رواية ابيك في دروب المحبة تخاويني -21
هند: ممممممممم يعني .. طبعا مو مثل هنا بس حليوهـ و في ناس حولي نفسي تقريباً توهم متزوجات و شغل ازواجهم خلتهم يعيشون هناك .. يعني كل شئ تمام
هديل: و الله وحشتييييني.. احس اني مسكينه في هالبيت الكل علي محد يفزع معي
هند: هههههههههه .. هذا اللي همك الفزعات , بس ولا عليك دامي في هالايام باخذ لك حقهم ونص
انظم لهم سعود بالسوالف و الكلام و كان اغلب اوقاتهم يقعدون مع بعض لان لهم فتره طويله بعاد و الحين مجتمعين .
************************************************
في بيت اهل لميس ...
ام لميس: هاه يمه وش اخبار زوجك انشاءالله بخير
لميس: ماشين و الحمدلله
ام لميس: وش جديدكم انشاءالله تغيير و صار احسن
لميس: كلنا تمام يمه .. نفسنا ما تغير شئ
ام لميس: طيب ما عرفتي وش فيه بالضبط وش يبي ... يمكن الرجال محتاج شئ ولد مثلاً يغيير عليه حياته
تغيرت ملامح لميس و قلب وجهها اصفر وقالت
_ يمه من جدك انتي وش هالكلام كأنك ما تعرفين اولاً تونا ما كملنا سنه من زواجنا و ثانياً شلون بحمل و اجيب له ولد وهو حتى ما قرب مني ... الله يهديك بس
شهقت ام لميس وما توقعت اللي سمعته من بنتها
_ لا عاااد من جد هالاكلام .. قلتي لي بدايه زواجكم و على بالي تغييرت اموركم .. معقوله يا لميس
تجمعت الدموع بعيون لميس و حست بالفشله و القهر قدام امها و ردت بصوت اشبه بالمسموع
_ أي اللي سمعتيه مني صحيح .. وانا ما بقعد معه هالرجال المجنون المريض نفسياً .. بتطلق منه خلاص
ام لميس: حسبي الله و نعم الوكيل .. عين وما صلت على النبي ولا هذه سوات يسويها ..
لميس: نواف هاللي تشوفونه رجال طلع ولا شئ بس ما عنده الا الصمت ولا العصبيه و الهواش .. مليت منه ومن الحياه كلها كرهني عيشتي
ام لميس: لا لا .. كذا ما ينفع لحد هنا وخلاص انا بكلم امه اخليها تتفاهم معه .. من هو علشان يلعب بحسبه بنتي
لميس: لا تكلمين امه ولا شئ .. ان ما تغير و الله العظيم ما اقعد معه ولا دقيقه .. و يصير اللي يصير يقولون عني مطلقه وشو يعني حرام
ام لميس: وش الفايده لو تطلقتي بتطيح السالفه كلها عليك والناس وش بتقول اكيد بيقولون فيك عيب و لا هو ولا عليه بيلقى الف وحده ياخذها .
لميس: ما علي من الناس يقولون اللي يقولونه .. الزم ما علي راحتى ان ما تعدل ما لي قعده معه
استغفرت ام لميس و تمتمت بكلمات تهدي فيها بنتها و تواسيها و هي حاطه في بالها انها بتفتح الموضوع مع ام نواف و توقف هالمهزله اللي تصير بس بدون علم لميس .
***********************************************
دخلت ملاك على امها و هي تتافف و واضح عليها الملل و الطفش
ام علي: وش فيك طفشانه و ضايقه بك الدنيا
ملاك: مليت .. ابوي للحين مالقى بيت .. ترا وصلت معي و الله
ام علي: لا للحين مالقى .. وكلنا وصلت معنا بس وش نسوي مالنا الا الصبر
ملاك: الكل يناظرنا بنظرات الشفقه و الشماته على حالنا .. شئ يقهر
ام علي: لا مو لهدرجه يا ملاك هذول اهلنا وما اظن بيناظرونا بهالنظرات اللي تتوهمينها .. وانتي ما عليك من احد و الله محنا عايشيين على راس احد فيهم .... الا مين تقصدين بالضبط !!
ملاك: في غيرها خالتي ساره .. هي و نظراتها و كلماتها اللي كل يوم تسمعنا منها
ام علي: ما عليك منها .. ولا كأنك سمعتي , بكره انشاءالله بيلقى ابوك بيت ننقل له و نريحها
ملاك: متى بكره .. من زمان وحنا نصبر نفسنا بهالكلمه بكره و بكره و جا بكره و لا تحركنا شبر
ام علي: احمدي ربك على النعمه وان جدتك الله يعافيها ضفتنا ولا كان حنا بالشارع
ملاك: الحمدلله .
بعد طلوع ام علي و عيالها من البيت و سكنهم في بيت الجده وتغير حالتهم .. ضاقت الدنيا بعيون ملاك وحست ان العالم حولها اسود ومعد في شئ يريحها .. مرات تفكر بنواف و تندم على اللي سوته له و مرات تنقهر منه ومن لميس و تتمنى لهم الشر و كل فتره ودها تعرف عن احوالهم و تهمها اخبارهم حتى لو بسيطه , يعني بعد ما كانت شامخه والعالم حولها صديقتها حنان و غيرها .. صارت الحين ولا شئ وحيده بالدنيا و في حاله ضيقه وطفش دائم كل هذا جزاء لها و لافعالها و تكبرها اللي اعماها .
************************************************** **
في بيت ام سلطان .. هذه كانت حاله سعود , قاعد يلعب بلاي ستيشن و الجوال فوق السرير و داخل جو مع اللعب الا سمع صوت مسج .. وقف اللعبه وراح يشوفه و اول ما فتح لقى مكتوب التالي:
نباركـ للطالب سعود محمد لقبوله في جامعه الملك فيصل , يرجى اكمال عمليه التسجيل باحضار باقي الاوراق لتحديد موعد المقابله الشخصيه
المرسل: جامعه الملك فيصل
بحركه لا اراديه صرخ و رفع يده لفوق و بسرعه طلع من غرفته يركض و وجهه احمر يضحك .. سمعوا الكل من تحت وخافوا لا يكون صاير شئ
ام سلطان: بسم الله عليك وش صاير
سعود وهو يدور : انقبلت .. انقبلت بالجااااامعه
عمت الفرحه الكل و امتلت عيون ام سلطان دموع من الفرحه و ضمت ولدها تبارك له .. وهند وهديل متقطعات من الفرحه و باركوا لاخوهم , صار البيت في حاله ازعاج و فرح بخبر قبول سعود اللي كانوا متخوفيين من الموضوع بس الحمدلله ربي وفقه و سهل عليه , ما بقى الا المقابله الشخصيه و باذن الله بيعدي منها ... اخذ التلفون و بشر ابوه و سلطان بسوريا و باقي عيال خالاته كلهم فرحوا بالخبر و باركوا له من قلبهم
سعود: عشاكم اليوم علي .. لو تبون من مطعم المريخ ابشروا
هديل: فديت قلبك انشاءالله كل يوم يجيك خبر حلو و نتعشى على حسابك
الكل : هههههههههههههه
بهالخبر الحلو و قبوله بالجامعه نسى كل التعب اللي عاشه طول سنوات الدراسه و بالاخص ثالث ثانوي .. نسى تعب الحفظ و المذاكره و سهر الليالي .. و المشاوير من مدرس خصوصي لمكتبه ياخذ اسئله الاعوام السابقه و من المدرسه لغرفته .. صحيح كانت ايام متعبه و هم على القلب بس الحين صارت ذكرى و احلى ذكرى .
************************************************** *******
تم قبول علي بكليه التقنيه بعد واسطه خاله خالد حتى يساعد اهله و يخفف عنهم المصاريف و يصير مسؤول عن نفسه , هو بعد الكل فرح بقبوله و بهذه المناسبه عزمت الجده بناتها و احفادها يحتفلون بقبول الاثنين سعود و علي .
************************************************** *
مشاعل: انتي يا حلوهـ .. كذا تبعدين و توحشينا تدرين مالكم داعي انتي و زوجك قولي له خلاص اهلي محتاجيني .. والله
عهود: من جد هنودهـ فقدناكـ يا بنت
هند: احم .. احم .. الحين حسيتوا بقيمتي
مشاعل: لا و الله انتي من زمان غاليه بس
عهود: قصدها بس يوم رحتى صرتي اغلى
هديل: هيه انتي وهي ترا اغار .. هذه اختي وبس
عهود: لا يسمعك تركي و الله ينتف شعرك
مشاعل: هههههههههههه أي والله ... المهم علومك وش الدنيا بك سولفي لا تسكتين
هند: يووه منكم يا بنات هذا انتوا تحبون السوالف
مشاعل: اسمع اسمع .. الله اعلم من اللي كان يسولف قبل .. ولا نسيتي انك بنت بعد
عهود: هههه لا صارت حرمه .. خلاص من الحريم
هديل: ههههه الحرمه هند ..
الكل: ههههههههههههههههههههههههه
في جهه اخرى من الصاله تسال الجده ام خالد عن نواف و زوجته
ام نواف: و الله بخير و لله الحمد بس صاير شئ انا مره افتشلت عند الناس و ما ادري وش السبب
ام خالد: الله يستر قولي وش صاير
ام نواف: نواف و لميس العلاقه بينهم عدم .. قبل كم يوم كلمتني رنا ام لميس وقالت لي ان ..............
وحكت ام نواف القصه لامها حتى تساعدها و تحل حيرتها وما كان احد يمهم و يسمع لهم الا وحده .. ملاك .. من سمعت جدتها تسأل عن نواف و اخباره .. حاولت تركز اكثر معهم حتى تعرف من خالتها ام نواف عن علومه و سمعت كل الكلام من اوله لاخره .. وقتها حست بالخوف تلتها الفرحه هذا يعني العمل اللي سوته ما طار بالهواء .. هي الحين ما همها ان نواف يكون من نصيبها ولاكن ما يتوفق مع لميس و تحرق قلبها و تقهرها مثل ما هي انقهرت .
احمد: اجل الشين بسوريا هاه .. فر بجلده هالمره مني لاكن والله لا اوريه ما نسيت حركته البايخه
سعود: ههههههه ... أي عاد خذ حقنا بس شوي شوي عليه تراه اخوي
احمد: احلف انه اخوك ... اقول يالله مناك بس لا احشرك انت وياها بعلبه مربى
علي: ووع بيطلع مربى مر
سعود يصرف قبل لا يقومون عليه الكل وسال عن نواف
احمد: قال بيجي مدري عنه وين راح .. جيبوا شئ نلعب فيه مليت و الله
علي يكلم عبدالله : قم .. قم جب لاعمامك البلاي ستيشن .. يالله
عبدالله: تخسون الا انتوا تكونوا اعمامي
قاموا عليه الكل وهو هرب بسرعه منهم قبل لا يمسكونه
احمد: شف هالنتفه طلع له لسان
سعود: هالولد قاهرني من زمااان ودي اعلقه بحبل و اجلده
علي: خليكم منه .. ما عليه شرهـ مسكين
************************************************** *********
دخل عليها كالثور الهائج و طالعه من عيونها الشرار , هالمره خافت من نظراته و طريقه دخوله و قالت اكيد ورا جيته هذه مصيبه
صرخ نواف: ولك عين بعد اللي سويتيه تناظريني
اهتزت اطراف لميس ما تدري وش يتكلم عنه
_ وش سويت .. وش تتكلم عنه
قرب منها و مسكت يدها بقوه وقال
_ مطلعه اسرار البيت عند امك و هي ما قصرت فضحتنا عند العالم ... ما قلت لك مره بقص يدك , شكلي هالمره بقص لسانك واعلقه للكلاب ..
ورماها على الكنبه .. عرفت ان امها سوت اللي براسها وقالت لام نواف و الحين بينتهي امرها بالفعل و يمكن هالمجنون يرتكب فيها جريمه .. كمل كلامه و صراخه و تهزيئه فيها وهي مرميه على الكنب بدموع على خدها و مغطيه طرف وجهها بيدها تخاف لا يمد يده او شئ .
كان بالفعل مثل المجنون شكله مرعب و هو واقف فوقها معصب و يصارخ و عيونه حمره.. لا ارداياً و بدون ما يحس بنفسه انهال عليها بالكلمات الجارحه اللي ما توقعتها منه ابداً و بعدها طلع من البيت و هو ما يشوف قدامه الا غيمه سوداء ... لاكن هالمره غير ما ظلت لميس مثل ماهي تبكي قامت وغسلت وجهها و يالله تسحبت على غرفتها و قررت خلاص من اليوم مالها قعده بالبيت ومعه .. يكفي ما جاها من قبل .. صبرت صبرت الين ما خلاااص ما عاد فيها حيل تصبر اكثر , جهزت اغراضها بسرعه و كلمت اخوها يجي ياخذها و اللي يصير يصير حتى لو رجع البيت ومالقاها بكيفه ما همها هو ولا غيره من الناس.
*************************************************
اليوم الثاني
ساره: لا اسمحلي ما اقدر .. خلنا كذا حلوين
سعيد: هذه اول مره اطلبك فيها ترديني .. ما قلت شئ غريب بس اني ابي اشوفك
ساره: لا يا سعيد قلت لك راي بالموضوع اشوفك لا ..
سعيد: متاكده انتي من قرارك
ساره: أي متاكده
سعيد: حرام عليك تحرمين عيني من شوفتك ..
ساره: يا عمري الله يخليك افهمني قلت لك ما اقدر
سعيد: طيب .. طيب لو قلت لك ان عندي شئ مهم لك
ساره: مهم .. وش الشئ ؟!
ضحك سعيد ضحكه شريره وقال: هاه هاه هاه .. اقولك ولا اخاف تنصدمين
خافت ساره من كلامه وقالت بحذر : لا قول ...
سعيد: طيب بقول ................
• يا ترى وش اللي عند سعيد من كلام مهم بيقوله لسارهـ و هل هو كلام عابر تقدر ترد عليه ولا بيغير حياتها 180 درجه ؟!
**************************************************
زاد التوتر و الخوف عند سيف , ما بقى الا يومين و يسمع اخر خبر و قرار من مشاعل هل بتوافق او لا .. ومن جهه ثانيه لميس مصممه على الانفصال من نواف و خايفه من اللي جاي هل بيرضى انهم ينفصلون وكل واحد يروح بطريقه ولا لا .
له يومين ماله خبر .. مستغربه ام نواف من ولدها و ينه عنها تدق عليه جواله مسكر و البيت محد يرد , و ايضاً لميس ما جاها اتصال منه ولا خبر معقوله يكون مرتاح بغيبتها وما صدق على الله نساها ..
***********************************************
دق جوال لميس و كانت ام نواف , فتأكدت انها داقه علشان طلعتها من البيت و تبي تشوف وش القصه خصوصاً بعد ما امها قالت لها الموضوع
لميس: هلا خالتي
ام نواف: هلا لميس شلونك يمه
لميس: الحمدلله بخير .. انتي كيفك
ام نواف: بخير دامك بخير , الا بسألك وين نواف ادق على جواله مسكر و بيتكم محد يرد على التلفون
تفاجئت لميس من عدم علم ام نواف بولدها و سؤالها عنه .. يعني اكيد ما جاهم ولا مرهم ابد
لميس: ما لقيتيه ؟!
ام نواف: أي و الله قلت غريبه ما مرنا ولا كلمنا اكيد فيه شئ
استحت لميس وما تدري وش تقول .. هل تقول اللي صار لهم و طلعتها من البيت ولا تألف أي عذر و سبب لين تشوف نواف وينه
قالت بتردد: و الله يا خالتي انا بعد ما ادري عنه .. قبل امس تهاوشنا وطلعت لبيت امي و للحين ما اعرف عنه شئ
شهقت ام نواف وقالت: لك يومين ولا تعرفين عن زوجك شئ.. ع الاقل كان خبرتيني مو تخليني كذا ..
لميس: انا ما ادري انك ما تدرين عنه
ام نواف: خلاص .. خلاص
وسكرت التفون في وجهها حتى ما قالت مع السلامه و بسرعه قومت احمد اللي كان نايم وقالت له يشوف وين نواف مختفي حتى زوجته ما تدري عنه .
قام احمد و طلع مع عبدالرحمن .. دقوا على جواله لقوه مسكر و مروا من عند بيته مالقوا له اثر ولا بالاماكن اللي يروحها حتى اصدقاءه ما يدرون عنه ولهم يومين ما شافوه .
ام نواف ما خلتهم كل شوي تدق اما على جوال احمد او عبدالرحمن وتسالهم عن نواف و كلهم يردون بلا للحين ما لقوه
احمد: خلاص يمه هدي نفسك بروح اسال مراكز الشرطه واشوف .. لا تشيلين هم تلاقينه طالع البحرين ولا الشاليهات و مقفل جواله ما يبي ازعاج
ام نواف: أي خبر تلقونه عنه كلمني علطول زين .. طمني يا احمد على اخوك
احمد: انشاءالله يمه ... مع السلامه
وقف عند عده مراكز للشرطه و سأل عنه بس ماله اثر و عطاهم مواصفات لسيارته يمكن يلقونه .. و رقم جواله حتى يتصلون فيه.
عند اخر مركز شرطه .. قال الضابط
_ دقيقه الله يحفظك صاحب السياره اسمه نواف سالم
احمد: أي طال عمرك
الضابط: السياره حصلناها على طريق الجبيل في حادث مروري
انصدم احمد و عبدالرحمن من كلام الضابط و طاحت قلوبهم يوم دروا ان اخوهم سوا حادث
الضابط: وتم نقل السائق للمستشفى
بسرعه البرق طار احمد للمستشفى بعد ما اخذ اسمها من الضابط وراح يشوف اخوهـ وحالته .. نبهه احمد عبدالرحمن بان ما يجيب طاري لامه و لو دقت يقول لها للحين ما لقوه .
************************************************** ***
مشاعل: يمه الله يهديك ريحي بالك انشاءالله يكون بخير
ام نواف: أي اريح بالي و الولد له يومين مختفي محد يدري عنه لا زوجته ولا اصدقاءه ... تخيلي صار فيه شئ و الله لانجن هذا ولدي
مشاعل: بسم الله عليك وعليه انشاءالله خير ..
ام نواف: اووف وشفيهم تاخروا , دقي على احمد ولا عبدالرحمن شوفيه وش صار عليهم
مشاعل: دقيت يمه قبل شوي .. احمد ما يرد و عبدالرحمن يقول ما لقوه للحين
ام نواف: استغفر الله العظيم .. وش هاللي انا فيه ما صدقت ولدي يكون جمبي و حولي حتى يصير فيه شئ مره ثانيه
*******************************************
في المستشفى ..
قابل احمد الدكتور المناوب و سأله عن حاله نواف
الدكتور: ولله الحمد تم انقاذه بالوقت المناسب بس هو الحين تحت العنايه المركزه في حاله اغماء بسبب الضربه اللي في راسه
احمد: يعني انشاءالله بيقوم بالسلامه
الدكتور: انشاءالله .. تم تجبير يده المكسوره و خرجنا قطع الزجاج من وجهه ... ادعي ربك يقوم بالسلامه
احمد: الله يسمع منك .. مشكور دكتور يعطيك العافيه
بعد ما راح الدكتور ما قدر احمد يمسك نفسه اكثر و قعد على اقرب كرسي له و راسه بين يديه .. كل شئ جا فجاءه و محد حسب له حساب او فكر فيه .. يومين يغيب نواف عنهم و السبب انه مسوي حادث و بالعنايه المركزهـ .. ما يدري شلون بيقابل امه ويقولها الخبر ولا وش بيسوي الحين هو المسؤول عن اخوه المريض و امه و اخوانه .
**************************************************
ما كانت لميس اقل منهم توتر , رغم اللي كان بينهم الا ان قلبها ضايق عليه و خايفه لا يكون صار له شئ لانها بتلوم نفسها و بتكون هي السبب .. كم مره دقت على ام نواف و مشاعل وكان ردهم لها بانهم ما يعرفون عنه شئ ..
*****************************************
هند: متي بيرجع سلطان ما قالكم ؟
ام سلطان: قال اجازته مدتها اسبوع يعني مابيطول .
هديل: تخيلوا يرجع لنا بحرمه سوريه
هند: لا انشاءالله
ام سلطان: فال الله ولا فالك .. انشاءالله يرجع لنا سالم غانم .. و الله فقدناه
شوي دق التلفون وكان سلطان المتصل يسلم عليهم .. فرحوا كلهم يوم سمعوا صوته و خذوا اخباره وقال انه بيرجع بعد كم يوم .
************************************************** *
حاله ساره تغييرت 180 درجه بعد ما قال لها سعيد عن شئ مو بس صدمها الا طيح قلبها و دموعها , ما توقعت ولا فكرت انها في يوم من الايام بتكون في مثل هالموقف .. و اللي صار ان لما عطته جوالها حتى يشوف العطل فيه خلاه عنده كم يوم علشان يصلحه و بحكم انه خبير بالجوالات قدر يرجع الملفات المحذوفه و كل شئ بالجوال من اسماء و رسائل و حتى صور , وهي كانت من قبل تصور نفسها بمناسبات او بايام عاديه , فاحتفظ بالصور و صار يستخدمها كنوع من التهديد ان ما نفذت اللي يبيه لا ينشر الصور و تنفضح .. ترجته و بكت عنده حتى يمسحهم بس ما رضى و أصر على انه يشوفها باي مكان هي تختاره .
محد حاس فيها و بالخوف اللي عايشه فيه حتى هي ما تتجرأ تشكي لاحد يساعدها بمشكلتها , صارت طول يومها تفكر بالسالفه و بحل للمشكله اللي طاحت فيها بنفسها لا تاكل زين وحتى النوم ما تنام زين و تقوم بوسط الليل خايفه من اليوم اللي بعده لا ينفذ تهديده عاد وقتها بالفعل تروح فيها .
************************************************** *
رجعوا احمد و عبدالرحمن للبيت و استقبلتهم امهم بأسئلتها عن نواف
ام نواف: هاه بشروا لقيتوه .. وش صار عليه
احمد: اهدي يمه كل شئ تمام
ام نواف: تكلم وش صار على اخوك , لي ساعه وانا قاعده على اعصابي تكلم يا احمد
احمد: لقيناه مسوي حادث و الحين بالمستشفى
دارت الدنيا بام نواف و طاح قلبها من الخوف على ولدها .. مسكتها مشاعل و قعدتها على الكنب تهديها
مشاعل: شلونه الحين انشاءالله بخير
احمد: الله يقومه بالسلامه
ام نواف: وين باي مستشفى بروح له الحين اشوفه
احمد: يمه الله يهديك وين تروحين الوقت متأخر و هو بخير
ام نواف: ما بيرتاح قلبي لين اشوفه ... مشاعل جيبي عبايتي وانت شغل السياره ..بسرعه
مشاعل: يا يمه خلي الصباح يجي و بكره تروحين له صدقيني بيكون بخير
ام نواف: تفهمين انا وش اقول جيبي عبايتي
احمد: وين تروحين .. نواف بالعنايه المركزه و الوقت ما يسمح للدخول .. بكره نقوم من الصبح وتروحين تشوفينه
زاد الخوف في قلبها يوم سمعت انه بالعنايه المركزه و اكيد فيه شئ خطر ولا ما كان دخلوه فيها
ام نواف: ليه وش فيه ... اخوك وش صار له حتى يحطونه بالعنايه
تنهد احمد و خلاص ما قدر يتحمل اكثر : يمه الله يرحم والديك خلاص .. ولدك بخير و بكره بتشوفينه
التفت على عبدالرحمن وسالته : تكلم انت نواف وش فيه ؟
عبدالرحمن بتردد: يوم سوا الحادث ضرب براسه و يده انكسرت و و
يقاطعه احمد: خلاص عبدالرحمن .. يمه الدكتور طمنا نواف بخير .. خلاص
ام نواف: اكيد انكم تخبون علي شئ ... قعده منب قاعده لازم اشوفه
ما قدروا يهدوون امهم اكثر و اصرت انها تروح له .. فلبست عبايتها وراحت مع احمد للمستشفى حتى تشوف ولدها نواف و تطمن عليه بنفسها .
هالليله كانت شؤوم على الكل .. محد جاه النوم و ظلوا طول الليل على اعصابهم و تفكيرهم مع نواف .. لميس درت عن زوجها و زاد خوفها و صارت تلوم نفسها انها هي السبب لو ما شكت امها من الاول كان ما صار اللي صار .
************************************************** ******
ثاني يوم سافر ابو نواف لعياله بعد ما سمع بخطبه مشاعل و حادث نواف .. فجاء يشوف عياله و ياخذ اخبارهم و علومهم .
تقابلوا ابو نواف و عياله احمد و عبدالرحمن في احد المقاهي .. عزموه على بيتهم بس رفض و قال يشوفهم برا احسن
ابو نواف: بشروني عنكم شلونكم و شلون امكم و الاهل
احمد: و الله كلنا بخير و ماشي الحال .. بس تعرف اللي صار لنواف قلب كيانا كلنا
ابو نواف: الله يسهل و يقومه بالسلامه متى قال الدكتور بيطلع من العنايه
احمد: قال بكره اذا تحسنت حالته و بينقلونه لغرفه خاصه بس بيظل تحت مراقبتهم
ابو نواف: هذه الدنيا فجاءه تصيبك مصيبه انت في غنى عنها .. الحمدلله جت على كذا وانشاءالله بيقوم و يصير احسن من قبل
احمد: الله يسمع منك
كملوا سوالفهم و سال ابو نواف عن اللي تقدم لمشاعل "سيف" و خذا اسمه بالكامل حتى يسأل عنه بين الناس و يشوف اخلاقه .
************************************************
دق جوال سيف و كان مهند
مهند: هلا شلونك يا الغالي
سيف: تمام الله يسلمك ... انت علومك وش مسوي
مهند: بخير دامك بخير .. اقولك تراني مسافر الليله لجده جتني السفره مفاجئه , كلها يومين اشوف الشغل و ارجع
سيف: اهاا الله يعينك و يوديك بالسلامه .. في احد بيوديك المطار ولا امرك
مهند: لا مرني الساعه 8
سيف: انت تامر .. و الله بفقدك
مهند: ههههه ادري ما يحتاج تقول هههههههههههه
سيف: الله على الثقه .. ههههههه زين اشوفك الليله
مهند: اوكي .. مع السلامه .
سكر منه و رجع اسير لافكاره و تخيلاته .. صار عالمه كله مشاعل .. مشاعل ... مشاعل .. ياربي من ذي المشاعل متى تقرر و تريحني .
تصدق .. !!
{ رقيت في حبكْ كْثير .. !
حتى وصلت , اني
اطير !!
تخيل ..
أطير في | زرقة | سمآك
واذوب في ذرة هوآك
واستعذبك ..
خوف و هلآك ..!
غصبن علي ..:$
من كثر ما : أحبك
و ابيك .. ابغى اكون بدآخلك ..
مالي شبيه ولا شريك
إلا .. \ أنا / .. وبس
***********************************************
ام خالد: يا بعد عمري يا نواف .. وشلونه الحين عساه بخير
ام نواف: انشاءالله و الله يا يمه خايفه عليه مالي غيره بالدنيا
ام خالد: ادعي ربك انشاءالله يقوم بالسلامه .. و الحمدلله انها جت على كذا مو اكثر
ام نواف: انتي ما شفتيه وجهه مشطب بالزجاج و يده مجبره و راسه ... الحادث مو سهل .. سيارته راحت عدم
ام خالد: ربك قادر على كل شئ يا يمه .. ادعي له يقوم بالسلامه و لا تشيلين هم ... شلون اخوانه ؟
ام نواف: ماشي حالهم , ابوهم جاء اليوم و طلعوا معه احمد و عبدالرحمن .
ام خالد: الله يسلمه دامه جاء يشوف عياله .. انا الحين بمرك ونروح نشوفه لا تضيقين خلقك اكثر
ام نواف: الله يسهل بس
سكرت من بنتها و التفت على اللي قاعدين حولها ينتظرون الاخبار من ام خالد
ام علي: سلامات وشفيها عبير ؟
ام خالد:استغفر الله العظيم .. نواف !!
زاد تركيز ملاك و تركت اللي بيدها تسمع اخبار الحبيب
كملت الجده : نواف سوا حادث و دخلوه العنايه المركزه
انصدم الكل و حزن على الخبر الشنيع .. ترددت كلمات الاسى و الحزن
ام علي: وشلونه الحين
ام خالد: عساه يكون بخير .. تقول بكره اذا تحسن يطلعونه من العنايه .. مسكينه عبير قلبها مخطوف على ولدها هذا الكبير و سندها بالدنيا .. الله يقومه بالسلامه يارب
الكل: امين
ام خالد: انا الحين طالعه لها و مناك بنروح نزورهـ ... عساها ترتاح اذا شافته
ام علي: الله يكون بعونها سلمي عليها .
ام خالد: انشاءالله
قامت تلبس عبايتها و حفيدها علي كان بيوديها لبيت خالته .. حتى يسلم عليها و على عيال خالته و يواسيهم شوي .
**********************************************
وصل الخبر للكل و لام سلطان و عيالها تفاجئوا و حزنوا كثير باللي صار لنواف .. فهي بعد راحت بيت اختها مع سعود حتى تهديها شوي .
*************************************************
بعد ما سمعت ملاك اللي صار لنواف زادت دقات قلبها و هالمره خافت من قلب عليه لان الحادث شكله جدا قوي .. حست بالاسى و الحزن على حبيبها ودها لو تروح وتشوفه بعينها تطمن على حاله و صحته .. هي صح تمنت الشر لزوجته لاكن مو له و لو تدري ان فعلتها سبب لحادثه كان من الاول ما فكرت فيها ..
طرى في بالها انها تكلم مشاعل و تعرف عنه اكثر .. وهي نادراً ما تتصل على جوالها الا بالضروره القصوى .. فخذت جوالها و دقت على رقم مشاعل اللي جاها الرد بعد فتره و كان صوتها متغيير باين انها متأثره مره باللي صار .
************************************************
في طريقهم للمطار ..
مهند: عاد انشاءالله لارجعت اسمع اخبار حلوه عنك
سيف: امين يارب ... و الله اني خايف و اعصابي مشدودهـ
مهند: هونها وتهون انشاءالله خير و انت مافي شئ يعيبك ويخلي البنت ترفضك
سيف: دعواتك يا خوي .. الله يسهل علي
مهند: هههههههه يا حليلك يا سيوف حالتك تحزن تدري ولا لأ
سيف: وبعدين معاكم انتوا .. كلكم علي لا انت ولا شمس بس طايحين فيني طنازه و ضحك
مهند: هههههههههههه مدري عنك انت اللي يشوفك يقول اول واحد بالعالم يخطب
سيف: وش اسوي الحب بكسر الحاء وانا اخوك
مات مهند ضحك على كلمه سيف وقال : الحب بكسر الحاء ليه يعني اقوى من الحب بالضمه
سيف: اتوقع انه اقوى
مهند: قسم بالله ان عقلك رايح فيها .. هذا وانت توك خاطب مستخف اجل لا تزوجت وش بتصير اكيد بتنجن
سيف: هذا اللي بيصير , لانك ما جربت الحب بكسر الحاء علشان كذا
مهند: ههههههههههههههههههههههههاااااااااااااااااي
سيف: اضحك .. اضحك يابو هنود .. هيييه بس
مهند: ههههههههه الله يرجك و الله ما بنسى حالتك ذي و طول عمري بقعد اذكرك فيها
سيف: لا يكثر وترانا وصلنا
الجزء (28)
رجع سلطان من سوريــا و هو كله شوق لاهله .. درى بسالفه نواف و تأثر مره على اللي صار لولد خالته
سلطان: وليش يوم اتصلت فيكم ما قلتوا لي
هند: ما حبينا نزعجك و كانت ايام وترجع لنا
سلطان: حتى لو .. على الاقل اكلم احمد و اشوف اخبارهم .. طيب شلونه الحين
ام سلطان: الله يكون بعونهم .. طلعوه من العنايه و الحين في غرفه خاصه تحت مراقبت الدكتور
طلع برا عن اهله يكلم احمد ويشوف اخباره وصحت نواف .. رد عليه بصوت باين عليه التعب و الارهاق.. بعد السلام سأل عن نواف
سلطان: بشرني شلون نواف عساه بخير
تنهد احمد من قلب و قال: بخير .. بس ...
ما قدر يكمل و حس انه شوي و يبكي على حاله اخوهـ .. عرف سلطان ان نواف فيه شئ كبير و احمد ضايق صدرهـ مره و محتاج احد يوقف معه
سلطان: وينك فيه انا الحين جايك
احمد: عند مواقف المستشفى توني طالع من عنده
سلطان: خلاص اجل اقابلك عند اقرب محطه للمستشفى .. مع السلامه
سكر منه و ركب سيارته بسرعه وطار لعند احمد .. ما يدري وش اللي زاد على حاله نواف و خلت احمد بهالصوره .. صوته ابداً ما كان يطمن و اكيد المشكله اكبر من حادث و جروح .
في بيت ام نواف ..
***************************************
قاعده ام نواف و دموعها على خدها تبكي على حاله ولدها الغريبه و امها بجمبها تهديها من جهه ومشاعل من جهه ثانيه وهي تحاول تسيطر على دموعها لا تنزل
ام خالد: اذكري الله و هدي يا عبير انشاءالله بيتحسن
ام نواف: شلون اهدى ما شفتي حالته شلون .. حتى ما يبي يسلم علينا ويشوفنا , معقوله يعني ولدي اللي ربيته يطردني من عنده
ام خالد: حسبي الله ونعم الوكيل ... اكيد الولد فيه شئ و نفسيته تعبانه لا تلومينه يمه .. ترا اللي تسوينه بنفسك مو زين ما نمتي ولا كليتي كذا بتتعبين اكثر
ام نواف: جعلي اموت بس ما اشوف ولدي بهالصوره .
شوي انفتح الباب و دخلت ام سلطان وهند و علطول ارتمت مشاعل على هند وبدت تبكي .. وام سلطان راحت لاختها تهديها و تطمنها على نواف
خنقت العبره هند من شافت حاله خالتها و مشاعل و حست بالضيق عليهم .. فخذت مشاعل و طلعت معها لغرفتها
هند: خلاص يا مشاعل يكفي بكى و دموع .. يكفي خالتي منهاره لازم تقويين قلبك اكثر و توقفين معها
مشاعل: شلون ما ابكي وهذا اخوي اشوفه بهالحاله ... كله جروح و متغيير علينا كأننا مو اهله
هند: يمكن نفسيته تعبانه وما يبي يشوف احد
مشاعل: حتى لو حنا اهله مو أي احد .. ما اظن ان في احد صاحي يطرد امه و اخوانه اكيد فيه شئ اكبر
ضمت هند مشاعل و تاثرت مرره بحالتها .. حاولت بشتى الطرق و الكلمات انها تهديها و تمسح دموعها ..
الكل كان مستغرب و مستنكر من حاله نواف بعد ما طلع من العنايه المركزه .. صاير عصبي و يرفض يقابل أي احد , ثاني يوم زارته امه واخوانه صرخ فيهم وطردهم و يوم جت زوجته لميس ايضاً طردها من الغرفه و قال ما يبي يشوف احد و الدكتور نفذ اوامره و منع زيارته حتى تتحسن حالته .
**********************************************
ام لميس: ياله يمه قومي كلي لك شئ من الصبح وانتي على لحم بطنك ما يصير كذا
لميس: ما ابي اكل شئ .. ما ابي
ام لميس: تعوذي من الشيطان و مسحي دموعك انشاءالله نواف بيقوم بالسلامه
لميس: انتي ما شفيته شلون ..يمه نواف تغيير عن اول و للاسواء .. معقوله يكون هذا بسبب الحادث اكيد في شئ ثاني واتوقع اني انا السبب في اللي صار
ام لميس: لا تقولين كذا .. ترا البكى و العتب ما ينفع قومي غسلي وجهك توضي وصلي ركعتين ادعي ربك انه يقومه بالسلامه و يعافيه
لميس: يمه لو صار فيه شئ اكثر من كذا ما بسامح نفسي انا السبب لو اني ما شكيت لك كان انتي ما قلتي لامه ولاصار الحادث .. كله مني انا كله مني
ودخلت في نوبه بكى مره ثانيه واشد من قبل , وامها جمبها تهديها بالكلمات و تحاول تشيل منها فكره ان هي السبب .
********************************************
محد فيهم مرتاح باللي صار , الكل قلبه على نواف و خايف .. تقابلوا سلطان واحمد وكان احمد وجهه اصفر و باين عليه التعب .. اول ما شاف سلطان ما قدر يتحمل اكثر و نزلت دمعه من عيونه .
شكى لسلطان كل شئ و انه خايف على اخوه و ضايقه الدنيا فيه , سلطان بدورهـ حاول يخفف عنه و يصبره ويقول ان الشئ ما يستاهل تخاف عليه هالقد كلها ايام و تتعدل نفسيته ويرجع مثل اول و احسن .
**********************************************
ايضاً سيف كان في حاله توتر و قلق باللي صار .. مدري ليه كل ما حاول يقرب منها يجي شئ و يبعدها .. تضايق للي صار لـنواف و لمشاعل اكثر لانه درى من شمس انها متأثــره مره و خايــفه على اخوهــا لدرجه انها نست خطبت سيف و كل تفكيرها مع نواف .
سيف: وش تسوين ؟!
شمس: حياك ادخل ما عندي شئ .. أحوس بالنت .. انت وش عندك غريبه هالوقت قاعد بالبيت
سيف: اووف من هالدنيا شئ غريب والله
شمس: ليه وش صاير لك
سيف: متضايق لا اكثر
شمس: و السبب
سيف: مشاعل ... مشاعل يا شمس مدري ليه احس الناس يشغلونها عني و ياخذونها بكل سهوله و انا هنا مشتاق لها و يحترق قلبي عليها
نزلت شمس اللاب توب من حظنها و التفت عليه حتى تستوعب كلامه وتشوفه هل هو صاحي ولا فيه شئ
قالت: وش هالكلام صاحي انت
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك