رواية علمني كيف اترك يدك في عز حبي لك -50
رجاوي : انطمي أحس ما أبكس هالوجه أغير معالمه لا تنسين يوم انبكستي في هالوجه العيد اللي فات و ما قدرتي تورين لنا وجهك ... سكري حلقك أفضل لك
قامت هديل
هديل : تهدديني طيب أنا أوريك
و طلعت من المطبخ و حنا فاطسين ضحك عليها لأنها بكل تأكيد راحت تشكي لأمها مثل البزران ....
عزه راحت تشتري بعض الأغراض من ضمنها عطور للفواحات و عود و حلاوات للعيد
يوم حلو يتخلله الضحك و الوناسه و الكل مغير جو الجده صحيح أجبرتنا جميع على شي يمكن بعضنا ما كان يبيه بس في صالحنا و صحيح انها طول و قتها ساكته بس تحس فينا بقلبها الطيب بصمتها تعرف كيف اني متعذبه بسبب فراق زوجي و تعرف خوف جوري من زواجها اللي قرب موعده و معاناة رجاوي مع نفسها و صمت عزه اللي تفرج عنه لما تجلس معانا تعرف معاناة ملك مع الماضي و تعلقها بزوجها الله يرحمه يزداد يوم بعد يوم
تحس فينا بس تسكت و هي تعرف ان بعض الأحيان الصمت ما يكون له مكان ابدا
سهرنا للفجر ما فينا نوم فرحانين بالعيد كل وحده راحت لغرفتها تشيك على لبسها و تتسبح و تسشور و خلافه أما أنا رحت أبكي على أطلال الحبيب و ألمس مكانه و أصيح
رن جوالي بنغمتي المفضله اللي حطيتها خصيصا له
و الله واااحشني موت
آخف بعدك أمـــوت
أميره : يالغلا واااحشني
جواد : يا حياتي لا تبكين
أميره : ارجع الله يخليك يكفيك بعاد يا روحي أبيك محتاجه لك حتى ولدنا ينتظر رجعتك رد لي خلاااااص حبي أنا بعد لي حق عليك تعاال أبيك
جواد : يالغلا يا قلب جواد و عينه لا تبكين تخلص ساميه العلاج و الله بنرجع شوقي لك أكبر يالغلا مب عارف كيف مشتاق لك كيف بيمر هالعيد بدون الأميره ....
أميره : حياتي طيب احجز لي أجيك الله يخليك
جواد : بتتعبين و بعدين انتي حامل و السفر بالطياره خطر عليك
أميره : طيب اوعدني ترجع الله يخليك !!
جواد : معشوقتي
أميره : .................
جواد : معشوقتي
أميره : جواد ... أحبك يالغلا أحبك لا يطول غيابك
جواد : أكيد يا قلب جواد برجع كوني واثقه من هالشي كلها كم شهر بتشوفيني عندك !
العيد هل و طلت تراحيبه
طبعا العيد يوم خيالي مع انه بالنسبه لي كان كئيب بدون جواد !!
كشخنا و تزينا رجاوي و جوري و هديل راحوا للكوافير يقصون و يصبغون
أنا و ملك جلسنا بالبيت نباشر الضيوف و نرحب باللي جايين يعايدونا
طبعا رحنا للمسجد صلينا و ردينا نعايد بعض و نستقبل المعايدين
عيدي بدون حبيبي مهو عيد و كل ما اشتقت و حرقني الشوق أكلمه أو أتصل عليه
أرسل لي صوره كانت مره تجنن بسويسرا و الأكثر اثاره في الموضوع انه كان لابس التعليقه اللي عطيته اياها كان شكله مره يجنن و هو لابس الكاب و راكب السياره سيارته البانوراما السودا هههههههه
جاني بوكيه ورد كبير و ساعه ألماس من جواد كان موصي عليها في واحد من المحلات و ربي كانت فرحتي غير تقليديه صرخت من الفرحه و الوناسه يعني وااااااااااااااااااااااو
حتى شي ما قدرت أوصف سعادتي لما شفت الهديه
ملك : أموره في ضيوف بالمجلس يبونك
أميره : غريبه مين يعني ؟!
ملك : جيبي الورد بخلي الشغالات يطلعونه لغرفتك و انتي شوفي ضيوفك
رحت أشوف ضيوفي اللي من شفتهم حسيت بالأكسجين يخنقني أكثر من انه يدخل لصدري
و يساعدني على التنفس !
ابتسمت ببلاهه ردت فعلي المعتاده و الغير متوقعه !!
أميره : أهلين تور ما نور المكان
سلمت عليهم ببرود شديد و اللي ما تتوقعونهم ........أخواني ....!!
وينهم من زمان !!
أخيرا استجابوا لنداءاتي لما قطعت الأمل في اني أشوفهم أو بالأصح نسيت ان لي أخوان !
ما قلت لكم اني دقيت على أخواني من باب صلة الرحم و طبعا محاولاتي باءت بالفشل الذريع ... أحمد الكلام بيني و بينه صار مستحيل بس أشكره على شي واحد انه زوجني جواد غصبن علي ... عبدالهادي كأنه ما صدق يتخلص مني أو لنقل انه اتقاسم الورث مع أحمد عشان كذا تخلصوا مني و أنا اللي كنت متوقعه ان الفلوس هي آخر اهتماماته !!
مسكينه أنا قلبي حنون حيل أمير سمعت من الناس تدرون يعني وش سمعت من الناس يعني أخوي اللي من لحمي و دمي أسمع أخباره من الناس و أنا اللي هريت جواله اتصالات و مسجات و لا جا فكر حتى يرد علي و من الأول يقول اني توأمه !!
ثامر لاهي مع مرته و عياله و شغله بالشركه قصدي شغله بالفلوس !!
ياه من كثر ما هم أوفياء معاي و قلبهم علي جو يعايدوني ههههههههه !!!!
سبحانه من علا شانه
أميره : وش اخبارك يا أحمد عساك متهني بس و مرتاح !!
طالعني برفعة راس و شوفة نفس
أحمد : بخير ....... تمام و من الأحسن الى الأحسن
طالعته بإبتسامه استغراب تعبر عن مقتي لهالأحمد بشده
أميره : شخبارك يا عبدالهادي طلعت مرتك أحسن منك تسأل و تتصل ؟
عبدالهادي : و الله يا وخيتي أشغال
قلت بدون تصديق
أميره : لااااااا تدري عاد علمتني مرتك مره ان كلمة أشغال ملغيه من قاموسها يعني ما تنفع حتى تصريفه تتصدق !!
طالعني بإرتباك و رد طالع الأرض ما عاد مثل عبادي اللي أخبره هزل جسمه و صارت عيونه غايره الفلوس وش يجي من ورى حبها غير الهم و الغم !!
أميره : هلا بتوأمي يا هلا بالبرنس شرفت و آنست متى الوصول من بريطانيا
قال و هو يتجنب يطالع عيوني
أمير : أمس !!
أميره : آهاا لا فيك الخير و الله جاي تعيد علي .... وش أخبار ثمور مضيع الأخبار و العلوم ؟؟
ثامر : ................
قلت بطفش
أميره : تدرون عاد حريمكم فيهم الخير أحسن منكم يثمر فيهم الخير لو قطره
قلتها و أنا أرفع شعري
أميره : ..... و أعتقد ان البيت بيتكم ما قلتوا لي وش تشربون ؟!
قام أحمد و قال بعصبيه
أحمد : جيناك نعايدك و تركنا أشغالنا تعاملينا بهالمعامله طلعتي ما تستاهلين مجينا لك
ضحكت بتريقه
أميره : رد لورى لبعيد قبل خمس شهور أو ست شهور و تذكر كيف رميتني أربع أيام تحت الأرض مع جيف متعفه و دواب الأرض تنهشني .... بصراحه برافو أحسنت معاملتي !!
طالعوني أخواني و بعدين طالعوه من كثر ما هم مفهيين .... هو طالع الأرض بإرتباك
أميره : أها طلعتوا ما تعرفون ما سألتوه مين حرق البيت و خلاني أتشوه و أنحرق ..
ما قالكم كيف صارت عنده هالشركه العملاقه و الفروع الكبيره في دول الخليج ما قالكم وش سوى على قطعة الأرض في أبو ظبي ما قالكم كيف زوجني بهالسرعه و بدون تأخير
معقوله كنتم عمي ما تشوفون كل اللي كان يصير و لااا تتعامون عشان تاخذون الفلوس و الحمد لله ان الفلوس عندي تراب الدنيا ما راح أسألكم و لا أقولكم أبي فلوسي اللي اختلستوها و لا حسابي اللي لقيته مجمد في البنك هههههههههه عادي خذوه
وقفت قدام أحمد
أميره : وش فيك خافض الراس .... وش فيكم سكتوا ؟؟!! و الله الحمد لله طلعت أحسن منكم فيني خير بعد ما رميتوني في النعيم عند جواد الله يطول عمره و بعد ما ظلمتوني و خدعتوني و خنتوني .... اتصلت عليكم و سألت عنكم أرسلت المسجات و اتصلت بس و لا واحد فيكم رد علي .... وش تنتظرون مني بعد كذا آخذكم بالأحضان و أطبطب عليكم ؟
و لا أرفعكم فوق و أفتخر فيكم .... ما راح أتبرى منكم بالعكس بتظلون أخواني غصبن علي
حبيت و لا ما حبيت لأننا نحمل اسم واحد مساعد آل ....
أنا لقيت أهلي اللي أحبهم و اللي يحبوني يخافون علي و أخاف عليهم أهل زوجي اللي رميتوني لهم محسبين انكم رميتوني لجهنم .... و طلع أطيب من الطيبه نفسها !!
عمر الفلوس ما جابت الحب و لا السعاده ..... انتم عار على الحياه ...
طلعت من المجلس و أنا أرتجف طلعت لغرفتي أبكي أبكي حيل
مب قادره أستوعب أنا وش قلت !!
_____________________
الساعه : 07:20 مساءا
ثاني يوم العيد رحنا الملاهي و بحكم اني حامل ما قدرت ألعب و لأن بطني كبرت شوي
أو بيتهيأ لي و ...دايم أحس بالألم بسبب بعده ياااااااااااه يا جواد ...
قمت أتأمل البنات و هم ينططون و يلعبون و يجرون جلست بروحي أتذكر لما رحت أنا و جواد الملاهي في ايطاليا ... ركبنا كل الألعاب و من ضمنها لعبه عباره عن كره تدخل جواها فتدفع الهوا بقوه من الأرض ياه قديش صرخت لما طار شعري لفوق و طارالإيشارب مع الأوراق اللي لازم نجمعها و نحطها بالصندوق !!
دخلنا غرفة المتاهه اللي كلها أبواب شفافه تدور على نهايه عشان تطلع و المضحك ان جواد تسلق واحد من الأبواب لما تهنا و عرفنا طريق الخروج ... غشاش بإمتياز لا يفوتكم !!
ملك : أميره أميره
أميره : هلا ااا
ملك : أكيد سرحانه في حبيب الألب
قالت و هي تناولني الأيسكريم
أميره : اذا ما سرحت في جواد بسرح في مين ؟ واحشني وربي
ملك : يا هوووو وينك يا جواد تسمع زوجتك وش تقول عنك !!
ابتسمت بمرح و قمت آكل الإيسكريم
ملك : تلعبين معانا
أميره : كيف ألعب و أنا بهالوضعيه
و أشرت على بطني
ملك : معليش نسيت أموره و ربي مقدره وضعك انك تعبانه بس
أميره : بس غير الغالي ما عندي أحد أتعب عشانه
ملك : طيب قومي نتمشى !!
قمنا نتمشى و نسولف في كل شي و الأهم اننا كنا نسولف عن عزه
ملك : تدرين حالة عزه محزنه !!
أميره : ليه هي ليه كذا دايم منطويه و تفكر و تتفلسف في كل شي ؟!
ملك : اسمعي قبل ما أقولك على سالفة عزه بقولك شي بس ما تزعلين !
جوري : بوم بوم بووووووووووووووووم
أميره : يا ويل قلبي !!
ملك : بسم الله الرحمن الرحيم جوري و وجع
هي فطست ضحك و طبعا بسبب حركتها الرهيبه توصخت ملابسي بالإيسكريم
ملك : روعتينا حسبي الله على عدوينك وش ذا !!
جوري : فقره من فقرات العيد هههههههههههه
أميره : أنا متأكده اني بسقط على يدك انتي و رجاوي
و قمت أدلع و أسوي نفسي تعبانه
أميره : آه لحقوا علي بطني سويتيها فيني يا جوري
طبعا خافوا علي و جوري تروعت مسكينه و كانت بتبكي كالعاده
أميره : هههههههههه الكاميرا الخفيه
جوري : و ربي سخيفه
ضربتني على كتفي بقوه و راحت !
رجعنا البيت و قمت أسولف أنا و ملك في غرفتي
أميره : وش الشي اللي خايفه يزعلني ؟!!
قالت و هي مستحيه
ملك : سمعت كلامك مع أخوانك أمس
ابتسمت ببرود
أميره : خذي راحتك
ملك : طلعوا زعلانين مره
أميره : الله يهديهم و اللي سووه معاي مب هين ؟؟
ملك : تدرين محد يستاهل الخير هالأيام الا الناس الطيبين تدرين و عزه كانت من هالطيبين و تحولت للي انتي شايفته !
تعدلت في جلستي و طالعتها
ملك : يا قلبي عزه تزوجت بعد ما خلصت الثانوي سافرت بحكم عمل زوجها الى ألمانيا و سجلت بالجامعه و تخصصت في قسم العلوم الإنسانيه طبعا كانت حياتها على ما تحكي لنا فوق فوق الوصف التهت في دراستها و زوجها في شغله ....
و مرت الأيام و خلصت عزه دراستها و عجبتها العيشه هناك فكملت الماجستير بإمتياز
في مره من المرات قالت لزوجها تبي تتأخر عندها عمل بعد الظهر فلما راحت لعملها ما لقت الدكتور لأنه اعتذر فرجعت لبيتها و دخلت لغرفتها لقت زوجها مع وحده في وضع لا يحسدون عليه !!
المسكينه جتها حاله نفسيه و رجعت للرياض و طبعا طلبت الطلاق و صارت بس تمسك كتب الفلسفه و تتفلسف صارت استاذه في الجامعه لأنها على درجه عاليه من العلم و الثقافه و مع ذلك عايشه حياتها !!! مشروخة القلب !!
( الخيانه عباره مستهلكه تتداولها الأجيال ... لا تحقرن صغرها لأنها هادمة لأكبر الدول )
الجزء الخامس و الثلاثين
ملك : شقه ابداعيه ؟!
قلت لها بمرح
أميره : سري الخاص
ملك : و وش هذا ؟!!
أميره : فقاعه بلوريه طلبتها رنو طلبيه من برلين ...
ملك : كيف دخلت الأعشاب فيها بهالشكل ؟!
أميره : اسأليها يمكن تجاوبك !
رحت للمطبخ اللي مفتوح عالصاله
أميره : ريحة الأكل ياااااااااااااااااه مذهله
ملك : بيت حلو بس شكله غريب شوي ....حتى السرير ههههههههه مائي
أميره : هذي شقتي الخاصه أنا و رنا هنا عالمنا الواسع لا ضاقت الدنيا علينا نجي هنا و أبو عبده الله يسعده يرسل مرته من فتره لفتره تنظف البيت
ملك : شريتوها !!
أميره : طبعا
ملك : و ما تخافون من الشباب
جلست جنبها و قلت بمرح
أميره : كل اللي عايشين حولنا عائلات
قلت و أنا آكل جزره
أميره : تغيير ........عالم رائع وش بعد كذا ؟!!
تعمدت أجيب ملك لمقري السري عشان تروح عن نفسها و خصوصا انها مره الماضي ذابحها في هالكم شهر و زوجها مقتحم أفكارها بشكل مخيف لدرجة انها صارت تتمنى تلحقه ...!!
مرت الخمس شهور على سفر جواد حاولت أأقلم وضعي على كذا تأكدوا تماما اني باقي أحبه و أشتاق لمكالماته اللي صارت كثيره يعني يدق باليوم يمكن خمس مرات و أحيانا أكثر يقول انه حلم فيني حلم بشع و صار يهوجس فيني و يفكر يقطع فترة العلاج و يجي يتطمن علي انبسطت بمكالماته الدائمه و الكثيره هونت علي أشياء كثير و خلتني أهتم بأشياء كثير أولها الناس الطيبين اللي حولي و أحبهم على قلبي ملك اللي من أشوفها يتملكني خوف فظيع عليها فحبيتها تغير جو و تتعرف على عالمي المثير !!
هالخمس شهور كانت جدا عاديه الا من بعض الأشياء الغريبه اللي صارت في أوقات مدري وش بقول عنها ؟!!
كنت أنا و رجاوي نسولف و نضحك في آخر الليل بالصاله اللي بالدور الثاني
شوي و نسمع صوت ضحك لصوتين فجعونا صوت رجال و صوت مره اللي عرفت انه لهديل
صوت ضحك ماصخ و أصوات ما قدرنا نفهمها و بطبيعة الحال حبينا نعرف وش السالفه ؟
و المرعب أكثر في الموضوع انه تخمينا طلع غلط و ان هديل فتحت لنا الباب مفجوعه توها قايمه من النوم و تتثاوب !!
حزنت على فراق الجده اللي راحت للديره لأنها كانت تبي تتطمن علي على قولتها !!
المصيبه الأصعب على النفس اني بالغلط تقابلت مع بندر أخو جواد فجعني و الله !!
دخلت للبيت بسرعه و أنا أرتجف من الخوف قلت لملك عاللي صار أخذت الموضوع ببرود و ما علقت !!
ملك : حصاله ؟؟؟
ضحكت و قلت
أميره : ايه !!
ملك : وش تجمعون فيها !أكيد فلوس
أميره : اكسريها و شوفي
قالت بطفش و هي تتمدد عالكنبه
ملك : خليها تعيش حياتها ليه نموتها بتكسيرها
مسكت الرموت و قلبت على قناة أغاني
و الله مااا يسوى أعيش الدنيااا دونـــك
لا و لا تسوى حياااتي بهااالوجــــــود
دااامك انت اللي رحلت و كيف أبصبر
حسبي الله وحده و نعم الوكـــــــــــيل
قامت تبكي و تصيح
أميره : اذكري الله يا بنت وش هالكلام ؟!
مسكت الرموت و قلبت على قناه ثانيه
مسحت دموعها بسرعه و قامت
ملك : ليتنا نرد للبيت خلاص تعبت !!
و ردينا البيت طبعا ..
جواد : وش فيك ؟
أميره : ولدك تعبني خلاص يا جواد رد الله يرحم لي والديك
جواد : خلاص و لا تزعلين أسبوع بالكثير بنرجع
أميره : صدق و الله
جواد : أكيد
كانت الفرحه عندي بالدنيا و خصوصا اني جلست أحسب هالأسبوع الكل ينتظر رجعت جواد جوري مأجلين زواجها عشانه و رجاوي مأجلين ملكتها عشانه جدتي اللي كانت تبي تحج مع جواد فاتها الحج و جواد ما جا
_________________
الساعه : 08:20 مساءا
رن جوالي ....
أميره : يا هلا بنداوي أمي الحنون
ناديه : لحقي علي يا أميره أخوك بالمستشفى من يومين
قمت من مكاني مستغربه و منفجعه
أميره : أحمد !!
ناديه : تعالي بسرعه
و فعلا خذت رجاوي معاي بعد ترجي لأني و بصراحه خفت من السواق حقهم ما أحب أطلع معاه لحالي ...
دخلت على أحمد اللي كانت حالته مأزمه قصدي ....شلت تفكيري !!
تذكرت الشموخ اللي دايم يتصف فيه !!
حتى طريقته في التوقيع على الشيكات تذكرتها
( جنتل مان بدون روح )
طالعته بذهول و أنا مغمضه عيوني أبي أحبس الدمعه مب قادره !!
في لحظتها ما فكرت الا كيف كانت بداية حياته في الغرفه اللي تحت الأرض و كيف أبوي عذبه و أذله .... أمي حنت عليه و اعتبرته واحد من عيالها كبر و الجرح اللي عاشه في الغرفه النحسه يكبر معاه و يزداد حقده للماضي و كرهه لأبوي لأنه يذكره بهالماضي
تأملته للحظه ....
جسمه احترق بالكامل و كل قطعه في جسمه ملفوفه بالشاش الأبيض بعنايه و الدم يخترق طبقات الشاش بالتدريج شفت كيف لحمه محترق في رقبته و تحت ذقنه ....
انهرت في مكاني و قمت أبكي
أميره : يا رب أنا مسامحاه لا تعذبه يا رب لا آاااااااااااااااه يا ربي هذا أخوي
انهارت ناديه تبكي و تصيح و تصرخ
ناديه : أنا عارفه انه حرقك بس آآآآاااااااااااااه
بس انتقام رب العالمين أقوى من أي انتقام في هالدنيا عمري ما دعيت عليه بس ربي أخذ حقي منه !!
مرت بعدها ثلاث أيام صامته أتأمل السما و أشوف الكون اللي حولي لأني أحيانا أرجع لطبيعتي أميره الأميره اللي الصمت يحبها و يعشقها اشتقت للحبوب المنومه بس تذكرت ولدي اللي بالطريق فخفت عليه أتحمل ألم الأرق عشانه مب مشكله بس أحمد و ربي شكله فجعني صرت أحلم فيه و هو يصرخ من الألم يا ربي ارحمه و اشفيه !!
حسبي الله وحده و نعم الوكـــــــــــيل على اللي كانوا السبب!!
كان في جوله لواحد من المستودعات أول ما دخله انفجر و الشرطه قاعده تحقق في الموضوع نزل الخبر بالجرايد و صارت ضجه حول رجل الأعمال الثري اللي تعرض لمحاولة اغتيال يقولون ان في تسرب للغاز صار بالمستودع بس الطريقه المفاجأه اللي انفجر فيها المستودع كانت مريبه ...
رجاوي : ما شفتي الأخبار كيف نزلت بالجريده شكله أخوك له مكانه مرموقه في المجتمع
أميره : ................
عزه : و اللي يقهر هالناس اللي قامت تذبح بعضها بسبب الفلوس
رجاوي : تلقينه حتى هو كان مصروع عالفلوس مين ما يحب الفلوس في هالزمن ؟؟!!
أميره : ..............
هديل : محد فينا كامل هههههه حتى اللي نحسبه رجل أعمال مرموق تفحم في المستودع
قالتها بتريقه
رجاوي : يا شيخه هم كذا الكبار و الناس اللي تقولين انهم فوق يموتون موتات الله يحفظنا يا لطيف ينذلون في موتهم و بعد موتهم !
عزه : اللحين الجشع مستمر و الناس كل مالها تذبح بعضها عشان حفنه من هالفلوس و مب مهم عندها اذا كانت حرام أو حلال ....
وش رايكم في كلامهم !!
أصرخ عليهم و أقول بس و لا أسوي فيها و أقوم أردح لهم مدري ليه في ذيك اللحظه !تخيلت اني عايشه لوحدي أفضل مية مره من هالعيشه المره اللي كلها كلام يكوي و يذبح
رجعت الكرسي لورى و قمت ..
أميره : عن اذنكم تعبانه شوي بطلع أرتاح
طلعت لغرفتي و جلست أطالع الحديقه بصمت تذكرت ملك اللي من ثلاث أيام ما شفتها
قمت رحت لغرفتها لقيت الباب مفتوح و هي ماسكه شفرة الحلاقه و تبي تقطع عروق معصمها !!
أميره : يا مجنونه ياااااااااااااااااااااااااااااااااا ملك
جريت تجاهها و دفيتها بقوه طاحت عالأرض بس الشيفره بيدها
ملك : انتي مو فاهمه شي لازم أموت مشتاقه لمشعل يا أميرة مشتاقه له سامحيني
طبعا بما اني حامل فما قدرت أقاومها و هي تدفني و تطيحني عالأرض طحت عالأرض بس قمت بسرعه من الروعه عليها لأنها بجنونها ناويه تنتحر
أميره : لا يا ملك وش بتقولين لرب العالمين يوم القيامه
دفتني بقوه و أنا أصرخ و أنادي خواتها اللي بكل تأكيد ما راح يسمعوني لأنهم جالسين في الحديقه و أنا بالدور الثاني ...
مسكت يدها اللي فيها الشيفره بقوه سحبت يدها بقوه و جرحتني في يدي دفتني بقوه عالسرير ما قدرت أقوم مسكت المخده و هي تقولي بملامح عمري في حياتي ما راح أنساها
ملك : سامحيني يا أميرتي
و حطت المخده على وجهي بقوه ضغطت عليها و أنا أقاومها و أحس بألم في بطني كتمتني بالمخده بكل قوتها حسيت الأكسجين يختفي مع آخر زفير أزفره ...
_______________
الساعه : 06:30 صباحا
قمت و أنا أحس بألم خيالي طالعت الدنيا اللي حولي لقيت نفسي على سرير أبيض بارد
عرفت اني بالمستشفى ... غمضت عيوني و تنهدت بعمق
قمت بسرعه و حطيت يدي على بطني
أميره : ولدي .... وينه ولدي !!
مسكتني يد حانيه ناعمه دافيه حنونه رقيقه كل اللي أقدر أقوله انها يد جواد !
حسيت اني تشافيت يوم شفته تعافت أمراضي تلاشى حزني ردت لي صحتي راح الألم اللي أحس فيه ضمني بقوه و هو يبكي انهار في حضني و هو يصيح مثل الأطفال ...
استغربته و استغربت هالإنهيار كله اللي خلاني أرتجف و أتسائل وش اللي صار له !
جواد : ملك .... ملك انتحرت يا أميره ملك ماتت قتلت نفسها يا أميره
أميره : انتحرت !!!
حطيت يدي على شعره و أنا أتذكرها
( سامحيني يا أميرتي )
الإبتسامه الحزينه اللي شفتها مرتسمه على وجهها يوم قالت هالكلمه تحسسني بالجنون
كانت تحس بنشوه أكيد لما قطعت عروقها و أعتقد بعد انها ندمانه عدد شعر راسها عاللي سوته لأنها لا راح تلتقي بمشعل و لا راح تعيش النعيم مثل ما قالت ...
ارتجفت و أنا أتذكر كيف كنت راح أقتل نفسي لما توفوا أهلي كنت أشرب المنومات اللي كنت عارفه انه زيادتها تقتل كنت أجرح نفسي أصرخ و أحيانا كنت أنوي أرمي نفسي من البلكونه ......
نسيت ولدي و نسيت ألمي بعد الولاده و نسيت حتى أسألهم وينه !!
انفتح الباب بقوه و دخلت منه ساميه و نطت في حلقي و ضربتني بشكل هستيري
ساميه : انتي اللي قتلتيها يا قاتله يا مجرمه انتي !!
مسكها جواد من يدها بقوه و عصب عليها و هو في قمة حزنه
جواد : ملك هي اللي اقتلت نفسها يا ساميه اعقلي
ساميه : ما راح أهدى لما تموت !!
ضربها كف قوي على وجهها فطاحت عالأرض
جواد : ............................
ساميه : تضربني عشان هالمجنونه
و جت بعنف و قوه ضربتني الممرضات سمعوا الصراخ فجوا مسكوها و طلعوها من الغرفه و هي تصارخ و تشد في شعرها و تلطم !!
أنا مثل ما أنا في مكاني لا دموع لا صراخ و لا ملامح غير الصمت اللي ذاهلني و حتى ضرب ساميه لي ما حسيت فيه لأني كنت في عالمي مع ملك ملك اللي انتحرت عشان توصل لزوجها و الأكيد انها ما وصلت و لا راح توصل ... ليه قلبت فجأه كانت وش حلوها هاديه و عاقله وش قلبها بهالشكل و لا عشانها حلمت بزوجها كم مره انه يناديها و يقولها يبيها تلحقه تقوم تفكر بهالطريقه !!
هزني جواد بقوه
جواد : أميره ردي علي !
أميره :.....................
جواد : لا تسكتين واحشني صوتك ردي تكلمي قولي أي شي انسي ملك و ردي علي
ضمني بقوه و هو يرتجف !!
_________________________
الساعه : 10:00 صباحا
نام جواد عندي بالغرفه .... بعد ما طلب من الدكتوره انه يتم معاي
جلست على السرير متربعه و ضاغطه على يدي في حضني بصمت عيوني تعبت من البكي تعبت حتى من الألم ضاقت علي الدنيا و اخترت الصمت حل لمشاكلي !!
ملك !!
وينها ليه مهي هنا تسلم علي و تحضني و تبارك لي عالمولود الجديد !!
اللي انتهى أمره في الحضانه لأني ولدته قبل أوانه فصارت الحضانه مقره عشان يكتمل نموه و هو المفروض يكون في حضن أمه ..
غطيت جواد زين و قمت أشوف ولدي مشتاقه أشوفه و ألمسه....
قديش يجنن ما شالله عليه طالع لأبوه بسم الله عليه
الدكتوره : انتي بس كدا اتغذي و أومي لنا بالسلامه
ابتسمت للدكتوره و أنا ألمس يده الصغيره الناعمه يا قلب ماما
أميره : أشكرك يا دكتوره و الله ما قصرتي معاي
الدكتوره : متؤوليش كدا الشكر لله و ابنك ما شا الله صحته كويسه
أميره : يا روح ماما و قلبها
قمت أتأمله
بأقول لجواد نسميه سلطان حلو سلطان طبعا ولد أميره و جواد لازم يكون سلطان
أو أسميه مساعد تميت عند ولدي ألمسه و أغني له و أسولف له عن أمه و أبوه و عن جدته
و قمت أتأمل الأطفال اللي معاه بالحضانه اشكثر يهبلون بسم الله عليهم
كان ودي أشوف عيون ولدي اللي تقولي الدكتوره ان لونها عسلي فاتح بس هو مسكرهم
كانت معنوياتي مره مرتفعه و عندي قوه خياليه أقدر أواجه فيها مشاكلي الله يرفع قدرك يا سلطان طلتك بس شو وش سوت في أمك !!
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك