رواية نور -7
نوره:الحين بروح ارقد بس شدنيه صوت البحر وقلت بطلع عن اليهال ياي عشان ما يدخل عليهم الهوا
كان الهوا يلعب بشعره وهو مغمض
التفتت له نوره
نوره:انته متسبح وطالع اهنيه روح داخل بتاخذ برد
خليفه:هههههه حتى انا بتخافين عليه
نوره:يمكن الحين ماتحس بشي بس بعدين بتتعب من الهوا البارد وشعرك خرسان
خليفه:اباه يحف
نوره :في مجفف داخل تعال بجففه لك
دخلت نوره وتبعها خليفه وابتسامته على شفايفه اول مره ايحصل اهتمام
كانت متجه لغرفة اليهال لاكن خليفه وقفها وهو يمسك يدها ويجرها لغرفته
خليفه:تعالي غرفتيه فيها مجفف عشان اليهال مايوعون
انتبهت اهنيه نوره لغلطتها وحست انها ماتقدر تمنع اريولها انها تلحقه في غرفة الملابس قعد خليفه واشار الها للمجفف التابع للفندق
خليفه:هااه مابتجففين شعري؟
هزت راسها باوكيه ومسكت المجفف واقتربت امنه اتجفف شعره ويدها تتخلل شعره اتفرق بين الشعر
كان مستانس ويحس بمتعه وهو مغمض عيونه خدمه مجانيه
بندت نوره المجفف
نوره:خلصت
خليفه:افاا والله كان جنااان
التفتت نوره اتريد اتروح
خليفه:هااه على وين؟
نوره :باروح ارقد
خليفه:توه الوقت
نوره بارتباك:انته مابترقد؟
خليفه:بعده بكير...شرايج ننزل نتمشى على الشاطئ
نوره بفرحه:صــــــــــــدق؟
خليفه:ننزل؟
نوره:ياليت والله بس انا مااقدر اخلي اليهال
خليفه:ماعليهم رقود
نوره:بس اخاف حد منهم يوعى ومايحصل حد
خليفه:عادتن يووعوون؟
نوره:لاا
خليفه:عيل احنا مابنتاخر
نوره:لا لا ما اقدر فرضا حد وعى على طول بعد ما نطلع
خليفه:يابنت الحلال مابيوعون صدقينيه لاعبين لين قالو بس التعب هاااد حيلهم
نوره:بعد ما اقدر....يمكن اللعبه الي كانو يلعبونها اتخلي فطامي تقافز في رقادها
خليفه:نووووره ياله خلينا ننزل مابيستوي عليهم شي على مسؤليتيه...ياله يابنت الحلال
لا تخافين بغفل عليهم ومابييهم شر ياله انسير ومافي داعي تلبسين عباتج بس ليلال ايكفي لان محد في طريقنا
طلعت نوره من غرفته
نوره وهيه متجهه للغرفه الثانيه:لاا ما اعرف اطلع من غير عباه
خليفه:اريحلج جذيه
نوره :لاا راحتيه بعباتيه ثواني بس
راحت عنه وتم واقف ايفكر ياترى كم عمرها وصلت الثلاثين لاكن عليها صوت عذااااب
ويد ملمسها يذبح...اعوذبالله من الشيطان وين راح تفكيريه انا
طلعت نوره معاه وهيه متردده تترك اليهال
نزلو تحت وكان المكان خالي الامن بعض الاجانب وخذو الطريق الي يودي للشاطئ وهناك بعيد عن اضواء الفندق التفت خليفه الها
خليفه:مابتعقين عباتج محد بيشوفج اهنيه
نوره:لا ماعليه
خليفه:بتخيس عباتج من البحر ترانا بنمشي على الشاطئ خليهن اهنيه على الكرسي واحنا رادين بنخطف عليهن
نوره:طيب
خلعت نوره العباه وصنفتها وحطتها على الكرسي وتمت بالنقاب والشيله الملونه الي عليها كان
خليفه رافع ثوبه ورابطنه على خصره وثاني اكمام الثوب اقتربت نوره امنه وهيه متوتره ومشت غريب امنه على امتداد الشاطئ
تم خليفه يتكلم ويسولف بدون مايحس بحواجز وكان اكثر كلامه عن زايد والاحوال الي تصيرله الحين فترة الانتخابات
وكل ماضحكت نوره حس خليفه ان ضحكتها اتلامس اوتار قلبه وفي سالفه من السالفات تم يضحك معاها بصوت عالي
وماحس بنفسه وهو يمسك يدها ويحاول ايهدي نفسه من الضحك وبعد عنا سكت من الضحك يوم شاف انها سكتت وعرف ان السبب هو مسكته لايدها تم يمشي معاها في طريق الرجعه ويده رافضه تترك هذا الملمس الناعم
وفي نفس الوقت كان يحس برجفت يدها الي استاااانس عليها
رن موبايله وكانت اميره المتصله الي تمت تساله اهو وين وشو يسوي وبعد ما قالها انه في دبي تمت اتحاكمه واشتغلت الغيره
وتم خليفه يشرح الها الوضع بدون ما اييب طاري لنوره انها معاه تمشي حس ابها انها اتحاول تسحب يدها في الوقت الي كان يحلف لااميره
انه مافي داعي تخاف من شي وانه قد كلمته بالقو سحبت يدها ومشت بخطوات سريعه تاركتنه رايحه لمكان عباتها واحساس موجع يدب في قلبها
بعد ما سكر عنها لحق نوره وتم واقف ينتظرها وكلام اميره ايرن في راسه بان نوره بتسحره وبتاخذه الها
هز راسه بمحاولة طرد هذي الافكار بعدها طلعو لفوق وعلى طوول نوره راحت للغرفه الي فيها اليهال ورقدت بدون ماتقول اي كلمه لخليفه
على اليوم الثاني طلع خليفه وحصل الكل صاحي واقترب منهم وقعد عدال نوره لاصق فيها كانت مشغوله
اتسوي سندويجات شل خليفه فطامي وقعدها على ريوله بعد ما رفعها من عدال نوره حاولت نوره تتجاهل وجوده
خليفه:اخبارهم الحلوين اليوم
احمد:عمي ودنا الالعاب مره ثانيه
خليفه:ياليت والله حبيبي بس انا عندي شغل ضروري اليوم ولازم نرجع الحين
احمد:تيبنا مره ثانيه
خليفه:اكييييد
التفت لنوره الي كان ايلاحظ ايديها ترتجف ومتوتره وهيه تسوي السندويجات همس الها
خليفه:شبلاج؟
التفتت له وتلاقت عيونها بعيونه لثواني:هاه لا ماشي
مد يده ليدها ومسكها
خليفه:ايديج ترتعش ليش
وقفت نوره بسرعه وسحبت يدها:مافيه شي مافيه شي نسيت اكل دوايه
وراحت لداخل وهيه تحاول تسحب نفسها تم خليفه ساكت منبهت اي دوا تقصد وتم ايفكر معقوله فيها مرض وانا مادري شوه لازم اكلمها في الموضوع
في السياره حاول خليفه يستفسر عن الدوا وقالت له انها فتامينات لازم تاخذها حس انها تجذب وهيه فعلا تجذب لانها ماتاخذ اي ادويه وجوده عدالها هو الي وترها وخلاها ترتجف
رجعو ومرت الايام احوال عيال اخوه مستقره حديث عادي ايكون بين خليفه ونوره وانشغل بعدها خليفه مع زايد بترتيب الانتخابات والاستعداد له
زايد بعد لقاءه مع نور تم يومين ايحس بتوتر وانزعاج من الموضوع كامل وتم ايحاول يلهي نفسه بلاستعداد للانتخابات
بدر قال لخليفه انه استعيل بفتح موضوع خطبته وهم مشغولين بالانتخابات وطلب انهم اياجلون الموضوع لين عقب
اما اليازي رجعت تتجنب فهد وتترقب الفرصه المناسبه عشان تنتقم فيها من فهد
رووووضه سالفه ثااانيه....ما خلت حد من صديقاتها ما قالت الها عن موضوع خطبتها واعلانها الرفض
واسباب الرفض ومن صديقاتها الي ايدتها والي رفضت تفكيرها واسبابها
اما هنيه فقد استخدمت كل وسائل الكبت على نور عشان تمنعها تطلع في الفله لاكنها تعبت معاها وهيه كل شوي محصلتنها في مكان في الفله
صرخت هنيه:بتعملي ايه يابنت
نور:هنيه انظري اليس من المستحسن ان نضع هذه هنا
امسكت هنيه نور من يدها وجرتها وراها الى ملحق الخدم
هنيه:يابنت حرااااااام عليكي انتي مابتوبيش عايزه تاطعي عيشي خليكي في الاوده يخرب بيتك
نور:يخرب بيتك.....ماذا تعنين هنيه؟
ادخلت هنيه نور الغرفه والتفتت لها
هنيه:اسمعي كلام انا تمااام اذا في سوي مشكل انا سوي انته مووووووت
اخذت نور تنظر اليها في محاوله ان تفهم اكثر
نور:انتي تتكلمين العربيه ولاكن لا اعرف ماذا تقولين او ماذا تريدين ان تقولي هل تفهمين لما اقول
هنيه:كلام زياده انا مايريد انته اجلس هنا روحي اعدي اقري في الكتاب بتاعك
واشارت لها على مصحفها
ابتسمت نور:لقد انتهيت من وردي هنيه لماذا انتي لا تقراين وردك
هنيه:انا مافي معلوم يقرا.......انا دلوئتي يروح برا سير يجي انتي مافي يروح برا اوكيه
ضحكت نور:لا افهم ما قلتي ولاكن حسنا اوكيه ههههه
هنيه:يالااااهوي منك
خرجت وتركت نور بعد ما سكرت عليها الباب زين
جلست نور على السرير وراح تفكيرها لصديقاتها في باكستان اتحس انها اشتاقت الهن
حرصت ام نور من يوم ما كانت نور صغيره ان تعلمها اللغه العربيه لغة القران وبعد ما توفت امها اهتمت ابها جدتها وسارت على نفس نهج ام نور في تعليم نور اللغه وتحفيضها القران والاحاديث
وبعد ما ماتت الجده اهتم ابها واحد من قرايب جدتها وكان رجل دين وصالح وكان يحب نور واااايد لانها من
اصل الجزيره العربيه وهذا الرجل يحب ابنا الجزيره العربيه لانهم ابنا الصحابه والخلفاء واول ما شاف هذا الرجل صور زايد في الجرايد راح عند نور يركض فرحان ورواها صوره
وقالها انها تشبهه وايد فرحت نور يوم عرفت بوجود ولد عمها الي حست انه شخص عظيم قدر يوصل
للمستوا الي وصله واكيد انه شخص صالح قدر بمحبته للناس وحبهم له انه يرتقي لاعلى المستويات
دخل زايد للفله متجه للدور الفوقي لاكن ريحه غريبه منعته ايكمل طريقه الريحه هذي ما يحبها اصلا مش حلوه
تم يتلفت ايدور مصدرها وشاف شي خلاه يصرخ باعلى صوووووته
زايد:هنـــــــــــــــــــــــــــــــــــــــــــ يه هنــــــــــــــــــــــــــــــــــــــــيه يعل مامن هنيه
كانت هنيه تركض وتتعثر في ركيضها لين قدرت توقف جدامه
هنيه بتلعثم وخوف:حادر ايوا مين جرا ايييه
زايد بنظرات غاضبه اشار الها على العود الي مدخل طرفه في فتحه صغيره ونهايته يطلع منها دخان معطر
زايد: هذا ......هذا الارف منو حاطنه؟
رفعت هنيه نظرها للعود وتذكرت نور
هنيه:ا ا انا ا ا
زايد:هيه صح ؟....هيه يعني سمحتيلها تطلع
هنيه والدموع بدت تتجمع في عيونها:ياباشه انا انا
صرخ:انا شو قلتلج ما قلت ياويلج ان خليتيها تمشي في الفله ..لا وحضرتها ماخذه راحتها تتحسب البيت بيت ابوها
حاطه اليه هالزق الي ريحته تيب المرض
انتحبت هنيه بالصياح وهيه خلاااص ماتقدر تستحمل اكثر
هنيه:يابااااااشه انا خلاااااص حاخد عيالي وامشي انا عارفه مليش مطرح هنا......دنا غلبت يابااااشه معاهااا هيه مش راضيه تسمع الكلام والله ياباشه
انا مابنامش الليل وانا بفكر انك حترجعني مصر تاني دنا غلباااانه يابااااشه دنا امي عياااانه واخواتي مش لاييين شغل واختي ارمله وتحتها كومة عيال
زايد:بس يا هنيه انا ادري بالاحوال هذي ما في داعي اتمين اتعيدينها اليه
هنيه:طب ياباااشه انا البنت نور دي مابتعبرنيش دي مابتفهمش انا اؤلها ايه هيه بتتكلم عربي بس مش فهمه احنا بنؤلها ايييه
تم زايد ايطالع هنيه عقب قال الها
زايد:سيري ازقريها اليه انا بسنعها مسودة الويه ناقصنيه عاده انا بس ريحتهم الخايسه
هنيه:طا طايب طيب
التفتت هنيه وركضت بسرعه عند نور
دخلت عليها الغرفه
هنيه:اوومي يابنت اووومي
نور بنظرات مستفسره:ماذا هناك؟
هنيه:مازا هناك ؟..هناك اجلك يابنت امشي معااايه الباشه عايزك
نور باستفسار:ماذا تعنين؟
هنيه بصوت عالي وهيه ترفع يدها:الباااشه عيزك
نور:الباشه هو السيد حسننا وما تعني الكلمه الثانيه
هنيه:يالاااااااااااهوي دنا حشق هدومي بنت يانووور امشي مع انا بااااشه برا يريد انتي
نور تشير لنفسها:يريدني انا؟
هنيه:ايوااا
ابتسمت نور:حقا هل صفح عني؟
هنيه:بلاش يابنت تتكلمي معايه كده امشي باااه
نور:حسنا حسنا سالبس حجابي واتي
اليوم نور كان اللبس الرئيسي الها هو الاحمر شال احمر وصروال احمر والقميص بالوان متداخل معاه اللون الاحمر
لفت الشال على راسها كالعاده واحضرت شال اكبر لونه اسود يغطي بقية جسمها وطلعت رايحه لزايد مستانسه
كانت تمشي واطالع تحت وهيه تمسك جوانب الشال الاسود ونظرها كل اشوي ارتفع لزايد قربت امنه اكثر وبدت اخدودها
تحمر وابتسامه عذبه مرسومه على شفايفها توتر زايد اول ما شافها وخصوصا ان شكلها يذكره انها تشبهه
تم ايطالعها من فوق لتحت بنظرات احتقار رفعت نظرها له
نور:طلبتني سيدي؟
حس انه ما يعرف شو يقول رغم انه يحتقرها الا ان حضورها قوي عليه
زايد:شوو هالزفاته الي معلقتنها اليه في كل مكان
كل مكان هيه الكلمتين الي فهمتهن اما بقية كلامه ما فهمته تمت اطالعه على امل انه يوضح شو قال
زايد بصوت عالي:انتي تسمعين ولا لا؟
نور:اسمعك سيدي ولاكن لم افهم ماذا قلت قبل قليل
زايد:انتي كيف تتكلمين عربي وماتفهمين؟
نور وهيه تنزل راسها تحت وترفعه:افهم القليل مما تقول سيدي....انته لا تتكلم الغه العربيه الفصحى
زايد:هذا الي ناقص
هزت راسها بنعم:اجل هذا الذي ينقصك
زايد بغيض:مـــــــــــــــرض انتي بتفهمينيه شو ينقصنيه
رفعت نور نظرها له مستغربه سبب غيضه
نور:اعتذر سيدي لم اقصد ان اقول شيء يغضبك
زايد:جــــــــــــــــــب
نور:هل تعني بان اصمت
زايد قرب ايمط شعره:قلت جــــــب
نزلت نور راسها تحت
نور:حسنا سوف اصمت
تم زايد ايطالعها ويحس بحراره تطلع من جسمه كيف يتفاهم معاها هذي
زايد:طالعينيه زين.....الوسخ هذا ممنوع تفهمين
سحب زايد العيدان وفرهن على الارض ودعس عليهن بريوله
واشار الها عليهن
زايد:هذاااا ممنووووووع ممنووووع تفهمين
هزت نور راسها بنعم وهيه اخيرا فهمت شو يريد
نور:حسنا حسنا لقد فهمت ...الم تعجبك رائحته؟
زايد:انجبي ما اريد اسمع صوتج ولا اريد اشوفج اهنيه ولا اريدج تدخلين الفله مره ثانيه
رفعت نظرها له وفهم من نظراتها المستفسره انها ما فهمت شي
زايد:لاحولا ولا قوة الابالله
ابتسمت نور يوم سمعته ايقول جذيه لانها اتحب ذكر الله واااايد ورددت وراه بصوت خافت
زايد:انتي ناويه تذبحينيه انقلعي داخل
رفع يده عقب واشار الها لملحق الخدم وصرخ بصوت عالي
زايد:انقلعـــــــــــي
ركضت نور ناحية الملحق واول ما دخلت ضحكت بصوت عالي
هنيه باستغراب:هو جرا ايييه بتضحكي يابنت
نور:هنيه ما ذا يعني بكلمة انقلعي
اغمضت هنيه عيونها اعلان انها نفذت عندها كل طاقات التحمل
نور ما فهمت الكلمه لاكنها فهمت لحركة يده
.....................................
كان بدر عند زايد في المسا وهو فاطس من الضحك
بدر:هههههه تتكلم اللغه العربيه ههههه
زايد: يعني انجلبت الايه بدال احنا ما نفهم الها ونتوهق بالي اتقوله صارت اهيه ماتفهم النا واحنا نفهم شو تقول
بدر:ليتنيه دريت ابها واحنا يايين جان استانست والله معاها بالسوالف
زايد:والله بتم اتسولف معاها بالفصحى
بدر:شو المشكله مب لغتنا
زايد:اي لغتنا الله يهديك انته اتشوف حد يتكلمها
بدر:لغة الاجانب بنتكلمها عادي ماعندنا مستحى فيها ....ويوم بيينا اجنبي يعرف عربي بتحصله يتكلم بالفصحى واحنا بنجاريه عشانه اهو
وبنتكلم بالفصحى عادي
زايد:تعال انته ...ناوي تنفخليه راسيه اكثر مماهو منفوخ ...اقلع عنك الرمسه هذي
بدر:ياحليييلها ولا لغه عربيه فصحى ههههه....تدري العجم حاسدينا على هذي اللغه وهم اتقنوها اكثرعننا...في باكستان والهند مدارس وااايد
كل طلابها يتكلمون الفصحى وحافضين القران والاحاديث مهتمين بعيالهم اكثر عننا احنا الي همنا اهنيه اننا اندخل عيالنا مدارس اجنبيه
زايد بطنازه:شرايك اتكلم باجر في الانتخابات ..يجب علينا العوده الى اللغه الفصحى عليكو ايتها القبائل العربيه
محاربة اللغه الاجنبيه
بدر:هههههه جناااان شرايك
زايد:لا والله ...عشان مايتم نعل في القاعه ماينفر عليه
ضحك بدر بصوت عالي وتم زايد ايهز راسه على دخلت خليفه الي تم يضحك هو بعد عقب بعد ما عرف بالسالفه
خليفه:والان ايها السيد هلا طلبت لنا الطعام هههههه
زايد بغيض:ويمييين ان ما اصطلبتم انكم اتعرفون عماركم زين انجبو
خليفه:هههههه حسنا حسنا
زايد:خاااال وبعديييين؟
خليفه:اوكيه اوكيه تنفع هذي هههههه
.................................................. .................
في اليوم الثاني كانت جدة زايد قاعده في الحوش عدال سيارة فهد الي طلع وحصلها
فهد:هااه يدوه علومج
الجده بعصبيه:الدريول وييين؟
فهد:طرشته اميه اييب سمان من المينا
الجده:هيييه امك انا ادريبها يوم درت انيه بروح لغنميه طرشته ماتبانيه اروحلهن
توهق فهد وحب ايدافع عن امه
فهد:يدووه انا قلتله ايروح عشان انا في خاطريه اوديج لغنمج واميه ماطرشته الامن بعد ماقلت انا انيه بوديج
الجده:زين عيل ياله شغل الموتر
التفتت عقب للباب
الجده:يزوووي يايزووووي ياله فديتج
طلعت اليازي:بنرووح
فهد:وانتي وين تبين اتروحين
اليازي:بروح مع يدتيه
تم ايطالعها فهد بنظرات
فهد:ووين عباتج
اليازي:مش لازم احنا بنروح الغنم
فهد:لااا والله ...مافي طريق فيه سياير لين العزبه
رفعت اكتافها:ماتهمنيه
فهد:زين اركبي اركبي خليهم ايقولون عيوز شاله معاها خدامتها
اليازي:انا مش خدامه
فهد:انا الي بقول؟ الي بيشوفونج بيقولون
اليازي:اووووه دقيقه انزين بيب عباتيه
راحت اليازي داخل وانرقع فهد على راسه بعصى جدته
فهد:اي........ يدوووه شبلاج
الجده:انته شبلاك على هالمسكينه جان خليتها تروح بدون عباه شو المشكله
فهد:ياسلااام ...من متى هذا احنا ماعندنا بنات تتصقع بدون عباه...ولا اهيه خلاص اتعودت بيت خالتها كل شي فري
الجده:جب جب سكر ثمك هذا ويويلك ان لعوزتها في السياره تراك مابتاخذ الا اهيه
فهد:اتهبي
وصلت اليازي وركبت معاهم
ساق فهد وطلع من البيت وشاف انها ماتغطت
فهد:انتي تتغطين ولا لا؟
بادلته اليازي بالنظرات من المرايه
اليازي:لااا ما اتغطى
فهد:والله ان ماتغطيتي انيه احولج اهنيه
اليازي:يدوووه قوليله ...اكيه يدوه مش متغطيه
فهد:هذي عيوز ولابسه برقع
الجده:عيوز امك يامسود الويه....شبلانيه انا ما اتغطى انا حرمه حشيم ولازم انيه بتغطى
فهد:زييين علمي بنت ولدج
الجده:وحتى بنت ولديه حشيييم ومزيونه ولازم انها بتتغطى الا انته مستعيل وماكلنا في بطنك
رفع نظره الها في انتظار انها اتنفذ الامر
اليازي:اووف
رفعت غطاها وتغطت وهيه متنرفزه
اليازي عاشت طفولتها في بيت خالتها الي كانت فري وماحصلت حد ايوجهها بالصح والغلط
ماكانت مهتمه بحجابها ولا انها اتغطي ويهها طبعا مش تعمد ولاكن جهل وهذا الشي مش فاهمنه فهد الي ماخذ عنها فكره سيئه
تحتاج البنت من الصغر التوجيهات وان تربي الام الستر والحيا في بنتها لاكن اليازي ماحصلت حد ايقوم بهذي المهمه
اتجه فهد بسيارته لطريق سويحان وين عزبة الجده في المناطق الصحراويه هناك
كانت اليازي فرحانه واااايد لانها اول مره اتروح العزبه
اليازي:اللــــــــــــــــــه يدوه هذي عزبتج
التفت فهد ناحيتها مستغرب انها اول مره تي
اليازي:يدووه انحول
الجده:هيييه فديتج حولي
حولت اليازي وصرخت:لااااااا
سكر فهد الباب والتفت ناحيتها
فهد:شبلاااج؟
اليازي:اندعس نعليه في التراب
تم ايطالعه مستنكر:والله لابسه كعب واتقولين اندعس؟
اليازي:الحين شو اسوي ما اقدر امشي
فهد بغيض:انتي ايه انتي وين عايشه؟ شوو هالملاقه؟ عقي النعول وامشي عادي
اليازي:واللـــــــــــــــــــه امشي حافيه على التراب اتريد اريوليه تتوسخ
فهد فقد صبره:لااااا والله بتتوسخ اريولج شيخه واحنا ماندري
اليازي بتحدي:هيه شيخه
فهد:ويوم انتي هب ويه سيرة العزبه ليش يايه
اليازي:وانا شو درانيه ان عزبتكم كلها رمل احنا انروح عزبة خالوه في المزرعه المكان اهناك كله نظيف
فهد:ماخربج انتي الا هالخاله المدرن مثل مايقولون...والله تبين تنزلين اكيه يدتج عند غنمها وان مابغيتي تمي في السياره
امبونج هب يايه اتساعدين
خلاها وراح وتمت اليازي اطالعه بنظرات كلها غيض وحقد عقب ركبت السياره وتمت فيها مقهوره
راح فهد عند يدته ودخل شبك الغنم ومسكلها وحده من الغنم قربها وتمت اطالعها وقالتله عقب ايروح عند الراعي اييب مقص عشان اتقص
الشعر الزائد في المعزه وفهد نفذ الها كل طلباتها وتم ماسك الغنمه والجده اتحلقها واليازي اطالعهم بنظرات مستغربه
شعر المعزه تطاير على فهد وخيس ملابسه وبعد ما خلصو تمو شويه عقب رجعو السياره كانت اليازي قاعده ورا فهد
حطت يدها على خشمها
اليازي:اووووف شو هالريحه
ولزت للجنب الثاني مبتعده من وراه ومازالت حاطه يدها على خشمها
اول ما ركب فهد
اليازي:اع شووو هالريحه
طالعها فهد من المرايه بغيض وتم ساكت ايسوق السياره وهو مقهور منها
اليازي تمت كل شوي تهب الريحه وتصدر كلمة اع اخ شو هالريحه وتحرك يدها تبعد الريحه عنها
بعد ما وصلو رقع فهد باب السياره وركض لفوق فكرت اليازي انه اكيد رايح يتسبح لاكنها انصدمت بيديه مسكتها
اول ما صعدت فوق وسحبها لاحد الغرف
اليازي:ايييييه اتركنيه
لصقها على الجدار وثبت ايديه على الجدار وهيه جدامه محصوره بين ايديه والجدار وتم ايطالعها بنظرات ناويه على الشر
فهد:هااه اليازي شو رايج في الريحه
اليازي:وخر عنيه ريحتك خايسه
فهد وهو يقرب عليها اكثر:والله عيل شمي اكثر عشان تتعودين
اليازي:اقولك وخر عنيه
طوقها فهد بين ايديه وهو يدعس بويهها في صدره
فهد:شمي زين شمي وافهمي انج باي حاجه ناويه اتغيضينيه انا بعاقبج ابها
كانت اتقاومه وتحاول تتفجج امنه رفعت ايديها وتمت تضربه على صدره ضحك فهد وهو يدعس ويهها اكثر واكثر
رفعت اليازي راسها وحطت عيونها في عيونه وهيه بعدها لاصقه في صدره
اليازي وهيه اتصيح:بطلنيه
حس فهد برجفه من شكلها القريب وايد دزها بعيد عنه وطلع بسرعه
.................................................. .................................
قعد زايد في الحديقه على الطاوله القريبه من برجة السباحه ينتظر هنيه تيب له الفطور لاكنه تفاجئ بوحده ثانيه
ابتسمت نور وحطت الصنيه على الطاوله
نور:اسعدت صباحا سيدي
التفت الها زايد وولعت عيونه من الغيض والاستفسار ليش اهيه الي يابت الريوق
نور:هنيه لم تستطع ان تحضر الفطار انها تعاني من الرشح وتشعر بدوار
صرخ زايد:وانتي منو قالج هاتي الريوق وين الخدامه الثانيه؟
فهمت نور انه يقصد الخدامه الثانيه
نور :ل لقد ذهبت مع السائق لاحظار بعض المستلزمات
زايد وهو يحاول يكبت نفسه:وانتي منو عطاج الاذن هاااه
تمت نور اطالعه ماتعرف شو تقوله
زايد:مليووووون مره قلت ما اريد اشوف ويهج
نور وكلامه بعده مش مفهوم الها
نور:ااسكب لك الحليب؟
زايد:انتي عنز ماتفهمين؟
تمت واقفه وتحاول تفهم شو يقول مع ان بعض الكلمات اتحس انها مفهومه لاكن المعنى مش واضح
زايد:لحووووووووو يالله انقلعي انقلعي داخل
بتردد:ماذا تعني بكلمة انقلعي
التفت زايد بسرعه للجهه الثانيه وهو يحاول يكتم ضحكته وبعد الموووت قدر التفت الها وهو يوقف
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك