رواية ابيك في دروب المحبة تخاويني -13
عهود: الا بتسوينها ... محد بيدري وحنا بنراقب المكان
هند: قوووويه مررره تخيلي احد شافها من الجيران
عهود: لا محد بيشوف يالله قومي
هديل:هههههههههههه حلوووه .يالله ميشو عن الدلع وقومي
مشاعل:لا ما ابي
عهود: بسرعه قبل لا يصير شئ ثاني
رفضت مشاعل و عهود وهديل يصرون عليها الين ما استسلمت ونزلت بهدوء خذت عبايتها وراحوا كلهم عند الباب
عهود: هند انتى راقبي اللي داخل خلي عيونك على باب الحريم ... وهديل على ملحق الرجال وانا بشوفها ترقص
هديل: لا انا ابي اصور
عهود: اوكي نبدل انا وياك ...مشاعل سوي الحكم بسرعه
مشاعل : اوكي ..وجعلنا من بين ايديهم سدا ومن خلفهم سدا فاغشيناهم فهم لا يبصرون ..
هند: ههههههه توكلي على الله يا فتاه
مشاعل: حسنا اختاه .. هيا الى ساحه المعركه
وطلعت مشاعل بعبايتها و بدون غطاها سحبته منها عهود و بوسط الشارع لفت على هديل
اشرت لها تبدا .. وبدت ترقص وتستهبل وهديل ميته ضحك وهي تصور
هديل بهمس: دوري .. وحركي شعرك
ومشاعل تنفذ طلبها
شوي لمحت لمبات سياره جايه و تركض على البيت , دخلوا وسكروا الباب وهم ميتين ضحك
هديل: خبله وربي ..شكلك يضحك مووووت
عهود: حركاااات يا جرئ ... مابننسى هاليوم
وقتها طلع سلطان من الملحق وهند اللي كلفوها تراقب المكان ما انتبهت وكانت تضحك معهم, استغرب سلطان من وقفتهم عند الباب ومشاعل بعبايتها
صرخ سلطان : بنت
يوم سمعوا صوته كل وحده حطت رجلها و هربت على الباب الداخلي وهم يتزاحمون من تدخل اول ..
ظل سلطان مكانه مستغرب منهم ومن حركتهم , خذا جواله ودق على هند
هند بخوف: سلطان يدق علي وش اقوله
مشاعل: لا تقولين الي سويناه والله لا يذبحنا
هديل: قولي وحده من البنات جت ..لانه اكيد شاف مشاعل مع عبايتها
عهود: أي قولي صديقتي توها تجي ورحنا نستقبلها
هند: طيب ..بسم الله
وردت عليه..بحذر:هلا سلطان
سلطان بشده: وش كنتوا تسوون عند الباب
هند: هاااااه ..مين حنا
سلطان: اجل مين انا.....اي انتوا يا البنات شفتكم واقفات عند الباب وش عندكم
ارتبكت هند ظلت تتحرك يسار ويمين من التوتر
_سشمه ..اااااا كانت وحده من البنات توها جايه ورحنا نستقبلها
سلطان: وشو ؟! ...اي بنت مو كلهم جايين مع اهلهم
هند:ااااااي بس هذه صديقتي امها ما جت انا عزمتها البيت وتوها تجي
سلطان: زين ليش هربتوا بطريقه كنكم مسوين شئ
هند:لاااا ما سوينا شئ ... بس خفنا يوم شفناك
سلطان: وش قالوا لك وحش ...زين مع السلامه
سكر منها و هو يرجع الموقف اللي صار ويتذكر شكلهم وهم يركضون .. ضحك من قلبه يوم تذكر شكل مشاعل بالعبايه وعلى باله صديقه هند مثل ما قالت..
هند: حسبي الله عليكم طيحتوا قلبي ....ونشفتوا حلقي بروح اشرب مويه
عهود:ههههههههههههه وناااااااسه يالله امشوا نشغل المقطع ..بشوف كيف
مشاعل: والله لا اوريك يا عهود ...لاحكم عليك بحكم اخليك تبوسين يدي علشان ماتسوينه
هديل: فسخي العبايه لا ننفضح اكثر .
رجعوا لمكانهم وشغلت هديل المقطع حق رقص مشاعل .. الكل مات ضحك على خبالها ... و كل شوي يعيدون المقطع , بعده رجعوا يكملون اللعبه وللاسف ما جا دور مشاعل تحكم على عهود لانها غيرت مكانها وجت بجمبها
الجزء (18)
اخر اسبوع من الاجازه ..ملوا الناس من الراحه و السفر و القعده بدون دوامات و قومه الصبح ... رجعت ام عبدالله وعيالها لبيتها و رجعت عهود ..
و الكل استعد لفصل دراسي جديد ..
في بيت ام نواف ...
احمد: يوووووهـ مالي خلق ارجع للرياض وللدراسه والله ما شبعت من الاجازه
مشاعل: بالعكس انا طقيت وصلت معاي خلاص ع الاقل الدراسه فيها احداث و ايام تختلف عن بعض
عبدالرحمن: لا من قال اخس شئ الدراسه ...كرف وتعب
نزلت ام نواف بعبايتها: يالله احمد ..انا جاهزه
مشاعل: على وين انشاءالله
ام نواف:بروح لمحلات الاثاث اشوف شئ حلو لمجلس بيت نواف
مشاعل: ولا تقولون لي ..دقيقه بروح معكم
احمد: بسرعه لا تتاخرين
طلعت غرفتها غيرت ملابسها بسرعه ونزلت مع امها واخوها مشوا لمحل الاثاث ... كانت متفقه مع ام لميس تختار المجلس و الصاله و لميس بذوقها تختار غرفه النوم و المطبخ ... ولان ايام الدراسه الكل مشغول فحبت تخلص من الحين و على ما يجي ولدها نواف تكون نص الاشياء جاهزه .
رجع سيف بعد سفره دامت 3 اسابيع مع مهند و بعض اصدقاءهم .. اقنعه مهند بتغيير جو فرضى وراحوا عمان ثم تركيا و اخيرا مكه ياخذون عمره ...
دخل البيت وكان هدوء خالي من أي همس ... دار الدور اللي تحت مالقى احد وطلع فوق لقى امه منسجمه مع المسلسل وما انتبهت لدخول سيف ومشيته ... جاها بهدوء من واها وحط يده على عيونها
ام سيف: شمس وخري زييين ... خليني اتابع الله يغربلتج يا بنت وخري
نعم صوته سيف ويحاول يقلد شمس: يمه من انا <<< حس ان جملته غلط وتقليد الصوت واااضح
ضحكت امه وضربته على يده وقالت: سيوووف يا الخبل عرفتك
سيف:ههههههههههه شحالتج يا الغاليه
ام سيف: هلا والله ...عاش من شافك .... تومانور البيت
سيف: منور باهله ...
باس راسها وقعد جمبها , يتطمن على احوالها واحوال اهله في غيابه
طلعت شمس وشافت راس امها وبجمبها راس مو غريب عليها ومتعوده تضربه ..عرفت انه سيف جت تركض
_سيووف حبيب ألبي ..مرحبا الساع خيوو
سيف: مرحبتين خيتو .. ولك اشتئت لك
شمس:ههههههههههه سيف لا يكون تزوجت شاميه اعترف
سيف:لاااا شو هالحكي .. بنات ديرتي يسوون الف منهم
شمس: هيه هالرمسه اللي تستاهل عليها بوسه
جلست امهم تضحك على حركاتهم و جمع اللهجات في كلامهم
قعد مع امه واخته يسولف لهم عن سفراته ومغامراته ..ثم طلع هدايه لهم ..جاب لامه قماش حلو من عمان .. و من تركيا تحفه حلوه على شكل "معبد آرتيميس " ولشمس عطر وميداليه من تركيا
شمس:وااااااااااااو احلى ميداليه بالعالم
سيف: عاد اتحدى بتلاقينها عند احد بالسعوديه .خذي هذه لربيعتج مشاعل اكيد نص اغراضكم مثل بعض
شمس:يسلمووووو اكيد بتفرح ..الله يخليك لي يا احلى اخ بالدنيا
سيف: وين ابوي ..بعطيه هديته
كانت هديه ابو سيف سبحه بخرز نادر وثمين من عمان و عطر انيق من تركيا ...
ام سيف: قول امين .. الله لا يحرمنا منك و يوفقك ويارب اشوف اليوم اللي معرس فيه
شمس: اميييييييين يارب
سيف: خلوا عنكم هالكلام ... ابي اكل تراني ميت جوع
ام سيف: انت تامر بقوم اسوي لك شئ
سيف: تسلمين يا الغاليه ...قومي ساعدي الماما
شمس: اوكيشن ترا برجع لك وبسحب منك كل السوالف ..
معلقه الجوال بأذنها و ما خذتها السوالف ..دقت ام خالد الباب
ساره: لحظه يا عمري ....
_نعم ...
دخلت ام خالد: ساره وش تسوين , وراك ما تنزلين تقعدين معي تحت ترا مليت من الوحده
ساره: وخواتي محد منهم جا اليوم
ام خالد: لا , كل وحده مشغوله ببيتها .. تعالي وخل عنك الوحده والقعده هنا
ساره: زين الحين نازله
طلعت ام خالد وكملت ساره كلامها بالجوال
حمد: مشغوله
ساره: لا هذه امي تبيني اقعد معها
حمد:اهااا ..اجل اخليك واذا فضيتي عطيني خبر
ساره: اوكي ..باي
بتتسالون من هذا "حمد" .. واحد ألف قصه صغيره وقدر يلعب فيها على ساره وقال انه معجب فيها من زمان و انه كان يشتغل معها بالمستشفى وهي ما تدري عنه , والحين فصل من شغله وصار بالتجاره .. اساساً هو من اصدقاء مشاري حفظ الرقم عنده بعد ما دق مشاري على ساره من جواله , ويوم درى ان مشاري انفصل عن ساره جاها و بدا يمثل تمثيليته عليها وهي مع الضغط النفسي و الملل اللي عايشه فيه صدقته .
ام عبدالله: ما قلتي لي وش سويتوا بملكه نواف ..شلون العروس حلوه
عهود: والله وناااسه , رقصنا وتعشينا و لميس مررره تهبل ماشاءالله عليها , ياحظ نواف فيها
ام عبدالله: انشاءالله بشوفها في العرس ..شلون فستانها كان؟
عهود: لونه وردي و فيه اشياء بالفضي ناعم و حلو هي اللي محليه الفستان.
ام عبدالله: هذه عمتك عبير موظفه براتب عالي وعيالها كل واحد يدرس بتخصص احلى من الثاني حتى اختارت لولدها وحده تاخذ العقل ... ماخذه الحظ الزين
عهود: اذكري الله لا تطقينها بعين
ام عبدالله: لا اله الا الله ... وش قالوا لك حسوده .
عهود: العين حق .. المهم قبل الدراسه ترا بروح الصالون بصبغ شعري , بكره طبعا اليوم ما يمدي
ام عبدالله: اوكي بروح معك انا بعد بصبغ
قالت عهود بمزح: يووووه على التقليد
خذت ام عبدالله المخده من على الكنب ورمتها عليها وهي تضحك:ههههههههه سوسه كل كلمه عندك ولها رد
نرجع لبيت شمس ... جلسوا ياكلون مع بعض و سيف يقص على امه المناظر الحلوه في تركيا اما شمس ماخذه جواله تشوف الصور اللي صورها بسفراته و مقاطع الفيديو .. من اللقافه راحت للرسائل تشوفها ومرت على الرسائل المرسله ..شافت نفس الرساله اللي ورتها مشاعل ذيك المره استغربت من تشابهه الرساله بجوال اخوها ومشاعل , شافت اسم المرسل اليه " ابو مشمش" دق قلبها اكثر و بسرعه شافت الرقم كان بالفعل رقم مشاعل ..ارتبكت وحست بالدم يتجمع براسها مو مصدقه اللي تشوفه رقم مشاعل عند اخوها والسالفه اللي قالتها مشاعل طلع اخوها له يد فيها , بسرعه طلعت من الرسائل وعطت سيف جواله
شمس: الحمدلله شبعت
ام سيف: ما كليتي شئ اقعدي كملي صحنتج
شمس: خلاص الحمدلله
طلعت لغرفتها تحاول تستوعب اللي شافته وتربط الاحداث
" وش جاب رقم مشاعل لجوال سيف , وشلون صار كل ذا وانا ما ادري معقوله يعني يكلمون بعض من وراي وبدون علمي ومشاعل ليش تقولي بالموضوع وتخبي على اسم سيف و المشكله تقرا لي الرساله .. طيب شلون وصلوا لبعض ومن متى , لهدرجه يصير كل ذا بينهم وانا غافله ولا قالت لي مشاعل وهي ما تخبي على شئ ... لازم اعرف الموضوع من اوله و الله لا يشوفون "
نواف: شلون اهلك انشاءالله بخير
لميس: الحمدلله كلنا تمام ... الشرقيه مشتاقه لك
نواف بضحكه بسيطه : تسلمين ..زين انتبهي لنفسك واذا بغيتي شئ دقي علي
لميس: اوكي عمري ..طمني عليك
سكر من لميس وحط راسه على الكنبه وهو يتنهد كان قلبه بيطلع من مكانه ...
حسين: وشعندك قاعد و مكتئب اللي يشوفك يقول ان هموم الدنيا على راسك
نواف: سلامتك ما فيني شئ ابي ارتاح لا اكثر
قعد جمبه يحاول يعرف وش اللي في قلبه و مكدر عليه حياته
حسين: نواف الله يهديك وشفيك متغيير مره , ما اتوقع كتب كتابك وانت مو راضي يسوي كذا ويوصلك لذي المرحله من التغيير , تراك مو اول واحد اهله يحددون مستقبله وحياته ..هونها وتهون
نواف: حسين تكفى فكني ما ابي اتكلم واقول شئ ..ريح بالك انا بخير
حسين: ابصم بالعشره فيك شئ منت نواف اللي اعرفه
قاطعه وقال بعصبيه: أي تغييرت خلاص تغيرت وما ابي ارجع نواف اللي تعرفه ياخي فكني ..اووف
طلع برا البيت وترك حسين وهو مستغرب من تصرفاته و اعصابه المشدوده ..
دق جوال مشاعل وكانت شمس المتصله
مشاعل: هلا والله شمس شلونك
شمس: هلا بتج ..انا بخير انتى شحالتج
مشاعل: تمام .. وش مسويه
شمس: ماشي الحال ... اقولتج شلون ذاك اللي قلتي لي عنه للحين يدق عليتج
مشاعل: هاه ..اي هذاك لا ما صار يدق علي من بعد ما طنشته شكله مل وما صار يدق
شمس: أي زين ... هاه وش قاعده تسوين
كملوا سوالفهم و شمس محتاره من رد مشاعل و جوابها بان سيف ما صار يدق عليها ونفس الشئ مشاعل خافت من سؤال شمس ولا يكون شكت في امرها او عرفت شئ ..
يوم الخميس اجتمعوا في بيت الجده "ام خالد" و الكل قاعد تحت بالصاله يتقهوون إلا ساره ما كانت معهم ...
ام سلطان : وين ساره ما اشوفها ..لايكون نايمه
ام خالد: لا ما اظن بس مدري وش عندها صارت تقعد بغرفتها كثير ..وحده منكم تروح تشوف وشفيها
طلعت هند تناديها , يوم وصلت عند باب غرفتها وقبل لا تدق الباب سمعت همسها تضحك من قلب
ساره:هههههههه يا حبي لك يا حمودي ما توقعتك كذا
حمد: تخيلي بس ... لازم في التجاره الانسان يكون ذكي ما يفوت أي شئ يمر عليه
استغربت هند من طريقه كلامها وخاصا يوم سمعت اسم حمودي , وترددت ما دقت الباب وجلست تسمع تحاول تستوعب او تفهم القصه , شوي طلعت لها زوجه خالها "ام عبدالله" وشافتها واقفه عند باب غرفه ساره
ام عبدالله: هند, وش تسوين؟
هند:هاااه ولا شئ
تركتها ونزلت بسرعه بعد ما تأكدت ان خالتها تكلم رجال وما تدري منهو , من لقافه ام عبدالله قربت اذنها من الباب تسمع ونفس الشئ سمعت ساره تسولف و باين من كلامها انها تكلم واحد رجال وطريقتها معه كانه صديق وما خذه راحتها
ام عبدالله تكلم نفسها" مين تكلم ذي ... معقوله ابو عبدالله لا ما اتوقع , اجل مين , لا يكون رجعت لمشاري ,لا ما اتوقع .. مالي الا اني ادخل عليها و يبين كل شئ
بدون ما تدق فتحت الباب ودخلت
اخترعت ساره وبسرعه نزلت الجوال
ام عبدالله: ساره وش تسوين
انقلب وجهها اصفر وقالت : ولا شئ ...بغيتي شئ
ام عبدالله: سمعتك تكلمين احد
ساره: انا ...لا يمكن الراديو يالله اسبقيني انا الحين نازله
ام عبدالله الراديو !! ...طيب انا نازله
نزلت وهي متأكده ان ساره كانت تكلم واحد غريب وتعرفه زين والدليل انها خبت عليها وارتبكت بدخولها .
"اااااهـ يا ما تحت السواهي دواهي , هذه نهايتها يا سويره تكلمين رجال من ورانا "<<< قالت ام عبدالله بنفسها .
عند البنات..
هند: اقولكم شئ غريب ..بس يا ويلكم ان طلع تراه مشكله كبيره
هديل: دامه مشكله ليش تقولينه
هند: ابي ارتاح واعرف وش القصه بالضبط ..اسمعوا
وحكت لهم الموقف اللي صار لها قبل دقيقه
الكل شهق من المفاجئ وما صدقوها
مشاعل: يمكن راديو ولا شئ ثاني
هديل: ما اظن تسويها خالتي كبيره وفاهمه .. لا لا ما تسويها
عهود: يمكن يكون مشاري رجعت له
هند: أي مشاري هو طلقها وما سمعنا انهم رجعوا لبعض ..وبعدين سمعتها تقول حمودي
مشاعل: يمكن يتهيأ لك ... اذنك فيها شئ
هند: يا بنت الحلال اقولك سمعتها باذني وهي تضحك وتقول اسمه وتسولف معه كانه صديق
عهود: غريبه .. تتوقعون تكلم واحد
هديل: لا ما اتوقع
مشاعل: شككتيني بخالتي الله يغربلك , تخيلي كنتى غلطانه
هند: انا متاكده مليون بالمليون انها تكلم واحد غريب
عهود: اشششش ..شوفوها نزلت اسكتوا
هند: لا تجيبون طاري لاحد ..خلوا الموضوع سر .
قعدت ساره بينهم تتقهوى وبيدها جوالها تقلب فيه وكل شوي تجيها رساله الين ما حست انها زودتها حولت جوالها على الصامت علشان لا تنحرج بين اهلها .
وام عبدالله طول الوقت عيونها عليها تراقب حركاتها وتصرفاتها وبالها مشغول تفكر باللي صار واللي سمعته , للحين مو مصدقه من حركت اخت زوجها وما بيرتاح قلبها لين تعرف الموضوع بالتفصيل الملل من الاول للاخير .
بنفس الوقت ..شمس في بيتها و بالها مشغول في اخوها سيف وصديقتها مشاعل .. تعبت من التفكير و الحيره تحاول تعرف وش القصه , طلعت من غرفتها وراحت عند سيف في الخيمه
شمس: ممكن ادخل ولا مشغول
سيف: لا حياتج .. وش عندتج قاعده بالبيت وهاديه مو من عوايدتج
شمس: ابي ارتاح تعرف السبت نرجع للدراسه والجامعه
سيف: الله يوفقك
شمس: مممممم سيف
سيف: هلا
شمس: هديتك لي من تركيا حلوه بس غريبه جايب لي ولمشاعل
سيف: هاه ... وش اللي غريبه فيه صديقت اختى المقربه واعرفكم نص اغراضكم مثل بعض قلت اجيب لكم ميداليات نفس بعض , لا يكون ما عجبتك
شمس: الا بالعكس عجبتني .. طيب اعطيها كذا ولا مع شئ
سيف: ممممم والله مدري انتى شوفي حركات الهدايا البنات ادرى فيها انا ما اعرف بصراحه
شمس: اوكي ..
كان ودها تطلع سالفه ثانيه ومنها تعرف لو شئ بسيط عن علاقه سيف بمشاعل بس ما قدرت وخافت , فقامت من مكانها وطلعت .
سيف: على وين اقعدي سولفي معي شوي
شمس: لا بروح تذكرت شغله بسويها
سيف: اوكي..لا خلصتي تعالي
الساعه 1 ونص و الكل خلاص بيطلع ويروح لبيته يرتاح علشان يستعد ليوم الجمعه .. عند الباب
هند: بنات ..مثل ما قلت لكم لا تطلع السالفه برا
عهود: سرك في بير
مشاعل: اوكي .. تصبحون على خير
وطلعوا كلهم علي سياراتهم و البعض نام في الطريق على ما يوصلون لبيوتهم ... بعد نص ساعه في غرفه النوم
ام عبدالله: اختك ساره احد تقدم لها
ابو عبدالله: لا ليش السؤال سمعتي شئ
ام عبدالله: سمعت اشياء
ابو عبدالله بحذر: وش سمعتي ..امي وخواتي قالوا شئ وانا ما ادري عنه
ام عبدالله: لا امك وخواتك ما لهم دخل, بس ............
ابو عبدالله: اجل وش القصه
ام عبدالله: ممممم لا ولا شئ خلاص نام وبكره يصير خير
ابو عبدالله: جواهر قولي وش صاير
حست ام عبدالله بالندم و الخوف على فتحها للسالفه
ابو عبدالله: بتتكلمين ولا شلون
ام عبدالله: هاه ... لا اللي بقولك شئ طويل خليه بكره الله يعافيك نام الحين وارتاح
يأس منها ابو عبدالله وما حب يتعب حاله على سوالف و قصص زوجته السخيفه لانه يعرفها كل بعد خميس او جمعه مع اهله تجيه بالقصص اللي تضيق الخلق و تفور الدم
ابو عبد الله: وخري بس خليني انام ما عندك سالفه
قالت ام عبدالله بصوت واطي: والله لو تدري كانت ما نمت الليله
التفت عليها وقال: نعم .. وش قلتي
ام عبدالله: ولا شئ ..تصبح على خير
تتوقعون ام عبدالله بتكب العشا وتقول كل شئ سمعته ولا تسكت وتكتم على الموضوع ولا تفضح اخت زوجها ؟
صباح يوم جديد واشعه الشمس منوره الدنيا .. الكل قام وتسبح واستعد لخطبه الجمعه و الصلاه
جهز سلطان و نزل ينتظر سعود وعلي ينزلون , وشاف امه طالعه من المطبخ
سلطان: يمه ... لا تسوون غدا اليوم بجيب من برا مشويات و نطلع للبحر .شرايك
ام سلطان: والله ليش لا ... خلاص بس تجون من الصلاه وكل شئ جاهز علطول نطلع
سلطان: قومي البنات ترا شكلهم للحين نايمين , ارجع وكل شئ جاهز
على نزلت سعود وعلي سمعوا بقرار اخوهم و الطلعه
سعود: في طلعه للبحر
سلطان: أي بعد الصلاه يالله مشينا
سعود: يا حبي لكم ..فاهميني من عيوني
ام سلطان: يمديك بس .. يالله توكلوا على الله و ادعوا ربكم بانه يوفقكم بالسنه الدراسيه الجديده.
طلعت تقوم بناتها يصلون و يجهزون للطلعه ...
قامت الخاله ساره و اول شئ سوته خذت جوالها تشوف ان كان فيه رساله ولا مكالمه , وبالفعل لقت رساله من حمد ابتسمت يوم شافتها و تذكرت اليوم الوعد , قامت بسرعه واتجهت للحمام تتسبح و تستعد لليله ..
بعد الغدا الكل مجتمع بالصاله يبون يحللون الدقايق و الثواني قبل سفر احمد ويشبعون من شوفته
احمد: والله احس اني مهم الكل قاعد علشاني
ام نواف: انت سيد الكل ... الله يخليك لنا
مشاعل: لا يكبر راسك ترا بس لانك بعيد لو انا اللي مكانك كان مامي تفرش لي الشارع ورد
احمد:يوووووهـ على القهر اشتغل
عبدالرحمن: من جدك ترا البعيد شوقه يزيد .... لاكن المشكله من يقدر على بعاد ام زي مامي
احمد:اووووه في هذه صدقت والله اني اشتاق لكم ولسوالفكم وهواشكم وكل شئ خاص فيكم
ام نواف: ههههههه ... الله لا يفرقنا يارب..كلها سنوات وانشاءالله تهون هذه الحياه
مشاعل: الفراق صعب
عبدالرحمن : مو شئ جديد
مشاعل: هاه هاه هاه ... يا سخفك
بعد ساعه طلع احمد ونزل اغراضه حملها في سيارته وينتظر يصلي العصر ثم يودع اهله و يمشي.
على قهوه العصر قاعد ابو عبدالله وزوجته اما عياله يلعبون بعيد عنهم
ما زالت ام عبدالله لسانها يحكها ومو قادره تخبي شئ بداخلها ...
قالت: منت رايح بيت خالتي
ابو عبدالله: الا بروح لهم بعد المغرب ليه بغيتي شئ
ام عبدالله: لااا ..بس اختك ساره ما ادري وش سالفتها..شكل صاير شئ هالايام وانت ما تدري عنه
ابو عبدالله: وش صاير ..سمعتي شئ امس
ام عبدالله: أي سمعت تكلم احد بالجوال مدري مين ..قلت يمكن رجعت لمشاري ولا شئ
تعدل ابو عبدالله في جلسته وقال: وشوووو...من قال انها رجعت له هو طلقها وانتهى الموضوع
ام عبدالله:مدري انا ..بس سمعتها باذني تكلم واحد مدري منهو
ابو عبدالله: وش تخربطين انتي ... والله ان طلع كلامك كذب لا تشوفين شئ ما عمرك شفتيه ... مين يعني بتكلم غيري انا او واحد من عيال خواتي
ام عبدالله: خلاص سكر السالفه , انا قلت لك باللي سمعته لا نقصت ولا زدت
ناظرها ابو عبدالله بنظرات قويه وسكت ...لف مخه كلام زوجته و بدت الشكوك و الهواجيس ومابيرتاح لين يعرف القصه .
ااهـ من بعض الحريم ما يسترون ابد ... يعني سمعتي شئ مو حلوه تفضحين الانسانه عند اخوها او أي شخص كان .. بكره بتسوين شئ وربي بيفضحك قدام العالم ..
دخل علي البيت وهو فرحااان وينادي على امه
طلعت ام علي من غرفتها وتوها مخلصه صلاه المغرب
قالت: هلا يمه ...وشفيك
علي: تفضلي يا الغاليه راتب الشغل .. الف ريال و زياده عليها 500 لحسن سيرتي و السلوك
ام علي: على البركه .... الف الحمدلله يارب ..شفت شلون ربي ما يضيع تعبك
علي: أي والله الحمدلله ..وين ابوي ابي ابشره
ام علي: ابوك من طلع العصر وللحين ما رجع , ما ادري وينه
علي: المهم خذي الفلوس عندك واذا احتجتي شئ لا تترددين
ام علي: لااا هذه فلوسك خليها لك ... هذا شغلك وتعبك
علي: ما عليك بس خذيها انا لو بغيت بطلب منك ... لان اخاف تكون عندي واصرفها مره وحده تعرفيني مبذر و الله تشوفين المطعم اللي جمبنا نهايه الشهر ربحان بزياده
ام علي:ههههههههههههه ... طيب هات بخبيها لك .. و الله يوفقك يارب ويسير عليك
مثل ما قالت ام علي لولدها ..ربي ما يضيع تعبه وشغله و برضوا ما ضيع دعائها ورجاها في رب العالمين انه يهدي عيالها و يوفقهم .. من يصدق بعد مراهقت علي وجنونه صار عاقل ...اي انسان بالدنيا لو فاسد او منحرف له رجى انه يتعدل و اللي حوله لهم دور كبير في هالشئ .
ام خالد: متى بترجعين
ساره: ما بطول ... قبل 10 وانا في البيت ... بغيتي شئ؟
ام خالد: الله يحفظك .. انتبهى لنفسك
ساره: يالله مع السلامه
طلعت ساره مع السواق لبيت صديقتها مثل ما قالت لامها ... و ان البنت عازمه صديقاتها على العشا ... وما مرت ربع ساعه الا جا ابو عبدالله يسلم على امه ويشوف اخبارها
ابو عبدالله : وين ساره ما اشوفها جالسه معك
ام خالد: طلعت قبل شوي تقول معزومه عند وحده من صديقاتها
ابو عبدالله: وطلعت لحالها مع السواق بالليل
ام خالد: تكفى خالد فكني من الحكي الكثير ترا مو اول مره تطلع بلحالها و هي مب صغيره
ابو عبدالله: ولو , تطلع لحالها بالليل ما يصير افرضي صار فيها شئ
ام خالد: لا انشاءالله مب صاير شئ .... هاك تقهوى و طمني شلونك وشلون عيالك
ابو عبدالله ومصر على حنته و عاد نفس كلامه
قال: كلميها خليها ترجع انا بوديها ... وخلي السواق تروح معه وقت النهار
ام خالد: استغفر الله العظيم ... وشفيك شايش علي قلت لك ما بيصير شئ خلاص , ولا زوجتك لافه عقلك بكم كلمه وجيت تحلل هنا
سكت ابو عبدالله بعد كلام امه وكان بالفعل زوجته بعد كلامها العصر مخربه عقله و خلته يشك بامر اخته وامه نهم مخبين عليه شئ..
• يا ترى وين راحت ساره وش قصتها مع حمد
• شمس و مشاعل وسيف و قصتهم الغريبه و اللي محيرتهم .. كل واحد فيهم يحاول يعرف عن الثاني اكثر .
• هدوء ملاك هالايام ..هل تخطط لشئ ثاني ولا يأست بعد ملكت نواف
الجزء (19)
انبح صوت ام نواف و هي تنادي عيالها على العشا ومحد سامع لها
ام نواف: الله يهديهم هالعيال وش قاعدين يسوون بهالوقت .. ما يدرون انه وقت عشا "
وطلعت لهم فوق تناديهم واحد واحد , دخلت على مشاعل وهي معصبه
ام نواف: ساعه اناديك وينك ما تسمعين
وبالفعل كانت ما تسمع حاطه السماعات باذنها و تتسمع للاي بود , بس يوم شافت امها دخلت عليها شالتهم
_هلا مامي وش قلتي
ام نواف: سكري هالبلى اللي باذنك وانزلي تعشي انتى واخوانك صوتي راح وانا اناديكم
مشاعل: والله ما سمعت هذاني نازله
ولفت الام على غرفه عبدالرحمن و فهد لقتهم قاعدين على البلاي ستيشن ومعلين الصوت ومندمجين مع اللعبه
ام نواف: ماشاءالله بكره عندكم مدرسه وانتوا للحين على البلاي ستيشن ..سكره وانزلوا تعشوا
عبدالرحمن: اوكي
فهد: ماما بس نخلص هالشوط و ننزل
ام نواف: عبدالرحمن سكره و شيله مع اسلاكه حطه بغرفتي ... خلاص بكره دراسه وانت ثاني ثانوي يبيلك معدل عالي
عبدالرحمن: لا تذكريني , لاحق على الكرف
ام نواف: يالله عن اللعب وانزلوا العشا برد
**************************************************
وقفت السياره قدام بيتهم ونزلت وهي متضايقه يوم شافت سياره اخوها خالد عند الباب
ساره: اوووف وش جابه الحين
دخلت و مثل ما توقعت بيبدا معها الاستجواب و اللقافه .. بعد السلام
ابو عبدالله: وين كنتي
ساره: ما قالت لك امي ..كنت عند وحده من صديقاتي مسويه عشا الليله و رحت
ابو عبدالله: وماشاءالله طالعه بالليل مع السواق , ما وراك رجال ولا ولي تتمشين على كيف كيفك
استغربت ساره من اسلوبه وشعنده ينافخ: ما تمشيت قلت لك رحت لبيت البنت و هو واقف برا خلصت ورجعت للبيت حتى قبل 10 ما صار شئ
ام خالد وتهدي الوضع: خلاص الحمدلله على سلامتها ما صار الا الخير , اطلعي يمه لغرفتك بدلي ملابسك وارتاحي
ويوم طلعت ساره وهي منقهره من خالد ..قالت الجده
_وشفيك انت اليوم .. قلت لك من اول ما جيت وين راحت ومتى بتجي و فتحنا سالفه طويله عريضه عن طلعتها بالليل مع السواق وسكرناها خلاص وش صار بعد
ابو عبدالله: يمه يرضيك اللي تسويه على كيفها الدنيا تطلع وتدخل
قاطعته امه وقالت: مب على كيفها ما قلنا تسوي على كيفها , واختك من متى تطلع عزايم و جمعات الا المناسبات و الشغل , شوف تبي تضييق ضيق على زوجتك وبناتك مو علينا
ابو عبدالله: الحين هذا جزاي لاني اخاف عليكم ... طيب جزاكم الله خير انا ماشي بغيتي شئ
ام خالد: لا مشكور
بعد ما سكر الباب و طلع نزلت ساره وتسال امها عن اسلوب خالد و تصرفه
ساره: وشفيه ذا معصب علينا ... كله بس علشان طلعتي لساعتين
ام خالد: خليك منه تلاقينه متهاوش مع زوجته و جاي يطلع حرته ... المهم استانستوا بالعزيمه
لمعت عيون ساره يوم تذكرت طلعتها وقالت: مرررررررره ونااااسه احلى طلعه بعمري
ام خالد بفرح برئ: دووم يارب هالفرحه ... يالله وش بنتعشى
ساره: انا بصراحه تعشيت والحمدلله .. انتى وش تبين اسوي لك ..امري
ام خالد: والله ودي بسلطه اللي من كودو ذيك الزينه اطلبيها لي و اطلبي للشغاله وجبه خل نسوي فيها صدقه
ساره: اوكي .. من عيوني
كل هالكلام الحلو و الروقان اللي حل على ساره من عقب طلعتها الليله و اللي كانت مواعده حمد "حبيب الغفله" في احد المطاعم ... في بدايه الامر خافت وترددت بس بعد ما قلبت الفكره براسها وقالت لمتى بتقعد كذا خل تجرب و تغامر مو هي اول وحده تطلع مع غريب ... تشجعت و قالت لامها انها معزومه عند صديقتها وراحت قعدت معه بخوف و شعور بالسعاده وغرابه الموقف.
************************************************** ***
صباح السبت غير عن كل الصباحات ... الدنيا منوره و الكل نشيط مستعد لاول يوم دراسي جديد ....
هند كانت انشط وحده فيهم ومتحمسه لانها اخر ترم لها هالسنه و تبي تخلص بسرعه و تملك على تركي , علي و سعود هم بعد كانوا شادين حيلهم لانهم هالسنه ثالث ثانوي يعني شهاده و سنه بتحدد مصيرهم و عبدالرحمن كان اقل حماس منهم لانه ثاني ثانوي و لازم يكون معدله عالي لانه بيكون تراكمي مع ثالث .. اما الباقي مثل ما هم فقط مشتاقين لاصحابهم و مدرسينهم و القعده في الساحه ...
في احدى زوايا الجامعه شله بنات تقريبا 10 ومن ظمنهم هديل كانت مجتمعه مع صديقاتها و في قمه السعاده بلقياهم وكل وحده تعبر عن شعورها بجمعتهم من جديد ..
مشاعل و شمس تقابلوا بالاحضان و كل وحده بسمتها على وجها محليتها
غالبا هاليوم ما يكون فيه دراسه فقط توزيع الكتب و الطلاب على الفصول و في الجامعات تسويه الجدول و ترتيب المواد .
************************************************** ***
الساعه 10 وهم بالكافتيريا يفطرون شمس و مشاعل و يسولفون بسوالف عامه لتمضيه الوقت
مع ان كل وحده منهم تفكر بالثانيه , شمس و تفكر بموضوع سيف و مشاعل و للحين مشغول بالها بالرساله اللي شافتها بجوالاتهم الاثنين , ومشاعل نفس الشئ ما تدري ان كانت شمس تدري عن اخوها و انها لها يد بالموضوع ولا لأ..
بين السوالف تذكرت شمس الميداليه اللي جابها سيف لهم وطلعتها لمشاعل
شمس: تفضلي
مشاعل: واااااو مره حلوهـ من وين
شمس: هديه من سيف
تغيرت ملامح مشاعل وقالت :نعم !!
شمس: اللي سمعتيه هديه من سيف يوم راح لتركيا جاب لي وجاب لتج
مشاعل: اهااا.. طيب اسفه ما اقبلها لان ما بيننا شئ حتى اخذ هدايا منه , لو منك كان أي اقبلها
شمس: شلون ما بينك وبينه شئ
تفاجئت مشاعل من كلام شمس : أي ما بيني و بينه شئ , وش على بالك انتى
ما قدرت تتحمل شمس اللي تسمعه من مشاعل و نكرها للعلاقه اللي بينها وبين اخوها , فلتت اعصابها وقالت
_ و تكذبين قدامي ... تراني عارفه كل شئ يا مشاعل ماله داعي تخبين علي , يعني لو كان واحد غير اخوي كان مشيتها بس اخوي ومن وراي ما صارت هذه
مشاعل: هيه انتى وش تقولين .. وش اللي اخبي عليك و هالخرابيط مين اللي كذب عليك وقالك هالكلام... قلت لك ما بينا شئ
قاطعتها شمس: والرسايل ... احبتج ومدري شنو ... شفتها بعيوني في جوال سيف يعني بكون احلم
مشاعل: هذا اخوك المصون اللي ارسلها وانا مالي دخل فيه مطنشته
قاطعتها شمس مره ثانيه و قالت: خلاص ..خلاص لا تبررين كل شئ باين توقعت أي شئ تسوينه الا انتج تكلمين اخوي من وراي وبدون علمي
عصبت مشاعل اكثر من كلام شمس و اتهاماتها لها , قامت و دفت كوب المويه اللي قدامها وطاح على الطاوله وشوي منه جاء على شمس
_يا مجنونه انتى وشفيك
مشاعل: هذا اخر ما بيني وبينك يا شمس , وتشوفين
مشت وتركتها بوسط المكان و هي حاسه انها مخنوقه و كل الهوا و وسع الحرم الجامعي ما يكفيها تتنفس وجهها منقلب الوانه و اطرافها ترتجف من الموقف اللي كانت فيه ما قدرت تتحمل وكلمت السواق يجي ياخذها للبيت.
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك