رواية علمني كيف اترك يدك في عز حبي لك -43
ملك : لا أنا تزوجت و عمري 14 سنه
أميره : يوه يا قلبي و كيف جا قلب لأهلك يزوجونك في هالسن
قالت بكل بساطه
ملك : عادات قبيليه
يقطعها " قلتها في نفسي بقهر
ملك : طبعا عشت معاه سعيده بدليل انه من أول يوم ضربني !!
أميره : جعل يده الكسر و الشلل ان شا الله
تذكرت كيف كانت ليلتي ... ليلة الدخله تبادل كلمات في الصميم و ضرب و غير الأشياء اللي كنت أرميها عليه
ملك : كان شري معاي مره و دايم أروح لأهلي أبكي من الضرب و الإهانات كان شكاك
ابتسمت بتريقه " مثل سي السيد
ملك : بس عشت معاه ... طبعا دايم جواد كان يوريه شغله و في الأخير يوعدني انه راح يحترمني و لا راح يمد يده علي ..... بعد سنتين تقريبا اكتشف المفاجأه انه عقيم ما يجيب عيال تغيرت أحواله معاي و صار يسوي بي يا دهينه لا تنكتين
أول كان يسوي لي النون و ما يعلمون يا شيخه !!
أميره : الرجال كلهم كذا ؟؟
مشينا جهة الإسطبل
طالعت السما و هي تمطر بغزاره
قالت بحنان و ملامحها تتبدل بالكامل كانت البنت تتكلم و هي هيمانه !!
ملك : مشعل غير غير عن كل الناس صحيح كان قاسي بس حنون بكيت لين قلبي انفطرعليه تدرين كانوا الناس يقولون له طلقها عشان تعيش حياتها بما انكم ما تجيبون عيال بس هو رفض بشده و أصر انه يحتفظ فيني !
ابتسمت ....
ملك : انتي ملكي أنا ما أسمح لأي رجال غيري يلمسك لو تزوجتي بأقتل زوجك بأموتكم اثنينكم!! كلمات كان دايم يقولها لما يسمع طاري الطلاق كنت أحن عليه مثل الحسناء و الوحش و في الأخير حبيته ..... حبيته بجنون يا أميره ما تتخيلين قديش لا ما كان حب كان عشق أو سميه اللي تسميه !!
و فجأه لما تعلقت فيه ! مات ...
حسيت برجفه هل هي من المطر اللي بللنا بالكامل و لا من قوة النهايه الحزينه اللي كانت غير متوقعه بالنسبه لي !!
أميره : مات ؟
ملك : ايه مات كانت صعبه على نفسي أتقبل هالحقيقه المره بكيت لين جاني حد بصري
رفضت انه أي أحد يلمسه كنت مجنونه أبوس يدينه و رجلينه عشان يقوم و يقولي انه ما مات .....
بس للأسف الموت انتشله من بين يديني في وقت كنت محتاجه له بكل لحظاتي !!
تخيلي أنا اللي غسلت زوجي و كفنته أنا اللي بكيت على كفنه و في الأخير انهارت أعصابي و تميت بمستشفى الأمراض العصبيه خمس شهور ! جواد ساعدني و رفع معنوياتي لين رديت لحالتي الطبيعيه مشعل بقلبي و مستحيل أتزوج لأني ملكه حتى بعد موته !
و مستحيل رجال يلمسني بعد مشعل !
أشرت على قلبها
ملك : مشعل عايش هنا يا أميره وسط الحشى عرق من عروقي لاء هو كلي بكل نبضاتي و أنفاسي أحبه يا أميره أحبه !!
عيوني دمعت في وسط المطر و أنا أشوفها تبكي ضميتها و بكينا تحت المطر يااااااااه مع ان اللي يشوفها ما يقول ان هذا كله صار لها " فعلا اللي يشوف مصيبة غيره تهون عليه مصيبته " بس لاء عمري ما راح أحب جواد ....... لأني بكل بساطه أكرهه !
الجزء الثلاثين
دخلت للغرفه و أنا غرقانه بموية المطر و ضايق صدري على ملك
أول ما دخلت وقف قبالي و مسكني بلهفه أول مره أشوفها في عيونه
جواد : وين كنتي ؟
بعدت يده عني بعنف
أميره : ابعد لا أنجسك و أقرفك !!
يا شين أميره لما تمسك عالواحد شي هالكلمتين جرحتي حيل جرحت مشاعري و كبريائي
نجسه و مقرفه ياااااااااه و أفضل حل أوريه فيها كيف أنا نجسه و مقرفه !
طالعني مو متوقع حركتي !!
التفت أطالعه من بين خصلات شعري المبلوله اللي نزلت على وجهي
أميره : ممكن تطلع برى ببدل ملابسي
طالعني بتحدي
جواد : بتبدلين ملابسك بدليها بضرك في شي ؟!
قلت و أنا أطلع ملابس من الشنطه
أميره : قدامك !!
جواد : ليه مب زوجك ؟
طلعت لي بلوزه رصاصيه و بنطلون وردي
طالعته بسخريه
أميره : قدام الناس يا قلبي بس بينا لاء مب هذا كلامك ?
فتح علبة السيجاره و ولع وحده
جواد : طبعا أكيد قدام الناس يا بنت مساعد
رميت الملابس عالسرير بعنف و رحت له
أميره : أبوي أشرف من ........
رفع يده بوجهي
جواد : لا تكملين !
أميره : لاء بكمل في الداخله و الطالعه يا بنت مساعد يا بنت مساعد و ليتك تقولها بأدب ترميها رمي بكل القرف و الإستهزاء تراني انسانه مب خشبه أو قطعة جليد بس خلاص ارحمني النفس طابت منك بس ....
تنهدت أبي هوا نقي و قمت ألتقط أنفاسي و أنا أرتجف تسندت عالكرسي
مسك كتفي
وخرت يده عني و شلت الملابس دخلت للحمام تسبحت بسرعه لبست ملابسي و طلعت مالقيته !
قمت أنشف شعري بالسيشوار
سمعت طق عالباب
أميره : تفضل
دخلت لي شمس و هي مبسوطه شكلها رهيب باللصقات اللي على خدها و أنفها
سلمت عليها و جلست عالأريكه
أميره : أخبارك يالغلا طمنيني عنك
شمس : بخير انتي كيفك ؟
أميره : بخير دامت الشمس بخير
شمس : تطلعين معانا
أميره : وين ؟
شمس : مع الكشافه
ضحكت و أنا أشوفها و هي تقولها
هزيت راسي
أميره : وين ؟
شمس : سباق في البحر
تذكرت رنا كنت بأقولها لا لأني أخاف من جواد يسوي لي سالفه بس بالأخير ما حبيت أكسر بخاطرها
شمس : وش قلتي ؟
أميره : طيب موافقه بس ألبس عباتي انتظري شوي
قمت ربطت شعري و دعجت عيوني بالكحل غلوس خفيف و لمسة بلشر بالفرشه
و في الأخير لبست عباتي و طرحتي و شلت نقابي احتياط لأي طوارئ
و طلعنا ... رحنا للمساحه الكبيره اللي ممتده بالبحر
أميره : كل هالمساحه ماشالله تبع الشاليه
شمس : طبعا كل هالمساحه لجواد
أوووووووف كرهت هالإسم اللي يتردد قدامي بكثره !!
بس معقوله انسان الكل يحبونه لدرجة ان الجده لما شافتني دمعت عيونها و هي اللي صلبه ما تلين ما شا الله كلهم يحبونه و يسولفون عن كرمه و حسن أخلاقه و أنا أحكي عن سوء أخلاقه معاي ...
رحنا للدبابات
راشد : مس أميره
أشر لي من بعيد و هو راكب الدباب مع محمد كانوا كلهم مرتصين في صف واحد
ملك : مستعدين يا كشافه
صرخوا كلهم : ايه ؟
كان في يدها مسدس صغير
و أطلقت النار في الجو
و انطلقت الدبابات ...
و البنات من الجهه الثانيه يشجعون و يصارخون في لحظه التقت عيوني بعيون شيخه
شرارات لاهبه تطلع من عينها انتبهت بصوت شمس
شمس : تركبين معاي !
قلت بخوف :
أميره : لا ما أحب أركب الدباب البحري
شيخه : خايفه من هالمجنونه
قالتها و هي تلمس شعر شمس بقرف
قلت بقرف مثلها
أميره : مجنونه ...... انتي المجنونه .... يالله يا شمس بركب معاك
تدرون تلاشى خوفي من البحر و تلاشى خوفي من كلمة مجنونه اللي يقولونها لشمس مدري أنا أشوفها انسانه عاديه !!لأني ما شفت جنونها اللي يتكلمون عنه !!
ركبت الدباب و جلست وراها
مشى الدباب بسرعه في البحر
أميره : خففي السرعه يا شمس
قلتها بخوف و أنا أشوف الأمواج تتحرك بقوه قدامي
كانت مبسوطه و هي راكبه الدباب و تسوق فيه شفت الشاطئ يبعد عننا كثير و المعالم تختفي .....مسكتها بخوف
أميره : بعدنا كثير يا شمس
شمس : مب مشكله يا أميره لو متنا سوى
قالتها بوناسه !!
قلت بروعه
أميره : نعم وش هالكلام ؟؟ ردي بسرعه للشاطىء
التفت لقيت ان الشاطئ اختفى البحر من ورانا و من قدامنا كانت ماشيه بسرعه جنونيه
خلت كل شي يختفي بسرعه !!
و هي ما زالت تمشي بسرعه و فجأه وقفت !!
التفت تطالعني
شمس : يالله نموت
فجعتني !!
أميره : لاء أكيد انجنيتي
شمس : أنا مجنونه أصلا انتي و عدتيني نكون سوى
أميره : ايه بس مو نموت سوى
ابتسمت
شمس : يعني أموت بروحي
و بحركه سريعه رمت نفسها في البحر
قمت بسرعه من الفجعه اهتز الدباب خفت و جلست خفت مره و قمت أصرخ
أميره : شمس ....... شمس يا مجنونه
كانت تعافر في المويه بشده الحياه حلوه حتى للمجانين اللي مب فاهمينها!
قمت أدور أي شي عالدباب ممكن يحل هالمصيبه و حنا في هالبحر المرعب
ما لقيت شي ... في الأخير مديت لها يدي مالي حيله غير كذا ؟؟!!
أميره : شمس ... امسكي يدي الله يخليك لا تموتين لاء
دموعي نزلت حاره و أنا أحاول أقرب منها أكثر ...
مسكت يدي أخيرا سحبتها عشان ارفعها بس الدباب خانا و اهتز بقوه ما تحمل و طحت في المويه مع شمس !!
مسكت الدباب بيدي أتعلق عليه و أنا أشوف شمس مغمى عليها و تغوص تدريجيا في المويه
مسكتها من ملابسها سحبتها و أنا أمسك الدباب باليد الثانيه !
حسيت بخوف برعب و روعه لما تذكرت وضعي في البحر لما رمانا الحرامي !!!
راسها كان داخل المويه مع ثقل جسمها ما قدرت أسوي شي حاولت أتعلق بالدباب و أركبه ما قدرت خلاص بكيت و أنا أشوف راسها بالمويه أكيد ماتت بس لاء ما راح تموت جمدت قلبي و فكيت طرحتي و مررتها حول خصرها و شديتها بيد وحده على فتحه كانت في الدباب حاولت أتعلق فيه تخلصت من جزمتي و حاولت بصعوبه أطلع الدباب و الحمد لله نجحت جلست ألتقط أنفاسي و أنا أسحب شمس من المويه خفت لا ينقلب علينا الدباب
رفعتها بصعوبه و ربطت الطرحه حولي و حولها خصوصا انها مغمى عليها حاولت أسوي لها تنفس صناعي بس حجم الدباب ما يساعد جلست قدام هالآله العجيبه اللي هي الدباب كيف أسوقه كيف أحركه مدري مسكت المقود و دورت المفتاح اشتغل الدباب و أعلن عن حركته و استعداده للإنطلاق ما عرفت كيف أسوقه بس ضغطت برجلي على دعاسه غريبه
فتحرك الدباب في البدايه خفت بس قدرت أتحكم في الإتجاهات و هذا أهم شي !
غيرت الإتجاه للشمال و أنا أستدل على الجهه عن طريق الساعه و الشمس ؟
علمتني اياها رنا أيام ضعنا في هاواي !!
عرفت الشمال و اتجهت له مرت ساعه و أنا على هالحال استغربت اني ما أغمى علي أو
جلست في مكاني .... تذكرت شمس اللي لاصقه فيني جثه بدون حياه !!
أسرعت و أنا خايفه عليها شفت الشاطئ قرب و المعالم للمباني بدت تظهر أسرعت بسرعه لين وصلت للشاطئ لقيتهم كلهم مجتمعين يطالعوني بخوف فكيت الطرحه و نزلت من الدباب تجمعوا علي البنات و الكشافه : وينك ؟
طالعت شمس و أنا أسحبها ساعدتني ملك و البنات و رفعناها
مددناها عالأرض و قمت أسوي لها تنفس صناعي و أبكي
و الأسئله تنطرح علي من كل صوب
ملك : بس اسكتوا خلوها تعرف تنقذ البنت
ترقب من الجميع لي و لشمس اللي ما تحرك فيها ساكن
أميره : بتعيشين أنا وعدتك و عدتك أنقذك من الألم واحد ... اثنين ... ثلاثه ....
بكيت و أنا أحسب كم ضغطه و أبكي
بعد فتره مب قصيره من المعاناه كحت و هي تفتح عيونها بتعب
صرخوا الكشافه بفرح و هم يطالعوني
ضميتها و بكيت
أميره : شمس لا عاد تعيدينها
بكت بهدوء
كل اللي حولي تأثروا حتى شيخه اللي قلبها مدري وين راح بان عليها الحزن
قمت أبي أروح لأنه اللي في داخلي كبير و مب قادره أطلعه
جاني جواد و ضمني بقوه
جواد : أميرتي سلامتك وين كنتي ؟؟
طالعته بإستغراب و مثلت قدامهم اني أبكي على صدره
مسك يدي
جواد : تعالي ارتاحي تعبتي حيل
و ضغط على يدي بقوه أكيد اصبعي البنصر انخلع من مكانه
طبعا ضغطه تحذيريه من كارثه راح تصير !!
و سحبني للشاليه و أنا أطالع سلطانه برجاء
أول ما دخلنا الغرفه دفني بقوه
جواد : انتي بأي حق تطلعين من الشاليه بدون شوري
أميره : شورك ؟؟ ما لك أي حق
جواد : لا و تسوين لي فيها و تركبين الدباب مع وحده مجنونه ..... افرض ... افرض صار لك شي أو .....
كان يقولها بعصبيه و هو يهتز بقوة
قلت ببرود و أنا أطالع الأرض كملت بقية جملته
أميره : أو مت صح !
طالعته و أنا أبتسم
أميره : ليتني أموت صدق و أروح للناس اللي أحبهم أبعد عن الجحيم اللي أنا عايشته
غمضت عيوني بتعب و قلت بنشوه
أميره : حيل وحشني أبوي !!
جا هزني بقووه
جواد : مجنونه انتي تفاولين على نفسك ؟!
دفني بعنف و طلع من الغرفه أنا في مكاني مثل ما تركني تميت
______________
الساعه : 01:00 صباحا
لقيت نفسي في مكان غريب
ملك : بسم الله عليك ما تشوفين شر
أميره : أنا وين !
ملك : بالمستشفى
هزتني الكلمه بعنف نفضت البطانيه و قمت
مسكتني سلطانه
سلطانه : اهدي انتي بخير ؟!
قلت بجنون
أميره : لا أنا ما أبي .... ما أبي المستشفى طلعوني من هنا أنا كيف دخلت هنا كيف ؟؟
ملك : ارتاحي و هدي أعصابك
مسكت يدها برجاء
أميره : ما أبي هنا أبي بره .....أبي أطلع بره هالمكان
سلطانه : أميره !!
قالتها بحزم
هديت و طالعتها و عيوني تدمع
أميره : أبي أطلع من هنا يا سلطانه افهميني !!
ملك : ان شا الله بس انتي قومي توضي و صلي
طق عالباب و دخل أول ما شفته
أميره : بره ..... بره بره بره طلعوه بره
مسكتني ملك بس بقوه سحبت نفسي و قمت من عالسرير و أنا أضرب صدره بقوه
أميره : يا عديم المشاعر و الإحساس بررررره اطلع بره تبي ترميني هنا
صرخت بعلو الصوت و سلطانه و ملك يمسكوني
أميره : طلعوه بره ما أبيه ........ أبيه بره اتركوني ما ابيه
ما تحرك من مكانه الا بقى على نفس وضعيته يطالعني ببرود !
دخلوا الممرضات و أنا أصارخ فيه و فيهم و في كل الناس اختفت الصوره من قدامي و حل محلها الظلام ؟!
_____________
الساعه : 05:00 صباحا
صحيت و أنا عارفه اني بالمستشفى
رحت للحمام توضيت و صليت و أنا أشوف الطيور من شباك الغرفه
جلست عالسرير و قمت أسبح و أستغفر
طق خفيف عالباب
أميره : تفضل
دخل و طالعني
طالعته و أنا أبتسم شكله مره تعبان حزني ..حتى الهجوم اللي كنت ناويه أشنه عليه
لما شفت شكله حنيت عليه و هونت !!
جا و جلس جنبي و طالعني
طالعته غصب عني طالعته
و ربي وحشتني هالعيون الناعسات الجاذبيه اللي فيهم مب طبيعيه هو كله على بعضه جاذبيه ابتسم لي بنعومه
جواد : شكلك بشرشف الصلاه حلو
صلح لي طرف الشرشف و هو مبتسم
أميره : جواد ؟
جواد : هلا
طالعت للباب بإرتباك
رد راسي تجاهه
جواد : قولي اللي تبينه ؟
تدرون كيف لما مغناطيس يجذب قطعه من الحديد وش يصير !!
بس أحاول أقاوم هالجاذبيه بكل اللي أقدر عليه ؟!!
أميره : تعبان ؟
فصخ الجاكيت اللي كان لابسه و حطه عالكرسي بتعب
جواد : تعباااااااااااان
مسك يدي و حطها على صدره
حسيت بنبضاته المتسارعه طالعته بحزن و عيونه الناعسه تطالعني بتعب
حنيت عليه و بعد حزنت عليه حيل مدري ليه قلبي كذا يحزن بسرعه و يرضى بسرعه
حط راسه على فخذي ...
أميره : جواد انت مره حار قوم للدكتور
قلتها بخوف عليه غصبن علي
رفع راسه بتعب
جواد : يالله قومي نمشي من هنا
أميره : بس الطبيب ما كتب لي خروج
ابتسمت له شكله رهيب و خصلات شعره القصيره على جبهته الجميله
حطيت أصبعي على خده
أميره : أححح أي أصبعي حرقني
ابتسم لي و هو يبوس اصبعي
باسني لااااااااااااااا مني مصدقه بس لاء ملامحه الشريره ما تغيب عن نظري أبدا
جواد : ما عاش اللي يحرقه
مسك يدي و رد حط راسه على فخدي
حطيت يدي على شعره بعد تردد
جواد : لازم نرد للبيت ؟
أميره : بس أنا أبي أتم بالمستشفى ؟!
رفع راسه و طالعني بإبتسامه حلوه
روعتني أكثر من انها عجبتني
جواد : لأني قاسي عليك !
قلت و عيوني تدمع
أميره : روح اطلب من الدكتور انه يطلعني ؟؟
سمعت طق عالباب
مسحت دموعي بسرعه
أميره : تفضل ....
دخلت عمه مزنه و ضمتني و قاموا يسلمون علي بالدور ملك و سلطانه و عمه نويره
مزنه : وش مدخلك هنا يالله يالله اطلع ؟؟ كل هذا ملهوف عليها
و قامت تدف جواد بخفه و تضحك
قالت عمه نويره
نويره : لا تكونين حامل و حنا ما ندري ؟
التقت عيني بعيون جواد
ارتبكت و حريت مع ان الجو حلو
قال بتريقه و هو يطالعني من طرف عينه و يبتسم
جواد : لا يا خاله مب جايبين عيال الا بعد عشر سنين
نويره : وليه ما تجيبون عيال وش فيكم !!
أميره : ما فينا شي يا عمه مب حمل و الله انه تعب بسيط يا قلبي
طلع جواد و هو يبتسم بإستغراب
همست لي سلطانه
سلطانه : ياه ما شفتيه أمس وش سوى لما طردتيه من الغرفه ؟
شمقت بشفايفي و قلت بدلع
أميره : يعني وش سوى ؟!
سلطانه : راح ضرب الدكتور و طلب دكتوره تكشف عليك ؟؟
قمت أضحك ...
دخلت الجده بدون ما تطق الباب جت سلمت علي و طالعتني
الجده : عسى ما شر يا بنتي
ابتسمت بمرح
أميره : بخير دامك بخير يا وجه الخير
جلسوا اهل جواد و هم جايبين معاهم شيله محترمه من المأكولات من كل الأنواع
نويره : يالله حبيبتي كلي عشان تتقوين كذا و تجيبين لنا جواد صغيرون
قديش أحرجتني ما أحب أجيب هالسيره حمل لا يا ربي أعوذ بالله و من مين من جواد ؟
طردت الفكره بسرعه قبل ما يبان على وجهي !!
مدت لي الجده صحن
الجده : خذي يا بنتي هذا أفيد لك من الخرابيط اللي جايبينها هذا جريش مصلحته على شانك ؟؟
أخذته منها ريحته رائعه
مزنه : يا اميمتي و الله أكلنا صحي
الجده : أي صحي خلها تاكل الجريش شوي و هي مثل الحصان
ابتسمت بإعياء و قمت آكل ارضاءا لهم
ملك : مين قدك جدتي بكبرها خايفه عليك ؟
طالعت للجده و ضميتها غصب عني بكيت و ربي بكيت من قلب أبي قلبها الطيب يحضني أبي أصرخ أطلع كل اللي بداخلي !
طالعتها لقيت دموعها على خدها كلهم استغربوا و بكوا .... تأثروا بالحيل !!
بعدين عرفت من ملك ان الجده ما عمرهم شافوا دمعتها و هي أعتى الرجال ما يقدرون عليها لو دخلت المجلس كل اللي فيه يقومون لها احتراما يسلمون على راسها و يدها و يسمعون كلامها و يسكتون لا تكلمت
رفعت يدي أبي أمسح دمعتها وقفتني
الجده : خليها هالدمعه اللي ما نزلت من عشرين سنه خليها تحرقني و ترتاح
رديت ضميتها و أنا أشهق بست راسها و يدها و رديت أضمها
كلهم تأثر و بكوا !!
انتهت الزياره
يااااااااااااه تمنيتهم يبقون هنا أكثر خلو لي الأكل رتبوه بالأكياس و الحافظات ودعوني و طلعوا ...
جلست عالسرير أطالع الغرفه بألم و الدموع ماليه عيوني
متعوده دايم الغرفه فاضيه غير من ريحة المطهرات و المعقمات و خطوات الممرضات
و أصوات الأجهزه !!
هم أسعدتني جيتهم و رفعت معنوياتي حيل أحسن من هلي اللي تنكروا لي !
03:20 عصرا
تذكرت رنا ...
رنا : الخير في الغرباء أحسن من الأهل اللي في الحشا يطعنونك
أميره : صح بس أحيانا الأهل يكونون طيبين
قالت بسخريه و هي تقلي البطاطس
رنا : الأهل ما فيهم خير و انتي قلتيها بنفسك أحيانا و هم أحيانا يا أميره
رميت الروايه عالطاوله و رحت لها
شلت قبعة الشيف من على راسها
أميره : يعني تبين تقنعيني ان الغرباء فيهم خير أكثر من الأهل ؟!
رنا : طبعا
أخذت القبعه من يدي و حطتها على راسها
أخذت بطاطس ضربتني على يدي و ردتها بالصحن
أميره : طيب انتي أهلي و ناسي و فيك كل الخير
شلت البطاطس رميتها في فمي و رحت للطاوله و أنا أضحك
انتبهت من الذكرى على وجهين حلوين يطالعوني
شمس : أمورتي
ضميتها بفرح مستانسه و مني مصدقه
مسكت وجهها
أميره : انتي بخير
ضميتها ياااااااااااه باقي عايشه الحمد لله
طالعت لجواد اللي كان الوجه الثاني و اللي يتأملني بصمت
قال و هو يطالعني بطرف عينه و يطلع السيجاره
جواد : خلاص يكفي أحضان كل هذا حب !
قلت بسخريه
أميره : طيب لا تولع السيجاره تراك في مستشفى
ردها في جيبه بهدوء
أميره : واحشتني حيل
شمس : متى تردين البيت ؟
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك