رواية نور -34
طلعت نوره لليهال برا وهيه مقهوره من خالة خليفه ورفعت نظرها فوق وشافت خليفه نازل وشكله متسبح ومبدل لبسه بثوب عربي وبدون سفره كان فرحان وهو يشوف اليهال جدامه التفو حوليه وتمو ايحبونه ويلون عليه وهو ايحبهم بشوق وقلبه معورنه على اثار جدري الماي الي كان له بقايه على وجوههم
خليفه:فديييتكم ماتشوفون شر
احمد:عميه شو يبتلنا
خليفه:اووووه يبتلكم العاب وااايد صبرو اشويه
وراح خليفه للكيس الكبير الي كان حاطنه على الطرف وسحبه الهم وبدا ايطلع الالعاب
نوره كان قلبها منحرق وهيه تتخيل شو ممكن صار له مع اميره فوق...ماعليه يا خليفه تحرق قلبه عادي عندك وانته تدري انيه ماسلمتك نفسيه الا وانا اكن لك مشاعر
قرب خليفه من خالته
خليفه:اميره وين؟
همست له الخاله:راحت اتحط راسها فوق شويه
ابتسم وعيونه على لعيال وخااااطره ايوجه نظره الها وهو يدري انها قاعده على جنب بس حس انه مايقدر وخالته موجوده واخيرا التهت الخاله مع تيلفونها ووجه نظره الها لاكنه انصدم بنظراتها الحزينه الي كانت اطالع ابهن تحت وكان هم كبير على راسها
نزلت اميره من فوق ورفعت نوره نظرها الها وشافتها طاويه ليلال على راسها ومتحجبه باحكام مثل الي ماتريد حد يدري ان شعرها خرسان وزاد ويع قلب نوره
قربت اميره وقعدت ورا امها مثل المستحيه خبيثااااات
الخاله:اه انتي شو سويتي وين كنتي؟
اميره:اميه شبلاااج ماصار شي؟
الخاله:وشبلاااج متلفلفه بالشيله جذيه؟
اميره:اميه بلاااج خلينيه احرق قلبها
الخاله:يعل قلبها الحريقه ...ماسمعتي شو قالت اليه...عقب عقب بقولج
قامت نوره ودخلت داخل وتمت قاعده على طرف السرير عقب ركضت للباب وغفلته وهيه تستسلم لدموعها طالعت نفسها في المرايه وتكلمت
نوره:انتي ليش اتصيحين بالطقاق الي يطقهم تراها حرمته وانتي تدرين من البدايه انج يايه حق اليهال بس
رجعت وجاوبت على نفسها:هيه صح انا كنت راضيه بالوضع هذاك بس اهو الي خلف الاتفاق اهو الي تم يحرك احاسيسيه ويتقرب منيه لين صار الي صار انا مش لعبه عنده يلعب ابيه على كيفه وفي الاخير قاعد يقهرنيه
اهو الي تم يترجانيه ويقربنيه امنه اهو يدري انيه ما استسلمت له الا وانا اكن له مشاعر غييير ليش ايسوي ابيه جذيه وفوق هذا عقب ما خذ الي يباه
ايقوليه انسي الي صار انا شوووه ماعنديه احساس امفكر اهو مش كفايه الي سواه فيه ...مش كفايه انه خلانيه اسقط الي في بطنيه
خلاص يانوره خلاااص اقلعيهم وخليج مع عيال اختج هم اهم ....اخليهم كيف مهما كان انا انسانه بشر احس ما اقدر اتجاهل مشاعريه ما اقدر اتجاهل انيه بمووووت من قربه منها اهيه ماتستاهله
حاجه وحده اعرفها ومصره اسويها انيه بحرق قلبها عليه وبحرق قلبه ..هيه خليه ايعرف ان الله حق والله لا اخليه مايعرف راسه من ريوله
غمضت اتصيح وحطت ايديها على ويههها
وبعدين شو بتستفيدين من هذا كله تبين تفترقين عن اليهال...اكيد ان كل الي بتسوينه بيكون له اثر على حياتج معاهم
.....ماعليهم شر الله بيتوكل ابهم وانا بحاول انيه ما ادخلهم بالسالفه
الخاله برا اتصلت على البيت ويابو الغدا وغدت خليفه وتمت تتكلم عن نضام الطبخ عندهم واشتكت من نوره الي قالت الها انا ماليه خص فيه وانتي دبريله غداه
تم خليفه ساكت وما قال شي
عقب قعدت اميره معاه على جنب وفتحتله موضوع العرس
خليفه:ماعليه يا اميره قريب ان شالله...خلي زايد يرجع اول وتستقر الامور
اميره بخجل:انزين خلنيه انا الفتره هذي ازدهب واجهز للعرس
ماعرف خليفه شو يقول ووعدها باجر يسحب الها فلوس عشان تزدهب....معقوله ياخليفه من عقب ماكنت تترجى اميره تملج ومييت على هالسالفه صار الامر الحين عادي حتى موضوع الزهاب عااادي شو الي صار
يابت الخاله الغدا الي طلبته وتغدا خليفه وغدت الخدامات العيال وكانت نظرات الخاله عليهم
الخاله:ماشالله لعيال مستكينين حق الخدامات مره مايبون عبالة حد عليهم..وانا دوم القاهم مع الخدامات
احساس خليفه بدا يزيد ان خالته تلمح ان نوره مالها لازم ففضل السكوت وعدم الرد عليها متجاهل كلامها
اول مره يحس خليفه ان خالته واميره كاتمات عليه وهن مصرات بالقعده وماخذات راحتهن قامت الخاله عقب للمطبخ تصدر اوامر فيه وتمت اميره مع خليفه قاعدين يشربون الشاي
اميره:ياااالله متى بايي وبتم عندك اهنيه على طوووول ..حبيبي وين بنروح شهر العسل
لا لا هذا فوق احتماله:يا اميره بعدنا ريضين على هالكلام
وقفت اميره معصبه:انته مره مش معاااايه وين قلبك بتقول اليه
زجرها:اميييره
رجعت اميره وقعدت على طرف مسويه نفسها زعلانه:خلاص خلاص انا انجب واسكت انته ابدا مش خليفه الي احيده
زفر خليفه وقام وقعد عدالها
خليفه:شبلاااج ...الحينشو صار منيه انتي تتخيلين شي ماصار
سكتت والتفتت عنه للجهه الثانيه
خليفه:اميره ...وبعدين طالعي ياي صوبيه
كانت واقفه وراهم وعيونها عندهم اتريد اتشل فطامي عشان اترقدها ويوم شافت الخاله طالعه شلت لبنيه ودخلت داخل
مازال خليفه يترجى اميره تتكلم معاه وهو يحس بتانيب الضمير ناحيتها
الخاله من وراهم:حسبي الله عليها
التفت خليفه واميره للخاله:شبلاااج يا خالتيه
عنبووووه كيف قاعده اطالعكم وعيونها بتطلع من راسها
وقف خليفه ومشى ناحية خالته:منيه هذي يا خالتيه
الخاله:هذي خالة عيال اخوك
خليفه متفاجئ:كانت اهنيه؟؟
الخاله:يا ولديه جذيه مايوز انته لازم اتخلص الملحق حقهم هذي بتضر بنتيه باجر من الغيره ماشفتها كيف كانت اطالعكم
احاسيس غريبه بدت ادب فيه وهو يتمنى صدق انها غيرانه او انه يعني الها شي
خليفه:لا لا يا خالتيه غيرةشوه الي تتكلمين عنها...اهيه ماتريد شي غير انها اتربي عيال اختها خلنها في حالها
الخاله :قومي قومي يا اميره خلينا نمشي الحين ابوج اكيد بيرد من عزبته
اميره:اميه انا بتم
الخاله:لالالا يابنتيه قومي ياله ان كان يباج ايدل البيت
ابدا ماعارض روحتهن وشكرهن على الغدا وبعد ماراحن التفت لعيال اخوه وتم ايلاعبهم وسال عن فطامي وقالوله ان خالتهم شلتها
انسدح قريب منهم وتم ايفكر لين ماغفت عينه
العصر طلع مع عيال اخوه وصلو ورجع على امل انها تطلع ويشوفها على راحته لاكن نوره تمت طول بقية اليوم داخل وما طلعت وهو مسنتر في الصاله ماتحرك يمين ولا شمال لين ماغط الليل ومافي فايده من شوفتها
دخلت اليازي على نور الغرفه المخصصه الها ولزايد وكانت الغرفه الكبيره ولقتها اترتب الملابس في الكبت
اليازي:ماخلصتي
نور:على وشك
اليازي:ياحليله عميه كان مسولنا جو الحين هذولا كله برا في التدريب ولا قاعدين في الشقه الثانيه
كانت نور تسمعها وهيه متضايقه من الضيقه الي تحس فيها في صدرها هذا الشعور تكرهه ودائما يوم تتكدر من شي اتم اتكلم نفسها وتقنعها ان هذا الشي مايستاهل واتم اتهديها لين تطلع الضيقه لاكن الحين من الصبح وهيه تحاول مع هالنفس لاكن مافي فايده الضيقه بعدها موجوده وعرفت ان هذا بلاء مش هين
نور:استغفر الله ماذا افعل
اليازي:نور شبلاااج
نور:لا اعرف اشعر بانني لست بخير
اليازي:شو يعورج
نور:لا اشعر بالم ولاكن لا اعرف مالذي اريده
اليازي:يمكن مارقدتي زين خذيلج غفوه
نور :ربما
اليازي:زين عيل انا بروح اشوف التلفزون
طلعت اليازي ونزلت دموع نور على طووول
نور:يا الاهي لا اريد الامر ان يصل بي الى هذا الحد
وانكتت بسرعه في لفراش وهيه تستسلم اكثر لدموعها وعبراتها
نور:انه الشيطان اعلم ذالك...اعوذ بعزة الله وقدرته من شر ما اجد واحاذر...اعوذبالله من الشيطان الرجيم
اندق جرس الشقه وقامت اليازي وفتحت الباب وكان زايد متكي على فهد وشكله تعبان
اليازي:شبلاااه؟
فهد:ماشي ارهاق شويه وين حجرته
اليازي:منيه
مشت اليازي جدامهم واول ما وصلو للغرفه
اليازي:نور داخل اكيد انها رقدت بعد اهيه شكلها تعبانه
زايد:شبلاها؟؟؟
اليازي:مادري اتقول انها مش بخير
زايد:خلاص فهد عطنيه العكاز انا بدخل بروحيه
التفت زايد ايريد يدخل ومسك فهد يد اليازي ويرها معاه للصاله واهناك التفت الها وسحبت اهيه يدها اتعدل حجابها ابتسم فهد
فهد:عن منوووه تتحجبين؟
اليازي:هااه عن زايد اكيد
فهد:خلاص راح داخل
اليازي بتوتر:انزين ماعليه
فهد وهو ايطالعها وقلبه ايدق من توترها:شبلااج
اليازي:مـــ مــاشي
فهد وهو يفكر ومايعرف شو يقول:ا ا تبينا نطلع نتمشى
اليازي:هاااه عادي؟
فهد:في حد بيمنعنا؟
اليازي:مااادري؟
فهد:اوكيه انتظرج والبسي جاكيتج
اليازي بتردد:انزين كيف بنروح ونور وزايد شكلهم تعبانين
فهد:يعني شو بنسوي الهم هم خلاص دخلو يرقدون وزايد تعب شويه من التمارين زادوها عليه اليوم
اليازي:مادري
فهد وهو طالع :لا تبطين
اول ما دخل زايد تم يعكز على عكازه وهو تعبااان ومافيه حيل دار للجهه الثانيه ويحس قلبه انشغل عليها
حط العكاز وقعد على طرف السرير وكشف اللحاف وهو ينكت عدالها وكشفه اكثر ايريد ايشوفها وتبادلت معاه النظرات وعيونها خرسانه من الدمع
زايد:نووور شبلاااج؟
اعتدلت قاعده:لا شي
دقات قلبه بدت اتزيد وبقو
زايد:كيف مافي شي ليش اتصيحين؟
نور وهيه اطالع جدام:هيا زيد لا تزد مافي قلبي من اوجاع
ونزلت دموعها اكثر
تم ايطالعها لثواني عقب انسدح والتفت عنها للجهه الثانيه
قربت امنه وهمستله:اريد البقا مع اليازيه في الغرفة الاخرى
زايد تم ساكت اول شي
نور:هل استطيع البقاء هناك؟
زايد بنبره حاده:كيييفج تمي وين تبين
انسحبت من عداله وطلعت
كانت اليازي توها تستعد للطلعه
نور:الى اين؟
اليازي:ا ا فهد قال اليه انروح نطلع اشويه نتمشى
نور:هل تريدين انتي ذالك؟
اليازي:ضقت من القعده في الشقه
نور:حسنا ولاكن انتبهي الى ان الجو في الخارج بردا قارس
اليازي بابتسامه:لا ماعليه خذت اليه جاكيت ياله باااي
نور بابتسامه:في حفظ الله
استانست نور وهيه تشوف اليازي بعد كل الي كانت اتقوله عن فهد انها بدت اتلين معاه
توضت وفرشت سيادتها وتمت اتصلي وبعدها قعدت تقرا قراءن وهيه تدعو الله ان الضيقه الي في صدرها اتروح
بعد نصف ساعه حست براحه شوي وحست بقلبها رفرف وهيه تحس ان في حد فتح باب الغرفه عليها وطل براسه متاكده انها مش اليازي اهو ميه بالميه بس شو الي يابه و ليش ماتكلم ولا حسسها انه ياي ايشوفها وسكر الباب عليها وراح
تمت اشوي لازمه الاستغفار وعقب طوت السياده وطلعت وحصلته قاعد ايشوف التلفزون
التفت الها وابتسمت له وهو ايحس بقلبه انتعش بابتسامتها
نور:هل احضر لك شيا؟
زايد:لا
وكان يشير بيده عداله عشان تي وتقعد عداله
اقتربت امنه بتردد
زايد وتوه انتبه انه اشار الها تي عداله وبعد ماقعدت:اليازي ويين؟
نور:خرجت مع الفهد
ابتسم زايد:انتي الاسامي على كيفج اتقولينها
نور:ماذا تعني؟
زايد:زايد صار زيد واليازي اليازيه وفهد سميتيه الفهد
نور:هل اخطات في ذالك
زايد:لا يعني عادي اناديج نوار او نوره او نوير هههههه
ابتسمت نور وهيه اطالع تحت
زايد:هااه شو عجبج من الاسامي
نور:ادعوني كما تريد
زايد وهو متعجب على قدرتها تغيير مزاجها بسرعه:تدرين يمكن باجر ايعقون الجبس عنيه
نور:وهل ستستطيع المشي عليها
زايد:ايقولون بيسوليه تمارين الها وعقب ان شالله بنرد
نور:اتمنى ذالك فقد اشتقت لجدتي
زايد وذكر يدته بعد انعش قلبه:فدييييتهاا احس ماروم اكلمها وانا بعيد عنها
وقفت نور:هل احضر لك عصير تفاح
زايد:هاتي
فهد واليازي كانو في الهايد بارك وفهد شل معاه قبل لا يطلعون بقايا خبز وسمون وطلب من اليازي تيب عيش واستانست اليازي مع البط والحمام وهم ايكلونهن كان فهد ينثر حبات العيش عليها
ويركض عنها عشان اتحل عليها ملايين الحمام واليازي اتصارخ من الروع
..................................
على المسا نزل خليفه من فوق متوجه للمطبخ وكانت نوره توها طالعه انحشرو مع بعض عند الباب ومر خليفه من جدامها وعيونه عليها وهيه مسنده راسها على حافة الباب في انتظار ايمر لاكن خليفه عوره قلبه من حركتها كانت مغمضه وصاده بويهها وكانها مشمئزه من الي مار من جدامها
وبعد مامر تحركت اهيه رايحه بسرعه لقسم الضيوف تم خليفه واقف في المطبخ متخربط على الاخر ليييييش ليش سوت جذيه اظاهر ان الفجوه بينهم صارت كبيره خلاص
مر اسبوع وخليفه خلاله مش
قادر يلتم مع نوره في مكان كل مادخل وكانت موجوده تروح بسرعه عنهم
واميره ماقصرت في الزيارات والتلميح لنوره عن استعدادها وتجهيزاتها للعرس اما نور والبقيه كان يومهم نفس اليوم ايمر عليهم الصبح زايد وفهد في التمارين ومن بعد مايرجعون يرقد زايد شويه وعقبها ايتم طول اليوم
مع فهد في الشقه الثانيه لقاءات بسيطه يلتقيها فهد مع اليازي من بعد طلعتهم المره الي فاتت
في ليله من الليالي وبينما كان فهد مستانس بتطور العلاقه بينه وبين اليازي طرشلها اول مره رساله فيها "فدييييييت الضحكه انا اليوم ...صدق اتخبلت عليها"الرساله خلت اليازي تختبص على الاخر وانسحبت من لفراش بشويش بدون ماتحس نور وطلعت للصاله طبعا نور كانت تقضي لياليها عند اليازي من بعد ماطلبت من زايد هذا الشي
قعدت اليازي في الصاله وعيونها على التيلفون
اليازي:هذا مينوووون استخف اكيد
فهد"انتي راقده ولا واعيه
اليازي"واااااعيه
فهد"وشو تسوييين؟
اليازي"ماااااشي
فهد"ليش مارقدتي
اليازي"ناس ازعجونيه
فهد"ماينلامووون وهم ايفكرووون فيكم
اليازي"انته استخفيت
فهد"اتسمين الشوق استخفاف
اليازي"وبعدييين
فهد"حرام يعني اقول الي في خاطريه
اليازي"من متى ؟
فهد"من زمن يوم الطفوله
اليازي"اتنكت
فهد"ويوم الوقت احلام وتصور
اليازي"شرايك اتحط راسك وترقد
فهد"تبين ترقدين؟
اليازي"ايقولون
فهد"تصبحين على خيييير والله يصبرنيه لين اشوفج باجر
اليازي"مينوووون
وعلى هالحال في اليوم الثاني مايحصل فهد فرصه يستفرد فيها مع اليازي لالتزامه بزايد طول اليوم لاكنه ازعاج الها في الليل بالرسائل وكانت رسائلها له كلها جاافه
.................................................. ....
كانت اميره وامها كالعاده في بيت خليفه وكان خليفه قاعد معاهن فترة الضحى واميره تتكلم عن كل الي جهزته
وشكلها جهزت كل شي وبسرعه
التفتت انظار خليفه لنوره الي طلعت من قسم الضيوف وهيه لابسه عباتها وماسكه النقاب في يدها ومرت من عدالهم رايحه المطبخ
همست الخاله:لا اله الا الله السلام لله
تم خليفه ايطالعهن وفضول قوي فيه ايريد يعرف وين بتروح
الخاله:وانته مره فاجلها راسها اتروح وين اتريد بدون شووور ولا مشاور
قام خليفه وراح عنهن رايح للمطبخ وشاف نوره وهيه تقعد على الكرسي
نوره:ماقال متى بيي؟
خليفه من وراها:منو هذا؟التفتت له نوره ووقفت اتريد تطلع
خليفه:وين كنتي اتريدين اتروحين؟
نوره:مابروح مكان خلاص
لاول مره مسكها والتفتت له
خليفه:اتكلم معاج ...وينكنتي بتروحين
نوره بدون نفس:اريد اروح عيادة الاسنان والدريول طلع مش موجود
خليفه:ليييش
نوره وهيه تسحب يدها من يده:ضرسيه ايعورنيه
وحطت يدها على مكان الويع
خليفه:وكنتي بروحج بتروحين؟
نوره:لا طبعا باخذ الخدامه معايه
خليفه وهو ايحط ايديه في جيوبه:وايد ايعورج
طالعته بنظره ذبحته:هيييه وااايد
تخربط:انزين ارقبينيه بروح اييب سويجيه وبوديج
تمت ساكته لو ماكانت اميره وامها اهنيه ماخلته بس قالت بتشوف شو بيسوي معاهن
اميره باحتجاج:والدريول وين خله ايوديها
خليفه بتوتر:محد طرشته العزبه
اميره:وهيه ماعرفت اتروح الا الحين
خليفه:ماكانت تدري ان الدريول مش موجود
اميره:ايوووا وانتم احنا اهنيه بروحنا
خليفه:اميره ترا البيت بيتج ماعليج خذي راحتج
اميره:اخذ راحتيه وانته معاها
خليفه:لحووووه بنرد على نفس السالفه
خلاهن وطلع
الخاله:يا العنز اسفهيها لا تحسسينه انج اتغارين منها خليج واثقه من نفسج
اميره:يا اميه خليفه مش اهو الاولي
الخاله :انزيين لازم اتردينه ولغاثتج هذي اهيه الي بتخرب عليج
ركب خليفه وركبت نوره عداله وبدا القلب يستطرب لقربها
خليفه في خاطره"لاااا هذي الاحاسيس مش معقوله ياربي شو اسوي متى بيكون الامر عنديه عادي
خليفه:في مكان معين تريدين اتروحيله
نوره:مادري قلت بقول للدريول ايودينيه اي عياده
خليفه:خلاص عيل انا بوديج عياده الدكتور من ربعيه
نوره:اريد حرمه
خليفه:موجوده اكيد
كان ايحس ابها انها متالمه وايد من ضرسها
خليفه:من زمان ايعورج؟
نوره:من يومين الصبح يهدا الويع وفي اليل ايزيد
خليفه:فارقت ويع الضرس مادانيه
تمت نوره ساكته وكان على امل انها تكمل معاه كلام
وصلو للعياده الي كان شكلها راقي وماتخيلت نوره انها في يوم اتكون فيها على طول فتحو الها ملف
وبعد ماتوجهو للعيادة الاسنان طلب خليفه دكتوره واعتذرو انها مش موجوده
رجع خليفه الها:نوره الدكتوره مش موجوده والدكتور عواد وايد زيين اهو كبير في السن هااه شقلتي
نوره بتردد:مادري
خليفه:ياله خلينا نتوكل على الله مابنحصل عياده احسن من هذي
هزت نوره راسها موافقه ومشت مع خليفه الي كان بس ايحس بوجوده معاها شي ايجنن
في غرفة الفحص دخلت الممرضه وطلبت من نوره تنسدح على كرسي الفحص
لفت نوره نقابها وغطاها وتحجبت زين وانسدحت على الكرسي وعيون خليفه عليها مكيفه من شوفتها
غمضت نوره عيونها وقرب خليفه منها ايطالعها واول مافتحت عيونها اتلاقت بعيونه اختبص
خليفه:ا ا الحييين الحيين اكيد بيي الدكتور
لفت بنظرها للجهه الثانيه
خليفه"ويل حاليه والدكتور بيتم يتملق فيج من كل هالقرب ماعليه ماعليه تراه الا شيبه
لاكنه تفاجئ بدخول شاب طويل حليو
الدكتور فواز:مرحبا كيفكو
تم خليفه ايطالعه وعيونه بدون احساس راحت لنوره
خليفه:اهلين
مد الدكتور يده لخليفه ايسلم عليه ورد خليفه ايسلم عليه
الدكتور:انا الدكتور فواز ابن اخوه للدكتور عواد
خليفه:اهلا وسهلا
التفت الدكتور على طول وسحب الكرسي وقعد عليه
الدكتور:شو فيها الصبيه
كانت نوره متفاجئه من الي قرب منها وخلا ويهه مجابل ويهها في انتظار تفتح فمها وجهت نظراتها لخليفه الي اهو اختبص اكثر منها
وماكان وده ان الدكتور هذا ايقرب منها ناااار حس ابها اشتعلت في صدره لاكن ماكان عنده وقت ايعارض ولا يسوي شي والدكتور على طول سحب العده وقرب الليت من نوره مطالب منها تفتح فمها
غمضت نوره عيونها واستسلمت للامر وهيه تفتح ثمها وطل اهو بنظاراته المكبره في ثمها وقرب صدره منها اكثر
شوي ويدخن خليفه من الي ايشوفه جدامه هذا وييين داز بالويه ومصدق عمره وهو مقرب منها
الدكتور يسال نوره:هيدي السن
نوره:ايوا
الدكتور:هاذا بده ينشل ..مشالله اسنانك عم بتجنن لاكن هدا السن طالع على جنب ومسبب الالم ثواني بس البنج راح يعمل مفعوله واشيله
خليفه ولع"جنانوه تاخذك امين من وييين طالع اليه
قام الدكتور بعد ما اعطى نوره الابره عشان البنج وكان سريع في شغله واتوجه للباب
الدكتور:ثواني بس وراجع
طلع وعلى طول قعد خليفه على الكرسي الي قام امنه الدكتور وقرب من نوره فتحت عيونها وتمت اطالعه مستغربه
تم ايطالعها منالقرب هذا الي يطالعها فيه الدكتور نوره كانت حاطه يدها على خدها
خليفه:ماجن الدكتور وايد لاصق فيج وهو يعالجج
تمت اطالعه مستغربه
خليفه:لا طالعينيه جذيه مستانسه انتي على قربه اظن ريحة عطره ترست راسج
مازالت اطالعه وهيه منذهله ...لاااا اظاهر هذا مصر يشكك في سلوكياتيه هذا وهو الي يايبنيه اهنيه
ماردت عليه لان الدكتور دخل وقام خليفه الي مايدري شو صارله
خليفه:الدكتور عواد وين؟
الدكتور:عمي راح لدبي شووو انته ماعندك ثقه في خبرتي انا تلميذو لعمي واساليبي مطوره كتير
قعد الدكتور وقرب من نوره والمره هذي قربها اكثر وهو يبتدي عملية خلع السن
نوره ماكانت تدري ان الامر بيوصل لخلع السن وضربها خوف من الموضوع لاكنها كتمت خوفها وهيه ميته اما خليفه الي صدق انحرقت اعصابه تم واقف بعيد في انتظار انه ايخلص لاكنه قرب اول ماشاف يد نوره تتخبط حوليها اتريد تمسك في شي ومسك يدها
بين ايديه حاضننها بقو حست نوره ان روحها ردت وهيه ميته من الخوف وخليفه كانت فرحته بيدها اكبر وهو يحس ان غيضه
طاااار مع ملامسته ليدها رجفة يدها كانت واضحه له واخيرا انخلع السن وابتعد الدكتور طالب منها اتقوم اتغسل ثمها
سحبت يدها من يده واعتدلت وهيه متوتره وغسلت وطلب منها الدكتور ترجع مره ثانيه عشان ايشوف اذا تحتاج خياطه مكان السن تم خليفه واقف عدالهم لين ما ابتعد الدكتور ونزل من كرسيه رايح يخلع قفازاته ويغسل ايديه وهو يقول شو سوا وشو الادويه الي بيكتبها الها
التفتت نوره لخليفه بنظراتها وكانت عيونها محمره شويه ونزلت دمعتها قلبه هوا فيه وقرب منها اكثر
خليفه:كنتي خااايفه!!!!؟؟
غمضت بعيونها وصدت للطرف الثاني
خليفه وقلبه عوره:نوووره
لاكنه ماقدر يتكلم نفسه ايطمنها نفسه يعتذر لو عن الكلام الي قاله قبل اشوي لاكن في شي مانعنه التفت للجهه الثانيه صوب الدكتور وهو متضايق من نفسه
اعتدلت نوره وهيه تحس بثقل لسانها وفكها مسحت دموعها واتمنت انها ماتستسلم لدموعها بسرعه عدلت حجابها ولبست الغطا على طول وتمت واقفه في طرف الغرفه تنتظر خليفه ايخلص من كلامه مع الدكتور
وبعد ما خلص التفت الها وقلبه مازال معورنه عليها
خليفه:ياله
طلعو وكان السكوت هو رفيقهم لين البيت
##
##
##
ودمتم وديمه العطا
"نـــــــــــــــــــــــــــــــور"
الجزء السابع والعشرون
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك