رواية الدمع من عيني مترضفا ع الخدين ولا لقى مسعافي -9
عند هاي النقطه انرد للواقع اللي كانت عايشتنه ميثه انرد للوقت اللي كانت ميثه يالسه فيه ع شبريتها .. ومسهيه اتفكر في حالها وتذكر كل هالاحداث
ام حمدان وهيه اتبطل باب حجرة ميثه .. اكيد بدون لا اتدق الباب عليها .. امها من يومها جيه ما تهتم لخصوصيات عيالها وما اتحب اتشوف بناتها مسكرات الباب على عمارهن
ام حمدان بلهجه اتعودت عليها ميثه ( بصيغة امر شديده نوعا ما ) هاي اللهجه اللي كانت تذبح ميثه : يله قومي البسي بنسير بيت يدتج ماشي وقت متى بيلعب اخوج تدرين انه باجر وراه دوام
ميثه : تراني لابسه جلابيتيه الا بلبس عباتي
ام حمدان اكيد ما ردت عليها وظهرت من الحجره
نشت ميثه من مكانها وسارت صوب غرفة الملابس .. رتبت شعرها بليا اهتمام شرات كل مره .. بطلت الكبت وظهرت الها نعال يناسب جلابيتها ... واختارت الها عباه أي كلام ولبستها .. وظهرت من الحجره .. وعلى طول حولت من ع الدري وسارت خاري
اليوم الثاني الصبح .. استغلت ميثه الفرصه واتصلت في خليفه فاللحظه اللي محد كان فالبيت غيرها هيه وامها .. امها كانت نازله تحت .. عمة ميثه يايه تعطيها شي
خليفه : وين هالغيبه ؟
ميثه : خليفه وضعيه مول ما يسمح اليه اكلمك ولا اتصل فيك ( وخبرته عن كل اللي قرره عليها ابوها )
خليفه : انا مادري ليش هلج جيه
ميثه : خليفه يبوني اخذ ولد عميه غصبن عنيه
خليفه :انزين انتي ما اترومين تيبين رقم ولد عمج واتقوليله انج ما تبينه ؟
ميثه : خليفه ماقدر وايد صعبه عليه شو ثرني ما استحي ولا اخيل ؟
خليفه : انا ما قلت جيه فديتج بس ماشي حل ثاني
ميثه : خليفه اتصرف انا ما قدر اسوي شي اكثر .. خليفه اذا انته ما تباني قول وانا بكون راضيه دام انه هالشي اللي انته تباه بس لو انته تباني مره وحده انا اباك الف مره هب الا مره وحده
خليفه : ان شا الله يستوي خير
ميثه ( تسمع صوت اللفت .. دليل على انه امها يايه ) : خليفه شكلها امايه يايه وانا بتصل بك عقب كمن يوم اتخبرك عن رايك فالموضوع اوكيه ؟
خليفه : خلاص عيل يله برايج
سكرت عنه ميثه .. وهيه بكبرها تنتفض .. كانت وايد مستغربه من هاي الجرأه اللي يتها مره وحده وخلتها اتقول هالكلام .. حولت بسرعه تحت قبل لا تي امها واتشوفها .. وحدرت المطبخ عشان اتزهب الوعيان اللي تباهن امها للغدا
لكنها اول ما حدرت المطبخ تمت واقفه تنتفض واتحس انه قلبها اشويه وبيظهر من محله من كثر ما كان يدق
تمت واقفه محلها دقايق .. اتهدي عمرها .. عقب ما هدت حطت كل شي وسارت فوق عند امها وحطت الها الصينيه فوق فالمطبخ التحضيري وظهرت عشان تفرش السماط
طافن يومين وميثه على نار تبا اتعرف رد خليفه اليوم الثالث ما رامت تتريا اكثر واتصلت في خليفه
خليفه : شو انتي مينونه ؟ ماقدر الحينه
ميثه : شو مينونه خليفه شو اتقول انته ؟
خليفه : ميثه ماقدر
ميثه وهيه مغتبنه وخانقتنها العبره : خلاص خلاص انا ماقدر اتحمل اكثر ماقدر اتكلم بسكر وبطرش لك كل اللي في خاطريه في ايميل اوكيه؟
سكرت عنه وسارت تربع بسرعه صوب حجرتها
شغلت كمبيوترها وعيونها مليانه دموع .. كانت ترمش بعينها اتحاول اتوضح اللي اتشوفه اكثر لكنها ما كانت رايمه اتشوف من كثر دموعها ... افترت صوب الكومدينو وشلت كلينكسه وتمت تمسح دموعها
هالحزه اشتغل كمبيوترها وفتحت ملف وورد بسرعه
وتمت تطبع وتطبع وتطبع وتبطع .. لين ظهرت كل اللي في خاطرها وقفت .. وردت الصفحه من اول عشان تقرا اللي كتبته
::
مرحبا خليفه
قبل ما كنت اقول مرحبا خليفه بس جيه كنت اقول ما يحتاي اقول روحك اتعرف هالشي
خليفه أنا ادري انك ما اتحبنيه ... اعرف هالشي من أول ما كلمتك لكني اتجاهلت كل شي لانيه اللي في خاطريه اكبر من ها كله
خليفه أنا تعبت خلاص من ايام وأنا لا ارقد ولا شي والأكل حتى ما اشتهيه كل اللي أسويه ايلس روحيه ما عنديه شي أسويه غير انيه أفكر
أنا ادري لو انك تباني بتسوي المستحيل عشان تلقى اللي تباه بس انته ما تبا وانا اعرف ليش وأول الأسباب كلها انك ما اتحبنيه
ادري انك ما بتقرا كل اللي كاتبتنه بس هاي المره ولاخر مره اقرى كل حرف وفكر فيه عدل يا خليفه
تعرف ليش أنا ازقرك باسمك ما اقول لك عمريه ولا حياتي ولا روحي ولا غناتي ولا شي من هالكلام لأنه اسمك يمثل إليه كل هالاشيا
صح انيه أنا قلت لك انيه بكون راضيه باللي يرضيك انته.. الكلام سهل وأسهل حتى من شرب الما.. وانا قلت هالكلام وبحاول ارضابه غصبن عنيه.. أنا في يوم من الأيام سويت المستحيل بس عشان أوصل لك وأكلمك
ودومي اقول لك اللي في خاطريه لكن هالشي عمره ما اثر فيك اتعودت على وجودي اتعودت ع الكلام اللي اقوله لك عشان جيه قمت اتشوفه شي عادي
انا عمريه ما حبيت حد كثرك ولا بحب حد عقبك
خذه عهد مني يا خليفه.. عهد !!
صعب عليه أنساك
( انساك كلمه ما لها أية وجود فمرجعي....... والقلب لا منه نوى غيرك حبيبي بمنعه
تنتابني ذكراك ما بين الوعي واللا وعي ... ما كنك الا بحر حلمي والمشاعر الاشرعه)
كيف تباني انساك وانا كل شي حولي يذكرني فيك .. حتى الكلام.. كل كلمه اتذكرني بك وبكلام انته قايلنه حسك يتراواليه .. صورتك ما يحتاي اشوفها لانه صورتك مطبوعه فقلبي ودومها مرسومه فعيوني وموجوده فبالي
من غلاك أتخيلك دوم فعيوني.. شوف حالي كيف عقبك مخطرا
لك غلا لك حب في دمي مخزوني.. يا لزيمي حتى في نوم الكرا
برايك يا خليفه يعل ربيه ايهنيك في حياتك ويعل ربيه يسعدك في حياتك اللي انته اخترتها
بس رجوا لا تخيب لي ظنوني.. لا تشمت بي عذول ما درا
خليفه كل اللي اباه انك ما تقطعنيه بس ابا اتطمن عليك مابا شي اكثر بين فتره وفتره طرش اليه ايميل دخيلك هذا الشي اللي اباه من عندك.. اذا اليه خاطر
اخر شي ودي اقوله لك يا خليفه.. انه قلبي مات وان قلت لك مات تراها اشويه عليه .. مثل ما قلت لك انا ما حبيت حد كثرك ولا بحب حد عقبك .. وان خذنيه ولد عميه برايه نفاد لانه كلهم واحد عنديه ان كان ولد عميه ولا غيره ما هموووني
وانا بكتب لك قصيده وبتكون اخر قصيده ولو انيه كنت ناويه اطور من عمريه واتعلم كيف اوزن القصيده عدل بس خلاص الانسان اللي كنت دوم اكتب له وفيه القصيد.. الانسان اللي كان اليه دافع انيه استمر خلاص ما وده انيه اكون معاه .. عشان جيه انا بكتب قصيده ختاميه لك انته وبس قصيده فالانسان اللي من يوم ماعرفته وانا احبه حب هب طبيعي
بتلقاها جريب على ايميلك
خليفه انا طلبت منك انيه اطرش لك ايميل لانيه هاذيج الحزه ما رمت انطق بحرف عقب اللي سمعته وهالكلام وايد ما بقدر اقوله وانا أصلا ماقدر أطول معاك ع الخط
أنا عمريه ما عرفت غير انك خليفه ال........ي ولوكنت ابا اعرف جان حاولت اول شي معاك ومن عقب يمكن حتى اشوف رقمك باسم منوه ولا شي جيه بس انا احبك لذاتك يا خليفه احبك لشخصك انته عمريه ما فكرت في شي ثاني .. عمريه ما توقعت انيه في يوم بعرف انسان شراتك انته بصفاتك انته يا خليفه انا اكتب لك كل كلمه وانا آنس الموووووت
لآخر مره اقولك.. أحبك
أتحمل على عمرك يا خليفه وين ما كنت
دام انك حرمتني منك لا تحرمني من انيه اتطمن عليك بس طرش اليه ايميل بين فتره وفتره
وارقب القصيده
فداعة الرحمن يا أغلى ناسي
لو انه ما كان ودي انهي هالايميل لكن ادري انك ما بتقراه كله لو طولت اكثر
باي
::
كان خليفه يقرا الايميل وقلبه ايعوره هب عارف كيف يتصرف .. كان يحس انه هالوقت بالذات ما بيده شي .. صعب عليه يتصرف ..كان وايد متضايج كل اللي سواه انه راح صوب العزبه وتم يالس اهناك يحاول يخفف من الضيجه اشويه
كان كل اللي يتمناه انه ميثه تتصل به ولو مره
وميثه ما خيبت ظنه واتصلت فيه اليوم الثاني .. وهو كان بعده فالعزبه لكن هالمره كانوا ربعه معاه .. ابتعد اشويه عنهم
خليفه : مرحبا والله
ميثه : مرحبتين
خليفه : اشحالج بخير انتي ؟
ميثه : مادري
خليفه : افا كيف ما تدرين
ميثه : قريت الايميل ؟
خليفه : هيه قريته
ميثه : خلاص عيل زين يوم قريته والقصيده انا طرشتها لك .. وتراها اخر قصيده اكتبها
خليفه : ما ظنتيه اذا يت قصيده في بالج بترومين اتردين عمرج ولا تكتبينها
ميثه : حتى لو ما بكتبها في حد غيرك خليفه مستحيل هالشي لاخر عمريه ان كتبت قصيده اتاكد مليون بالميه انها بتكون فيك انته يا خليفه
خليفه : فذمتيه انج تستاهلين
ما كانت لميثه فرصه تسال خليفه شو اللي تستاهله وسكر عنها لانه واحد من ربعه يا جداه
طافن الايام بدون لا يتغير شي في حياة ميثه كانت على حالها .. وصحيح كلام خليفه ميثه ما رامت اترد عمرها عن القصيد وكتبت قصيده ثانيه في خليفه
وعقب ما مرن اسبوعين على اخر مره كلمة خليفه فيها .. اتصلت ميثه في خليفه لكنها ما رد عليها
طافن يومين ثانيات .. واتصلت فيه لكنها كانت في بيت عمها .. كانت عندهم حفله مسوينها لبنت عمها الصغيره ( كانت مكمله سنه )
حدرت ميثه في مدخل البيت وكان عندها تيلفون وحده امريكيه دوم تي عندهم وكانت اتعرف سر ميثه وحبها لخليفه .. فعطتها التيلفون عشان اتكلمه
اول ما اتصلت ميثه رد خليفه
خليفه : الوه مرحبا
ميثه : يا مرحبا بك زود
خليفه : منوه ؟
ميثه : ههه
خليفه : ميثه ؟
ميثه وهيه تبتسم : ومنوه بيتصل بك غير ميثه؟
خليفه : وين؟ وليش هالقطاعه ؟
ميثه : انته اللي ما تباني يا خليفه
خليفه : منوه قال هالكلام ؟ بس كنت امر في بعض الظروف الغامضه
ميثه : والحينه ؟
خليفه : لا فديتج الحينه خلاص كل شي اوكيه .. وين انتي فالبيت شو هالصدعه اللي عندج ؟
ميثه : لا والله في بيت عمي مسوين حفله حق بنت عمي
خليفه : هييه ما شا الله
ميثه وكان حادر عليها واحد من الصغاريه : فديته محلاته كيوت
خليفه : منوه ها ؟
ميثه : ولد خال بنت عميه الي مسويلها الحفله
خليفه : هيه ما شا الله .. انتوا قوم بن ....... ما ايوون منكم غير المزايين
ميثه : ههههه .. خليفه بتخبرك
خليفه : شو غناتي ؟
ميثه : مرت عميه اتقول اليه ليش ما تتغشين عن البشاجير .. انتي فتنه وهب زين يشوفونج شو رايك انته اتغشا ؟
خليفه : اتحجبي لكن اذا بالغشوه استر وابرك
ميثه : خلاص عيل من عيوني من اليوم وساير انا بتغشا عنهم بس عشانك
خليفه : ميثه ليش ما تنشرين قصيدج فالمجله ولا الجريده ولا شي جيه ؟؟
ميثه : وين اروم صعبه اشويه فديتك شو بقول لهليه ؟
خليفه : شدراه ابوج ياما شيوخ نشروا قصيد ومحد درابهم
ميثه : مادري بشوف
خليفه : ما عندج قصيد يديد ؟
ميثه :عنديه فديتك
خليفه: يله عديها عليه
ميثه بس تراني هب حافظتنها كامله بطرشها لك بعدين ع الايميل
خليفه : اوكيه قولي
ميثه :
في خيالي منظر اشوفه
وفي عيونك اكبر امالي
خليفه : يوم بدايتها جيه كيف بيكون الباجي
لك غلا مقدر انا اطوفه
لو تبدل وقتي وحالي
بحر حبك مكثر وصوفه
لو تغيب اليوم ما ابالي
بس نسييت هب حافظه
خليفه : ما شا الله عليج دومه قصيدج غير معانيه غير
ميثه : فديتك يوم انته بتمدحنيه خلاص ما بتريا المدح من حد غير .. انته اتكفيني عن الخلق كلهم
خليفه: انتي الدانه وانا الطواش اللي يغوص عشانج لكن .... وهو يقلد فزاع ( يباله سنتين ثلاث سنين قدام )
ميثه : لا صدق كم يباله ؟
خليفه : سنتين ولا ثلاث
ميثه : خليفه واااااايد
خليفه : البحر غزير فديتج
ميثه وهيه مويمه : اها
خليفه : يله غناتي انا وصلت الحينه عند بيت ربيعيه عازمني بحول عنده وانتي لا تقطعيني
ميثه : بتصل فيك سوون
خليفه : اليوم فليل ما ظني تلقيني
ميثه : انا ما قلت فليل قلت سووووون
خليفه : هيه سوون خلاص عيل انا برقبج
ميثه : ربيه ايحفظك الغالي
سكرت عنه ميثه ومن هاذيج الحزه وهيه طايره من الفرحه ظهرت وتمت في بيت عمها لين الساعه 11 حزه اتصور اليهال ووديه تسولف مع عمتها وبنت عمها
ردت البيت .. وبدلت ثيابها وحاولت ترقد هاذيج الليله لكنها ابدا ما رامت من فرحتها .. لاول مره من عقب شهور .. يرتاح بالها من الهم والتفكير .. وكل اللي حطته في بالها انها تصبر لو كانن سنتين وصعب مرورهن بسرعه
من وصالك بس يكفي
من غزر غيمك نفافي
لو تجود بعطف منك
يبتهج ما بالخوافي
من مشاعر تلتجي لك
وانته للاحساس وافي
هالله هالله يا حبيبي
من الهجر بسك وكافي
طافت هاي الليله ع خير لكن قبل لا ترقد ميثه .. ما نست تتصل في حمدان واتريح باله ولا تخليه ينشغل عليها زود ما هو مشغول
ميثه : حمدان فديتك متولهه عليك
حمدان : حتى انا والله وينج قطعتيني هاليومين ؟
ميثه : فديتك الجو متكهرب اشويه فالبيت واترييته يهدا اشويه واتصلت فيك
حمدان : ليش شو مستوي ؟
ميثه : لا والله ماشي بس تعرف عقب هاذيج السالفه اللي استوت .. وابويه هب راضي عنيه والله والله انيه هب قادره اتحمل هالشي موليه صده يذبحنيه .. انته روحك اتعرف غلاة ابويه عنديه
حمدان : فديتج ان شا الله كل شي بيعتدل مع الايام بيكتشفون انج هب مسويه شي
ميثه : حمداني انا الحينه الحمدلله مرتاحه لا تشغل بالك عليه
حمدان : شو اللي ريحج ؟؟ شو اللي تغير فالموضوع
ميثه : احاول اشغل عمريه باشيا ثانيه تبعدنيه عن ابويه .. وامايه اللي تعرف اسلوبها معايه كيف
حمدان: زين اتسوين وان شا الله مثل ما قلت لج مع الايام كل شي بيعتدل انتي ما عليج الا بصبر .. وحاولي اتبينين الهم انج غير عن الفكره اللي هم حاطينها عنج في بالهم اوكيه ؟
ميثه : من عيوني كله بسويه عشان خاطرك .. حمداني ابا اقولك شي
حمدان : امري فديتج شو في خاطرج ؟
ميثه : حمدان هب قادره ايود الطاقه اللي فيه ابا اكتب وابا انشر كتاب وجيه .. وانته اتعرف كيف هلنا ما ايحبون هالشي موليه .. شو اسوي ؟
حمدان : انتي كتبي كل اللي عندج .. ولا ما عندج اوراق؟
ميثه : هههههه لا عنديه
حمدان : وقلم ؟
ميثه : قلامه هب الا قلم
حمدان : خلاص عيل انتي اكتبي ولا تيودين أي شي في خاطرج ان كانت قصيده ولا أي شي ثاني
ميثه : بس انا ماحب هالوضع جيه محد يعرف انه انسانه شراتي موجوده في هالمجتمع
حمدان : ميثوه ما فيج صبر لين ارد انا وبسويلج كل شي تبينه ؟
ميثه : خلاص بصبر
حمدان : يله سيري ارقدي اتاخر الوقت متى ناويه ترقدين ؟
ميثه : عقب اشويه
حمدان : انزين
ميثه : حمدان شي في خاطرك؟
حمدان : ليش؟
ميثه : مادري بس احساسي يقول انه شي في خاطرك .. صح ولا انا غلطانه ؟
حمدان : ممم شو اقولج .. متوله عليكم وع البلاد لاعت جبديه من بلاد الانجليز
ميثه : فديتك هونها واتهون ماشي باجي .. ها كله حق مستقبلك
حمدان : وانا شو اللي مصبرني غير تشجيعج انتي اليه ؟
ميثه : فديتك يعلنيه ما خلا منك
حمدان : ولا منج
تمت اتسولف معاه ميثه وقال الها سوالفهم هناك سكرت عنه وسارت حجرتها .. ظهرت دفتر من دفاتر الرسم ماليلها وتمت ترسم لين عيزت .. وعقت الدفتر ع الارض .. وبندت الابجوره واتلحفت وارقدت
نشت ميثه الصبح الساعه تسع ونص .. وكالعاده سارت تفزع امها .. كانوا طالبين 3 بشكارات بس لين الحينه ولا وحده وصلتهم
انشغلت امها بتقطيع السلطه وميثه قالت خلني اتصل في خليفه دقيقتين بس اكلمه وبسكر عنه .. سارت ميثه الصاله واتصلت
عقب ما سلمت ميثه عليه وخذت علومه
خليفه :اليوم انا هب ناوي اكلمج
ميثه وهيه منصدمه : عيل ؟
خليفه : بسمعج شي وبس
شاغليني بنظرة تشفي المشاعر بالوله
واجذبيني في عوالم تسحر القلب الحزين
ادخلي بنور واثيري نار سرك تشعله
واسرجي النجوى اماني تكشف الكنز الدفين
كل شي في حياتي لك يدين بمرحله
بصمتك فالروح ذكرى ما تواريها السنين
تحظن احساسي طيوفك هو نزيل منزله
لك حنين ما يفوقه فالبشر كل الحنين
صادريني من ظلالك في في خيال اغزله
تصبح الدنيا جناحه والخوافي به تبين
جربي صبرك وصبري فالليالي المقبله
وابشري بسعد الليالي من بعد هم معين
الهوى لو كان نار طيب مني بحمله
دام قلبك فيه نابض يا ضمير الطيبين
انا من دونك سفينه والمواني مهمله
موجك العالي متوه بالسفينه والسفين
ودي انزل في فوادك وادنو منه واسأله
وين يا نبع المحبه عن اماني الواردين
انا وانتي يا غناتي صرنا كل المساله
ان سالتي او ما سالتي صرنا نحنا العاشقين
عقب ما خلصت الغنيه قالها خليفه :
جربي صبرك وصبري فالليالي المقبله
وابشري بسعد الليالي من بعد هم معين
الهوى لو كان نار طيب مني بحمله دام قلبك فيه نابض يا ضمير الطيبين
ميثه : لا خليت منك يالغالي
ما طولت معاه وسكرت عنه .. تخاف امها تي واتشوفها وهيه تتكلم فالتيلفون فسارت جدا حجرتها .. وانشغلت باشيا وايده منها ترتيب الحجره .. وما ظهرت من الحجره الا لترتيب الغدا وعقب ما اتغدت ردت الحجره اتكمل شغلها لين ما استوت الساعه 11 من الليل .. يت امها الحجره تزقرها
ام حمدان : شو ما تسمعيني ازقرج ؟
ميثه : لا والله ما سمعت ..تبين شي؟
ام حمدان : ابوج يباج
راحت عنها وامها وظهرت ميثه من الحجره تمشي فالممر سايره جدا حجرة ابوها
ميثه في خاطرها : اللهم اجعله خير اللهم اجعله خير اللهم اجعله خير .. تمت اترددها لين وصلت حجرة ابوها وحدرت
انتهى الجزء
شرايكم ؟؟
وشو توقعاتكم ؟؟
وشو يبا بو حمدان من ميثه ؟
وخليفه شو اخرتها معاه ؟؟
ارقب ردودكم
تحياتي وتقديري الكم
ويا مرحبا السااع
.. الجزء السابع ..
ميثه : ها ابويه بغيت شي ؟
بو حمدان : سكري الليتات
ميثه عقب ما سكرتهن : بس؟
بو حمدان ما رد عليها فظهرت ميثه من الحجره وهيه سايره حجرتها حدرت بدلت ثيابها .. وكانت يوعانه بس شافت انه امها جد سكرت كل الليتات اللي صوب المطبخ .. فحدرت حجرة اختها شيخه اللي كانت يالسه ع شبريتها تقرا قصه من القصص اللي منزلتنهن من النت يت ميثه ويسلت ع طرف الشبريه
شيخه وهي فالخه : والله اتحريتج جنيه
ميثه : هههههههههه اسميج هب صاحيه
تمت شيخه اتسولف معاها
ميثه : يوعانه بس ماروم احدر المطبخ تدرين امج بتسويلي امية قصه وقصه
شيخه : يالله لو اشوف عفريته اهون عليه من شوف امايه وهيه معصبه
ميثه : عاد خلج انتي ع برد ... زيااااغه
ملاحظه : شيخه كانت من النوع اللي وايد تخاف من امها يوم تعصب واتسوي اللي اتقول االها ايه امها لو ما كانت تبا اتسوي هالشي .. وشيخه بنت خريشه مرات امها تستغرب من حركاتها وسواياها
شيخه : حسبي الله ع بليسج اللي بليتيني بهاي القصه الحينه كيف برقد وانا جد بديت في قرايتها
ميثه : شيخووه اهنيه يعورنيه ( وهيه تهوس فوق بطنها بشويه ) جبديه جبديه اتعورنيه
شيخه : تبيني اشوتج ؟
ميثه اللي كانت منسدحه ع طرف الشبريه وهيه تسطع شيخه بالخفيف ع خدها يعني تمزح معاها : عله تعلج يالدفشه قالت اشوتج شو ماشي شغله ؟ اتشوفيني كره جدامج ؟
شيخه : ههههههه شو اسويبج ؟
ميثه : اقولج ييبي الساعه بشوف
شيخه : وهيه اتولع الساعه فويه ميثه
ميثه : حوووه شعندج
شيخه : شوفي ساعتيه تتلون كل شويه تولع بلون
ميثه : هههههه عنبوج شو ها ؟
شيخه : اقولج يوم بياخذج بطوي
ميثه بسرعه : بسم الله عليه الله لا قاله ان شا الله
شيخه : ههه سمعي انتي شلي هاي الساعه ولعيها في ويهه خليه يشلق
ميثه : زين خلاص ما عليه هذا اذا خذته .. تحلمين الشيخه .. بس اقولج خلي الساعه عندج احتياط عشان هاذيج الحزه اعرف اتصرف
شيخه : ههههههه ما اتخيل شكله .. اسميج انتي شكلج الا بتيننين بالريال
ميثه : دوااااه محد قاله ياخذنيه انا .. شو قلن البنات لازم انا ؟
شيخه : ههههههههه اتخيلج انتي معاه اول ما يزفونه لج يوم بيخلونكم رواحكم .. اتشلين الورده وتعطينه ع راسه
ميثه : هههههه ( باستهزاء ) ومنوه قالج انيه اتنزل ولا بسويله سالفه ماشي شغل شوه حتى ولا بصد صوبه ولا بشووووووف رقعت ويهه ووردتيه ما بخبرها بسبته
شيخه: هههههههههههههه يالخقاقه
ميثه توها بتضحك لكنها تمت تتويع : اااااااه شيخوه حسبي الله عليج بس لا تضحكيني ماروم بطنيه ذابحنيه انسه ( احس انه ) يتقطع عليه من الويع
شيخه : ميثوه شو بلاج؟
ميثه : مادري صخي والله يعور
شيخه : ازقر امايه
ميثه وهيه هب رايمه تتحمل الويع : لا لا مابا
شيخه : هب كيفج بزقرها
ميثه : لا قلتلج لا
شيخه وهيه تنش من ع الشبريه
ميثه اتحاول تمسكها وما لحقت غير ع تي شيرتها : ايييه تعالي وين سايره شيخوه مابا ردي
شيخه وهيه تفتر صوب ميثه : هااا .. ميثوه بزقري امايه ما اتشوفين كيف شكلج
ميثه : بس مابا عاد الا هيه تهتم اليه
شيخه : مهما كان هيه امج .. بسير ازقرها
سارت شيخه ولا عطت ميثه فرصه تتكلم ولا تردها عن السيره
يت امها
ام حمدان : لازم بيعورج من هالغثايث اللي تاكلينهن
ميثه : والله ما كلته اليوم امايه
ام حمدان : ما يخصه اليوم ولا قبل
ميثه : البارحه الا ماكله اندومي
ام حمدان : والعثرتين من زينه عاد الاندومي الحينه .. قومي بعطيج خيله
ميثه وهيه اتحاول اتقوم لكنها ما رامت موليه
ام حمدان : يله قومي
ميثه : مااااروم ايزيد الويع يوم احترج
ام حمدان رغم كل اللي في ميثه ما حنت عليها واسلوبها تم شرا ما هو ما حاولت حتى اتغيره
ام حمدان : شيخه سيري وييبي الها خيله و ما
شيخه : ان شا الله
ظهرت شيخه من الحجره وتمت ام حمدان مع ميثه لكن ما قالت الها شي تمت تطالعها لين يت شيخه ومعاها الخيل
صرطت ميثه الخيله .. وراحت امها ترقد .. اما شيخه اتقربت من ميثه
شيخه : ميثه اذا ما اترومين اتسيرين حجرتج ارقدي اهنيه عنديه
ميثه : اوكيه خلاص بس ممكن تيبين اليه مخدتيه من الحجره لانيه ماعرف ارقد على وحده غيرها
راحت شيخه ويابتها لميثه .. وانسدحن ع الشبريه وتمت شيخه اتسولف مع ميثه سوالف عاديه لين ياها الرقاد وارقدت لانه باجر وراها دوام
اما ميثه حاولت ترقد لكن الويع كان مطفربها وغير ها كانت ضايجه من اسلوب امها معاها .. لكنها من التعب عقب فتره ارقدت
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك