رواية ورود الامل برائحة الالم -27
ناظرت الفله الفخمه اللي أقرب مايقال لها قصر مصغر على كبرها وفخامتها أطلقت آه كبيييره بعدها قالت:ناس تلعب بالفلوس وناس ماتحصل شي تاكله ... آآآآآآه لو ماعرفتك ياالوليد وحبيتك كان أنا ألحين في دوامي أسولف مع جمانه .. ياحلو العزوبيه ويازينها والله ماورا الزواج الا وجع القلب
رفعت جوالها واتصلت بجمانه رنه وحده ووصلها صوت جمانه اللي صرخت:هلا هلا هلا بالعروس
غيداء ابتسمت:هلا بك
جمانه:وينك يابنت من زمان عنك والا من لقى أحبابه نسى أصحابه
غيداء(أي أحباب واللي يرحم والديك):أنا في السعوديه
جمانه بصدمه:صدق!!
غيداء:إيه من قبل أمس
جمانه:قلتي شهر عسل بدبي وقلنا يلا معليه لكن شهر عسل اسبوعين مالك داعي صراحه
غيداء:عشان زواج أخته كان أمس
جمانه شهقت:عبير تزوجت!!
غيداء:لا مو عبير رؤى
جمانه:عنده أخوات غير عبير
غيداء:إيه أخت رؤى كبير ومتزوجه وشيخه لسى صغيره
جمانه:ماقد شفتها رؤى هذي
غيداء كشرت:أحسن لك مغروووره
جمانه:والله!!عكس عبير أجل عبير عسسسسل هالإنسانه
عبير(كلهم عايله غريبه):........
جمانه:آلو غدو آلو
غيداء:معك .. معك
جمانه:اسمعي بأقولك سالفه
غيداء:ايش؟؟
جمانه:فيصل.....
غيداء ابتسمت(ياليتني وافقت عليه أبرك لي من الذل اللي عايشته):..........
جمانه بطفش:غدو وينك؟؟كل شوي تسرحين
غيداء:معليه كملي
جمانه:الوليد عندك؟؟
غيداء بروعه:لا
جمانه:ههههههه شفيك ارتعتي؟؟
غيداء:كملي بس
جمانه:ايه فيصل خطبني
غيداء بصدمه:خطبك!!
جمانه:إيه ليش كذا مصدومه؟؟
غيداء بقلق:وافقتي؟؟
جمانه:طبعا لا تستهبلين
غيداء غمضت عيونها براحه ماتدري وش سرها:........
جمانه بشك:غيداء لا يكون تحبينه!!
غيداء:حشا رقاصه أنا من واحد لواحد
جمانه:اسمعي طيب بريكي خلص لازم اسكر مع السلامه
غيداء:مع السلامه وسكرت
ساحت في جلستها وبالها مشغول(فيصل خطب جمانه!!..ليه طيب مو هو يقول يحبني؟؟_ابتسمت باستهزاء_يعني تبغينه يجلس يبكي على الأطلال ولايتزوج!!هو متزوج متزوج ... طــ.......)
قطع أفكارها الوليد كاشخ ولابس وريحة عطره ديور الرجالي سابقته وينقز الدرجات ... حست بدقات قلبها تدق مع قفزاته العاليه وانتفضت أطرافها وارتبكت:......
الوليد من دون مايناظرها:السلام عليكم وكمل مشيه
غيداء تحس انه يهينها بهالطريقه وقفت:لحظه
غيداء مشت له بتوتر لكن حاولت تكون ثابته:إلى متى بأظل على هالحال؟؟
الوليد فتح عيونه والتفت عليها وقال:وش تبيني أسوي لك مثلا؟؟
غيداء ماكانت تناظر إلا هيئته لأن باب المدخل وراه عاكس الشمس فما تناظر إلا سواد هيئته .. رفعت أكتافها:أي شي أنا طفشت
الوليد قرب منها:انتي اخترتي هالطريق وتحملي
غيداء حاولت تركز وتناظر ملامحه:يعني بأظل كذا مقابله أربع جدران
الوليد يرد لها:وش تبغين من واحد مايفرق بين الحلال والحرام!!
غيداء ماعرفت وش تقول:.....
الوليد:سوي اللي تبغين أنا مالي شغل_رفعت اصبعه بتهديد_إلا السواق ماأرضى تروحين معه وحدك فاهمه!!
غيداء دخلت ايديها بجيبها:طيب
الوليد ناظر ايديها ..في لغة الجسد اللي يدخل ايديه في جيبه علامة التحدي.. والوليد كان خبره في لغة الجسد:شوفي أنا عارف إنك بتعملينها من وراي_اشر باصبعه يهدد_لكن والله ان عملتيها ياويلك وياسواد ليلك وطلع
غيداء انصدمت(شدراه اني باعملها من وراه!!بسم الله جني)تنهدت وناظرت الفله بعيون دامعه:الظاهر مالي إلا النت
الوليد ركب سيارته وهو يفكر في الفكره اللي جت في باله(العنود مصيرها متزوجه ليش ماأزوجها أنا اللي يعرف قيمتها ويقدرها أحسن ... بس وشلون بأقول لــ....؟؟كيف بأنقله الفكره أخاف يفهمني غلط ... لا ياالوليد ..... عاقل وفاهم وتفكيره راقي وان شا الله بيتفهم)
>>الله يستر منك ياالوليد واللي في راسك!!<<
وقف سيارته في باركنق القصر وشاف سيارة عواد واقفه ابتسم ونزل وتوجه لمدخل الرجال فصخ نظارته ودخل وكان عواد جالس مع أبوالوليد قال بصوت مرتفع:حياالله المعرس
عواد ابتسم وقف:حيا الله المعرس
الوليد ضحك وتصافحوا وقال الوليد:وجهك منور
عواد:قايلك الزواج يحلي
الوليد:هههههههه
أبوالوليد وقف:زين جيت ياالوليد أنا بأروح للشركه_سلم على عواد_تروح وترجع بالسلامه ومااوصيك على رؤى
عواد:لاتوصي حريص ياخال
أبوالوليد:مع السلامه
الوليد+عواد:مع السلامه
طلع أبوالوليد والوليد مسك عواد وجلسه:هاه كيف البارح من غلب؟؟
عواد:ههههههه أفا عليك خويك سبع
الوليد بحماس:صدق!!
عواد:من بعد العشا
الوليد:ههههههه الله يخسك عجل
عواد:أفا عليك أجل على أخر عمري تغلبني مره
الوليد:هههههههه
عواد بتردد:وأنت ياالوليد!!ماحصل وقت اسألك
الوليد نزل نزل راسه وتنهد:خليها على ربك يارجال
عواد بحزن:كنت حاس
الوليد وهو منزل راسه:ماطيقها ياعواد مااطيقها تصدق اني للحين مالمستها
عواد:أوما!!
الوليد:والله أتقزز منها ياخي
عواد:يعني بتظل كذا
الوليد:بأطلقها
عواد شهق:ايييييييش!!ولود على بالك الطلاق لعبه اصحى ياالوليد
الوليد رفع راسه:ماحصل حب ياعواد ماحبيتها
عواد:مولازم تحبها أهم شي التفاهم والتوفيق
الوليد باندفاع:لا ياعواد لازم حب وشلون تبغانا نتفاهم وأنا ماأحبها أهم شي في الزواج الحب عشان يحصل التفاهم والتوفيق
عواد:يعني بتطلقها وتسوي اللي في راسك
الوليد نزل راسه:مافي إلا هالحل وهي طلبته بنفسها
عواد:يعني بتظل على هالوضع عزابي وعلى ذكراها
الوليد:وش أسوي ياعواد؟؟عجزت أنساها عجزت كل شي يذكرني فيها_ناظره_تدري أفكر أهاجر
عواد:إييش!!وش تهاجر وش خرابيطه؟؟اهجد مكانك بس
الوليد:والله يمكن أنساها هنا كل شي يذكرني فيها
عواد:اهجد بس بلا هجره بلاخرابيط
الوليد زفر:......
عواد ناظره وابتسم بخبث:أجل ماتزوجت قبلي
الوليد انفجر ضحك:هههههههههه وأنت هذا اللي هامك_وقف_بأروح أنادي رؤى
عواد:والله تسوي خير بنتأخر على الطياره
الوليد:مو لو انك رايح بالطياره الخــ.....
عواد قاطعه:ولود أتوقع حاكين بهالموضوع ومنتهين
الوليد:عنيد ودخل ينادي رؤى
داخل رؤى جالسه مع أمها تسولف عن الزواج وخرابيطه وعبير جالسه مستمعه فقط
دخل الوليد:السلاااام
الكل:وعليكم السلام
الوليد:يلا رؤوو عواد ينتظرك
رؤى وقفت:أوكي
الوليد راح وأم الوليد حضنت رؤى وبكت:انتبهي لنفسك
رؤى باست راسها:حاضر
بعدت عنها أم الوليد ومسحت دموعها .. عبير وقفت وناظرتها وهي ماسكه دموعها .. رؤى كانت نفسها ترتمي بحضنها أو تودعها عدل بس الفجوه اللي بينهم كبييييره مدت ايدها وناظرتها بغرور:.....
عبير صافحتها(ليه يارؤى؟؟ليه الغرور؟؟):......
رؤى لبست عبايتها وطلعت ودعها الوليد وودعت أم الوليد عواد وتوجهوا لبيت عواد ودعوهم عالسريع لأنهم تأخروا على طيارتهم وتوجهوا للمطار ومن المطار لتركيا .. عواد ماكان راضي على عباية رؤى لكنه سكت وأجل الموضوع لبعدين
العصـــر
الوليد طلع من المسجد وتوجه للقصر من دون تفكير وقف السياره عند بوابة القصر ودخل غرفة البواب المصري وقال بلهجه صعيديه متقنه:السلام عليكوم يا عبد الرحمن وثقل الميم
عبدالرحمن فز من مكانه:العم الوليد أهلا وسهلا أهلا وسهلا
صافحه الوليد بايده:ازايك ياعبدالرحمن؟؟
عبدالرحمن:هههه الحمدلله ماشا الله عليك دا انت بتتكلم صعيدي كويس
الوليد:أومال_رمى عليه المفتاح_نظف السياره الله لايهينك
عبدالرحمن أشر على راسه:حاضر حاضر
الوليد طلع من غرفته وناظر الشارع الطويل والنافوره الفخمه ابتسم وركض بسرررعه إلى ان وصل لمدخل القصر ونقز الدرجات العاليه ودخل شاف أمه جالسه تشرب شاهي وعبير بجنبها تناظر البلازما وواضح من وجهها الطفش صرخ:سلااااااااام
عبير التفت وصرخت:ولوود الحمدلله انك جيت
ابتسم وجلس بجنبها وقالت عبير بفرح:الحمدلله انك جيت كنت بأمـ......
قاطعتها أم الوليد وهي تقول بحزم:الوليد ليه طالع وتارك زوجتك؟؟هذا وتوكم عرسان
الوليد هذا اللي ماحسب حسابه بلع ريقه:آآآآ....غيداء غيداء
عبير انقذته:سجلت في النادي؟؟
الوليد ناظرها وقال بسرعه:إيه إيه_ناظر أمه_سجلت في النادي
أم الوليد عقدت حواجبها:نادي!!
عبير:إيه ماما هي تقول انها سمنت من بعد الزواج
أم الوليد مشت عليها لأن فعلا غيداء كانت سامنه مررره من القهر تطلع حرتها في الأكل:......
عبير:ولود ماقلت لي من كان يربط لك كوتشاتك في دبي؟؟
الوليد:أووه والله اني عرفت قيمتك صرت ماألبس إلا صنادل أوكوتشات شمع
عبير ضربته على خفيف:عرفت قيمتي في كوتش مالت عليك
الوليد:ههههههه
أم الوليد ذكرت موضوع نايف قالت بابتسامه:عبور
عبير التفتت لها مبتسمه:لبيه
أم الوليد زادت ابتسامتها:جايك خطاب
عبير اختفت ابتسامتها والوليد صرخ:أوووووه ياحركتات مين اللي جا للموت برجوله؟؟
أم الوليد:نايف ولد خالتك
عبير همست:نايف
الوليد:نيوف والله انك مو هينه يا عـ......
قاطعته عبير وهي تقوم بسرعه وتطلع الدرج:.....
أم الوليد ضحكت توقعتها خجلانه والوليد استغرب يعرف عبير مو خجوله لهدرجه لكنه قال يمكن عشان السالفه فيها زواج وطنش الموضوع
عبير كانت تطلع الدرج وهي تركض بسررعه ودموعها على خدها(أنا أتزوج غير مهند مستحيل مستحيل)فتحت باب غرفتها وقفلته بقووه ورمت نفسها على السرير تبكي(أتزوج غير مهند مستحيل .. ومين نايف صديقه؟؟لا مستحيل)بدت تبكي بصوت عالي لفتره بعدها رفعت الجوال واتصلت على العنود ثواني ووصلها صوت العنود:هـ...
عبير قاطعتها وهي تقول بصوت مبحوح زياده على البحه الطبيعيه بصوتها قالت بهدوووء:العنود مشغوله؟؟
العنود خافت من صوتها قالت بخوف:خير عبور شصاير؟؟
عبير ودموعها تنزل بكثافه:مشغوله؟؟
العنود:لا
عبير:أوكي أقابلك بكوفي المساء وسكرت على ولبست عبايتها ورفعت شنطتها ونزلت بس من الباب الخلفي عشان الوليد وأمها مايشوفوا دموعها
السايق كان جالس على كبوت السياره يضغط بجواله التفت وانصدم من منظر عيونها الحمرا مرررره وتنح فيها وماحس بنفسه إلا على صوت عبير وهي تقول بهدوووء:على كوفي المساء ياطاهر بسررعه
طاهر فتح لها الباب:حاضر
ركب وحرك بسررعه
العنود سكرت من عبير ولبست عبايتها بسرعه وخذت شنطتها ونزلت تركض أم العنود وأبوالعنود جالسين في الصاله يسولفون ومرت من عندهم حطت شنطتها ولبست عبايتها:بأروح لكوفي مع عبير اتصلت فيني تبكي
أم العنود:أوكي بس طمنيني
العنود لفت طرحتها:أوكي وطلعت ركبت سيارتها:على التحليه بسرعه
نتركهم إلى أن يوصلون مشوارهم ونرجع لقصر السيجدي
شيخه نزلت من الدرج وضيقت عيونها تناظر من في الصاله لكن ماقدرت قربت وبان لها الوليد ركضت ورمت نفسها في حضنه:ماشا الله مجتمعين
الوليد:شيوخ شفيك؟؟ملاحظ استيعابك بطئ_بشك_تناظرين زين!!
شيخه:لا ماأناظر إلا اذا قربت من بعيد ماأشوف إلاضباب
أم الوليد بخوف:وليش ماحكيتي؟؟هذي عين مافيها لعب
شيخه رفعت أكتافها:قلت مومهم
الوليد:لاشلون مو مهم!!بكره أوديك للدكتور وبالمره نطلع نتمشى من زمان ماتمشينا مع بعض
شيخه باست خده:أموت عليك
أم الوليد:الوليد ترا وراك زوجه بتتركها طوال هالوقت لوحدها
الوليد:آآآ....في النادي بيمديني عليها .. الا كم الساعه؟؟
أم الوليد:خمس
الوليد رفع شيخه:أووه يلا استئذن على ماأجيب غيداء من النادي<<صدق الرجال
أشر بايده لشيخه:مع السلامه ياحلوه وعلى موعدنا بكره بعد صلاة العصر مباشره تكونين جاهزه
شيخه بابتسامه طفوليه:أوكيشن
الوليد ضحك وطلع متوجه للمسجد بعدها للإستراحه
كوفي المساء
وقفت سيارة العنود ورفعت الجوال بتتصل على عبير لكنها لمحتها ..تنزل من سيارتها البورش وهي منزله راسها.. فتحت الباب بسرعه ونزلت لها عند مدخل الكوفي:عبور
عبير رفعت راسها وناظرتها ورمت نفسها في حضنها .. العنود انحرجت كل الناس يناظرونهم لفت ايدها على خصر عبير ودخلتها داخل المقهى جلسوا على طاوله وسكرت العنود الستاره وجلستها على الكرسي وقالت بخوف:عبور شفيك؟؟
عبير حطت راسها على الطاوله وبدت بنحيب يقطع القلب:.....
العنود بنفاذ صبر:عبير شفيك؟؟
عبير:با..بـ....بـ....با....وغطت وجهها تبكي
العنود نزلت دموعها:الوليد فيه شي؟؟
عبير حركت راسها بالنفي:....
العنود حست انها ارتاحت:أمك..رؤى..شيخه..أبوك فيهم شي؟؟
عبير حركت راسها بالنفي:....
العنود:أجل شفيك؟؟خوفتيني!!
عبير تبغى تحكي بس ماقدرت:بـ...مـ..._حركت راسها بيأس بمعنى ماأقدر وكملت بكي_
العنود بشك:مهند!!
عبير حركت راسها بايجاب ومستمره بالبكي:.......
العنود تركتها تكمل بكي لمدة ربع ساعه بعدها هدت عبير وقالت:خالتي...وماما_شهفت بالبكي_نايف...زوجي...مهند..والـ....
العنود قاطعتها وهي تمد لها كاس مويه:شوي شوي مافهمت شي
عبير شربت المويه كلها دفعه وحده وحمحمت تخفف البحه اللي في صوتها وقالت:نايف ولد خالتي_شهقت_خطبني
العنود:طيب
عبير ناظرتها وصرخت:مستحيل أتزوج غير مهند مستحيل أنا أعشقه تعرفين شمعنى أعشقه!!لو يقول ارمي نفسك في النار أنا مستعده ارمي نفسي عشان عيونه
العنود نزلت دموعها:حاسه فيك .. صدقيني حاسه فيك
عبير حطت راسها بين ايديها ودموعها تنزل:طيب وش أسوي؟؟
العنود:وافقي
عبير ناظرتها وقالت باستنكار:أوافق!! مستحيل
العنود ودموعها على خدها:ياعبير هذا اللي كاتبه ربك وش يضمنك ان مهند يحبك؟؟ووش يضمنك انه بيخطبك؟؟بتظلين ترفضين الخطاب تنتظرينه وهو ماطق لك خبر وحتى لو خطبك خلينا نحكي بصراحه أهلك بيوافقون على مريض نفسي؟؟
عبير:أنا اللي بأتزوج مو اهلي
العنود:عبير انتي بنت يعني مالك إلا أهلك أنت مو ولد عشان تقولين بأهاجر أو بأهددهم بشي معين لا!!..اصحي وفكري بعقلك مو بقلبك
عبير وقفت ورفعت شنطتها وقالت:أنا أفكر بعقلي وقلبي للأسف ياالعنود الدنيا خلتك سلبيه وماتؤمنين بشي اسمه أمل
العنود وقفت معها:وليش ماتقولين هذا الصح؟؟انتي تكذبين على نفسك بالأمل_اشرت بايدها للمكان اللي حولها_انتي شايفه شي حولك يستاهل الأمل!!_أشرت باصبعها على راسها_فكري بعقلك
عبير دفت ايدها بعنف وقربت منها:اللي أشوفه شي واحد يسمى يأس يسمى غباء وطلعت بسرعه
العنود ناظرتها وهي تطلع بعدها جلست وحطت راسها على الطاوله وبدت تبكي
عبير طلعت للسياره ومشى وراها ثلاث شباب قال واحد:الحلو ليه يبكي؟؟
الثاني:آآآخ لو اعرف اللي بكاه لأخليه يندم على الساعه اللي انولد فيها
الأول:دموعك غاليه ياالغاليه
عبير التفت وبالشنطه على وجهه الأول وقالت:حقير وكملت طريقها
الأول مسك فكه يتأكد ماصار له شي من قوة الضربه وأخوياه انفجروا ضحك عليه الأول طلع من عيونه شرار من العصبيه ومشى وراها أخوياه مشو وراه وقال الثالث:شكلـ.....
وسكت وهو يناظر السياره البورش الفخمه وحتى أخوياه تنحوا من فخامتها وظلوا يناظرونها إلى ان اختفت وقال الأول:حشا وشهالسياره؟؟هذا وهي بنت أجل أخوها كيف؟؟
الثالث:ماعرفتها هذي بنت السجيدي دايم أشوف هالسياره واقفه عند قصرهم
الثاني ناظر الأول:بنت السجيدي هاه اهجد بس اهجد
الأول ناظر الشارع بغيض ورجف الزفلت برجله بقهر ومشوا
نرجع للعنود بالكوفي
رن جواله وردت بصوت مبحوح:آلو
أم العنود بصوتها الهااااادي:العنود وينك ياماما تأخرتي؟؟
العنود:في سياره ياماما راجعه
أم العنود بخوف:وش فيه صوتك؟؟تبكين؟؟
العنود:لا مافيه شي يمكن لاني ساكته فتره
أم العنود ماصدقتها بس قالت:أوكي انتظرك وسكرت
العنود سكرت ولفت لثمتها ورفعت شنطتها وطلعت ركبت السياره:للبيت
السايق شغل السياره:حادر
قصر السجيدي
وصلت عبير للقصر ونزلت من سيارتها وهي تمشي ببطئ ومنزله راسها وتفكر(أرفضه!!..بس وش سبب رفضي؟؟مافيه سبب مقنع_رفعت راسها وناظرت السماء اللي ظلمت_ياااااااااارب انك تساعدني وتهون علي هالمصيبه اللي فوق راسي)دخلت غرفتها وفصخت عبايتها وتمددت على السرير ودموعها تنزل بكثافه وبدون صوت
نرجع للعنود أول مارجعت لبيتها شافت أمها واقفه في الصاله وتدور وقلقانه .. أم العنود رفعت راسها وأول ماطاحت عينها عليها ركضت لها ومسكت ايدها وقالت بخوف:عنودي ماما .. فيك شي؟؟صارلك شي؟؟
(أم العنود من بعد اختفاء العنود صارت تخاف على بنتها خوف موطبيعي ونقدر نسميه وسوسه)
العنود ابتسمت غصب تطمن أمها:لا ماما مافيني شي الحمدلله
أم العنود بشك:أكيد!!
العنود عذرت أمها:ماما هذاني قدامك مافيني شي
أم العنود:عبور شفيها؟؟ليش متصله عليك تبكي؟؟
العنود:هههههه الله يخسها نازله عليها الدوره وبطنها يألمها ونفسيتها زفت واتصلت علي
(أم العنود مشت عليها لأنها تعرف عبير اذا نزلت عليها الدوره بطنها وظهرها يألمونها بشكل فضييييع ونفسها تصير في خشمها وبس متضايقه ومعصبه)
أم العنود ابتسمت:أوكي حبيبتي روحي خذي لك شاور بارد تريحين نفسك على مابال ماأسوي عصير نعناع بالليمون ونجلس سوا في الحديقه نسولف من زمان ماسولفنا مع بعض
العنود:سوري ماما راسي يعورني ونعساااااانه وأبغى أنام_ابتسمت_بكره ان شا الله
أم العنود:ان شا الله
العنود باست راسها:تصبحين على خير
أم العنود:وانتي من أهله
طلعت العنود لغرفتها وخذت لها شاور طوييييييل وبارد وهي تبكي تحت المويه ودموعها اختلطت بالمويه البارده بعدها طلعت ورمت نفسها على السرير ونامت بروب الحمام
الوليد رجع من الإستراحه بوقت متأخر .. دخل البيت وهو عاقد حواجبه يفكر باللي ناوي عليه بكره بدل وتمدد على السرير ونام
ناموا أبطالنا بعد يوم طويل وحافل بأخبار مفرحه للبعض وحزينه للبعض
يـــوم جـــديد
وفي تركيـــا
وبالتحديد بالهوليدي ان
عواد ورؤى صحوا من النوم الظهر وقرروا يتغدون برا لبست رؤى بالطو طوييييل لتحت نص ساقها وأكمامه حاير(ثلاث ارباع)أسود بأزارير ذهبيه كبيره عطته فخامه ورزه وبنطلون جينز سكيني ولبست قبوع خفيف لأنها ماتعرف عواد متشدد في مسألة الحجاب في الخارج أو عادي عنده أي شي ... حطت لها روج وردي ومسكرا وخذت شنطتها الفيافينتو السودا وطلعت ... شافت عواد جالس ينتظرها في الصاله وهو الثاني لابس بلوزه أكمام طويله بس مرفعها زيتي وأطرافها خياطه حمرا بارزه وجنز أسود ضيق وموقف شعره الأسود الكثيف سبايكي .. ابتسمت على انه موغني الا ان ذوقه رااااقي وبرستيج ورزه وكأنه رجل أعمال معروف .. مشت له وابتسمت وقالت بدلع:يلا
عواد رفع راسه وابتسم ووقف ولاف ايده على خصرها:يلا
نزلوا تحت وسألها عواد:وين حابه نتغدا بالفندق أو بمطعم؟؟
رؤى:على راحتك
عواد ناظرها:راحتي براحتك يابعد قلبي_رفع راسه_أنا أقول نروح لمطعم لأنا بنمل من الفندق
رؤى:أوكي على المطعم
طلعوا برا ومشوا على رجليهم لأن تركيا أحلى شي فيها التنقل على الرجلين ولو بتركب سياره بتتعب والجو وأشكال الناس اللي تفتح النفس وابتسامتهم تساعدك على هالشي
عواد جر الكرسي:تفضلي
رؤى جلست:تسلم
عواد رفع المنيوم وناظرها:امممم شرايك اطلب لك على ذوقي
رؤى:أي شي يجي منك حلو .. بس لاتجيب أشياء دسمه ومقليه .. أنا أكل مشاوي
عواد:يعني ماتاكلين دهون ابد ابد
رؤى هزت راسها:يب عشان الرجيم
عواد:بس أنا عاجبني جسمك كذا مررره حلو
رؤى طارت من الفرحه أول مره أحد يمدح جسمها لكنها مابينت .. ابتسمت:عيونك الحلوه
عواد قرب منها:أكيد حلوه مو انتي عيوني ياعيوني
رؤى حمر وجهها:.......
عواد:ههههه_نادى القرسون وطلب بعدها التفت لها_أمس من أول ماوصلنا الفندق نمتي شكلك مانمت كويس قبله
رؤى بغرور:لا نمت كويس بس جسمي ماتعود على الطياره وجلستها اللي تكسر الظهر متعود على الطيارات الخاصه المريحه
عواد لاحظ نبرة الغرور اللي في صوتها ولاحظ غرورها في تصرفاتها بس قال معذوره بنت السجيدي وغرورها ماوصل لدرجة الكبر عشان أقلق وبعدين مافيه انسان كامل<<هذي كلها مبررات اختلقها عواد لرؤى عشان ماتحصل مشاكل
بعدها ساد صـــمـــت على الطاوله
رؤى تفكر في حياتها الجايه مع عواد وعواد يفكر في غرور رؤى وهو خايف انه يوصل لدرجة التكبر ... بعدها وصل الغدا وبدوا يتغدون وعواد حاول انه يغير جو الصمت بخفة دمه
الوليد صحى الظهرتروش وبدل وكشخ كعادته ونزل .. غيداء كانت جالسه في الصاله لما سمعت صوت خطواته قامت ووقفت أخر الدرج تنتظره .. الوليد بدوره احترم وقوفها ووقف:السلام
غيداء مايحتاج أشرح شعورها لما تشوفه ردت السلام وقالت:الوليد أبغاك بموضوع
الوليد أشر بايده:أوكي تفضلي
جلسوا وقالت غيداء:اسمع ياالوليد هذي موحاله أنا جالسه في البيت بين أربع جدران طفشانه وأنت تروح وماترجع إلا أخر الليل ولا كأنا متزوجين_ارتجف دقنها_صحيح احنا متفقين على الانفصال بس أنا إلى ألحين زوجتك وأنت تعاملني كزوجه في اصدار القرارات وبس
الوليد انتظرها تخلص حكيها بعدها سحب نفس وقال:غيداء انتي اللي منعتيني من القعده في البيت بمشاكلك وهواشك على الصغيره والكبيره
غيداء ماسكه نفسها لا تبكي:انت اللي خليتيني أسوي كذا بصدك عني
الوليد:غيداء أنا صريح بطبعي وكنت صريح معك من بداية زواجنا وشرحت لك وضعي وانتي وعدتيني بس ماوفيتي بوعدك
غيداء:بس..........._طقت بلسانها_طيب عطني فرصه ثانيه
الوليد:أوكي فرصه ثانيه واذا بغيتي تروحين مع السواق روحي بس بشرط تحطين عندي خبر
غيداء:اجل بأروح اتغدا عندي اهلي
الوليد كان متوقعها تقول نتغدا مع بعض أو شي مثل كذا ... وقف:أوكي روحي وأنا مواعد شيوخ أوديها للدكتور عشانها ماصارت تشوف كويس وبامشيها شوي
غيداء:طيب وراحت تلبس والوليد طلع لشيخه واخذها للمستشفى
في المستشفى
دخل الوليد وهو ماسك ايد شيخه ويضحكون .. الوليد لمح جمانه ابتسم ومشى لها مع شيخه:السلام عليكم
جمانه كانت معطيته ظهرها وايديها بجيبها التفتت وابتسمت لماشافته:أوووه المعرس أهلا ومدت ايدها
الوليد صافحها:هلابك كيفك؟؟
جمانه:الحمدلله كيفك أنت؟؟
الوليد:الحمدلله
جمانه ناظرت شيخه بنظرة تأمل من فوق لتحت:ماشا الله امداكم تجيبون عيال
الوليد:هههههه لا هذي أختي شيوخ_قال يحاكي شيخه_شيوخ هذي الدكتوره جمانه
شيخه مدت ايدها:تشرفنا
جمانه رفعت حاجبها(والله هالنتفه موهينه)صافحت:أهلا
شيخه:شايفتها في زواجك
جمانه:والله!!أنا ماشفتك
شيخه بغرور:لأني مو أي أحد
الوليد ضحك وقالت جمانه بقهر:يعني أنا أي أحد هاه
شيخه ببرود:تقدرين تقولين_اشرت على نفسها_أنا أخت الوليد المعرس
جمانه:فرحانه بأخوك مع وجهك
شيخه رفعت كتفها:يحق لي_اشرت بايدها_شوفي الناس وشلون تناظره
جمانه:سبحان الله كلكم عايله واثقه
شيخه:اذكري الله
الوليد:هههههههه يلا بس شيوخ تأخرنا على الموعد
يتبع ,,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك