رواية ويبقى الحب -9
ضحك الجد اللي فاهم بندر زين ( اية وعقب حب الخشوم .. وش وراك ؟؟
( ابي بنتك .. شفى .. حرمتن لي ..
جده توقع انه يبي فلوس .. او يبي شي من فيصل ويبيه يقنعه .. بس ماتوقع انه يخطب ..
قاله بجدية ( ولا خذيت بنتي .. وين بتحطها .. ومن وين بتصرف عليها .. وانت ما عندك وظيفه .. ولا بيت..!!
قال بندر ( ياجدي انا تخرجت هالفصل .. ووظيفتي مضمونه وجهازه .. عند واحدن من معارف عمي ناصر .. بشتغل في الاتصالات .. وراتبن زين .. وحلال ابوي فيه وانت منت بمقصر ..
(شفى .. بنتي ماازوجها أي احد .. انت رجالن صلاتك ماتجوز لي .. ولك علومن ماتصلح لي بعد ..
انصدم من رد جده توقع يرده علشانها صغيره لكن يرده علشان شين فيه ماتوقعها ..نتوقع انفسنا كاملين نعرف عيوبنا ونتستر عليها ولن الغير مايعرفها .. نحاول نلمع صورنا .. ونغير براويز الصورة .. ونجملها ..
قال بغصب كتمه ( وش علومه ؟؟
(تدخن .. وماتدخل البيت الا الفجر .. وعليك ريبه !!.. اللي يستر منك ..
قال بينه وبين نفسه اجل لو تدري اني كنت اشرب .. قال له جده ( حتى الصلاتك تنام عنها .. مانت بحرصن عليها ..
(الحمد الله يبه اصلي .. صح ان فروض تفوتني في المسجد .. واقضيها .. والدخان هذا انا احاول اقطعه ..
(الله يهديك يابوك ويصلح حالك ..قالها الجد
سكت متضايق ..يدري اني ادخن ..هذي اللي ماحسبت عليها .. سال مرة ثانية ( يعني يبه ماانت بمزوجني ؟؟
ابتسم الشايب (اسمع يابوك.. انا ما ابيها تبعد عن بيتي .. ودامك تبيها اصلح من نفسك .. واهم شي صلاته .. لا زانت صلاتك .. تسهلت امورك .. وصِرفْ الشيطان عنك ..باقي الامور ..
نزعل على ناس اجواد يطلع ولدهم خايب وعلومه ردية ... ووشلون لو طلع من عيالنا مثله ...
القهر بنهش داخله .. ونفسه تلومه ..وماعاد باله مع امل ضاع ..ولا حلمن كان هاجس ..ما عرف الدخان الا من سنتين .. ولا عرف الشرب الا من شهرين ..
دخل تركي انفاس متسارعه ( فيه واحد عن الباب اسمه .. ابو نايف ..
قال الجد بصوتن عالي ( حياه الله ..
وفز بندر لخاله ابو نايف ...ومو من اهل الرياض ..جاين من ديرة اهل ام فيصل .. تبعد عن الرياض اكثر من 100 كيلو ..
فتحت وهي متجمده وكل الافكار السوداء في راسها .. (مــــــــــ ــــتــــــ ــــــعــــ ــــب .. قالتها تبي تعلمه انه مايرد تسبق العلم بعلمن ثاني ... وماقدرت تكمل كلامها ..عيونها ..رجفتها .. انفاسها .. ترجيه يقول اللي عنده .. شكلها كسر خاطر فيصل اللي كان هادي .. تكلم وطمنها بعد ما شاف شكلها الملهوف عليه ( ما فيه الا الخير .. تطمني ..
(والله ..حلفته بلا شعور
( ايه ان شاء الله ..بس نسيبه مسوين حادث وراح لهم ..
ارتفعت اصابعها لشفايفها تمنع أي شي شين بتسال عنه وغمضت عيونها بلعت ريقها .. تبي تقول وينه ؟؟ ماقدرت تصدق كلامه.. قال فيصل وهو يتلفت حوله يضيعها عن اسئله يتتعبها قبل توصل لااهلها ( وين اغراضتس جهزتي ..
هزت راسها ولفت للكنبه اللي عليها عباتها اخذتها ونادى فيصل عامل يشيل الاغراض وطلعوا وهي تلحقه بخطوات واسعه تحاول تجاري سرعته ...
ركبوا السيارة سالته بقلق ( متعب مافيه شي متاكد ؟؟
(والله يابنت الحلال مافيه شي .. تبين تكلمينه ..
( ايه.... قالتها متشفه حيل تبي تطمن ..
قال وعينه على الطريق بعد تنهيده ( بس لا تكثرين الكلام ترة موب في حالك .. الله يرفع عن نسيبهم حالته حرجه ..
واخذت الجوال منه بعد ما اتصل جاها صوته متغير حيل ماعرفته وسكتت ( الو .. الو .. فيصل ..
( الو .. كانت خافته
( هلا ..
( انت بخير .. قالتها ودموعها تسيل على خدودها بصمت صوته لتعبان المها ..
قال لها ( لحظه .. وسمعت خطواته وزفراته وحست انه متضايق وفيه شين كايد ..
(متعب ..
(هلا نوف .. معليه ماقدرت اكلمك زين عندي رجال .. انتي في البيت ..
( لا ..
( لحظة .. رجع يقطع كلامه.. صوتن جاي لمه.. وابطئ وهو يكلمه ..سمعت صوته يقول ( اذا فضيت اتصلت .. مع السلامة ..وقفل الخط قبل مايسمع ردها ..
ردت الجوال لفيصل وهي تساله ( وش صاير ؟؟
راشد رجع لبيته وما مر اهله بعد الصلاة بعد نقاشهم الصبح ..تجنب لا صتدامات جديده .. بيريح كم ساعه لبعد العصر ويرجع لشغله ..تمدد وقطع هدوء الصمت صوت جواله رد ببرود (هلا
بصوت انوثي مبحوح ( هلا حبيبي .. شخبارك ؟؟
رد ببرود اكثر ( الحمد الله .
(للحين زعلان ..
مارد عليها وسكتت وهو ساكت ورجعت تسال له بصوت متغير والعبرة خانقته ... ( زعلان يعني ..
(وش رايك انتي ؟؟
(رايي انه مافيه شي يزعل !!
قالها بسخرية ( اها .. انا غلطان اللحين لاني زعلان بدون سبب صح ..
ردت متردده ( المفروض ماتزعل وخلاص .. انا قلت لك اني كنت ناسية
(فيه احد ينسى يودع اهله قبل يسافر .. قالها بغصب
ردت بهدوء (فكر فيها .. تراه سبب تافه ..
(يعني انتي ماغلطتي ؟..
(يمكن بس ماقصد ..
(طيب على راحتك !! ...
(وشو على راحتي .. انا مابيك تزعل علي .. وراحتي رضاك علي
مهما حاول راشد يخفى مشاعره حتى لو عن نفسه مايقدر ..يحبها ويحس هالوصف مايكفي وصف لمشاعره تجاهها ومثل مالها عيوب لها حسنات في نظرة .. اذا حبينا شخص ماشفنا عيوبه .. وان شفناها سترنا عليها ..واذا تحكم العقل مرة فينا فالقلب يتحكم اكثر لاننا بشر والعاطفة تغلبنا ومانقدر نغلبها ...
دخلت غرفتها وهي ترجف كل اللي صار اليوم اكبر من احتمالها خوفها على متعب و زيارة خالها اللي بزيارة رجعت لها ذكرى خلتها تنتفض وتغمض عيونها .. وكفوفها على وجهها .. دخلت امها وهي عرفتن وش فيها اقطعت في اهلها علشانها .. جلست جنبها وحاولت تطلعها من اللي هي فيه .. سالتها عن متعب.. والسوال بعد اتعبها ..
(مدري عنهم يمه .. حتى كلام ماكلمتهم .. !!
( مايصير يمه تجلسين هنا والناس حالتهم كذا .. يالله اجهزي خلي اوديك انا والسواق بروح اسلم عليهم ..واشوف احولهم ..
هزت راسها.. بلا راي... تبي تجلس تهدي ثورة داخلها .. وتبي تروح علشان الواجب .. لمت الباقي منها وقامت اخذت ولدها وراحت مع امها لبيت متعب .. بيتها ورجعت له .. ورجعتها راح تكون غير .. بمشاعر غير وانسانه غير اللي طلعت منه ..دخلت لحالها .. وطلعت ولدها في بطنها ..حامل بالشهر السابع.. ورجعت معه ابو اربع سنوات ..
متعب اللي رجع لبيت اهله يحسب انه بيلقها قدامه .. تغدى ودخل غرفته ينام .. بعد ماطمن امه واخته على رجلها ..اللي استقرت حالته وفاق من غيبوبة دامت ساعات .. وكان حادثة قوي ونتايجه كسور مضاعفة في الفخذ وكسور في اليد .. الكتف .. غير الجروح والرضوض .. ونجى منها برجمة ربه .. لكن مازال تعبان .. وجلس عنده عزيز .. واخوانه اثنين ..
بخطواتها الخجولة وابتسامة سلطانه تشجعها .. ( انتهت مهمتي .. بروح للخدامة تجيب لك اغراضك ..
( لا حبيبتي خليها لبعد العصر .. يمكن متعب نايم ما ابي ازعجه ..
ردت سلطانه ( اوكي على راحتك بس عبودي باخذه معي.. لا تشيلين همه .. بلعبه مع عيال بدور وتراه متعود عليهم ..
ابتسمت (ايه دايم يحكي عنهم .. الله يخليهم لها ويعافي ابوهم ..
(امين ..
سكرت الباب وهي تتامل جناحها اللي استغربت انه تحت اول ماتوفى ابوه رجعوا ليت اهله وسكنت عندهم كانت بالدور الفوقي مع انه قبل زواجهم كانوا متفقين معه اهلها انها في بيت لحالها .. ولكنها رضت علشان ضروفهم وسكنت معهم ..وتنازلت عن حقها في بيت لحالها ..
لفت نظرها تصميمه كان حلو مرة يجمع العنابي الملكي والعودي .. مكون من صالة صغيرة وفية ثالث ابواب قدامها تقدمت تتفحص المكان .. وعلى باب وحده من الغرف سمعت صوته وراها ..
(هلا والله بام عبدالله ..
ابتسمت بحب يشع من عيونها له .. وهي تشوفه فاتح ايدينه يبها تقرب له ..تقدمت بخجل ولماصارت بين ايده ضمته اكثر غمض عيونه يسمعها تقول (خوفتني عليك ..
دخلت البيت خواتها رايحين مع امهم لخوالهم .. وطلبت من ابوها تروح لعمانها لانه رافض تزو امها وهي طالعن لمزرعتهم برى الرياض ..تدري ان نوف ماهي موجوده .. لكن تستانس بشوفة ام فيصل .. وجلستن معها ..
وقفت خطواتها في الممر على صوت كحة قوية ..وجمدت مكانها ..( السلام
ردت بصوت واطي خجول ( وعـــ ــــــليــــ ــــكـــ ــــم الســــ ــــلام ..وهي تغطي كفوفها ..
طلع وتركها ..اي برود تتصنع يافيصل .. كان يحاكي نفسه .. ومانتبه لام خالد مقابلته (السلام .. رد عليها
ودخلت ولقت غصون جلسة بمجلس الحريم ومانزلت عبايتها سرحانه وعيونها تايهه (سلااااااام ..اللي ماخذ عقلك .. قالتها ام خالد وهي تغمز بعينها ..
حمر وجه غصون وهي تقول ( وعليكم السلام .. مالقيت احد وينهم ؟؟
قالت غالية ( مدري انا جايبة ابي نجلاء تروح تشوف المجنونه اللي عندي زعلانه من امس للحين مافتحت باب الغرفة والظاهر حتى اكل ماكلت ..
قالت غصون ( من مزعلها ؟؟
ردت غالية وهي مقهورة ( دلع بنات ...
بعد اسبوع من الاحداث
كان راشد مسافر شغل يومين لجدة يحضر اجتماع سنوي لشركائهم ارسله ابوه وعمه بدالهم على رجعت تهاني وماكان بينهم لقاء..
مها للحين الحزن تحاول تخفيه ويبان عليها ويالم ناصر اللي يحس انه سبب حالة الاكتئاب الي فيها ..
يوسف بداء يستعد لزواجه وملكته اللي مسوي حفل لها جبر خاطر لامه .. واللي علشان خاطرها بعد اجل الزواج .. بعد خمس شهور بس طلب يشوف راي هناء وموافقتها ..اللي رحبت بقراره ..كثير..وتعذرت بالدراسة
متعب ونوف بدات الدومات ورجوعوا لدوامتهم وحياتهم مستقره يتخللها الصمت من طرف نوف دائما وعبود يضيف لها نكهه خاصة ..بسبب نومه مع امه وزعل متعب ..اللي يستعد لتجهيز سفرت امه للعلاج بعد شهر ورفض روحة سلطانه .. وكان تبريره تجلس مع بدوراللي رجلها بالمستشفى وبيجلس له كمن اسبوع فيه وعزيز اللي بياخذ اجازة وقت سفرتهم ..
اما ماجد
فــــــــــــــ نزل فنجاله وصرخ باعتراض ( لا يمة ال سلمان مرتن ثانية .. توهم راديني ..قبل كمن شهر ..
ام ماجد تحاول تهدي ثورته ( هالمرة ماخذتن الموافقه مابقى الا تروح تخطب رسمي من عندهم ..لا تفلشني
قالها (لو تنطبق السماء على الارض ما اخذت من هالحمولة ..
قالت بغصب وعصبية ( تعصاني ..
جزء متواضع جدا ... اتمنى تعذروني عليه .. لانه حلقة وصل للقادم ..
(14)
القدر ختم على اوراق الايام .. يختم عليها بالفراق .. اللقاء .. وبين الاماني والعمر .. يبقى الحب ..اشواق تشرق في حياتنا ..تكسر بلور الياس لشظايا نورمن امل..واشواك الخطايا ورد .. عبيرها التسامح يملى الحنايا ...
جاويته وصوتها بالله يطلع (مستحيل ..
رد كلمتها مستغرب (مستحيل!!.
نزلت دموعها حسته يمسخر عليها مو فاهم وش تقصد ردت بصوت باكي ( ايه .. وصلني منه اللي يكفيني .. اهانه .. سب .. وكلام جارح ما ينقال .. وحتى يده مدها علي ..وقبل ذا عافني ..
سكت ناصر وهي تقول ( كيف نجتمع بعد كل ذا .. ما خلى شي يشفع له ..اللي بينا كبير .. وش غير امي اللي تعرضها ..
( ماتعرضها في شي ..
ردت بغضب ( الا قبل سنتين يوم جت امي تسلم على جدي .. وش قال ..
ضيق عيونه بتركيز وما تذكر رد عليها ( قال وقلت هذي سوالفكم يالحريم اخلص وش قال .. انا ما اذكر شي ..
قالت وهي تمسح مكان دموعها اللي جفت على خدودها ونزلت راسها وهي تقول ( شمتان فيها ويقول ان ابن هزاع حابسها .. يظن انه يشك فيها .. لكن ابن هزاع ابرك منه وعقليته مو مثله .. وامي اللي ماتحب الطلعه ..وجلستن في بيتها كافيه خيرها وشرها..وقال لجدي المفروض حتى البنات مايطلعون من البيت الا لبيوت رجالهم .. منا بناقصين احد يقطع وجيهنا مثلها ..سكت تاخذ نفس ونزلت دموعها وهي تكمل .. امي غلطت اول شبابها .. وتطلب السماح والعفو من ربها مو من فيصل ولا منكم ..
تاثر بكلامها ( امتس بنت عمنا الوحيد .. يتمة عاشت بيننا وطت روسنا بجهلها .. واللي سوته مهوب سهل .. ولا ينسى ..وزوجها ابوي تركي غصبه يكمل سنه وهي في ذمته .. وفيصل اللي قاله ماتعرض لها في شي .. انتي اللي مكبره الموضوع ..ترى سوتها ماتنسى .. وتقهر ..حتى لو مرت سنين ..لا تلومينه ..
( ماني لايمته .. بس لا احد يجبر ني على شي ما ابيه ..
ابتسم هو يقول ( ماتبينه !!
رفعت عيونها له ووجها احمر .. ضحك وهو يقول (نفسي افهم ليش يحمر وجهك لاطريته .. وهو مايهمك ولا تبينه ؟؟ وحب يضيع السالفه لانه احرجها .. روحي جيبي قهوتس اللي من اسبوع تعزميني عليها .. بتقهوى وبسري وراى دوام بكرة ..
طلعت وحس بقهر داخله من فيصل دق عليه ورد فيصل وهو منزعج من مكالمتة وهو مشغوووووول حيل ( هلا
قاله ناصر ( اهلين .. مداوم..
رد فيصل وهو مشغول بالاوراق اللي معه وقدامه زميله مسعود اللي اشر له يكمل مكالمته ..( ايه ..بغيت شي؟؟
( مشغول؟؟ ناصر كان بارد ويبي يقهره ..
قاله فيصل اللي يعصب اذا كان مشغول مايحط راسه بشغلتين ( وش رايك في الدوام يعني اللعب بلوت ؟؟
ضحك مسعود على فيصل اللي منتزفز خلقه من عمله وزادها ناصر اللي قال ( انت ليه دايم اخلاقك تجارية ..
نزلت غصون القهوة وصبت له فنجال وهو يغمزلها ويشغل السبيكر ( انت فاضي صح ؟؟
( لا والله مشغول جالس مع غصون اقنعها توافق على ابن راشد ..
سكت فيصل وناصر يناظر غصون اللي ما تحس اللي بضربات قلبها المجنونه ..ويد ناصر اللي ماسكه معصمها علشان ماتهرب .. قاله ناصر ( وش رايك انت ؟؟
قاله فيصل بقهر ( تبي رايي !!
قال ناصر بابتسامة لغصون (ايه رايك مهم خصوصا لك سوايق .. كيف اقدر اقنعها ..
سكت فيصل وعجز عن الرد مكانه غلط والرجال جالس قباله وناصر سواله بايخ وحاس انه يسمع احد فقال له ( انا مرة سمعت واحد يغني ويقول هالبيت.. ابسألك وش هو الشبه بين النهايه والاخير !؟ ... كلها نفس المصير ..!
ترك يد غصون اللي وقفت وطلعت وابوها دخل المجلس.. وصدت تخفي عيونها ووجها عنه ..
قال ناصر لفيصل ( ماقصرت .. بيض الله وجهك.. جملتها اول وتالي .. وسكر في وجهه ..
دخل بيته .. من اسبوع مفارقة .. طلع الدرج .. وصل جناحه الخاص .. فتح الباب ..دخل ..سمع صوتها من الغرفة طالعه ..بالاسود يضاد بشرتها البيضاء الفاتنة ..وشعرها الاشقر اللي صابغتة هاي لايت بلونين عسلي وثلجي وقاصته بشكل جذاب وكانت روعة لدرجة ان راشد وقف مبلم ثواني ..ماسلم ولا تكلم .. الاان ضحكت عليه ووصله صوت ضحكتهاوهي تسلم عليه وتحمدله بالسلامة ( وش فيك ؟؟
قالها ببرود ( قصتيه ؟؟
مسكت اطراف شعرها اللي درجته اخر وحدة في نص ظهرها ( ايه !!موب حلو ؟
وده يقول الا يجنن وماخلى فيني عقل مثل راعيته بس منقهر لانها قاصته وهومحذرها ماتقصه وعاندت وسوت اللي تبي
(اهم شي معجبك انتي ؟؟ ..
عرفت ان فيه صوته لهجت استخفاف غيرت الموضوع( من ساعه ونص انتظرك تاخرت ؟؟
قالها ببرود وهو يفتح ازرا ثوبه ( مريت اهلي ..
(اها .. تعشيت ولا احضر لك عشاء ..
وقفت ايده عن الحركة وظهره لها وش هالتغيرات .اهتمام واتصالات بالساعه .. ابتسم لانه متعشي عند اهله.. بس اعجبته الحركة قال (لا ..ودخل الغرفة .. وانتظر وش بتسوي ؟!
(اللحين اجهزه لك .. طلعت وهو يقلبها في راسه وش الاهتمام الزايد السفر ودايم اسافر واغيب بالاسابيع .. لايكون درت بس .. هههههههه لو درت كان امدها حذفتني مع النافذه موب تقول تبي عشاء ..ولف على ملابسه مطلعه ومجهزه وحك راسه بحيرة وهو مبوز بابتسامة .. على افكار في راسه ناوي يطبقها معها وبدت تبخر ..
(خير فيه شي يضحك انا متازم وانت متشقق من الضحك !!
(لا ابدن مافي شي يضحك .. نجلاء وانت ههههههههههه.. وعرف انه يقهر ماجد بضحكه بس مقدر يوقف وهويتذكر نجلاء وهي صغيرة مسرع بتزوج ومن؟! ماجد! .. مايصلحون مدري كيف جمعتهم ام ماجد ..
(اسمها نجلاء ساله ماجد
قال له متعب ( ايه ههههههه اسمها نجلاء ههههههههه
تنهد ماجد بضيقه ( ماني مرتاح .. يامتعب .. ما احس اني ابيها ..
قاله متعب يطمنه ( علشانهم قد ردوك قبل .. هذا اللي حاز في خاطرك ..
قال ماجد(لا ..موب كذا ..مدري .. مدري .
(استخرت
(لا .. قالت لي امي الخبر .. وانحشت من البيت على كبره حسيته ضاق علي..خصوصا ان امي زعلانه ..لاني رافض
(اجل لا تستعجل الامور .. فكر واستخير .. وعسى ان تكرهوا شي وهو خيرا لكم ..
(تدري وش احسن شي .. اني بصير عديلك هههههههههه
(ههههههههه ايه يارجال وسع صدرك .. عقب يومين لاتزوجت حتى امك ماعاد تعرفها
سكتوا الثنين ماجد يحاول يدور طريقة يرضي امه ويتقبل هالخطبة الي قلبت توقعاته ان امه تخطب سلطانه..ومتعب اللي يناظرة وياما تمنى انه يكون من نصيب سلطانه ولولا الحياء كان لمح له ..
هناء اللي سالت امها وش فيها ضايقه قالت لها عن ماجد وسوياه ( يمه ترى ماتصلح الغصايب ..
ناظرتها امها وهي منقهرة من ماجد تزودها بردها( وش غصايبه ؟؟ موب قايلن اخطب لي على كيفتس ..
(ههههههههه احسه يبي سلطانه ..وانتي استعجلتي ..
(هاه .. قالتها ام ماجد منصدمه .. وعاتبت هناء ..ليه ماقلتي لي يومنتس عارفه !!
هز اكتافها ( مدري .. ماقال شي .. بس احساس يمكن غلط ..بعدين السنه الماضية انتي قلتي لمحي لها ولمحت ورفضت .. ماتفكر بالعرس وكل همها امها ..
(ماتدرين يمكن غيرت رايها ..
(ما اتوقع .. الا وش معنى نجلاء ؟؟هههههههههههه
( ليه تضحكين ؟؟
(اتذكر سوالف سلطانه عنها..
ابتسمت ام ماجد( فز لها قلبي من يوم شفتها..
(يقولون حلوة ..انا اذكرها من ثلاث سنين .. كانت نعومة مرة.. قالتها هناء بحماس
قالت ام ماجد ( زينها ماهو بشوي ..ازين من اختها وبنات عمها ..
سالت امها وهي تغمز بعينها (وازين من غصون ..ابتسمت (كل وحدتن لها شكل ..وياليتها من نصيب ماجد ذا الغصون ..
منزله راسها بين كفوفها وتبكي ونوف تضحك عليها ( اللحين كل ذا خوف مابعد صار شي علشان تبكين !!
قالت وهي تشاهق ( امانه يانوف قولي لامي خلاص ماعاد ابي ..هونت ..
ضحكت زيادة ونجلاء تبكي وعبود يحوس في غرفتها صرخت وطردتهم .. طلعي انتي وذا الجني اللي جايبته .. ترى موب ناقصتك ..
دخلت ام فيصل ( خير وش فيكم ؟؟
قالت نوف ويدها فمها ( نجلاء هونت .. ماعاد تبي المزيون ولد ال راشد هههههههههه
ضربتها بالمخدة ( اطلععععععععععععي يالسخيفه ..يالدبة ..
ام فيصل حاولت ماتضحك على الازمة اللي مسويتها نجلاء ..(اطلعي وخليها مع سكونها ..
قالت نجلاء ( ايه هي بنتك وانا وبنت الجيران .. اهم شي هي وانا بطقاق .. وبدت تشاهق ..اصلا ولا مرة حسيت فيني .. اهم شي العيال ونوف وانا صفر على الشمال .. ودخلت في نوبة بكاء ..
قالت ام فيصل وهي تعرف دلعها ماخذتن حقها بيدها ( ايه.. متبنينـــــــتس منتي بنتنا ..مادريتي ؟؟
طلعت نوف وولدها معها تضحك على خبال اختها .. وجمعت اغراضها وطلعت لمتعب ينتظرها عند الباب ..
كانت مبتسمه تحت الغطاء.. ومتعب متبسم ..ناظرته وتاملت ملامحه وهي تشوفه يمنع نفسه يضحك سكتت والفضول يحثها تسال ..وهو بعد وده يسال عن خطبت ماجد ويمنعه الخصوصية يمكن مايبون احد يعرف حتى يصير كل شي رسمي ..
سال عبودي ( هاه انبسطت عند خوالك ..
(ايه .. وبداء يحكي عليه طول الطريق وقاله عن سالفة نجلاء ..
قال متعب بتمثيل ( ضربت امك وانت وينك ليه ماضربتها ..
قاله عبود (مااقدر تعض ... و تضرب بقوة وتصارخ.. . وعععععععععععععععع اطلعوووووووا
ضحك متعب ودمعة عيونه .. نوف تضحك (بس خلاص يالفضيحه .. كل شي تقوله.. ماتعرف تسكت ..
اعجبته السالفه قاله ( ايو وش سوت بعد ..
قلدها عبودي ( تبكي كذا ... وحرك فكه بطريقه تضحك .. ما احبها تضربني انا وتركي
قالت متعب ( مافيها حيلة اذا تضرب امك .. الله يستر منها ..
(ليه مايدل بيتي راشد يخطبها منك ... قالها تركي بعصبية وله كمن يوم يقلب الموضوع في راسه وحاسم القرار
قاله ناصر ( ماخطب عرض لخطبة يمكن خايف تردونه مثل اخوه ..
و رد برد حازم لا رجعه فيه بهدوء من غير مايرجع لغصون اللي شاورها ناصر وعرف ردها (قل لابن راشد .......
الجزء القادم
فيه نهاية مرحلة لجميع الشخوص ....وبداية مرحلة اخر في اللي بعده ..
تنهي تلك الغيوم التي تلبد سماء شخوصنا ..وينجلي الغموض .. ونكون على الموعد .. ليبقى الحب
انتظركم
اهلا بالجميع ارق تحية عذبة لكم مني .. قبل البداء ياليت تذكرون شي مهم علشان ماتتلخبط عليكم الاحداث
وتقولون متى وين مثل شخوصي اللي نسوا كلامن قالوه ... واللي متابع بدقة راح يفهم متى ... ليلة قبل زواج نوف كان لقاء نوف وغصون بعده كان فيه هالموقف
اقتباس:
مابقي بالعمر مقدار ماراح فيه
كل مازل يومٍ ... يوم بالعمر ولى
مايعرفالجمر مثل الذي يكتويه
احد يدفا بناره ... واحد فيه يتصلى
مد يده وسكر القصيده مايبي يسمع باقيها ولا يبيها تسمع قالت نجلاء ( خلها فيصل ..ابي اسمع
قال بكلام مبطن يقصد شين يبيها تعرفه ( كلام يانجلاء وش تبين بالكلام .. ضاع العمر وحنا نرجي كلام ..خلينا نعيش بدونه ..
ولما نزلت قالت بصوت حاولت تجمع نفسها فيه ( مشكورررر ..
ووصلت الرساله .. ذبحت باقي المشاعر .. وانحرت الامل ..
وخلت فيصل ضايع بين صوتها صوت قلبه وصوت عقله
اتمنى اني ماضيعتكم بهالمقدمة وتكون دليل لكم ..
(15)
ينشر عينيه ويطويهما
حيران، لا يغفو ولا يستفيقْ
كأنّما يفرُّ من نفسِه
كأنما تجفلُ منه الطريقْ.
*أدونيس
الساعة 12 نص الليل راجع مثقل بالهموم الشغل وزادها ناصر بمكالمته .. استفزه .. وكان رده كلامن قالته عاده عليها ..وكلمات أدونيس السابقة تصور حاله .. حيران .. من نص ساعه في فراشه والنوم مجافية .. البيت هدوء الكل نايم طلع من غرفته لصالة لقى بندر داخل البيت ( مساء الخير ..
رد بشرود (مساء النور ..جلس معه بندر .. ملاحظ شكله مهموم .. ( عشى ماشر شكلك متضايق !!
تنهد بحيرة .. ( متضايق شوي على اللي احسه ..حيران ذبحني الهم والهوجاس .. يااخوك كل ماقلت هانت وزانت جد علمن جديد ..
انقبض قلب بندر من حال اخوه اللي مايشكي.. وساله بقلق ( وش فيك ؟؟
( مدري وش فيني .. لو اعرف ما احترت .. في حالي .. خذ نفس وحط يديه ورى راسه وسنده يناظر السقف... قالوا خذها خطبتها ورفضت.. قالي جدي حرام تقطع في نصيبها امش معي في خطبتها يدرون الناس انك مطلقها وماهي محجورة رحت .. زفر بتعب وقهر .. علشانها ولها نسيت الكرامة ذليت نفسي بدال المرة ثلاث وكل مرة تردني ..
قاله بندر (مابقى في الدنيا الاهي ..اللي خلقها خلق غيرها ..
اشر على صدره ( في الصدر علة تظهر كل ما كنيتها ..ربك خلق وفرق ..
بكنيتها =اخفيتها
قال له بندر (وللحين تحبها ..
ضحك فيصل وقلبه تعالت دقاته من سوال بندر وقال له ( اللحين تاكدت انك غبي .. اللي يحب ماله وقت يبداء وينتهي فيه ..
تمدد بندر وقال ( والله انك صادق ..آآآخ .. لو ان جدي وافق على خطبتي لها ..
نزلت نجلا وهي تسمع اصواتهم .. وقربت منهم وقفت تسمعهم بندر متمدد وفيصل مرتاح في جلسته ويبتسم
وساله (ههههههه وش بتسوي
(احقق امنيتي اكسر رقبتها ..
ضحك فيصل ونسى همومه على تعليقات بندر وقال له ( لا تفرح واجد يمكن ماتوافق ..
ضحك بندر ( من هي اللي ماتوفق لايكون شفيا .. تبطي.. ان ماجبت راسها وانا ولد ابوي ..
(علشان تكسر رقبتها .. هاه
قالتها نجلاء ويدها على خصرها .. فز بندر مرتاع على صوتها ( بسم الله .. من وين طلعت ذي؟؟ ..
قال فيصل ( الله يعينك .. وصلت الاستخبرات .. وغمز بعينه .. حاول ترشيها ترضيها اهم شي تضمنها هههههههه ..تصبحون على خير ..وصلهم بكرة المدرسة انا دوامي بعد المغرب
(والسواق ..
(تعبان قالتها نجلاء وهي تحرك حواجبها ..تبي تقهره لان اكره شي ياخذهم ولا يوديهم مكان كيف المدرسة والصبح طلع فيصل وخلاهم سالها بندر ( ماعاد شفنا رفيقتك ..العصلاء ..
(حرام عليك .. لها اسبوع وكمن يوم ماطلعت من البيت حتى المدرسة ما راحت لها الا اليوم ..من عقب كلامك عليها .. حتى امها احسها زعلانه عليها .. حالتها صعبة ..قالت هالكلام تلين قلبه عليها لكنه قال ببرود
( خليها تادب .. ماتراد الرجال ..لسانها طويل ..
وقفت منقهرة منه ( تصبح على خير ..
شفى في غرفتها ترتبها وشافت نوته لها سوداء عليها كتابات كثيرة بالانجلش بالابيض وعليها رسمة Panda ذكرت الظهر لما رجعهم فيصل من المدرسة وسالهم لمن هالنوته لانها طاحت منها .. ابتسمت وهي تذكر كلامه ( احسبها حقت تركي ..
وملامحه ..وضحكته .. صوته .. مبهوره فيه .. يختلف عن بندر كثير .. بندر يحكي اكثر يضحك اكثر لكن فيصل مميز بهدوء طبعه .. وبندر ورجعت تعيد المقارنه ..ووووووووو يااااااااا هي تكره هالبندر اللي دخل عرض حتى وهي تفكر .. (الله ياخذك وافتك منك ..قالتها بصوت عالي .. وعورها قلبها على امه خواته ..
ونفس الوقت كانت نوف نايمة وفي احضانها ولدها لها اسبوع مانمت معه تنومه وتطلع لكن اليلة اخذها النوم من اللي واقف يتامل نومتهم ..لابسه بيجامه رمادية بوردي .. يدها حوله وراسه على صدرها .. ببيجامة كحلية بدى يتحرك .. ويبعد الغطاء عن رجوله ويتمسك فيها اكثر .. متعب كان مشاهد مستمتع باللي يراقبه من حركات الاثنين .. صوت الجوال في الغرفه الثانية قطع عليه تاملاته .. جوال نوف واتصال من غصون .. استغربه .. فكر يصحيحها وتراحع عن الفكره .. ورجع يرتفع صوت الجوال اللي صحى نوف من غرفة عبودي .. تلحق الصوت جولها مع متعب اللي هز اكتافه وقال ( غصون.. شهقت (غصووووون واخذته من يده وطلعت ..
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك