رواية ماساتي في سطور الماضي -9
سديم : اسمعي أنا بريحك أنا كنت فاهمه كل شيء بالسيارة بس كنت استغبي أبي اعرف خالي وش مسوي
ساره : .......سديم أنا أنا
سديم : انتي وش
ساره : اسمعي بقول لك اللي صار
وقالت لها السالفة
سديم : والحين هذا اللي مشغل بالكم انتي وياه خلاص ولا تشيلين هم وبعدين أنا اعرف خالي اذا عطى احد ورد ابيض بينها احمر وش يقصد بها
ساره : ايه وش يقصد بها
سديم : ما اقدر اقول لك انتي اكتشفي هذي رساله لك أنا أخليك الحين وان شاء الله تفهمين الرسالة قبل لا تطير الطياره
طلعت سديم من غرفه ساره بعد ما زادت ساره حيره وراحت تمارس عادتها الكريمه اللي هي النت والكتابة
المهم فتحت المنتدى لقت رساله خاصة من الشامخ
" كيفك ملوكه شلون استعدادك للمدرسة أبيك تجيبين من العشر الأوائل لا تنسيني اخوك شموخ "
سديم " يالله هالولد بغيرني وانا مابي بس وش أسوي يالله مالي الا اسأل ريما بكره "قفلت بعدها وانسدحت على السرير
المهم سعود وتركي كانوا في الكافتريا
سعود : ولله من زمان عن الطلعات
تركي : انت اللي حابس نفسك في البيت مع النت
سعود: وش تبيني أسوي
تركي وبتردد: وش سويت مع عبير
سعود : خلاص
تركي : يعني وشلون خلاص
سعود : يعني خلاص
تركي : وشلون اقتنعت
سعود : اقتنعت وخلاص
تركي وبخبث : أكيد فيه احد غيرها
سعود : وش قصدك
تركي : مو قصدي شيء
سعود : ان كان قصدك سديم فهذي أخر وحده افكر فيها
تركي : ليه البنت ماسوت لك شيء
سعود : مولازم تسوي لي شيء
تركي : وأبوك
سعود : وش أسوي له
تركي : ما تخاف انه يزعل
سعود : يزعل يوم ويرضى
تركي :ليه أبي سبب مقنع واحد لرفضك لها
سعود : لا تسألني مادري
تركي :أبيك تجاوبني بصراحة متعرف على احد جديد بالنت
سعود : من أي جنس
تركي : لا تستغبي
سعود : لا
تركي : وملاك الحزن ما كلمتها ثانيه
سعود : ايه كلمتها
تركي : طيب ليش أسالك تقول لا
سعود : لأني اعرفها من زمان
تركي : طيب هي تعرف ان عبير كلمتك ثانيه
سعود : مافيه مفر بقولك السالفة وأمري لله
وقال سعود كل السالفة وحتى الرسالة اللي ارسالها
تركي : الله الله وش هالتطورات
سعود : ايه اجلس اضحك علي علشان كذا ما كنت أبي اقول لك شيء
تركي : افاااااااا أنا اضحك عليك لالالا ماتوقعتها منك
وجلسوا يسولفون
في بيت فهد رجع فيصل من عند عمه مهموم
حصه : وش فيك ياولدي
فيصل: مافيني شيء
حصه : وش قالك عمك
فيصل : يمه أنا تعبان إذا قمت الصبح قلتلك كل شيء
حصه : خلاص ياولدي على راحتك
دخل فيصل لغرفته وتذكر كل كلام عمه من يوم دخل عليه إلى ان طلع
فيصل : بس ياعمي أنا ما قصرت في شيء
يوسف : ياولدي أنا عارف
فيصل : طيب ليه تقول اني مو قد المسؤليه اللي عطانياها الوالد الله يرحمه
يوسف : انت شاب صغير ومن حقك تتمتع في حياتك وتتزوج وتشوف عيالك
فيصل : بس اللي تتكلم عنهم إخواني
يوسف : انت قالتها أخوانك مو عيالك وبعدين مصيرهم يكبرون ويتزوجون وانت بتكون لحالك
فيصل وفي لحظه صمت
يوسف : أنا مااقول هالكلام علشان تتخلى عن امك وإخوانك
فيصل : أنا عارف مو هذا قصدك بس وش تبيني أسوي
يوسف : تعالوا اسكنوا عندي بالقصر
فيصل : صعبه ياعمي وش بيقولون الناس عنا
يوسف : وش بيقولون أولاد اخوه سكنوا عنده وش فيها
فيصل : بس أنا ياعمي ما علي قصور ومعي فلوس تكفينا لأخر العمر
يوسف : أنا مو قصدي كذا ياولدي وان كان على الفلوس الله منعم علينا بها
فيصل : أسف ياعمي ماقدر على طلبك
يوسف : وان قلت اني بتزوج امك بعد ماتخلص عدتها
فيصل فتح عيونه بعد ماسمع كلام عمه
يوسف : لا تفهمني غلط ياولدي بس أبوك الله يرحمه وصاني عليكم وانا عارف انك مو مقصر بس أنا أبي أحس اني ريحت اخوي وحافظت على عياله
فيصل والدهشة مازالت واضحة على وجهه
يوسف : انت لاترد علي الحين لك إلى ان تخلص امك العدّة
يوسف حس ان فيصل ماراح يوافق من شاف ردة فعله
فيصل : طيب وإذا ما وافقت
يوسف : أنا أكون سويت اللي علي وماراح أتكلم في هالموضوع مره ثانيه ولله يعلم ان نيتي خير بكم وماراح اقصر عنكم بشيء والعذر والسموحه منك ياولدي أنا عارف اني فاجأتك بالموضوع بس انشاء الله انك بتتفهم موقفي
فيصل وبكل برود : أنا تأخرت على البيت مع السلامه
يوسف وحس انه استعجل بالموضوع : الله يحفظك ياولدي
أظنكم الحين عرفتوا وش كان يوسف مقرر
فيصل بعد مامر عليه كلام عمه حس بعذاب في قلبه وحس انه مقصر مع إخوانه بس هم مااشتكوا وفيصل زي ماتعرفون ماعنده أصدقاء يسولف عن اللي بخاطره لهم بس حس ان الوحيد اللي بيساعده في الموضوع هي سديم فقرر انه يفاتحها بالموضوع بس حس ان الوقت متأخر لذلك قرر انه يفاتحها بكره
طبعا أبطال قصتنا الموقرين كالعادة اللي عنده مشكله أو امر يتعلق بالقلب يجافي عيونه النوم بطل السهرة اليوم احمد
احمد وهو يقلب في جواله لقى "وجد " رقم غريب متصل عليه أكثر من مره بس مارد عليه المهم كانت كل المكالمات اللي لم يرد عليها العصر على المغرب المهم اتصل على صاحب الرقم
طبعا لالالا أكيد عرفتوا من صاحب الرقم أو بالأصح صاحبه الرقم كانـــــــــــــــــــــــت
المهم يدق عليها المره الاولى ماردت شافت الرقم غريب بس يوم كرر الاتصال كم مره ردت
ساره : هلا
احمد : آهلين
ساره : عفوا من معي
احمد : عفوا انتي متصلة علي كذا مره
ساره : لا غلطان ما تصلت على احد اليوم
احمد : عموما أنا حبيت أشوف من المتصل علي أكثر من مره
ساره : انت غبي والا تتغيبا أنا ما تصلت عليك وحركات هالمغازلجيه ماتنفع معي
وطرررررررررررررخ سكرت في وجهه
احمد "هذي وش فيها تتصل علي ثم تهزئني ولله بنات أخر زمن بس عناد مو عنادها برسل لها علشان تتأكد أنها متصلة "
وطبعا احمد سوى اللي في رأسه وأرسل لها رساله
ونعمه رساله وصلت لسارة فتحتها لقتها من الرقم نفسه
"أختي قبل لا تتهمين الناس تأكدي من جوالك وشوفي الاتصالات اللي مسويتها "
ساره طبعا ماردت عليه ولا كلفت نفسها تشوف الصادر من المكالمات
وفي بيت يوسف كان يوسف ينتظر ولده
سعود : السلام عليكم
يوسف : هلا ولله وعليكم السلام وينك غاط
سعود : ابد كنت مع تركي
يوسف : الله يعين هالتركي اذا تزوجت
سعود : وليه الله يعينه
يوسف :وين بيلقى احد يسولف معه ويدج هو وياه اذا تزوجت ماراح تطلع من البيت
سعود : وليه مااطلع من البيت انشاء الله
يوسف : بتقعد تقابل زوجتك
سعود : ايه اذا جاء هالوقت يحلها ألف حلاّل
يوسف : معد بقى شيء وانا أبوك كلها كم شهر
سعود فهم قصد ابوه وماكان وده يطول معه في النقاش لان ما فيه فايده مع ابوه : يصير خير يالله تأمر على شيء قبل مااروح
يوسف : وين بتروح وانت ماسالتني وش صار مع ولد عمك
سعود : مو وقته بكره سولف لي
يوسف : على راحتك
سعود باس رأس ابوه وصعد لغرفته
يوسف " يالله ماتوقع ولدي بيرضى على اللي أسويه أنا اعرفه مايبي احد يأخذ مكان امه بس النشاء الله يفهم الوضع وخلني أأجل الموضوع ولا اقول له شيء حتى يوافق فيصل وتنتهي عدت حصه"
سعود كان مستعجل وهو رايح لغرفته ماكان يعرف ليش بس كان يعرف انه يبي يفتح النت يشوف ملاك الحزن ردت له والا لا وللأسف خاب أمله يوم مالقى أي رد وتوقع إنها ماشافت الرسالة المهم الولد انسدح على السرير ونام وهو يفكر كيف بيكون رد ملاك الحزن وماكان يعرف سر هالاعجاب مع إنها توها في الثانوية يعني صغيره بس كانت تلفت الانتباه بسبب أخلاقها العالية وابداعاتها
أصبحنا وأصبح الملك لله لا اله الا الله
اليوم كان اول يوم دراسة في الفصل الثاني
حصه جالسه تصحّي العيال
حصه : ميونا حبيبتي يالله قومي
مي : خلاص قمت
حصه : يالله شوفي الفطور جاهز
اتجهت حصه لغرفه مازن
حصه : مازن حبيب امه متى بيصحى من النوم
مازن : أنا صاحي من زمان بس أبيك تجين تصحيني
ونقز"طمر" يبوس امه
حصه : فديتك جعلي ماانحرم منك
مازن: ولا انت يمه جعلي ماانحرم منك
وطبعا راحت لسديم لقتها "وجدتها" صاحية
حصه : صباح الخير
سديم : صباح النور
وكالعادة الأمر لا يخلوا من ان سديم تبوس رأس أمها
بعدها راحت تصحي ساره اللي كانت غرقانه في النوم بس الحمد لله صحت بدون خسائر محليه >وحده متاثره بالحروب
طبعا ما بقى الا فيصل راحت بتصحيه لقت "وجدت "انه قايم من بدري ورايح
اتصلت عليه تبي تشوف وينه هاجّ "يعني ذالف أو طاسّ أو رايح ">>اختاروا اللي يريحكم أهم شيء راحة الضمير (وحده مضيعه خخخ) له من الصبح
حصه : فيصل يمه وينك رايح له
فيصل : اول شيء الناس يسلمون
حصه : السلام عليكم وش أخبارك وش علومك هاه ارتحت الحين
فيصل :أولا الحمد لله بخير ثانيا أيــــــــــــــــــــه ارتحت هههه
حصه : اقول يابردك ياهالولد وينك فيه
فصيل : طالع
حصه : قل ولله أنا ادري انك طالع يعني وينك فيه
فيصل : عند زوجتي
حصه : شوفي الولد أنا خايفه عليه ومن الصبح ينكت الشرهة علي اللي خفت عليك
فيصل : وش فيك يالغاليه قلت لازم افتح نفسك على الصبح
حصه ساكتة
فيصل : وينك لا يكون زعلتي الا انتي ما اقدر على زعلك
حصه : ايه واضح ما تقدر على زعلي وانت من الصبح تستهبل عليّ
فيصل : افاااااااا ولله ياأم فيصل من يقدر يستهبل عليك وانا حي ّ
حصه : اقول خلنا من هالكلام وينك فيه
فيصل : رايح أشوف محل علشان استأجره وابداء فيه التجارة
حصه : واحد يروح من فجر الله ظنك من بيودي أخواتك للمدرسة
سديم وهي تسمع أمها : يمه أنا خالي بيجي يوديني علشان يروح مره وحده للمطار
حصه : لا فشيله الرجال بيسافر ويوديكم المدرسه
سديم : لا عادي هو بيفرح
فيصل وطبعا سمع النقاش : خلاص يمه هو يوديهم وانا أرجعهم
حصه : بكيفكم يالله مع السلامه
فيصل : فمان الكريم
وقفلوا
حصه : ولله ياخوفي نثقل على خالك
سديم : وش دعوه يمه هذي اول مره وأخر مره بكره اتصلي على السواق اللي قبل يودينا ماراح نتكل على فيصل والى بندج "يعني بنضيع أو بنخرب أو بننقلب >>مادري وش اقرب معني لها اللي يعرفها يبشر امه خخخخخخ
حصه : وانت الصادقة هالولد مدري متي بيعقل
المهم افطروا وبعد الفطور جاء خال سديم علشان يسلم عليها قبل لا يروح للمطار >>أنا داريه بتقولون كل هذا صار الصبح وانا اقول لله في خلقه شؤون
سديم : خالوا
احمد : وش ورى خالوا مو من عوايدك
سديم : افاااا ياخالوا طيب قل ياعيون خالوا
احمد وهو يقلد سديم :ياعيون خالوا
سديم : أبي منك طلب قبل لا تسافر
احمد :ياربي مدري متى بتخلص هالطلبات
سديم : اففف لها الدرجه طلباتي كثيرة وانا أمس احايل سارونه علشان ترضى عليك
احمد وفز قلبه يوم سمع اسمها : يالبى قلبها
سديم : نعم وش تقول
احمد : اقول أمري تدللي
سديم : أبيك توديني للمدرسة أنا وإخواني
احمد وكان يبيها من الله : بس هذا اللي تبينه ما طلبتي شيء
طبعا الكل ركب السياره بعد ما قالت سديم ان خالها هو اللي بيوديهم مازن كان قدام والبنات كلهم ورى وكانوا سديم ومي وسارة في مدرسه وحده طبعا وصل مازن اول شيء لان مدرسته اقرب وفي الطريق لمدرسه البنات
احمد : ما أوصيكم على الدراسة وخاصة انتي ياسديم أبي نسبه تبيض الوجه
سديم : افاااا عليك أنا طالعه على سوسو
مي : هذا أردى لك ما طلعتي علي
المهم ضحكوا الا ساره اللي قطعت عليهم ضحكهم
ساره وبعصبيه : ليه أردي لها
سديم : ساره ميونا ما تقصد كانت تمزح
مي : أسفه سارونه اذا زعلتي
ساره : خلاص ولا يهمك
احمد : عيني عليكم باردة بسرعة رضيتوا مو مثلي مجافيني النوم من يوم زعلوا علي الغالين
ساره ودها الأرض تنشق وتبلعها
سديم : افاااا من فيه غالي غيري وبعدين ليه تزعلهم دامك ماتقدر على زعلهم
احمد : ولله ما كان قصدي
سديم : تحمل ما يجيك
احمد : ايه بتحمل مالي الا كذا بس أبيهم يرضون قبل ما اسافر
مي طبعا ما فهمت ولا شيء من اللي أنقال بعكس ساره اللي وضح لها إنها هي المقصودة
ووصلوا الغالين للمدرسة
احمد : يالله مع السلامه اذا رجعتي من المدرسه اتصلي علي أنا بكون بالمطار
سديم والعبرة خانقتها : ولله بتوحشني ياخالي
احمد : سديم مابي دموع وكلها انشاء الله كم شهر وراجع لك بس بيضي الوجهه بالنسبه الحلوة وهديتك بتوصلك من ألمانيا
سديم : الله لا يحرمني منك
احمد وهو يطالع ساره قبل لا تنزل : وانت ياساره انتبهي لنفسك وانتبهي لسديم
ساره وهي شوي وبتبكي : لا توصي حريص تروح وترجع بالسلامه
أما مي سبقتهم ودخلت المدرسه
ساره وهي نازله بتلحق سديم
احمد : ساره
لفت ساره وبكل إحساس : لبيـــــــــــــــــــــه
احمد فتح عيونه : قلبي أمانه عندك
ساره وهي ماتدري وش تقول ركضت تدخل المدرسه
المهم لكم ان تتخيلون المناحة اللي سوتها سديم بالمدرسة وريما وسارة ورهف ومي ونجلاء وندى وحصة وسماح وأمل ونوره والجوهرة وميعاد ومنى ودليل يعني كل الشلة جلسوا يهدونها
بعد اختنا ما هدت في الفصل الحصة الخامسة كان عندهم فراغ المهم ريما وسديم يسولفون
ريما : يالله ما أسرع العطلة وراحت
سديم : ايه ولله بسرعة راحت الا تعالي
ريما : الحمد لله وين اجيك فيه أنا جنبك
سديم : لا يعني تذكرت شيء
ريما : وش تذكر أين شتاين على غفله
سديم : ايه تطنزي علي ّ من ينك انتي وجهك وهقتيني "ورطتيني"وبس
ريما: خير وش سويت
سديم : لا بس قلتي لي ردي على الشامخ
ريما : يووووووووووه والا الحين تذكرين
سديم : الا هو إلى الحين يذكر تخيلي 000000وق/ س هاه وش رايك
انفجرت ريما ضحك
المدرسه مهـــــــا : خير انشاء الله ياريما إلى متى وانا بقول ريما ريما اسكتي ترى بجيبك عندي
ريما وبصوت واطي : خخخخخ إلى بكره
مها : خير وش قلتي
ريما : ابد ياستاذه سلامتك
مها وبدت تعصب من ريما : شوفي ان سمعت لك صوت بتندمين
ريما وبكل براءة : انشاء الله ياستاذه
سديم : أحسن ليش تضحكين علي
ريما : حرام عليك ما ضحكت عليك ضحكت على الشامخ يمون يوم يقول ملوكه
سديم : الحين وش أسوي معه
ريما وبجديه : انت ليه حاطه بينك وبينه حواجز
سديم : ليه وش تبيني أسوي
ريما : سولفي معه ومع غيره عادي يعني وش فيها بياكلونك
سديم : بس انتي تعرفيني مو من هالنوع
ريما : أنا ما قصدت النوع اللي في بالك أنا قصدي كلميه مثل ما تكلمين فيصل في النهاية هو مايعرفك
سديم وبداءت تقتنع بكلام ريما : بس أخاف
ريما : ولله هذي اللي بتجلطني وش تخافين منه
سديم : مدري
ريما : أنا أعلمك تخافين يغير نظرتك للرجال ويبداء الحب تجاه سعود يرجع من جديد
سديم : أي حب وأي خرابيط وبعدين من قال لك اني أحبه
ريما : سديم بقول لك بس لا تزعلين انتي تحبين سعود ويمكن عقب اللي صار لك من عمك كرهتي الرجال بس سعود ما قدرتي تكرهينه انتي نسيتي قبل الحادثة وش كنتي تقولين عن سعود والى تبين أذكرك
كنتي تقولين يووووه ياريما أو تشوفين عيونه يالله من عيونه ونظراته القوية محد يقدر يفهم هو وش يبي نظرته اللي تزرع الخوف باعداءه والاحترام من أقرانه ووووو هاه تبيني أكمل بعد
سديم والعبرة خانقتها : خلاص ياريما خلاص لا تزيدين الجروح
ريما : أنا أسفه بس كان لازم أوعيك
وعم الصمت في المكان اللي قطعه صوت الجرس معلن انتهاء الحصة الخامسة
بدأت اسماء تقول ألمقدمه المعتادة
المعلمة اسماء : لازم تشدون حيلكم هالترم الحين الاسئله من الرئاسة وانت ياريما ما فيه تحذيف مثل الفصل الأول
ريما وبصوت واطي : يالله مو فاضيه لخفه دمك الحين
واستمرت اسماء في المحاظره إلى ان دق الجرس معلن نهاية الحصة السادسة وطول الحصة كانت سديم تفكر في كلام ريما
ريما وهي ملتفتة على سديم تبي تغير الجو بعد ما صفرت الحصة وكانت منتبهة لسرحان سديم : يالله ما بغت تخلص من بربرتها وأنتي ياريما ما فيه تحذيف كنّها الحين محذفه الفصل الأول
سديم وتضحك : الله يقطع بليسك
ريما : اقول خلي بليسي في حاله ووين اول خاطره بينزلها تركي
سديم : يووووه نسيت ولا يهمك عطيني ايميله وأرسل له الخواطر
ريما : خلاص بس وش تبين اسمك
سديم : مدري انتي وش رايك
ريما : خلاص مو مشكله الاسم خليه الانثى الجريحة
سديم: خلاص كل فتره برسل له
ريما : خلاص خليها كل اسبوع وش رايك
سديم : خاف ما يمديني اكتب شيء
ريما : مو مشكله اذا ما طلع معك شيء جديد أرسلي له من القديمة
سديم : ايه خلاص متى ارسل له
ريما : اليوم ادخل ردي على الشامخ وانا بعطيك الايميل وابدائي تكتبين اليوم
سديم k مومشكله
وبعد الدوام ما انتهى ورجعوا العايله للبيت اتصلت سديم على خالها علشان تودعه
الزبده أنهم ودعوا بعض "ما أبي أطول عليكم وأقول الحوار"
قفلت منه وبعد فتره دخلت عليها ساره
ساره : سديم فاضيه بغيتك شوي
سديم : افاااا ولله اذا ما فضيت لسارونه لمن أفضى
ساره : تسلمين
سكتت ساره شوي
سديم : يالله بسرعة
ساره : وش بسرعة
سديم : قبل ما تطير الطياره
هنا ساره فهمت من سديم أنها فاهمه وش تبي منها
سديم : هيه وين سرحتي
ساره : لا معك
سديم : ايه مره معي أنجزي علي "اخلصي علي" فهمتي وش معنى الورد
ساره : مدري يمكن
سديم : ايه وش فهمتي
ساره : يمكن يبي يوضح انه ندمان
سديم : ااااه منك يالقلب
ساره : وش فيك
سديم : لا ما فيني شيء انتي اللي وش فيك
ساره : ما فيني شيء
سديم : ليه تصرفين ولا تقولين الصدق
ساره : وش صدقه
سديم : أنا خالي يوم عطاك الوردة الحمراء يني انه يحبك انتي وماحب غيرك والورد الأبيض يبي قلبك يكون ابيض زي ما تعود انه يشوفه وتسامحينه وتقبلين قلبه اووووه قصدي حبه
ساره : لا صح عليك قلبه هو قال لي ان قلبه أمانه عندي
سديم : طيب وش تحترين اتصلي ودعيه
ساره : لا استحي
سديم : اقول خذي رقمه واتصلي
الجزء التاسع
وبعد التردد اتصلت على الرقم 0504000000
ساره : الوو
احمد وهو يشوف الرقم اقول ذي وش تبي واذا قلت لها شيء بتقول انت مغازلجي خلني ارد واشوف وش تبي
(طبعا عرفتوا انه يقصد الرقم اللي اتصل عليه في الجزء السابق)
احمد : وبعدين قولي ما أتصلت خلاص
ساره : عفوا وش قلت
احمد : اللي سمعتيه اختي
ساره : هذا مو جوال احمد الـ0000
احمد وبستغراب : وين تعرفين اسمي معه
ساره : ما عرفتني
احمد : لا ولله ما حصل الشرف وبعدين ليش تتصلين والا شفتي الرقم في الصادر وعرفتي انك متصله هاه عرفتي من المغازلجي الحين
سارة تذكرت كل اللي صار معها وحست بغباءها وعرفت انها هي وسديم اتصلوا على احمد يوم ما لقوه في السوق
ساره : احمد انا اسفه نسيت اني متصله عليك وماكنت مخزنه رقمك توني اخذته من سديم
احمد مو عارف وش يقول : من انتي
ساره : معقوله ما عرفتني
احمد : ساره
ساره : أيـــــــــــــه ساره
بعد فترة صمت
احمد : انا اسف
ساره : على ايش انا اللي مفروض اتاسف
سكتوا للمره الثانيه على التوالي وفجاءة كل الاثنين ضحكوا على غباءهم
احمد : ولله اني غبي مفروض اعرف انه رقمك
ساره : شلون بتعرفه
احمد : اعرفه وبس
ساره : ايه وشلون
احمد : خاف تزعلين وتسكرين في وجهي وما تكلميني
ساره : لا قول ماراح ازعلي
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك