي لا تنحرق
قدر يطلع الثلجه بعد ما ساحت نصها و بللت تي شيرته .. و لميس مناك تضحك عليه وهي تزين الكيكه قبل لا ياكلونها .
صارت حياتهم حلوهـ و لا كأنهم نواف و لميس اللي من قبل عايشين في برود قاتل و احيانا هواش و صراخ .. كل ما صلت لميس حمدت ربها مليون مرهـ على فضله و تغيير نواف .. وهو ايضاً يحمد ربه ان الله سلمه و شاف النور بحياته وزال الهم و الضيقه اللي كانوا بقلبه ... لاكن صار بقلبه الم على بنت خالته ملاك بعد احلامه المزعجه اللي كان يشوفها راح و طلب تفسيرها عند اكبر الشيوخ المختصين بتفسير الاحلام و بين له انها هي اللي سوت له العمل..ما خبر احد بهالنتيجه و ظل ساكت محتفظ فيها حتى ما تصير مشاكل بين الاهل .
****************************************
يوم الخميس...في بيت الجدهـ
درى الكل بخطبه مشاعل و باركوا لها , و فرحوا لها من قلب
هديل: يا الخاينه بتتزوجين قبلي هاه
مشاعل: شفتي شلون .. عقبالكم
عهود: سمعت انه اخو شمس .. جد
مشاعل: أي جد
عهود تغمز لها : لا يكون كان بينكم حب ولا شئ ... اعترفي
مشاعل: ما ادري ... نصيبنا جاء كذا
هند: ما عليك منها ... الله يوفقكم و يسهل عليكم ... حركات بتصيرين حرمه مثلي
الكل: ههههههههههههههههههه
استحت مشاعل من كلامهم : خلاااص عاد يا شينكم
بينهم كانت لميس تسولف و تاخذ وتعطي لاكن بحذر .. من عرفت ان اللي سوا العمل لزوجها من اهله صارت تخاف منهم وتحذر كثير مثل ما وصتها امها ..و كان باين عليها الرضى و الراحه .
بعكس ملاك اللي زادت ضيقتها بدون ما تعرف وش السبب .. للان ما درت عن نواف و العمل انفك عنه و صارت اكثر حيره و ضياع بحياتها .
لاحظوا البنات ضيقه ملاك و تغيير خالتهم ساره و ضعفها
سالت هديل: عهود وشفيها ملاك و جهها معبس
عهود: ما تعرفينها مزاجها اكيد مو رايق
مشاعل: للان وهي ما تسولف معك
عهود: يعني اوقات مو كثيرهـ
هديل: يا ويلي ما تطفشين في هالبيت ملاك و مغروره وخالتي ساره و غريبه من تقعدين معه
عهود: الله يخلي جدتي لي ... صديقتي و اختي و كل دنيتي
الكل: هههههههههههههههه
هند: يا حبي لها ... الله يطول بعمرها
الكل: امين
مشاعل: طيب خالتي ساره كأنها مريضه او فيها شئ
عهود: تلاقينها مكروفه من الدوام ولا حبيب الغفله زعلان عليها
استغرب الكل من كلامها .. وش حبيب الغفله بعد
هند: أي حبيب وش تقولين انتي
هديل: من جد حبيبها زعلان
عهود: مدري عنها , مو انتي هند تقولين مره سمعتيها تكلم واحد
هند: أي من زمان
عهود: طيب انا قبل فتره سمعتها .. حتى كانت تكلمه وما تدري اني وراها
مشاعل: يوء .. وشافتك
عهود: أي شافتني و درت اني سمعتها .. و عصبت وقامت تهزئ .. الحمدلله والشكر فاتحه باب الغرفه وتكلمه ام الثقه الزايده
هديل: والله قويه .. الحين من جدك هو زعلان
عهود: اقولك مدري يمكن .
هند: هيه انتوا لا يكون فضحتوها و قلتوا لاحد عن اللي سمعته
هديل: اصلا نسيت السالفه
مشاعل: و انا بعد ما جا على بالي ابد .. قلت يمكن يتهيأ لك مو اكيد
عهود: انا اول ما صدقتك بس يوم سمعت باذني صدقت ... بعدين من بقوله ابوي اللي بيعطيني كف وقتها ولا جدتي اللي بتمسك قلبها و تطيح علينا .
انظمت لهم لميس و غيروا سوالفهم للموضه و المكياج يتخللها ضحك و سعه صدر .
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك