رواية ابيك في دروب المحبة تخاويني -11
ابو عبدالله: السلام عليكم
عبدالرحمن: وعليكم السلام ..هلا خالي حياك
حيت ام نواف اخوها وعلى بالها جاي يسلم لا اكثر بس شوي نزلت عهود مع اغراضها
ام نواف مستغربه: عهود على وين
عهود ببرود: بروح بيت جدتي
ام نواف: افاااا ليش .. يا بنتي اقعدي كملي الاجازه عندنا سهر و وناسه مع مشاعل
سكتت عهود ما تكلمت وقال ابوها
_ ما ودنا نثقل عليكم ... الفتره اللي قعدت فيها كافيه المره الجايه انشاءالله
حست ام نواف ان عهود زعلانه وماخذه على خاطرها من كلام مشاعل واسلوبها القوي
ابو عبدالله: يالله انا استاذن سلمي على نواف و اخوانه
ام نواف: انشاءالله ... مع السلامه
واول ما طلعوا من البيت راحت للحديقه كانت مشاعل قاعده فيها
ام نواف: عاجبك اللي سويتيه
مشاعل: وشو
ام نواف: البنت زعلت من كلامك و كلمت ابوها جا خذاها
مشاعل ببرود: انا ما قلت شئ يزعل كلامي صح ..اغراضي ما ابي احد يفتشها.. حلووه والله ناس تزعل من الصدق ولا تبيني اقولها تفضلي الغرفه كلها فتشي و حوسي على كيفك
ام نواف: بس اسلوبك معها كان قوي ... البنت ما توقعتها منك وانتى اقرب وحده لها , هذه هي راحت حتى ما شفتيها او سلمتي عليها
مشاعل: الجيات اكثر
ام نواف: معصبه وتطلعين حرتك فينا ..خير انشاءالله
مشاعل: طبيعي بعصب طفش و زهق كل يوم نفس اللي قبله وما تبوني اعصب ... ودامي معصبه ليش تكلموني خلوني بروحي
احمد كان توه راجع من المسجد ..
_السلام عليكم
الكل: وعليكم السلام
احمد: وشفيها معصبه العالم كله معصب اليوم وش السالفه
ام نواف: مدري عنها طالعه شياطينها تنافخ على كل صغيره و كبيره
احمد: حتى نواف معصب ومو على بعضه ...وش ما كلين او وش شامين
ام نواف: اخوك فيه شئ
احمد: مدري عنه ... يالله يرد علي و متغيير عن اول
ام نواف: بروح اشوفه .. وش قصه الاخلاق الشينه هذه
احمد: وين عهود روحي اقعدي معها يمكن تهدين
ناظرته مشاعل وعيونها فيها شرار
احمد: بسم الله الرحمن الرحيم ..والله ولا عيون انسان ..كنك شيطان مقعد
مشاعل: احمد ترا مو فاضيه لك ... وخر عني احسلك
احمد: طيب طيب يا ابو عنتر لا تنفجرين بس
بعد ما راح الكل وتركوها بحالها .. ظلت تفكر وتحس بتانيب الضمير على عصبيتها لعهود واهلها وانهم مالهم ذنب باللي هي فيه ..كانت معصبه من سيف وسخافته و اعصابها متوتره .. وخايفه و الافكار الشيطانيه تجيها وتروح ..مرات تقول ان شمس لها يد بالموضوع ومرات تقول انها ما تدري عن اخوها ..كل اللي بداخلها انعكس على تصرفاتها مع اللي حولها.
يعني سيف لا ارتاح ودايم يفكر فيها .. ولا مشاعل ارتاحت ودايم تفكر فيه ..
************************************************** **
ام نواف: شفيك يمه وش متضايق منه
نواف: مافيني شئ ..انتوا اللي شفيكم كل ما شافني احد سالني
ام نواف: طيب ليش تنافخ انا اكلمك بالطيب
نواف: ما ابي اتكلم طيب .. انا طالع
طلع من البيت بكبره تارك امه في حيرتها من حالت عيالها و عصبيتهم الغريبه ... و اخذ يدور بالشوارع ما يدري وين يروح ... حتى ما فكر يكلم صديقه حسين او ولد خالته سلطان .. ضاايق صدره مررره و يحس انه بيختنق ..اخرتها مسك خط جسر البحرين وراح هناك بدون أي تفكير .
***********************************************
في السياره
ابو عبدالله: غريبه تبين تقعدين عند جدتك وانتى من اول طلبتي تقعدين عند مشاعل
عهود: ما ابي اثقل عليهم
ابو عبدالله: ليش صاير بينكم شئ
عهود: لا
ابو عبدالله:اسمعي ترا محد بيتحملك غير امك وابوك وامك مو معك يعني مالك الا انا ... الناس يالله تتحمل نفسها مو مستعده لغيرها .. ولازم تعرفين بهالدنيا ان في حدود ما تتعدينها سواء كان مع أي شخص قريب لك او بعيد .
عهود تتنهد بعد كلام ابوها وقالت: انشاءالله
ابو عبدالله: يالله وصلنا ..خلي اغراضك انا بنزلها
نزلت ودخلت بيت جدتها لقت خالتها ساره نازله من الدرج بعبايتها ..وبعد السلام
ساره: يالله امشي معنا طالعين نتعشى برا
عهود: طيب بس ادخل اغراضي للغرفه
شافت جدتها وسلمت عليها وبعد كذا طلعوا لبيت ام علي ياخذونها مع عيالها ويروحون للمطعم .
مرت الايام
وسيف بمشاعره المتضاربه و توتره بعد فعلته مع مشاعل .. ومشاعل نفش الشئ خايفه و افكارها توديها وتجيبها ..
سافر نواف ورجع لشغله كالعاده بروح متغييره مررره عن قبل وباسلوب غير مع الكل حتى مع اقرب اصدقاءه "حسين"
داخل الشقه في ماليزيا , طلع حسين بصحن ساندويتشات سواها بيدينه له ولنواف
حسين: يالله مد ايدك وكل .. وجهك اصفر وصاير كنك في مجاعه
نواف: ما اشتهي كل انت
حسين: اقول عن الدلع وكل ربي جسمك وعضامك
نواف: اووووف
حسين: شفيك منت على بعضك من اول ما بدينا الشغل ,, ترا كلنا ما شبعنا من الاجازه بس وش نسوي هذا الشغل
نواف: مو سالفه اجازه او شئ ..تخيل امي تبي تزوجني
حسين: مبررررررررررروك عقبالنا
نواف: بس انا ما ابي ..رافض هالشئ وبقوه... رافض البنت ورافض فكره الزواج اصلا
حسين: ليش فيها شئ مو عاجبتك
نواف: البنت ما فيها شئ بس انا ما ابيها ولا ابي اتزوج الحين
حسين: طيب وش يمنعك وظيفه والحمدلله متوظف و رجال الكل يتمناه خلاص توكل على الله
نواف: اوووف
حسين: طيب قلت لامك انك ما تبيها وما تبي تتزوج
نواف: قلت وصرخت في النهايه زعلت .. مو بيدي شئ وافقت علشانها بس
حسين: والله مدري وش اقولك ... هونها وتهون
************************************************** **
في مصر ...
سعود: اليوم نبي السينما في فلم لهنيدي
ام سلطان: وووع يا شينه ذا الانسان اليوم بنروح السوق بلا هنيدي و بنغالي
هند: أي نبي السوق
هديل: لا السينما .. السوق لاحقين عليه
سعود: ترا من جينا وانتوا سوق ..سوق و في الخبر سوق سوق خلاااااص ارحموا نفسكم
هديل: وشرايكم انا وسعود نروح السينما وانتوا روحوا سوقكم
سعود: أي احسن بعد
ام سلطان: لا اخاف تضيعون ولا يخطفكم احد
سعود: ما عليك هنا الامبراطور سعود ولد ابو سلطان اعجبك
هند: ارحمنا يا الامبراطور
ام سلطان: ولو ..تعالوا معنا السوق والسينما مره ثانيه
هديل: يمه .. هذا فلم ما ينعاد الا بعدين , الله يخليك يمه نبي السينما
ام سلطان: طيب ... بس انتبهوا لنفسكم و من السينما للبيت علطول بدون لف و دوران
هديل و سعود يناظرون بعض : انشاءالله
طلعوا مع بعض هديل وسعود راحوا للسينما و ام سلطان وهند وعلي للسوق ...
في وسط الزحمه و القلق ناس منا تشتري وناس تبيع كنهم بحراج ..
هند وامها يمشون الا مر بجمبها واحد يركض جاي من بعيد و خطف شنطتها
من الصدمه وقفت وصرخت : شنطتي ..شنطتي
ام سلطان ما كانت اقل منها خوف: حراامي الشنطه خطفها
والتفتوا حولهم يبون أي احد يساعدهم لاكن الكل مشغول يشتري ولا احد يمهم , انتبه لهم واحد شكله خليجي قال:
_ وانتى صاحيه تمشين في مصر جذي بدون ما تيودين شنطتج زين.. محد يقدر يلحقه خلاص راح يعوضتج ربي
هند وشوي بتبكي اول مره تكون بموقف مثل هذا
_ الله يحرق قلبه ولا يوفقه يارب يموت قبل لا يوصل لبيته حيوان
ام سلطان: حسبي الله عليه من ولد ... جعله بالضربه ..كم فيها شنطك عسى مو كثير
هند: فيها 100 ريال وجوالي و عطري ذاك الزين
ام سلطان: حسبي الله عليه ... مالك الا تدعين عليه هالحقير امشي نكمل بس الوقت يمشي علينا و كل شئ بيرجع لك انشاءالله
*************************************************
شمس اول ما ردت مشاعل رحبت فيها باحلى ترحيب
_ عاش من سمع هالصوت ...شحالتج يا الغاليه
مشاعل ببرود: هلا بك ..انا الحمدلله بخير انتى شلونك
شمس: منيحه ..ابشرتج رجعت للخبر امس
مشاعل: الحمدلله على السلامه شلون اهلك في الامارات
شمس: كلهم بخير و بنات خوالي يسلمون عليتج
مشاعل: الله يسلمهم
شمس: زين يا قلبي حبيت اسلم عليتج ولو انتج قاطعه ..وسلمي على الوالده
مشاعل: الله يسلمك
شمس: اشوفتج على خير..مع السلامه
مشاعل: باي
سكرت منها و تمدت على الكنبه تفكر " شفيني يالله اتكلم معها وهي اعز صديقاتي واقربهم و الانسانه الوحيده اللي اثق فيها .. يمكن مالها دخل بسالفه سيف وهو اللي خذا الرقم بدون علمها ..ويمكن لها دخل وهي اللي عطته , بس شمس ما تسويها اعرفها لا ما تسوي هالشئ ... استغفر الله العظيم ..خلاص يكفي شكوك في البنت اهم شئ اني صديته وكل شئ راح يبان في الايام الجايه"
*****************************************
في الظهران مول , علي يشتغل بالكوفي شوب بكل راحه , كان اللي معه واحد طيب و متعاون علشان كذا ماشيين مع بعض , جت بنت بتطلب منه
علي: تفضلي اختي
البنت: مساء الخير
علي: مساء النور تفضلي
البنت: اثنين كابتشينو ..الحجم العادي
علي: اوكي 20 ريال
وبعد ما جهز طلبها وسلمها الكوفي مدت له واحد
_ هذا لك عزمتك عليه
متفاجئ علي من حركتها الوقحه: نعم !!
البنت: شفيك مستغرب هذا لك وبليز لا تردني
علي: مشكوره بس انا ما ابي
البنت بدلع: افااااا ترد ريمي ..
علي متضايق منها : مشكوره بالعافيه عليك
شافه صديقه "محمد" بوضع محرج وكان يعرف يتفاهم مع هالنوع من البنات جاء وخذاه بابتسامه
_تسلمين والله
بعد ما راحت قال علي: وش قله الادب ذي اللي ترمي نفسها علي
محمد: مشي ياخي هذولا هم صاروا يمشون وراك و غصب تلزق ...اذا مرت عليك وحده مثل ذي خذ الشئ و ارميه بعد ما تروح
علي: والله خووش تطورنا
محمد: ههههههه يا حليلك توك ما شفت شئ
وهو صادق محمد ما شاف شئ ... حركه البنت بسيطه وتهون عن غيرها من الحركات الثانيه .
************************************************** **
طلعوا سلطان و احمد يلعبون بلياردو في احد الاماكن الخاصه بتجمع الشباب ... وداخلين جو مع اللعبه و كل واحد يتوعد الثاني بالهزيمه , في نفس المكان كان سيف ومهند يلعبون
فاز مهند على سيف : ياهووووو كذا اللعب ولا بلاش معك الفنان
سيف: مبرووك تراني اليوم مو شئ احمدربك لو اني مروق كان هزمتك انت و هالشله اللي حولك
مهند: أي نشوف المره الجايه
وقعد سيف يشرب له عصير وكمل مهند اللعب مع غيره ... وبالغلط كان احمد ماشي من جمب سيف و ضرب بالكاس طاح وانكسر
احمد: العذر و السموحه يا اخوي
سيف يناظره بنص عين: الله يخلي لي عيوني
احمد: نعم !!
سيف يعلي صوته ويرفع راسه: قلت الله يخلي لي عيوني ... ما فهمت وش قلت
احمد: الا فهمت ليه وشايفني باكستاني البقاله
سيف: مدري عنك انت احكم
احمد: اقول احترم نفسك
شاف سلطان الجو تكهرب وقرب منهم
_ هيه شباب ما صار الا خير انكسر الشر
احمد: شفته شلون نافخ صدره مدري على وشو
سيف: أي انفخ واصرخ عندك شئ
مهند: سيف وشفيك طاير علشان شئ بسيط اذكروا الله
الكل: لا اله الا الله
سلطان: يالله مشينا
مشى احمد وهو يناظر سيف من فوق لتحت وسيف نفس الشئ يبادله النظرات وكل واحد عيونه طالعه منها شرار
عند الباب صرخ سيف
_انتبه الباب
لف احمد وعطاه نظره اقوى من اللي قبل ورجع له
_اقوول هيه ترا مصختها انت و وجهك وبعدين يعني تبيني اعلمك شلون تتعامل معي
وقف سيف: ومن حضرتك علشان تعلمني ... ورني عرض اكتافك اشوف
كل من سلطان و مهند حاولوا يهدون الموقف ومسكوا احمد وسيف بعدوهم عن بعض
سلطان يهمس لاحمد: والله ما يستاهل نظره منك امش فكنا
احمد: مثل ما قال ما تستاهل نظره مني
وطلع خلا له المكان لاكن سيف مع عصبيته الزايده طلع لحقه ومهند وراه ..
مهند: اقصر الشر يا سيف خلاص انتهينا
سيف: لا ما انتهينا انا اعرف كيف اادبه الكلب
وركب سيارته لحق احمد وسلطان ...
في سيارتهم
احمد: كان خليتني عليه هالحيوان انتف شنبه اللي باز فيه
سلطان: هدي اعصابك والله واحد مثله ما يستاهل شئ ... انت اعلى من كذا
ناظر سلطان من المرايه يشوف السيارات اللي وراه علشان يلف وبالصدفه لمح سياره سيف ومهند
سلطان: يووووووه ... ربي بلانا بواحد عربجي شفه ورانا
التفت احمد: زين .. علشان اعرف اتفاهم معه زين .. وقف على جمب
سلطان : اقوووول اعقل وانا خييك وش اللي اوقف ... خل الليله تعدي على خير
احمد: بتعدي على خير ان قتلت هالحشره
سلطان: استغفر الله ... مانيب موقف طيب
احمد: اوكي بيلحقنا و بتوقف عند البيت وانزل له الكلب
ظل سيف ورا سياره سلطان من شارع لشارع ومن لفه للفه وهو متوعد في احمد لا يوريه الشغل زين , كان معصب و واصله معه الاخلاق فاي شخص قدامه يطلع حرته فيه وما يدري ان احمد اخو مشاعل ولا لاحظ الشبهه بينهم .
مهند ومل من الحاله: اووف خلاص ياخي فكنا وين حنا فيه تنتقم منه لشئ بسيط
سيف: اذا مو عاجبك انزل .. انا اليوم فيني شئ ابي اطلعه هالنتفه اللي قدامك لاوريه نجوم القايله
مهند: خير انشاءالله معصب ومتضايق من نفسك تطلع حرتك في غيرك ..سلاماااات
سيف: الله لا يسلمكم زين ..
حس مهند بقوه الرد و تضايق من اسلوب سيف , ما نزل وحب يكون مع سيف يشوف وش نهايتها لانه مجنون ممكن يسوي أي شئ اذا عصب.
************************************************** **
رجعوا للشقه و الكل فرحان الا هند ضايق صدرها على شنطها المسروقه
هديل: وشفيها هنووده متضايقه لايكون شفتي شئ حلو وماشريتيه اعرفك
سعود: أي والله وشفيك مبرطمه خيتووو
هند: شنطتي انسرقت
هديل+سعود: ااااااااااااش ..احلفي !!
هديل: شلون انسرقت؟
سعود: وين انسرقت؟
هند: كنا نمشى بالسوق الا جا واحد طاير وخطف الشنطه وفيها فلوسي والجوال وعطري
هديل وسعود فيهم الضحكه على شكل اختهم ..
هديل: كم فيها
هند:100...المشكله عطري ذاك ابيه
سعود: اشتري غيره
هند:قديم يالله القاه...الله يقطع يدينه هالحرامي
سعود: كان ركضتي وراه
هديل: أي والله وصرختي تعالا يا ولا تعالا
الكل ضحك حتى هند اللي متضايقه ضحكت من اسلوب اختها
ام سلطان : ادعي عليه وربي مابيضيع حقك
************************************************** *******
حسين له دقيقتين وهو يدخل غرفه نواف يصحيه من النوم ولا يقوم ..
حسين: نواااف ..نوااف قوم ما صارت نومه قوم صلي
نواف:همممم ..خلاص اطلع بقوم الحين
حسين: منب طالع الين ما تقوم .. لا تفوت الصلاه اهم شئ
نواف:لا حوووووول خلاص قلت لك بقوم
حسين: طيب قوم اقعد على السرير ابي اشوفك
نواف وهو قايم :هاه قمت خير
حسين: قم صلي
نواف: طيب اطلع اول فكني ياخي
حسين: طلعه منب طالع ..قوم <<< قالها بصراخ
وسمع له نواف وقام للحمام
حسين: ناس ما تجي الا بالعين الحمرا...لا تطول بسرعه ورانا طلعه
طول الفتره اللي هم بماليزيا كانت علاقه نواف بحسين متغيره كلها هواش و صراخ من قبل نواف ومرات برود وكسل .. احتار حسين بامره واستغرب من اسلوبه الجديد ما صار نواف الاولي اللي يضحك ويمزح وراعي سوالف و وناسه .
************************************************** *****
وصلوا لبيت احمد وقف سلطان , نزل احمد بسرعه علشان يستقبل سيف ويتفاهم معه... اما سيف اول ما لف وراهم شاف ان الحي مو غريب عليه و صفت البيوت قد مر من قدامها بدا يخفف السرعه ويتلفت كانه يدور على شئ
مهند لاحظه وقال: وشفيك
سيف:لحظه ..هالشارع مو غريب علي مره جيته
يوم التفت لمكان سياره سلطان وقرب منها شاف احمد واقف عند باب بيتهم ومكتف يده ينتظره ينزل وسلطان بالسياره ما تحرك يبي يشوف نهايتها مع هالاثنين المجانيين
سيف يكلم نفسه بصوت شبه مسموع: وين ياربي وين
ومهند يناظره باستغراب الين ما اخترع من شهقت سيف
_معقوله ..لا مستحيل
مهند:وشفيك خوفتني
سيف:لحظه شوي
ونزل لعند احمد ..مهند يصرخ عليه: سيف ارجع تعوذ من ابليس
سلطان وهو في سيارته يتمتم: الله يستر وفتح الباب مستعد للنزول
قرب سيف من احمد بهدوء وقال
_هذا بيتك
احمد: لا بيت الجيران وشرايك يعني
سيف: لا ولا شئ ...
ناظره بهدوء وراح , وقتها ارتاح مهند وسلطان من هدوء اعصابهم , ركب سيف السياره دعس على البنزين ومشى بسرعه والكل مستغرب من حركته وتغييره المفاجئ
وسلطان بعد ما تطمن على الموقف مشى لبيته ودخل احمد يرتاح .
في السياره..
مهند: أي قولي وشفيك
سيف: تخيل هذا بيت مشاعل
مهند:نعم !! من جدك انت
سيف: أي والله بيتها تخيل بس..اذكر مره وديت اختي لها هو نفس البيت ونفس الباب ونفس كل شئ
مهند: زين ما تهورت اكثر ... يعني هذا اخوها
سيف: اكيييد...الله يقطع الشيطان يا شييخ
مهند: الف الحمدلله انه اخوها ولا كان ارتكبت فيه جريمه .. كل هدوء الاعصاب ذا علشان الشئ يخص الحبيبه
سيف: هذه مشاعل مو أي شئ
مهند : اوووخص وش ذا التطور هع هع ... كل ذا حب هذا وهي صادتك اجل شلون لا حبتك ..اااهـ منك يا حب عذبت قلوب الناس.
الجزء (16)
اخيرا و الحمدلله اكتمل المبلغ المطلوب لدفع الغرامه وخروج ابو علي من الحجز وكله كان بفضل الله ثم شغل ملاك وعلي البسيط .. يوم شافت الجده اهتمام احفادها بابوهم رجعت لهم نص المبلغ الخاص فيهم وحطت الباقي و دفعوه وطلع ابو علي ..
بعد اسبوع رجعت ام سلطان وعيالها للسعوديه بعد فتره من التغيير و الترفيه عن النفس قبل الدراسه و الكرف مره ثانيه ..
**********************************
حنان: دووم فرحانه وش الطاري
ملاك: يدوم عزك يا عمري انتي ... فرحانه لشيين اولهم طلعت ابوي من الحجز
حنان: الحمدلله على السلامه ... اخيرا قرت عينكم بشوفته
ملاك: الله يسلمك ..اسمعي الثاني و الاهم
حنان: هاتي اشوف
ملاك: نواف ..
حنان: وشفيه جا خطبك
ملاك:لاااا بس شكل النتايج بدت تظهر تخيلي رجع امس وسمعت خالتي تقول غريبه رجعته وهو ما عنده اجازه
حنان:لاااااا... يا حركااات عقبال ما يدق بيتكم ويطلب يدك
ملاك:اميييييين الله يسمع منك ... ما تتصورين شكثر انا فرحاانه بتشقق من الوناسه
حنان:هههههههههه يا حبي لك وانتى مروقه ومستانسه تهبلين
ملاك: يووووه يا حنان ما تتصورين قد اش اعشق هالانسان واتمناه تعبت احلم انه يكون قربي
حنان: بتكمل فرحتك وانتى جمبه انشاءالله
ملاك: انشاءالله يارب
صحيح كلام ملاك ان نواف رجع للخبر مع انه ما وعد اهله برجوعه وماله وقت طويل .. كان تعبان و مو على بعضه فاضطر ياخذ اجازه اضطراري كم يوم ورجع لاهله
*******************************************8
ام نواف بفرح: دام نواف رجع ما بفوت علي الفرصه
مشاعل: ليه وش بتسوين
ام نواف: نسيتي انه خاطب لميس و انا حددت مع امها أقرب اجازه له يجي فيها يملك على لميس و يصير العرس هو اللي بقى لنا
مشاعل: والله فكره حلوه ... قلتي له
ام نواف: بقوله لا قام من النوم و ان وافق كلمت رنا وخبرتها ... يارب يسهل عليه انا ما بيرتاح قلبي لين يتزوج او على الاقل يملك
مشاعل: ماشاءالله العالم كلها بتتزوج حتى هند مدري متى بتملك
ام نواف: الله يوفقهم ..اهم شئ ولدي يستقر
********************************************
داخله جو مع دقات الاغنيه وتستشور شعرها بعد الشور اللي خذته ... دخل سيف وطفى الاغنيه وقفت شمس الاستشوار و التفت عليه
_اهلين خيو كيفك
سيف: شو عندتج تحرقين في هالشعر عازمه احد
شمس:لا مو عازمه احد بس توني متسبحه لا اكثر
سيف: الا شلون ربيعتج مدري وش اسمها نسيت <<< مسوي لي نسى مشاعل
شمس:منهي مشمش ..مشاعل من زمان عنها
سيف: أي مشاعل ...ليش هي مسافره
شمس: لا موجوده بس مدري من فتره ما كلمتها تقريبا اسبوع
سيف: مالتج خاتمه دقي شوفيها يمكن تعبانه او فيها شئ .. هي ما قصرت يوم كنتي بالمستشفى زارتج هناك وبالبيت
شمس: اوك ..بكلمها باتشر
سيف: اقولتج شئ ما تصدقينه صار لي قبل اسبوع
شمس: شو صار
وحكى لها سالفته مع احمد اخو مشاعل اللي صارت له بمحل البلياردو الين ما وصل لبيته
شمس: من جد ... زين ما تهورت اكثر وذبحته كان انا وهي بنفترق
سيف: اقولتج ما صدقت يوم شفت نفس البيت ويوم سالته قال أي ... حسيت اني احلم
شمس: شفت الصدف شلون باتشر اذا كلمتها بقولها اكيد اخوها قالها
سيف: عااد لا تزيدين الموضوع قولي ان اخوي ما كان يدري انه اخوها و وقتها كنت معصب و الاخلاق شينه
شمس: طيب ... الحين ممكن اكمل شغلي
سيف: هاتي انا بسوي لتج تراني خطير بهالامور
شمس: لااااا اخاف تحرق شعري تراه غالي واحبه
سيف: عاادي ينحرق اليوم بعد ساعه نحلقه لتج على الصفر وبعد شهر يطول خخخخخخخخخخخ
شمس: بسم الله علي .. ما ابيك تسوي شئ هات
***********************************************
ابو علي: من صدقك انت تشتغل بمقهى
علي: أي قلت بدل ما اقعد بطالي و الوقت طويل ما عندي شئ اسويه اشتغل احسن لي
ام علي: و الشغل مو عيب
ابو علي: بس مو بياع في مقهى ... انا يوم قالوا لي تشتغل على بالي شغل زين
علي: يبه تدري انا حتى ثانويه ما خلصت انشاءالله السنه الجايه اخر سنه , ما عندي الا شهاده متوسط و الشغل اللي انا فيه مو دايم بس فتره الاجازه
ابو علي: ياخوفي تتعود على هالشغل ويعجبك وقتها عاد تترك الدراسه و تتفرغ له
علي: لا انشاء الله بكمل دراستي و برفع راسكم بالمعدل الزين
ابو علي: نشوف مع اني ما ضنتي انت خلقه فاشل
بعد هالكلمه سكت علي ونزل راسه ضل يفكر بكلام ابوه ياما تمنى أي كلمه حلوه او تشجيع له منه بس للاسف لسانه طول ما تكلم وهو ينتقد او يحطم ... الشغل مو عيب ويحمد ربه ان ولده عقل و صار يحس بالمسؤوليه ويعتمد على نفسه مو كفايه هو نفسه ضايع يبي يضيع عياله بعد .
************************************************** ******
في بيت الجده ام خالد كانت قاعده مع بنتها ساره وحفيدتها عهود ماعندهم شئ غير التلفزيون و ساره على اللاب توب تحوس بالنت
عهود وهي تقلب مرت على قناه مغربيه فيها طبخ ... طلبت ام خالد توقف عندها
عهود: ما نفهم شئ كلامهم معجن
ام خالد: خليه نشوف اكلهم شكله زين ..
عهود: يوووه حطت بصل كثير ... عااد ما احبه
ام خالد: هو حلى الاكل
عهود:الحين لازم بصل في الاكل
ام خالد: أي معضم الاكل الا الحلى وفي اكلات ثانيه بدون
عهود: فاضيه والله اقعد اطبخ الله يخلي المطاعم
ام خالد:لا والله... المطاعم مو دايمه لك عيوني ... والله بكره لا تزوجتي و اعتمدتي على المطاعم ابشري ثاني يوم بحرمه ثانيه في بيتك
يوم سمعت ساره كلمه زواج التفت عليهم وقالت
_ انتى بتتزوجين ؟!
عهود:هههه لا من قال
ام خالد:شفيك اخترعتي ..اقول لو تزوجت وانشاءالله تتزوجين وافرح فيك انتى و الباقي
قالت عهود بنفسها:امين يارب ..الله يسمع منك اليوم قبل بكره
تغيرت ملامح ساره بعد دعوت امها و ضاق صدرها على حالتها المحزنه .. تحس ان كل عيال خواتها بيمشون بحياتهم ويتزوجون الا هي بتقعد في بيت ابوها ولا احد داري عنها .
******************************************
دخلت ام نواف بابتسامه حلوه على ولدها:صح النوم
نواف: هلا يمه ... حياك
ام نواف: هاااه عساك ارتحت
نواف: أي الحمدلله
ام نواف:زين قبل لا تطلع بغيت اقولك شئ
نواف: امري
ام نواف:دامك جيتنا هالايام وما عندك شئ والناس باجازه للحين شرايك تملك على لميس وما يبقى لنا الا العرس
ما تفاجئ نواف من كلام امه لانه كان داري ان جيتها لذا الموضوع .قال ببرود:
_ يمه ليش مستعجله
ام نواف: ابي اتطمن عليك والله اخاف عليك من هالغربه تضيع .. بعدين انت كامل والكامل الله املك الحين ويمديك تجهز البيت و حنا نجهز حفله الزواج ترا منا للعيد باقي وقت ولا شرايك .. عندك كلام ثاني
نواف: لا ما عندي كلام ثاني اللي تشوفينه
ام نواف: ترا الموضوع خاص فيك وهذه حياتك أي شئ في بالك قوله
تنهد نواف وقال بنفسه" وااضح ان الموضوع خاص فيني و الدليل بتزوج غصب"
قال: لا خلاص يصير اللي تبينه
ام نواف: زين الله يوفقك و يسهل عليك يمه وعقبال اخوانك يارب... يالله اخليك بروح اكلم ام لميس واقولها
طلعت ام نواف فرحاااااانه من موافقت ولدها وما تدري انها كل يوم تقتله اكثر وهو يتالم بصمت .. صاير هادي و بارد واحاسيسه ميته تجاه الكل مدري شلون بيكمل حياته ويتزوج ويعيش ... يمكن يتغير بعد الزواج او يمكن يظل نفسه .. غير كذا يمكن ما يصير اللي تبيه امه ويظل مثل ما هو او يتقدم لملاك ويتحقق حلمها..
كلها احتمالات و احداث مو اكيد تصير فقط توقعات .. محد يعرف وش يصير بكرهـ ..
************************************************** **
هند بالمطبخ تقلي السمبوسه اشتهتها ام سلطان وقامت هند سوتها .. دخل سعود
_يمممم في ريحه اكل ومو أي اكل ... لايكون رمضان بكره
هند: لا امس شرايك
سعود:باخذ هذه باكلها
هند: تستخف دمك هذه توها ما انقلت شوفها لينه
سعود:اووووه الجووع اعماني ..خلاص برميها في الزيت
هند: لا ترميها ترا يطش الزيت حطها شوي شوي
سعود: لا تخافين وانا اخوك شوفي المهارات ولا الشيف اسامه
ورمى السمبوسه في الزيت .. وطش على يد هند .. رمت اللي بيدها وصرخت من حرارته
_ااااااااااااااااااااااهـ يدي يا غبي ااااي
سعود بخوف:يووه والله ما ادري ..حطي لها مويه
مسك يدها وهي بعدته عنها :
_وخر عني ... عاجبك اللي سويته
دخلت ام سلطان بعد ما سمعت الصرخه : وشفيك عسى ما شر
هند: ولدك الغبي حرقني ..اااااي
ام سلطان:يووء بسم الله عليك ... روح جيب مرهم الحروق
سعود بتناحه:وين مكانه
ام سلطان: بالصيدليه اللي بالحمام بسرعه تحرك
هند: ااااااااي و الله يعور
بدت عيونها تدمع من الالم و الحراره هذا زيت مو أي شئ
رجع سعود يركض:هاك
ام سلطان:انشاءالله بيخف بعد المرهم
جت هديل وشافت الحادث البسيط اللي صار وشاركتهم عمليه الاسعاف , وبعد ما خلصوا هزئت سعود على جرح لاختها العزيزه
هديل: مو علشانك اخوي وصديقي في هالبيت بسكت هذه اختي العزيزه هند ما ارضى عليها
سعود: قولي قسم ..على بالي العزيزه تريزا ... جايتلي تدافع بعد ..فكيناا زين
هديل: عمتك هديل اذا تكلمت تسكت وتسمعها بدون ما ترد
سعود: عمتى طل ... الا شفيق غسال السيارات
طلعت ام سلطان وهند من المطبخ تاركين المهبل هديل و سعود يتهاوشون ..
ثاني يوم مشاعل جاها اتصال من شمس وردت عليها .. وبين السوالف قالت شمس لمشاعل عن سالفه اخوها سيف واحمد
مشاعل: أي قالي احمد بس ما كنت ادري انه سيف
شمس: الا هو كان وقتها معصب و اخلاقه شينه ...اقوله زين ما ارتكبت جريمه في الولد كان انا وياتج افترقنا
مشاعل: أي صح
وطول المكالمه وبالها مو مع شمس كانت تفكر بسيف وحركته مع احمد تحاول تحلل الموقف هل كان متعمد الحركه ولا ما يدري عن احمد ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك