رواية نور -26
خليفه:بتم عند زايد ماتريد اتخليه
اليازي:وعادي سامحين اتبات عنده
خليفه:لا مش عادي بس نور يوم تبا الشي محد يقدر ايردها عنه ...يزوي فيج اتروحين معايه لين الجمعيه ناخذ اغراض للشقه
اليازي:هيييه عادي
خليفه:مش تعبانه؟
اليازي:لا اريد امشي واغير جو
خليفه :ياله عيل خلينا نلحق انوقف تكسي وهو بيدلنا على الجمعيه
استانست اليازي مع عمها خليفه في الجمعيه وهم يترسون العربانه من كل شي
خليفه:يزوي اتعرفين تطبخين؟
اليازي:ههه لا اكيد وييين انا والطباااخ اصلا انا مابدخل المطبخ من عقب الي صار اليه فييه
خليفه:افااا يعني انا بتوهق بالمطبخ
اليازي:عميييه العالم اطورت خلنا نتغدى ونتعشى في المطاعم
خليفه:واتخيييس بطونا من اكل المطاعم
طاح نظر خليفه في طرف الجمعيه على محل للهواتف
خليفه:زيييين محل تيلفونات تعالي اختاري لج تيلفون ولنور واحد
اليازي متفاجئه:اليه انا؟
خليفه:هيييه فديتج احنا في سفر ولازم كل واحده منكن ايكون عندها تيلفون عشان انعرف نتواصل
اليازي فكرت على طول في فهد لو يدري اكيد مابيوافق
اليازي:ما يحتاي عميه انا بتم مع نور دوووم
خليفه :لا فديتج احنا في الغربه واكيد انج بتحتاجيين له مايندرا بالدنيا لو يصير شي بعدين فهد حاشرنيه من الصبح
وموصي اخذلج واحد عشان تتواصلين معاه بعد
وقفت اليازي منصدمه منو الي قال فهد لاا مستحيييل
خليفه:ياله يا يزوووي تعالي طالعي الي ناسب لج
تمت اليازي اطالع التيلفونات ووقف خليفه على طرف واتصل على البيت ويوم ما شله حد اتصل على تيلفون نوره كانت الساعات الاولى من الصبح في الامارات
نوره بصوت نعسان:الوووو
انتفضت اوتار قلبه
نوره:الووو
خليفه:هلا نوره
اعتدلت نوره بسرعه:خليييفه
كان صوتها فيه لهفه حاول خليفه يقنع نفسه انه مايتوهم
خليفه:وعيتج من الرقاد؟
نوره بتوتر:هااه لا ماعليه
خليفه:اخبار اليهال؟
نوره:احمم بخيير ايسرك حالهم
خليفه:اتصدقين مانتبهت ان الوقت عندكم غير عن وقتنا اكيد عندكم الحين الفجر
نوره:هييه
خليفه:اموركم كلها زينه؟
نوره:الحمدلله
خليفه تم ساكت ماعرف شو يقول
نوره:ا اخبااار مريضكم ان شالله بخير؟
خليفه:الحمدلله بخير وعمليته باجر
نوره:ونور بخير؟
خليفه ايحس انه ذااااايب من صوتها
خليفه:بخير وماتشكي باس
تمت نوره عقب ساكته ومايسمع الا تنفسها
خليفه:نوووره
نوره:هممم
خليفه:انتي بخير؟
هزت راسها بلا
خليفه:نوووره
نوره:الحمد لله بخير
خليفه بعد صمت:انزيين شي اتوصينيه فييه؟
نوره:سلااامتك
سكر عنها وقلبه يرقع بقو كان كان ناوي يتصل عقب على اميره لاكنه حس انه ماله خاطر ايسوي على حد من عقب ماسمع صوتها
اليازي:عميه شرايك في هذا
خليفه:هاااه اوكيه عجبج
اليازي:هييه
خليفه:انزين ناخذ لنور نفسه ولا بتختارين الها غيره
اليازي:هذا بعد حلو واحسبه ايناسب لنور
خليفه:زين زين بناخذهن كلهن
.................................................. ..........
في اليوم الثاني سوو العمليه والحمدلله نجحت بفضل الله نور كان حيلها منهد من البارحه ما حست انها رقدت رجعت للشقه ورقدت كم ساعه ومن عقبها رجعو عند زايد الي ظل طول اليوم تحت تاثير البنج يوعا شويه ويرجع ايغط في النوووم
في غرفة مي كانت روضه عندها وهيه تفتح عيونها منصدمه من كلام مي
روضه:شووووه رشوووه حسبي الله عليها معلمه وانا اقول السالفه فيها شي
مي:تخيلي البنات عاجبتنهن السالفه وولا وحده تكلمت
روضه:عناالله ابو الي مايعرفها ملعونة الصير انتي ادلين بيتها؟
مي:ليييش؟
روضه:انا بقولج ليييش قومي ياله لبسي عباتج
مي:روضوووه شو بتسويين؟
روضه:قومي انتي وانا بقولج بعدين
مي:لا رويض ادريبج بتهدين عليه ارجوووج مافيه مشاكل معاها بروحها علاماتيه خافستبهن
روضه بصرخه افزعت مي:قووومي اقولج ولا ترانيه باجر في الاداره بتكلم
مي:لا لا لا روضه حرام عليج لا تخلينيه اندم انيه قلتلج
روضه:اصلا انا ادري بعلومها من زمان ياله قومي اتحركي
طلعت روضه وهيه تسب وتشتم ولبست عباتها ولحقتها مي وطلعن مع الدريول متوجهات لبيت المدرسه الي كانت ماجره في احد البيوت السكنيه وكان بيتها عباره عن حوش صغير فيه بعض النباتات
وطاوله وحوليها كراسي وصاله وغرفة نوم
دقت روضه الباب الحديدي وفتحت المدرسه سلمت عليها روضه ودخلت ووراها مي الي كانت ميته من الاحراج المدرسه ابتسمت شكل البنت فهمت اخيرا اهيه شو تريد
الحوش كانت فيه بعض المدرسات قاعدات على الكراسي وباب الصاله مفتوح وبعض الطالبات قاعدات داخل وفي ايديهن اوراق رحبت المدرسه ابهن وضيفتهن داخل بعد ما طلعن البنات للحوش بعض البنات كانن ربيعات مي
اول شي بدت روضه تتكلم معاها وتاخذ من وراها لين ما فهمت السالفه بتوضيح قوي من المدرسه
وقفت روضه وعيونها يتطاير منها الشرار
روضه:يعني يا ابله رشوووه؟
عصبت المدرسه من اسلوب روضه ورجعت روضه تناقش الموضوع مع المدرسه بصوت عالي وغيض وقهر لين ما عصبت المدرسه وطردت روضه ومي من بيتها وهيه تصارخ على روضه وتتوعد انها ترسب مي
روضه وهيه طالعه في الحوش تمت اتصارخ على بقية المدرسات وانهن بعد من نفس الطينه وتتوعدهن انها بتكشف امرهن في الاداره
المدرسه عصبت اكثر وقامت تقذف روضه بعبارات ماقدرت روضه تستحملها وردت معصبه في محاوله انها تتضارب مع المدرسه الا ان البنات الي كانن حاضرات منعنها وسحبنها لين الباب وهن
يحاولن ايهدنها
روضه بصراخ:اتخسي الكلبه ملعونة الصييير انا بنت حرام يالي ماتعرفين الحلال من الحرام وقسما بالااااااه ان موتج ايكون على يديه واللــــــــــــــــــه لا اذبحج بايديه
وانيه ازهقج روحج يا ملعوووونه
البنات كانن بسحبنها بعيد عن المدرسه الي بدا اهيه صوتها يعلو وهيه تشتم وتسب وروضه ركبها مليوووون عفريت بس اتريدهن يتركنها عشان تمسكها من رقبتها وتذبحها
الكلام الي قالته المدرسه في حقها ذبحها وخلاها تحلف وتتوعد بدون ماتحس بنفسها
مي وهيه ادز روضه لبرا مع البنات:ياربييييي بس يارويض اقلعييييها فارقت ويهها
روضه:بذبحها الحيوانه ...بطلنيه بطلع روحها اليووووم بطليييينيه اقووول
مي:ياربيييي حرام عليج ياروضه بس عاده خلينا انروح
مقاومه عنيفه البنات حصلنها من روضه الي كانت تدفع نفسها ناحية المدرسه وهن يسحبنها لبرا
روضه:انا بنت شوارع بطلنيه خلنيه اعلمها منو بنت الشوارع هذي مدرسه هذي الفاظها جذيه بطلنيييييه
اخيرا قدرت شلة البنات يطلعن ابها برا البيت وصوت المدرسه طار اذنيهن وبالغصب ركبنها السياره وسكرن الباب وراها ركبت مي السياره بسرعه وهيه تقول للدريول يمشي بسرعه
تمت روضه طول الطريق تنافخ وتسب وتتوعد وكل ما كلمتها مي صرخت عليها
جدام البيت كان بدر توه طالع من الميلس وتفاجئ بالاعصار الي نزل من السياره وهيه تصفق بالباب وتمر من عداله ومليون شتيمه على لسانها بدون ماتحس اهيه عدال منو مرت
كان واقف فاتح عيونه منصدم والتفت لمي
بدر:منو هذي؟؟!!!ّ
مي وهيه منزله راسها تحت:هـ هااذي روضه
بدر بعده منصدم منها:وشبلااها جذيه
مي:تواقعت مع المدرسه
بدر:هااه
رد والتفت للباب الي دخلت امنه
بدر:وهيه دوم حياتها وقعات عشان جذيه اظن السقوط دائما
نزل بدر السلمات الباقيه وهو يحس انه متضايق من روضه هذي شوووه صدق انه وهق عمره معاها معقوله في انسانه جذيه اسلوبها
هذي ما يصلح معاها لا تاديب ولا غيره ابرك شي انه يحصل طريقه يطلقها ويريح راسه
في المسا في نفس اليوم الي كانت فيه العمليه كان خليفه واليازي ونور عند زايد الي دخل عليه الدكتور الي سوا له العمليه وكانت جنسيته اردني
دكتور شاطر ومن ابهر الدكاتره قدرت الدول الاوربيه تكسبه وهيه توفرله وتفتح له اوسع المجالات
لمهنته في سبيل الاستفاده امنه
الدكتور:زااايد يازاااايد تسمعني
فتح زايد عيونه بصعوبه
الدكتور:كيفك يازااايد
هز زايد راسه باوكيه
الدكتور:الف الحمدلله على السلامه
غمض زايد عيونه
الدكتور:زايد الحمدلله العمليه نجحت وانته عديت كل مرحلة الخطر بس تحتاج لشوية تمارين طبيعيه وباذن الله راح اتقوم بالسلامه
هز زايد راسه وهو يغمض عيونه ويفتحهن
الدكتور:زايد تعرف الي موجودين عندك اليوم مين هذا الرجال الي واقف جنبك؟
زايد التفت لخليفه الي ابتسم له
زايد:خـ خلـــــــــيييفه عــعميييه
الدكتور:وهذي الصبيه الي جنبه
وجه زايد نظره لليازي
زايد:الــــــــــ اليااااااازيي
الدكتور:والثااانيه
كانت نور مغطيه ويها زايد تم ساكت ومارد
الدكتور:ماعرفتها لانها متغطيه؟
زايد وهو ايطالع الدكتور:هــ هـذي ز زوو زووجتتييه
حست نور ان قلبها رفرف فووووق وتمنت اتكون بس اهيه معاه ومحد معاهم استانست وتجمعت الدموع في عيونها
الدكتور:اااه انته متزوج يا زااايد ...الحمدلله على سلامتك يارياال
طلع بعده الدكتور وغمض زايد عيونه مستسلم للنوم
رفعت نور غطاها:هل سمعت عماه ماذا قااال ؟؟
خليفه:ههههه عليه رفجه انه هب صاحي...المهم نور خلينا نرجع الشقه الحمدلله اهو بخير الحين وباجر من غبشه بنكون عنده
نور:اريد ان ابقى قليلا عماه
خليفه:يانور الوقت تاخر وانتي ماكلتي شي اليوم وبعض الناس ماطاعو يدخلون المطبخ هههه
في اليوم الثاني اول ما دخلت نور الغرفه على زايد شافته فاتح عيونه ويطالع التلفزون وبعده الي على رقبته محاوطبها
اقتربت امنه
نور بابتسامه:اسعدت صباحا كيف حالك اليوم؟
التفت الها بنظره ورجع ايطالع التلفزون بدون مايرد عليها
نور خلعت قفازاتها وغطاها وحطتهن على طرف
نور:هل افطرت؟
تم ساكت ومارد عليها
التفتت للمرضه الي دخلت وسالتها وردت عليها بانه مافطر
نور:حسنا سوف اقوم انا بمساعدتك على الافطار لابد بانك تتلوى من الجوووع
فتحت نور الغطا عن الافطار وشكل الفطور اكل مهروس لان اول ايام العمليه الحلج ايكون ملتهب
قربت نور الطاوله جدامه وحطت الاكل
نور:انه طعام شهي ماذا تريدني ان اطعمك اولا؟
رفع زايد يده ايرويها انه يقدر يحرك ايديه يعني يقدر ياكل بروحه ابتسمت
نور:حسنا وما المانع من ان اطعمك انا؟
عدها يده كانت مرفوعه نزلها ومسك ابها طرف الصنيه ورفعها وفرها على جنب الصنيه وبكل الاكل الي فيها والاواني الزجاجيه من صحن وكوب كله تناثر على الارض مسوي ضجه عاليه بتكسير الزجاج وانتثار الاكل في كل مكان
الممرضه الي كانت بعدها في الغرفه شهقت رافضه الي تشوفه ..نور حست بقلبها وقف امازايد رجع ولا كانه سوا شي والتفت للتلفزون ايطالعه
تمت نظرات نور على الفوضه الي سواها في الارض والاكل المتناثر طلعت الممرضه وهيه تتحرطم
ورجعت نور اطالع زايد:لما فعلت ذالك؟
مارد عليها وتم ساكت
نور:حسنا ربما لم يعجبك الطعام؟
نزلت نور على الارض وتمت تجمع قطع الزجاج وتلم الاكل في كيس والاشيا الي حست انها ماتضررت حطتها في الصنيه ورفعتها على طاوله في الطرف ورجعت اتنظف الارض
وهيه تحس ان قلبها مقبوض ليش سوا جذيه معقوله رجع مثل اول بلعت ريجها ووقفت اطالعه
نور:هل تحتاج الى شيا اخر؟
بعده تام ساكت ومتجاهلنها
ماعرفت شو تسوي له وراحت وقعدت على واحد من الكراسي ولزمت الصمت
بند زايد التلفزون من الريموت الي عنده وبند الليتات لانه عنده نقطة التحكم بالاناره
تمت الغرفه في ظلام شكله ايريد يرقد رفعت نور اريولها من على الارض وضمتهن الها وغطت عينها بعد ما حست بالنعاس
وعت نور على صوت الممرضه اتكلم زايد والي طلب منها اتساعده ايروح للحمام
قامت نور وقربت منهم وهيه تقول للمرضه اتروح وهيه بتتولاا الامر لاكن زايد مسك الممرضه بغيض من يدها مانعنها اتروح
والتفت لنور بنظرات معصبه لاكنه ماتكلم
الممرضه فهمت له وساعدته بالنزول على الكرسي ومن بعدها راحت به لين باب الحمام
عصبت نور ولحقتهم وهيه تطلب من الممرضه اتفارج وتخلي ممرض يحضر بدالها
تنرفزت الممرضه وطلعت
زايد:ا انـــانتيييي ماااالج خــخص
نور:انا زوجتك احق من هذه الكافره بان اساعدك
زايد:ا انتييي بنت باااكستااانيه ماااريد منج اي خدمممه
نور:اعلم اني ابنة باكستانيه لما تذكرني بهذا الامر كل حييين ولاكنني زوجتك
زايد:انقلعييي براااا
نور:اريد مساعدتك
زايد:ماااريييد منج اييي مسااااعده انقلعيييي
نور باستعطاف:زيد لما تفعل هذا انا لم اتي معك الا من اجلك لما تريد ان تمنعني من مساعدتك؟
زايد:مـمن البدااايه ماااكنت اريييد منج ايي مساااعده طـطلعييي برااااااا
سحب زايد الخيط الي يعطي لجرس الانذار عشان اييه حد غيرها ودخل عليه المره هذي ممرض
زايد:طلعييي براااااا
نور:حسنا
التفتت عنه ولبست غطاها وطلعت من الغرفه وتمت تمشي في الممرمتضايقه
خليفه ومعاه اليازي:نووور شو تسوييين اهنيه؟
نور:زيد ...لقد طردني من الغرفه
خليفه حاول انه يمنع نفسه مايضحك لانه يعرف زايد
خليفه:افا ياذا العلم يطردج وانا موجود ماعليج تعالي وانا بسنعه لج
دخل خليفه ومعاه البنات وحصلو زايد على سريره ايطالع التلفزون وسلم عليه
خليفه:الحمدلله على السلامه انا عاده اليوووم ابصم بالعشره انك بخيييير مليون بالميه هههههه
ابتسم زايد
خليفه:هاك كلم بدر حاشرنيه من البارحه ايريد ايكلمك
اليازي طلعت الدلال الي يابوهن وقامت معاها نور ورتبن صنيه صغيره وحطن فيها اكواب وفناييل وطبعا مله صغيره فيها تمروعلبة حلويات
تم زايد ايكلم بدر وشافت نور ان نفسيته تحسنت شويه ولسانه بدا ينطلق اكثر في الحروف
قرب خليفه من نور واليازي:اقول بنات شرايكن اتروحن الشقه لان ريايل بيون ايسلمون على زايد ويتحمدون له بالسلامه..ناس انعرفهم من السفاره ومعارف زايد اهنيه واييد
نور:ولاكن عماه هو لا يزال متعب
خليفه:لا ماعلييج من ايشوف العرب بيغادي بخير بسرعه فديتكن الجماعه يايين في الطريق
طلعت نور واليازي وراحن للشقه وكان الاتصال بينهن وبين خليفه الي اذا احتاج قهوه وشاي طلب منهن ايسون ويرجعلهن ياخذهن ويرجع عند زايد الي ماشالله زاره ناس وااايد من الي يعرفونه وضامين صوتهم للتصوييت له
حس زايد في اخر اليوم بتعب واستسلم للنوم ونور حشرت خليفه كل شوي تساله اذا كل شي او لاا سوتله شوربه وطرشتها له وقالها خليفه انه شربها
في اليوم الثالث في الامارات اتصل مروان في الساعات الاولى من الصباح على بدر الي توه واعي ويتجهز للدوام
مروان:بدر..انته ويييين
بدر:مرواان شبلاااك شكلك عندك شي؟
مروان:اااخ شو بقولك؟
بدر:يا اخي ارمس
مروان:مصييييبه
بدر:مروان لاترفع ضغطيه
مروان:مصيبخ مايت على البال يا خويه
بدر:لحووووووه وبعدين يعني؟
مروان خذ نفس وتكلم:بدر امس المغرب صارت جريمة قتل والقضيه خذها حسن السعدوني قبل لا اوصل المخفر
بدر:انزين الزبده
مروان:حرمتك متهمه بجريمة القتل هذي
وقف بدر مش مستوعب مروان شو يقول:شووووو؟
مروان:روضه بنت راشد يارنا الي انته مالج عليها متهمه بقتل المدرسه
بدر:انته شو قاعد اتخربط وتقووول
مروان:اسمعنيه بدر الموضوع ومافيه ان لبنيه امس كانت عند المدرسه وهددتها بالقتل حسب كلام المدرسات الي كانن عندها والطالبات ايقولن استوت وقعه بينهن كبيره وروضه هددتها انها تذبحها والبارحه المغرب المدرسه حصلوها ميته
ماكله بيتزا وفيها سم
بدر:عاده اهيه مش مينونه لهدرجه عشان اتروح تذبحها عسب وقعه
مروان:البنات قالن ان المدرسه غلطت على روضه بالفاظ بذيئه خلت لبنيه اتهد عليها في نفس الوقت وهيه تقول بذبحج وان موتج بيكون على يديه
بدر بغيض:يا مروان انته مصدق هالخرابيط
مروان:المهم انا اقولك حسن السعدوني مش هين وانته تدري ان بينيه وبينه مشاكل من العام والريال من درا انها حرمة اخويه مصبح جدام بيت ابو فهد من غبشه وهم الحين ايحاولون ياخذون روضه للمخفر
كانت هذي ضربه قويه على راس بدر
بدر:شو هالكلام الفاضي الي انته قاعد اتقوله..على اي اساس ايشلها وهو ماعنده ادله وبراهين لعب عيال اهو
مروان:تراااه سبااال ويريد ياخذها للمخفر عشان التحقيق
بدر بغيض وقهر:سكر يامروان انا بروح وبشوف شو السالفه
وبسرعه بسرعه لبس بدر ثوبه وتم يعقم ازرار الثوب وهو متوتر ولبس سفرته وعقاله ونزل بسرعه تحت وطلع لسيارته وهو لاف لبيت ابو فهد كان يتمنى انه مايشوف حد جدامه وان هذا كله مقلب من مروان لاكنه انصعق من عدد السيارات والشرطه الي واقفين غير الصحافه الي مانسو ان هذا البيت كان اخر بيت طلع امنه زايد قبل الحادث
حس ان في شي يضغط على جسمه وشي يكبت على صدره ويحاول يخنقه
على طووول اتوجه من بعد مانزل من السياره للضابط حسن الي كان فاتح باب سيارته ومنزل ريوله برا وينتظر البنات الشرطيات الي طرشهن داخل اييبن روضه سلم بدر على حسن
بدر:شوووه ياحضرة الضابط حسن ياي تقبض على عصابه
التفت الضابط حسن لبدر وهو يدري انه اخو مروان الي دائما بينهم عداوه
حسن:نعم يا استاذ بدر انا قاعد اطبق القانون
بدر:والقانون ايقولك تعال خذ بنت ناس عرب من قبايل وهل الدار بالطريقه هذي
حسن:والله اهيه المتهمه الاولى
بدر:عندك ادله يا حضرة الضابط تثبت التهمه عليها
حسن بنظرات مايهمه شي:عنديه شهووود
بدر:بالعقل ....بتاخذ تهديدات وحده معصبه من كلام انقال الها على محمل الجد وين احنا عايشييين
حسن:اوووه انته بتبدا بالدفاع الحين تو الناس عدنا جدامنا وقت طويل
بدر:انا ما اسمحلك تاخذها من البيت بالطريقه هذي وجدام العالم هذي كلها وانته ماعندك اي دليل يثبت ادانتها
حسن:قلتلك عنديه شهوووود وانا ماعليه من حد الي في راسيه بسويه والبنت بتطلع بتطلع برضاها بالقوه بتطلع
قعد بدر محتشر معاه ويحاول معاه بكل الطرق عشان ايرده عن الي ياي ايسويه لاكن مافي فايده في البيت داخل اول ماطبت البنات العسكريات على روضه وطلبن منها اتروح معاهن وعرفت بالسالفه
فتحت عيونها منصعقه والتفتت لمي اتشوف شو ردة فعلها والتفتت الهن
روضه:انا ذبحتها؟؟!!!ّ
العسكريه:انتي المتهمه الاولى والمدرسات شهدن انج هددتيها بالقتل
روضه بسخريه:لاااا انا قتلتها وكيف قتلتها قطعتها بالسجيين وحطيتها في اكياس
العسكريه بحزم:امشي لبسي عباتج احنا ماعندنا وقت وكل الي تبين اتقولينه قوليه في المخفر
روضه:لا والله على كيفكن انا اتفضلن انتن طلعن برا
العسكريه:لاتخلينا نستعمل معاج العنف
روضه:اميه وين ابووويه؟
ام فهد الي تمت اتصيح من الوضع:ابوج وفهد البارحه راحو قطربالسياره يااااااله بسترك
العسكريه:انا انذرج لاخر مره لبسي عباتج وامشي جداميه
روضه:انا هب طالعه من اهنيه وابويه محد انقلعن انتن برا
التفتت العسكريه لام فهد:يا حجه هاتي عبات بنتج وخليها تلبسها لاننا مظطرين ناخذها بالقوه
روضه:واللــــــــــــهما اشبر معاكن شبر لين ايي ابويه انا ماليه خص فيها روحن طالعن منو الي بحها
اميه ترا كل الي ايقولنه جذب انا ما ذبحتها
كانت مي اتصييح بصوت خافت وهيه لاويه على امها من ورا
روضه هزت مي:مي تكلمي قولي شي انا ذبحتها انتي بتصدقين كلامهن
التفتت الام لمي:سيري يابنتيه هاتي عباتها
روضه:لاااا اميه بتخلينهم ياخذونيه انتي صدقتيهم
ام فهد:يابنتيه اتقول باخذها بالغصب انا ما اباهم يطلعونج جذيه بدون ستر
روضه وهيه بدت تنتفض من شكل امها الي تصيح ومي:ماعليج منهن انا اصلا مش طالعه بيبطوووون انا اروح مخفر شرطه والله لايذبحنيه ابويه اندرا قوليلهن يطلعن برا انتي راعية البيت طلعيهن
العسكريه تمت اتكلم الضابط حسن برا وتقوله ان البنت مش راضيه تطلع وصرخ عليها هاتيها بالقوه ولا بدخل انا اطلعها بالقو
عاده في هذي اللحظه كان مروان قريب منهم توه واصل وسمع الضابط حسن ايقول جذيه ومانتبه على البوكس الي ياه من مروان
مروان:جان فيك خير ادخل داخل وانا بعلمك السنع عدل
التفت مجموعه من الشرطه على مروان يمنعون الضرابه الي متعودين عليها دايما وابعدوه عنه بعيد
بدر:يامروان الله ايهديك احنا الحين فكار وقعاتك
مروان:هذا سبااااال لو تكلمه من اليوم لين باجر مايفهم
قام الضابط حسن واتصل على البنات داخل وهو يقول الكن خمس دقايق ولا تراه اهو بيدخل
مروان والشرطه يمسكونه مانعينه يقرب من حسن:يا حقيييير انته ماتستحي على ويهك والله لو السالفه وصلت الشيوخ انهم ايفنشونك اليوم قبل باجر
حسن ما عبرهم وتقدم بخطواته ناحية البيت في الوقت هذا قدرت ام فهد اتلبس روضه عباتها وهيه تترجاها لان الشرطيات سحبنها اول شي لين الباب
تمت روضه تلبس العباه ويابتلها مي الغطوه من فوق الشيله والعباه ولبستها واول ما خطت روضه خطوه برا وشافت الي برا التفتت اتريد تدخل وهيه تصرخ ماريد ماريد
بدر انتبه لصرختها وهو كان واقف ايكلم واحد من المسؤلين في التلفون بند التيلفون وركض ناحيتها راقي السلمات وصرخ على العسكريه
بدر وهو يلفها ناحيته وياخذها في حضنه:بطليييهااااا
روضه مثل الي ماتحس بشي حوليها يتها حاله هستيريه وهيه تصييح ماريد ماريد
بدر وهو يلمها اكثر لحضنه وكان واقف معاها في مدخل البيت ورا الباب الي كان مفتووح
بدر:روضه روضه خلااص اهدي انامعااااج
روضه:اريد ابويه اريد ابويه ماريد اروح معاهم ماااااارييييييد انا ماذبحتها والله ماذبحتها
بدر:الله يغربلهم خلاااص انزييين لاتخاقين انا معاااج وانتي بتروحييين معايه مابخليهم ياخذونج
ماكانت تدري اهيه في حضن منوووه ولا منو هذا الي يكلمها اخيرا استوعبت وابتعدت نه شوي
روضه بخوف:انته منووووه؟
لفها اكثر لحضنه وهو يحس بمقاومتها
بدر:انا بدر ياروضه بدر زووووجج لا تخافييين
بدت ترتعش اكثر وتحس انها في دوامه وقريب تفقد وعيها ورجعت تستسلم لدموعها
روضه:ارييييد ابووويه ماريد اروووح معاهم ياربي انا شو سويييت والله ماذبحتهااااا
بدر:خلاص انزين خلاص لاتخافين انتي بتروحين معايه وبترجعين معايه بس اهيه جلسة تحقيق وبينتهي كل شي وبردج البيت تعالي تعالي معايه لسيارتيه
مشت روضه معاه وهو لافنها بيديه ومعدي ابها بينهم متجه لسيارته لاكنها قبل لا توصل السياره وقفت رافضه اتكمل
بدر:وبعدين يا روضه امشي خلي هاليوم ايعدي على خييير
حسن:على وييين يا استاذ بدر ماخذ المتهمه؟
بدر:خذت اذن من المسؤل انيه اوديها معايه شل حشدك انته وتوكلو
ركبها السياره ودار للجنب الثاني وركب قرب امنه مروان ونزل ايكلمه من الدريشه وعينه عليها وهيه تنتفض
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك