رواية نور -40
ام فهد طلعت برا وهيه ترحب:يامرحبا يامرحبا اسفرت وانورت حيالله بحرمة الغالي وعيال الغالي يا مرحبااابكم
استااانست نوره على الترحيب ودخلت داخل وخليفه واقف ايراقبهم لين اختفو طبعا الشباب كانو معاه والريايل كانو بانيين الهم خيمه قريبه من البيت اتوجه الها خليفه وين حشرة الشباب والرزيف
بعد ما دخلت نوره للحوش وسلمت على ام بدر وقفت على طرف وخلعت العباه الغليضه وطوتها والتفتت لام فهد
ام فهد وام بدر:ماشالله ماشالله تبارك الرحمن
ابتسمت نوره ومشت معاهن باتجاه الحضور
كانت مي واقفه ومبهوره بالبنت الي مع امها وام بدر قربت منهم وهمست لامها
مي:اميه منيه هذي
ام فهد:هذي حرمة عمج خليفه
مي:هاااه عيل منيه هذييج
نحزت ام فهد مي وهيه تقرصها وتسحبها صوبها:انجبي هذيج حرمته الثانيه هذي بنت خالة عيال اووه
مي:اوف اتجنن ماجذبت يزوووي بروح اقول الها
قربت ام بدر نوره لوحده من الطاولات ونادت لمقهويه اتقهويها وكانت اهناك عيوووون اتمنت تنشق الارض ولا اتشوف الي تشوفه
مسكت اميره يد موزه بقو وهوست قو
موزه:اااي فارقتج يديه
اميره:قهر والله انه قهر هذي شو يايبنها زييين زييين يا خليفه سويتها
ام اميره:تعوذي من ابليس ولا تفضحينا
اميره:شووو افضحج انا بموووووت خلاااص ما استحمل والله
موزه:اخخخخخ وهذي اهيه يوييييل حالك يا ولد خالتيه جدامه هالشمس وماتبونه يغلط الا انا متاكده ان علومه ضايعه ضايعه
اميره:يا حيوانه انكتمي انتي قاعده تقهرينيه
موزه:ابا اعرف انتي ليش دازه بويهج في السالفه وانتي ماتحبينه بس اتحاولين تخدعين نفسج انج احسن منها لا والله فرق بين السما والارض
اميره:حقييييره دواج في البيت هب اهنيه
ام اميره:مويز انتي ماتعرفين اتلمين ثمج فضحتينا
موزه بنظرات حقد لاختها الي دائمن امها اتفضلها عليها:والله انا اقول الصدق ماتبنيه ارمس بسكت امري لله المهم ادحب بطنيه من هالعيشه قبل لا تقولن ياله نرجع خسرنا المعركه
اميره:انجبي
موزه:انزين اختيه اخر ملاحضه هدي شويه الدخان طالع منج والعالم بدت اتشم الريحه
اميره:مرض
وقامت:انا بروح اعدل مكياجيه
موزه:خخخخخخخخخخ اتريد تتاكد من نفسها
اميره:ليتج الا ماييتي
موزه:ليتنيه الا مانولدت
الامر عادي عند موزه الي بدت تاكل من المقبلات متجاهله نظرات امها الي خطر عليها تعطيها كف
كل الي كانن حاضرات اعجبن بنوره وبدا السؤال عنها والتفت حوليها بعض الحريم ياخذن ويعطن معاها بالكلام
بعد ما خلص العشا طلعو روضه ومشوها اشوي بين الحضور ورجعوها داخل للميلس
اليازي نزلت تحت وراحت للمطبخ وحصلته خالي قعدت على الكرسي وطلبت من الخدامه تييب الها سلطة فروووت محد في المطبخ غيرها من الباب الخلفي طل فهد ودخل والتفتت له وتلاقت عيونهم الا انه تجاهلها وراح لين الباب اينادي الخدامه فجئه دخلت شلة بنات وصرخن اول ماشافنه منحرجات وطلعن بسرعه
ماحست اليازي بريلها الثانيه وهيه تهزها بتوتر بعد مالتفت فهد راجع وهو مبتسم والله الاستاذ مستانس شكله يوم شاف البنات اصلا اهو ليش يسمح لنفسه يدخل البيت وهو يدري ان في بنات
بعد ما طلع دخلن مره ثانيه وضاربنهن فضول يعرفنه
وحده من البنات:اليااازي شحالج ليش قاعده اهنيه ماطلعتي برا
بضيقة خاطر:مرتاحه اهنيه
البنت:اااه عشان ريلج ان شالله تقومين بالسلامه
اليازي بدون نفس:ان شالله
البنت:الا اقول اليازي منووو هذا الي كان اهنيه
اليازي:وانتن ليش تسالن عنه
البنت باحراج:هااه لا بس يعني فضيحه شافنا واحنا بدون عبايا
التفتت الهن وحطت عيونها في عيونهن:هذا ولد عميه زوووووجيه ارتحتن
وقامت ماسكه عكازتها وطلعت من المطبخ متوجهه لقسم يدتها اما البنات انحرجن بجد بعد ماعرفن انه زوجها
في قسم اليده حصلت اليازي نور ونوره والبنات الصغار بنات عمها واستانست ابهن
اليازي:فديييتكن انتن اهنيه
في الميلس وبعد ماطلعن صديقات روضه دخلت عليها امها
ام فهد:هااه وين رايحه
روضه:بروح قسم يدوه بشوف حرمة عميه خليفه البنات ينن عليها
ام فهد:تعالي اهنيه ام بدر راحت تتصل على ولدها عشان يدخل ايشوفج
روضه منصدمه:هاااه ايشوفنيه لاااا لا لا ليش ايشوفنيه اهو قد شافنيه خلاااص
ام فهد:شبلااااج تراج حرمته والريال ماعليه ان شافج مره ثانيه
روضه:لا اميه فديتج كيييف ايشوفنيه وانا جذيه لا لا انا ما اريده ايشوفنيه
من جهه ثانيه كانت ام بدر تحاول في بدر يدخل وهو واقف معاها عند باب الحوش
بدر:لحووووه يا اميه قلتلج انا مابدخل ليش اتسوين جذيه
ام بدر:يا ولديه شبلاااك اباك اتشوف حلالك والله انها اليوم اتجنن عنبوووه العالم كلها شافتها وانته مالك نصيب اتشوفها
بدر:بس انا يا اميه متفق معاج من البدايه انيه مابدخل يمكن هلها مايوز الهم
ام بدر:لا عادي كلهم قالو عادي
بدر وهو مش عارف شو يسوي كيف يدخل ايشوفها وبعده مش عارف اهيه حرمته ولا لا والله انها بلشه
بدر:اسف يا اميه
عصبت ام بدر:والله ان مادخلت انيه ما اكون راضيه عليك الييوم
في الميلس دخلت ام بدر اتشوف الطريق جدام ولدها
ام بدر:هااه ترا بدر بيدخل
روضه:عمتيه لالا فديتج
والتفتت لامها:اميه اريد عباه فستانيه عريااان الله ايخليج اريد عباه
ابتسمت ام بدر:ماعليييج تراج حلاااله اقرب فديتك محد جدامك الا حرمتك وعمتك
دخل بدر وهو متوتر ونزلت روضه راسها تحت وانتبهت انها نست انها عقت نعولها قبل اشوي يوم كانن البنات عندها ...الله يغربلهن نعول وين راحن
تقدم بدر وقلبه يرقع وسلم على عمته الي باركت له وعيونه رافضه تلتفت الها قربت امه منهم
ام بدر:هاه يابدر شرايك في عروسك
غصبا عنه التفت الها وياليته ما التفت اسرته وماقدر ايرد نظره عنها
دقت ام بدر ام فهد وانسحبن من الميلس
كانت واقفه على يمينه واول ماحس بامه وعمته طلعن التفت على يساره لاكنه دار دوره كامله ودار من وراها وهو يشوفها شعرها قصير واصل تحت اكتافها وملولو من تحت فستانها عسلي ومطرز بذهبي عريان من فوق بدون ايدين وكانت حاطه شال من التور الي والله انه ماستر شي
قرب منها وهو يتفحصها تمت اهيه منزله راسها تحت ياترا انا شو وضعيه معاك يابدر
وحست بشي خفيف ينسحب منها الشال شكله واقف وراها وقاعد يسحبه روحها طلعت مع سحبة الشال وسحبت نفس بصعوبه وهيه تحس انها بدون الشال...الوقح شو قاعد ايسوي
حط ايديه على اكتافها وانتفضت
قرب منها وهمس الها:هاااه اهدي ماصار شي
تم ايحرك ايديه على اكتافها العريانه
بدر:هذا واحنا ماندري بوضعنا لابسه جذيه
روضه:ارجوووك لا تقول جذيه انته قلت مابتدخل
بدر:وتلبسين جذيه
روضه:انا هذا ستايليه
لفها ناحيته وذاب على الغمازيه الي كانت واضحه
بدر:وكيف بيكون ستايلج يوم بنكون مع بعض
تمت ترتجف:شوو شووو قصدك
بدر وهو يلمها لحضنه ويرفعها:قصدي واااضح
تفاجئت روضه بقبلته الي خلتها ترتفع عن الارض وتلامس اطراف اصابعها الارض
بعد ماتركها حطت ايديها على ويههها وركضت ناحية الباب ولحقها مانعنها
بدر:تعالي اهنيه وين رايحه
روضه:انته شووو سويييت
بدر:انا اسف ماكان قصدي انا انا
احتااار ومسكها من اكتافها بقو:اسمعينيه انا الي قلتيه ما اعرف شو الحكم فيه بس اريدج تعرفين انيه مابطلق لو تنطبق الارض على السما مابطلق والاخ الي تفكرين فيه احذرج حتى من التفكير فيه انتي صرتي ملكيه وقريب بيصير العرس رضيتي او مارضيتي
تركها وطلع بسرعه وهو مستقرب من قراره الي اتخذه بدون تفكير على اقرب كرسي قعدت وهيه تنتفض
اما اهو دخل عند الشباب الي باقييين وشاف مروان فاتح له عيونه وانتبه لثوبه جدام لطعة رووج مسك طرف سفرته على اللطعه وقام متوجه للمغاسل لحقه مروان اهناك
مروان:يخرب بيتك هذي النتفه سوتبك جذيه
ابتسم بدر وهو يتراجع عن غسل الروج
بدر:بروح ابدل احسن
طلع عنه وتم مروان واقف وراح عقله عند مي
##
##
##
وديمه العطا
"نــــــــــــــــور"
خليفه العمر 28سنه
زايد وبدر العمر27سنه
مروان العمر26سنه
فهد العمر23
نور22سنه
نوره20سنه
روضه19سنه
اليازي 18سنه
مي 15سنه
الجزء الواحد والثلاثون
في بيت اميره كانت اتحس بنااااار مولعه فيها تمت رايحه راده وموزه اختها قاعده اطالعها
موزه:انتي شبلاااج ما خليتينا انكمل السهره ونشوف العرب
اميره:انتي جب انا اليوم بذبحج
مدت موزه رقبتها:حيااااااج رقبتي
اميره:قهر قهر والله انه قهر
تفرك ايديها بقوي
اميره:مويز ابويه وين؟
موزه:اتقول اميه بيبات في عزبته
اميره وفكره شيطانيه اتسيطر عليها:زين زين ....امسكي
موزه:شووو هذا؟
اميره:اتصلي على خليفه وقوليله تعال بسرعه اميره تعبانه بتمووووت
موزه:انتي متفيقه شو تبين بالريال خليه في حاله الي يشوفج ايقول ميته عليه
اميره:اموووت عليه بيبطي انا الي قاهرنيه كيف من بعد ماكان ايلاحقنيه وميت عليه اتي هذي وتجلب حاله ...ماهمنيه اهو وعلى الاقل اهو مضمون الخير عنده وايد وين بحصل انا واحد عنده خير مثله ولد اخته ورافع خشمه ابو الباكستانيات
موزه:بنت عمه
اميره:ياله عااااده قال بنت عمه امها باكستانيه ماله مفر من هالحقيقه
موزه:والي امها باكستانيه مالها رب ترا ريلج عمها
اميره:تعمعمت في خصف تهبي ايكون عمها.....اووووف انتي الكلام معاج ضايع اسمعينيه زين يامويز احسلج اتصلي على خليفه وقوليله كل الي بقوله لج
وقفت موزه:ااااااااسفه طالعيلج غيريه يتنيذل معااااج
اميره بابتسامه خبيثه:كييييفج ماتبيييين بقول لاميه عن سيراتج بيت جيراننا وعن باكيتاات الباتشي الي كل يوم تيبينهن
موزه:وشوفيهن باكيتات الباتشي
اميره:لااااا شو فيهن منو الي بيخسر عمره كل يوم سلة باتشي الا واحد مغرم ومتيم
موزه انصعقت منها:انتي شو تقولييين الباتشي هدى الي تطلبه كل يوووم
اميره:واللـــــــــــــه هدى قال من حبها فيييج يعني ياماما السالفه واضحه
موزه:انتي وحده منحطه وتفكيرها مثل ويهها انا اروح اهناك عشان الدراسه
اميره بكيفج وانا حره اقول الي اقوله وعاده اميه عشان تقطع الشك باليقين بتمنعج من السيرات اهناك ويا حراااام العاشق بينتحر ان ماشافج مره ثانيه
موزه عصبت وكانت ناويه اتخليها لاكن اميره تمت تستفزها لين مارضخت ومسكت التيلفون مكرهه واتصلت على خليفه
خليفه:هلا اميره
موزه:انا مش اميره انا موزه
خليفه:هلا موزه في شي
موزه:خليفه مادري شو اقولك اميره تعباااانه وايد ومن رجعنا من الحفله وهيه كله اتصيييح واحسبها بتموت من بين ايديه واميه راحت بيت خالها وابويه في العزبه واناما اعرف شو اسويبها وكله قاعده اتناديك
خليفه:لييييش شو صاااار
موزه وهيه كارهه نفسها:والله حرمتك الثانيه ماقصرت فيها بنظرات التحدي كل اشوي التفتت الها وعطتها نظرة تحدي وانها احسن منها ميت مره
ضاق صدر خليفه من الي يسمعه
خليفه:وين اميره اعطينيه اياها
موزه:اقولك تعبانه وماتتكلم وكله اتصيييح
خليفه:زين زين انا ياي الحين
ركب خليفه سيارته وهو متضايق شووو صار وشو هالحاله معقوله نوره الي قاعده اتسويه
في بيت خالته حصل اميره شبه منهاره عقت نفسها فيي حضنه وتمت اتصيييح
اميره:خلييييييييييفه انا بموووووووووووت حرام عليك الي تسويييييييه فييييييه
خليفه وقلبه عوره عليها:اميره حياتي شو صاااار
اميره:انا خلااااااص ما اقدر اتحمل اكثر من جذييييييه قهرتنيه ياخليفه قهرتنيه ليش ماقلتليه انها بتروح الحفله جان انا ماحضرت ولا تعرضت لنظراتها الي فضحتنيه ابهن جدام الكل
خليفه:اميره انتي ليش مكبره الموضوع على اي اساس بتقهرج
اميره:مادري مادري بس اهيه تعرف وضعنا وقاعده تقهرنيه...انا يا خليفه خلاااص ماعدت اتحمل وييين حبنا الاولي وييين خليفه الي كان دوووم عندنا في البيت وين خليفه الي دوووم الاقيه واقف اليه جدام الجامعه هذاك يوم كنا مخطوبين والحين يوم صرت حلالك ماتعطينيه ويه ولا تفتكر فيه خليفه انا احبك احبك نسييييت يا خليفه نسيييت انا شو ذنبيه اتسوي فيه كل هذا بس لانيه رفضت اضم عيال اخوك لاتلومنيه انا كنت متروعه ياخذونك عنيه وهم صدق خذوك عنيه وخالتهم سحرتك
خليفه حس بتانيب الضمير:يا اميره انا شو فيه قصرت هذا احنا ملجنا وقريب بنتزوج والحال الي كنا فيه بسبب انشغاليه بزايد انا يا اميره صدق غلطت معاها لاكن خلاص الغلطه مابتتكرر اوعدج مابتتكرر وانا وهيه مابينا الا مصلحة العيال
اميره:ليش عيل مخلنها تحضر الحفله وليش كانو مهتمين ابها اكثر منيه مش انا حرمتك واهيه حرمه بس على الورق
خليفه:عاده انا ماليه خص بمعاملتهم الها
اميره:انا تعباااانه تعبااانه يا خليفه قاعده اتعذب كل يووووم متى بتحس ابيه
خليفه:شو تبينيه اسوي يعني
اميره:طلقها طلقها وريحنيه
خليفه:انا وعدتج انتي ليش خايفه انسي انها على ذمتيه
اميره وهيه اتصيييح اكثر:ماااااقدر والله ما اقدر..لييييتك تحس بالنااار الي في قلبيه
خليفه:سلامة قلبج
ضمها لصدره ايهديها من كثر ماكانت اتصيييح وتشاااهق
خليفه:خلاااص ياماما قلبج بيطلع اهدي اشويه وانا اوعدج ان كل الي تخافين امنه مابيصير امنه شي وقريب بيخلص القسم الخارجي وبطلقها
خليفه ماكان ايحس بالي يقوله المهم عنده انها تسكت وكان تانيييبه لضميره ايزيد وايزييد...صعب على اميره تتقبل وضعه عقب ماكانت اهيه كل شي في حياته فجئه ايوقف ويطالع وحده ثانيه
اميره:انا ماسويت الها شي ليييش كانت تقهرنيه بنظراتها ...ليش اتريد اتحسسنيه انك صرت ملكها...لو اهيه تعرف معنى الحب ماسوت جذيه ابيه..ماتدري اننا احنا مش من تو نعرف بعض احنا من زمان ياخليفه وحياتنا مرتبطه ببعض
عمريه ماتخيلت انيه اكون لانسان غيرك او في انسان يتجرا ايفكر فيه وانا لك انا هذا الشي زارعتنه في راسيه من زمان اننا احنا لبعض وبس ما كنت احس انيه كنت اتغلا عليك ماخطر في باليه ان في وحده في يوم بتاخذك عنيه لو كنت ادري جان عمريه ماقلتلك في يوم لاا
وتمت اتصييييح وخليفه قلبه معورنه عليها
موزه كانت في الممر وكارهه صوت اميره وهيه تدريبها انها ممثله محد يقدر الها عشان جذيه اظطرت ترضخ لطلباتها دام ان السالفه فيها عرض مايندرابها باجر اتلفق الها مصيبه مع ولد الجيران
خليفه:خلاااص يا اميره ارجووووج خليج واثقه فيه
اميره:انا واثقه فيك بس خايفه منها خايفه تجرك مثل ماجرتك المره الي فاتت
خليفه:وانا وعدتج والوعد مش هيين
..................................................
عند باب قسم الجده والمعازيم كلهم راحو ومابقى الانوره وعيال اختها قاعدين مع نور واليازي وروضه والجده ومي الي استانست على عيال عمها وتمت طول الوقت منشغله معاهم وتييب الهم كل شي يبونه
زايد وهو واقف عند الباب من برا:هووووود حد اهنيييه
ركضت مي ليين الباب وطلعتله وبعد ماسلمت عليه
مي:ا ا ا البنات اهنيه مجتمعات وحرمة عميه خليفه
التفت الها زايد:اي حرمه فيهن؟
مي:خالة عيال عميه
زايد:هييه يدتيه وين؟
مي:بناديها لك
زايد:قوليلها ارقبها في الصاله
وراح للصاله وتم يرقب يدته
اول ماسمعن البنات صوت زايد التفتن لنور الي ابتسمت والتفتت لفطامي تلاعبها
طلعت الجده عنده وقام وسلم عليها وقربها تقعد عداله
الجده:حياله الي مانشوووفه هاااه وييين قاطع
زايد:والله يا يدتيه طلعت عنديه اشغال كثر راسيه وماعنديه فرصه حتى ارتاح
الجده:هيييييه الله يعينك الله يعيينك واخبارك بعد
زايد:الحمدلله مانشكي باس
الجده:وعلومك من العمليه وريلك ربك ماتشتكي منهن
زايد:لا الحمدلله مررره مافيه شي
الجده:الحمدلله الحمدلله الي شفنا فيهها عينك ولا انته قد رحت فيها الحمدلله هذا بفضل الله ودعا الي يحبونك
زايد:الحمدلله
الجده:عاده يا ولديه لا تجهد عمرك وايد في الشغل ترا الانسان ماتدومله الاصحته وانته الحين عدك مرييض
زايد:انا بخيير يا يدوه واحسن من قبل لاتحاتينيه
الجده:الله يعطيك الصحه يا ولديه
زايد:انتي علومج يا يدوه وعلوم العرب الي عندج
الجده:الحمدلله الحمدلله احنا بخييير ومانشكي باااس
زايد وهو سرحان"شو سالفتج يا يدووه مايبتي طاريتها عنبوووه الكل صاخ ماياب اليه سيره عنها ولا موضوعنا ولا شووو وضعها حتى خليفه وخاليه وحتى هنيه ابد ما طرتها شو السالفه توقعت يعني بنرقع على راسيه اول ما احضر عندج يا يدوه وبتقولين اليه وين مهمل حرمتك لاكن كلش حتى طاريها مايبتيه
وقف زايد:انزيين يدووه اتوصين بشي
الجده وهيه توقف:سلااامتك يا ولديه ما وصيك على نفسك وصحتك
زايد:ياله تصبحين على خييير
حبها على راسهاوالتفت عنها ومشى
الجده:زاااايد
التفت الها بسرعه اكيد بتقول شي
زايد:لبيييه
الجده:ان شفت خليفه خالك خله ايينيه
اتقرب منها خطوه:ليييش شي صاير؟
الجده:لااا ماشي صاير حرمته وعيال اخوه اهنيه والبنات ملتمات خله ايي ويكمل السهره عندنا
زايد:اااه يعني الي داخل كلهن حلااال عليهن من قده الخال ان شالله
رجع وحبها مره ثانيه على راسها وطلع ايحس انه منحرق من داخل
بعد نصف ساعه دخل خليفه عليهن وبعده متضايق من موضوع اميره
روضه من بعد مابدلت:هلا هلا هلا بالعم هلا بالي داسييين عنا الزين كله
خليفه بابتسامه:هاااه العروس مبرووووك
استحت روضه:الله يبارك لك
سلم خليفه على الباقي كلهم وعلى حرمة ابوووه
الي رقعته على راسه
خليفه:اااي عمتيه شبلاااج
الجده:تعااال اهنيه اقعد عدال حرمتك
قعد خليفه عدال نوره بدون مايلتفت الها
الجده:يالخماااام وين داس حرمتك عنا متروع عليها ناكلها
ابتسم خليفه شكلها حتى هم اثرت فيهم يا حليييلج يا اميره اظنيه مادرو بج
الجده ورقعته مره ثانيه
خليفه:ااااي
ضحكت نوره بصوت عالي مش متخيله وضع خليفه مع حرمة ابوه جذيه الضحكه هذي الي دوووم تذبحه
الجده:مسيود الويه اتقول مالج عليها بس عشان لعيال وماسويتلها حفله ولاشي ومن ورانا تدخل عليها
عض خليفه على طرف لسانه وتفاجئت نوره الي انحرجت التفت لنوره وحوطها بيده ضامنها له
خليفه:عمتيه انا هذاك اليوووم معرس ومابغيت حد يزعجنيه ضحكت عليج وقلتلكم الي قلته
ويته رقعه ثالثه:مسييييود ويه جنك الا ابوووك اتمووتون على لحريم
حاولت نوره تسحب نفسها امنه وتعتدل
خليفه وهو يتركها:هههههه في هذي ماجذبتي ولا حد قديه حرمتين باسم الله حارسهن
الجده:سود الله ويهك انجب
روضه من الجنب الثاني:ياعيني ياعيني عليييك يا عميه ولا متهني واحنا ماندريبك
ابتسم ابتسامه جانبيه لاحضتها نوره ومافهمتها
انشغلن عقب البنات بعيال عمهن الصغار وانتهز خليفه الفرصه انه يكلم نوره وهو يدري ان محد بيسمعه
خليفه:مشكوووره على الي سويتيه ماقصرتي
التفتت له مستغربه:شووو
خليفه:ابدا ماشي سلااامتج مره ماسويتي شي
كانت مستغربه ومرت مي واظطرو يسكتون اشويه ومن بعد ماراحت التفتت له:انته شو صاير عندك؟
خليفه بعصبيه واضحه في صوته ونظراته:ماجنيه موصنج في السياره بانج تتجنبين اميره
نوره:امييييره!!!ّ
خليفه:هيييه تصنعي البراءه ولا كانج سويتي شي
فااار دمها:انته شو تقصد وضح كلااامك؟
خليفه:اونج ماتدرين شو مسويه يعني لييييش تقهرينها بنظراتج وتتحدينها على شوووه شايفه نفسج ومصدقتنها اهيه مش اقل عنج بعد
تمت نوره اطالعه وتحاول تستوعب شو يقول
نوره:خليفه انته شووو قاعد اتخبص وتقوووول ...شووو من الحشي بعد الي حشتبه راسك
خليفه:احترمي نفسج وتكلمي عنها بادب
نوره خلاااص وصلت عنده وكانت تتكلم معاه بهمس وهيه محروقه خاطرها اتصارخ
نوره:ماتستااااهل ماتستااااهل ابا اعرف شو قالت لك انا متى شفتها ولاطالعتها بعييين
خليفه:لاتنكرين انج طول العزيمه قاعده تقهرينها بنظراتج وتتحدينها
نوره:انا!!!!انا اتحداها كلااام فارق وانته بتم دووووم اتصدق اي شي ينقاااال عنيه...خلاااص عاده ياخليفه انا مليييت من هاذي الاتهامااات..اتهمتنيه انيه اجرجرك ورايه وانا كنت حاشمه نفسيه وانته الي فرضت عليه الي تباااه
خليفه:ما مانعتي
نوره:اسكت اسكت ارجوووك لاتتكلم في الموضوووع وخله على ماهو عليه هيه انا انا الي اغريتك وانا لابسه نقابيه
خلااااص خل الموضوووع على ماهو عليه الكلااام فيه مايفيييد انته الكلااام معاااك مايفييييد وانته مفرق راسك حق حشو الكلام الي تسمعه
خليفه بهمس وهو يشوف روضه تقرب منهم:احترمي نفسج
نوره:ماشالله عليك عرفت تختار الزمان والمكان حق الكلام
اندفعت دانوه وهيه ماسكه كوووب عصير صوب نوره وطاحت قبل لا توصلها وانجب العصير على ثيابها
نوره وهيه توقف:لااا يادااانه
قربت منها روضه:هاتي هاتي عباتج والتووور زين الفستان ماخاااس هاتيهن بنغسلهن بسرعه
خلعت نوره العباه والتور الي فوق الفستان وهيه تحس بنفسها تنتفض من الغيض والقهر وماحست انها
بفستان ماله ايدين وكاشف الاكتاف بس حمالات خيوط ماسكاتنه حطت الشيله على اكتافها
وقعدت عداله وبعدها على حالها
خليفه بهمس:هيييه بدينا الحركات ولعب دووور الاغراء
جمدت مكانها وكانه كفها على ويهها مليووون كف هذا ابدا مستحييييل يفهم
الي بيدقق في ويهها ساعتها بيلاحظ الغضب الي تحاول تكبته وويههها يحمر من الغيظ
قعدت وتمت اتحاول اتصد بنظرها عنه بعيد
الكل التم عليهم مره ثانيه وتمو سوالف وضحك على احمد الي قال لروضه انه بيحيرها وماعليه من الزرافه الي شافه برا
احمد:والله هذا زرااافه انتي بس ارقبينيه السنه اليايه بغادي طولج
روضه:افاااا هذي مسبه علنيه يعني مش عاجبنك طوليه يمكن انا اطول بعد
اليازي:لا لا ماعليك منها هذي مابتطول كلش
روضه:حرام عليكم على الاقل سنتيمتر
احمد:خلي زرافه يعطيج شويه من طوله
الكل كان يضحك نوره رغم الغضب الي كابتتنه اتحاول اتجامل وتبتسم معاهم اما خليفه فتم منشغل مع تيلفونه وانسدح على الكنب وهو يحس انه تعباااان وشعور كريييه مسيطر عليه
فتحت روضه رساله وصلتها
بدر"شو تسوييين
روضه...والله بعد حضرته يرسل رسايل خل عاده حد ايرد عليك
بعد اشوي اتصل عليها ارتبكت وحطته صامت والتفتت الهم اتكمل معاهم سالفه احمد
اليازي وهيه تمثل دور الاب:جب انتي مالج حد غير زرافه وولد عمج هذا انسييه اصلا اهو وييين توه منتبه على عمره خليييه ايولي
روضه بصوت باكي:لا لا بس انا اريد احمد ارجوكم انا وهو من زمان انحب بعض لا تحرمونيه امنه ولا تظلمونيه بالزواج هذا
انا ماريد اتزوج مارييييد اهئ اهئ
اليازي:انكتمي مالج غير ريلج ياله اجلبي ويهج ههههههههه
قبل لا تتكلم اليازي اغلق التيلفون وهو يفوووور من الغيض دانه شافت الشاشه تولع وتبند وهوست على فص الارسال وروضه تتكلم
قام بعصبيه ولبس ثوبه وطلع راقع الباب وراه
لحقه مروان ومسكه عند السياره:بدر على وييين وشبلاااك جذيه انجلب حالك
بدر:ماااشي قم عن طريقيه
مروان:وييين بتروووح؟
دز بدر مروان بقو:يا اخي تركنيه
ركب سيارته وطلع مفول من الحوش ومروان يتبعه بنظراته ومستغرب شو الي جلب حاله فجئه
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك