رواية لو تنتثر احلامي برجع ارتبها -16
ساره: يلا يمه بروح اجيب عبايتي وبجي ..
العنود فزت بتروح تلبس عبايته بتجي
وقفها خالد: وييين وييين؟؟ ليكون على بالج بتجين؟
العنود بأستغراب : أي بجي ..
خالد يستعبط عليها: لا اسمحيلي انا بس بودي خالتي معاي
العنود التفت تشوف امها الي راحت وخلتهم وقالت: والله ماتطلعون من البيت الا وانا معاكم فالسياااره
خالد: شهالنشببببببببه !!!
العنود وهي تلف عنه بدلع: كيييفك عاااد ... وراحت فوق تلبس عبايتها وبسرعه تنزل عشان تلحق عليهم ...
في واحد من مجمعات الدوحه .. وتحديدا رويال بلازا المعروف بهدوووءه ومافيه ناس واجد بالكوفي شوب كانوا قاعدين جاسم ومقابله سعد الي طلب ان يقابله بمكان غير البيت !
جاسم وصله مسج اخذ تلفونه يقراه ويكتب رد عليه ..
وسعد الي مقابله .. شلون بقوله !! هو بيتقبل والا لا شمككن تكون ردة فعله؟؟؟؟
آآآآآوف ..
نزل جاسم تلفونه عالطاوله وقال: صج سلووم مفهي الحين العصر مطرش لي مسج عن الصبااح هههههه
ابتسم سعد .. واستغل الفرصه لان جاسم باين انه رايق وقال: ممم اقول جاسم انا بدخل بموضوعي الي ابيك فيه بسرعه !
جاسم: عيوني لك ياسعد امرني ..
ابتسمت سعد بأمتنان ..: عينك سالمه ياجاسم .. انا الصراحه انسان ابي اتزوج
قاطعه جاسم بفرحه: صجججججج؟؟؟؟؟؟ من سعيدة الحظظظظظ؟
سعد بتوتر .. : رضيعتك ! ( أختك )
اتسعت ابتسامة جاسم اكثثثثثر وهالي الي خلا سعد يفرح اكثر ماكان متوقع ردة فعل جاسم بهالطريقه ..
جاسم بفرحه : هذي الساعه المباركه ياسعد الي بتكون فيها نسيبي
سعد بفرحه : ساعتك ابرك ياجاسم .. ماتوقعت بتكون هذي ردة فعلك
جاسم وهو يضحك: ليش؟
سعد: يعني بدون مقدمات ولاشي عطيتك كاش
جاسم: احسسسسن تعجبني مااحب المقدمات الي ماوراها فايده خخخخخخخ
سعد: ههههههه بس في مقدمات تخفف على الواحد الصدمه
جاسم: يارجاااال خل هالخرابيط عنك خلك جي نفسي
سعد: هههههههههه .. نزين بس ابيك تشوف شرايها عشان عقب اتقدم لها رسمي مع الاهل
جاسم: خلاص ابشر لما ارجع اليوم بكلمها بالموضوع وان شاءالله بتلقى كل الي يسرك ياسعد .. تستاهل كل خير
ابتسم سعد بفرحه كبيره .. هذي الخطوه الاولى مرت بنجاح !
بس أكبر خطوه وهي ردة فعل ريم لان باقي الخطوات اسهل واحلى منها مافي ....
في بيت بوعبدالعزيز وتحديدا بغرفة عبدالعزيز الي دخل وباين عليه التعب
رمى بنفسه عالسرير .. التفت عليه خلود الي كانت تحط عبدالله الصغير بسريره مع اخته وقالت : شكلك تعباان
عبدالعزيز وهو يفك ازرة ثوبه وبعده منسدح: حدددددي تعبان .. انسدح على بطنه وهو يشوف خلود الي قعدت على طرف السرير بكل رقه وقال: عندي لج خبر بالنسبه لي وااايد فرحني
خلود بفرحه: خييير
عبدالعزيز: عطوني دورة لمدة سنه في فرنسا ! بروح وانتي وعيالنا معاي
تغيرت ملامح خلود وقالت: سنه ! نروح احنا واليهال؟
عبدالعزيز وهو مازال محتفظ بأبتسامته: أي سنه ولنا من هالسنه اجازة راس السنه الي بتقطعها !
خلود التفت تشوف عيالها الي نايمين ولابهامهم شيييي على سريرهم والتفت لعبدالعزيز من جديد وقالت: بس واايد واليهال توهم صغار
عبدالعزيز بدت تغير ملامح قام وقرب من خلود وقعد وقال: خلود انا مااقدر استحمل غيابي عنج فتره طويله عشان جي ابيكم تكونون معاي .. لاتنسين الدوله موفره لنا كل شي هناك اذا انتي معاي بتمر هالفتره بسرعه
دمعت عين خلود وقالت : مو متعوده ابعد عن اهلي بهالفتره الطويله
عبدالعزيز مسك يدها بكل لطف وقال: وبتقدرين تعودين على غيابي هالفتره الطويله؟
رفعت خلود عينها الي مليانه دموع وقالت له بكل براءه وبسرعه: لا ..
عبدالعزيز: عيل؟؟؟
خلود: ضروريه هالدوره؟
عبدالعزيز: بتزيد رتبتي .. وابتسم وعقب كمل وقال: انتي ليش خايفه؟
خلود مسحت دموعها وابتسمت ابتسامه زادت من حلاوتها وقالت: اروح معاك لأخر الدنيا بس اتم معاك
طبع عبدالعزيز بوسه كلها حب على جبين خلود
وقال بكل حب ورومانسيه: فديتج يا أغلى مااملك
ابتسمت خلود بخجل .. وتركت المجال لعبدالعزيز الي استغل هالوضع وتم يحرجها بالكلام ..
فالليل في بيت بوجاسم
دخل جاسم البيت .. مالقى احد تحت طفى الليتات وقفل الباب وراه وركب لدرج على طووول على غرفة ريم
طق طقتين عالباب وبسرعه انفتح الباب ريم وشعرها طاير وهي تأشر له: غرفتك منااااك ..
قاطعها جاسم وهو يضرب عالباب بقوه عشان يصرقعها وقال وهو يضحك عل شكلها: هههههه الشيخ جاسم بسياادتي جاايج غرفتج تطرديني؟ صج قليلة ادب
ريم الي معصبه عليه روعها قالت: وجعععع صرقعتني
جاسم: بطول عند الباب؟
ريم وهي توخر : تفضل .. سكرت الباب وراه وراح جاسم قعد عالسرير وريم سحبت كرسي التسريحه وقعدت عليه : امرني الشيخ جاسم !
ابتسم جاسم بكل غرور: احم احم ..
تكتفت ريم وهي تضحك على اخوها وحركاته العبيطه ..
وكمل جاسم كلامه وقال: اقامتج قربت تخلص فهالبيت !! اخيرا بنفتك منج
ريم الي شبه فهمت شيقصد قالت تتصنع انها مافهمت: شايفني خدامه اقامتي خلصت؟؟؟ تكلم عدل
جاسم بجديه اكثر: لا صج صج ريموه عندي لج خبر حلووو ...
ريم وقلبها شوي وبيطلع من مكانه لكن شكلها الخارجي كان عكس شكلها الداخلي قمة الهدوء .. قالت: شهالخبر؟؟؟
جاسم بفرحه : سعد نسيب عمي محمد اليوم خطبج مني
ريم اتسعت فتحت عينها عالاخر .. وقلبها زاااادت دقاته قالت بتوتر: آآآ...
قاطعها جاسم الي ماانتبه على توترها وقال وهو يكمل : الصراحه ريموه فرحت من قلبي لج صج هالانسان ينشرى وشخصيته واااايد تعجبني ورجال والنعم فيه بالنسبه لي كل شي فيه اوكي وانا اشوفه مناسب لج
..شرايج؟
ريم وقفت وقالت بسرعه: لا
انصدم جاسم ووقف هو الثاني: مابي رايج الحين .. فكري عدل وعقب قولي لي هالشي بيتم بينا
ريم بخوف قامت ترجف ماتدري ليش .. وصورة يوسف وسعد قدامها قالت : لا مايحتاج افكر جاسم .. انــ ـا مب موافقـ ـه
جاسم قرب من ريم وقال لها بكل حب: ممكن اعرف ليش؟ ... ( سكت شوي .. حاس ان اخته فيها شي وتوه يكتشفه قال ) كل الي جاووج قبل بأستثناء عيسوه مافي احسن منهم ورديتيهم ..
امسحت ريم دمعه خانتها وانزلت .. ايدها ترجف مسكها جاسم وضمها لصدره يحاول يخفف من رجفتها الي بانت واضحه ..
جاسم وريم بين ايديه تبكي بصمت قال: افتحي لي قلبج .. قولي كل الي بخاطرج ... وبجديه اكثر قال انا لازم اعرف سبب رفضج لسعد لانه مايتفوت ..
هدها وقال وهو يمسح دموعها: فكري عدل الوقت كله لج .. وبكره لنا كلام ثاني
في مدينـة دخان قريب الفجر على الساعه 2
توعى غانم بخوف وهو يقوم من قبضة تماضر الي ضغطت بأصابعها بقوه عليها وهي تصرخ : غاااااااانم انا تعبااانه ياغانم ......
غانم بكل خوف قام وهو مب مستوعب عدل: شفيج تماضر
تماضر ويدها على بطنها وتبكي بألم ..: تعبانه .. تعبانه غانم بموووووووووووت
نط غانم من سريره بسرعه ولبس ثوبه بسرعه ونزل تحت يركض شغل السياره وقربها من الباب وتركها تشتغل ورد يركض مره ثانيه للبيت داخل على طول عالدرج دخل الغرفه وتلفت ولقى عباية تماضر الي من جات امس وهي رمتها عالكرسي اخذها بسرعه ولبسها تماضر الي تتزوى من قو الالم ولف الشيله على راسها بحركه سريعه وغطاوجهها وشلها ونزل بحذر عالدرج وقلبه يعتصر على تماضر الي تتألم ..
حطها بالسياره وشخط بسيارته يسوق بسرعه جنونيه وبخوف كل شوي يلتفت على تماضر وهي تتألم
غانم وهو شوي يلتفت وشوي يشوف الخط قدامها ويقول: تماضر خوفتيني شفييج؟
تماضر بألم: ماادري حاسه اني بموت غاانم ماقدر استحمل
غانم: ولاده؟
تماضر من زود الالم مالها خلق ترد حتى.. قالت بألم فضيع: لااا مب وقتهاا
غانم بخوف اكبر: عيل شفيج؟
تماضر وهي تزيد بالبكي قالت: غانم والي يرحم والديك عّجل بموووووت
اسرع غانم بسيارته وهو خايف على تماضر ..
من جهه ثانيه وبنفس هالوقت كانت جواهر قاعده بغرفتها حاسه بجوع مب طبيعي .. قربت من الدريشه وفتحت جزء بسيط من الستاره وكأنها بتشوف خالد !
الي نايم ولاهو بحاس فيها .. تركت الستاره راحت لثلاجتها فتحتها لقت غراش ماي بس !
فتحت باب غرفتها بهدوء وطلعت كأنها حراميه !
نزلت الدرج بشوي شوي بتروح المطبخ الداخلي لعل وعسى تلقى شي يسد الجوع
والحمدلله لقت لها شي ينوكل سوت لها عصير وسحبت الكرسي واقعدت تاكل ..
ومن جهه ثانيه وصل غانم وتماضر للمستشفى وعلى طول طلب سرير وساعدوا وحطوا تماضر عليه الي تألم وتبكي وغانم يركض معاهم ويده بيد تماضر
لحد ماافصلوهم عن بعض وتسكر الباب بينهم !
ضرب غانم بيده بقوه عالباب بقهر .. وتراجع بخطوات ... وهو يتنهد بقهر وبخوف على تماضر
: شفيهااا؟؟؟ شفيها ليش مايقولون ...
قعد على اقب كرسي وتذكر ! محد يدري تضاايق هو مايعرف شيسوي هالحزه
ركب سيارته وبسرعه جنونيه كان يتخطى السيارات بيروح بيجيب امه تقعد معاه ومع تماضر لو احتاجتها
في خلال دقايق هو واقف قدام بيتهم كان باب الحوش مسكر دق الباب محد فتح له اتصل بسرعه على الدريول
الي قام من نومه بسرعه وفتح له الباب ودخل غانم بسرعه يركض
وفتح باب الصاله لقاه مقفول .. ضرب بيده بقوه وهو يصرخ : وقته .. اوووف ... طق الباب بقووه
في هاللحظات جواهر توها بتصعد الدرج ومع طقات الباب القويه تراجعت وراحت تطلع من الدريشه تشوف من والخوف يرجف بها رجف !
ولما شافت غانم بسرعه فتحت الباب كان شكله مبهدل
مسكها غانم وسحبها معاه .. جواهر بخوف وهي تحاول توقف: غانم لحظه شفيك.. والله ماسويت شي
غانم وقف والتفت بسرعه قال وهو يتنفس بطريقه غير انتظاميه قال: جواهر بسرعه الله يخليج تماضر فالعمليات ماعرف شفيها
جواهر بخوف: زين تبيني اطلع جذي .. تأشر على عمرها كانت لابسه بجامه قطعتين
غانم وهو يصرخ فيها: شتنطرييين روحي البسي عبايتج وتعالي يلااااا
راحت جواهر بسرعه تلبس عبايتها وترد ركيض وركبت سيارة غانم .. الي رد للمستشفى بسرعه صاروخيه !
وقف سيارته مكان مخالف وهو مب مهتم مهما كان سعر الغرامه !
وهو يمشي بخطوات سريعه وجواهر وراه الي ماقدرت تلحقه تخاف يختفي عن نظرها ...
وفنفس الوقت قلبها يرجف خووووف شفيها تماضر بالعلمليات
وقف غانم ووقفت جواهر معاه .. تلفت غانم لعل وعسا يشوف احد !
جواهر بخوف: شسالفه غانم فهمني
غانم بخوف وتوتر كبير: ماادري جواهر .. فجأه قامت تبكي تحس بألم قوي سألتها ولاده تقول مب وقتها مادري شفيها
جواهر بخوف: ان شاءالله ماعليها شر ...
طولوا اثنينهم وهم واقفين ينتظرون يشوفون طيف دكتور يمر عشان يتطمنون !
وبعد مرور وقت طويل .. طلع يطمنهم الدكتور .. بأن تماضر بخير
لكنها فقدت الجنين ! بسبب جفاف الماي حوله .. وهالشي سبب لها تسمم
وشكر غانم لانه لحق عليها قبل الوقت الضايع والا كان ممكن يفقد تماضر مع ولددهم الي راح ..
تراجع غانم بخطوات لورا وهو يمسح على وجهه براحه كبيييييييره وقعد على اقرب كرسي
قربت منه جواهر : الحمدلله على سلامتها ياغانم
غانم الي ماكان متخيل فكرة انه ممكن يفقد تماضر لو تأخر شوي قال: الحمدلله والشكر له يارب .. صج صج كنت راح اموت وراها !
جواهر: اسم الله عليكم انتوا الاثنين لاتقول جي غنوووم
غانم : ابي اشوفهاا
جواهر: تحت الملاحظه الحين ممنوع تشوفها
غانم تنهد ... اما جواهر قعدت جنبه وهي تحاتي شبتكون ردة فعل تماضر !
اشرقت شمس يوم جديد .. يوم توعى فيه خالد بكل نشاااط وحيويه
واخذ له شور طويييل يروق به نفسه بما ان اليوم السبت .. ماعنده دوام
طلع من الحمام وهو مستطرب يدندن لمحمد عبده ..
كل ما نسنس من الغربي هبوب
حمّل النسمه سلام
و إن لمحت سهيل في عرض الجنوب
عانق رموز الغرام ......
وقف قدام المنظره وهو يمشط شعره الي بدا يطول بطريقه مبهدله : لالا يبيله حلاااااق .. ومره وحده نضبط الزلف بعد ..
كشخ بثوبه وغترته وعقاله .. وكالعاده تسبح بالعطر !
واخذ تلفونه بينزل .. الا رن
رد بعد ماشاف اسم المتصل : هلااا وغلاااا ببوخالد
فهد: يـــــــــه شعنده الاخ رااايق
خالد: كل يوم رايق انا بس الظاهر انت ماتشوف
فهد: دوووم دوووووم ان شاءالله .. الصراحه توقعتك خااامد
ضحك خالد وقال: خمدت عليك طوفه .. وراي مليون شغله شلون اخمد
فهد: شهالشغل الي هل عليك في اخر الايام؟
خالد: بيييتي بعد شنو
فهد بفرحه بانت في صوته: لاتقووول تراضيتوا؟؟؟
خالد: هههههههه لا للحين .. بس ان شاءالله قريب
فهد: ان شاءالله .. نزييين عيل انا متصل ابي اعزمك عالريوق حدي رايق اليوم
خالد: خلها غدا ودام ان فيك طلعه .. قوم اجهز بمرك الحين بروح استلم بعض الشغلات الي طالبهم طلبيه
وبالمره تعطيني رايك ياذوق انت
فهد بغرور مصطنع: احم .. مشكللله الواحد اذا ذوقه حلو
خالد: ههههههههههه .. يلااا بسكر الحين عطني 10 دقايق وانا عندك
سكر خالد من فهد رفيقه .. ونزل تحت لقا جدته بالصاله وعندها لولوه اخته الي تلعب بلعبتها الي بيدها وحاشره المكان بصراخها وسوالفها الي ماينفهم منها ولاحرف !
واول ماشافت خالد ينزل الدرج هدت لعبتها وفتحت ايديها بمعنى شيلني .. الاخت على بالها كل مره تسوي هالحركه بيطلعها معاه هههه
اخذها خالد وقرب من جدته الي تكلم بالتلفون .. : الحمدلله على سلامتها .. الله بيعوضها ان شاءالله .... آمين ان شاءالله اهم شي قامت بالسلامه ... أي أي ان شاءالله خلاص اخلي خالد يجيبني .. ان شاءالله .. مع السلامه
سكرت الخط ودنق خالد على راسها يحبه .: تحب الكعبه يبه
خالد وقعدد وبحظنه اخته: حبتج العافيه يمه ..
ام سلطان: خالد يبه دام انك بتطلع نزلني على طريقك المستشفى
خالد: يمممممه بتأخر على فهود وانا وراي شغللل لازم اخلصه
ام سلطان: ششغله الي يوم السبت والناس اجازه؟
خالد: شغلات بتوصل اليوم ابي اخلصهم
ام سلطان وهي تقوم معصبه: بس بس روح كمل شغلك بقوم اجيب تلفوني اتصل بالدريول يوصلني ابرك
خالد وهو ينزل اخته ويقوم لجدته يحبها على راسها وقال: خلاااص ولاتزعلين بوصلج وعقب برد امر فهود او بخليه يجيني هناك جيبي عبايتج على مااشرب لي فنجال قهوه
ام سلطان وهي رايحه لغرفتها معصبه : لااازم ترفع ضغطي عشان توافق
خالد بصوت واطي وهو يقعد: وانتي لااازم تطلعين لي كل مابغيت اطلع بشغله !
في بيت بوجاسم كانت ريم توها متوعيه
سوت لها روتي وجبن وعصير وراحت للصاله شغلت التلفزيون .. وقعدت تشوف الا جاسم ينزل توه متوعي هو الثاني .. طلب من الخدامه تجهز له ريوق
وراح قعد بالصاله مع ريم ..
ريم توترت لوجوده هي فكرت بالموضوع صح
لكنها للحين مااستقرت على راي معيين .. استغربت ان جاسم مانطق بولا حرف !!
والصراحه هو لانه توه قايم من النوم وماله خلق سين وجيم فماتكلم .. وهو ناوي يسالها عن المووضوع
خصوصا بأنه متحمس واجد لهالموضوع ..
جابت له الخدامه ريوقه وتريق .. وراااق عالاخر وصحصح شوي
وقال وهو يشرب شوي من العصير: اقووول ريموه فكرتي بالموضوع؟
ريم اشتدت اعصابها والتفت له وقالت : أي فكرت
جاسم وهو يلمح حصه تشاركهم القعده وقال: شرايييج؟؟ شرسيتي عليه؟؟؟
توها بتكلم ريم .. الا حصه قالت : ها ريم كلمتي تماضر؟
ريم على طول جاوبت حصه وقالت: لا والله ماكلمتها اليوم اصلا هالاسبوع دوام واكيد مع غانم استحي اكلمها
جاسم: سؤااالج وقته غلط حبيبتي
حصه بخجل : ابي اتطمن على تماضر فديتها ..
ريم بخوف: ليش شفيها؟
حصه: انتي ماتدرييين؟
ريم بخوف: عن شنوووووو؟
حصه: تماضر من امس فليل بالمستشفى كانت تعبانه
وقفت ريم بخوف وقالت بصدمه: شفيهااأ؟؟؟؟
جاسم وهو يوقف: مافيها الا العافييييه لاتحاتييين .. بس قولي لي شراييييج؟؟؟ ترى الريال ينطرني
ريم بخوف: تماضر فالمستشفى وانا اخر من يعلم .. الله يسامحج جوجو ماقلتي لي
جاسم الي كلللش داش غلط قال: زين ماقلتي لي شرايييج ريموووه يالعله أي والا لا؟؟؟
ريم: صج متفيق جسوووم قوم ودني المستشفى الحييين
جاسم: اوكي بوديج قومي اجهزي
ماصدقت ريم خبر كانت بتروح بس مسكها جاسم وقال: موافقه؟
ريم وهي تسحب بيدها بتروح بسرعه تلبس قالت بدون تفكير: أي أي موافقه ... وراحت على طول عالغرفه
جاسم بفرحه: اخييييييييرا وافقت
حصه: على شنو؟
جاسم: على سعد .. التفت عليه وقال: تعااالي انتي من صجج جايه تقاطعيني ؟؟
حصه: على بالي تدري عن توته والله
جاسم بمزح يتصنع الجديه: اذا انا اتكلم انتي تسكتين تنطريني لين اخلص كلامي عقب تكلمي
استحت حصه واحمر وجهها .. وشوي الا ريم الي تنزل الدرج بسرعه وتوجه للباب: يلا جسووووم لانتأخر بمووت واشوف توتي
جاسم وهو يقرب صوب الباب: زين زييين كاني جاي
فالمستشفى
اخيرا الدكتور سمح لغانم بعد حنننننه يدخله هو بس عليها
رغم ان امها وابوها واخوانها ودهم يشوفونها ويتطمنون عليها بس غاانم كان حاشر الدكاتره الا يدخلونه
دخل بغرفه ماتخلى من اجهزة الملاحظه .. لقاها على سرير ابيض منزويه على جنب وشكلها يعور القلب
قرب منها بطلف مسح على وجهها التعبان وقال بهمس: حبيبتي تبكي؟
تماضر وهي تبكي بتعب: تعبي راح ياغانم
غانم وهو يمسك يدها: هذا المكتوب .. واللهم لااعتراض الله بيعوضنا ان شاءالله
غمضت تماضر عيونها ونزلت منها دمعه استقرت على الفراش الابيض .. ومد غانم يده مسح دموعها وقال: مابي اشوف هالدموع حبيبتي مااستحمل دموعج
:
:
:
:
مرت الايام يوم ورا يوم واسبوع ورا اسبـوع لين مامر شهر كامل
طلعت تماضر من المستشفى وريحت عند امها شوي عن التعب .. جاسم بلغ سعد رد ريم الي فرح من الخاطر وعلى طول طلب من امه واخته يخطبونها لها وخلال فتره بسيطه تملكوا .. وخالد تم يأثث بيته من الى بمساعدة خالته والعنود بنتها الي اثثوه احلى اثاث على ذوقهم .. وطلع بيته ولا احلى حتى الحديقه زودوها بكل لوازمها والبركه الي ورا البيت وطلع بيت راااقي وفخم بنفس الوقت فرح خالد من الخاااطر على مساعدتهم له .. هذا بالاضافه للدفعات المعنويه من ابوه الي كان ينصحه دوم ويرفع من معنوياته دووووم
ويحسسه بقربه دوووم
القى نظرة اخيره على البيت وهو يركب سيارته وطلع من اسواره متجه لبيتهم الحالي
دخل وطفى الليتات بما ان الوقت متأخر ..
وعلى طول على غرفة جدته فتح الباب بهدوووء ولفحه الظلام الي يغطي اجزاء الغرفه الا من اضاءة الابجوره الخفيييفه .. منها قدر يلمح هيئة ججدته الي كانت عالسرير وبيدها المسباح
ام سلطان بهدوء: تعال ياوليدي
دخل خالد بأبتسامه: ليش قاعد بالظلام يمه؟
ام سلطان وهي تأشر له يقعد جنبها: هالغرفه راح الي ينورها
سكت خالد وهو يقرب من جدته مسك يدها وحبها وقال: الله يرحمه .. ويطول بعمرج يانور البيت كله
ام سلطان وهي تمسح على راسه بحنان الام: فديتك الله يرضى عليك يالغالي ..
خالد : اذا انتي راضيه علي .. ربي بيرضى علي يمه
ام سلطان بحنان ونظرة الام: انا برضى عليك يوم بترد جواهر ياحبيبي
خالد وهو يحط جدته بيأيديه قال: بردها يايمه .. عيل انا اراكض كل يوم اعدل هالبيت حق من؟؟؟
ام سلطان: ماجبت لنا طاري انك بتردها
خالد: ابوي وعمي بومحمد يدرون بس هههههه .. وحبها على راسها وقال: وانتي الحين دريتي
ام سلطان: الله يرضى عليك يبه ..
ابتعد خالد عن جدته وهو يوقف : عيل بروح الحين انام عشان اقوم بكره اخلص باقي اشغالي تامريني بشي؟
ام سلطان: سلامة عمرك نوم العوافي يبه
خالد: الله يسلمج ويعافيج يمه ..
دخل خالد غرفته ورمى بنفسه عالسرير يحس بفرحه !
تذكر الدفتر الي بالدرج الكومدينا جنبه فتحه واخذ الدفتر .. وفتح عالصفحه الي كتب فيها بيانات جواهر وهو يبتسم .. يتذكر ذاك اليوم الي نست فيها شنطتها وهو من زود الفضول فتحها يستكشها وكأنه يحاول يتعرف على شخصية جواهر .. وسجل بياناتها عنده .. اخذ جواله يشيك عالتاريخ ابتسم وحط الدفتر والجوال جنبه عالكومدينا ورقــــد ...
من جهه ثانيه كانت متوعيه وحاسه بضيقه هالضيقه الي مافارقتها كللش من تركها خالد وهي قربت تخلص عدتها !!! وهو للحين ماجا
حزت بخاطرها حركته كيف يجفيها كذا وهي تعرف انه يموت فيها
ماتوقعت ان الي سوته تأثيره كبير لهالدرجه .. حزنت من الخاطر على الي يصير لها .. تنهدت وهي تقرب من التسريحه بغرفتها تشوف شكلها .. هالات سود تحت عيونها شعرها كله تلمه بطريقة مبهدله حتى لونه تحس قام يبهت .. ضعفت بزياده لبسها صار يوسع عليها .. انطق الباب وهي من زود الضيقه ماحبت ترد عشان يعرفون انها نايمه ويروحون !
رد وانطق الباب مره ثانيه .. جواهر بضيق: نعم؟
محد يرد .. لكن الطق مازال موجود لانه انطق الباب مره ثالثه !
جواهر سفهت .. انطق الباب بطريقه مزعجه مره ثانيه قربت جواهر من الباب وقالت بضيق: من عند الباب .. ترى مالي خلق احد ...
حست بشيط دخل غرفتها من تحت الباب دنقت الا تشوف ورقه بيضا اخذتها الا تشوف صورتها مع خالد
حزنت من الخاااطر تجمعت الدموع بعيونها وقالت بصوت مخنوق: بااايخه الحركه ياريموه ... وتمت تبكي بصمت
انطق الباب من جديد .. تضايقت جواهر وفتحت الباب بقوه .. وطاااحت عينها على ورده حمرا مربوطه بشريطه مخمليه حمرا من نفس اللون .. خليفة الورده كانت ثوب !!!
نقلت نظرها لليد الي ماسكه الورده .. هي تعرف هاليد عدل خنقتها العبره هي بحلم والا علم؟؟؟؟
رفعت نظرها بعيون كلها دموع .. وشافته بوسامته بأبتسامته بنظرته هو كله قدامها الحين ..
جواهر وعلامات الدهشه من ورا الدموع: خــ خـ ـالد؟؟؟
خالد بأبتسامه ولا اروع: كل عام وانتي بخير يااااكل الحب
جواهر وبدون سابق انذار رمت بنفسها بأحضان خالد الي ضمها هو الثاني بكل قوه وكأنه ماشافها من سنين
جواهر وهي بعدها تبكي بحظنه : ليش خليتني ياخاالد انا مت من بعدك
خالد: وهو ضامها: مو وقت العتب الحين وقفي خليني اوريج هديتج
ابتعدت جواهر عنه وهي تمسح دموعها بيد واليد الثانيه ماسكه فيها خالد : خايف يكون حلم ياخالد
خالد بضحكه حلو: لا علم علم ياجواهر .. انا لج
اخذ الكيس الي كان عالارض كان كيس فخم لمحل مجموهرات .. ودخل غرفة جواهر وسكر الباب وراه : هذي هدية عيد ميلادج تراها بسييييطه ومب قد المقام
جواهر وهي ترد تضمه من جديد: رجعتك لي اكبر هديه ياخالد .. هدته وهي تقوله بكل براءه : بتخليني مره ثانيه؟
خالد بحب ورومانسيه حالمه: امووووت ان خليتج مره ثانيه
مسحت جواهر دموعها بفرحه وبنفس الوقت بحزززن كبير .. حزنت على كل الي سوته خالد قلبه كبييير رجع لها أحلى واحسن من قبل
ماوعت الا بقبضة خالد على يدها وقال: لبسي عبايتج بسرعه
جواهر بأحراج: زين مالميت اغراضي؟
خالد بضحكه: بعدين لميهم .. تعالي بوريج هديتج الكبيره
جواهر وهي فاتحه عينها عالاخر: في اكبر بعد؟
خالد وهو يبتسم: بسررررعه يلا بتعرفين لما تشوفينها ..
فتحت جواهر الكبت وخذت عبايتها والبستها بسرعه وانزلت مع خالد الي وداها تشوف البيت
الي كان تأثيثه والبيت بكبره هديه لها راح يعيشون فيه باقي عمرهم يجمعهم سقف واحد مع الحب والموده والالفه .. اندهشت جواهر البيت صار احلى بعد التأثيث قالت وهي تنقل نظرها للبيت حولها: وااااو الصراحه ماقصرت ياخالد رووعه بمعنى الكلمه
خالد بنظرة حالميه : تستاهلين كل خير ياجواهر
جواهر بحب ممزوج بخجل: لهالدجه تحبني؟
خالد بحب كبيــــــــــر قال: وأكثـــــــــــــــــــــر
تمت بمحمد ـآلله ..~~
تجميع ورد جوري
اللهم لك الحمد حتى ترضى وإذا رضيت وبعد الرضى ,,, اضف تعليقك