رواية نور -33
وراحت للمطبخ وتمت اتسوي الشاي ورجعت له به وحطته جدامه وراحت تقعد على واحد من الكراسي وتمت اطالعه
فهد اول مره يتخربط من نظراتها شو سالفتها شكلها اتريد تتاكد انيه بعدنيه حي
دق الجرس وقامت فتحت الباب وكان خليفه الي رحب به وعلى طول راحت داخل
سئل عن زايد وخبره بالاحوال الي صارت له
فتح زايد عيونه وحس براس متكي عدال ذراعه
زايد وهو يتحسس هالراس:نووور
رفعت راسها:هل استيقضت؟
زايد:شو صااار؟
وقفت نور وابتسمت:حمدلله على سلامتك هل تشعر بشي الان؟
زايد:لاااا انا وييين؟
نور:لقد احضرناك الى المستشفي الا تذكر بانك كنت تتالم من وجع اصابك
زايد:لاااا ما اتذكر...خليفه وييين؟
نور:لقد عاد الى البيت
زايد:وانتي؟
نور:سابقى الى جانبك
زايد وهو يحس بضيقه من مواقفها معاه وهو مايستاهل :ليييش اتمييين ماشي دكاتره اهنيه؟
نور:انا لا اريد ان اتركك لوحدك
زايد:انا هب ياهل عشان اتمين كله لاصقه فيه ياله اتصلي على خليفه خليه ايرد ايرجعج
نور:لا املك هاتف ولا اريد العوده
زايد:بتكسرين كلاميه؟
نور:زيد انك تعب عليك ان ترتاح قليلا
زايد:نوووور انا ماريد شفقه خلااااص عاده انا صرت بخير ومافيه شي
نور منصدمه:لما تقول هذا زيد؟
زايد:هيه شفقه ولا مستحيل وحده عقب الي شافته منيه تستحمل الي انتي اتسوينه
نور:انته لا تريد الا ان تتشاجر معي
زايد:هيه وبتم اواقعج طول عمريه بتستحملين ولا اهيه فتره لين اتشوفينيه افتكيت وبتقولين مع السلامه
نور:قد اخبرتك زيد من قبل لا اريد الفراق الا عندما تعقد الهمه انته على ذالك
زايد:ممكن اتبندين الليت وتنقلعين برا
نور:حسنا
طلعت نور بعد مابندت الليت وتمت قاعد في الممر لين مامرت عليها حرمه مواطنه وسلمت عليها وقالت الها تقرب عندها في غرفتهم
الحرمه كان عندها ولد مريض حزنت نور على حاله وتمت اتوصي امه انها تقرا عليه دائما سورة البقره وعلمتها عن فوائدها ووعدتها الحرمه انها تلتزم بقرائتها كل يوم على ولدها
..............................................
روضه طلعت من المستشفي وبعدها تعبانه من موضوعها مع بدر وكل مايتصل بدر اتقول لمي قوليله انيه راقده مش موجوده على كثر مايتصل ومايحصلها عرف انها ماتريد اتكلمه ووقف من الاتصالات
في اليوم الثاني طلع زايد ورجع للشقه وكانت نفسيته زفته ومحد يقدر يكلمه
فهد:عميه متى بترجع؟
خليفه:وين ارجع وزايد هذا حاله انا مادري ليش انجلب حاله من شاف الحادث؟
فهد:تمام
خليفه:زين انا بروح السفاره شويه عنديه شغل وبرجع
بعد ما طلع خليفه دق فهد الباب على اليازي وفتحتله تمت واقفه اطالعه وحج راسه اهو مايعرف شو يقول؟
اليازي:في شي؟
فهد:ا ا انا نسيت اييب فرشاه ومعجون ومشط وبعظ الاشيا من لعيله نسيتهن ...ماتدلين اهنيه جمعيه دكان سبرماركت
اليازي:في دكان صغير موجود اهنيه في المنطقه انا دوم اروح مع عميه خليفه صوبه
فهد:ووين مكانه؟
اليازي:اهنيه قريب...اول ماتنزل من الفندق اتروح يمين وتمشي ليييين اتحصل
وسكتت اتحاول تتذكر
اليازي:لا لا تمشي لين اتحصل ممرمش ممر واحد في ممرين الاول مادري الثاني اهوه
فهد:اليازي ترانيه مافهمت ادلينه انتي؟
اليازي:هيه
فهد:عيل ياله تعالي معايه اذا تقدرين اخاف اضيع
اليازي:انزين بلبس عباتيه وبييك
فهد بفرحه داخليه:اوكيه بنتظرج
بعد شوي نزلو مع بعض وهم ساكتين
فهد:اوووف برد انتي ماتحسين بالبرد؟
اليازي:الابموووت امنه
فهد:وليش ماتلبسين جاكيت
اليازي:ماعنديه
سكت ومارد عليها اظاهر وايد اشيا ياليازي ماتمتلكينها وان شالله بعوضج اياها قريب
فهد:هاااه اي طريق
اليازي:اظن هذا
فهد:اتظنين؟؟
اليازي:ههههه مادري والله يمكن اهو خلنا انجربه
ودخلو في الممر
فهد:وينه دكانج هذا
اليازي:شكله مش الطريق هذا؟
فهد:والحل
اليازي:نرجع
فهد:ووين نرجع انتي دخلتينا في متاهات انا الحين ما اعرف شرق من غرب
اليازي:هههههه
فهد:وبعد تضحكين
اليازي:انا ميته من البرد وين انروح الحييين؟
فهد:انا داري وين انروح تعالي منيه
ومد يده ليدها ومسكها وكانت قطعة ثلج وقف والتفت ناحيتها
فهد:يدج ثلج
وتم يفركها بين ايديه ومدت يدها الثانيه وكتتها بين ايديه ابتسم الها وصدت بنظرها للجهه الثانيه وشفايفها ترتجف وقلبها وكل شي فيها
وشوي ونزل عليهم مطر قوي تمت اليازي اتصارخ اتريد تندس عن المطر وماتعرف وين اتروح سحبها فهد لمظله قريبه من واحد من لبيوت وتمو واقفين تحتها كان ويهها كله مغرق وعباتها وشيلتها
وحتى فهد كامل خاس من المطر واول ما حطت نظرها عليه ضحكت بصوت عالي
فهد بابتسامه:اليوم انتي بس ضحكي شو تبينا الحين انسوي بعد ماضعنا وكبس علينا المطر
اليازي بابتسامه وهيه ترفع اكتافها:مادري
رفع فهد نظره لفوق:شكلنا بنخيس اهنيه
اليازي وهيه ترتجف:اااووو انا بردانه بمووووت
فتح الها الجاكيت الي لابسنه من جدام يدعوها تنضم لحضنه
تمت اطالعه وبتردد اتقدمت شوي شوي وانكتت في حضنه وكان فهد مثل العطشان الها وهو يضمها بقو
امن وراحه وطمانينه حست واهيه في حضنه وتمو على هالحال لين وقف المطر
فهد :يزوووي
اليازي:همممم
فهد:وقف المطر
ابتعدت عنه وهيه اطالعه والتفتت اتشوف الطريق
اليازي:وين بنروح الحين؟
فهد:تعالي انا بشوف الطريق هذا
واول ماعدو من الطرق لقو الدكان جدامهم
اليازي:هذوووه بس كيف ييناه منيه؟
فهد:لانج درتي ابنا من الطريق الثاني والفندق ياحبيبتي اكوه مايباله كل هالدواره
اليازي:هههه انا اصلا ماقد رحت له الامره وحده وقلت اكيد بدله
ابتسم الها ومسك يدها رايحين للدكان
بتقولون شو ياب الدكان في لندن وفي ممرات عادي شفتهن اهناك والي يبيع فيهن هندي هههه
نور خلااااص وقفت طاقتها اليوم مع زايد وهو كل شوي صرخ عليها ولافر اي شي تيبه له
كان قاعد على طرف سريره وهيه واقفه ماسكه كوب الماي عشان يشرب دواه خذ الكوب وحذفه على الجدار ووقف ماسكنها بشعرها بيديه الثنتين
زايد:انتي ماتفهميييين متى متى بتفارجينيه وبتتركينيه في حاليه قلتلج ماريييييد شي
نوربالم من مسكته:يجب ان تاخذ الدواء
زايد:وان ماخذته شو بتسوين بتغرينيه اياه هاااه ياهل انا عندج ياهل...انا ابا افهم حاجه وحده بس انتي ليييييش اتسوين كل هاذا عشااااان شووووه
نور:انته زوجييي
زايد:وليش متزوجتنيه هاااه ليش...عشان سواد عيونيه هاا
نور:زيييييد انته تؤلمني ارفق بي
زايد:مابرفق بج ولا بتشوفينها الرحمه عنديه لين اتقولين لييييش اتسوين كل هذا معايه
نور ودموعها تنزل بقووعيونها مسكره وهيه تتالم من مسكته الي قام ايزيدها اكثر في انتظار ردها:انـــــــــا......انــ.....انا احبك زيد
ارتخت مسكته وكان اخر رد توقع يسمعه:شوووو؟
نور:انني متيمتا بحبك يابن عمي اقسم لك واعلم بانه بلا ابتليت به فليكن في عوني الله كل امر مومن يبتليه الله وكان ابتلائي بمحبتك
كان ايطالع ويهها المرفوع فوق بسبب مسكته لشعرها وشده لتحت دموعها ماوقفت تم يتاملها شوي وعقب زاد اكثر شده لشعرها
زايد:هذا الخربطان ماعاد اريد اسمعه....مافي شي اسمه حب ...في شي اسمه مصلحه وبس...ان كان لج مصلحه من الي تسوينه كله اختصري على نفسج وقوليه
نور:انا لا اريد زيد ....لا اريد محبتك ولا اريد شيا اخر ...وان كنت تريد فراقي فافعل ماتريد ...........ولكن عندما نعود
دزها بقو عنه وهو يحس بجسمه منهد ويرتجف وانكت في لفراش ايحاول ايهدي مشاعره وروحه المتخبطه وكل شي فيه اما اهيه ماهقت انه تركها تمت قاعده على الارض سانده راسها على طرف السرير وتكبت شهقاتها وهيه تحس ان طاقتها نفذت
##
##
##
ودمتم وديــــــــــــــــــمه
الجزء السادس والعشرون
اخذ فهد واليازي كل الي يريدونه من الدكان وطلعو راجعين للفندق وفي طريقهم شاف فهد بوتيك صغير للملابس الشتويه
فهد:تعالي انطالع شوعند هذا
تبعت اليازي فهد وعجبها المحل وايد
فهد:اليازي شورايج في الجاكيتات هذي
قربت اليازي امنه اطالع الجاكيتات
اليازي:اتجنن بس شكلها غاليه وايد
وبالفعل كانت البضاعه غاليه واظاهر الها زباين خاصين
فهد:اي واحد فيهن حلو
اليازي:كلهن ايجنن
فهد:يعني اختارلج انا على ذوقيه؟
اليازي:اليه انا!!!لا لا انا ما اريد
فهد:بس انا عجبنيه وباخذلج واحد...شرايج في الاسود هذا
اليازي:حلو بس غااالي
تم ايطالعها:مايغلا عليج
شله فهد وتوجه للبياعه وتحاسب معاها وعقب طلعو وكانت اليازي مستااانسه وتحاول ماتبين وناستها
بعد ساعه من رقدة زايد قعد قاعد وتفاجئ ان نور على نفس قعدتها متكيه براسها على طرف السرير وهيه قاعده على الارض
تم دقايق ايطالعها وهو سرحان ويفكر في كل الي صارلهم وفي الكلام الي قالته هل صدق اهيه تحبه
قرب منها وهو بعده قاعد ودقها
زايد:نووور نووور
قفزت خايفه ورفعت نظرها ناحيته وتمت اطالعه
زايد:انااااا ايعااان اريد اكل
وقفت نور بسرعه:حسنا ساحضر لك الطعام
وطلعت بسرعه ولحقها زايد وراح يقعد في الصاله في انتظارها
بعد دقايق رجعت نور وهيه شاله صنيه فيها كل شي من الاكل سندويجات كيك وبسكويت وصحن صغير فواكه غير العصير وكوب النسكافيه
حطت الصنيه جدامه وقعدت اهيه ورا الطاوله على الارض مجابلتنه
زايد:ليش قاعده اهناك؟
وقفت على طول:هاا ..حسنا
التفتت عنه وراحت للمطبخ
اتبعتها نظراته وهو مستغرب شو فيها وليش اهيه قالت حسنا تم زايد ينتظرها يمكن تيب شي بعد لاكن نور تاخرت وايد مسك
عكازته وراح وراها للمطبخ وهو يعكز على العكازه طل براسه للمطبخ وانصدم انها قاعده على الكرسي في الزاويه وهيه سرحانه وشكلها حزين
زايد:نوووور
التفتت له مستغربه انه واقف في مكانه
زايد:ليش قاعده اهنيه؟
نور وهيه توقف:الا تريد انته ذالك؟
زايد:شووو انا !!!؟
نوروعيونها بدت ادمع:انته لا تريد رؤيتي انا ....سوف....
ماكملت جملتها وطاحت من طولها صرخ زايد وهو يقرب منها في محاوله انه يمسكها قبل لا اطيح لاكنه مالحق وطاحت على ارضية المطبخ
زايد:نووووور
حذف زايد العكازه وقعد على الارض قريب منها وهو يفرد ريله المجبسه
زايد وهو يحركها:نووور يانوووور....لحووووه شبلاهااااا
نووور نووور
دور زايد تيلفونه في جيوبه لاكنه مالقاه
زايد:نووور نوووور شبلااااج نووور
صرخ بصوت عالي على امل ان خليفه يسمعه
زايد:خليفاااااااااااااااااه....فهـــــــــــــــــ ـــــــــــــد
التفت الها وهو محصل صعوبه في قعدته على الارض سحبها وحط راسها على ريله
زايد:نوووور نوووور الله يخليج قومي عاده...شووو صارلج؟
فتحت نور عيونها شوي شوي ودمعتها تنزل بسرعه وتمت اطالعه وهيه راسها طايح على ريله
شهقت يوم عرفته وتمت اتصيييح
زايد:نوووور وبعدييين ليش اتصيحيييين؟؟؟
قعدت بسرعه وتمت تتكلم وهيه تزحف لين الثلاجه الي كانت قريبه منها وسندت ظهرها عليها وهيه اطلع كل الي في خاطرها عليه تمت اتلومه واتلومه وهو فاتح عيونه ايطالعها
زايد:انتي شو تقولييين ؟؟
نور ماسكتت وكملت كل كلامها الي كان كله باكستاني وماكان يفهم امنه غير مااااه وباااه
زايد:نووور عن الرطينه هذي انا ما افهم شو تقولين
تمت اتاشر له وتاشر لقلبها وهيه اتصيييح بحرقه وتهز راسها كانها تعاتبه
عصب عليها:بــــــــــس عاااده...قلتلج ما افهملج شو تقولين بتنطميييين ولا اعطيج كف على ويهج
نور ماسكتت لانها ماطلعت كل الي في خاطرها واستمرت اتعاتبه وتلومه وهو مش فاهم شي كان مستغرب وهو ايطالعها تتكلم بلغه ماتعود يسمعها منهالاكنه اخر شي ضحك
زايد وهو يضحك:ياحماااره اقولج ما افهملج
حطت نور ايديها على ويهها وانتحبت شوي
وتم ايطالعها وهو عاض على شفايفه مايعرف شو يقولها
بعدها رجعت اتكمل كلامها بعد بالباكستاني لاكن المره هذي كانت هاديه
وكان كلامها المره هذي وهيه تردد كلمة الله غيييير كانها كانت تضربه بكلامها في قلبه مايفهم شو تقول لاكن الكلام كان له اثره في قلبه
زايد وهو يقرب منها:خلاص خلاص عاده
مسكها ويرها لحضنه وتمت اتصيييح وهو يهديها
زايد:خلاص يانور خلاااص انا مابمد يديه عليج ولا بواقعج مره ثانيه خلاااص الله ايخليييج
تمت اتشاهق في حضنه لين هدت وهو يمسح على راسها ايهديها
هز راسه مستقرب كيف انه اول مره في حياته يتعاطف مع حد بالشكل هذا وهو مش فاهم شو سالفتها
بعد ماهدت كليا رفع ويهها له وتم ايطالعها وايطالع عيونها وويهها المحمرتلاقت نظراتهم مع بعض وابتسم الها
زايد:والله مافهمت غير ماااه وباااه والله هههههه
سحبت نفسها امنه بسرعه ووقفت وطلعت من المطبخ
زايد:تعاااالي وين بتروحين انا ريليه عويج والعكاز مادري وين عقيته
رجعتله
نور:ماذا تريد؟
رفع راسه الها:هاااه رديتي يعني بعدج تتكلمين عربي؟
نور:قلت ماذا تريد؟
زايد:تعالي ساعدينيه اوقف واعطينيه العكاز
قربت امنه نور ومدت ايديها له ومسكهن ووقف واول ما وقف مجابلنها اختل توازنه وطوقها بيديه على اساس ايسيطر على وقفته
زايد وعيونه في عيونها:احمممم اعطينيه العكاز
كان ايحس بفرحه داخله ومايدري شوسببها هل هو اعترافها بحبه
تركها ويابتله العكاز وراح لين الطاوله الي عليها الاكل
زايد وهو يقعد:مابتين تاكلين؟
هزت راسها بلااا
زايد:انزين قعدي
بصوت متشرط:سابقى في الداخل
وراحت عنه داخل
بعدها اجتمع الكل في صالة خليفه وحس خليفه ان نفسية زايد اوكيه لانه كان اينكت ويسولف مع فهد وياخذ علوم يدته
خبرهم خليفه عقب انه بيخلي حجزه في اليوم الثاني
نظرات خفيه كان يتبادلها فهد مع اليازي يوم ايكون الكل غافل وكان لهذي النظرات المفعول لتحريك المشاعر اكثر
اقترح عليهم خليفه انه ينقلهم لشقه وحده لاكن زايد رفض بحجة ان الشقق قريبه من بعض وان فهد واليازي هب يهال ينخاف عليهم
همس عقب خليفه لزايد ان الشيطان شاطر ويمكن ايصير شي
زايد:وصااار يااخي حرمته
خليفه:بس عرسهم ماجل يا زايد فهد وراه دراسه
زايد:ياريااااال دراسة شوووه وخرابيط شوووه وين احنا عايشين خلها تمشي
خليفه:انته اليوم هب صاحي...لا يكون وانته بحالتك هذي سويت شي
ضحك زايد:هههه لا يارياااال ...اورط عمريه معاها ليش وانا ادري اننا مابنتم مع بعض دوم
خليفه:شقصدك؟
زايد:قصديه واضح ...نور مش زوجتيه الدائمه يعني ماتصلح لمستوايه انا لازم اتزوجوحده على مستوا
خليفه:ونور؟
زايد:مادري شو بسوي معاها؟
خليفه:خماااااام وانته وين بتحصل وحده تسوا ظفرها
زايد وهو ايطالع جدامه:زوجتيه لازم اتكون على مستوا ووايدين الي يتمنون قربيه
خليفه:والله انا قلته من قبل الرمسه معاك ضايعه
على الليل تم زايد منسدح على الكرسي برا في الصاله ايتابع فلم وطلب من نور تيبله فراش لان الكرسي عجبه
نفذت طلبه ودخلت عقب داخل
فهد وخليفه بعد كانو ايتابعون فلم واليازي يتهم وتمت قاعده شويه واول ماحس فهد ان خليفه انتباهه للتلفزون استرق بعض النظرات الها وحست اهيه ان قلبها بدا ايدق وزاد توترها وقامت رايحه لغرفتها
على اليوم الثاني راح فهد مع زايد للتمارين الطبيعيه وطلع خليفه يشتري بعض الهدايا لليهال ول ول
وعلى الليل متاخر كانت طيارته وطبعا خليفه ماارتاح الا يوم نقل فهد للشقه الثانيه وطلب من زايد ونور ينقلون للشقه الي كان فيها عند اليازي كان الوقت في الامارات فترة الضحى
استقبله اخوه ابو فهد وراح معاه للبيت تم خليفه ايكلم ابو فهد عن احوال زايد واحوالهم اهناك
وبعد ما وصلو نزلو داخل
خبرت الخدامه نوره ان خليفه وصل ومعاه ريال كانت في المطبخ وطلبت من الخدامه تيب شيلتها ونقابها
طلعت وسلمت عليهم خليفه بدا قلبه ايدق من سمع صوتها لاكنه بعده الغيره ذابحتنه من سالفة الريال
ابو فهد:تعالي يابنتيه اقعدي....يابنتيه اسمحيليه ترانيه مقصر معاكم وانا والله ييت المره الي فاتت وحصلت اليهال بروحهم في حجرتهم وقعدت معاهم ويوم قلتلهم خالتكم وين قالو ان لبنيه الصغيره مريضه وزاعت عليج
نوره تمت اطالعه:انته...انته الي ييت هذاك اليوووم
وتلاقت نظراتها بنظرات خليفه الي كان متفاجئ ومنصدم
ابو فهد:اليهال ماقالو لج؟
نوره:لاااا انا انا قالت اليه الخدامه بس قالت ريال وماتعرفه مايا في باليه ان اليهال شافوك ولا هم قالو انهم شافوك
ابو فهد:هيييه كنت مستعيل عنديه شغل ولا جان رقبناج لين تطلعين
تلاقت نظراتها بنظرات خليفه الي حس انه مستحي منها
نوره بمزح:هههه ياعميه يبتليه الشبهات
ابو فهد:محشووووومه يابنت على انتي بنت عرب حشام وابوج ريال والنعم امنه ينقطع لسانه الي بيب طاريج بالشينه
نوره:ههه امزح معاك عميه اقرب بيبلكم لقهوه
ابو فهد:لا يابنتيه انا مستعيل بروح البوشيه....اليهال اخبارهم
نوره:الحمدلله يا عميه ازمه وعدت علينا ضربهم جدري الما وكل يوم واحد طايح مصخن بس الحمدلله كلهم الحين بخير
تفاجئ خليفه بالي يسمعه وتم ايطالعها:جدري الما وليش ما قلتوليه؟؟
نوره:مابغينا نشغلك وانته في سفر مع مريض
ابو فهد:هيييه يابنتيه فيج الخير وانتي ماقصرتي معاهم الله يحفضج الهم ويحفضهم الج
نوره:امييين يا عميه والله انا ماريد من هالدنيا الا نهم ايكونون بخير تراهم في الذمه وايتام
بعد ما التفت ابو فهد رايح اتلاقت نظراتهم مره ثانيه بس في صوت غثيث سمعوه مع طلعة ابو فهد
اميره وهيه مندفعه داخل:خلييييييفه
التفت الها متفاجئ:هلا اميره
وكانت امها وراها الي كانت مستغربه من الريال نفسه طالع من عندهم
نوره التفتت وراحت داخل
اميره:حبيبي حمدلله على السلامه
خليفه:الله ايسلمج يا اميره
سلم خليفه على خالته وهمستله:منو الريال الي طلع من تو؟
خليفه:اخويه ابو فهد
الخاله:هاااا اخوك!!!!!ّ
خليفه:عرفتيه يا خالتيه؟
الخاله:حشا عليه وانا وين قد شفته من قبل؟
خليفه:هب اهو الريال الي شفتيه المره الي فاتت طالع من اهنيه؟
الخاله:اهوووو؟؟؟ مادري يا ولديه انا ماشفته المره الي فاتت زين شفت زوله بس
خليفه بحرقه:يا خالتيه الريال الي شفتيه كان اخويه ابو فهد ياي يطمن على لعيال
الخاله:هييييه فيه الخير ياحليله....اااا انته علومك يا ولديه ان شالله ماتعبت من السفر
خليفه بخاطر متضايق:الحمدلله مانشكي باس
اميره:وليش ما قلت اليه انك بتي اليوم الله يسامحك
خليفه:عيل شدراج انيه ياي الحين
اميره بارتباك:ااا انا كنت يايه مع اميه نطمن على اليهال
خليفه:وليش يا اميره ماقلتيليه ان اليهال كانو تعبانين
اميره:هاااه تعبانيين منو قالك انا دوووم اشوفهم بخير ومافيهم شي
خليفه:كيف مافيهم شي والحراره لاعبه ابهم
اميره:جذب مافيهم الا العافيه
خليفه:فيهم جدري الماي وتقولين بخير مافيهم شي
انصدمت اميره:هاااه جدري الماي !!!؟؟؟ انا انا انا ما حبيت اروعك
سكت خليفه وهو يحس بغصه صار مش فاهم شي من حوليه
خليفه:اسمحن اليه بروح اتسبح وابدل ارتاحن البيت بيتكن
طلع خليفه فوق وكانت نوره طالعه من قسم الضيوف شاله فطامي الي توها واعيه
همست اميره:اميه سمعتي جدري الماي اخااااف اخاف يعادونيه
الام:يا خبلا انتي ضربج من زمان مايعادي مره ثانيه
اميره:اوف اشوا
الخاله بصوت عالي عشان نوره تسمع:اميره شترقبين فديتج الحقي ريلج وطالعيه توه ياي من السفر اكيد يباج عداله همزيه ودوسيه يمكن السفر هاد حيله والحرمه تعرف اتريح ريلها
اميره بخجل مصطنع:يوووه اميه استحي
الخاله:تستحين من شوووه تراه ريلج ياله سيري له
اميره:عادي اميه
الخاله:نعم عادي ريلج يابنتيه ريلج اتوكلي وانا بتم اهنيه اسنع المطبخ
اميره:ان شالله اميه
وركضت اميره صاعده السلم وحست نوره بروحها بتطلع تجاهلت الوضع وراحت المطبخ
مر الوقت وتمت نوره مع فطامي تنتظر رجعة اليهال من المدرسه واول مارجعو ودتهم داخل وبدلت الهم ملابسهم ورجعو للصاله عشان اتغديهم وسمعت صوت خالة خليفه اتواقع في المطبخ
دخلت نوره عليهم والتفتت الها الخاله
الخاله:شووو هالغدا هذا غدا اتسمينه
نوره:اسمحيلنا يا خاله مادرينا بييتكم وهذا غدا اليهال
الخاله:عنبوووه وراعي البيت شو تبون اتغدونه عيش ابيض ودياي مشواااي
نوره:الحمدلله على النعمه ...لا يهمج راعي البيت بنعوضه مره ثانيه والمره هذي طلبنا له سمج مشوي
الخاله:لاااا والله تبين اتاكلينه اكل مطاعم وخياس اسميه ما كله
نوره:عيل يا خاله ولد اختج اعتبريه في ضيافتج اليوم وطالعيله عيشه على كيفج امبونيه انا مش مسؤله عنه
الخاله:واااايه لا قويتي ماعليه يامسودة الويه انا بخليه ايسنعج عدل
نوره:لو تسمحين انا مش مسودة الويه واحشمي الفاظج
الخاله:والي سوييتيه مع الريال هب سواد ويه
نوره:لا هب سواد ويه انا حرمته وهو الي طلبنيه
وغياض الها
نوره:وطول ما انا حرمته ويريدنيه مابقول له لاااا...
الخاله:ماعليه ماعليه
طلعت نوره لليهال برا وهيه مقهوره من خالة خليفه ورفعت نظرها فوق وشافت خليفه نازل وشكله متسبح ومبدل لبسه بثوب عربي وبدون سفره كان فرحان وهو يشوف اليهال جدامه التفو حوليه وتمو ايحبونه ويلون عليه وهو ايحبهم بشوق وقلبه معورنه على اثار جدري الماي الي كان له بقايه على وجوههم
خليفه:فديييتكم ماتشوفون شر
احمد:عميه شو يبتلنا
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك