رواية ولد الترف والدلال -5
ربى :قومي بأدق على (ساجد) قبل ما ينام خليه يطلعنا
مسكت ربى جوالها ودقت عليه وقالت له يجهز السيارة
وشوق وربى كل وحدة راحت تلبس ....
طلعو مع السواق وكانت الساعه حدود 10 ونص ....
شوق :تهقين أمي لو تعرف ما راح تقول شي
ربى :ما سوينا شي غلط رتاج تطلع وتجي على كيفها وش معنى
أحنا بأستأذان يله بس ........
قطع عليهم ساجد :وين روح ؟؟؟
شوق : المملكة
ربى : الفيصليه
شوق : المملكة مالي شغل
ربى :أقول يله بس أنا الكبيرة ..روح ساجد الفيصلية
شوق :اوووف
مشى ساجد رايح للفيصلية
وصلو في حدود الساعة 11 إلا عشر ...
نزلو كان السوق مليان شباب وبنات وعوايل من جميع الأشكال والألوان ..
ربى وهي تدخل محل ساعات :وش موضوعك اللي كنتي تبيني فيه
شوق : لا خلاص مو وقته
ربى : كيفك ...شواقه شوفي الساعه هذي مو حلوه
مسكتها شوق مع يدها :أقول خلينا نطلع بس
وطلعو من المحل
ربى :وش تبين أنتي خلينا نتفرج على الساعات
شوق :أبي عطر
ربى :يا حبك للعطور خليها بعدين
شوق تطنشها وتدخل محل العطور وعلى ذوق اللبناني اللي في المحل
أختارت العطر وحاسبت وطلعت لربى اللي تنتظرها برى ,,,,
شوق قربت تبي تتأكد : ربى
ربى :تغطي تغطي بسرعه
شوق بسرعه رمت الطرحة على وجهها ..:هههه وشووو
ربى : مدري شفت عيال مشاري مشو من عندي بس ما انتبهو لعمتهم
شوق :من جايبهم اليوم ؟؟؟؟
ربى : مدري تتوقعين ساره ؟؟؟؟
شوق : مدري ؟؟؟؟؟؟؟ما عزمتها صيته على سابع أختها ؟؟؟؟
ربى :مدري امشي بس نطلع ....
شوق:هيه ما تعشينا
ربى :نوقف في الطريق وناخذ سفري يله بسرررعه
شوق : ما راح اطلع تونا جايين
ربى :الجايات أكثر أقول يله امشي بس .............
ومشو طالعين وطبعا في كل مرة يطلعون يخلون السواق برى ينتظرهم حتى لو جلسو 6 ساعات ....
ركبوا وتوجهوا للبيت ....
بعد ما وقفو المطعم المفضل لهم (بيتزا هت )
وصلو عند البوابه ونزلوا ودخلوا .....
لكن المفاجأة ...
كان سلطان جالس في الصالة وجمبه مشاري ومعهم
أوراق ويتناقشون في موضوع
رفعو روسهم يشوفون اللي داخل البيت .....
مشاري :من وين جاين
ربى :ها مدري
شوق :رايحين السوق شريت عطر وجيت ....
سلطان :مستأذنين من مين ؟؟؟؟
شوق:من أمي
رجعو مثل قبل مع حوسة الأوراق ....
وربى وشوق على طول رقوا فوق .......
شوق:لو أنهم مو مشغولين كان استقعدوا لنا
ربى :ما عليك المهم وش كان موضوعك ....
شوق : لا بعدين ...
ربى : كيفك ....
واجتعو ياكلون عشاهم
حدود الساعة 12 ونص ....
دخل سلطان القسم حقه...
تسبح ولبس ثوب البيت ...
مسك جواله وفتحه من زمان مخليه مغلق ...
لقى رسايل كثيرة من حصه ...
تذكر أنها عند أهلها ...!
بيروح يجيبها بكرة ...
جلس يقرا الرسايل حقت حصه من الفضاوة واللي ما تعجبه يمسحها..!
منها :
مسيت ياعز المخاليق بالخير
كل الأمل تبقى حياتك سعيدة
احلم بشوفك حلم عطشان للبير
وأحسب مسافات الليالي البعيدة
بس المهم تكون مرتاح وبخير
ولا اللقاء ملحوق ربك يجيبه
ضحك ضحكة طويله اللي من دون سبب :والله انك يا حصه مريضة..!!!
.............................
في صباح جديد.......
في بيت قديم......
ماليه الحزن بعد رحيل الغاليه ....
الساعه كانت في حدود 7 .....
قامت حصه من النوم على صوت جوالها يدق من سلطان وردت وقال أنه عند الباب ينتظرها ...
كان نفسها تودع خواتها لكن النوم مجافيهم
خلتهم على راحتهم وطلعت ....
ركبت سيارة سلطان ...:السلام عليكم ...
ما رد سلطان ومشى يكمل طريقه
حصه :حمد لله على سلامتك
مارد
حصه:ليه مسكر جوالك ولادقيت علي
طالعها سلطان ورجع يطالع الطريق:اسكتي أحسن لك ترى أنا رايق مره
لا تعكرين مزاجي..!!
قالت حصه بصوت هامس :حمد لله على العقل
وفجأه ....
وقف سلطان على جمب ..........:وش قلتي تو ؟؟؟؟؟؟
حصه خافت: وش قلت ؟؟ماقلت شي
سلطان : اها ...انتبهي بس ....
ورجع ماشي للبيت ..........وحصه ماسكه عمرها لا تقول شي
لأنه شكل سمعه قوي
............................
معروف يوم الجمعه
الكل يجتمع على الغدا ,,,
وكانت الساعة في حدود 2 الظهر ...
وفي الصالة متواجدين رجال ونساء ...
(مشاري وزوجته وعياله ومشعل وزوجته وعياله وسلطان وحصه
والبنات ))
بدر يشد شعر دانه :مكانــــي أنا أول
دانه تفك يده :عورتني يا حمار
وتعطيه ضربه ناعمه على وجهه وهو ردها برفسه
قوية خلتها تطيح على الأرض ...
وعند المضاربه لا تعرف النعومه مكانها ..!!
قامت دانه بتردها له وتطقه وهو يردها
وطقه على طقه أعتلت الأصوات ...
وانتبه الجالسين للهوشة اللي تصير ...
ساره :بددددددر خل أختك في حالها
لكن ما يسمعها مندمج بالطق ...
هزت ساره مشاري يقوم يفكهم ما فيها حيل تقوم لهم وهي في الثامن ..
مشاري :دااااااااانه بدرررررررررررر
الكل سكت على صوته
و
دانه انتفضت على صوت أبوها
وبدر توقف عن الضرب ...
ربى :هههههههههههههههههههه
ههههههههه
ههههههه
الكل طالعها ومستغرب من الضحك اللي مو بوقته لقوها ماسكه جوالها ومنسجمه معه ولا تدري باللي صاير حتى ما اللتفتت على صراخ مشاري اللي متعودة عليه..!
دانه لم شافت كل النظرات عليها لأنها هي اللي انطقت صح من بدر
راحت تصيح عند عمها مشعل اللي جلس يهديها ....
بحكم أنه يوميا تمر عليه حالات صياح وبجميع الانواع ...
ورجع الكل يسولف مع اللي جمبه ...
صيته :إلا ليش ما جيتي أمس للعزيمة
ساره :والله ما فضيت رحت السوق أشتري ملابس للبيبي
وخذت العيال معي والتهو هناك
شوق :وين رحتو أمس ؟؟؟
ساره:الفيصلية
شوق : أها ...
ولفت لربى اللي سمعت ساره وين راحو بس مالفت تطالع شوق
بيشكون أن صاير شي ....
جى سلمان يصيح .....
صيته :وشفيك أنت الثاني
سلمان يروح لأمه :ضربني بدر
صيته :ساره شوفي ولدك
ساره :والله مافيني على طقاق بزران تصرفي أنتي لو تطقينه عادي
صيته : روح وخذ حقك بيدك لا تصير رخمه
سلمان زاد صياحه
رتاج :هه لا تفكرين لو لحظة بدر شراني ما يقدر عليه سلمان
صيته انقهرت :لا يقدر مو صح سلومي
سلمان يصيح
وفشل صيته ....
......مر الوقت وجى وقت الغداء وكان مثل العادة هدوء بسبب وجود الوالد
لكن البزران هم اللي كان لهم صوت بطبيعة سنهم ولسانهم ..
بعد الغداء أجتمعو مره ثانيه بس بدون وجود الوالد ......
وشربو الشاهي وسولفو وضحكو مع بعض ...
الكل كان مستانس إلا حصه اللي ساكته من جلست ,,,,
كم مره سألتها صيته عن خواتها وأبوها ووكيف بيعشون ومن بيربيهم ومن بيجلسون عنده ما كانت من باب الأطمئنان لا لأن عيونها كانت تتشمت لا أقل ولا أكثر ,,,
لكن حصه تجيب بكلمة أو كلمتين وتسكت ما كانت تبي تفتح مجال نقاش معها بتاتا لأنها راح تبدا بتجريح المشاعر ,,,,
...........................................
يوم السبت ...
أبو حصه : يله منيرة تأخرنا
منيرة :وين يبه الساعة 5 الفجر .....
أبو حصه:بأروح المدرسة تلقين ابو عبدالرحمن تعبان هناك يله مشينا
منيرة :طيب شوي ونجي
((أبو عبدالرحمن الحارس الأول ساكن في المدرسه هو ومرته ...
وأبو حصه الحارس الثاني معه مثل المساعد ويداوم من الصباح لين ما يطلعون البنات من المدرسة والمدرسات ويتأكد إذا كان فيه صيانه في المدرسة يجلس ويدخل مع العمال أحيانا يوصل جلوسه لأذان المغرب .......))
لطيفة طلعت وجلست في الصالة ومنيرة شوي وجت
وطلعو رايحين المدرسة .....................
.............................
شوق :أنا ما أبي كل مره أتأخر عشان ربى
أم مشاري اللي جالسه قبالها : طيب وش يضرك أنتظري خمس دقايق ...
شوق : ماما حرام عليك الساعة 7 إلا ربع وين أصبر وهي حتى ما تحركت من السرير ....
أم مشاري :روحي خل يوديك ويرجع بسرعه ,,,,,,,
شوق :وأخيرا فرجت ...إلا يمه ما راح تنقلوني خلاص
أم مشاري : لا دام العجوز ماتت خلاص ما يحتاج
شوق استغربت من طريقة كلام أمها و
لبست عبايتها وخذت شنطتها وطلعت مع السواق .....
............
حصه : سلطان قوم صارت الساعة 7 .....
سلطان يرمي البطانية على جمب ويقوم ........
تسبح ولبس ثوبه وشماغ وتعطر ....
حصه : جهزت لك فطور
سلطان :مستعجل ما يمدي ......
وطلع من عندها ......
وهي راحت تدق على أبوها تسأل عن أخبارهم لكن جواله مفصول عن الخدمه ...............
رتاج جالسه في غرفتها :تكفين قولي لها اني ما أقصد الكلام اللي قلته
بس قلت لها إذا بتطلع معه راح أقطع علاقتي معها
سديم : لا يا عيوني أنتي قلتي لها ..
العنود ترى ان طلعتي مع جابر ما تلومين إلا نفسك
وراح أقطع علاقتنا ...
رتاج :أنا خايفه عليها تركب معه
سديم : لا أنتي غيرانه منها .......
رتاج :سديم قدري وضعي أحبها موت وربي أحبها ومقدر أصلا أزعل عليها
سديم : بعدين العنود بوي مره وجابر يكلمها بس كذا
ولا لو يحبها بيروح لوحدة ناعمه ....
رتاج:يعني وش أسوي لها هي زعلانه علي اللحين
سديم : طال عمرك أكتبي لها شيك بخمس ألاف وبترضى على طول
رتاج بغباء: جد راح ترضى ؟؟؟؟
سديم : أكيد
رتاج :خلاص أنا ساعة ونص وأكون في الجامعه عشان تعطينها لها
سديم :اوكي أصلا أنا الساعة 8 هناك يله باي
رتاج :باي .....
قامت رتاج بسرعه تكشخ لحبيبتها العنود ....
اللي تسميها (خالد) ...
..............................................
ساره :بتوديني المستشفى الظهر ولا أروح مع السواق
مشاري : أرد عليك الساعة 10 إذا كنت فاضي جيت وخذتك
ولا خليتك مع السواق ...
ساره تجلس بثقل على الكنبه : لا تتأخر طيب ....
مشاري :من عيوني ......
طلع مشاري رايح لدوامه ..........
.....................................
مشعل جالس على مكتبه ..................
دخلت عليه الممرضة السعودية : دكتور مشعل أبدا أدخل الحالات
مشعل :ايه يله
وطلعت تنادي على أول حاله ,,,,,,,,
كان طفل عمره 3 سنوات مرتفعه حرارته وصف لأبوه دوا مناسب وطلع .......
والحالة الثانية كسر في اليد وجبروه له ..........
الحالة الثالثه لطفل مرتفع السكر عنده ...
وكان صياحه خل راس مشعل يصدع ........
وما صدق أنه خلص منه وطلع .........
دخلت الممرضة :دكتور مشعل ......مدير المستشفى يبيك ..؟؟
مشعل استغرب :وش عنده؟؟؟
الممرضة :ما ادري بس قال بسرعه
مشعل :يا ليت تجيبين لي مويه ......
الممرضة :مثل كل مره صداع صح
مشعل :ايه والله صداع ...
طلعت الممرضة وجابت مويه لمشعل وبلع حبة بندول وراح لمكتب المدير
طق الباب ودخل ورحب به أبو علي وجلسه ....
مشعل : بغيتني ؟؟؟؟
أبو علي : ايه بخصوص موضوع الممرضة إيمان اللي عندك
مشعل :وش فيها ؟؟؟
أبو علي : مقدمه على أجازة 3 شهور بسبب حملها ..
وجبنا بدالها ممرضه جديدة ....
مشعل :وش جنسيتها ؟؟؟
أبو علي : سعودية وترى كانت تشتغل في الوحدة الصحية وجبناها هنا
مشعل : أها طيب وإيمان متى تبدا أجازتها ؟؟؟
أبو علي : الأربعاء القادم
مشعل : والممرضة وش أسمها ؟؟
أبو علي :خذ هالملف فيه كل المعلومات
عن الممرضة وهي راح تجيك بكرة الصباح
حتى تعرفها على الشغل ...
مشعل : يصير خير ,,,,فيه شي ثاني ؟؟؟
أبو علي : لا مشكور تفضل على شغلك ........
طلع مشعل وراح لمكتبه .......
وفتح الملف حق الممرضة الجديدة ...
الأسم : وعد عبدالمجيد محمد ال.........
العمر : 25 سنة ..........
سكر الملف مشعل لأنه في حاله جديدة ..
................................................
في الجامعه .....
رتاج :خلاص رضت علي ؟؟؟؟؟؟؟؟
سديم :أكيد بترضى يا غبيه ما تلاحضين أنها تستغلك ...؟
رتاج :عادي
سديم : يوم من الأيام بتطفرين والسبه هي ...
رتاج : فلوس الدنيا تفداها ....بعدين أنتي ما تعرفين أنا بنت مين ؟؟
فلوس الدنيا كلها ما تسوى عندي شي .........
سديم : نشوف ........
رتاج :طيب قولي لها عادي أجي لها البيت ...
سديم : أنتي صاحيه ولا مجنونه
رتاج :ايش عادي؟
سديم: لا مو عادي تدرين كم أخو عندها
رتاج : قالت لي 5 أخوان ...
سديم : وكلهم فوق العشرين وما تزوجو
رتاج : طيب وش دخل هذا في هذا ...
سديم : لا تستغبين يا رتاج أقولك بيتهم مليان عيال وأمهم متوفيه
وش تتوقعين لو شافوك أكيد بيضايقونك ...
رتاج :لا حبيبتي مو لهدرجة وبعدين ما راح أطول ساعه وأطلع ,,,
سديم : روحي قولي لها أنتي
رتاج : لا استحي
سديم : يله بس ما راح أقول لها
رتاج : سدومه حبيبتي أنتي روحي قولي لها بليز يله يا طلبه ...
سديم :آه منك أمري لله ...
....................................
منيرة جالسه تفكر في حصه فيزياء .....
كيف تتخلص من الورطة اللي انحطت فيها ...
هند
تبي تجرها معها ....
ليه وش سوت لها .....
تذكرت الرقم ......
مسكينه هند ما تدري أن أمس انقطع التلفون عنهم ....
فتحت الكتاب تدور على الورقة ......
وانجن جنونها لم مالقتها
...............
الظهر في أحد البنوك اللي مخلي أبو مشاري يشرف عليها مشاري .....
مشاري : روحي مع السواق وجيبي العيال من المدارس لا تنسين ...
ساره :اوكي يله لا أعطلك عن شغلك
مشاري : لا يكون زعلتي ...؟؟؟
ساره : لا ما زعلت متعوده عليك يله باي ....وسكرت ...
مشاري حزت في نفسه أنه مهمل ساره وعياله هالأيام بسبب ضغط
الشغل .......لكن بيقول لأبوه يخلي ماجد يساعدهم بدل ما يصيع في أراضي مالها داعي ....
..................
رتاج واقفه عند محل الورد ....
بعد ما أخذت بوكيه الورد الأحمر ....
ركبت السيارة وراحت للبيت ونزلت عشان تبدل وتطلع ......
راحت بسرعه لغرفتها تدور على لبس يشرفها عند خالد ...!
طلعت تنورة كروهات أسود ووردي توصل لنص الفخذ ....
مع تشيرت وردي ناعم وعليه كتابات بالأسود ....
لبست كعب واطي أسود ,,,
فكت شعرها لأن العنود تحبه كذا ....
رسمت عيونها بالكحل السايل وحطت شدو وردي ...
وبلاشر وردي وروج فوشي غامق ....
لبست عبايتها وسكرتها عشان محد يشوف وش لابسه ,,,,
طلعت وقالت للشغالة تقول لأمها ما راح تتغدا معهم ....
راحت وركبت السيارة ومشت ...
وبأستحياء مسكت جوالها ودقت على العنود .....
العنود بصوتها الخشن :هلا وغلا بروحي ...
رتاج راح صوتها وما عاد عرفت تتكلم ...
العنود :رتاج وينك حبيبي
ضيعت الدنيا رتاج ...
العنود: يعني أسكر ؟؟؟
رتاج : لا خلودي
العنود :ههه وينك اللحين .......
رتاج : طالعه من البيت بس أبي الوصف ........
وجلست العنود توصف لرتاج بيتهم ........
لم بعد الحوسه وصلت البيت ........
استغربت أنه العنود ساكنه هالبيت المتواضع ...
نزلت بعد ما قالت للسواق ينقلع ...
ضربت الجرس وفتح لها واحد في حدود الـ28..........
الرجال : نعم ؟؟؟؟؟؟؟
رتاج : هذا بيت خا سكتت وقالت :العنود ......
الرجال:ايه من أنتي
رتاج :انا صديقتها
الرجال : أها ....طيب ..تفضلي ......
ومشى وهي مشت وراه ..........
لم دخلها الصالة .......
العنود تنزل من الدرج : هلا وغلا ...
رتاج تسلم عليها ....
العنود : افسخي عبايتك .....
رتاج تطالع الرجال وتطالعها يعني أفهميها ,,,,,
العنود : لا عادي هذا أخوي طلال قد قلتلك عليه ,,,,
رتاج :طيب نروح غرفتك أحسن ,,,,
العنود :اوكي ,,,,,
طلال : تستحي مني .......
العنود:أول مره بعدين راح تتعود ...!!!!!!
طلعت رتاج والعنود وراحو الغرفة ......
العنود : يله عاد ارمي العباية
فسخت رتاج عبايتها وحطتها على جمب ......
العنود :العن أبو ذا الجسم يا شيخة
رتاج أحمر وجهها .......
جلست رتاج على السرير وجت جلست جمبها العنود ومسكت يدها .......
العنود /: وشفيك حاره
رتاج : لا الجو حر
العنود : أها
رتاج تذكرت شي وشهقت
العنود : وش فيك
رتاج: الورد نسيته في السيارة
العنود :أي ورد ؟؟
رتاج :كنت جايبه معي ورد نسيتها في السيارة
العنود وهي تغمز لها :أكيد لي ؟؟؟؟
رتاج هزت راسها ب(ايه)
انفتح الباب عليهم وبعدت العنود شوي عن رتاج ....
راشد : من ذي ؟؟؟؟؟؟؟
العنود وقفت :هذي رتاج صديقتي
راشد يطالعها من فوق وتحت
العنود :تعال سلم ترى عادي الوضع
مشى راشد بيسلم عليها ورتاج تحاول تسحب العباية عشان تلبسها
وهي جالسه ارتفعت التنورة وما بقى شوي ألا نقول (ماله داعي لابستها)
مد راشد يده لرتاج : سلام يا حلو ؟؟؟؟
رتاج مد يدها :وعليكم .........
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك