رواية الفئة المجنونة -23
(( الجزء الرابع عشر ))
بعد آسبوعين
برائحة حليب شكولاته السآخن ممزوج بالهواء البارد إلي يغطي جو مكة مكرمة
حضنت يدي مع بعض عشآن أدفئ نفسي من جو البارد
و أفتكر كلام أمي وهي مكلمتني من أمس وقالت أنه عندها وحدة في المستشفى
كانت بتنتحر في الأصلاحية بس ربي ست.......
قطع حبل أفكاري صراخ الأداريات وبكاء طالبات
حطيت الكوب في الأرض وقمت من الأرض وانا أطلع من الكفتيريا وأوقف في درج
وماسكة دربزان و منزله راسي
وأشوف المعلمات وخالات وهم شايلين طاولة ويحاولو يكسرو باب المصعد
عرفت من البنات أنه المصعد علق مابين دور الثاني والثالث
والمشكلة أنه فيه بنات
رجعت للكفتيريا لمن الدكتورة طلعت وهي تدخل البنات في قاعتهم علشاآن
الأسعاف المدني جاين في طريق
رجعت لمكاني وانا أتلذذ بطعم الشوكولاته.. و أتصل على السواق
واقوله يجيني عالساعة 11 ونص
0
0
0
عالس 11اعة
دخلت بين الممرات وعيوني تتأمل في لوحات معلقه بجدارن
وقفت الدكتورة طيبة عند غرفة رقم "23 "
وقالت بهمس وهي تدخل الغرفة كبيرة إلي كانت مليانه أسرة ومرضى :سريرها في نهآية الغرفة
أمك راح تجي بعد شوي
هزيت راسي وانا أمشي خلفها وعيوني تتنقل بين المرضى والزائرين والممرضات
إلي كل وحدة تشرف على مريض
وقفت لمن سمعت صوت الدكتورة طيبة وهي تتكلم بلهجة مصرية:أزيك يانسرين عامله أيه
ردت نسرين ببتسامة وهي تلعب بخصله من شعرها ويدها الثانية فيه محلول
:طيبة الحمدالله
ناظرتها وهي مرمية في سرير الأبيض والأبتسامة مرسومة في شفايفها
لكن وجها شااحب وباهت
حزنت عليها و رحمت حالها
لإنها كانت ناوية تنتحر وإنها من الأصلاحية
وحدة بعمر الزهور أهلها ماسألوعنها ولا دور عنها
والمصيبة!!
أنه أبوها متبري منها و راميها في الأصلاحية
الدكتورةطيبة وهي تحط يدها في كتفي: أبقي معاها ياديما.. حتى مامتك تخلص من شغلها
وبعدها راح تجي لهنا
سحبت الكرسي خشبي إلي يشبة "كراسي المدرسة " وقعدت قدام نسرين وقلت للدكتورة:طيب
راحت الدكتورةطيبة وناظرت بنسرين إلي كانت تناظر في دكتورةطيبة وهي تناظر خطواتها
كأنها تبي تهرب معاها..أو تبي تخرج من المستشفى و الأصلاحية
قلت لها وانا أفتكر كلام ماما وهي تحكيني عن نسرين:أخبارك نسرين أمممم الحمدالله على سلامتك
طلعت من صدرها تنهيدة طويله ماعرفت إيش تفسيرها:الله يسلمك..إيش أسمك؟؟
حطيت شنطتي في حضني وانا أشوف واحد من الأطفال يجري و أخته الكبيرة
تلحق وراه وتخاصمة: أسمي ديما
قلت لها أسمي وانا أرجع أشوف نسرين
كان هذا اليوم ما أنساه طيله حيآآتي
أول يوم شفت نسرين و أتعرفت عليها
عن طريق ماما إلي كانت رئيسة القسم
وتابعت حالتها وحزنت عليها للأخر
وحبت إني أتعرف عليها..أمكن ربي يهديها
أو أمكن ترجع للحياة أو أرجع لها الأمل مرة ثااني
من يوم عرفت قصتها.. وقصتها وحكايتها مكررة مثل بآقي البنات
نفس الصورة تنعاااد مع كل بنت
بس اللهم أنه البرواز يتغير
قطع حبل أفكاري ورجعت لأرض مستشفى عند بنت الزمزمي..لمن سألتها:إيش تقولي؟؟
نسرين وهي تجلس وتحط المخدة خلف ظهرها وتحط شعرها لقدام
وهي تقول: كنت بقولك وين سرحتي ؟؟
كتمت أبتسامتي وانا أسمع نبرة صوتها إلي كله دلع في غنج وبين نفسي
" حشى ولا حليمة بولند ماوصلت لصوتها ": كنت بفكر ليش دخلتي المستشفى؟؟!!
نسرين نزلت راسها وبآن من ملآمحها إنها مضآيقة: كنت تعبآنه وأتنومت في المستشفى
هزيت راسي وانا فاهمة تصريفة وسكت بس أفتكرت ليش أنا جيت عندها وليش قاعده عندها
رديت لها بشجاعة:الله يسلمك ويقومك بس مو هذا إلي سمعته يانسرين
رفعت راسها وهي تناظرني بصدمة.. أتوترت ساعتها.. لكن نزلت راسها وهي عاقدة حواجبها
وقالت بضيق: ما أحب أسم نسرين ماأبغاكي تناديني بهذا الأسم
أفضل إنك تناديني ب نتوس
رفعت حاجب وعلامة التعجب بوجهي:نتوس!! إيش يعني أسم نتوس؟؟ وليه يعني أسميكي
نتوس بدل نسرين؟؟ يعني أسم دلعك؟؟
نسرين وهي ترجع شعرها على وراه وتسترخى عالمخدة وتغمض عيونها:مو أسم دلعي بس أنا أحب نانسي
عجرم من زمان وأهلي وصحباتي سموني نتوس لإن نتوس إسم دلع نانسي
وانا أعشق نانسي مرة وصآر ينآدوني نتوس بدل نسرين
بين نفسي قلت وانا كارهة دلعها "هذي البنت جاية من الأصلاحية ؟؟"
:شوفي أنا راح أناديكي نسرين مثل ماهوا مكتوب أسمك بكرت العائلة
ناظرتني بحتقآر وهي تلعب بخصلات شعرها: مع نفسك
كاان الجو جداا متوتر بيني وبين نتوس أقصد نسرين
أمكن كنت غلطانه معاها
لإني ماكلمتها بسياسة ورواقه
و أسلوبي مراح يجيب مع نسرين فااايده بالعكس راح يتوتر الجو أكثر
وكل وحدة ماتتقبل الثانية
قلت لها ببتسامة مصطنعة :o.k نتووس.. متى راح تخرجي من المستشفى ؟؟
ردت علي بملل وهي تلعب بخصله من شعرها تضفرها وترجع تفتحها :روحي أسألي أمك
أو وحدة من صحباتها المشرفين علي؟؟
مسكت أعصابي وطنشت أسلوبها ..لإني ماأحب أحد يغلط علي لإني عصبية مرة:طيب راح أسألها
بس إنتي ماتعرفي متى راح تخرجي؟
طنشتي وهي تتنهد وتغني بهمس وكأنها مو معتبرتني أدمية قاعدة عندها :أوكي نسري...
أووو أقصد نتوس راح أطلع شكلك تعبانة وتبي تنامي وان شاء الله بكرة راح أشوفك
وقفت وانا أحط شنطتي في كتفي وأنتظر منها رد أو حتى نظرة
لكنها صدمتني لمن ناظرتني ببرود وعلى وجها أكبر أبتسامة وقالت: مع سلامة وياليت تنادي
دكتورة طيبة لإني أبغاها تغير مكاني مو قادرة اتأقلم مع ه......
قاطعتها لمن أعطيتها ظهري و بعدت عن سريرها وانا أخرج من الغرفة و أقول
: وحدة بوحدة والبادي أظلم
~ $ (( deema ))$ ~
(($~ الفئة مجنونة ~$))
بجامعة أم القرى
ماسكة الأوراق بيدها وحاطة الطرحة بكتفها وهي ماسكة بيدها عباية الراس إلي طاحت على كتفها
وبيدها الثانية تتكلم بالجوال مع بنت خالتها وتمشي في الساحة
وكأنها تسمع أحد يناديها من بعيد بس مو مركزة ومشغوله بمكالمتها
_:سمااااهر.. سمااااااهر .. أستني سمااااااااااااااهر
التفتت سماهر ونزلت الجوال بإذنها وهي تشوف فاطمة تأشر من بعيد وهي تحاول
تسرع في مشيتها وتوصل عندها
قالت سماهر وهي تأشر لفاطمة وتبتسم:أوكي سمية بعدين أكلمك يالله مع سلامه
قفلت الخط وهي ترمي جوالها في شنطتها وبكل حمااس وشوق تروح عند فاطمة
وتحضنها بالقوة:وحشتيني فطوووم
بعدت عنها فاطمة وصفعتها كف بالقوى
طاحت الشنطة من يدها وعينها على فاطمة وهي مصدومة من حركتها
ومومستوعبة إلي يصير لها :ليش يافاطمة؟؟
فاطمة وهي شايله بقلبها ودها تفرغ شحنه الغضب على سماهر:سلامتك مافيني شئ
بس ليش غايبة لمدة آسبوعين وجوالك مقفل وتلفون البيت ماتردي عليه
سماهر وهي ماسكة خدها وبصدمة:طيب راح أفهمك بس مو تضربيني يافاطمة والله زعلت منك
فاطمة وهي مقهورة من سماهر.. كانت ماسكة أعصابها قبل لاتصيح.. :أزعلي وأنحرقي
إنتي عارفة أنه صارت أشياء كثيرة بحياااتي ومافي أحد عارف بهمي إلا ربي
سماهر وهي عارفة بداية مشاكل فاطمة بسبب أبوها البخيل وهوا شايل بطاقة صرافها
ومايصرف عليهم وقاعدين على باب الله أو على صدقة الجيران: عارفة يافاطمة بس منتي أحسن مني
إنتي عارفة إني جيت الجامعة علشان أوقف هذا الترم وأكمل أن شاء الله في ترم الثاني
شهقت فاطمة وهي تبعد خطوة لورى.. ناظرتها وبعتاب قالت وهي تكابر :براحتك بس بجد
كنت محتاجتلك بالفعل و ودي أحضنك واصيح عليكي واقولك إلي بخاطري بس شك..
قاطعتها سماهر وهي مسكت يد فاطمة وعينها كل ترجي: وغلاوتك يافاطمة والله إني أعزك
وأنا اللي بالفعل ودي أحضنك بالقوة وأفضفضلك إلي بداخلي.. آخ يافاطمة تخيلي
أنه فيني جني وإني ماأتعالج إلا بموية زمزم والقرآن وزيت زيتون
والله تعبت من حالتي ومن العله إلي فيني
توسعت عيون فاطمة وخافت مرة وقالت وهي تأشر عليها من فوق لتحت:أنتي ملموسة
بملل قالت سماهر وهي تسحب يد فاطمة وتقعد في أحد الكراسي: ولا أسمة زعبور
صرخت عليها وهي شوي وتضربها بس مسكت أعصابها وحاولت إنها ماتنفعل :مو حاله هذي غايبة
أسبوعين من المدرسة و إلحين تغني إنك ماتبي تدخلي الأختبار دوري الأول
أصاله وعيونها كلها دموع وصيآح:ما أبغى أكمل دراستي وماأبغى أدخل الأختبارات
خلاااص ما أبغى أروح المدرسة
عصبت غالية منها وقالت وهي تنهي النقاش مع بنتها : شوفي يا أصاله كلمه وحدة و أنهي الموضوع كله
والله ثم والله إذا فتحتي سيرة إنك ماتبي تكملي دراستك والله ماتلومي إلا نفسك
هذي دراستك وهذي مستقبلك بقي لك سنتين وتخلصي من الثانويه
وبعدها براحتك تبي تكملي الجامعة ماتبي تكملي دراستك مع نفسك
بس المهم أنك تاخذي شهادة الثانوية بطول وبعرض
رجعت لصياحها أصاله وهي تهز راسها بنفي:ولييييش أكمل دراستي وانا راح أنزف لأبو مسفر
ماأبغى لا دراسة ولا هم ولا قرف
سكتت غالية لمن "قلبها عصرها "غمضت عيونها لمن سمعت أسم أبو مسفر
قالت بضيق وهي ناوية تنزل عند أمها تفضفض لها وتشتكي إلي بقلبها :المهم قلت لكي الأختبار
قرب و إنتي راح تدخلي الأختبار من يوم السبت و تختبري كل المواد.. فااهمه
وطلعي اللحم من الفيرزا علشان راح أسوي كبسة
غطت يدها بوجها وهي تصيح من قلبها وماتبي تكمل دراستها أولى ثانوي
ولا تبي تدخل الأختبار الفصل دراسي الأول
حياتها أتغيرت من يوم صارت حرمت للشيخ " أبو مسفر "
ماتبغى شئ من حياتها ولا تبغى شئ من أهلها
فقدت الأمل من كل شئ
أتوقعت بعد وفاة أبوها .. آنه جدها راح يتكفل فيهم ويشيلهم
لإنهم أمآآنه و أيتام
بس هوا ماحافض عليهم..و زوج أصالة بصاحبة أبومسفر
مسحت دموعها و وجها بطرف بجامتها ودخلت المطبخ والبوز مادة شبرين
طلعت من الفيرزا اللحم وحطته في موية حارة علشان تنفك
_: سلااام عليكم؟؟
طلعت من المطبخ بسرعة لمن سمعت صوت خالها يونس وقالت:وعليكم السلام ياخالو
يونس وهوا يدخل شقة أخته ويسأل أصاله:سويتو الغداء
هزت راسها بنفي وقالت:لسه ماسوينا.. أنت جيعان؟
قعد يونس في الأرض وهوا يشغل التلفزيون ويغير في القنوات.. وأستغربت أصاله من جيته
لإنه أول مرة يدخل شقتهم ويقعد فيها بعد:أممممم حطي أي شئ أكله وسوي شاي أخضر
دخلت أصالة المطبخ وثواني طلعت وقالت برتباك:ماافي عيش خالو
يونس وهوا مسترخي بجلستة ويحك بشعره: أنتو كل شئ ماعندكم.. نفسي أعرف إيش عندكم؟؟
توسعت عيون أصالة لمن سمعت كلام خالها وأنجرحت للأخر..
كلمته قويه وماتوقعتها يقولها.. مو البركة في أبوك إلي ماأخذ فلوسنا
و أنت تجي وتلومنا ليش ماعندنا شئ
لاحض يونس سكوت أصاله وقال لها وهوا يناظرها من طرف عينة: هاتي فلوس خليني أشتري عيش
أصالة ماعلقت ودخلت غرفة أمها وهي تدور على ريالات
عشآن تعطي لخالها ويشتري عيش
رجال طول وعرض ومافيه في جيبك ريال
أصلا من يومك حاف وتاخذ من عند أمك أو أخواتك
طلعت ريالين من شنطة أمها ووراحت عند خالها وهي تعطية الفلوس وبكل كذب: بس هذا إلي لقيته
في شنطتي وماعندي غير ال ريالين
أخذ يونس الريالين وحطها في جيبة وقال وهوا يوقف ويلتفت لأصاله: أسمعي ماعندك 10 ريال
أصالة توسعت عيونها وقالت: مرة وحدة عشرة ريآل؟؟ أصلا ماعندي غير الريالين
من وين لي ب 10 ريال؟؟
يونس" حتى إنتي وجهك وجه فقر بس وين مهرك أخذتيه":أمممممم طيب عند أمك ماتقدري
تاخذي من عندها 10 ريال أو عند فاطمة؟؟
أصالة وهي عارفة أنه خالها يعشق شئ أسمة"فلووس ":ما اقدر أخذ من عند ماما
وفاطمة في الجامعة لسه ماجات
سحبها من بجامتها وهوا يكلمها:أأقصد أفتحي شنطتها أو أغراضها وخذي ال 10 ريال أو كلمي جدتك
عشان تعطيكي 10 ريال ولا فين مهرك ماشاء الله
أصالة وحست بجرح كبير.. هي ماأتعودت إنها تسرق أو تاخذ من عند جدتها أو فاطمة
لإن نفسها عزيزة ومو محتاجة فلوس: صعبة ما أحب أخذ فلوس من عند أحد
بستهزاء قال يونس:ليش قاعدة بجنب بنك الراجحي ولا بنت الولد بن طلال وانا ماأدري
صدت عنه أصالة ودخلت المطبخ وهي تداري دمعتها
طلعت من الثلاجة 3 بيضات و جبنة سايلة و علبه زيتون علشان تسوي ليونس أكل
دخل يونس المطبخ وهوا مصمم بالطول بالعرض يحصل على فلوس: أسمعي أصاله أيش رايك
تاخذي من عند جدك فلوس وقولي إنك عروسة ومحتاجة لكم م.....
قاطعته أصاله وقالت وهي تكسر البيض وتحطه في صحن:المشكلة تعرف جدي مايطلع ريال
من جيبة ولو بالموووت.. يعني من وين أدبر لك فلوس ياخالي
كشر بوجها وقال بنرفزة لإنه مالقي شئ من عند أصالة: متى يجو مهند وعلااوي من المدرسة
ناظرت أصالة بساعة إلي كانت تشير على11 ونص وهي عارفة ليش يبغاهم يونس
بس عشان يتمصلح عندهم ..:عالساعة 1 ونص
طلع من المطبخ وقال :المهم سوي الأكل بسرعة وخلصية.. الله ياخذكم الواحد مايستفيد منكم بشئ
حتى خالكم ماتقدرو تساعدو
حطت الصاج في نار وهي تسوي البيض وترش عليه ملح وفلفل أسود وسمعت كل كلامه
وهوا يخرج من الشقة وهوا يسب ويلعن :________
: أتعوذي بالله و أشربي موية
:طيب أذكري الله ياسمااهر.. لاتضعفي الله يخليكي لهم
:أقري سورة الكرسي وحصني نفسك
مالقت أستجابة من سماهر إلي وجها أتغير خلال ثواني وصآرت عصبية ومتضايقة وكل شوي تصرخ
حتى ماحاولت تسحبها فاطمة وتجلسها في مكان مافي بنات كثيرين
وحاولت تذكرها بالله..لكن سماهر كانت لامة رجولها ومنزله راسها وعينها في الأرض وهي عاقدة
حواجبها وفاطمة ميته رعب بس ماحبت تبين لها وتحاااول إنها تهديها وتخرجها من الحاله
قالت لها وهي تحط يدها براس سماهر:بسم الله الرحم.....
صرخت سماهر وهي تدف يدها وقالت: لاتذكري الله أبعدي عني ماأبغى أحد جنبي
شالت يدها فاطمة وهي تهديها:خلااص طيب طيب أهم شئ راحتك ياسماهر
بحدة وهي تناظرها:مني سماهر ماتفهمي
نشف ريقها فاطمة وقالت: طيب طيب.. المهم إيش تبغى إلحييين والله البنت مسكينة وضعيفة
صرخت سماهر وقالت:مالك صلاح وقفلي فمك و أنقلعي من عندي
وقفت فاطمة و رجولها ترتجف من الخوف وقالت:طيب راح أبعد عنك ولا عنكم مادري كم إنتو
بس المهم لاتأذي سماهر
أبتسمت سمآهر أبتسامة كلها سخرية وثواني أتلاشت الأبتسامة وحل بدالها ضحكة
بعدت فاطمة وهي تمسك جوالها وتحاول تدور في قائمة الأسماء على رقم بيت سماهر
عشآن تكلم أهلها
جوال سماهر دق بصوت السديس وهوا يدعي دعاء ختم القرآن
طاحت في الأرض سماهر وهي تحااول تسيطر على نفسها بالقوة وتحاول تذكر الله
وتسمي بالله بس كانت ضعيفة وخايفة
حست أحد يضربها في ظهرها وتسمع ضحكات في إذنها.. ناظرت في المكان ومالقت ولا طالبة
ثواني جريت فاطمة وهي تمسك سماهر وتقعدها وتقول سماهر بضعف: ممكن تتصلي على
أبويه علشان يجي ياخذني
فاطمة بدهشة :مييين سماهر ولا خويها أوو أقصد زعنوب أو زبور أو مدري إيش أسمه
سماهر و دموعها تنزل وتحس قوتها ضعفت وهي تحس بصداع قوي مسك مقدمة راسها
و الرؤية عندها شبه معدومة و حاسة بكسل وخمول في جسمها
:فاااطمة هوا قاعد معانا ويحااول يأذيني بس انا أحاول أكون قوية ومتوكله عالله
أنتي صحبتي و أختي لاتبعدي عني ولا تخافي منهم..أنا أحتاااجك يافطوم
مسكت يدها فاطمة بالقوة وقالت:وانا معاكي و متوكلة على الله وهما جن مخلوقات ضعيفة
ويخافو من ذكر الله.. إنتي امسكي بلسانك ذكر الله وانا راح احصنك وانتي رددي وراي
واحب اقولك أنك دقيت على تلفون بيتكم وردت علي أمك
وقلت لها كل شئ وهي الحين جاية مع أبوكي
شدت يدها بالقوة وهي تحصنها و يقرو مع بعض سورة الكرسي والمعوذات و آواخر سورة البقرة
كانت سماهر تقري معاها وهي تصيح.. وفجأه تسكت وتحاول تشيل يدها بالقوة
بس فاطمة كانت ماسكة يدها بالقوة وهي تكمل معاها القراية وتذكرها بالله وبالجنة والصبر
وتكمل معاها سماهر لمن تفتكر الله تعالي..
وفجأه توقف وهي ماتسمع صوت فاطمة كأنه صابها الصنج أو تشم ريحة عفنه تجي من فاطمة
وهذي كلها من الاعيب الجن " زعبور " وهوا يحااول أنه سماهر ماتذكر الله
بس سماهر بحكم صارت ماتسمع أو تسمع وتصير الاصوات عالية جدا ومو واضحة
كنت تغمض عيونها بالقوة وترفع صوتها وهي تتعوذ من شيطان
وفاطمة تكمل التحصين وهي تبكي لإن تشوف صحبتها و أختها بتتعذب قدامها وبتتعب
حتى ماخلصت من التحصين ونفثت بيدها وحصنت سماهر إلي كان جسمها ينتفض ويرتعش
و فاطمة تحصنها .. حتى جوال سماهر دق وكان المتصل أمها
قامت فاطمة و وقفت سماهر بالقوة وهي تعدل طرحتها وتحط عبايه الراس في راسها
وتمسكها بيدها وهي تردد معاها الأذكار وتحاول تمسكها بشكل طبيعي علشان لايلفتو الأنتباه لبنات الجامعة..
~ $ (( deema ))$ ~
(($~ الفئة مجنونة ~$))
~ $ (( deema ))$ ~
@ تكملة نهاية الجزء الرابع عشر @
جاه عبداللطيف عند أهل زوجتة..وقآل للجدة كل شئ من أول القصة لأخر القصة
والجدة كانت سآكتة وهي تفكر بكلام عبداللطيف ومتفاجئة آنه الحركات هذي تصدر
من حفيدتها صغيرة نتوس
لو كآن آختها هوازن أو بنت خالتها بثينه أو سندس كان قالت طيب
بس ماتوقتها من نسرين
رفعت راسها وهي تناظر بزوج بنتها وهوا منزل راسة والهم باين بوجهة
ومرتة من يوم عرفت أنه أبو قصي جاه
دخلت الغرفة وحبست نفسها ولا و دها تشوف زوجها أو تتناقش معاه
قالت الجدة وهي تنهى الموضوع: طلع البنت من الأصلاحية و يصير خيير
رفع راسة عبد اللطيف وهوا مصدوم وقال:نعم؟؟!!
الجدة: إلي سمعته ما نبغى الموضوع يكبر ويجي صحافي ملقوف و ينشر الخبر
البنت أنفصلت من الجامعة و راح تجي لجدة عشان راح نتفاهم معاها ونكلمها
نحنا عائلة كبيرة ومانبغى صورتنا تتشوهة عند جماعتنا و الأغراب
أعتقد نسرين أنجلدت لمدة أسبوعين وهاذا كافي لها
~ $ (( deema ))$ ~
(($~ الفئة مجنونة ~$))
~ $ (( deema ))$ ~
في المساء وتحديدا بحي الأسكان عند بيت أبوحمزة
وهوا عازم أبو مروان وعياله لإن الشيخ أبو المعالي
حاب يلقي محاضرة عن "الجن والمس شيطاني "
في مجلس الرجال والحريم كان يفصل المجلسين باب السحاب
وكانو الحريم في مجلس الداخلي وفاتحين الباب شوي وهم يسمعوا للمحاضرة
كانت أحسان لابسة شرشف صلاة وقاعدة عند باب مجلس وهي تهز راسها وتسمع
وبجوارها أختها وداد وهي مندمجة في الكلام ومنصته كويس مع بنتها الكبيرة أسيف
أما سماهر كانت مسدوحة في الكنب لإنها تعبت بعد ماقري عليها أبو المعالي
و تعبت و أتعذبت خلال فترة العلاج
وسمية قاعدة بطرف الكنب وتسمع لكلام الشيخ وتناظر في سماهر بين فترة لفترة
الشيخ أبو معالي وهوا رافع صوته ومكمل كلامه: والجن مايدخل في الأنسان إلا لأسباب ثلاثة
أولهم والعياذ بالله عشق الجني للأنسان أو عشق الجنية للأنسان
وثانيا وهوا يحدث بيننا ولكن نحنا نتجاهله بإن الحريم وهداهم الله يصبو الموية ساخنة في مغاسل
وهذي الأماكن مسكن للجن والشياطين أو البكاء وصراخ والغناء في دورة المياة أكرمكم الله
أو أذى الجن وهوا متشكل على صورة كلب أو قطة أو ثعبان .. وثالثا ظلم الجن للأنس فمثلا
يدخل فيه أو يأذيه بدون سبب وهذا مايصير إلا نسيانه ذكر الله أويكون في حاله بكاء
أوغضب أويقعد في الأماكن مظلمه
بسخرية قالت سماهر لبنت خالتها سمية:سمعتي إيش قال الشيخ عشان تبطلي تدخلي
الحمام وإنتي تغني بصوت عالي
سمية بخوف:أصلا انا أنشد وما أسمع أغاني وفيه فرق بين الأغاني و الأناشيد
سماهر:والله هم مايفرقو وإنتي تغني في الحمام..بس إذا حابة يدخل فيكي جني
ماأوصيكي غني وأرفعي صوتك
سمية بخوف سكتت وقالت:أصلا راح أبطل من العادة بس إنتي كيف دخل فيكي الجني؟؟
سماهر وهي تسمع لكلام الشيخ:أخوي حمزة قال لي سوي شاهي.. وانا كنت سرحانه وبالغلط
كبيت الموية حارة في مغسلة ودخل فيني على طول..أستكي خلينا نسمع
_: و أعراض المسن الله يكفينا شرهم عديدة ومنها التخبط في المشي أو الكلام
والترنح في المشي وشعور بصداع دائم ماله إي علاج و الصرع بين فترة وفترة وعدم التحكم
بأعضاء الجسم وغير النزيف إلي يصيب الحريم وتجي الأعراض في المنام مثلا الأرق وعدم قلة النوم
و رؤية الكوابيس أو الحيوانات من القطط والكلاب والأفاعي السوده
والسقوط من الأماكن العاليا ورؤية الأماكن القذرة والمقابر وهذي جمعيا تدل أن الأنسان مصاب بالمس
رن جوال سمآهر بدعاء ختم القرآن بصوت السديس ردت على فاطمة وهي تسلم عليها
وقفلت الخط وهي تحط جوالها جنبها وتسمع لكلام الشيخ : والرسول ذكر الجن في الأحاديث
و وصانا بتحصين ورقية الشرعية
آتثآآآوب سمااهر وهي تفرك عيونها وخلال ثواني حست بنعآس ونامت
~ $ (( deema ))$ ~
(($~ الفئة مجنونة ~$))
~ $ (( deema ))$ ~
قعد في الأرض وهوا يسمي بالله وقاعد يتعشى .. رفع راسة وقال:يونس نحنا حالتنا الله يعلم فيها
لازم تقوم وتدور على شغل علشان تكسب فلوس وتصرف على أخواتك
يونس وهوا يحط سلطة خضار في صحنه:عشان تاخذ راتبي وتنام عليه لا يبه أنا مرتاح وانا عاطل
وأتكالي وماأبغى أخدم أحد ولا أساعد أحد
رفعت راسها غالية وناظرت بأخوها يونس وهي تنتظر ردة فعل أبوها
أبو يونس: من يومك أتكالي وحرمة موجديدة عليك..بس هذا مو تصرف وانا ما أرضى على هذا الشئ
رجال طول وعرض والشنب راص بوجهك وفي نهاية أشوفك مسدوح كل يوم زي الوليه
أم يونس ردت: ياولدي أبوك يدور على ملصحتك.. بكرة تفتح فمك وتقول أبغى عروسة
و زوجوني وانت حاف وفقير وماعندك ريال في جيبك
يونس ببرود: ماأبغى أتزوج ولا أفكر في الحرمة
أم يونس:و متى تبغى تتزوج لمن عمرك يصك ال 40 أو50 و وقتها تقول زوجوني
هذيكة الساعة مافي وحدة تقبل فيك
يونس وهوا ياكل: عساها لا تقبلني أنا ماأفكر في زواج إلحييين ولا أفكر في شغل
علشان لا أتنصب مثل غالية و فاطمة
عصب أبو يونس ورماه بقارورة الشطة وكسرت صحنة:الله يلعنك قوم من سفرة ما أبغى أشوف وجهك
ولا مقفاك..ولد عاق وعاصي وباطل مايحشمني ولا يحترمني ما فكر يقول أبوي كبير في سن
أحاول إني أساعدة و أشيل عليه مسؤولية بس الش.......
قاطعه يونس وهوا يقوم من سفرة ويرمي ملعقة في الأرض:تقصد المسؤولية إلي تتتكلم عنها إني أشيل
فلوسك وكيسك الأسود إلي جامع فيها فلوس.....
سكت لمن شاف ملعقة تجي عندها و أبوه يصرخ ويرمي عليه كل شئ
عصب يونس وطلع من شقة نهائيا
قام أبو يونس وهوا يلعن ويسب ويقول لمرته: دخلي صحن الفواكة بغرفتي.. الواحد مايعرف ياكل في البيت
ولا يعرف يعيش مرتاااح
غالية قالت لأمها لمن شافت أبويونس دخل غرفته: الله يهديهم ياارب مدري متى راح يبطلو
أم يونس وهي منزلة راسها وتهزه: أنا تعبت بحياااتي .. تعبت من كل الجهااات بس الله يديني الصبر
وانا عايشة ومتحملة كل شئ
قالت فاطمة وهي تغير الموضوع:تدرو أنه صحبتي سماهر جاها مس
ناظرتها أصالة بصدمةوقالت:أحلفي صحبتك سماهر
أم يونس وهي عاقدة حواجبها: الحضرمية صحبتك دخل فيها جني بسم الله من متى وكيف؟؟
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك