رواية ورود الامل برائحة الالم -45
فتح الباب أبو حمد وناظر الرجال الملتحي ومعاه شرطي:نعم؟؟
الشيخ طلع بطاقته:عندنا بلاغ بأن البيت فيه خـ....
قطع حكيه أبو فراس وهو يقول:جت!!
أبو حمد بغى يصفقه ،، الشيخ ناظرها:من اللي جت؟؟
أبو فراس:الموزه
الشيخ:آها الموزه_ناظر الجنود_فتشوا المكان
دخلوا الخيمه وشافوا أنواع الوسكي والمخدرات والريحه تصرع ،، قبضوا عليهم وهم يصرخون بحكي وقح وأبو فراس يضحك ،، أم صافي ولمياء ورزان طلعوا وهم يصرخون ويسحبون أبوهم ،، لكن الهيئه جروهم وركبوهم الدوريه وحركوا وأصوات الونانات سابقتهم
أم صافي جلست عالأرض وهي تبكي:هذي أخرة لعبك يابو صافي ياما قلت لك ونصحتك
لمياء مصدومه مو مصدقه إن أبوها بجبروته وقوته مقبوض عليه هو وأخوانه:...
رزان مو أحسن حال من أمها:ياربي شقول للبنات في المدرسه؟؟أقول بابا مقبوض عليه
صافي دفها بعنف:هذا اللي هامك
دخلوا لبيتهم وأم صافي تنحب على حظها ولمياء على طول طلعت لغرفتها وقفلت الباب حالها تبدل من بعد سالفة مهند وصارت هاديه وماتحاكي أحد إلا قليل
(.. وعمـــر النـــدم مـا ينفـــع الظالـــم ..)
الـبــــارت الـثــامــن عشــر
في هالبارت بينكشف أكبر سر من أسرار الروايه واللي أغلبكم يبغى يعرفه
**ســر بطلنــا زيــــــــد**
(.. ألا يآقلــب لا تحــزن تــرآ دنيــاگ مـآ تســوى .~
وألا يآعينــي لا تبگــي گفآيــه لوعــة الذگــرى .~
ويگفينــآ ألــم وجــروح وأحــزآن بهــآ نگــوى .~
نبــي ننســآگ يـآ الأحــزآن ونفرح فــي أمــل بگــرآ ..)
يـــوم جديـــد
العنـــود جالسه بصالة بيتها وعبايتها على كتفها تنتظر عصام متى يشرف ،، ناظرت ساعتها (أووف شيسوي هذا؟؟تأخرنا) ،، عصام نزل وهو يسرع بمشيته ويعدل شماغه ومرزامه:تأخرت؟؟
العنود ناظرته من فوق لتحت (شعنده كاشخ؟؟):تقريبا_وقفت_يلا تأخرنا
عصام:يلا
ركبوا السياره وحركوا لبيت أهل العنود ،، العنود ماقدرت تمسك نفسها:شعندك كاشخ؟؟
عصام ابتسم:بأقابل خويتي
العنود ناظرته بصدمه:...
عصام:ههههههه امزح
العنود ناظرت قدام:مزحك ثقيل
عصام:هههههه تغارين؟؟
العنود:بالله شرايك؟؟
عصام:خلاص ولا يهمك ، كاشخ طال عمرك عشان اليوم زواج صديقي المقرب بسام
العنود بتلقائيه ابتسمت:مبروك
عصام:الله يبارك فيك وأخيرا بيتزوج بعد ٣٢ سنه عنوسه
العنود:يه ليه طيب؟؟
عصام:يبغى يتهنى بحياته
العنود:هذا شلون يفكر؟؟إذا كان هو مايعيبه تأخر زواجه البنات شذنبهم؟؟
عصام ناظرها:شدخل البنات؟؟
العنود:إذا كل شاب فكر بمثل تفكيره ماراح يتزوجوا البنات وبينعنسون ويقولون ليه منتشره العنوسه؟؟لازم نعدد ،، هذا اللي تبغونه ،، زوجوا الشباب أول بعدين فكروا بالشياب
عصام هز راسه:صادقه_وقف السياره والتفت لها_وهذانا وصلنا
العنود ابتسمت:مشكور
عصام أشر باصبعه:كم مره أقولك لا تقولين مشكور أنا زوجك وما بينا شكر
العنود (مو المشكله إني مو حاسه إنك زوجي إلا إذا اجتمعنا عالفراش):..
نزلت وسكرت الباب وضربت الجرس:ترررن<<لا ياشيخه
زيد فتح الباب وابتسم:عنوود
العنود دخلت وفكت اللثمه:إيه عنوود_ناظرته_وأنت مرابط هنا!!
زيد دخل وهو يقول:ياشين اللي يغارون
العنود ابتسمت ودخلت وراه ،، سلمت على أمها وأبوها وتقهوا مع بعض وراحت سوالف وجت سوالف والسوالف ماتقضى ،، أبوالعنود وقف:يلا أنا استئذن بأروح أنام بكره عندي دوام من بدري
أم العنود وقفت:خذني معك
العنود غمزت:معلوم تموتين إذا كان في البيت وماجلستي معه
أبوالعنود:ههههه حاسدتنا!!
العنود ببراءه:لا أبدا الله يتمي عليكم
أم العنود:آمين ، تصبحون على خير وراحوا
العنود كانت تراقبهم وهم يطلعون الدرج وهم ماسكين إيدين بعض إلى أن اختفوا ، بعدها لفت لزيد وقالت:وأخيرا تفرغت لك_أشرت بإيدها_يلا احكي
زيد تنهد:شتبغيني أقول؟؟
العنود تنهدت وقلدته:شتبغيني أقول_ناظرته_قول كل شي
زيد ناظر قدام وقال بنبره حزينه:ولو إني كنت معاهد نفسي ما أحكي لأحد بس إبن أدم ضعيف قدام الفضفضه وراحة البال_ناظرها ولمعت عيونه_والحنان
العنود أشرت على عيونها:من عيوني بس أنت قول
زيد ناظر قدام وزفر:كنت طفل مثلي مثل باقي الأطفال دايم أجتمع مع عيال الجيران ونلعب مع بعض وكانت بنت جيرانا دايم تلعب معنا مع إنا كلنا أولاد إلا إنها كانت تفضل ألعاب الأولاد على ألعاب البنات وكانت تصرفاتها تعجبني وكنت أحبها من طفولتي وكل الناس تعرف عن حبي لها_ابتسم بحزن_حتى أمي أول ماجيت هنا سألتني عنها ، كبرنا وكبر حبنا وصار عشق وتوجناه بالزواج
العنود شهقت وحطت إيدها على فمها وصرخت:متـــزوج!!
زيد:أوضح أكثر تملكنا واحتفلنا وفرحوا لنا كل الأهل والعائله وقضينا ثلاث شهور من أسعد أيام حياتنا_نزل راسه وقال بأسى_لكن فجأه انقلبت حياتنا لتعاسه طلعوا لنا كبار القبيله وطالبونا إنا نتطلق بسبب عدم تفاوق النسب وإني ولد قبيله والعنود **** ((أنا أرفع من أذكر هالتفاهات بروايتي)) ومن هالحكي ورفعوا قضايا وخرابيط لكن ربك مايظلم أحد كسبنا القضيه صحيح العنود تضايقت وبدت تسبني وحطت اللوم علي لكن أخر شي اعتذرت مني وأنا قبلت إعتذارها عشان الحب اللي بينا ورجعت الطيور لأعشاشها ، وقبل زواجنا بيوم
أم زيد وخواته صرخوا:وااااااو
زيد يعدل الثوب:شوفتوا إني ماني هين
أثير دارت عليه:خقق عليك السكسوكه
زيد:أصلا كل شي علي يخقق
أم زيد تجمعت الدموع في عيونها:الله يوفقك ياوليدي
روابي أشرت بإيدها:لا لا لا وفري الدموع لبكره
زيد:اللاااااه بكره متى يجي؟؟
أثير جلسته:بالله زيود قلي وش شعورك؟؟
زيد:والله شعوري شعور أي مواطن سعودي زواجه بكره
الكل:هههههههه
زيد:بس بيني وبينكم خايف ومتوتر
أثير شهقت وقالت تخوفه:أجل إذا جيت معاها شبتسوي؟؟
زيد ضربها على خفيف:اخسي لاتخوفيني
أثير توها بتنطق قطع عليها صوت الجرس وهو يرن ،، أم زيد:من بيجينا هالوقت؟؟
زيد قوس شفته:مادري
أثير:تنتظر أحد؟؟
زيد:لا
فصخ البشت ونزل يفتح الباب وخواته واقفين عند باب المدخل يترقبون ،، فتح الباب وكانت العنود واقفه عنده ،، زيد دق قلبه بقوه ومايدري يفرح إنها جايه له أو يقلق لأنها جايه في مثل هالوقت ،، أخو العنود عمر:السلام عليكم
زيد:وعليكم السلام تفضلوا
دخلوا ووقفوا بالحديقه ،، زيد أشر بإيده:تفضلوا
عمر:لا إنا جايين نقول لك شي واحد بس ونطلع
زيد باهتمام وهو يناظر العنود:خير!!
عمر ناظر العنود:احكي
العنود سكتت فتره وقالت:طلقني
زيد انشل لسانه من الصدمه وعيونه اتسعت:...
عمر:أتوقع سمعت شقالت!!طلقها
زيد:....(يحس إنه بحلم)
عمر:طلقها يازيد وفكنا
زيد:أطلق!!أطلق مين؟؟
العنود:طلقني أنا
زيد صرخ:ليـــه؟؟
العنود باشمئزاز:ماابغاك عفتك يااخي طلقني
زيد مسكها مع كتفها وصوته صار يرجف من العصبيه:لعبه هي!!
العنود سحبت كتفها:يااخي ماابغاك غصب هو!!
زيد يحس كرامته في الحضيض وهو كل شي ولا الكرامه ماحس بنفسه إلا وهو يقول:انتي طالق (ثم) طالق (ثم) طالق
اخواته داخل شهقوا ،، زيد بعد مااستوعب إنه طلقها صرخ:براااا اطلعوا برا بــــــراااااااا
عمر والعنود طلعوا بسرعه وسكر الباب زيد بقوه وصدره يرتفع وينزل من الصدمه ،، خواته جوا يركضون:زيد شصايـ...
زيد قاطعهم وهو يصرخ:على #### ابعدوا عن وجهي
خواته يناظرونه بصدمه لأول مره في حياتهم يشوفون زيد معصب بهالشكل:!!!!!
زيد صرخ:مجنون أنا تناظرون كذا!!شتناظرون؟؟إيه أنا طلقت العنود ، طلقتها في ثانيتين_جلس على ركبه_طلقتها في ثانيتين وبدا ينحب
أم زيد جت تركض ومسكته وحضنته:بس خلاص زيود اهدى اهدى
زيد تمسك في بلوزتها وناظر في عيونها:يمه أنا طلقتها طلقت العنود خلاص طلقتها
أم زيد يتقطع قلبها عليه ،، زيد بدا يتمتم بحكي غير مفهوم واغمى عليه ،، خواته صرخوا:زيـــد
طاروا به للمستشفى وصار عنده إنهيار عصبي حاد))
زيد ودموعها مغطيه وجهه:طلقتها وأنا أحس كرامتي انهانت هي رجفتني برجلها وأنا أعز ماعلي كرامتي بعدها عشت بحزن كئيب وصرت إنسان هادي وصرت أسير قلمي أنا طلقت لكن مو أي طلاق أنا طلقتها بعد ماأهانتني وأعز ماعالإنسان كرامته فعلا أنا كنت مخدوع فيها ماكانت مستاهله أي تضيحه سويتها عشانها ولا الساعات اللي تمرمطت فيها بالمحاكم عشان أبقى بقربها_نزل راسه_أصعب شي عالإنسان هو شعور الخيانه خاصه من إنسان تحبه وبالعكس أنت راعي معروف عليه وهو قابل هالمعروف بالنكران
العنود تقطع قلبها عليه:طيب ليه؟؟معقوله كذا من دون سبب طلبت الطلاق!!
زيد ابتسم بإستهزاء:لا أمي لما اتصلت على أمها وسألتها قالت إن صديق عيالها تقدم لها وهو غني وبطران وعيالها اقنعوا أختهم وأغروها بالفلوس وهي لعبه تصدق كل اللي يقولونه
العنود بقهر:وقحه باعت عشرة عمر عشان الفلوس
زيد:للأسف إيه_ناظر العنود_بس أنا أحبها ياالعنود صحيح عقلي وكرامتي تحتقرها لكن هذا_أشر على قلبه_هذا شيفهمه؟؟
العنود:ماعليك أبشر باللي يزوجك من ينسيك أيامها
زيد بنص ابتسامه:لا خلاص أنا عفت الزواج
العنود:صدقني حكي بس بعدها بتجيني تقول زوجيني
زيد:...
العنود بتردد:طيب أهلك وينهم؟؟
زيد هنا انفجر بكي و صار يشهق ،، العنود انصدمت من ردة فعله لكنها تركته إلى إن هدا بعد ربع ساعه من البكي والنحيب المتواصل وقال بصوت مبحوح وبحرقه:أهلي!!أهلي ماتوا قدامي ياالعنود ، ماتوا كلهم قدام عيوني وسكت
العنود:كيف؟؟
زيد وهو يشهق بين فتره وفتره:لما كنا مره طالعين للإستراحه وبعد ماراحوا الضيوف قررنا نجلس للصباح ، أمي و خواتي قرروا يتسبحون بالمسبح اللي بالإستراحه بس أنا رفضت أتسبح ودخلت داخل وجلست كعادتي أدق عود وأنا أسمع أصوات الدي جي واصله عندي وأصوات ضحكاتهم فجأه اختفت أصواتهم و صوت الدي جي ركضت لهم وياليتني مارحت_غطى وجهه يبكي لفتره بعدها كمل وصوته خلاص راح_رحت وماشفت أهلي بالمسبح شفت جثث هامده طافحه عالمسبح ، شفت منظر تمنيت إني أموت مليون مره ولا أشوفه ، شفتهم ماتوا_شهق بالبكي_ماتوا كلهم بصعقه كهربائيه هنا ماقدر يكمل جلس على الأرض وانهار
العنود جلست بجنبه وحضنته وهي مو أحسن حال منه:بس يازيد الله يرحمهم كلنا بنموت وهم رجعوا لخالقهم
زيد بصوت يقطع القلب ومكتوم وهو على صدر العنود:أبغاهم ياالعنود أبغاهم لحظه وحده بس بأقولهم سامحوني وأبوس راس أمي_بعد عنها وناظرها وهو يأشر باصبعه_لحظه وحده بس أبوسهم وابتسم لهم_أشر على نفسه_أنا أحس بالذنب لأني مابريت بأمي بالعكس أنا كنت سبب حزنها لأن حالتي من بعد طلاقي من العنود كانت تقطع قلبها
العنود رجعته لصدرها وغمضت عيونها وعضت شفايفها وهي تسمع صوت عبرات زيد وأناته ،، شاب بأول عمره يتعرض لكل هالأحزان دفعه وحده كويس إنه مامات من الحزن:...
بعد فتره هدا زيد ومسحت العنود على شعره بحنان:بس خلاص إنا أهلك وأمك وخواتك ينتظرونك بالجنه إن شا الله
زيد:...(يسمع كلماتها)
العنود تكمل:والدنيا هذي رايحه وأهم شي أخرتك (وبشر الصابرين)
زيد وهو على صدرها:أبغى أنساهم ياالعنود_دخل راسه بصدرها_أبغى أنساهم كل اللي أنا فيه بسبب العنود حزني وحزن أمي وموتها وهي حزينه علي بسببها ، حسبي الله ونعم الوكيل
العنود:كيف تبغى تنساهم وأنت عايش بين ذكرياتهم؟؟بيع البيت وأحرق الصور وصدقني رح ترتاح ربك مايحرم شي إلا لفايده
زيد يفكر بحكيها:...
العنود:مستحيل إنك رح تنساهم للأبد لكن رح تخف هواجسك
زيد بعد عنها:والله صادقه من بكره أبيع البيت وأحرق الصور
العنود ابتسمت:إيه ،، كيف نبغى ننسى أحزانا وإنا غارقين نفسها بذكرياتها لا تقتل نفسك بهمومك خل الناس يشاركونك فيها عشان ماتموت من الحزن
زيد ابتسم:مشكوره ياالعنود وربي حكيك ريحني وكنت محتاج لهالحكي من زمان
العنود:لا شكر ولا شي أنا أختك إذا ماساعدتك من أساعد؟؟وأوعدك باللي يزوجك وحده تنسيك العنود وبزواج تحكي عنه السعوديه كلللها وأرقص بزواجك حافيه
زيد يناظر عيونها (ما ألوم الوليد لما تعلق بسحرك أسلوبك يريح ،، آخخ لو أنا مو أخوك كان تزوجتك):...
العنود استحت من نظرته ووقفت تصرف الموضوع:ياربي تأخر الوقت وأنا مارحت خلينا اتصل بعصام
زيد:على ايش مستعجله؟؟
العنود وهي تحط السماعه على أذنها:خلاص بكره وراك دوام ولازم تنام
زيد ابتسم:..
عصام من الطرف الثاني رد بصوت نعسان:توني باتصل عليك يلا اطلعي أنا عند الباب
العنود ضحكت:أوكي
عصام:بسرعه ترا يالله أناظر طريقي
سكرت منه ولبست عبايتها بسرعه:يلا عصام مستعجل_باست راسه_أشوفك على خير ونام هنا وبيتك لا تقبل جهته متى مافضيت مرني وأنا أجمع لك ملابسك
عصام ضرب بوري يستعجلها ،، لفت لثمتها بسرعه:يلا سلام ولا تنسى نام هنا وطلعت
زيد ابتسم ولف وناظر البيت بأكمله (خلاص هذا بيتي لازم أنسى أحزاني) طلع لغرفته اللي ياما قالت له أم العنود إنه يجي يعيش فيها وبدل وتمدد وناااام بسرعه من التعب
الصيـــن
بعد ماناموا شبه يوم كامل وتغدوا وتنظفوا وروقوا
الوليد جلس وحط الأوراق اللي بإيده عالطاوله:هذي عنوانين أشهر العيادات النفسيه بالصين وأرقامهم
عواد سحب ورقه وبدا يتصفحها:حلو خلينا نبدا بالأقرب
الوليد:إيه أنا طالب منه يرتبه بالأقرب
عواد توه بينطق لكن مهند سبقه وهو يوقف ويقول:لا تعبون نفسكم ودخل لغرفته
عواد والوليد ناظروا بعض وهم حزينين على صاحبهم ، عواد قال:ماعليك منه بيروح غصب لو أجره مع كشته
الوليد ابتسم وبدوا يتصفحون الأوراق ويشوفون وش أفضل؟؟وش أقدم؟؟عشان يعرضون مهند عليه
>>وكل هذا عشان حبيبهم مهند<<
النمســـا
الجو بارد والثلج ينزل لكن كل هذا ما منع عرسانا من الطلعه والتنزه
ســـاره واقفه قدام التسريحه تحط لها روج وهي لابسه البالطو الرمادي الطويل لنص ساقها بأطراف سودا على بوت جلدي أسود وقبوع رمادي ثقيل ولبست تحتها درزن بجايم عشان ماتبرد
دخلت الروج في الشنطه وطلعت وسكرت الباب وكان فارس جالس بالصاله ،، ناظرته بالجاكيت الأبيض الثقيل بينه أسمن على جنز رمادي باهت وقبوع أبيض وبان خصلات من شعره الطويل المموج باختصار طالع شكله خقه ،، فارس وقف وابتسم:جاهزه؟؟
ساره بادلته الإبتسامه:إيوه
فارس لف إيده على خصرها:يلا
نزلوا تحت وركبوا السياره مع السايق وحركوا ،، ساره كالعاده لازم تسأل هالسؤال قبل كل طلعه:وين بنروح؟؟
فارس:خليها مفاجأه هالمره
وقفت السياره وفتح لهم السايق الباب ،، ساره ناظرت الملاهي والألعاب الكبيره وصرخت:واااااو
فارس:هاه حلوه؟؟
ساره:مره جنان
فارس قرب منها:انتي الجنان والله
ساره حمرت خدودها وقالت تصرف:يلا نلعب
فارس ضحك على حياها:ههههه يلا
مسك إيدها وركبوا أول لعبه بجنب بعض وسكر فارس الحزام لساره وساره بتموت من الحيا لأن موقع الحزام استراتيجي
صفرت اللعبه بصوت مزعج خرع ساره اللي صرخت ومسكت فارس:يا مـــامـــا
فارس:هههههههه ياخوافه
بدت اللعبه وكانت مثل العجله تقريبا لكن مو عجلة السعوديه لا عجلة النمسا يعني موووت
كعاده تجري في دم كل فتيات العالم إذا ركبوا لعبه بدت ساره تصارخ وفارس ميت ضحك على شكلها ،، فجأه وقفت اللعبه في الهوا وصرخت ساره وحدها:يا مـــامـــا
لكن اللعبه غيرت اتجاهها للجهه الثانيه بسرعه مذهله وساره بس تصرخ من الخوف وفارس ميت ضحك عليها ،، وقفت اللعبه وبسرعه ساره فكت حزامها وأخذت شنطتها ونزلت بسرعه وفارس جالس بمكانه فاقع ضحك عليها أخر شي فك حزامه ونزل وطيران للحمام من كثر الضحك وساره واقفه تنتظره برا
فارس طلع وهو منزل راسه يسكر سحابه وأول مارفعه وشاف ساره رجع يضحك:ما اتوقعتك خوافه لهدرجه ههههههه
ساره عدلت قبعتها وقالت بغرور:أصلا أنا ماخفت لكن حلاة اللعبه بالصراخ
فارس:نجربها مره ثانيه؟؟
ساره بروعه فتحت عيونها:لا
فارس:ههههههه
ساره:نشف ريقي من الصراخ
فارس مشى معها:أوكي فيه كوفي داخل شرايك نروح؟؟
ساره:اللي يريحك
فارس:راحتي براحتك
ساره:أجل نروح للكوفي
فارس:يلا
فارس ماكان يدلع ساره كثير لأنه إذا دلعها تستحي وتسكت لأن ما صار هذاك الشي اللي يكسر الخجل بينهم
نرجع للرياض عاصمتنا الحبيبه
في إحدى سجون الرياض
أبو صافي هز الحاجز الحديدي وهو يصرخ:طلعووووني يا ####
أبو فراس وهو متمدد عالأرض:تراك أزعجتنا يااخوي اسكت خلنا نام من جينا ما نمنا
أبو صافي التفت له:نامت عليك طوفه إن شا الله أنا أبغى أطلع هذا مو مكاني
سجين ثاني في زنزانه بجنبهم:يا#### أسكت لأجي أحوسك
أبو صافي وهو يحاول يناظره:على #### تعال كان فيك خير
السجين طق بلسانه:أمحق رجال يتحدون من ورا جدران
أبو حمد مستند عالجدار وهو مو طايق نفسه من المكان اللي جالس فيه:مو طلعينك لو بيطلعونك طلعوك من زمان
أبو صافي يأس إنهم يردون عليه جلس:أنا مستحيل أجلس بهالمكان
الجندي جا:راشد المحموقي زياره
أبو صافي جا بسرعه:أنا راشد أنا
الجندي فتح له الباب وطلع معه وكانت اللي جايه زياره لمياء ، ركض لها بسرعه:لمياء طلعوني من هنا بأنجن لو قعدت يوم زياده
لمياء ناظرته (معقوله ماتأثر!!معقوله ماأثر فيه السجن ولا فكر في فعايله وعقاب الأخره اللي أشد من عقاب الدنيا!!):...
أبو صافي مسكها:لمياء شفيك تناظريني كذا؟؟أبغى محامي
لمياء همست:محامي!!يعني المحامي بيفيد؟؟
أبو صافي:إيه أبغى محامي شاطر
لمياء:ماراح يفيد المحامي هم قبضوا عليك وأنت متلبس
أبو صافي:ماابغى أبغى أطلع من هنا
لمياء:بابا ماما منهاره وبس تبكي ومقفله عليها الغرفه
أبو صافي:...
لمياء:وأنا وخواتي شلون بنقابل الناس وأبونا مسجون؟؟ومن بيرضى فينا؟؟وصافي من بترضى فيه؟؟وكيف يكمل حياته؟؟يروح للحرام!!
أبو صافي صرخ:أوووف انتي جايه تهونين وإلا تنكدين علي
لمياء:أنا جايه أقولك الحقيقه وأبينها لك أنت دمرت حياتك وحياة أولادك_بغصه_وحياة ولد أخوك اللي أمنك أخوك عليه ، كل اللي صار لك ما أثر فيك؟؟
أبو صافي وقف وأشر بإيده:بأطلع من هنا وبأرجع أخذ فلوسي وحلالي وبأرجع للشراب والبنات بعد ومحد راح يمنعني ورجع لزنزانته
لمياء غطت وجهها تبكي خايفه على أبوها وهو ماعنده ولا هامه
الـبـــارت الـتـــاســـع عشـــر
الشرقيـــه
يـــاسر جالس في صالة شقته يفكر
>>اللي سويته صح؟؟ياترى تصرفي كان سليم لما بلغت عنهم!!<<
>>إيه أكيد سليم هذولا ينشرون الفساد وأنا حاولت أنصحهم بس مافاد<<
>>طيب شذنب بناتهم وأولادهم وزوجاتهم؟؟<<
>>إيه صح شذنبهم؟؟بس لازم يلاقون جزائهم<<
>>وعيالهم؟؟تشردوا بدون ذنب<<
>>إيه صح<<
>>أجل لازم تكون لهم أب بدل أبوهم هذا واجب عليك<<
>>إيه صح لازم أرجع وأكون مكان أبوهم وماأقصر عليهم<<
قطع عليه حبل أفكاره رنين جواله بنغمة نوكيا ،، ناظر الشاشه
أمي
يتصل بك
سحب نفس ورد:هلا
أم ياسر تبكي:ياسر ياولدي وينك؟؟حرام اللي تسويه فيني والله حرام
ياسر تقطع قلبه على أمه:خلاص يمه لاتبكين أنا جاي اليوم
أم ياسر ابتسمت من بين دموعها:جد!!
ياسر:إن شا الله
أم ياسر:الله يهديك ياوليدي والله إن ما هان علي إنك بعيد عني لوحدك وما عندك أحد لو يونسك ويوسع صدرك وبدت تبكي
ياسر:يمه ليه الدموع طيب أبي أفهم؟؟خلاص قلنا بنجي
أم ياسر مسحت دموعها:طيب لاتطول علينا ولهنا عليك
ياسر:وأنا أكثر
هنا أم ياسر انفجرت بكي:..
ياسر بطفش:يمه
أم ياسر من بين عبراتها:تذكر أخر مره كنت مسافر لجده الأسبوع اللي راح ، تذكر لما حاكيتك بالجوال شقلت؟؟
ياسر تذكر لما سكر السماعه بوجهها وهو سكران:...
أم ياسر:تذكر؟؟
ياسر نزل راسه:إيه أذكر يمه
أم ياسر:هذا اللي يبيكني
ياسر بندم:لا يمه خلاص ولدك ياسر بيرجع لك ياسر جديد
أم ياسر:الله يهديك ياولدي ويثبتك
ياسر:آمين
أم ياسر:يلا ننتظرك
ياسر:مع السلامه
أم ياسر:مع السلامه
سكر منها وراح يجهز شنطته لأنه بيحرك من ألحين لأنه ولهااااان على أهله
الريـــاض
العنـــود تحاكي أمها بالتلفون:وهذي كل القصه
أم العنود تمسح دموعها اللي نزلت بعد ماسمعت قصة زيد:يعني زيد ولدي مطلق؟؟
العنود:إيه ولازم نخطب له
أم العنود:إيه والله صادقه بس من برايك؟؟
العنود:أنا أعرف وحده معي أيام الجامعه ما شا الله دين وأدب وأخلاق وجمال ورشاقه يعني كامله والكامل الله
أم العنود:يعني بتنسيه العنود؟؟
العنود تذكرت الوليد وقالت بحزن:ماما اللي يحب عمره ما ينسى
أم العنود عرفت إنها تقصد الوليد ،، قالت تغير الموضوع:طيب شسمها؟؟
العنود:رنا الفواح
أم العنود:الفواح ماعليهم عايله معروفه
العنود:بس أنا مادري إذا كانت تزوجت أو لا؟؟لكن بأتصل بعبور وأسألها علاقتها معها أقوى وللحين مستمره
أم العنود ابتسمت:ياحليلها عبير ما بقي أحد ما صادقته
العنود:إيه ما شا الله عليها تنحب
أم العنود:أوكي أجل اتصلي فيها واسأليها وجيبي رقم بيتها
العنود:إن شا الله مع السلامه
أم العنود:مع السلامه
العنود سكرت السماعه من هنا واتصلت بعبير من هنا ((حريم خخ))
عبير ردت ببشاشه:هلا هلا حيا الله اللي تخرجوا وقطعوا
العنود:يا التسذوب (الكذابه) توني محاكيتك أمس
عبير:يااختي ما تعرفين تسلكين سلكي أنا ماصدقت يطلع معي سجع
العنود:هههههههههه
عبير:آها انهجي ((اخلصي لغير الناطقين بالسعوديه)) شعندك؟؟
العنود:أمس قالي زيد قصته
عبير شهقت:شقال؟؟أحكي
العنود:يوووه توني حاكيتها لماما ماأبغى أعيد
عبير:أقول بتحكين وانتي ماتناظرين الطريق
العنود:أوكي
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك