رواية ابيك في دروب المحبة تخاويني -12
مشاعل: أي قالي احمد بس ما كنت ادري انه سيف
شمس: الا هو كان وقتها معصب و اخلاقه شينه ...اقوله زين ما ارتكبت جريمه في الولد كان انا وياتج افترقنا
مشاعل: أي صح
وطول المكالمه وبالها مو مع شمس كانت تفكر بسيف وحركته مع احمد تحاول تحلل الموقف هل كان متعمد الحركه ولا ما يدري عن احمد ..
**************************************************
يوم الاربعاء ..الساعه تقريبا 12 الظهر .. رجعت ملاك من دوامها و بعد ماسلمت على امها دخلت غرفتها ترتاح شوي ومن كثر فرحتها برجوع نواف ما جاها النوم قعدت تتسمع في اغاني الحب و تحلم فيه ..
دخلت امها بسرعه وبفرح وعلطول اتجهت لدولاب ملاك حق الملابس , فتحته وكانها تدور على شئ
ملاك تسأل: يمه وش عندك تحوسين بالملابس عندك طلعه ولا شئ
التفت لها بابتسامه على وجهها :لا ادور لك لبس حلووو علشان عزيمه اليوم
ملاك: أي عزيمه ..وش السالفه
التفت عليها مره ثانيه وقالت: ما تدريتي اليوم ملكت نواف
ورجعت للدولاب تدور على لبس لبنتها اللي من لحظه سمعها للخبر واستيعابها للي قاعد يصير اغمى عليها
ام علي : وشرايك بــ
التفت ولقت ملاك طايحه على الارض..صرخت تنادي عيالها
ام علي: ملاك شفيك ...بسم الله عليك يمه وشفيك
علي: وش صاير شفيها ملاك
ام علي: ما ادري وشفيها شغل السياره بناخذها لاقرب مستشفى
وطاروا فيها للمستشفى وهم متازميين من حالتها المفاجئه بلا أي مقدمات
كشف عليها الدكتور و طلع يطمن اهلها
الدكتور: الحمدوولله حالتها كويسه دلوئتي بس تعب وارهاق بسيط مع انخفاض في الضغط .. ركبنالها المغزي << "المغذي" وكلو كم ساعه وتخرج بالسلامه
جلست ام علي على اقرب كرسي لها ودمها متحجر بمكانه مستغربه من طيحه بنتها المفاجئه و خايفه لا يكون السبب في حالتها شئ كبير ... ما رضت ترجع البيت وقعدت بجمب ملاك اللي فاقت بعد دقايق ومنسدحه على السرير بعيون حايره
ام علي: الحمدلله على سلامتك ما تشوفين شر يا الغاليه
علي بابتسامه:خوفتينا عليك ... ما تشوفين شر
حست ملاك انها تحلم وقامت تلتفت حولها تتفحص المكان وسالتهم
_انا بالمستشفى ليش
ام علي: خوفتينا عليك يا بنت ...
قاطعت امها و قالت: نواف وشفيه
ردت ام علي بعفويه ولا تسالت عن سبب هالسؤال :
_مافيه الا العافيه اليوم ملكته وكلنا معزومين عليها عقبالكم يارب
تجمعت الدموع بعيونها و هي تحاول تمسك نفسها عن البكاء قدام اهلها .. ودقات قلبها مرات تتحرك بقوه ومرات توقف , ما ادري وش تحس فيه اندهاش من الخبر اللي سمعته و خوف و انكسار للروح .. ودها تصرخ وتبكي بصوت عالي والناس كلها تسمع وتفهم حبها لنواف .. ما تدري ليش الحظ معاكسها كل ما قالت شئ صار شئ ثاني وكل ما قربت للشئ يبتعد عنها و امورها دايما بلا نهايه ..
********************************************
هي تعبانه و ضايق صدرها من حركه الزمن و غدره .. وهو اكثر منها تعب وضيقه من حالته قاعد حول الناس ببرود وهم رايحين وجايين يجهزون لليله
جاء عبدالرحمن يسال اخوه عن ابوهم
_نواف..ابوي بيجي اليوم
ناظره نواف ببرود وقال
_لا ..كلمته و وافق على كل شئ ..يمكن مشغول
عبدالرحمن: اييي مو شئ جديد ... الشغل عنده اهم من عياله
نواف: عن الهذره الزايده و رح كمل شغلك
نزلت له مشاعل بفرح وقعدت جمبه
_يا حبي لك يا نونو ...اليوم من قدك عريس
اكتفى نواف بابتسامه بارده على جمب
قالت: اسمع مني شويه نصايح علشان تكبر بعين لميس , اذا قعدت جمبها ناظرها بنظرات الاعجاب و بين لها كانها ملكه وانت منبهر من شكلها و جمالها و لا تصير مستحي من اللي حولك اعرف في الملكه كل الحريم حول العريس حتى لو ما يقربون له بس حشره و زحمه زايده .. اوكي وبعد اذا شربتها العصير قولها هني على قلبك
التفت عليها نواف وعلطول سكتت
مشاعل: وشفيك تناظرني ..اكمل
نواف: اقول اذلفي عن وجهي مو ناقصك
مشاعل: وشفيك ياخي هذا جزاي لاني احبك واتمنى لك الخير
نواف: لا يكثر بس
مشاعل: من متى ونواف يهزئ بهدوء ..شكلك تتدرب عن برود الاعصاب علشان تقضي على التوتر حاسه فيك يا اخوي
عطاها نظره قويه خلتها تسكت وتتركه لحاله .. تحت غيمه الكابه اللي حلت عليه .
*******************************************
طول الوقت وام نواف تدور ..تجهز وتسوي ومعها احمد كان انشط واحد فيهم ويحب الفزعات وخاصا اليوم ملكت اخوه لازم راسه يكبر .. بيسوون الملكه في بيت لميس وبتكون بسيطه تقتصر على الاهل من الطرفين و بعض القرايب و الاصدقاء .
************************************************** ********
انواااع الضيقه و القهر اللي عايشتها ساره .. كل بعد دقيقه تتأفف و مكشره وجهها و مرفعه حواجبها
ام خالد: لا اله الا الله ..وشفيك كاره نفسك و الدنيا
ساره: مافيني شئ اووف
عهود: يالله خالتي ما خلصتي نبي نروح للصالون الحين قبل الزحمه
ساره: يختي ازعجتينا تبين تروحين روحي بلحالك
عهود: طيب وشفيك معصبه كذا ما قلت شئ
ساره: كيفي ابي اعصب كييييفي
ام خالد لعهود: خليها يا بنيتي طالعه شياطينها اليوم وما كانه ملكه ولد اختها
ساره: ما يكفيكم حضوري ولا تبوني انط واصرخ من الفرحه ... ملك اليوم مبروك ما تدرون عن بكره يمكن يطلق
ام خالد بعصبيه: فال الله ولا فالك, وش هالكلام اللي تقولينه والله ان سمعتك اختك لا تقص لسانك ..عمى بالحسود
احتقرت عهود حركت خالتها وكلامها , مو علشانها ما توفقت بزواجها تدعي على غيرها وما تتمنى لهم الخير ..
يعني بيوم الفرح والكل مستانس ممكن يكون شخص زعلان ومتضايق و ممكن يكون شخص حاقد وما يتمنى الخير ... اللي قلبه ابيض , ابيض مهما صار واللي قلبه اسود حتى بالفرح شري..
سيف: على وين الليله اسمع امي تقول معزومين
شمس: ما دريت الليله ملكت نواف اخو مشاعل
سيف:لاااااااا؟! زين والله , هذا اخوها الكبير
شمس: أي اكبر واحد .. عقبال ما نفرح بكبيرنا بعد
سيف: زين من بيوديكم
شمس: اكيد سفرجل ولا مين بعد الا لو تبيني اسوق عطني الليسن وموترك ما اعدمه ابد
سيف: لا لا الا انتى ..خلاص انا بوديكم
شمس: اوكيك ..وشرايك تقعد تبارك لهم وبالمره يطيح الحطب اللي بينك وبين احمد يمكن شايل بقلبه شئ
وكان الفكره عجبت سيف ..قال
_اوكيكيين ليش لا
******************************************
طلعت ملاك من المستشفى على العصر ودرى ابوها بتعبها
ابو علي: اكيد من قله الاكل لايكون مسويه رجيم
ملاك: لا مو مسويه
ابو علي: اجل كلي وتغذي ....
التفت على زوجته وقال
_ اطبخي لهم اكل خلهم يتغذون زين شوفي كل واحد منهم اضعف من الثاني
ام علي: و انت كل ما صارت مشكله حطيتها براسي
ملاك: يمه خلاص , يكفي هواش و كلام كثير
ام علي: اللهم طولك يا روح .. روحي غرفتك ارتاحي على ما يجي وقت الروحه للعزيمه
ابو علي: أي عزيمه , بتطلعون من وراي
ام علي: لا من وراك ولا من قدامك , اليوم ملكت نواف ولد اختى
ابو علي: اهااا وش عندهم اهلك كل بعد فتره ملكه وزواج
ام علي: الله يوفقهم ويبارك لهم بحياتهم
تركت زوجها الغبي بكلامه الفاضي ودخلت لغرفتها ما تبي صداع وتعب زياده اللي فيها كافيها .
************************************************** **
مرت الساعات بسرعه على عكس ما يتمنى نواف و الكل اجتمع من اهل ومعازيم .. بجمب الشيخ كان قاعد نواف وبالجهه الثانيه ابو لميس يوقعون العقد , مسك نواف القلم ويده تهتز وقلبه يرتجف يحس بالجو حار وعيونه ما صار يشوف فيها زين
الشيخ: توكل على الله و وقع
اخيرا وقع وبعدها الكل قام يبارك له ويهنيئ و الرجال حوله يسلمون عليه .. كلمات التهانئ كانها كلمات عزا و مواساه له , هم فرحانين و يضحكون وهو وده يطلع اختنق من الجو و ريحه البخور ..
**********************************************
عند الحريم يسلمون على لميس اللي كانت مثل الورده بفستانها الوردي و الذهبي وميك اب يبين انوثتها و اللي محليها اكثر ابتسامتها و غمازاتها
عهود تهمس للبنات: مو تهبل
هديل: أي ماشاءالله تاخذ العقل.. يا حظ نواف فيها
وقتها ملاك ودها تمسك البنت و تقتلها تخرب عليها كل شئ .. راحوا الكل يسلم عليها الا هي لانها بتتهور ويمكن تتهمها بالحراميه اللي سرقت حبيبها منها وتخرب الليله ...
دخل نواف بعد اصرار امه على لميس علشان يلبسها الشبكه و يصورون مع بعض .. وجهه مكتم وممسوح منه الابتسامه و النور
وقت التصوير وهم بجمب بعض مشاعل تاشر له علشان يبتسم شوي و جاملها و ابتسم من دون نفس ..
ملاك اللي ما قدرت تتحمل اللي تشوفه تركتهم وراحت للحمام تبكي وتطلع اللي في قلبها ..وبهاللحظه ساره رجعت بها الذكرى يوم كانت مكان لميس وبجمب مشاري والدنيا موشايلتها من الفرح ... ما صدقت ان الايام مرت و تطلقت من مشاري ورجعت لحالتها الاولى من الوحده و الملل.
**************************************************
عند الرجال ..
احمد اسعد واحد ومن عيونه واضحه السعاده و الراحه .. شافه سيف واتجه له
سيف: السلام عليكم ...
تفاجئ بجيته ورد السلام
سيف: الف مبروك على نواف
احمد: الله يبارك فيك
سيف: شلونك بعد ذاك اليوم ..اعذرني كنت معصب و اخلاقي شينه ما دريت ان خواتنا صديقات
احمد: هههه لا عادي ما صار بينا شئ ... فرصه سعيده تعرفت عليك
سيف: وانا اسعد ... يالله اخليك الحين اشوفك على خير
احمد: خذ راحتك ..حياك
***********************************************
رمزت بحرف حرماني على صدر الألم ليتك
تحس بلوعه المجروح يوم انك تجاهلته
كتبت اخر قصيده حب "بحر خداع" سميته
انا العطشان و اغراني سراب لاح ما طلته
********************************************
ثاني يوم من الصبح طفت ملاك جوالها ما تبي تكلم أي احد ولا تسمع أي شئ ... طول وقتها قاعده بغرفتها تندب حظها و كل ما تذكرت اللي صار بالامس وصوره نواف وهو قرب لميس ينقبض قلبها اكثر والدنيا بعينها مظلمه وقاسيه الكل شايل نفسه يفرح لنفسه ناسي ان في غيره يتعذب و مجروح .
*******************************************
هند وهديل وامهم قاعدات بالصاله يتقهوون و يحللون اللي صار امس
هديل: شفتوا هذيك اللي لابسه احمر ...فستانها خطيررررر
ام سلطان: أي يقولون اخت لميس... ما شاءالله عليهم كل وحده احلى من الثانيه
هند: بس نواف متغيير شكله مدري وشفيه
هديل: يمكن مستحي , ومرتبك
ام سلطان: الله يوفقهم كانت ليله حلوه
هديل: أي والله دايم عزايم خالتي عبير حلوه ولها طعم
ام سلطان: لانها طيبه وعلى نياتها ربي يوفقها .. ما تتكلف ولا تحب المظاهر ابسط شئ تسويه يطلع حلو بعين الكل .. هذا الانسان الطيب ربي يوفقه اما اللي قلبه اسود لو شرا اغلى و واحلى الاشياء ما بيتوفق و بيظل بسواد قلبه .
هند: وانتي الصادقه يمه ..
هديل: طيب وهند متى تملك
ام سلطان: قررنا قبل الزواج بفتره قصيره لاني ما احب فتره الملكه تكون طويله
هديل: ومتى الزواج؟
ام سلطان: في الاجازه بين الترمين والملكه قبلها
هديل: يووووخ باقي كثير
هند: احسن يكون خلصت لان باقي لي ترم واحد
ام سلطان: وبعدين تعالي كان الموضوع لاختك .. واسئلتك يا كثرها
هديل:خخخخخخخخ ابي اعرف وبس ... دامه الموضوع خاص باختي انشاءالله بيكون احلى عرس وبقوم وبقعد عليه
هند: ههههههه فديتك والله
ام سلطان بابتسامه : الله يخليكم لبعض .. زين يا هند عندك اختك شيطانيه تاخذ حقك وتخاف عليك اكثر منك
هديل: احم ... اعجبكم
*************************************************
طلعت من المطبخ بصينيه فيها قهوه تركيه لها ولامها .. يوم شافها فهد شهق وفتح عيونه
قال: يوووء ساحره زي اللي في التماثيل السوريه ...
مشاعل: أي بسحرك واخليك واحد دبي ما تدخل مع الباب
فهد: اتحداااك لو انك رجاله تسوينها
مشاعل:ههههههههههه رجاله بعينك ..طير مناك شف دحوم ينتظرك عند المسبح
وقعدت مع امها يتقهوون ويعدلون المزاج .. نزل نواف وقعد معهم بصمت
ام نواف: شلونك بعد امس
نواف: تمام
مشاعل: تبي قهوه تركيه ترا حلوه من ايدي
نواف: لا ما ابي مشكوره
التفت ام نواف على بنتها وتتسال وش فيه نواف يتكلم من طرف خشمه
ام نواف: نواف وشفيك
نواف: مافيني شئ
مشاعل: شكله رافع خشمه علينا بعد ما ملك من قده الاخ
ام نواف: لا ولدي ما يسويها ما يرفع خشمه على اهله .. بنت خلي اخوك بحاله
نواف: وين احمد؟!
ام نواف: للحين نايم مسكين امس ما قعد لين بعد الفجر
مشاعل: ههههه شفته امس كانه ابو المعرس
تنهدت ام نواف وقالت: كلمت ابوك
نواف: أي من قبل امس كلمته بارك لي ويسلم على اخواني
ام نواف: زين ..لا تقطعونه في الايام العاديه و المناسبات لازم تسالون عنه و يدري بكل شئ يصير لكم
تذكرت مشاعل شئ وطلعت جوالها
_ نواف .. ترا رقم لميس عندي ما تبيه
نواف: نعم !! وليش ذا السؤال
مشاعل: مو لشئ بس خذيته مو هي صارت زوجه اخوي .. افتح جوالك خذه
فتح عيونه وقال: من جدك انتى
مشاعل: أي علشان تسلم عليها وتطمن ولا ما تبي تسمع صوتها
نواف: اوووف ..طيب هاتي
ام نواف: يا حليلها لميس امس طالعه قمر ماشاءالله عليها مرره تجنن
مشاعل: تجنن وبس العالم خق عليها ...فستانها نعوم لايق عليها
ام نواف: حتى نواف كان رزه و يهبل ...شكلك وانت جمبها انما اييه ..ولدي اعرفه امير
مشاعل:ههههههههههه اوخص يا نونو امي تمدحك ... وحنا سفطه على جمب
ام نواف: من قال انتى سفطه ...انتى بس تزوجي وبتشوفين الدلع شلون
مشاعل:احم ..احم
نواف: خلاص بيتقطع حلقتك
ام نواف +مشاعل:هههههههههههههههههههه
ام نواف: متى بتسافر
نواف: الثلاثاء برجع للشغل
ام نواف: الله يعينك
التفت لمشاعل وقالت: هاتي التلفون بكلم امي اسلم عليها .
دقت ارقام امها وبدت تسولف وهذره معها ..نواف قام بدل ملابسه وطلع برا البيت يغير جو , اما مشاعل طلعت تسبح مع اخوانها .
الجزء(17)
في دوامها وقت البريك قعدت ملاك بوجه حزين وروح ميته , جتها حنان
حنان: وشفي الحلو زعلان
ما ردت ملاك وظلت ساكته
حنان: ياهووو عبرنا ...
ملاك: تدرين وش صار يوم الاربعاء
حنان: لا وش صار ..اكيد عن نواف وشفيه ؟
بدت عيونها تدمع وقالت : كانت ملكته
حنان:من جدك انتى ولا تمزحين ... زين وانتى وين رحتي
ملاك: انا رحت ملح ..تصوري بعد كل اللي سويته ودفعته علشان يكون لي صار لغيري وقدرت تاخذه بكل سهوله
حنان: وهو موافق عليها يمكن مغصوب
ملاك: لو مغصوب يرفضها ليه ما عنده لسان يتكلم يقول ما ابيها ... انتي لو تشوفين شكله وهو جمبها يصورون مع بعض وياكلون مع بعض ..اااااهـ يا قلبي والله قهر
حنان: تتوقعين لعب علينا الرجال
ملاك: مدري عنه .. ولا المفعول توه ما بدا..وانشاءالله ما يستمر معها وينفصلون لان نواف لي انا ومحد بياخذه مني
حنان: يا عمري عليك والله تكسرين الخاطر .. قلت لك من اول لا تتعلقين فيه مره ما تضمنين الزمن يجي على الكيف
ملاك: خلاااص طيب لا تلوميني الحين ... صار الشئ وانتهينا اووووف
*******************************************
دخلت غرفتها وخذت جوالها تشوف اذا البطاريه امتلت ولا توها تشحن .. لقت 2 مسد كول و رساله وحده
المسد كول كان من هديل و الثاني من سيف ... اما الرساله بعد كانت من سيف
احبك كثر ماضمت مياه البحر شاطيها
احبك كثر ساعتي ودقايقها وثوانيها
احبك كثر ايامي كثر ماكنت اداريها
باختصار:
ترى الدنيا بلا صوتك يتم الحزن يطويها
مثل غيمه ابت تمطر على الدنيا وتحييها
رمت مشاعل الجوال بعصبيه وهي منقهره منه ومن حركاته السخيفه
" وبعدين يعني ما يكفي اني طنشته ورجع يدق ويرسل كلام فاضي ... ما عنده أي ادب واحترام هالسخيف , اووف يا ربي وش اسوي ان قلت لشمس يمكن تصير مشكله كبيره وان قلت لاخواني بتكون كارثه , هذا لازم له واحد يوقفه عند حده "
جلست تفكر بالمصيبه اللي جتها و لزقه سيف شلون تفتك منها ..بالاخير كلمت شمس تعزمها على بيتها اليوم الثاني .
*******************************************
مهند: ما مليت من القعده شرايك نسافر نغيير جو
سيف: وين تبينا نروح
مهند: مممممم أي مكان لو دول الخليج ..عمان مثلا نكلم الشباب ونجتمع ونروح والله بتكون سفره حلوه
سيف: طيب
مهند: وشفيك بالك مو معي بس تسكتني
سيف: افكر
مهند: لحوووووووووووول ..ترا مليت من كثر تفكيرك اللي لا يودي ولا يجيب , خلاص درينا انك تحب و حبيبتك ما تعطيك وجهه مو اول واحد بالدنيا يصير له كذا
سيف: ادري اني مو اول واحد وتحصل عند العوائل السعوديه .. بس انا غير وحبي غير زين , سفر مانيب مسافر تبي تروح روح مع السلامه
قام وخلى له المكان ...طلع من المقهى وركب سيارته ومشى
ما تفاجئ مهند من حركته لانه يعرف صديقه اذا عصب او تضايق ... ينسى نفسه و الناس كلهم ولا يحط اعتبار لاي شخص كان .
*******************************************
خلصت ام خالد صلاه العشا وتسمع صراخ صوت ساره تهاوش عهود , بسرعه طلعت تشوف وش صاير
ام خالد: خير انشاءالله وش عندك تصارخين
ساره: شوفي حفيدتك هذه ازعجتني و غثتني , شوفي لك صرفه معها انا معد اتحمل
عهود: والله ما سويت شئ كل اللي قلت لها ان بكره في زواج وشرايك نروح الا عصبت علي وقامت تهاوش
ام خالد: تعالي يمه عهود خليها بحالها تصارخ مثل ما تبي ثم تهدأ ..ما ادري وش فيها عقب ملكه نواف وهي طالعه شياطينها اعوذ بالله
ساره: أي روحي لها وانتى خميها واحتويها وانا بالطقاق جعل حريق تشب فيني عادي عندك
طنشتها الجده وخذت عهود يقعدون بالصاله ويفكون عمرهم من صراخها .
من عقب ملكه نواف وهي متغييره كل شوي تتذكر ايامها ولحظاتها مع مشاري وكيف انخدعت فيه وتعقدت منه وحطت في بالها ان الرجال مثله و الحريم محد يفهمها .. ومنقهره من العالم اللي عايشه فيه ليش هم يستانسون وهي مثل ماهي , مع ان محد مانعها ..بيدها تسوي اللي تبيه وتريح نفسها وغيرها .
ام خالد: خلاص كلمي بنات عماتك وشوفيهم ان كان بيروحون ولا لأ , واتوقع عمتك مها تدري بالعرس
عهود: اوكي ... بروح اكلم هديل واشوف
كلمت هديل وافقت تروح معها هي وهند وامهم , اما مشاعل اعتذرت لانها عازمه شمس ثاني يوم
***********************************************
على الساعه 11 سكروا الكوفي شوب و كل واحد مستعد يروح لبيته يرتاح .. في طريقهم طالعين من المول بلبس الشغل ..علي ومحمد يمشون الا في شباب يتحرشون فيهم ويرمون كلام
_ اااااي يا الشغال ما عندكم تخفيضات على الكوفي
_ واحد سنبون و2 موكا بليز
_ههههههههههههههههههاااااي
محمد: خلهم المتخلفين كثرانيين هالايام لا شغل ولا مشغله شاطرين بالتحرش و الذب لو فيهم خير كان شغلوا مخهم بشي ينفعهم
علي: المشكله شف الاشكال لاهم عيال ولا بنات..جنس غريب
محمد:هههههه وانت صادق فالحين بقله الادب وبس
علي: هذا حنا نعييب و نضحك على كل شئ صغير كان او كبير
محمد: ونحطم ..قليل تلقى من يشجعك ولا الباقي طل .تدري يوم دروا اني اشتغل بمقهى ما شفت شلون لدرجه واحد يقول صارت ريحتك قهوه محمصه
علي: يا سخفه و ثقاله دمه
محمد:كنت اول ازعل وارد وتقوم هوشه بس الحين صرت اطنش ما علي من احد بسوي الشئ اللي يريحني ويعجبني ..لو بطلت الشغل و سمعت كلامهم بكره لو اهلي احتاجوا شئ ورحت اطلبهم كل واحد بيسكر الباب بوجهي ..ليش السؤال ومدت اليد اشتغل وريح نفسك
علي: وانت صادق .. الله كريم وانا اخوك
************************************************** ***
على سفره الغدا و الكل مجتمعين ياكلون الا سعود وعلي نايمين
سلطان: اليوم وانا طالع من السوبر ماركت قابلت تركي خطيب هند
ابو سلطان: شلونه وشلون اهله
سلطان: الحمدلله ..شفت وجهه متغيير و حزين .سالته سلامات وشفيك , قالي ان ابوه توفى الفجر
ابو سلطان: لا اله الا الله ..الله يرحمه
ام سلطان: انا لله وانا اليه راجعون ... الله يرحمه ويغفر له
سلطان:اميين ..
ابو سلطان: هو كان مريض قبل
ام سلطان: أي مريض بالقلب .... الله يصبر اهله ويغمد روحه الجنه
ابو سلطان: زين قلت لي بروح اعزيهم ...
ام سلطان : وانت رايح خذني انا والبنات معك نعزيمهم ونصبرهم على ما ابتلاهم ربي
************************************************
على المغرب وصلت شمس لبيت مشاعل , رحبت فيها وقعدوا بالمجلس
شمس: من زمان عنتج يا الشينه لتج وحشه
مشاعل: أي والله الاجازه لهتنا
بين السوالف و الحكي قالت مشاعل
_ في واحد مزعجني على التلفون يدق ويرسل مسجات ..غثني وفي الاخير يقول انه يحبني
شمس: ااااايه ما عليتج منه لعاب ولد لعابه ... الحب صاير موضه هالايام
مشاعل: المشكله يعرفني واعرفه , يعني اهلنا يعرفون بعض وقريب مني
شمس: لاااا ... من اهلتج يعني !!
مشاعل: تقريبا بس مو مره قريب لاكن اعرفه حتى قال اسمي وقال اسمه انه فلان
شمس: وش اسمه
مشاعل بتردد: اسمه خالد
شمس:هو قال احبتج يا مشاعل
مشاعل: أي قال انا خالد احبك يا مشاعل
شمس: غريبه وهو من اهلك ما يخاف تفضحينه
مشاعل: هذا اللي انا مستغربه منه ... طنشته وللان يدق ويرسل
شمس: وين رسالته اشوف
مشاعل تتهرب : انا بقراها لك ..اسمعي
وبعد ما قرتها وخلصت
شمس: الله .. الله كل حب العالم سطره بهالرساله
مشاعل:طيب قولي لي وش اسوي ..والله خايفه
شمس: لو كان صادق بكلامه ويعرف اهلتج و اكيد يدل بيتكم ليش ما يجي يتقدم لتج ويقصر المشوار
مشاعل: أي صح
شمس: هذولي هم. شباب الحين كذا مسويلي فيها حب و رومانسيه وما يقدر يتخلى عن حبيبته , زين تعال تزوجها وخل العالم تعرف بحبك لها ... ولا يجيك بذيك الاعذار توني ادرس او ما كونت نفسي ومدري شنو
مشاعل: طيب مو حلوه اقوله دامك تحبني تعال اخطبني ..خييير!!
شمس: لااا عاد مو تقولين له , بس طنشيه ولا تردين عليه يمكن يختبرتج ويشوف هل انتى خبله مثل بعض البنات وتنجرين ورا أي كلمه ولا لأ
مشاعل: تتوقعين كذا
شمس: أي اكيد ... خليتج من هالكلام الفاضي من اول ما انولدت وحنا في مسلسل احبك وما اقدر اتخلى عنتج وبعد الزواج تشوفينه ولا يعرف وش معنى الحب غير انه كلمه من حرفين .. لو فيهم خير وقلب واحساس كان كل واحد احتوى زوجته و حطها فوق راسه لاكن من يسويها بس شوفيهم بالصيف يطامرون من بلد لبلد وكل واحد يستخف ويطير عقله عند الشقر ... مالت عليهم
مشاعل:هههههههههههههه ..طيب مساكين مالقوا من يداريهم في البيت علشان كذا يدورون الحنان برا
شمس: أي ممكن ..عااد لا جتك وحده 24 ساعه في المطبخ ولدها متعلق بضهرها و المشط بكشتها , يد ماسكه العصا و يد تقطع بصل و الولد الثاني قاعد يسمع لها محفوظات , يجي زوجها البيت ولا هي داريه عنه .. اكيد بيسحب عليها ويدور وحده تنتبه له
مشاعل: أي والله في حريم هم السبب في هروب ازواجهم تلاقينها بس تبي يدلعها ويجيب لها و يوديها لو انشاءالله المريخ علشان فلانه راحت مع زوجها ... حشى بس هات وجيب ودي هو بعد يبي منك اشياء .. الحياه كلها خذ وهات .
شمس: خليها على ربتج .. ااهـ من هالناس يدرون عن الغلط وين بس كل واحد يسوي نفسه ما شاف ولا انتبه ويستمرون بالحياه .
كملوا سوالفهم بين الضحك و الاكل .. ونست مشاعل امر سيف وسمعت لكلام صديقتها انها تنطشه ومابتوقف الدنيا عنده .
********************************************
طق ..طق
هند: نعم
فتح سعود الباب ودخل
_مشغوله
هند: لا بغيت شئ
مد لها كيس حلو وداخله هديه
هند: وشو ذا ..هديه لي
سعود: أي اكيد بتعجبك
يوم فتحتها كانت عطر نفس عطرها اللي انسرق بمصر ويدري سعود انها تحبه مره
هند: وااااااااو ... تسلملي على الهديه , بس وش المناسبه
سعود: احم ... لسلامتك من الحرق ذاك اليوم
ناظرت هند يدها ثم اخوها سعود وابتسمت :يا حليلك يا سعيدان طلعت ولد اصول و حنون .وهـ فديتك والله
سعود: اهم شئ تعجبك الهديه ...عاد وريها الشعب الكريم وقولي لهم سعود جابها لي علشان اكبر بعينهم
هند: انشاء الله والحين نازله اوريهم
نزلت هند وماسكه سعود والعطر
هند: شوفوا وش جاب لي الامبراطور سعود ... في احد منكم يقدر يسويها
هديل: اشوف .. هذاا مثل عطرك اللي انسرق
هند: أي يدري اني احبه فشرى لي واحد مثله
هديل:واااااو ليت اغراضي تنسرق
ام سلطان: فيك الخير يا سعود ...
سلطان: وش المناسبه
هند: لانه ذاك اليوم انحرقت في يدي بالزيت وهو السبب
هديل:اهاااااااااا..يعني يتاسف
سلطان:هههههههههههههههههههه اوووخص يا رومانس لا يدرون عنك بنات الخبر يتذابحون عليك
سعود: احم ..اعجبهم
الكل:ههههههههههههههههههههههههههههههههههههه
هديل: لا والله فيك الخير ... الله يرزقنا يارب
هند: مرره شكرا سعيدان ... اوعدك بالهديه اللي تسرك
ام سلطان:يا حليلكم يارب دوووم مع بعض
سلطان: وشمعنى سعود خلاص انا بعد بجيب لكم هديه ... العشا علي
هديل: خليه بكره , اليوم عندنا طلعه
سلطان: اوكي بكره بكره ننتظر وش ورانا
************************************************** *******
مرت الايام وانتهت اجازه نواف ورجع لشغله ...في الصباح وهو في مطار الملك فهد جاته رساله على جواله فتحتها وكانت من لميس .. تطلبه اذا وصل يطمنها عليه وينتبه لنفسه في السفره.
كانت مو اول رساله منها له , قبل كذا صار بينهم كلام و رسايل بس نواف للحين بارد معها ويقطر الكلام من فمه تقطير وكل اللي يسويه معها علشانها وعلشان لا يحط اهله بموقف محرج مع البنت .
************************************************** ****
يوم من الايام عزمت ام سلطان امها وخواتها في بيتها .. اجتمعوا يغيرون جو ويستانسون
هديل: بنات ما مليتوا من السوالف و القعده قوموا نلعب
مشاعل: الا انا مليت ونص ... دبري لنا أي شئ نسويه
عهود: نبي شئ خطير وفيه مغامره
هند: انا عندي راي ... جيبوا لي علبه مويه فاضيه ونسوي حلقه وندور العلبه ..اكيد عرفتوها السؤال و الجواب او امر
عهود: أي حلوه ...يالله
هديل: برب بروح اجيب العلبه
مشاعل: تيت
هند: تلاقينا بالصاله اللي فوق بعيد عن ازعاج الحريم
وطلعوا للصاله اللي فوق ولحقتهم هديل بعلبه المويه
هديل: يالله نبيها اوامر وكل وحده لازم تنفذ الامر .... اتفقنا
الكل: اتفقنا
كانوا البنات كلهم مع بعض الا ملاك قاعده مع خالتها ساره تحت يسولفون .. ما تحب تقعد وتشوف مشاعل قدامها تضحك ومستانسه تحس هي وحده من الاسباب اللي بعدتها عن نواف .
بعد كم حكم بسيط .. جاء دور عهود و مشاعل ..
عهود:انا بحكم .. تلبسين عبايتك وتطلعين برا البيت ترقصين في الشارع
مشاعل:لااااااااااااا مستحيل اسويها تبينهم يذبحوني ..لااا
عهود: الا بتسوينها ... محد بيدري وحنا بنراقب المكان
هند: قوووويه مررره تخيلي احد شافها من الجيران
عهود: لا محد بيشوف يالله قومي
هديل:هههههههههههه حلوووه .يالله ميشو عن الدلع وقومي
مشاعل:لا ما ابي
عهود: بسرعه قبل لا يصير شئ ثاني
رفضت مشاعل و عهود وهديل يصرون عليها الين ما استسلمت ونزلت بهدوء خذت عبايتها وراحوا كلهم عند الباب
عهود: هند انتى راقبي اللي داخل خلي عيونك على باب الحريم ...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك