رواية ويبقى الحب -15
على ردها العفوي وندمة انها ردت كذا من صوت ضحكته (اكلي اللي تقدرين عليه .. عطاها الشوكة خذتها و سكتت اذن الفجر .. وهو يحاول ياكل أي شي علشان تاكل شرب العصير وموية اما هي كانت تاكل من السلطة بتوتر وكل ماناظرته لقته مايناظر فيها .. وهو ملاحظ انها تناظره .. قالها ويحس نفسه متوتر ومرتبك او مستحي ( والله مدري وش اقول .. ابتسم وهو يقول شي اصلا ماكان ناوي يقوله
ناظرته بارتباك وبان في نظرتها قالها ( اعذريني على اللي صار .... علشان كنسلت التصوير .. احس انك تضايقتي .
. كان يبي يعتذر على مرضة في هاليله لقى ان المرض محد يتعذر منه لكن قال غير اللي يبيه والايام جايه بتعرف وتعذره
نجلاء رف رف قلبها بقوة نزلت الشوكة وهي تحاول تجمع حروف ردها ( لا عادي ..
(اكيد .. عادي يعني ماكنتي تصيحين علشان ماصورتي ..قالها يمزح مثل ماهو معروف عنه
ناظرته تشوف هو جاد ولا يمزح ... ضحك على شكلها وضحكت معه بخجل .. وهي فعلا تبكي علشانها ماصورت معه ولا علشانه اهملها ..
مسك كفها الصغيره وضمها بقوة بين ايديه وسالها ( نصلي ..
تأملت يدها الحرق بداء يلتهب .. مع ان ام فيصل حطت علية شاش الحروق .. جلدها حساس ورقيق .. والقهوة كانت حارة مرررة .. فكته تتفحص الحرق .. بعد ماغيرت عليه عبير بعد الشور اللي خذته .. خلته مفتوح يتهوى وينشف ..كانت بقعه بسيطة قريبة من الابهام على ظهر الكف .. يارب تنجينا من النار ..رددتها وهي متضايقه مو قادرة تتحرك على راحتها .. من الم يدها ..
.. موقادرة تنام.. ناظرت عبير نايمة بهدوء .. تنهدت ...رفعت نفسها تعبانه وحرق يدها زاد عليها .. بسريرها ..مدت يدها لدرج واخذت مسكن .. وشربت من كاس الموية .. ونزلته واشغلها عن حرق يدها حرق قلبها .. من تملكت ماحست انها فرحانه تحس بشتات .. تحس انه قدرها وصار .. رفعت خصل عن جبينها بكفها وظلت ثواني على راسها ..اللي تحسه بينفجر ..تحس بضغط نفسي .. تجبر نفسها على تصنع الهدوء ..براكين وزلازل داخلها ..القلب الوحيد اللي تقدر تفضفض له .. ام فيصل .. اللي اللحين مستحيل تقولها .. انا احس اني ولاشي في حياة ولدك المغرور وافقت عليه وضيعت شي من كرامتي اللي جرحها بتصرفاته المغرورة ..وغير مقعول تقول لها انا احبه لكن اشك في مشاعره الباردة انها في يوم ممكن تتغير .. وين تلقى احد تفضفض له .. امها الصامته مهما تكلمت معها ردت فعلها الوحيده الصمت .. تنهدت بضيق .. وانتهت التنهيدة بعبرة .. ضمت شفايفها تمنعها وبلعت ريقها .. وعيونها تذرف دموع ..مسحتهن وتعوذت من بليس ماراح تخلي له باب عليها .. يكفي انا احبه ..والماضي ماراح تلقى من الا الم ..تعبت سنين تلم وتبعثر في نفسها ومشاعرها ماتغيرت ..تحبه ..غروره ..كبرياءه..بروده..الزين والشين فيه ..ابتسمت على تناقضها ..طول عمرها كذا ..
انامل ناعمة في شعره الناعم الاسود القصير ..مغمض عيونه بالاحساس رفع يده لها..وسحبها لشفايفه ..باسها وفتح عيونه ونظرته في عيون صاحبتها ..وباتسامتها تسحره .. بصوتها الناعم (حياتي ..مابقى شي على الظهر يالله ..
هز راسه بهدوء .. ناظرها وهي تطلع ..رجع يغمض عيونه .. ورجع في نومه ثانيه ..
دخلت تشوفه بعد دقايق للحين نايم تنهدت (ياصبر ايوب قالتها في خاطرها ..
جلست على طرف السرير ..معطيها ظهره ونايم .. قربت من اذنه (متعب ..حبيبي ..يالله قووووووم ..
فتح عيونه بكسل .. نظرته الناعسة تجننها ابتسمت على شكله .. وقرصت خده بقوة (ربي يخلي النعسان ..
صرخ من قوة قرصتها وهي تضحك بشقاوة .. جلس يمسح خده بعصبية ..فزت مبتعده ماتعرف ردت فعله ناظرها واشر باصبعه (تعالي هناآآ..
هزت راسها بــ لآآآ
قال بتهديد (اذا جيت انا موب احسن لتس ... تعالي..
قربت بهدوء وخجل وكنها طفله صغيرة مسويه جريمة وتمنع ضحكة تفلت منها .. ماسك اذنها .. تتصنع الالم (آآآآآآآ متعب اخر مررررة .. ما تعودها ..
فكها وهي تفرك اذنها اشر على خشمه باسته بنعومة ..ناظر عيونها .. واشر على خده .. باسته .. والثاني ..عبست في وجهه وباسته ..وحست بيدينه على ظهرها يضمها بحب كل ماحاولت تعطية لقته دايم صاحب العطاء .. ابتسمت بعبرة وهي تسمع كلامه وبصدق احساسه ومشاعره .. ابتعدت تشوف وجهه وقالت له ( الله لايحرمني منك ..وشفايفه على جبينها رد عليها (ولاانتي بعد ..
عيونه منفخه من النوم سلم على جده اللي باين عليه الضيق (شلونك اليوم يبه؟؟
(الحمد الله ..رد بصوت باين فيه الزعل ..
(زعلان يابو محمد ..ساله فيصل ..
(مالقيت شين يرضيني .. اذا انت واخوك نايمين لضحى ..حتى صلاة فاتتكم جماعه ومكملينها عقبهم ..
كبار السن لازم معهم الصبر وذا شي تعود عليه فيصل رد بهدوء ( الشيطان يبه .. اعوذ بالله منه ..راحت علينا نومه .. وذا المسجد مشاء الله عليه اذان وراه اقامة لا يقدر شايب ولا مريض مايقدر يوصل بسرعه للمسجد ...
للحين زعلان (لوانكم تبون شين غير المسجد وصلتوه .. في وقته !!
سكت فيصل لانه مايصلح الجدال يضيقه والسكوت بعد معناته سفهه مايدري وش يرضيه ؟!
(خير ان شاء الله ..اخر مرة
ضحك خالد على كلمة فيصل حسها ماتناسبه ..ظاهر كفه على ثمه ..وعيونه تضحك من ضحك خالد .. وكنه يقول الشكوى على الله لازم نسايره ..
دخل عليهم ناصر وهو مستانس ..(السلاااااااااام عليكم ..
ردوا عليه وسيده لخشم الشايب (ابشر برجال ..
ابتسم الشايب ( الله يصلحه .. ويبارك فيه ..
وبارك له فيصل وابتسم له مع ان الوضع متازم بينهم من بعد سالفه خالد ... لكن الفرحه تنسيك ألد الاعداء كيف بلحمك ودمك ومابينكم الا عتب احبه ...
دخل للبيت مشتاق
كان له سنين مو دقايق طلع يصلي ورجع لقها واقفه بعباتها وتنتظره .. عبس وبانت الصدمه بوجهه اللي كان مشرقه .. رفع حاجبة وهويتقدم وسالها (وين على الله ؟!
ابتسمت وهي تقرب منه وتقوله بفرحه (مها ولدت جابت ولد اليوم الصباح..و اممممممم بروح اتطمن عليها ؟! اذا ماعندك مانع ..!
ابتسم لها (لا ماعندي وانا اللي بوصلك .. ونرجع مع بعض ..
(فديتك والله حبيبي .. ثواني اقول للخدامه تنزل الاغراض اللي مع السواق نخذهم معنا ..
(انتظرك في السياره ..
قالها وطلع راشد اللي حس بعد انه مهمل مثلها متى اخر مرة قد وصلها ولا طلع معها .. اوحتى جلس معها .. لازم يكونون اقرب علشان لوابتعد واحد الثاني يفقده .. مو اذا بغاه قرب واذا الدنيا خذت حاسب الثاني .. اعتمد على السواق مثل ما اعتمدت على الخدم ...
تحركت بضيق في شي مضايقها .. يد كبيرة على خصرها وجسم جنبها .. وفتحت عيونها .. نومها كان متقطع .. متوتره من هالقرب اللي متعودت عليه .. غمضت عيونها تاخذ نفس .. تحاول تبعد عنه .. تنفست بعمق بعد ماصارت بدورة المياة ..
تحرك في نومته ..وفتح عيونه .. حلم حلو غريب ..عطرها للحين يشمه ودفى جسمها اللي كان في احضانه .. نايم ..لكن يحس بوجودها مثل ماحس في غيابها ..
تذكر الصلاة فاتته قام بسرعه لدوره المياة لقها مسكرة نادها (نجلاء ..
استحت وهي تسمع صوته وتسال نفسها (متى صحى ذاآآآ !! طيب شوي !! قالتها وهي لابسه روب الحمام ومخلصه لكن ماتقدر تطلع كذاآآآ .. وملابسها في الغرفة الثانية .. تاخرت الثواني والدقايق ..
جالس على طرف السرير ينتظرها سالها ثاني مره (نجلاء ماخلصتي ؟!
هالمرة ادركت لمتى بينتظر بقوله وبكيفه قالت بكلمات متقطعه ( ممكن تطلع شوي لبرى الغرفة ..
سالها يبي يحرجها (لامو ممكن ليه تبيني اطلع ..
تورطت ماتوقعت انه لئيم كذا وسكتت سالها ( اجيب لك ملابس ؟!
بسرعه قالت (لاآآآآآآآآآ
ضحك عليها بصوت عالي وابتسمت من الاحراج وهي تفتح الباب وتضم نفسها .. ناظرته للحين جالس وملاحظ خجلها قالها (مسوية زحمه وانتي مدبرة نفسك ؟!
سكتت وطلعت للغرفة الثانية وهي تنفس بسرعه نظراته تحرجها الا تلسعها مثل النار .. غيرت ملابسها وصلت فرضها .. وطلعت مالقته ..
ضيق في التنفس وخفقان سريع وتصبب العرق على جبينه .. ويد تشد على يده .. لسان يدعي له ..
(يارب طول بعمره ..
انتظركم ليبقى الحب ...
يبقى الحب ...
ضيق في التنفس وخفقان سريع وتصبب العرق على جبينه .. ويد تشد على يده .. لسان يدعي له ..
(يارب طول بعمره ..
بعد ثمان ساعات وصلت رحلتهم لماليزيا ماجد كان نايم ونجلاء النوم مجافيها .. تتصل على فيصل تتطمن على جدها .. رحلتهم كانت الساعه 10 الليل .. وماحصلت جدها ولا فيصل ..ودعت اهلها وطلعت المطار وهي قلقانه ..
زفرت بضيق وهي تشوف ماجد نايم .. طلعت لتلفزيون فتحته وتمددت تنام عنده .. تبي تنام ومومتعودت تنام مع احد فقررت تبعد الحرج عنها بالتلفزيون ..وماحست بنفسها الا نايمه ..
فيصل تحرك بهدوء وهويشوف جده نام .. صلى الفجر .. واتصل على عمانه ..رجع لجده اللي نايم .. وغفت عينه وهوجالس .. لولا دخول ناصر عليه ..
بندر طمن امه ان جده بخير ودخل ينام وباقي اهل البيت ام خالد وشفى ماجاهم النوم .. ام فيصل تبي تتطمن على نجلاء وتبي فيصل يرجع يتصل عليها .. وام خالد مازال الخوف ياكل قلبها لوصار شي للجد مالهم غيره ..
وفي بيت تركي بعد ماوصله الخبر خافن البنات على جدهن ..
اللي بعد يومين تحسنت حالته للاحسن وماحب جلست المستشفى اصر يطلع لبيته .. وجمعت عياله حوله .. اريح له نفسيا .. ومع طلعت اجتمعت العايله كلها ماعدا فيصل اللي من قبل بيوم وهو في جده اللي باقي عليه فيها ثلاثة شهور ويخلص مع وقت عرسه ..
غصون تحلم به في اليقظة والنوم .. اللقاء .. ماتذكر قبله الا انفعالات صاخبة ..وهفوات متلاحقة .. وتعترف انها منهم الاثنين اذا طيشها خلها في يوم ترد عليه فتهوره خلاه يمد يده .. يبقى الحب ... صامت داخله .. .. وكلما حن لمتاهاته اللي تشتتها..
بادرتك باإحتوائها بعزف... يبقى الحب ..
فيصل كانت واقع له .. بغباء او طيش او شي ماعرف له اسم ؟؟يمكن نصنفه احنا الكبرياء .. حولها لحلم ..كل ما طرق الابواب لقى قبله احد .. وماله الا الاطلال .. يبقى الحب .. عناد عندها ..كلما بعثرة الياس يرجع يبتسم له القدر هي له ..
مسح وجهه بمنشفه صغيرة ويوم شافها جالسه ومنزله راسها بحزن.. ضحك (ههههههههه نو نو مانبغاء ..هههههههههههه
ابتسمت وهي تصد عنه فشلها .. وتقول في خاطرها ..يالليل الاحراج مايصدق يمسك علي شي ..
(تعالي يالغيوره .. جلست جنبه وهي تقول باحراج (خلاااااااااااص ماجد .. وش تبيني اسوي وانا اشوفها شوي وتلمنا ..وتطل بوجهك وانت تضحك اكيد بنقهر ..
اذنيها الحمر وابتسامه منكمشه زامه شفايفها من الاحراج رافع حواجبة من شكلها ( يعني تحبيني ...
فتحت عيونها ( وش دخل ؟؟
ضحك على هبالها ( مو اللي يغارون يحبون !!
زاد توهج خدودها وماعرفت ترد ورجع يضحك ..ضمها (لبى قلب اللي يحبني ..
بعدت عنه تساله(متى بنرجع؟
حس بنبره حزن في صوتها (ليه تبينا نرجع؟؟
بلعت غصة وهي تقول ( اشتقت لاهلي .. ووو ماارتحت هناآآ .. مالهم الا ثلاث ايام لكن يحس انه بداء يفهم عليها ..ويحس فيها .. وخجلها خف وتعودت على اسلوبه المحرج ..و مشاعرها له ماتوفيها كلمة الحب اذا وصفتها.
مشاعره بدت تتعمق بدت بانجذاب .. وراحة .. لمشاعر اعمق ..من الراحة والانجذاب ..
رفع ذقنها وناظر عيونها يدها على صدره ورفعت عيونها اللي مليانه دموع له ( وغير هالكلام ..صوت عميق هز شي داخلها .. خانتها دموعها تنزل ...وهي تقول (ابي امي ؟
من يوم كلمتها وهو يحس انها تبي تبكي .. .تركها تكلمها ودخل لدورة المياة ..عارف انها بتفتح مناحه .. دخل يمزح معها ويغير مودها وهو ملاحظ انها حزينه.. لكن مانفع ..وهذا هي تبكي .. مايعرف للبنات وحركاتهم .. وتعلم بعدها..يدلعها ويواسيها .. ويمازحها ويغازلها
بعد شهر ..
للحين بندر يشرف على قسم فيصل .. اللي بيسكن في بيت اهله .. مع امه اللي لحالها في البيت بعد زواج نجلاء .. نجلاء اللي كل يوم حبها لماجد يكبر وغلاها عند يزيد .. استقرار في حياة نوف اللي يشغلها موضوع الحمل .. لاجديد بعد خطبة سلطانه ..
هناء تعيش ايام بحلاه كلام يوسف المشتاق للوطن والاهل والحبيبة ... راشد وتهاني اوضاع مستقره تتخللها سفرات راشد لشغل تزيد حياتهم تجدد اذا رجع بالاشواق ..
(يبه خذيت علاجك..
رد خالد وهو يضرب جبينه (لا نسيت مع ان امي موصيتني ..
تنهد بندر ( كم مرة تنسى ..انا دوامي مايخلص الا بعد العصر .. ما يعتمد عليك
رد علهم الجد المبتسم ( عطتني شفى علاجي ... ياخوي يومن من الايام كل واحدن منكم يعطيني .. ثمن تذبحوني من بركم ..
ضحكوا على كلام الجد .. ودخل ناصر (السلام عليكم ... يونسهم بالعافية
ردوا عليه السلام وريماس جلست في حضن جدها اللي سالها ( حلو اخوكم الصغير ..
هزت راسها وهي متحمسه توصفه لجدها ... اللى نص كلامها مافهمه وبندر كان يكلم في الجواله سكر ولا حظ نظرات ناصر له متغيره .. استغرب .. اما ناصر اللي يعرف حركات بندر ومغازله .. قرص قلبه مستقبل شفى معه ..
اكيد مايرضى لها ..
ترتب السفرة مع ام ماجد بنشاط ..ويسولفون عن الطبخ والاصناف وفجاء صوت الباب كان قوي ودخول ماجد غريب (سلام ..
ردوا عليه الثنتين دخل مكتب ابوه ولحقته نجلاء قربت منه بابتسامه وهو جالس (تعال ماجد تغدى مافي الا انا وخالتي ننتظرك ..
ناظرها بغصب ..وهو يتصل بالجوال ( ماابي غداء ... ويكلم نفسه بعصبية ..
روعتها عصبيته (بسم الله عليك .. شفيك ؟؟
رد بهدوء ( مافيني شي !!
ردت تساله ( الا فيك شوف شكلك ...
رمى جواله على الارض وهويصارخ ( ماتفهمين .. انتي .. لازم الواحد يعصب .. علشان تستوعبين ..
ام ماجد كانت ورى نجلاءسالتهم ( شفيكم ؟
(فيني هالبزر اللي نشبتيها في حلقي .. وطلع وترك نجلاء تصدق وتكذب اللي سمعته .. كانها عايشة حلم صحت منه .. لاآآآآآآآآ شي اقوى كانها على قمة ولقت نفسها في الهاوية ..
اما ام ماجد (استغفر الله .. الله يهديه .. لا تزعلين يمه هو كذا اذا عصب يقول كلام مايثمنه ..
لا هي اضعف من انها تتصنع القوة بكت صغيره وحساسة وكانت تعيش حلم ... انقلب لكابوس كلها كلمتين خلتها تنهار .. وتحس انها ولاشي ..
طلعت لغرفتها .. وسكرت الباب وهي تنتفض من القهر بزر وناشبة في حلقه يانجلاء .. يعني كل اللي كان يقوله قبل كذب .. اتصلت على امها تبكي ..
(ياهلا يمك مابغيت تجينا... اسبوعين .. كل اسبوع تقول باجي ثمن تنكسل
ابتسم فيصل ( تعبت من المشاوير يمه كل اسبوع وانا هناآآ قلت اجلس اسبوعين تشتاقون لي .. والمرة الجاية ثلاث اسابيع ..
هزت ام فيصل راسها ( تسويها ياقاسي القلب .. حتى شاح علينا بمكالماتك ..
شاف جوال امه واسم نجلاء وعطاها ( يكفيتس نجيلا الظاهر بدقيقه تتصل ... ههههههههه
(ههههههه عطني ياها اشوف لبى قلبها ..
ردت ام فيصل وفيصل يضحك (هلا يمه .. وتغير صوت ام فيصل .. وهي تسالها .. وش فيتس ؟؟
سكتت تسمعها واكيد صوتها وصل لفيصل اللي ركز باهتمام لملامح امه وكلامها (طيب يمه .. انا بتصل عليس بعد شوي ..
سالها بسرعه ( وش فيها ؟؟
ردت ام فيصل ( تعبانه ..
(وش متعبها ؟؟... سوال اكثر الحاح من الاول مليان قلق لان صوتها وصله تبكي بالم ..
(يووووه منك يامك لمن كثرت اسئلتك... تعب حريم .. ودخلت ام فيصل غرفتها ... تكلم نجلاء ..المجروحه او مصدومة وماعاد تبي تجلس تبي احد يجي ياخذها ... رد عليها امها
(اجلسي في بيتس وش الهبال اللي جايس..
(ماابي اجلس عنده .. ارسلي السواق او بندر ..
(تعوذي من بليس ... الرجال ماقال شي .. الرجال يقولون اكبر من كذا .. والحرمه العاقله تصبر ..
(تصبر اللي تبيه بس انا ما ابيه ..
(اقول اعقلي وخلي حركات البزارين ..
(يومني بزر ليش تزوجيني ..
سكرت ام ماجد التلفون في وجهها هذي محد يعرف يتكلم معها ... ابدن دايم كل كلمه لها كلمة ترد فيها ..
طلع فيصل لجده وسلم عليه وتمدد لصلاة العصر ... وما امداه ينام صحاه الجوال ورد عليه بدون مايشوف الاسم (الو ... صمت من الطرف الثاني ... الو
صوت ناعم خجول بعد صمت ردت (السلام عليكم ..
رفع جسمه وتسند بيده ( هلا ..آآآ وعليكم السلام ..
ماعرفت وش تقول ( آآآآآ ابي ابوي سلمان ..
رد بهدوء ( نايم ..
(ردت (طيب !! مع السلامه ..
بعد ماسكرت نادى (غصون .. ابتسم مسرع سكرت ما عطتني فرصة ... وناظر جوال جده وهو يضحك ( تبطي يا ابو محمد ارجع جوالك ...
لحد ماتتصل مرتن ثانية ...
بعد العصر طوت سجدتها وهي تفكر يمدي ابوي سلمان جاء من الصلاة .. ابتسمت .. ورنة صوته في اذنها ..صح كان بارد ورسمي .. لكن يكفي انها سمعته .. احساس مراهقين ولا كل العشاق يحسونه ..
اتصلت ورد نفس الصوت لكن بنبره غير حست من او كلمة انه ينتظرها تكلمه (هلاو الله ..
(السلام ... طلعت ضعيفه
(وعليكم السلام ورحمة الله ...
(احم .. ابوي سلمان .. ومن الاحراج ماكملت ..
سالها (وش فيه ؟؟ قاصد ومستمتع بصوتها العذب ..
(يعني ابي اكلمه ..كانت مستحية وداريه انه يبي يحرجها قهرها عبطه
هنا ضحك فيصل بصوت عالي ناظره جده مستغرب قالها (اتصلي بعد شوي !!
يحس بنشوة انتصار انه استفزها اما هي كانت تدخن من القهر بعدين ضحكت غبي ماعنده احساس ..
(يمكن اتاخر نوف نامي ..
(طيب .. نزلت من السيارة وفتحت الباب لقت سلطانه وعبود في الحوش وسلطانه تزفر بضيق (استفغر الله ولدك من كثر اسئلته احس اني اشركت
(ليه ياكافي .. ههههههه
(تخيلي ياسالني القمر ليش يمشي معنا .. صح ربي وسط القمر .. ربي القمر ولا واحد ثاني .. القمر بيته ...
(ههههههه استغفر الله .. اهم شي لاتلعبين في عقيده ولدي
(والله .. قالتها تمسخر على نوف وكملت ... قولي عسى ماخلاني اشرك بس
(تعالي خلينا نفلها متعب رايح مع ماجد الشرقيه عنده شغل وماخذ متعب خوي له في الطريق ..
(كلمي نجول تجي معنا ..
(بشوف ..
القمر اشغل فيصل بعد مثل عبود .. كل ماتذكر كلمتها (يعني!! ابي اكلمه ... حس صوتها تغير من الخجل لعنادها اللي يعرفه .. صمته مكتوم .. وحبه لها مفضوح كلن يدري عنه ..
والمشكلة يدوسون آماله في قربها اولهم جده يوم اخذه لخطبة ماجد لها وعمة اللي رده ثم ناصر اللي يساله عن رايه في خطبتها من راشد ..كان يعض على اصابع ندم وصبر ..وينخر عظامه ياس.. وتشرق شمس تدفيه بامل وصل .. وصله القدر لانه مكتوب يبقى الحب ...
ليلة
ليلة كلها دموع كلمتها نوف وتفاهمة معها وهدتها وعقلتها لانها اختها واقرب لها .. سمعت منها .. انتهت الليلة وجاء النهار .. وماجد مابين .. قالت لها نوف انه رايح مع متعب ..صحت بدري لبست وتعطرت ونزلت تحت مالقت احد الا هي والخدم قلقانه لانه تاخر
وماتصلت ولاراح تتصل عليه .. نزلت خالتها وسلمت عليها وجلسوا يسولفون .. دخلت تحضر الفطور وهي طالعه سمعت صوته ورجعت .. شافته يطلع الدرج .. انتظرت شوي وطلعت تفطر مع خالتها اللي قالت لها ( ماجد مانام في البيت ؟
ردت (لاآآ
سكتت ام ماجد ما تبي تتدخل بينهم رفعت نجلاء جوالها تشوف اتصال منه حطته سايلنت .. وابتسمت لامه ..
العصر
جالسه تسولف على هناء في المطبخ وهناء تقطع الكيكة ( ماودي اغير مدرستي تعودت عليهم ..اجي على اخر سنه اغيرها ..
(صادقة لكن بعيد عن البيت .. الله يعينك على الزحمة ..
(مدري وش جاب السيرة باقي على الدراسة ثلاث شهور وحنا نفكر فيها ..
(انا ادري عنك قالتها هناء وهي تاشر لنجلا تشوف اللي وراها .. يدخل المطبخ وباين على وجهها انه توه صاحي من النوم .. ضحكت هناء ( اول مرة في حياتك تدخل المطبخ وش صاير في الدنيا
ابتسم وهو يتقدم لنجلاء وضمها بقوة له (ادور واحد زعلان ابي اراضية .. وباس راسها . نجلاء انجرحت وهناء اخذت الصحن واشرت للخدامه تشيل القهوة وهي تقول ( بنتقهوى في الحديقة ..
للحين ضامها وهي مغمضه عيونها ماتبي تبكي .. ولا تبي اصلا تكلمه .. تحس بانفاسه على رقبتها وهو يهمس في اذنها (نجولة حبيبتي ..وهي تحاول تبعدت بدون صوت .. تركها قالت له ( ماني بحبيبتك ..
(نجلاء انتي عارفه اني معصب ومالقيت الا انتي في وجهي ..
حاولت تكتم عبرتها وهي تقول ( تصارخ علي كذا .. ابي اعرف وش قلت علشان تسوي كذا .. وتفشلني حتى قدام خالتي .. على الاقل كان احترمتها دامك مو متحترمني ..ومعتبرني بزر مثقل عليك
(والله يانجلا كنت معصب وصرتي بوجه المدفع .. وهذا انا اعتذر .. واعترف اني غلطان .. لا تكبرينها ..
صرخة وهي تبكي ( انا صرت ناشبه في حلقك .. انا ؟؟ تساله بعتب والم
ضمها وهي تبكي .. (حبيبتي خلاص ..
دفته بعيد عنها (اكيد خلاص ... يوم كامل مافكرت تكلمني ولا تعتذر .. حتى رحت لشرقية ماقلت .. وشوانا في حياتك ولاشي .. وتجي تقول حبيبتي ..
دخلت عليهم هناء وهي تشوف الوضع متازم حيل ماجد يده على خصره ومتكي بيدة الثاني على الطاولة ونجلا واقفه قرب منه وتبكي .. (خاتلي منيرة هنا..
هز راسه بصمت واشر لهناء تحاول في نجلاء تسكت وطلع لخالته .. وهنا.. تحاول تهدي نجلاء ولا فكرت تسالها وش فيك لانه شي اعتبرته خاص بينهم ..
(يمه ماعليك تعرف تدبر عمرها ..
(وش تدبر عمرها.. اتصل عليها ماترد على قليلة المعرفة ..
ردت نوف( اني يمه بعد ماعطيتها وجه ..هي مقهوره وانتي قهرتيها زياده ..
(الا دلعتها زياده عن اللزم .. انا قلي ياكلني عليها وهي مطنشة ..
(خلاص يمه بكلمها اللحين ..
سكرت نوف ومتعب ينسف شماغه قدام المراية .. بتنتظره يطلع وبتكلمها .. متعب حاس ان ماجد بينه وبين نجلاء شي بس ماحب يتدخل .. وماوده بعد نوف تدخل ..
(نوف ما نبي نتدخل بينهم .. ماجد غالي علي ..حتى لو نجلاء اختس ..
تنهدت بضيقه ( ان شاء الله خير ..
جالسه على طرف سريرها ردت على امها (هلا يمه ..
(وينتس ماتردين علي ..
(ماكان جوال عندي .. تاركته بالغرفة .. وهالشي بعيد ن الصحه لانه كان معها بس ماعاد تبي تشكي صادقة نوف لازم تحل مشاكلها لحالها ..
(شلونتس اليوم ؟؟ وسوال له اكثر من معنا ..
(الحمد الله بخير ..انتم وش اخباركم ماجاء فيصل هالاسبوع ..
(الا جاء امس وبيروح اليوم تعالي سلمي عليه ..
(ان شاء الله ..اذا صار لي فرصة جيتكم اشوفه من زمان ماشفته ..
(يالله مع السلامه ..
(مع السلامه .. سكرت التلفون .. وناظرت ماجد اللي واقف قدامها مبتسم يفكر معقوله ماقلت لامها .. لان مكالمتها كانت عادية جدا .. ولا كنها زعلانه ..كبرت في عينه اكثر .. وفقت بتطلع ( وين ؟؟
(بنزل اسلم على خالتك ؟؟
(انتظري راشد عندها .. جلست وقالها (ولا اقول البسي عباتك اذا سلمتى على خالتي نروح لااهلك ..انتظرتحت
ماترك لها وقت تفكر .. تجهزت لبيت اهلها .. وطلعت معه لهم .. وبعد ماسلمت على اهلها كان الوقت بعد العشاء .. عزمها ماجد على العشاء .. وبدت الامور ترجع بينهم ..
شهر انتهى .. والثاني .. وبعده الثالث ..
فيه تطمن ناصر على مستقبل شفى .. وان ابوه له نظره ماتخيب .. وتمت ملكة نايف .. وجاء يوم فيصل المنتظر
رهبة تجتاح عظمها المرتجف توتر .. ابتسامة وجل.. ترسم بارتباك طريق الحلم حتى يكون واقع .. معزوفة خفات القلب لحن انتظار .. في مقابلها ..
ملامح الراحه ارتسمت عليها بعد مابكت كابوس ضياع ..كانت تعزف معها نفس مقطوعه الانتظار ..
ماتذكر شي من يومها الا يده القويه التي تضم كفوفها ولا يحس بشي الا نعومة اصابعها الغضة .. ابتسم وهويشوفها متصلبه .. نادها بحرف اسمها اللي رده عنها عنادها وكبريائه (غصون ..
تنفست بعمق وهي تعض شفايفها وترفع راسها بابتسامه .. لابتسامته ..
ابتسامة هادية وحياة مستقره ومشاعر بين الاثنين كل واحد يبين صدقها بعيد عن الماضي واللي صار فيه ..
مابعد النهاية ......
يبقى (ال ) تعريف بــــــ حب ابطال روايتي
يبقى الــــــــ حب
الجد سلمان
دافعا لحماية عائلته وحرصا على تماسك ابنائها .. حب ابوي كبير كهالة يحيط بها افراد عائلته ..
يبقى الــــــــ حب
محركا لتصرفات بندر الطائشة والمتزنة .. خبثة وطيبته.. مزحه و جديته..
يبقى الــــ حب
السر في قوة وتحمل وصبر غالية ..
يبقى الــــــ حب
سبب في تلك العلاقات الاخوية بين ماجد ومتعب ..وهناء وسلطانه ..
يبقى الــــ حب
بعد انتهى هذة الحكاية بيننا كما كان قبل ذلك
لكم مني كل الشكر والمحبة احبتي في الله
ولفته لصديقتي الغالية (؟)المتابعه لاجزاء يبقى الحب من خلال المسنجر قبل عرضها لكم .. والتي غيرت كثيرا في مجريات الحكاية ..
ربما تعود تلك الغيوض وربما هنا النهاية ....
حب يبقى لـ
شخوص حكاية الخياة...
و يبقى الحب
حكاية لا تنتهي ...
-تمت -
تجميع ورد جوري
الكاتبه غيوض 2008
اللهم لك الحمد حتى ترضى وإذا رضيت وبعد الرضى ,,, اضف تعليقك