رواية نور -3
التفت زايد لخليفه وكانه يحاول يستوعب منو الي قاعد ايكلمه
خليفه:زايــــــــد يابويه هونها وتهون
وقف زايد وكان بكلمة خليفه اتذكر السالفه وبدا يصارخ
زايد:اي اهونها واتهوووون هذي مصيبه مصيبه....انا داري من وين ظاهرتليه
هذي السالفه لو تدريبها الصحافه باجر انفضحت وكلت تبن احصل الكرسي .......انا انا زاااااااااااايد بن حمد الراشد
الي طاريه في كل مكان .....وقريب اخذ الكرسي ....انا الي طوووول عمريه رافع راسيه فوووق ولا عليه من حد
ادوووس الكل ولا اخاف حد يدوسنيه.....يستويليه جذيه........اناااااا انا ياخااااال تطلع اليه بنت عم امها باكستانيه
انااااا اتخسي اتخسي اتكون بنت عميه ......انا بعرف كيف ارويهم الحيوانات الي مرتبين هالسالفه
برووووويهم برويهم زايد على شوووه يقدر
يتحسبون انيه بستسلم الهم ايخسووون
خليفه:زايد زايد يابابا هد اعصابك السالفه ماتستاهل
زايد:كيييييف ماتستاهل اقولك بنت باكسسسسستاااااانيه...انا بنت عميه باكستانيه اتهبي
خليفه:لحووووه انزين يابويه هد اعصابك لين نتاكد
زايد:بعدمهاااااا من الوجود لو تطلع السالفه صدق
طالع خليفه وبدر بعض بنظرات
خليفه:استغفر الله ان شالله جذب بس انته اهدا ماينفع هالكلام...مايسوا عليك
الشيوخ الي هم شيوخ ياخذونهن من كل ديره شو مستوي عليك انته
زايد:باجر بتعرف شو مستوي عليه
قام عنهم زايد واتوجه للسلم لفوق لاكنه قبل لايطلع فوق التفت لبدر
زايد:لاتنسى باجر اتروح وتتاكد اليه بنفسك..والله ما اعديها على الي مرتب هالموضوع
ورجع زايد يخطي كم خطوه لخليفه وهو ياشر لنفسه
زايد:انا ...انا ياخال بنت عميه باكستانيه هاه باكستانيه ويقولك عايشه طول حياتها في باكستان
انا اليوم بينسبون هالبنت اليه والله بيبطون مانزلت الهم راسيه
خليفه:انته يا زايد مكبر الموضوع وطلعت بنت عمك شو المشكله
صرخ زايد:اقوووولك بتبطي بتبطي والله لا اخليهم يندمون على كل هذا...لا تنسى يابدر
بدر:ان شالله
راح زايد وزفر خليفه زفرة بقل الحيله
رجع خليفه لفلته وحصل اليهال كلهم قعود
خليفه:ليييش واعيين
هند:دانه اتزوع وفطامي اتصيح
خليفه:اتزوووع ليش؟
ناصر:كلت حلاوا وايد
خليفه:لحوووووه ...زين ناصر انته تعال معايه بنوديها المستشفي ولا اقولك خلك عند خواتك بوديها انا
وشل خليفه البنت ووداها المستشفي خلااااااص انهد حيله نفسه بالشبريه ايحط راسه ويرقد خذ
الدوا ورجع وحصل الخدامه واعيه عطاها البنت وراح فوق بعد ماتاكد ان الكل رقد
حط راسه ويادوب الرقاد ساحبنه اتصلت نوره
خليفه بلا اراده:الوووووو
نوره:اسفه علازعااج بس انته ماتصلت
خليفه:لاااااا عاااادي
نوره:انته راقد
خليفه:ماااااادري
ابتسمت نوره لان صوته ايقول انه راقد
نوره:طيب انا اسفه ازعجتك
خليفه:لا والله صوتج حلو
فتحت نوره عيونها:ا ا اانته راقد صح
خليفه:انا تعباااااااان..والله تعبااان
نوره:سلامتك ا االيهال تعبوك
خليفه:اليهااال .....وزااااااااااايد ......وصوووووتج
نوره:احم...بلاه صوتيه؟
خليفه:عذااااااااب
احمر ويه نوره وسكرت التيلفون في ويهه
كان قلبها ايدق بسرعه
نوره:هذا هب صاحي...ان شالله ايكون راقد ومايحس بالي ايقوله
اول ماقام خليفه شاف اتصال نوره الي كان متاخر
خليفه:انا متى كلمتها والله ماذكر يييه لايكون خرت معاها في الكلام
اتصل خليفه عليها وياه صوتها نعسااان
نوره:الووو
خليفه:احم الاخت نوره معايه؟
اعتدلت نوره وزادت دقات قلبها وهيه اتشوف الرقم ماكانت تعرف اسمه فتعمدت تساله
نوره:منو معايه؟
خليفه:انا خليفه....عم عيال خلف الله يرحمه انتي ماعرفتينيه؟
نوره :هيه هيه اسمحليه
خليفه:اظاهر انيه وعيتج من الرقاد
نوره:اااحم لاواعيه
خليفه:ا انتي سويتيليه البارحه تيلفون؟
نوره:هاااه هيه ...سويت ويوم شفت انيه وعيتك من الرقاد قلتلك بكلمك باجر
خليفه:ايواااا اا اسف البارحه نسيت اسويلج
نوره: ماعليه...طمني على اليهال
خليفه:شو بقولج هم بخير بس ماياكلون....كله عيشتهم من الدكان
نوره:ليييش ليش تيبلهم من الدكان تراه ايسد نفسهم عن العيشه
خليفه:مااادري انا تارس الهم الثلاجه.....واكل البيت مارضو ياكلونه اتقول دانوه ايعور في البطن
نوره:فدييييت الدانه...تولهت عليها والله....وفطامي اخبارها
خليفه:ام الغناقن سرج حالها
نوره:هههههه فدييييتها....اريد اشوفهم
وشهقت نوره وهيه تصيييح
خليفه:هاه هاه هاه لاتصيحيييين الحين اطرش الدريول ايبج صوبهم
نوره:خلهم ايونيه
خليفه:على راحتج بقول للخدامه اتلبسهم وتجهزهم وبعطي الدريول رقمج عشان ادلينه على البيت
حتى هم متولهين عليج
نوره:مشكوووور وماتقصر....اهم شي اشوفهم
خليفه:زيين عيل باروح ابشرهم
نوره:مشكوووور
كانت تمسح دموعها وتحاول تمنع الصيحه ترجع الها
لاكن خليفه حصل دانه مصخنه واتواقع مع الخدامه الي ما اعطتها الدوا
ونسى سالفة نوره الي تمت على اعصابها تنتظر وتنتظر بدون فايده
في باكستان وفي احدى المناطق الجبليه الي كانت البيوت مبنايه على الجبال والي يشوفها من بعيد مايشوف
للجبل اي اثر غير منظر البيوت وهيه مبنايه عدال بعض وفوق بعض واسفل الجبال الوديان المبهره للي يشوفها وكان بيت
نـــــــــــــــــور احد البيوت الموجوده على الجبل كانت تمشي وفي يدها عصاتها الي تهش فيها
عيال الجواميس الصغار
وعلى راسها العباه المعروفه عندهم مخرمه عند العيون نازله لين نصف ريولها ومن تحت العباه لبس البنجاب
صروال وسيع وقميص نازل لين وسط ريولها وكانت ايديها متروسه بالحيووول
وفي ريلها الخلخال
دخلت من الباب وانتبهت للريالين الي واقفين مع احد قرايب جدتها وهيه عايشه عنده حاليا
صرخ الريال الباكستاني وكانت هذي طريقتهم في الكلام بصوت عالي ايكلم نور ويطلب منها اتروح تيب الاوراق الي عندها
ردت عليه نور بنفس اسلوبه الصوت العالي وركضت لفوق عن طريق سلم خشبي في نصف الحوش وكان البيت
مفتوح من فوق
بدر تم عيووون وفكر ان زايد لو يشوفها اكيد انه بينتحر وتم يدعو ان الاوراق اتكون كذب لانه حسب ما قاله الريال
ان عم زايد ياهم من زمان في رحلة قنص
وانه انصاب في القنص برصاصه وساعده جد نورواسعفه وقضى عندهم فتره اتعرف حينها بام نور وطلب الزواج منها
وبعد سنه وكم شهر بعد ماولدت ام نور بنور
رجع على اساس انه يرجع واييب زوجته معاه لاكن حصل انه توفى قبل ما يعلم اخوه ابو زايد بموضوع زواجه
والاوراق الي طلبها الريال هيه اوراق الملجه وشهادة الميلاد وصورة جواز ابو نور وبعض الصور له مع زوجته الي توفت وعمر نور سبع سنوات
الاتصالات الي كانت تي زايد كانت من الريال الي عايشه عنده نور ونور اهيه الي طلبت امنه يتصل عليه بعد ماشافت صوره في الجرايد وشافت تشابه الاسما
كان يوم عيد عندها واهيه اتروي صديقاتها صور ولد عمها واتقول ان الها عايله ولازم ترجع لموطنها الاصلي
قربت نور منهم وفي ايديها الاوراق والصور وماكان ظاهر منها شي
كان بدر وابو درويش الي يعرف يتكلم باكستاني واقفين ينتظرون عطاهم الريال الاوراق ووقف بدر ايطالعهن وايحس بماي بارد ينصب عليه
الموضوع صح يعني الحين كيف ايقول لزايد
اتصل بدر لخليفه وقاله ايروح عند زايد عشان ايهديه اذا قاله
كان زايد في ميلسه ينتظر اتصال بدر الي تاخر عليه فقرر يتصل اهو بنفسه وكان على اعصابه
بدر انصدم من المتصل ولازم ايرد
بدر:الوو..هلا زايد
كانت نور ملتفته للجهه الثانيه واول ماسمعت صوت بدر التفتت له تريد تسمع شو يقول وشو هالهجه الي يتكلم ابها
بدر:زااايد الموضوع طلع جد والي يكلمك من كم يوم موجود اهنيه ايقول ان بنت عمك اهيه الي طلبت امنه
وقف زايد وهو ثاير:اتعمعمت في خصف....الله يلعنــ......استغفر الله....انته متاكد من الي تقوله
بدر:هذيييه الصور بطرشلك اياهن على المسج مادري اذا اهو عمك بس يشبهك واييد
زايد:ماعرف الاباكستانيه شووووه قلت الحريم
بدر:مافيها شي يا اخي
زايد بصريخ:لاتبط جبديه انته الثاني
بدر:زين زين هدي اعصابك
زايد:قله بعطيه الي يريده بس مايتكلم ابها ولا ييب طاريها لحد مستعد ادفعله مليووون
بدر:مايصير الكلام هذا انته شوووه تبا تفتح عيونه على شي مب منتبه له
زايد:لااا والله وشو فتح عيونه عيل الحين الا يوم شاف...انا شولينه وصلت
بدر:بنت عمك اهيه الي طلبت امنه ايكلمك
زايد:لاتقووول بنت عمك...اتخسي
بدر:لحوووووه....انزين لبنيه تريد اتروح الامارات
زايد:شو شوسمعنيه شو قلت ......لين اهنيه واتوقف اللعبه هذي خلها منثبره اهناك وياويلها ان شبرت الدار اهنيه
كل الاوراق والصور الي عندها خذها...وقلهم كل الي يبونه ياخذونه بس ينكتموووووون
بدر:ماعليه بحاول
زايد:لاتحاول نفذ بالغصب لازم ايوافقون
اخبر بدر ابو درويش بطلباتهم وتكلم معاهم ابو درويش بالباكستاني
حينها سحبت نـــــور الاوراق من ايديهم وركضت لفوق وهيه تقول بعض الكلمات الغير مفهومه
بدر:شبلاااها؟
ابو درويش:رافضه الي نقووله...ماتبغي...تقول لازم تروح الامارات
بدر:هب على كيفها خبر الريال هذا اننا مستعدين ندفع له الي يباه بس ماييب طاري انها بنت عم زايد
التفت ابو درويش للريال وقاله ضحك حينها الريال وقاله انه مش طمعان في لفلوس وان لفلوس وسخ الدنيا
وقاله انه الامر بيد نـــــــــور بس
بدر:لحوووه شو يعني هذولا كيف بيفهمون السالفه....هذي لو تسافر اهناك ذبحها زايد وفك عمره
خليفه حس براسه ايعوره من كثر ما زايد كان يصارخ ويتحلف ويتوعد بعد مارد عليه بدر برد نــــــــــور
خليفه:خلاص يابوي خلاص هذا امر مقضي فيه انته مابتقدر اتغير فيه شي
زايد:الا اقدر واقدر اسوي اكثر مماتتخيل.....ارويها بنت الباكستانيه....تبا تحط راسها في راسيه
خليفه:ياخي ليش تاخذ الموضوع بتحدي انته كل حياتك تحدي في تحدي....يمكن لبنيه نيتها
شي ثاني تبا اتشوف بلاد ابوها بلدها الاصلي
زايد:يعل مالها بلد قل امين........انا ماهمتنيه ياخوفيه بس العلل الي اهنيه يدرون ابها
خليفه:شو هامنك انته في الدنيا غير نفسك
زايد:هييه من شو بهتم غير من نفسيه...متى قد اهتميت انا بحد اصلا.اااووووف
.................................................. ...................
شل فهد كل كتبه ومن كثرتهن كانن مغطيات الطريق جدامه لاكنه يعرف طريقه زين
عند اخر السلم بعد مانزل اصطدم بشخص وطاح اهو والشخص والكتب فوقهم
حطت اليازي يدها على يبهتها بعد ماظربها واحد من الكتب على راسها واتفاجئت بالي طاح بحضنها فجئه
اتصنمو في ثنينه وعيونهم في بعض..كان ويه فهد قريب منها وهو ايطالعها"يخخخخخخخرب بيتك يافهووود وين هذي ووين هذيج
فرق الليل من النهار
اليازي:احمم ممكن
اعتدل بسرعه فهد وقام عنها
فهد:ااحمم....كنت كنت شاال الكتب ماشفتج
نزلت اليازي راسها تحت وتعدته رايحه فووق وعيوون فهد تتبعها حس حينها بضيقه من الي سوااه
يعني اهوه من البدايه مااعتذر منها يعتذر منها الحين مايصير
##
##
##
وديمه العطا
نـــــــــــــــــور
الجزء الرابع
كل ما اتصلت نوره على خليفه حصلته مشغول لين ماتملكها الخوف وعقب الغيض
نوره:وبعدين معاه هذا يلعب عليه ولا ياخوفي اليهال صار الهم شي وعلى اخر الليل اتصلتله
وكان ميت يبا الرقاد
خليفه:الوووووو
نوره:انتظرت وايد ومحد يانيه
خليفه:.....................
نوره:الو......الو
خليفه:هلاااا
نوره:انته قاعد تلعب عليه....مسوي عمرك راقد عشان تتهرب من اتصلاتيه
خليفه:هااااااااه منو انتي؟
نوره:انته شوووووتلعب باعصابي؟
خليفه:لا والله انتي الي قاعده تلعبين بقلبي
نوره:استاذ خليفه ...ممكن اتصحصح معايه انا خلاص تعبت من الي تسويه فيه
حس خليفه ان الصوت الي يكلمه معصب
خليفه:الووو منو معايه؟
نوره:يا الله وبعدين يعني
خليفه:انتي منو؟
نوره:انا نوره
خليفه:شبلاج معصبه؟
نوره:صحصحت؟
خليفه:انا صاحي منو قالج انيه راقد؟
نوره:ليش ماطرشت اليهال مثل ماوعدتنيه؟
اتذكر خليفه السالفه
خليفه:صار عنديه ظرف
نوره:وانته كل حياتك ظرووف
خليفه:وبعدييين ....اسمعينيه انا تعبااان بكلمج باجر
نوره:زيين بنشوف شو اخرتها معاك
سكرت نوره وتم خليفه ايطالع التيلفون ويحاول يتذكر اهو متى شل السماعه
.........................................
اتصل بدر لزايد مثل ما اتفق معاه
زايد:هااه شو سويت؟
بدر:قلتلهم انك مستعد تاخذلهم بيت وتفتح الهم حساب واتوفر الهم كل شي مقابل انغير جوازها ماطاعت
زايد:كيييف سوت الها جواز اماراتي؟
بدر:عمك الي سواه والريال كان دائمن يجدده عن طريق اصدقاءه الي يعرفهم اهنيه
زايد:انا لو ايطيح الجواز في يديه قطعته الها....بس تدري انا البارحه فكرت في الموضوع وايد اخاف انهم
ايكبرون اليه السالفه وتكبر عند هل الاشاعات
مافي حل غير انيه ايبها عنديه اهنيه مثل ماتريد وانا اعرف كيف عقب اسيطر على الموضوع
بدر قلها انيه اباها تي بشرط ما ايي معاها اي حد من الي يقربون الها
بدر:زايد انته متاكد من الي تقوله؟
زايد:هيه متاكد...ابا كل شي تحت يديه وبرويك بنت الباكستانيه وين بعقها...مفكره اهيه بتي بتحصل حلال ابوها اهنيه
انا اعرف شغلي معاها
بدر:انزين وان اصر قريبها ايي معاها
زايد:محد ايي غيرها...وشف رتب الموضوع في المطرات عشان ماينتبهون للاسامي المتشابهه ...حاول انته تمررها بدو مايحسون...بدر انته قدها
انا بصراحه الموضوع مارقنيه واريد اخلص امنه
بدر:ان شالله
سكر بدر وتم زايد ايفكر في بنت العم العله مثل مايسميها....."انا زااايد اخر زمانيه اتكون عنديه بنت عم امها بكستانيه الله يسامحك ياعميه
هذي وين بوديها باجر ان يت...ماعليه والله لاخليها تكره اليوم الي فكرت تي فيه الامارات
نزل زايد للدور التحتي ونده على هنيه مدبرة المنزل الخاصه عنده
زايد:هنيه...ياهنيه .....هنيه
زايد يعرف هنيه من ايام ما كان يدرس في مصر لانها كانت تيهم الشقه تهتم بتنظيفها واكلهم
وبعد ما رجع زايد للامارات يابها وعينها مدبرة المنزل وياب بعد معاها زوجها وعيالها
هنيه:ايواااياباشه
زايد:تعالي اهنيه
ركضت هنيه لزايد وهيه تمسح ايديها في المريله
زايد:اسمعينيه ياهنيه
هنيه:ايوااا انا كلي ودان يابااااشه
زايد:عقب كم يوووم بتي خدامه يديده
هنيه:ليه ياباشه دا الخير كتير؟
زايد:اسمعينيه انتي
هنيه:ايواااا
زايد:هذي الخدامه احنا مسوين خير في ابوها كان من زمان يشتغل عندنا..وانا ماريدهااتسوي شي بس خليها عندكم في ملحق الخدم
وشوووفي ترا مااااريد اشوف ويهها اهنيه في الفله...تسمعين؟
هنيه:حاضر ياباشه
زايد:واتحملي تطلع برا ولا اتكلم حد من برا اباج اتراقبينها زين
هنيه:ليه يابااشا هيه فيها حاجه؟
زايد:مالكيش دعوه انتي باأ
هنيه:انته تؤمر ياباشا
التفت زايد بيروح فوق عقب رد والتفت الها
زايد:اخبار فريد شوقي؟
هنيه:الممسل
زايد:انتي مب ولدج اسمه فريد وريلج اسمه شوقي
هنيه واهيه تفكر:اااه والله تسدق انا ماكنتش عارفه
زايد:اظاهر انه استفحل عندج
هنيه:هو مين؟
زايد:سلامتج سلامتج...المهم لاتنسين الي وصيتج عليه
هنيه:من عنيه ياباشا
ركب زايد السلم وهو ايفكر ان الي بيسويه هو عين الصواب على الاقل يضمن ان البنت مايوصلها حد غيره ويفضحه
كان يشوفها نكره على حياته فقراره الاخير انه يحبسها عنده ويقطع اي اتصال الها بالعالم احسن طريقه
خصوصا الحين لين ماتعدي فترة الانتخابات
.................................................. .........................
دخل مروان واحد من الدكاكين الي اتكون في وسط البيوت السكنيه... كالعاده بشورت وفانيله كت
ومروان واحد طويل وجسمه رياضي ومعضل
سلم على راعي الدكان وقعد على الثلاجه وكل شوي طلع له ايسكريم وكله تم فتره طويله
وراعي الدكان حس بضيق منه
صاحب الدكان:جييب فلوس
مروان:بعدنيه ما خلصت
صاحب الدكان:شووو خلص ياله رررح
مروان:تعال دكان ابوك هذا اتروغنيه امنه شبلااك انته؟
صاحب الدكان:انته في واحد ساعه يجلس بس اكل اكل مافي يدفع فلوس
مروان:انزين يوم بطلع بعطيك
هز صاحب الدكان راسه مش راضي بالوضع هذا
مروان:ههههه
نقز مروان وخذله علبة بيبسي وخضها بدون ما يشوفه صاحب الدكان وفتحها عشان اطيش في كل مكان وتخيس الدكان
حينها زدا صريخ صاحب الدكان وهو ياشر لمروان يطلع
مروان:ما بطلع قلتلك يوم بخلص بطلع
صاحب الدكان:انا بيكلم شرطه
مروان:اوكيه سوي كلام مافي مشكله
عصب صاحب الدكان اكثر واخذ يشتم ويسب
رجع مروان وقعد على الثلاجه وهو مش مفتكر في كلام صاحب الدكان الي تقرب من مروان وتم ياشر له يطلع
صاحب الدكان:خلاااص روووح ما يريد فلوس
مروان:بعدنيه ما خلصت
صاحب الدكان:انته واجد مشكله
مروان :شووو مشكله...انا في قاعد
صاحب الدكان:ياله روووح انا مايريد انته منيه
مروان:ايييه مافي سوي مشكله انته نفر سرسري حرامي
عصب صاحب الدكان زياده وقعد يدز مروان من على الثلاجه مسكه مروان ودزه دزه وحده خلته يطيح على الارض
قام حينها صاحب الدكان ومسك عصى طويله وتقرب من مروان في محاولة ظربه وقام له مروان وظربه هو بظربه قويه
ثانيه طيحته بعد مره ثانيه
صرخ حينها صاحب الدكان مستنجد بشخص كان في لستور التابع للدكان وطلع الهندي الثاني
وصارت المواجهه بين مروان والهندي اكل منها الهندي ظرب ما اكل مثله في حياته وانتهت الظرابه بكلبشات
طلعهن مروان من جيبه وكلبش فيهن الهندي وهذا هو الي كان مروان ايريده...انه ايطلع الهندي
هذا من المخبا الي هو فيه لانه من يومين ايراقب الدكان وشاك انه في هذا الدكان
مروان ضابط شرطه في التحريات عصبي زياده فوق اللازم مرااات يكون مرح ومرات ما يعرف الي جدامه
وهو اخو بدر و يصغر عنه بسنه ونصف
دخل مروان مخفر الشرطه وتم يضرب الهندي لين حب الدبس واعترف لمروان بكل حاجه كان ايريدها مروان
.................................................. ....................
طلع فهد من الميلس ايودع ربيعه وبعد ما طلع ربيعه من الحوش التفت عشان ايروح داخل البيت واتفاجئ
باليازي قاعده على السلم الي جدام البيت رجع والتفت للميلس مكان ما كانت سيارة ربيعه واقفه
ورجع والتفت الها تقدم منها كم خطوه
فـهد:انتي كنتي اهنيه يوم تطلع السياره من الحوش؟
رفعت اليازي نظرها صوبه ورجعت عقب اطالع جهه ثانيه
فـهد:اكلمج كنتي موجوده اهنيه يوم تطلع السياره قبل اشوي؟
قامت اليازي الي لاحظ فهد انها مطلعه غرتها عادي والتفتت اتريد تدخل داخل
صرخ عليها:انا اكلم منوووه؟
وقفت ورجعت تلتفت صوبه
اليازي:اتكلمنيه انا؟!!!!!!!!!ّ
تم فهد ايطالعها مستصيب يعني منو بيكلم غيرها
فهد:اتشوفين حد اهنيه غيرج؟
اليازي:وانته اتشوف فيه اربع اريول عشان اول ما تطلع السياره وقبل لا تلتفت ايي اقعد اهنيه
فهد:تطنزين حضرتج....يعني كنتي موجوده؟
اليازي:وشو المشكله؟
فهد واستغرابه ايزيد منها:لااااا عادي عندج يعني؟
اليازي:اصلا انا ما افتكرت فيكم؟..عاديه قعدتيه مافيها شي
فهد:لا والله.....اتسمين قعدتج مجابله الريال وانتي ظاربه بالقذله عاديه ومفيها شي ...وبعد ما افتكرت فيكم
اليازي بنظرات غيض:شو بتسوي بتضربنيه ياله تعال اضرب
كانت نظراته شرار وهو ايشوفها واقفه تتحدا واول ما صعد السلم سلمتين ركضت اهيه داخل ولحقها معصب
على طول راحت وازبنت ورا يدتها الي رفعت العصى اتهدد فهد
فهد:تعالي اهنيه تتحسبينيه ما اقدر اوصلج
الجده:ااييههها يافهيدان انته شبلاك مصبح جنك ارضي
فهد:هذي بنت ولدج تبالها تاديب ومحد بيادبها غيريه
اليازي:سر ركب نظرات اول شي عشان اتعرف اتفرق بين الناس
فهد بغيظ:وقسما بالله ان مسكتج اليوم ان محد يقدر ايفجج منيه
اليازي واهيه اطلع لسانها:ها ها ها ماتقدر
نط فهد ورا يدته ومسكها من شعرها
صرخت اليازي بصوت عااالي تستنجد والجده اتصارخ وتضربه بالعصى وماتركها فهد الاونصف شعرها في يده
فهد وهو يطلع مولع من الغيظ:كلبه حقيييره انا برويج
اليازي بصرااخ:انته الحقير انته الكلب يا حيوااان
التفت لها:انجبي والله لا اذبحج
الجده:حسبي اللــــــــــــــــــه عليك يا فهيداااااان حسبي اللــــــــــــه عليك يا فهيدان ذبحت لبنيه لا عينت خير
اليازي بصراخ:انا ما اريييييد اقعد اهنيييييه اريد ارووووح بيت خالوووووه
فهد بعصبيه:هيييه حق لهياته اهناك من مول لمول تتحسبينيه ما ادري عنج
الجده:انقلع برا انقلع وواللـــــــــــــــــــه لا اخبر عليك زاااايد واخليه ايسنعك يالخمااام
فهد:خليه اول شي ايي ايسنع الخايسه هذي
اليازي:حرمتك الخاااااايسه يالخايس
فهد:جـــــــــــــــــــــــــب
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك