رواية لو تنتثر احلامي برجع ارتبها -10
التفت له فهد : نعم؟؟ توك معامل وين تطلع استريييح يبه .. خلك عندهم تحت ملاحظتهم
خالد: لا والله قعدت المستشفى تمرررض الي مايمرض ابي اطلع زهقت
فهد وهو يحط رجل على رجل .. : خل عنك الكلام الفاضي وقول لي اتصل فيك ليش ماترد؟؟؟
خالد : ياخي التلفون مب عندي هذا عالطاوله تبيني اقوم له يعني؟؟
فهد وهو يشوف خالد بنص عين: الي عندك ماتسمع تقوم تعطيك اياه؟؟؟
تنهد خالد .. وقال : ماطلبت منها !!!
فهد وهو يقرب من خالد: لاتقول هذي مرتك؟؟؟؟
خالد بضيق واضح: أي !
فهد : شصاااير بعد ياخالد تكلم اشوفك متضايق !!
خالد: ماصار شي ...
فهد: يعني ماتبي تقول؟
خالد: شقولك ماصار شي فهود ..
فهد: اوكي اووكي .. من متى تخش عني؟؟؟
خالد بضيق: مااخش عنك يافهد لاتضايقني زياده
فهد: عيل ليش ماتبي تقول شفيك؟
خالد: لاني بنفسي مابي اتذكر شالي صار ... وثاني شي مافي شي تغير على حطت يدك يافهد
فهد بضيق : ياااخي انت بعد اعرفك اذا عاندت خلاااص يصير راسك ياابس
خالد : اعاند على وشو؟؟ والله ماتدري انت بالي يصير يافهد .. العلاقه ماعاد فيها رجا شكلها اختربت انا مابي اخسرها .. بس شكلي بخسرها !!!!
انصدم فهد من هالكلام وقال : لالا ياخالد لاتهور !
خالد: صبرت وتحملت شهور ييافهد ماعاد فيني اتحمل اكثر
فهد: معليه اصبر عشان لاتندم عقب
سكت خالد ماعنده رد .. حده متضايق .. وقال بضعف: زين شسوي؟؟؟ كل شي سويته ماعاد يفيد شي
فهد: حاول معها باللين ..
مر اليوم بدون أي تغيير هادي جدا ولا فيه احداث تذكر .. اليوم الثاني الصبح توعت ريم بسرعه والبست واستأذنت بتروح بيت جدها عشان جواهر دخلت الصاله سلمت على جدها وجدتها وراحت على طول فوق طقت الباب محد فتح لها .. طلعت هيا من قسمها وشافت ريم بالممر : مرحبا ريم
ريم: هلااااا هياا .. سلمت عليها : شخبارج؟
هيا: بخير الله يسلمج انتي شخبارج؟؟
ريم: بخير .. التفت للباب : تهقين جواهر قامت؟
هيا:هي اصلا مانامت هني عشان تقولين قامت .. توها جايه من بيت ابوها ..
ريم : ايييي صح بتصل لها الحين بشوفها تفتح لي ...
اتصلت ريم في جواهر الي ردت بتعب: هلا
ريم: هلا جوجو صباح الخير
جواهر: صباح النور .. انتي وين عند الباب؟
ريم: أي يلا انطرج
قامت جواهر من سريرها: جايتج الحين
فتحت جواهر الباب لريم ودخلت .. ريم الي كانت تشوف جواهر شلون شكلها ذبلان وباين عليها التعب والحزن قال : جوجو .. شمسويه بعمرج؟؟
جواهر بهمس خانقتها العبره والدموع بعينها : شمسويه؟
ريم ضمتها بقوه وقالت: حبيبتي كل هذا عشان خالد بالمستشفى صدقيني بيطلع قريب ان شاءالله وبترجعون لحياتكم طبيعي .. بس لاتسوين بعمرج جي انتي حلوه وين راح جمالج اختفه هالبقع السود تحت عيونج عيونج حلوه ليش جي ذبلانه؟؟؟ بشرتج ليش جي ناشفه .. جسمج الحلو ليش جي ضعفانه وايد؟
جواهر انفجرت بكي ورمت بنفسها في حضن ريم تبكي من جديد .. وهالشي الي خلا ريم تخاف اكثر: شفيييج؟ تكلمي؟؟؟ تكفين جواهر تكلمي والله الي فيج شي كبير مب بسيط ..
جواهر بصوت باكي : ماقدر ريم مااقدر اانا خلااص تعبت .. شهور عايشه عيشة ماهي عيشتي محد سألني شفيني والا شالي بخاطري .. وردت تدفن وجهها بحضن ريم تبكي ..
ريم الي نزلت دموعها غصبا عنها مع انها مب فاهمه بالضبط شالي تقصده جواهر قالت .. : حبيبتي اهدي انتي الحين وعقب قولي لي شسالفه .. تراني مافهمت شي ...
قامت جواهر وغسلت وجهها ومسحت دموعها .. وردت الصاله قعدت جنب ريم عالكرسي وقالت: ريم انا بقولج كل شي .. كللل شي تماضر تدري عن االي انا فيه بس مب التفصيل كل ماقلت لها انا ابي ارد بيتي اهلي ابي اتطلق ترفض وتعصب علي ... عقب مسحت دموعها وقالت : لانها ماتعرف شالي يصير لي ماتعرف كل شي ..
ريم: جواهر قولي لي شالي صاير ترى خوفتيني
قالت جواهر كلللللل شييي لريم الي انصدمت ووقفت : الصراحه انتي صدمتيني مب عارفه شقولج ..
وقفت جواهر وراها وقالت والعبره خانقتها : شفتي .. لاتلوموني ريم انا ابي اتطلق
التفت لها ريم: لا جواهر تحملي ترى صادقه توته انتي بعدج صغيره تبينهم يسمونج مطلقه؟؟؟
جواهر وبدت تنرفز: بالطقااق يقولون الي يقولونه .. انا ماابي اتم اكثر معاه انا كل يوم اموت محد حاس فيني مايهمني كلام الناس بعدني على قولتج صغيره والفرص قدامي ..
ريم : بس جواهر .. من كلامج عرفت ان خالد كلش ماقرب صوبج شتبين يقول عنج وعنه الي بياخذج من عقبه؟
جواهر توترت التفت بخوف وقالت: شبيقول يعني؟؟ ماله خص
ريم ابتسمت بخبث وضربت جواهر على كتفها بالخفيف وقالت: يعلللج ههههههههههه توج نونو ماتعرفين؟
جواهر استحت ولفت عن ريم وقالت: مب وقت استعباط وفلسفتج الشيخه ريم
ريم: انا مااستعبط ولا اتفلسلف اقولج الصج
جواهر: يعني؟؟ الزبده ؟
ريم: انج تقضبين ارضج
التفت جواهر توها بتكلم الا قاطعتها ريم: ادري انج ماتقدرين تمين معاه .. واعرف انه غلط عليج بس بعد جوجو انتي غلطتي عليه .. انتي جرحتيه لو ماتبينه كان ماوفقتي عليه من البدايه ترى محد غصبج
سكتت جواهر .. محد حاس فيني محد حاس اني وافقت عشانهم .. آآآه غلطتي يوم جازفت بعمري عشانهم الحين اكيد محد بيدفع الثمن غيري .. رفعت نظرها لريم الي نادتها: وين سرحتي جوجو
جواهر قعدت عالكرسي: معاج ..
قعدت ريم جنبها: ها شقلتي؟؟؟
جواهر بعد تفكير .. : عدل كلامج ..
باستها ريم على راسها وقالت: هذي جواهر الشيخه الي اعرفها .. التفت وراها واشرت على غرفة جواهر : عيل انتي تنامين في هذيك الغرفه؟
التفت جواهر تشوف وين اشرت وقالت: أي
ريم : والي هناك هذي الي فيها خالد صح؟
جواهر بدون ماتلتفت : أي
ريم: اهااا .. نزين بتروحين المستشفى؟
جواهر : مالي خلق اروح .. بس بروح غصب
ريم: يلا عاد جواهر لاتخربين حياتج
في جو لبنان
الحلو وعلى شوارعها ومناظرها الروعه كانوا يتمشون ويدهم مشبوكه ببعض .. غانم بحب: فديييتج تماضر احمد ربي الي جمعني بج
تماضر بخجل يالله ينسمع صوتها قالت: وانا بعد احمده واشكره ..
غانم: حبيبتي .. مرتاحه معاي؟
التفت له تماضر بدلع وقالت: هذا سؤال؟ .. اكييد مرتاحه معاك
ابتسم غانم وهو ذايب من شكل تماضر ودلعها قال: امووووووت انا تكفين لاتشوفيني بهالنظرات ترى كلش مااستحمل هههههه
استحت تماضر وتوردت خدودها ولاردت .. وفجأه رن تلفون غانم .. وطلعه من مخباه: هذا وقته يتصلون يخربون علينا .. خير ان شاءالله .. رد على الاتصال: مرحبا
جاسم: شعلييييييييك معرسنا اكيد الحين تمشى بالجو الزين ومستانس
غانم : يالملغ حاسدني بعد على هالشي .. شتبي اخلص تراك خربت علي
جاسم: لاااأ؟؟ عيل نصكر ماينفع الحين نقولك نخرب عليكم الجو .. بعدين اتصل فيك اقولك ههههه
غانم تنرفز: جسوم قول شصاير شسالفه؟؟ مكالمتك ماتبشر بخير ترى
جاسم: لاتخرع يارجااال .. بس حبيت ابلغك ان خلود امس صار له حادث وهو الحين بالمستشفى
غانم بخوف: شنووووو؟؟؟؟؟؟
جاسم : لاتخاف غنووم هو بخير الحمدلله بس الدكتور مخليه تحت الملاحظه من امس واليوم ويمكن عالفجر تقريبا ينقلونه لغرفه عاديه ترى مافيه الا
غانم: مافيه الا العافيه وتحت الملاحظه؟
جاسم: اييي لانه مسوي عمليه امس في يده كسر عميق فيها والباقي ماشي رضوض وسهالات العافيه وحتى في وعيه يسولف معانا ويضحك معانا شالوا المغذي منه وصار ياكل معانا هههههه
غانم : لاحول ولاقوة الا بالله .. نزين هو جنبك عطني بكلمه
جاسم: لا يبه وين ادخل تلفوني لغرفة الملاحظه؟؟؟ انا بالاستراحه الحين
غانم : تكفى اول ماينقلونه لغرفه خاصه كلمني ابي اكلمه اتطمن عليه ..
جاسم: صار ولايهمك .. يلا يالحبيب بس انا كفلوني اني ابلغك هالخبر ومضطر اسكر الحين ..
تماضر بخوف: شفيهم؟؟ من الي متصل فيك؟
غانم : لاتخافين حبيبتي خالد صاير له حادث وهو الحين مرقد بالمستشفى ويقول جسوم انه بخير واول ماينقلونه لغرفة خاصه بكلمه اتطمن عليه ان شاءالله ..
تماضر : سلااامته مايشوف شر .. فديتها جواهر مادري شصاير لها الحين ..
غانم بحب: تبين تتصلين لها .. مد لها تلفونه
تماضر ماكذبت خبر على طول اتصلت في جواهر الي ماكانت ترد لان تلفونها عالسايلنت وحاطته بالشنطه عند جدتها وقاعده عند خالد داخل ..
سكرت تماضر الخط قالت بخوف: ماترد ..
حط غانم يده ورا تماضر وكملوا مشي..: لاتحااتين حبيبتي ولاتضيقيج خاطرج تلقينها الحين راقده والا يمكن داخل عنده ماتقدر ترد ..
دخلت غرفته وهي تحاول تستجمع قواها وماتخلي افكارها تسيطر عليها .. دخلت وهي حاطه ببالها انها تحاول تكون لينه معاه يمكن هالاسلوب يجيب نتيجه ... قعدت جنب جدتها الي كانت تصب قهوه لخالد عشان يتقهوى .. وعقب التفت على جواهر بكل هدوء الي كانت
عيونها مليانه دموع .. : جهزي لي اغراض حق المستشفى شكلي مطول
جواهر والعبره خانقتها قالت: ان شاءالله ماتحتاجهم .. في هاللحظات طلعت ام سلطان الي تعبت من القعده تبي تروح البيت ..
التفت خالد لها وقرر يغير اسلوبه ويقسى شوي معاها لانه بدا يتنرفز وقال بعد ماطلعت جدته : لاا؟؟؟ من متى تبيني ارد البيت؟؟ الصراحه صدمتيني.. ماتدرين ان هالي انا فيه كله بسبتج؟
جواهر نزلت دموعها على خدها وقالت بقلة حيله : خالد والله ماكان قصدي اضايقك ..
التفت خالد عنها بدون مايرد عليها .. وهالشي الي خلا جواهر تحط غشوتها على وجهها وتطلع من الغرفه تبي تروح البيت خلااص ماتبي تم عنده هي كل يوم تغصب نفسها عالجيه قدااامهم عشان لايحسون ان في شي .. طلعت تسحب عمرها تجرجر همومها وراها .. كانت تمشي بثقل وتعب وفي نفس الوقت تصيح بدون صوت عشان لحد يحس فيها .. قرب منها ابوها : بنتي تعبانه فيج شي؟؟
جواهر من تحت الغشوه: لا يبه .. وسكتت لما سمعت ابوها الي قال بخوف: لا بالله فيج شي ليش تصيحين؟؟؟ تعبانه شي يعورج؟؟؟
جواهر تحاول تغطي: لا يبه مافيني شي ..
سلطان: لالا ياجواهر انتي اليوم بتردين معانا البيت لازم ترتاحين عندنا لين مايطلع زوجج
جواهر بقلة حيله اشرت له بمعنى أي .. وراحت تمشي ورا ابوها ...
وتم خالد مكانه مقهور .. على هذا كله تسوي نفسها بريئه وماسوت شي بتذبببحني هذي آآوف
طق .. طق .. طق .. دخل فهد بأبتسامه حلوه: هلااااا بالحلوييين
ابتسم خالد بدون نفس .. وقرب منه فهد وقعد على طرف السرير : لالا شكللك ابببد مب عاجبني
خالد بضيقه: واحد فالمستشفى شلون تبي يكون شكله؟
فهد: خلووود مب علي اللف والدوران قول لي .. شصار بينكم؟؟؟
خالد والدمعه لمعت في عينه : ولا شي تغير بالعكس زااادت العلاقه للأسوء ..
فهد: لحووووول ..
خالد: فهود
فهد: عيونه
خالد: عينك سالمه .. حبيبي انت خلنا نسافر
فهد: مب صاحي انت؟؟ تسافر وايدك جي؟؟
خالد: بنسافر علاج
ضحك فهد بصوت عالي وقال: هههههههههه علاااج؟؟ مايبيلها عالجوك هني كلها الا عمليه ردوا العظم مكانه وجبروه .. وهالشي يبيله وقت لا اكثر ولا اقل .. لاتفاول على عمرك
خالد بضيق: بس كيفك دبر لي سفره انا لازم اسافر
فهد: خالد من صجك انت؟؟؟ تسافر شتسوي؟؟؟
خالد: بس ابي ابتعد عنها شوي
فهد: هذا مب حل يا اخ.. هذا انت مبتعد عنها بالمستشفى وعلى قولتك ماتغير شي ..
خالد يفكر : نزين اوكي ماراح نسافر الحين بننطر فتره وعقب نسافر اوكي؟
فهد: على حسب تعرف انا رجال متزوج .. وضحك على شكل خالد الي كان يشوفه بنظرات تضحك
وعقب قال: ماودي اجرحك ياحبيبي بس الله بيعوضك خير خلود
ابتسم خالد وقال: الله كريم .. الله كريم
بعد اسبوعين مملين .
. طلع خالد من المستشفى بعد ماوصاه الدكتور على توصيات وفرحه بأن الحمدلله كسره انجبر بنسبة 15% عشان جي وصاه على اشياء ياكلها تساعد على جبر الكسر .. كل هالامور خذتها هيا وكتبتها عندها في ورقه وجواهر بعد كتبتهم في ورقه بعد ماقالت لها هيا .. عشان تجهزهم جواهر له ..
قعد خالد وهو يحسس على الجبس الي على يده .. : الحمدلله يمه الدكتور قال لي الكسر انجبر بنسبة 15%
ام سلطان: الله يجبر كسرك ياوليدي .. انا بسوي لك الحلبه تجبر كسرك
خالد: لاتكفين جدتي خلج مرتاااحه انتي لاتسوين شي .. التفت على هيا وجواهر وقال: هيا وجواهر بيسوون كل شي ..
ضحكت هيا ومعاها جواهر بهدوء .. هيا كانت بحضنها بنتها لولوه الي هي الحين صارت اخت خالد .. كانت نايمه مثل الملاك .. ابتسم خالد وهو يشوف اخته: فديييتها انا الي ناييمه قعديها خليني الاعبها ..
هيا بمزح: لااا توها نايمه الحين خلها تنام على راحتها .. ومسحت بالخفيف على جبتها تبعد قذلتها الخفيفه عن وجهها ..
ام سلطان: لا تشيلها وانت ايدك تعورك ..
خالد: يه .. جدتي تراها خفيفه مثل الريشه ماتضر
هيا بخوف: أي والله خالد خايفه يدك تعورك والا شي .. ماشاءالله البنت مليانه وخايفه تعور عمليتك وانت ماصارلك الا اسبوعين بعده جرحك طري ..
خالد: زين في خاطري اشيلها عطيني بشيلها بيدي اليسار ..
هيا: اييي وتطيح بنتي عالارض
خالد: يه ههههههههههههههههه
ام سلطان: جواهر قوميه امسكيها لريلج يلا خليه يبوسها عن خاطره
قامت جواهر بتوتر وشالت لولو الصغيره بحذر : بسم الله عليج .. وقربت من خالد ومدتها له وتم يبوسها شوي وهو يتفداها كان مستانس عليها .. وشوي شوي قامت الصغيره بملل وصاحت وهي تحرك راسها متضايقه من حركات خالد لها وهو يضحك عليها: هههههههههههههههههههه
ام سلطان: صيييحت البنت .. يلا عقبال ماتشيلين عيالج ياجواهر ... كانت هذي نغزه من الجده , وجواهر فهمتها وخافت ان البنت تطيح من يدها قعدت على طول جنب خالد وتسوي نفسها اونها تسكت البنت ..
ابتسم خالد بخبث وقال: آآميييين
انحرجت جواهر .. وضحكت عليهم هيا ..
وجواهر في خاطرها تقول شفيه هالانسان مزاجه متقلب !!
تماضر الي كانت تمشط شعرها .. دخل عليها غانم: فدييييييتها انا الي مقابله المنظره وتمشط شعرها الحلو
انحرجت تماضر .. وماردت
ضحك غانم عرف انه احرجها قال: حياتي
تماضر بدلع: آممر
غانم: مايامر عليج ظالم .. اليوم انا عازمج في افخم فندق فالدوحه بنتعشى فيه
تماضر التفت له بدلع وقالت: بس احس اني زدت عشرين كيلو كل يوم طلعات واكل
غانم قام من عالسرير وقرب لها: حبيبتي احنا للحين في شهر العسل ونبي نستانس .. بعدين مب على كيفج على بالج ببيت اهلج؟ خلاص انتي عندي وانا على كيفي اطلعج احبسج فالبيت كيفي هههههه
تماضر بحب: انت تامر امر ..
غانم وده يضمها بأقوى ماعنده بس خايف يحرجها قال : حياااتي انتي .. يلا لاتطولين ترى ميت جوووع
وابي استانس في اخر اسبوع في شهر العسل الاسبوع الجاي دوااااام
التفت تماضر له وقالت: الدوام لله .. بتاخذني معاك دخان؟؟
غانم بحماس: طبعاااا مأجر لي بيت هناك على حساب الشركه بنسكن فيه في كل اسبوع دوام لان صعبه كل يوم بنروح من الدوحه لين دخان !!! كم يبيلنا هههههه ..
في بيت خالة خالد ( ساره ) كانت قاعده بروحها بالصاله تشوف التلفزيون وحاسه بملل فضيع وفراغ كبير فالبيت , يابعد عمري يابناتي والله انكم تارسين علي البيت .. شوي وينفتح باب الصاله ويدخلون حصه والعنود وبأيديهم اكياس الدنيا هدت العنود الاكياس الي بيدها وعلى طول انسدحت عالكرسي: آآآه يمه تعبببت تعبت من المشي ظهري بينقص
حصه: وييييعه عندوووه شوي شوي عالاغراض ..
ضحكت عليهم امهم : هاا بشروا عسى استانستوا مع ابوكم؟؟؟
حصه وهي تنزل الاكياس الي بيدها بهدوء عالارض قربت من امها وقعدت جنبها: الحمدلله يمه شوفة عينج مو مخلي شي بخاطرنا وغير هذا تغدينا بمطعم كلنا مع بعض وسولفنا واستانسنا الحمدلله ..
ساره: الحمدلله .. تروحون معاي بيت خالتي ام سلطان؟؟
التفت حصه للعنود الي كانت عالكنبه الثانيه وقالت: مممادري .. انا بروح اخذ لي شور سريع واصلي العصر وافكر عقب انتي متى بتروحين؟
ساره: يعني بعد المغرب ابي اسلم على خالد فديته اشوف ايده شسوت واسولف مع خالتي شوي واجي ..
العنود بتعب: عيل انا مب رايحه يمه حدي تعبانه
حصه بخجل: ولا انا يمه استحي ..
ساره: تستحين من من؟؟ لاتحسبين ريلج بيجي هناك مايجيهم ..
انحرجت حصه وقالت: لا يمه مادري تعبانه اصلا مالي خلق .. شلت الاكياس الي لها وراحت غرفتها على طول ..
فتحت جواهر البلكونه الي بصالتهم فوق الي تطل على البركه وجزء من حديقة البيت كان الجو ولا اروع وبيدها ايس كريم باسكن روبنز الحجم الكبير بعد .... خالد الي كان منسدح على سريره يفكر حس بجوع مع ان توه متغدي من ساعتين ونص بس مايدري هالايام يحس بجوع بشكل مب طبيعي قام من سريره وراح المطبخ التحضيري والتفت لقى جواهر عالبلوكنه تتأمل وبيدها الايس كريم ضحك بدون ماتحس به وكمل طريقه للمطبخ فتح الثلاجه وطلع له جبن كرفت سكرها واخذ له روتي ومسح عليها الجبن سواله سندويتشتين واخذ له بيبسي وقعد عند التلفزيون .. رن تلفون جواهر وردت بسرعه: هلااا وغلاااا
في هاللحظات خالد وطى على صوت التلفزيون شوي عشان يسمعها .. انصدم مب هذي جواهر الي يعرفها كانت في قمة الفرحه تهلل وترحب وتسولف مب هذي جواهر الي يعرفها دايما ساكته ومب معطته أي اهتمام حز في خاطره هالشي وتم مدنع راسه وهو يسمع المكالمه الي كانت بين جواهر وريم ..
ريم: عاااد اقوولج يعني هو يوم قال لي صج ماتوقعت بيفتح معاي موضوع مثل جي ههههه
جواهر: اييي اصلا يوم قلتي لي قبل قاعده افكر ياربي شالموضوع الي افتحه معاها هههههههه
ريم: بس والله عرف يختار
جواهر: ايي والله
ريم: شتاكلين شكلج تاكلين شي
جواهر: اكل ايس كريم تبين خخخخخخ
ريم: يالييييت تعالي لي الحين جوجو
جواهر وطت على صوتها: وددددي بس ماقدر ههههه
ريم: آآآوف كلكم تزوجتوا ماعاد تفضون لي
جواهر: فديتج ريوم شكثر الي تقدموا لج ورفضتيهم لو موافقه كان الحين عندج عيال
ريم: ويييي اسم الله علي توني صغيرره .... شدي حيلج انتي وجيبي عيال
جواهر: يعني لازم تنرفزيني؟؟؟
ريم: قلت شي غلط؟؟
جواهر: لاااا انتي مستحيل تغلطين ... ريموه انا مشغوله اكلمج عقب
ريم: أي أي مشغوله تاكلين ايس كريم هااا والا ولهتي على حبيب القلب ..
صرخت جواهر لا اراديا تضحك قالت: باااي يالحيوانه هههههههههههههههههههه
ولا اراديا خالد ضحك وخلا الصحن وقوطي البيبسي الي باقي فيه لين النص تقريبا عالطاوله وراح داخل غرفته .. دخلت جواهر للصاله شافتهم تنهدت يعني شلون بقعد كل مره اشيل وراه؟؟؟؟ كيفه ماني بشايلتها خلتها وراحت غرفتها بتقعد عالنت .. دخل عليها خالد معصب: ماتسمعيني اناديج؟
جواهر بخوف من هالهجوم المفاجىء: ماسمعتك
خالد: طببببعااا وين تسمعيني وانتي حاطته هالسماعات بأذنج ..
جواهر بدت تنرفز: يعني ماتبيني اسمع شي بعد؟؟
خالد: لااا .. تقدرين تسمعينها بس اعتقد اني ناديتج من قبل ماتخلين غرفتج حتى !
اتحرجت جواهر لانها كانت لاهيه بأفكارها وهي تتحلطم عليه ...
عضت على شفايفها قهر ولفت عنه والدمعه بعينها .. وقالت بصوت مهزوز : شتبي مني الحين؟
خالد : انتي متى بتعدلين اسلوبج معاي؟
جواهر التفت له والدمعه حايره بعينها: هذا الي تبيه مني؟
خالد معصب: ردييي على سؤالي
جواهر: لما تحسن اسلوبك معاي ...
طالعها خالد بنظرات وواضح انه معصب .. قال بهدوء غريب: تعالي ساعديني بلبس ثوبي !
قامت جواهر وراحت وراه لغرفته وساعدته يلبس ثوبه وطلب منها تضبط له وضعية يده مع الربطه الي يربطها عالرقبه .. وضبطتها له جواهر وراحت لغرفتها سكرت اللاب وحذفته على طرف السرير وانسدحت على ظهرها تبي تريح نفسها توها بتغفى عينها الا سمعت صوت خالد الي طل عليها بلغرفه : جواهر اجهزي عشان تنزلين معاي تحت ! خالتي تحت تبي تسلم لازم تنزلين معاي !.... كان خالد يستقل اتفه الفرص عشان تكون جواهر معاه كان دايما يتعذر بأهله وعشان يشوفونهم اثنينهم مع بعض وهو ميييت من الوناسه وعايش الدور مرتاح والضحيه طبعا جواهر .. لبست جواهر خلال 10 دقايق هي جاهزه ونزلت معاه تحت محد كان موجود غير جدتهم الي تتقهوى وتوه طالع منها زوجها الجد بو سلطان .. وبعد شوي بتجيها ساره ...
كانت على سجادتها توه مخلصه صلاتها وتمت على سجادتها تستغفر ربها مثل عادتها بعد كل صلاه تستغفر 100 مره .. طلع عبدالعزيز من الحمام وهو لاف الفوطه على خصره وشعره مبلل , خلود بخوف عليه: عزيز شلون تطلع وشعرك مبلل خلني اطفي المكيف ..
عبدالعزيز: هههه لا خلييه وتعالي نشفي شعري بالاستشوار وانتهت القصه
ابتسمت خلود وقامت طوت سجادتها واخذت الاستشوار وشالت المشط منه ونشفت شعر عبدالعزيز بالهوا
عبدالعزيز: ياجعلني مانحرم من هالايادي .. انا ماعرف اذا ولدتي بالسلامه وقعدتي عند اهلج شبسوي
ضحكت خلود: تو النااس ياعزيز باقي 4 شهور تحاتي من الحين؟
عبدالعزيز: شفتي شلون انا تفكيري كله مستقبلي ... ومد يده واخذ ايدها من وراه وباسهم ثنتينهم ..
انحرجت خلود مع انها متعوده على حركات عبدالعزيز الرومانسيـه ... وكملت تجفف له شعره وهو مستمتع بهالشي ...
كانت ريم قاعده عالنت تسولف مع ربعها عالمسن دخل عليها جاسم : هلوووو
ريم: اهليين .. هااا اشوف الضحكه من هني لهني
جاسم: حاسدتني عالضحه بعد
ريم: لا افا عليك بس .. خير شوراها هالضحكه تراني اعرفك عدل جسوم
ضربها جاسم بالخفيف على كتفها: تعجبيني طالعه على اخوج تفهمينها وهي طايره
ريم غمزت له: شفت شلون ..
جاسم: بس عاد لاتصدقين عمرج واجد .. هااج هالكيس ابيج توصلينه حق حصه
ريم بخوف: انت ماتخاف احد يدري ويسوي لك سالفه والا احد من اهلها يدري ويبلشها خلاااص شكثر وصلت لها اغراض منك .. ترى البنت انحرجت
جاسم وهو يحط رجل على رجل: حبيبتي احب اذكرج تراها على ذمتي الحين حليلتي اذا ماتدرين .. الي بيتكلم خل يتكلم انا عندي الرد الي بيسكتهم كلهم .. مااعتقد فيها شي وانا ملزوم اصرف عليها واجيب لها الهدايا دام انها الحين زوجتي خلاص ..
ريم: زين خلاص حدد يوم بالشهر معاها وروح زورها وسلمها الهديه بنفسك !
جاسم: يعني تسوين نفسج ماتدرين؟؟ مشكلتي انولتد في بيئه تفكيرها غريب .. تدرين اني مااقدر اشوفها الا ليلة الدخله
ريم: خلااص عجل بالعرس هههههههه
جاسم: ومن قااااااااااالج اني ماابي العرس قريب .. انتي بس عطيها الكيس وداخله كرت وعقب بنشوف ردها
ابي اعرف رايها بالتاريخ الي حددته ..
ريم: والله مب هيييين جسوووووووم
جاسم: افا علييج بس
ريم: افحمتني ههههههههههههه
كانوا الشباب في مجلس فهد يلعبون ورقه والجزء الباقي منهم يلعبون سوني وخالد لا مع هذول ولا هذول
كان قاعد بطرف يتفرج عليهم كلهم .. وفهد الي كان يلعب ورقه معاهم كل شوي يرفع نظره يشوف خالد الي كان سرحان اكيد فيه شي شكله مب عاجبني كللش ...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك