رواية فوق الجروح اللي بقلبي يكفي دخيل الله لا تجرحوني -34
جت بتكمل قاطعها وقال:ادري اتحبي شغلك ومستحيل تستغنين عنه خلاص فهمت وكمل بعياره:بس ابعدي عن وجهي لا تندمين
نور اضحكت وابعدت راحت تشوف امل وابتسمت كانت نايمه طفت النور عليها وانزلت تحت تنطر غانم
واول مادخلت المجلس شافت سعود جالس يفطر وفاتح كتابه يدرس
ابتسمت وقالت:صباح الخير
سعود بود:هلا صباح النور
وكمل دراسته وهي اجلست تفطر ودعت بقلبها يوفقه وينجحه سعود هالفتره كلها إمتحانات في الجامعه
وتحس انه يتعب حيل بالدراسه وينسى نفسه وماياكل عدل وهي وغانم يحرصون انهم مايزعجونه ويقدمون له كل سبل الراحه عشان جذي ترسل له اكله بالغرفه مرات
عند سند
كان جالس جنب الحضانه الي تحمل بنته كانت نايمه وتحرك بشكل طبيعي يدل على صحتها وانها ماتشكي من اي شي
ابتسم وهو يدخل يده يمسح شعرها كان كثيف حيل واصل لي رقبتها
لدرجة انه محسسها وصايره حمرا والممرضه قصت اطرافه
تضايق كان يبي يتم شعرها على طوله
بس راحتها اهم وتذكر سالفة عهد وقص شعرها عقب طاحت عليه نسا السالفه وراح ركض ينقذها
بعد دقايق جت الممرضه قالت بأسلوب حلو: انتا بابا اشر لها براسه
قالت وهي تفحص الأجهزه :بيبي حلو ماشالله وصحه زين
قربت ودخلت يدها ومسحت خدها برقه وقالت بنغزه:اكيد سيم سيم ماما بس انا مايشوف ماما يجي بس انتا ومدام كبير
تنهد من كلامهاكأنها انثرت على جرحه ملح
قال برود:مدام تعبانه وكمل بأهتمام: البيبي استجاب لرضاعه ولا بعده على المغذي
قالت بسعاده:يس بيبي يشرب حليب بس خلي مدام يجي رضع احسن
سند بضيق:انا مستعد اجيب احسن حليب مغذي يمكن مدام ماتقدر
حركت راسها بأسف وطلعت وتركته عند بنته كأنها حست ان في شي صاير بين هالأبوين
عقب طلع جاه اتصال من فواز كان يبي يقابله
استغرب بس خمن ان السالفه تخصه هو وعهد
فواز فعلا كان يبي يتكلم معاه ويتوصل معاه لحل في مشكلة عهد هو وعدها انه بيوقف معاها في الي هي تختاره
عشان جذي بيشوف رد سند على الموضوع وبيحاول يقنع سند بالطلاق بدون اي مشاكل
جلس بالكافيه ينطر جية سند له طلب القهوه والكيك
وقبل يجي الطلب وصل سند
سلموا على بعض وجلسو
فواز كان يحاول يدخل بالسالفه
سند بدون تفكير قال برود: فواز عارف الموضوع الي جايبني عشانه هو عهد
فواز بضيق:ايه والبنت تبي الطلاق وانا واعدها اوقف معاها بالي تبي
كمل بنفس الأسلوب:سند طلقها وفكنا من المشاكل
سند جلس فتره يفكر ويسترجع حساباته قال برود:وابنتها ماسألت عنها مافكرت فيها خير شر قالها بسخريه
فواز بحزن:عهد متغيره ياسند معاملتنا الجافه لها من قبل حجرت قلبها خلتها بدون احساس
وهذا انطبق على بنتها هي الضحيه
سند بغضب وصوت ارعب المكان:شمعنى بنتي انا عارف اني بموقف صعب بس عشان بنتي بسوي المستحيل
فواز بتنهد:مثل ماعهد انظلمت بفعايل ابوها من امك بنتك راح تنظلم بفعايلك من امها
حس بخوف فواز قال نفس الي امه قالته
تنهد وقال برود:يصير خير خل تطلع بنتي وتشافى راح اصلح الأمور
فواز كان بيعترض ويقول شي بس سند قاطعه وكأنه حاس وعارف:مايصير خاطرها ألا طيب وصله ألها
وستأذن وترك المكان
بعد اسبوع
من وصل لها فواز كلام سند وهي حاسه بضيق راح تفقد سند للأبد اكيد كرهها زياده عقب فعايلها في بنته حتى الرضاع رفضت ترضعها مع ان صدرها يتشفق شفايف الطفله صابتها حمى وقالت ندى من الحليب لازم جسمك يتخلص منه بالرضاعه كانت تبيها غصب تروح وتشوف بنتها متأكده انها اذا شافتها بتضعف وتاخذها وتمسك فيها بقوه
بس هي كانت عارفه ورفضت الرضاعه وتخلصت منه بطرقيه ثانيه وفي داخلها تصرخ من الألم
ألم القلب فوق ألم الحمى
حست بأنها احسن وحبت تجلس بالحديقه برا
تشم هواء نظيف عن كتمة البيت
وضيقة الغرفه
عقب فتره طلع فواز وندى ومعاهم اعيالهم
فواز بحب عقب سلم:تروحين معانا
عهد عارفه انهم بيروحون لسوق ومن وراه بيتعشون برا بس هي رافضه ندى قالت لها ورفضت
كانت تبيهم يستانسون ماتبي تضيق عليهم بوجودها
عهد ببتسامه:لا انتم استانسوا ولا تحاتون
ندى بتنهد:بكيفج بس انا موصيه على عشاج وراح تضبطه سونا واذا
عهد ابتسمت ندى صايره ام لها من انفست
قالت بحب:ندوي انا كملت الشهر خلصت فترة انفاسي يعني
ندى بأصرار:باقي عشر ايام وتطلعين
وضحكت منها عهد وقالت وهي تأشر لفواز:عمي شوف حل مع مرتك
فواز :بدال ماتحمدي ربك ندى بشحمهاولحمها تخدمك
عهد :بدال ماتوقف معاي
فواز وهويحضن كتف ندى قال:انا بكل الحالات بصف ندى
وعقب استإذن وطلع مع اهله
وعهد تمت جالسه بحديقتها تستنشق الهوا الحلو الصيف على دخول والجو صاير حلو ومعتدل
عند شهد
كانت عند امها وقالت لها عن نقاشها مع سند
وان سند مستعد يبوس رجول عهد بس ترجع له
شهد اقترحت على امها يروحون لها ويحاولون بس سند رفض هالشي قال هو يتصرف
ادخلت عليهم سهام وحبو يغيرون الموضوع
مو عشان شي بس لأنهن مايبون يشغلون فكرها بهالسالفه
سهام بحب عقب سلمت قالت وهي تقص لشهد وامها من الحلى الي مسويته :ذوقوا وعطوني رايكم
شهد عقب ذاقته قالت:حلو ماشالله من وين لج طريقته
حصه بعد قالت:حلو
سهام بغرور:الطريقه من عهد بس الحمدالله ضبط معاي
وكملت وهي تحط بصحن:بخش حق حمد
اضحكوا عليها
وعقب دخل سند واول ماشاف جمعتهم جا وجلس
عقب السلام عطوه من الحلى كان موغريب عليه هالطبق
فتح ابواب الحزن عنده وذكره بشغلات عهد الي تسويهم لما كانوا برا كانت تفنن بالأكلات وتبدع بالحلويات والفطاير
أكل لقمتين وشرب كم فنجال وكانت سوالفه قليله وهي ردود على اسآلت امه
اما عند سحر
بدت حالة الوحام معاها واشغلت نفسها ببيتها وخالد ونست عهد شوي كانت تبي تعرف اخرت اعنادها
موقاهرها في عهد ألا اسلوبها في بنتها ماتوقعتها بالحقد
وتحقد على منو على ضناها
تنهدت وشالت فارس لفراشه عقب نام
شافت خالد دخل ابتسمت له وهو قرب وسلم عليها قالت بحب: نطرك فروس وعقبه نام
تضايق وقال:اوف كنت مشتاق له
سحر بدلع:ذنبك مره ثانيه لاتأخر
خالد سحبها جنبه وقال بخبث:زين الي لحقت عليك انتي
عقب فتره وهي قايمه عجز يجيها النوم وخالد اول ماحط راسه نام جاها مسج افتحته كان من عهد تسلم وتسأل ليش ماقامت تجي
تنهدت بضيق الله يهديج ياعهد ويردج لطريق الصواب
ارسلت لها تطمنها وتعتذر بنشغالها بتجهيزات عرس فارس
عند عهد
حاسه بوحده فضيعه وان مالها داعي بهالحياه الكل منشغل بأموره وحياته وهي جالسه بين اربع طوف
مع ان ندى ماتقصر بس لازم تنشغل خاصة مع طبيبها عشان اتابع الحمل
طالعت بالساعه كانت خمس العصر
فواز راح يشوف اوراق الجامعه وياخذهم من سند لان هو قال انه خلصهم
وندى اطلعت تزور امها صارلها فتره ماراحت لها
وهي كالعاده جالسه بروحها
اطفشت تبي العشر ايام تمر بسرعه عشان تخلص من انفاسها وتطلع
تبي تروح اي مكان بس تفتك من الوحده
اسمعت صوت الباب واستغربت من بيكون هي كلمت البنات عشان يجون بس ارفضن
وطلت تشوف عقب افتحت الخدامه
وكانت صدمتها صدمه
سند
وش جايبك
ارحمني حرام عليك انا ابي انساك وجاي لي ومعاك بنتك
لا لا مستحيل ارضى ارجع معاه وهو مايحبني مستحيل ارضخ لرغباته وهو مازال محتفظ بذكريات سعاد عنده
وموقادر ينساها
بس بنتك ياعهد بنتك
كان صوت عطفتها يصرخ ضناك
اه ليش جابها ماكنت ابي اشوفها
كافي علي يوم المستشفى للحين راسخه في بالي كل حركاتها
وقفت تطالع وكل هالأفكار كانت براسها
اما هو فستغل غياب اهل البيت واقنع فواز الي بالغصب رضا واخذ بنته الي رخصها الطبيب وراح لها
اجزم على خطوه ويدعي ربه يساعده فيها
تصدآ كل الوساوس الي جته وانه مستحيل يتبدل حب سعاد لكن عقب ذاق حب عهد انغسل من قلبه حب سعاد ومابقى لها ألا القليل
وعهد تربعت على عرش قلبه واسرت كل عواطفه خلته غير قادر على الفراق
وخاصة عقب جابت له بذرة حبه لها وهي((غرام))
قرب خطوه يمها ومعاه غرام الي نايمه كأنها مرسول سلام بينهم
ارسلها رب العباد عشان تألف بين قلوبهم القاسيه
عهد ركزت بنظرها على البنت
كان ودها وتخطفها من يده كان شكلها وبرأتها تسحر وتعلق الي مايتعلق فيها
وطقم البس الوردي الي جايبه سند لها كان خيال عليها
ارفعت نظرها وكأنها نظرت عتاب
سند بهمس وهو يأشر لبنته: جبتها واسطه لي عشان ترجعك لي
عهد بتوتر: مستحيل
سند بضيق:عهد
قاطعته بغضب:اطلع برا واخذ بنتك معاك مااحبك ولا احب بنتك
حست انها بيغمى عليها واجلست وصدت عنه وسند جازف لمره الثانيه ومستعد يجازف للألف
قرب وجلس قبالها واشر لغرام قال بضعف اول مره يطلع عند عهد:عهد انا محتاجك وغرام بعد محتاجه لك عهد بنرفزه: اشعقبه ياسند انت طعنتي عذبتني بجفاك انت ماتحس مفكرني جاريه
عندك و
قاطعها بتنهد:انا ذقت من الفراق الويل وماصدقت ألقا الي نستني هالفراق
الأنسانه الي تفجر حبها في قلبي من اول ماشفتها
عهد صامده وتسمع
قرب وجلس على نفس الكنبه وعهد اول ماقرب بعدت
بدون لاتقوم
سند بضيق: عهد لاتعتقدين اني ماحبيتك او ان وجودك بحياتي ماأثر بطبعي شي
كمل ويده تحسس خد غرام :لا ياعهد انتي قلبتي حياتي فوق تحت وكنت اعاند مشاعري وجازفها بس كانت دايم تغلبني وتروح لج
تفرح بشوفك تستانس لي حست بقربك
عهد بضيق:وينها مشاعرك ليش ماحسيت فيها
سند بتنهد:اجل اسمحي لي اقول لك انك ماتعرفي الحب ولاتعرفي مشاعره
عهد بقهر:وضح لي
سند بهمس وعينه بعينها: سعادتي وانتي بين احضاني
شوقي الي يتزايد اذا غبتي عني دقايق
عهد اخجلت كلامه كبير وخطير معقوله سند يحبها ومن زمان ليش ماقال
اخاف يضحك عليها بس عشان ترجع لشباكه
ويتوحد فيها هناك برأ
كانت سرحانه حيل في افكارها وماانتبهت ألا لصوت البنت تصيح تفطر قلبها من غير شعور قالت بنرفزه:اشفيها ليش تصيح
سند بكذب وعشان يوصل لهدفه في هالشي قال بضيق: مادري بس الظاهر من حليبها الدكتور قال راح يسبب لها ماغص
عهد بخوف:والحل اخذت البنت وقامت تحضنها والبنت تصيح وعهد بعد تصيح معاها تبيها تسكت ماتبي اتشوفها تعور وهي ساكته ماتسوي شي
سند تأملها وشافها تحضنها والبنت كانت جوعانه وتفتح فمها
قرب منها ومد يده لفتحة صدرها قال بعطف:عهد بنتك مراح يهدأ مغصها ألا لي رضعت طبيعي
عهد مانطرت اول ماقالها صدت عنه وقامت ترضعها وكانت تذرف مع كل مضغة تمضغها غرام
سند تركها واخذ يدور بالصاله وعقب فتره شافها نزلتها وجلست تفقد الحفاض قال بتنهد: عهد
قالت بضيق وحزن: سند انا مومستعده اعيش مع واحد مايبي ينسى
انا
قال بهمس: انا مستعد انسى سعاد وابيك تساعديني حسسيني بأهميتي عندك حاولي تقربين مني اكثر هذي كانت طبايع سعاد الي رسخت في بالي
عهد عصبت قال يراضيها: عشان اعطيك خبره
ابتسمت له بخجل وهو قرب كان يتأمل شكلها رغم انفاسها وشحوبها وضعفها نزل وزنها حيل بهالفتره
سند وهو يمسك يدها ويركز بجسمها عهد تفشلت وسكرت دلعتها
قال بضيق:ليش ضعفانه حيل
عهد برود:خلنا بسالفت رجعتي وترك جسمي على صوب
قال بخبث:جسمك هو نص السالفه لانه بيرجع معاي
عهد عصبت قال بأصرار :ليش ضعفانه ماكنتي تاكلين عدل صح
عهد النفسيه ساده شهيتها اصلا وبالموت تاكل خفيف
قالت بتنهد:ألا اكل بس من تعب النفاس
نزلت راسها وقامت تبوس بنتها وتلاعبها عاطفت الأم اغلبت عليها وشافت رجولها نتفه وانتبهت لشامه في فخذها هي بعد فيها وبنفس المكان
سند عرف وش شافت قال وهو يبوس فخذ بنته: من كثر ماحبك الجينات كلها عندي ضربت وجبت بنت نسخه منك في كل شي
وعهد استحت وقالت بتنهد: ودي اصدقك
بس مادري
سند بضيق:عقب كل الي قلته مو مصدقه
عهد بتوتر:ألا بس ابي اثبات عشان تنسى سعاد
خافت لايهجم عليها لان قبل مستحيل تنطق هالأمر بس دامه هو فتح السالفه خل يتحمل
سند برود:ارجعي معاي وراح تشوفي الأثبات بنفسك
عهد بضيق:لبيت اهلك
سند بحب وهو يمسح يدها بيده:اي عند امي وتراها طخت وانتي شفتيها بنفسك
عهد صح ان حصه طخت بس في شي يمنعها هو جناح سند الي كله ذكريات سعاد وذكرياتهاهي السيئه قالت بأرتباك :سند
رد بحنان:عيونه كان يبي يغسل قلبها الي تشرب بالكراهيه له ولأمه
عهد بخجل:ارجع بس بشروط
قال بخوف:اشرطي
عهد خايفه تسافر معاه وماتدري عن موضوع تركه لشغل هناك: بجلس هنيه اربي بنتي وادرس لين مايخلص شغلك الي برأ
وشرط الثاني مابي ارجع لجناح سعاد شوف مكان غيره
سند ببتسامه وهو يرفع يده لخدها :بس انا ابي قربك
عهد بخجل:حاول تجي كل فتره حس براحه اقناعها حلو
سند بعبط:ماقدر ابيك جنبي كل لليله ابي احس ان
قاطعته بتوتر: شسوي انت وعدتني اكمل بالجامعه وماقدر اسافر عقب سجلت
سند ببتسامه:ان شالله بتكملي وانتي عندي
عهد بقهر:اشلون خافت لايكون ناقلها او اي شي
قال بهدوء:لان انا بجلس هنيه على طول مراح اسافر
شاف السعاده بوجهها
عهد حست براحه وكمل وقال:بخصوص الجناح بنجلس بجناح شهد لين مايخلص جناحنا الي بالطابق الثالث
انصدمت متى قرر وفكر عمره ماجاب لها سيره
قالت :من متى هالتطور
سند برود:من زمان وجناحنا الي طاف اضافه حمد لهم
طارت من الفرحه عبرها وحس فيها عقب زمن طويل ماحس بفقدانها ألا عقب جابت بنته شاف الضياع وعاش
الحرمان
بس بالأخير رضخ وجا زاحف يترجاها مثل ماتمنت حقق الله لها أمنيتها
خذت بنتها ورفعتها وباست خدها بقوه
سند ابتسم وطالع بالساعه قال :شرايك تجي معاي اليوم
عهد برفض:لا سند خلها ايام وتعال اخذنا
اجمعت بنتها معها بدون شعور لان قلبها نطق اول
سند بحب:خلاص بصبر نفسي ايام ونزل راسه وباس غرام
وهي كانت بحضن امها فرفع راسه وقرب يم وجهها واخذ منه كم بوسه يكفونه للأيام الجايه
كانت ترجف تركها للبرد القارس ومادفاها بمشاعره الدافيه
تبيه يتم حاضنها لين ماكل اشعره بجسمها تصرخ وتقول احبه والله احبه
هي للحين ماعترفت بحبها بس صار الوقت الي ينباح كل شي وراح تبوح له عن حبها بس يجي ياخذها
شالت بنتها وراحت لغرفتها كانت تفكر بردة فعل فواز وندى لي شافوا وعرفوا بتصالح الأمور بينهم
اكيد راح يفرحون بهالخبر
صح كانت تقول مستحيل ترجع او تنازل بس عقب جاها وقال الي قاله
طاح كل الحطب ونست غرورها وكبريائها حطت غرام بسريرها ونزلت الشنطه الي جابها سند معاه
كانت نايمه واستغلت اللحضه وراحت تسبح تضايقت ماكانت متكشخه ومتعدله لسند جاء فجأه وهي بلبس البيت
بعد شهرين من الأحداث
في افخم قاعأت الديره
عرس فارس
كانت واقفه بالأستقبال وكل الأنظار عليها منبهرين في جمالها وكشختها كانت احلى من العروس نفسها
سحر بتعب وهي تحط كرسي وتجلس:اه احس اظهري بينكسر هذا وانا مارقصت
عهد بضحكه : مولازم ترقصين راح ارقص بدالج حبيبتي لاتحاتين
سحر بنرفزه:تحريني انتي وجهج يعني ضامنه ان مافيج حمل
عهد بخبث وهي تقرص عينها:اي ضامنه
وقالت بدلع:غروم بعدها صغيره فديتها
سحر برجا: يارب انك تخليها تحمل ومن هالليله بعد
عهد بخوف: اعوذ بالله
وبدت الزفه والكل اندمج معاها ونسوا
عهد او الله ابعد الأنظار الحاسده عنها عشان ترجع لسند سالمه الي يعد الساعات عد وينطرها بفارق الصبر
لان عهد طول هالفتره وهي عند سند كانت تختبره وتختبر مدى حبه لها
كانوا رغم تعدل الأوضاع وتحسنها بينهم ألا انهم مااجتمعوا بغرفه عهد مستغله بغرفه لها هي وبنتها وسند ماحب يضغط عليها هي كانت بعدها متحسسه منه ومستحيه عقب فراق وزعل دام فتره طويله
مع انها كانت راضيه كل الرضا عن سند واهله حتى حصه اتسامحت منها واعتذرت عن كل الي سوته ووعد عهد ماتدخل بحياتها خير شر
وفعلا نفذت وعدها تاركتهم براحتهم
اطلعت الساعه حدعش عقب احرق سند جهازها يستعجلها وماطلعت لين قال ان غرام تصيح والمربيه عجزت فيها
كانت حاطه مربيه عشان دوام الجامعه لي راحت تكون مطمنه
مع ان عمتها ماتقصر كانت تشيلها اكثر من المربيه نفسها
حتى اكثر من عهد
مرات تحس ان حصه امها موهي من كثر ماهي متعلقه بضنا سند
اركبت السياره عقب ودعوها البنات بنغزاتهم الخبيثه
على ان الوقت حان وان سند مستحيل يتركها الليله حتى خجله الي لازمه عقب صرح بحبه لها بيتجرد منه بمجرد انه يشوفها
وصل للبيت وألتفت لها وقال بحب:تفضلي انزلي
عهد ببتسامه وتوتر:سند صج غرام تصيح
ونزلت وكملت:ياقلبي مشت معاه ودخلوا كانت بعباتها ولافه الملفع ومغطيه وجهها عشان المكياج
وقررت تلتزم بالنقاب عشان خاطر سند لانها طارت من الفرحه لما قال لها انه يبها تنقب لانه غيور ومايحب احد يشوف حلاله
شافت الصاله فاضيه لان عمتها تنام مبجر حتى العرس اعتذرت تروح واجلست عند غرام
قالت بأستفسار:وين عمتي وين حطت غرام
رد بتنهد:امي نامت وغرام عندها
كانت بتروح لغرفة عمتها بس سند مسك يدها قال:وين
عهد بعجب:بروج اجيب بنتنا
سند بهمس:بنتنا بالحفظ والصون تعالي بس تعالي
ادخلوا جناحهم الموقت على مايخلص جناحهم او بيتهم على قولت عهد شافته وانبهرت بكبر حجمه تحسه حيل كبير عليهم
بس سند اخجلها وقال يادوب يكفي لي ولعيالنا الدرزن كان ناوي يبي درزن
اول ماختلوا بروحهم وسكر الباب رفع الملفع وانبهر بالي قدامه
هي كانت ترجف من حركته وتطالع تحت
قرب لها ومسك خصرها ورفع راسها وقال بذوبان: لو حصل وصديتيني الليله بموت
عهد بتوتر :مستحيل
سند بضيق :مستحيل شنو
ترك خصرها وقف مصدوم معقوله للحين كارهته
عهد بتنهد وهي تفصخ العبايه وزادت من ربكة سند وجنونه عقب شاف اللبس:مستحيل اصدك
ابتسمت بخجل ومايمديها تكلم ألا وسند حاضنها لدرجة ان ضلوعها بغت تكسر بسبته
اليوم الثاني الساعه ٣العصر
كان حارمها من القرب صوب الباب او انها تطلع من الجناح نفسه حاولت فيه ترجته ان غرام محتاجتها بس ماسمح مازال محتفظ في خصال العناد عنده
كان بفراشه وحاضن كتفها قال بتنهد وهو يبوس يدها :عهد
قالت بخجل: نعم
رد بحب:ابي منك خدمه
بدون تفكير قالت:ابشر
كانت تحاتي بس مستحيل ترد سند
قال بتنهد:اقرصيني
بطلت اعيونها مستغربه وكمل بضحكه:ابي اصدق انك معاي
عهد اقرصت خده وقالت بدلع:ها صدقت وكملت بضيق:سند خلاص اطلق سراحي بشوف بنتي والله فشله من امس مع عمتي
سند بحب:امي مستانسه حسبالك ماطليت وشفتها اصلا انا استغل كل لحضه تكوني نايمه واروح اشوف بنتنا
وكل مره القى بنتنا تضحك ولاتلعب
كمل بخبث:سنعه بنت ابوها ادور راحته
عهد ابتسمت وقالت بتنهد: خلصت كلامك اقدر اطلع
سند بحب:اي خلصت كلامي بس ماكو طلعه واعد امي ان الولد جاي بالطريق
وو
عهد بطفششش لا لا لا
النهايه
تمت بحمدالله
واتمنى من كل القراااء والاعضااااااء بأن يذكروني بكل خير ويسامحوني اذا كنت تسببت لأي احد بضيق
ويحللوني بيوم الحســـــــاب <<محد يضمن عمره وسبحان من بيده الاروااح
والســـــــلام ختــــام
اختــكم الهـــــــودج
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
♫ معزوفة حنين♫
اللهم لك الحمد حتى ترضى وإذا رضيت وبعد الرضى ,,, اضف تعليقك