رواية نور -54
دخل ابو فهد:لمطوع وصل ...يا فهد اتصل على زايد استعجله
بدر بهمس:الله يهديك ...الحين كيف بتطلعنا من هالمصيبه
مروان كان يتمنى ياكل شفايفه من التوتر ومن ردة فعل بدر الله يستر عيل من ردة فعل زايد
دخل فهد:وصل زايد يا ابويه
ابو فهد:زين زين
زاد التوتر عند مروان وخصوصا بدر الي يعرف كيف بتكون ردة فعل زايد
دخل زايد وسلم وعيونه تستكشف الموجودين كلهم وخصوصا لمطوع
عاد اهنيه مروان حس انه مايقدر يرفع راسه ويحط عيونه في عيون حد خصوصا بعد ماوجه له زايد نظره عقب ماقاله ابو فهد بالسالفه لاكن زايد تم ساكت ومحد عرف شو اهيه ردة فعله
بس مروان حس ان صدر زايد انتفخ وهو ياخذ نفس
بدر وهو يهمس لمروان:يا خوفيه زايد ساكت بس لانك اخويه الله يهديك جان قلتليه من قبل زين الحين الموقف الي احنا فيه
تم مروان ايحاول يمنع نفسه انه يترك الميلس ويطلع من التوتر الي كان ايحس فيه لاكنه ماقدر وابو فهد ناوي يملجبه الحين
طلب لمطوع توقيع العروس
ابو فهد:فهد ود الدفتر لاختك
قام زايد وهو يهمس لخاله:انا بوديه وقسما بالله ان ما وافقت انه ماتستوي الملجه
خلاااه وطلع عشان يبتدي التوتر عند ابو فهد عقب قسم زايد
اول ما دخل زايد الليوان وشافته مي ركضت بسرعه ناحيته وهيه اتصيييح وارتمت في حضنه تشهق من الصياااح
سكر زايد الدفتر وحطه على الرف عداله وهو يلمها ويقسم الها انه مايصير شي بدون رضاااج
مي من بين شهقاتها:ماريييد مارييد اريد اكمل دراستيه
زايد:بس فديتج بس والله مايستوي شي بدون شووورج وموافقتج وهذوووه الدفتر انا يايبنه عشان اشاااورج
مي:بس ابويه ايقول لازم تاخذه انا انا اخاااف امنه عقب يعصب عليه
زايد:خلي حد ايقولج كلمه وانا برويج فيهم
كان مطوقنها بيديه وهيه تشهق وشهقاتها بدت تهدى لين ما سكتت خلاااص
بعد زايد راسها عن حضنه الي صار مغرق بدموعها وتم ايطالع ويهها
زايد بابتسامه:والله وكبرتي يا ميمي وياينج خطاااب
خنقتها العبره مره ثانيه
زايد:هاه هاه هاااه انا امزح ما كبرتي وبتمين طول عمرج دلوعة زايد فديت قلبج
رجع وضمها لصدره محد يدري بغلاااتها عنده ايحس انها بنته
بعد شوي
زايد:ميمي اتحيدين يوم كنتي صغيره شو كنت اقولج
رفعت راسها وتمت اطالعه
زايد:كنت اقولج يا ميمي يوم بتكبرين انا بيوزج واحد شرطي ومش اي شرطي شرطي ماعليه كلااام واحسن شرطي في الدنيا تدرين ليش
رمشت بعينها
زايد:لانج اتقولين انا اخاااف من الحرامي وقلتلج مايقدر الحرامي اييج دام انيه معاااج وقلتيليه واذا رحت عنيه بعيد..قلتلج عيل بيوزج شرطي عشان يحميييج وانتي عاده ساعتها استانستي وقلتي عادي يتجوزنيه الشرطي
ابتسمت مي وهيه تتخيل مروان ببدلة الشرطه
زايد:عاده تدرين منو اليوم الي يا يخطبج
تمت اطالعه باستفسار
زايد بابتسامه:شرطي يا ميمي واحسن شرطي واغلى شرطي عنديه
تمت اطالعه
زايد:تدرين ان هذا الشرطي احسن بعد من الشرطي الي كنت افكر احصله وايوزج اياه
نزلت راسه تحت وهيه تحس انه ايريد يقنعها به
مي:بس انا اريد اكمل دراستيه
زايد:ومروان مابيمنعج اتكملين دراستج
ارتجفت رجفه قويه حس ابها زايد وهيه تفتح عيونها
مي:مروااان
زايد:هيه مروان احسن شرطي عندنا في المنطقه هههه
احمرت اخدودها ساعتها وزادت ابتسامة زايد ورد يحضنها بقو
زايد:والله يا ميمي ان مروان احسن من اي ريال ثاني وانه بيحطج في عيونه وبيحميج طووول عمرج ماتدرين كيف كانت فرحتيه يوم شفت انه اهو المعرس
ابتسمت مي وهيه مستحيه وداسه ويهها في صدر زايد
رجع زايد وبعد ويهها عنه شوي وتم ايطالعه ويلاحظ ابتسامتها:شووفي اذا ملجتو اليوم بنقوله اياخر العرس لين اتخلصين دراستج ...هاه شقلتي
مي:هزت اكتافها بمعنى مادري
مسك زايد الدفتر وفتحه:هاج اذا كنتي موافقه وقعي واذا كنتي مش موافقه وقعي اهنيه وعلى كيفج غناتيه
حطلها الدفتر على الرف وراح ايسلم على يدته الي دخلت الصاله
مي بتوتر تمت اطالع الدفتر وتحس بخربطه واحراااااج وقعت بسرعه وركضت
لفوق سكرت باب غرفتها وتاندت عليه وهيه تحط ايديها على ويهها منحرجه وبعدها قعدت وهيه بعدها متسانده على الباب
مي:ياربييييي احرااااااج ....والوقح مسوي عمره مايعطي ويه
كان قلبها ايدق مش مصدقه هل فعلا مروان اصبح زوجها وكل ماتدخل الفكره راسها هزت راسها بلااا مش مصدقه وهيه تتذكر كل مواقفه
دخل زايد الميلس وتم ايطالعهم بنظرات مش مفهومه وقرب من خاله وهمس له
بدر بهمس:اسميييك الا صدق وهقتنا ...زايد حالف من زمان انها مابتاخذ الا الي بترضى به وهااااك تلاقي لبنيه متروعه الحين ورافضه
زاد التوتر عند مروان
زايد بصوت حازم وهو يقعد قريب منهم:مروااان...ترا ميمي تبا اتكمل دراستها
طاح قلب مروان وتاكد من الرفض
زايد:يعني هب تقول باجر اريد العرس قريب
تم مروان ايطالع زايد مش فاهمله
زايد:فهمت شو قلت الحين بس ملجه
نقز مروان وقعد عدال زايد وعيونه على التوقيع:صدق وافقت؟
طالعه زايد بنظره حاده وجاده:احممم
عقبها انتبه مروان لنفسه
وقام زايد عشان يكملون اجراءات الملجه ومروان مش مصدق...معقوووله الحين الي يصير انه ملج خلاااص عليها وصارت حرمته محد كان ايحس بالفرحه الي ترفرف في قلبه وضحكه خنقها وهو مش عارف شو في خاطرهم
باركوله كلهم وعقبها طلع مع بدر الي تم طول الطريق وهو يشرشحه في الكلام وانه كيف ايفكر في بنت صغيره وهو كان ايقول كذا وكذا
دخلو على امهم الي كانت تنتظرهم على العشا في الخيمه وقربو منها وخبرها بدر وتمت اطالع مروان مش مصدقه
ام بدر:الله يهديك يا ولديه لبنيه هب صغيره عليك
مروان تم ساكت وبدا يتعشى ويفكر ايفكر في لبنيه الصغيره الي صارت حرمته خلاااص ومن كثر ماكان مندمج في التفكير فيها حس انه مايفهم لامه وبدر شو يقولون بس اهو متاكد انهم مش راضييين مش مشكله المهم انها صارت ملكه
فرحه بدت اتزيد اكثر واكثر في قلبه وهو يتخيلها ومبتسم مطنش كل الي ينقال
بعدها بشوي وهو ياكل ويدلقم اللقمه وابتسامته على شفايفه
ام بدر:فدييييييتك فيه العاااافيه
بدر:ايييه يالخمااام كلت الصحن كله
بدون احساااس مروان كان ياكل من الصحن وهو مش معاهم وقرب يخلص الصحن
ابتسم الهم وهو من الصبح كان يبتسم
ام بدر:فيه العااافيه يا ولديه لو كنت ادري انها اهيه عوقك جان من زمان خطبتها الك
لف بنظره لامه وقام وهو يحبها على راسها وطلع عنهم وشعووور بالفرحه كل ماييله ويزييييد
هز بدر راسه:خلص الصحن ودبر ...اميه زيدي باجر الغدا ولابتلاقينيه انا عقب متهلك
دخل مروان غرفته وابتسامته اتزيد واتزيييد فرحااااان خلع ثيابه ومن ونااااسته عق بعمره على السرير فارد ايديه جنبه وهو المكيف ظارب فيه
مستااااانس مستاااانس ومايعرف كيف يعبر عن ونااااسته ااااه ليتها الحين في حضنيه صارت ملكيه يانااااس صارت ملكيه
وببتسااامته غمض عيونه وهو يتخيلها لين ماغفت عينه لاكنه قام على اتصال خلاه يفزع من رقدته
مروان:الووو
بدر بصريخ غير طبيعي:مروااااااان الحق اليه يا مرواااااان زايد زايد انظرب بطلق ناري الحق النا يا مرواااان
مروان ونفضه قويه تهزه:انته شوووو تقوووول وين انتووو
بدر:اهنيييه اهنيييه جدام بيتنا انظرب وانا معاه الحين في الميلس بسرعه بسرعه فديتك تعااااااال
قفز مروان الي كان بس لابس شورت وركض بسرعه طالع من غرفته
............................................
اتصل خليفه على البيت وكلم البنات وطمن على احوال لعيال وسال جان نوره اتصلت وكان الرد لا
سكر عنهن وتم ايدور في شوارع دبي ما يعرف وين ايروح ولا ليش اصلا ياي اهنيه ايحس نفسه مثل التااايه
خليفه"الله يسامحج يا نوووره هنت عليج انا واليهال
دخل مروان ميلس الريايل وهو مش في حااااله
لاكنه تفاجئ باثنينه منفجرين في الضحك على شكله
زايد وبدر:ههههههههههه
بدر:طالع شكله دحب بطنه من العيش وحط راسه يرقد
زايد:هههههههه
تم مروان ايطالعهم ودقااات قلبه منتهيه استوعب اخيرا وحس انه منهاااار وقعد على اقرب كرسي ياخذ نفسه
بدر:هههههههه ويقولك اباها كبيره وفاااهمه ومخلصه على الاقل سنتين من الجاااامعه هههههه
لمح مروان خيزران على طرف سحبها وتوجه لبدر الي زحف بسرعه واندس ورا زايد الي كان ميت من الضحك
مسك ريول بدر وسحبه وهو يصرخ ويستنجد بزايد وهو يضحك
على ريوله انشاااط منقهر من ردة فعله في الميلس ومن مقلبه هذا
بدر:ااااخ والله ايعور يا حمااار
سيطر زايد على ضحكته وهو مش هاين عليه بدر ينظرب ونزل لعقال وقام لمروان الي شرد عنهم من الميلس وتمو يتضاحكون عقب ما طلع
##
##
##
ودمتم وديمه
الجزء الثامن والثلاثون
الايام بدت اتمر وكلا في حاله نوره مازالت غايبه عن البيت
وروضه بدت استعداداتها للتجهيز مروان نفسيته صارت احسن والكل حس بهذا الشي حتى اصدقاءه في البدايه ازعجه بدر كيف اتفكر في ياهل وكان يتجاهل سؤاله بابتسامه وصمت لين ما اقتنع بدر ان مروان فعلا ايحبها
اليازي رجعت تمشي طبيعي على ريلها واقنعتها روضه انها ترجع تكمل الدراسه قبل لايفوتها الكثير
ميمي كانت في عالم ثاني وهيه مش متخيله انها صارت زوجة مروان وكانت تستحي وماتحب حد يتكلم معاها على انها مملوج عليها كل ماحد فتح الموضوع تتركه وتطلع
وفي يوم كان زايد ومروان وبدر في ميلس ابو فهد وقام زايد وبدر دخلو داخل ايسلمون على اليده وتم مروان متحرقص من راحتهم في الدخله والطلعه وانحرق اكثر وهو يتخيل مي قاعده اتسلم عليهم الحين
نفسه ايكلمها ولا يشوفها من ملج اختفت عن انظاره الحين كيف بيفهمها انه مايريدها اتسلم عليهم...يا سلام عليك يا مروان من الحين بتم تتحكم فيها وتضغط عليها يمكن المسكينه من زمان اتحاول وماقدرت والدليل انيه سمعت اختها اتهددها اذا سلمت على بدر
السبلااان الحين قاعدين ايخممونها بالاحضان
دخل بدر وزايد وتمو ايطالعون مروان بنظرات مش مفهومه رفع راسه الهم وتم ايطالعهم باستغراب
مروان:علووومكم شعندكم اطالعونيه جذيه
بدر:عاده عدينها لك انك تملج عليها لاكن تطلب منها تتغشى عنا هذا يوم بينغسل فيه شراااعك
مروان باستغراب اكبر:تغشت تغشت عنكم منووو تقصدون
قعد زايد وهو مبتسم:فدييييتها كبرت ميمي يا بدر وتغشت اااه والله انيه بغيت اموووت وهيه ماره متغشيه ومفتشله مننا
بدر وهو ايقرب من مروان:انته قايللها اتغشي صح
تم مروان ايطالعه بنظرات وهو يريد يستوعب:اتغشت!!!!!؟
بدر:تخيل ميمي الي احنا مربينها عقب العمر هذا كله تتغشى عننا ...والسبه منوووه انته يا السبااال
زايد:حرام عليك لبنيه اتقول انها من زمان ناويه تتغطى وموضوع الملجه مايا الامن بعد ماقررت
بدر وزايد ماتخيلو الفرحه الي بدت ترفرف في صدر مروان وهو ابتسامته اتزيد اكثر واكثر...خلاااص صارت ملكه اهو وحلال له اهو وبس حتى هذولا افتك منهم ومن سلامهم الها ياسلااااااام والله انيه فرحاااان تم ايطالعهم وعقب ضحك بصوت عالي وما قدر حينها بدر يستحمل وقام منزل عقاله
في البيت داخل كانت مي اتصيييح في حضن روضه بعد مواجهة بدر وزايد
روضه:ههههه ليش اتصيحين الحين مش قرارج هذا...يابنت الحلال احسن والله احسن لج
اليازي:ياسلااام الي يسمعج ايقول حتى انتي تتغطين
روضه:ماعليه باذن الله انا بعد الله بيوفقنيه وبتغطى
مي ابتعدت عن حضن روضه وتمت تشهق وهيه تتكلم:لو شفتي زايد كيف كان ايطالعنيه مره ماتكلم تم بس ايطالع وهو ساكت ما اعرف شو في خاااطره والله حسيت انيه بموووت اااه
ونزلت دموعها اكثر
روضه:يا الخبلا هذا الشيطان ايقولج جذيه بلعكس انتي الحين اثبتي الهم انج كبرتي وصرتي حرمه من متى وانتي كنتي ناويه تودرين موايههم وماقدرتي الحين بغطاج صار الامر عادي
مي:يمكن ايفكرون انه عشان ا
روضه:ايوا عشان شوووه
مي احمر ويهها وابتسمت:رويييض بس عاده انا والله ناويه من زماان
روضه وهيه تضحك وتلوي على مي:فدييييت انا اختيه الي غدت حرمه
واشارت لليازي انه الحمدلله انها افتكت من سلامها لبدر
اليازي:هههههه
............................
في اليوم الثاني وبينما كان زايد قاعد في الحديقه ياخذ القيلوله اليوميه كانت نور
واقفه مجابلتنه وتحط صنية القهوه والشاي وهيه كل شوي اطالعه
فتح عيونه وانصدم انها واقفه
زايد وهو يعتدل:نووور
نور:هنيه ولدها مريض واستاذنت وراحت
زايد:هيه ادريبها
نور:زين شي تبا
تم زايد ايطالعها ويحاول يستوعب انها اهيه الي واقفه جدامه
زايد:لا تعالي اقعدي
نور:استاذن ..اذا تبا شي سوليه على تيلفون هنيه عنديه
التفتت عنه وراحت
تم قاعد ويراقبها بعيونه وقبل لا تبتعد
زايد:نووور
التفتت له
ابتسم:تعالي بقولج شي عن ميمي
رجعت وقربت امنه كم خطوه وتمت واقفه تنتظره يتكلم
زايد:ميمي اتغشت عنيه
ابتسمت نور وتمت اطالع تحت
زايد:كبرت ميمي وانا ماحسيت من فتره كانت ملجتها والبارحه اتغطت عنيه ...احس اا
كان ايريد ايقول انه يحس بالوحده وانه صار وحيد
رفعت نور نظرها وتمت اطالعه وهو سرحان ماعرفت شو في خاطره وماحبت تساله وتم ساكت سرحان
نور:الله يوفقها وكله في ميزان حسناتها ...بعد انا زايد لازم اتغطى عنك
رفع نظره الها:لااا انتي لاااا
تغيرت ملامح ويهه
وتمت نور اطالعه بعدها التفتت عنه وراحت وزايد فكرة انها تتغطى عنه وتبتعد ذابحتنه
وصلتها رساله اول ما دخلت الغرفه
زايد"نووور انا اموووت تعرفين شو اموووت
تمت اطالع الرساله وتحس ان قلبها طاح من مكانه هذا شو يقصد؟
.................
بعد مالفت اليازي وروضه ومي في الاسواق اشويه مرن بيت عمهن خليفه وكان راقد في الصاله والعيال يلعبون قريب امنه
اليازي:والله ايحزن حال عميه حرام الي تسويه نوره فيه
روضه:ايقول المثل شجابرك على المر غير الي امر امنه اكيد ان في شي قوي خلاها اتسوي جذيه
قربت مي من عمها خليفه ودقته
مي:عميه صليت الظهر
خليفه وهو يمسح ويهه:لا بقوم الحين زين يوم يتن انا بروح الشغل شويه وبرجع
روضه:الحين عميه الشغل؟
خليفه:باخذ اوراق نسيتهن البارحه اهناك وبرجع
قام خليفه وطلع وتمن البنات عند اليهال لين العصر رجعت اليازي وروضه وتمت مي عندهم لين الليل
وهذا حالهن كل يوم وحده اتم عندهم لين الليل
بعد يومين استقبل زايد صديقه منصور وسواله ميوب وحضر المايوب هذا نااس وايدين من كبار الشخصيات لان منصور ريال معروف وله ناااس من لكباريه
تم منصور وزايد يتكلمون على طرف في بعض المشاريع وعن الانتخابات وامور وايده لين تكلم منصور عقب عن موضوع اهو ياي عشانه
منصور:زايد الحين انته مطلق بنت عمك بس لان امها باكستانيه
تلاقت نظرات زايد بنظرات منصور وحط زايد فنيال القهوه وهو يحرك راسه بهزه بسيطه
منصور:وخلاص مطلقنها مالك رجعه الها
الموضوع ضايق زايد وااايد لاكنه حاول ايكون طبيعي وهو يرسل بنظره للحضور في الميلس
زايد:انا منتهي من الموضوع خلااص
منصور:اذا مالك رجعه الها يا زايد انا ترانيه اريد القرب وياي اخطبها منك انته شخصيا لانيه يا زايد اريد اناسبك
رجعت نظرات زايد لمنصوروهو يطالعه بعدم استيعاب للي يطلبه
ابتسم بعدها زايد:منصور تبا بنت الباكستانيه؟
منصور:امها ماتعيبها يكفينيه طاري انيه باخذ بنت حمد الـ......ّ
زايد وهو مش مصدق الي يسمعه ولا يريد ايصدقه:شف اذا كانت هذي حركه منك عشان تبين اليه انه عادي اخليها على ذمتيه ترا
منصور:لا والله انا اريدها ...انا اريد نسب عايلتكم
بدا التوتر يلف زايد وكل الكلام ضاع امنه مش عااارف شو يقول
منصور:اسمحليه انيه طلبتها الحين وهيه بعدها في العده بس انا ما اريد حد يسبقنيه الها وانته اكيد مابتردها مثل ماتقول هااه يا زايد شو قلت
وقف زايد:حياك يا منصور اقرب العشى حطوووه وعقب بنرمس في السالفه هذي
ومشى عنه زايد وهو خاااطره لو يعطيه ***س على ويهه كيييف يتجرا ويطلبها امنه كان مبتسم وجسمه لو حد ايدقه حس بالحراره الي بدت تطلع امنه من الغيض والقهر
زايد طول فترة العشى وهو يتحاشى يقعد قريب من منصور ويتمنى الوقت ايمر بسرعه عشان ايروح ويخلص من هالسالفه الي ماكانت في الحسباااان
لاكنه انقهر اكثر واكثر وهو يشوف منصور منفرد بخاله على طرف ويكلمه اكيييد نفس الموضوع هذا من وييين طالع له
قعد بدر عدال زايد وهو يحس انه مش طبيعي
بدر:زااايد زااايد
التفت زايد له
بدر:شو السالفه منصور شو يبا؟
زايد:تخيل ياي يخطب نووور منيه والحين اكيد قاعد ايكلم خاليه عنها اهو شعرفه ابها
همسله بدر:سمعت انه شافها في لندن
التفت زايد لبدر منصدم:شوووه؟
بدر:الله واعلم ربيعه محمد هذاك اليوم ايقول ان منصور حاسد زايد على حرمته وايقول انه شافها عندك في المستشفي
زايد:متى صااار هالكلاااام؟
بدر:ماندري يا زايد بس انا اشك لان نور مستحيل بتخلي حد ايشوفها
زايد:وياي حضرته اونه ايدور النسب بيبطي
بدر:ههه بلاااه منصور ريال والنعم على الاقل بتضمن لك بعد من صوبه اصواااات
وقف زايد:بيبطي والله انه يبطي
بعدها بنصف ساعه تم زايد يتلفت في الميلس ايدور خاله وماشافه وقام واستاذن منهم اشويه وعلى طووول راح للفله داخل وحصل خاله قاعد
زايد:خاااليه
ابو فهد:هلا يا ولديه هاااه خليت ضيفانك
زايد:انته يا خاليه شو يايبنك اهنيه
ابو فهد:انا ياي اسلم على نور
زايد:اتسلم عليها ولا ياي اتشاورها في منصور
ابو فهد:من حقها تدري
زايد:وانا ماليه راي
ابو فهد:انته مابتوقف في طريق بنت عمك ودام ان الريال شارنها شعنه بتعارض
زايد بتوتر:منصور ربيعيه وانا مابرضى له الي ما ارضابه على نفسيه
ابو فهد:هذا بس تفكيرك الريال ماعنده مانع فيها وقابلنها حتى لو كانت امها باكستانيه ويقول هذاالشي مافكر فيه ولا طرا على باله انه بيفكر يعيبها من امها وهو يا ولديه ايريد النسب ويقول كم يسوا طاري انيه ماخذ بنت حمد الـ....ّ
زايد:ما اعتقد ان نور بتوافق
نور من وراه:وليش ما اوافق؟
التفت زايد بسرعه وراه :انتي شو تسوييين اهنيه وليش قاعده تتسمعين
نور:كلامكم واضح وانا يايه لان عميه طالبنيه
زايد وهو متخربط على الاخر:سيري داخل الموضوع عدنا ما انتهينا من نقاشه عشان تين تتكلمين فيه
سلمت نور على عمها
ابو فهد اشار الها تقرب وتقعد عداله:تعالي يا نووور
زايد بعصبيه:وانا اقول انقلعي داخل
ابو فهد صرخ على زايد:زااايد حشم خااالك
زايد قرب من خاله وحبه على راسه وهمس له :بعدها في العده ومالكم حق تتكلمون في الموضوع هذا
ابو فهد:احنا نتشاور يا ولديه والريال مايتفوت
زايد:وشووو عايلنه؟
ابو فهد:مايريد حد يسبقه عليها
زايد بطنازه:لاااا ما احيد طابور واقف عند الباب
ابو فهد:ومنو قالك بنت حمد مطلوبه ووايدين الي رمسو فيها
زايد حس ان عيونه بتطلع من راسه:انته شتقول يا خاليه !!!!؟
ابو فهد:هيه نعم بنت حمد مطلوبه والبارحه كان عنديه ابو سالم وولده ياين يسالون اذا طلعت من العده ولا بعدها ويوم قلتلهم شو في خاطركم قالو نبا القرب
وامس متصله بنت خالة ام بدر بعد تسال عنها وتقول ان ولدها سعود يباها
وام فهد اتقول ان في حريم وايد يسالن عنها
حس زايد ان الدم بدا ايفور في راسه:وهذيلا شعرفهم ابها؟
التفت لنووور:وانتي كم واحد خليتيه ايشوفج عشان يخبل مايعرف راسه من ريوله
نور تمت اطالعه بنظرات منصدمه من كلامه
نور:شقصدك
زايد:شقصديه ...يعني معقوله منصور بيي من فرنسا عشان النسب بس هااه ولا عشانه شافج
نور:زايد احترم نفسك
زايد:اذا انا جدام عينيه شايف سعود هذا الرقله شايفنج بجذب ان الباقي بعد ماشافوووج
نور بغيض:انا ما اسمح لك...تفهم ما اسمح لك ....عميه اذا كنت ياي وتريد اتشاورنيه في الريال الي قال مايهمه ان اميه باكستانيه قله انيه موافقه
زايد:لااااا والله على كيفج اهو
نور:نعم على كيفيه وانته مالك كلمه عليه
زايد:نووور لا تتحدينيه انتي اصلا امرج في يديه ومحد له شووور فيج تسمعين
تركتهم نور وراحت داخل
زايدوهو يصارخ:تتحدينيه يابنت الباكستانيه تتحدينيه هين اشوووف منو كلامه الي بيمشي
وقف ابو فهد:يا ولديه هد عمرك لا تنسى انك مريض وبعدها عافيتك مارجعت لك
زايد:رحله الحين وقله ان ماعندنا بنات للعرس وياوييييله لو يشرف اهنيه مره ثانيه انا بعرف اتصرف معاه عقب
ابو فهد استغرب من عصبية زايد وخاف عليه لانه اول مره يشوفه جذيه طلع وقال لبدر ايروح له وبدر على طووول راحله ابو فهد ماحصل منصور وعقبها رجع لبيته اما بدر فتم ايهدي زايد الي تم ايصارخ ويتوعد ويهدد ويقول كلام ضايق نور الي كانت قاعده في المطبخ وتسمعه
هنيه وهيه تقرب من نور:ربنا ايهدي سره دا الصريخ مش كويس ليه ااه الدكتور النوبه الي فاتت قال بلاااش تخلووه يصرخ
تم بدر مع زايد ايهديه لين سكت وعطاه ابره مهديه لان ظهر زايد بدا ايعوره ومايدري من شووه في غرفة زايد
بدر:الله يهديك يا زايد مايسوا عليك كل هالصريخ والعصبيه اعصاب جسمك كلها انشدت وتاثر ظهرك منها انته لازم اتروح معايه باجر المستشفي الامريكي الي في دبي ايسولك فحص كامل
حط زايد ذراعه على ويهه وتم ساكت وهو يحس فعلا بالويع في ظهره
التفت بدر للكرسي الي في زاوية الغرفه وشاف فستان عشبي حس بقلبه ينقبض وهو يتاكد الحين ميه بالميه ان زايد ايحبها ويكابر بحبه
بدر:لا يهمك منصور يا زايد انا بعرف اصرفه
زايد:ايقولك خاليه ان ناس وايدين متكلمين عليها
بدر بابتسامه:يدورون قربك يا زاايد
زايد:وليش مايكونون شايفينها مثل ماتقول ان منصور شافها
بدر:يا زايد محد احتك بنور كثريه ولا تنسى انها يايه معايه من باكستان احلفلك بشوووه انيه عمريه ماشفتها وان شافها منصور اكيد انها صدفه
على طووول اتذكر زايد يوم تقوله نور ان ريال دخل وشافها
زايد:قالت اليه .....تذكرت مره قالت اليه ان في ريال دخل وشافها وانه دخل بدون استاذان...نفس اليوم الي زارنا فيه منصور في الليل بس ماياب طاري انه زارنيه الصبح
بدر:شفت ..الله براها...واكيد مارمس عشان ماتدري انه شافها
سحب زايد المخده وحطها على راسه وهو يحس بالرقاد يسحبه اثر الابره
زايد:اااه ...يا ويله الي بيفكر باجر ايقرب يخطبها.......نووور مش لاي حد....... نووور نور زاااايـ........ّ
ابتسم بدر وهو يسمع تنفس زايد الي شكله رقد
في اليوم الثاني كم اتصال يا زايد من منصور وكان يطنشه الي خلا منصور يعصب على الاخر ويحقد فعلا على زايد
بعد زايد كم مره طلب من هنيه اتروح اتنادي نور الي رفضت تطلع عنده وتم ايصارخ ويتوعدها
على الليل كان بدر منسدح يتكلم في التليفون ومبتسم مستمتع بسوالفها قرب مروان وقعد عداله التفت له بدر وهو يشير له خيير
مروان:اريد اكلم مي
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك