رواية سرقتك بالزمن لحظه وعشتك بالفراق اوقات -41
نزلوا وتحمد ربها البيت هادي رغم انها حزه العصـر شكل عمتها والبنات طالعات مكان
بعد ربع ساعه وصلوا المستشفى الخاص ونزلت وهي كارهه للموضوع كله .. الموانع وبتتركها لكن مافي داعي تتعالج هي مافيها شي كل حاجه في هالزمن صارت التجاره بالمقام الاول من اولوياتها حتى الطب صار تجاره محضه للاسف ونادره الامانه الطبيه سواء كتشخيص وعلاج او كـ تكاليف منصفه .
دخلوا غرفه الطبيبه الي جود مو طايقه خلقتها والي بس سافهتها وتكلم فيصل وهي صاحبه المشكله ولا كأنها موجوده ...بدت طبعا الطبيبه تتكلم مع فيصل كالعاده ومطنشه جود .. وجود ساكته ..
...... وطبعا راح نبتدي بأبر المنشطات "
ناظرتها جود بصدمـه " نعم نعم منشطات صاحيه انتي "
الطبيبه " انتي كنت تاخذي موانع واذا كنتي تبين تحملين الشهر الجاي لازم منشطات "
ناظرت جود في فيصل تبي تشوف رأيه – تسمعها شتقول ابر ومنشطات ... ماتسوى السالفه
همس والقهر باين بصوتـه – كل هذي عمايل يدينك لو ما اخذتي موانع ما احتجنا للشي ذا
انصدمت جود من ردة فعله صحيح همس بـ هالكلام لكن نظرة الرضا بعيون الطبيبه علمتها انها سمعت كلامه زين .
فيصل يكلم الطبيبه – مافي حل ثاني
الطبيبه تحاول تقنعه بموضوع المنشطات – لان المدام خذت موانع لمده طويله ف مستحيل تحمل مباشره بعد تركها راح يكون معها فتره حمايه وهي يا انها بتكون نفس المده الي تتناول فيها الموانع او اكثر وطبعا الموانع تسبب ضعف لها لذا نسبة حصول حمل بتكون قليله لذا انصح بالمنشطات وان وافقت نقدر الحين نعطيها وحده
جود بعصبيه – انا مو لعبه بيدك منشطات لا
الطبيبه عصبت عليها – ماتبين منشطات انتي حره
ووقفت ,, - انا بتركك مع زوجك وتفاهموا
وقف فيصل معها – موافقين على اخذ الابـر
وقفت جود ووجهها اصفر – صاحي انت هذي مو لعبه انا مو لعبه
فيصل – لا تسوين فضيحه بالمستشفى يا جود وتذكري انك انتي السبب في هذا كله
همست وهي مدمعه – ذليتني ترى ماصارت ...!
فيصل بعصبيه – هذي فعايل يدينك لا تجلسين تمثلين دور البريئه كان المفروض تحسبين حساب ان لي وجود ولي رأي ولكنك جحدتيني وصرتي تتعاطين الموانع بالدس عني انتي تصرين انك ماتزوجتيني غصب لكن فعلتك ذي ماتبين انك تبيني ...
وقفت في وجهه بأنفه – انا لو ما ابيك ما تحملت طبعك وتعاملك الجاف معي (دمعت عيونها ) انا احلم اني اوصل لاي طيبه او حنيه ممكن تكون بداخلك وماقد شفتها عندي امل وانا اذا كانت عندي امال اتمسك فيها لين اشوف الطريق قدامي مسدود وان هالامل اضغاث احلام ساعتها بس استسلم للابد .
ناظرها بصدمه وحست فيه لاول مره ما يلقى شي يقوله ..
قاطعتهم الطبيبه – ياليت تجي معاي المدام
وقفت جود تناظر في فيصل والصمت يلفهم والجو متوتر حست بالخذلان وان الكلام الي قالته تو, ماوصل لاعماق نفسه ..
طلعت الطبيبه و جود وراها قالت وهي عند الباب – اذا انا بنظرك غلطت فأنت بعد غلطان لانك ماتعرف تسامـح !
صدمته كلماتها للمره الثانيه ..وقبل لايرد حطت الغطا على وجهها وطلعت مع الطبيبه ...
مرت نص ساعه لا جود بينت ولا الطبيبه ...جلس فيصل يطقطق بالجوال رفع عيونه وشاف
الطبيبه داخله بلحالها – وين زوجتي
الطبيبه ووجهها ماله لون ...- اغمى عليها بعد ماعطيناها الابـره وهي بخير ما تخاف
ناظرها فيصل بنظره قويه وطلع من المكتب للغرفه الي فيها جود لقى الممرضه عندها تشربها مويه بارده وجهها ماله لون وترتجف ..قرب لها وانكمشت على نفسها مو طايقه يقرب منها تورط وده يجي لها وماوده عشان ماتسوي فضيحه بالمستشفى ...
فيصل – خير شصاير
قالت الممرضه – هالابره شوي مؤلمه وهي ماتحملتها اول ماخذتها ..
قالت جود وهي تقوم عن الكرسي – انا بخير بخير
فيصل – متاكده
ماناظرت فيه لبست طرحتها ومشت على مهل طلع معها
>>
وطول الوقت بالسياره ما كلموا بعض وطلعوا البيت بعد ماقابلوا واحد من اخوان فيصل عند سيارته برا وردت عليه السلام بكل هدوء ودخلت البيت وعلى طول لبيتها هي رمت العبايه والشنطه وهي تحس بنفسها مرهقه وتتألم الم جسدي اكثر من النفســـــــي ... شغلت المكيف ودخلت سريرها ومادرت الا وهي نايمه ..
ماصدق فيصل افتك من اخوه ومشاكله الي ما تنتهي وهو داخل البيت قابل ابوه وكملت عليه طلع بيته بعد ساعه وشافه هادي بشكل مو طبيعي وين راحت لايكون اغمي عليها مره ثانيه راح للغرفه وفتح الباب لقاها ظلام وجود نايمه ... حس بتأنيب الضمـير على الي صار بس هي الي حدته على هالقسوه .
سكر باب الغرفه ..طلع من البيت عشان يمر على مقر عمله رغم ان كل شي يوصله بالتفصيل عن طريق الجوال او زملاءه الي يزورونه يوم كان بالمستشفى ..
*دخل المركز بعد تقريبا ثلث ساعه *
فيصل – السلام عليكم ...
قال الضابط المناوب عنه – هلااااا والله يالله تحييه
فيصل – الله يسلمك اخبار الشغل والشباب
الضابط – زينه الحمد لله وابشرك الليله بننقل السجين الي عندنا ونفتك منه سمعت انهم بيحاكمونه
انشرح صـدر فيصل – واخيـرا سنين وانا اطارده وكل مره يطلع منها
الضابط بابتسامه كبيره – هالمره ثابتـه مامنها خلاص
فيصل – بحول الله
قام فيصل سأله الضابط – على ويـن تونا ...
فيصل بابتسـامه – ابدا بطل على السجين وبطلع البيت برتاح مادمت بإجازه
الضابط – براحتك اهم شي صحتك مانستغني
فيصل – هههههههه ايه يصير خير
ضحك الضابط – حرام عليك انا صادق
ابتسم فيصل وهز راسـه يعرف انه متطلب في شغله وعصبي وحامي بس اخوياه وربعه هنا بالمركز يعرفونه زين ولا يزعلون منه .. ومايقصرون معه ..والاهـم يحبوونـه ...
دخل فيصل التوقيف ...ناظره الرجال بعيون حمر ووجه كئيب ... وقال جمله ظل صداها يـــــرن بقلبه من الخوف – بتنـدم ... وراح تشوف كل من تحب ينهار وانت واقف تشوف
قال فيصل بثقه رغم غصه الخوف بحلقه – تهديداتك المريضه ماتخووووفني ... وربعك انسجن الي انسجن ومات الي مات منهم ... جيت اقول لك ان الله يمهـل ولايهمـل .. وباذن الله تنال جزا لافعالك الشينه بحـق وطنك وديرتك .
ناظره الرجال نظره فارغـه .. وطلع فيصل من عنده بكل ثقه ...
قال للضابط – يالله اشوفك يوم السبت ان شاء الله
الضابط – ياخي ارحم عمرك توك مريض وبتداوم بعد كم يوم .
فيصل – واجد هالايام الله يصبرني ..سلام
ناظره الضابط بابتسامه فيصل مدمن شغل وماتغير عنه يوم كان عـزوبـي !
>رجـع البيت متأخر<
دخل ونزل شماغه بالصاله البيت فيه هدوء فضيع ... وين راحت جود لايكون صار لها شي ..مشى بسرعه لغرفتهم ولقاها ظلمه اللهم نور خفيف عند السرير خلاه يشوف جود معطيه الباب ظهرها وكانت تبكي ...ضاق صـدره ..جلس جنبها وكلمها برقه – جود ...
مسحت دموعها بقفا يدها – نعـم ..
فيصل – تحسين بشي فيك شي
جود وصوتها يالله ينسمع من الصيـاح – شرايك يعـني ..
تنهد – جود هذي مو حياه شغلي ماخذ كل وقتي والي اتمناه القى الراحه ببيتي وراحه مافيه راحه
جت بتحتج وسكتها – انتي مو مقصره بواجبتك بس ليه دايم نتهاوش انتي تعرفين طبعي ياجود لنا كم شهر متزوجين المفروض ماتسوين شي الا بشوري ...
سحبت نفسها وجلست – يعني انا مالي راي مالي وجود
همس وهو يكبت انفعاله – ماقلت مالك وجود بس انا ولي امرك ومسؤول عنـك ليش تحطين من الحبه قبه .
مو قررت تسلمه زمام امرها وحياتها مو قررت تحاول تنجح زواجهم مهما كانت الظروف والعواقـب ...همست وهي ترجع شعرها ورى – خلاص فيصل الي صار صار انا مابي مشاكل ووجع راس .
سحب نفـس طويل وقال – ما يخالف بروح اجيب لنا عشا من برا وش مشتهيه
جود – على كيفـك انا مو مشتهيه شي محدد .
وقف – زين ربع ساعه وراجـع .
وطلع من البيت ..جلست جود تناظر في الفراغ بعدين وقفت تعدل شكلها احسن من جلستها كذا .
/
/
>> بعد يوميـن ...
لبس فيصل ملابسه عنده موعد بالمستشفى وقالت له جود وهي تعطيه شماغه – نزلني بدربك ببيت اهلي
اخذ شماغه منها – مصره .
ناظرته – فيصل لي اسبوع قايله لك عن جيت عمر الموقته هنا
فيصل – زين انا مستعجل الحين يالله امشي
- انا جاهزه باخذ عبايتي بس .
قال لها وهو رافع حاجب – واثقه اني بوافق طيب لو عييت وش بتسوين
ابتسمت برقـه –قلبك طيب منت بمعيي
ابتسم وجلس يناظرها مده .. لاول مره يحس بشي يجمعهم شي حسـي !!
نزلوا وبالطريق قابلوا ابوه سلموا عليه قال بلقافه الكبار بالسن – على وين .
فيصل – عندنا مشاوير بنقضيها
ابوه وهو يمشي تاركهم وراه – ياكثر مشاويركم هاليوميـن ...
قالت له وهم بالسياره – ورى ماقلت له وين رايحين
فيصل – مو لازم كلن يدري وين رايحين حتى لو مكان عادي لنا حياتنا حتى لو ساكنين مع اهلي .
نقطه اعجبت جود .. بس سكتت لايفهم انها تحرضه على اهله .
بعد كم دقيقه قال فيصل – بتروحين يدك فاضيه
جود – بطلب لهم عشا على حسـابي الليله
فيصل – على الاقل خذي معك حلا استني في محل اعرفـه قريب من بيتكم حلو شغلهم اسمه .....
قالت جود الاسم بنفس الوقت .. وناظروا في بعض وضحكوا ...
جود بمرح – يوه قبل لا اتزوج كنت مأذيتهم اطلب منهم ياحلوها ذيك الايام ..
قالت كلامها باندفاع عفوي وماحسبت انه ممكن ينفهم غلط ..مست وتر حساس في نفسه وقال وهو يناظرها – والحين وشلون ايامك ...
ناظرته برقـه – الحين وبـ هالساعه احسها حلوه بعد .
ناظرها مايدري شيقول كان محضر نفسه لهواش جديد وحواجز تنبني اكـبر ... وصل محل الحلا في نفس هاللحظه ..ناظرها ثانيه ونزل للمحل ...
جلست جود مصدوم من نفسـها .. لانها لاول مره تحس باهمـيته في حياتها صحيح انه مثل ماهو جدي تقليدي بقوه بس بدت تفهمه صـح وتتقبل طبعه زي ماهو .. مهما كان فهي مهمه بحياته هي زوجتـه وقريب بتكون ام لعياله .. اخيرا بدت تحس بالحياه تبتسم لها بعد سنين كان الفرح فيه تتخلله عبرات
رجع من المحل محمل باكياس انصدمت جود – وش ذا يا فيصل ...
فيصل – مابقي الا تروحين لاهلك بيدين فاضيه ..
قالت بابتسامه – نادرا ماكنا نمر محل حلا .
رفع حاجب وهو مبتسم – لانك كنتي تسوين حلا بالبيت ياذكيه ..
جلست جود تضحـك من قلب ...
قال وهو يشغل سيارته – هذي هي الحياه الي تمنيتها زوجه متفهمه تقوم بواجباتها تهتم فيني وببيتها وتحب اهلي وتقدرهم وتساعد بالمناسبات زوجه لها وجود مو طيف .. ياليت الوضع مايتغير ابدا
همست – ان شاء الله نكون تعدينا كل هالخلافات الي تبعدنا ونكمل حياتنا مع بعض بتفهم واحترام متبادل..
وكملوا المشوار وهم يتكلمون مع بعض صحيح فيصل زي ماهو تفاصيل وتعمقات في شغله امر محرم بس مع كذا كان الكلام معه متعه ومادرت انهم وصلوا بيت ابوها الا لما قال لها – وصلنا
نزل الاغراض ودخل معها يسلم على اهلها ....
دخلت جود البيت ورمت طرحتها وعبايتها لقت امها جالسه مع البتول يسولفن وندى موجوده ..
جود – سلااااااااااااااااااااام ..
شافنها البنات وضم وسلام
جود – ههههههههه خير كان لكم شهر ما شفتوني
ندى – الشرهه مو عليك علينا الي فرحانات فيك
جود وهي تتذكر – يوه يمه فيصل برا بيسلم عليك مستعجل
البتول – خلف الله على الرجال منلطع بالشموس برا
ام بندر – ايه يمه مايجوز تتركينه برا وماتعلميني
جلسن البنات يضحكن عليها وانتظرت لين طلعت امها – احلفي بس يا انسه البتول
البتول – مدام لو سمحتي
جود – هههههههههههه الله يرجك بس
ندى – قولي انك بتنامين الليله هنا ...
جود بتكشيره – ماتوقع بعدين زوجي مريض شلون اتركه
ناظرن البنات في بعض وابتسمن ابتسامه ما ارتاحت لها جود..
حمر وجهها – هههههههههههه خير ان شاء الله ...
ندى والبتول ببراءه – ولاشـي ...
- اطلع اجيب الاغراض من برا اصرف لي
قالت ندى – الشغاله تجيبها ولا بتلقين نظره على البعل
جود –ههههههههههههههه شفيكن اليوم مو صاحيات وليش القي نظره الاشتياق زين
وغمزت وطلعت وهي تسمع اصوات ضحك البنات وتعليقاتهن عليها .
لاقت امها بالطريق والشغاله تدخل الاغراض
ام بندر – راح زوجك وعيا يتقهوى
جود وهي تمسك يد امها بمحبه – ايه مشغول مره وين العيال وابوي
امها – ابوك مسير على اخوك متعب وحده من بناته انخطبت ...
انصدمت جود – من ؟
ام بندر – مدري اظن اسماء او نجوى او الثنتين كلهم
جلست جود تضحك- اما الثنتين كلهم .
ام بندر – الله يرزقهن ويتزوجن ويصيرن حريم سنعات ...
سكتت جود ماعلقت على الموضوع ...وقالت لماتذكرت – يمه عايشه اكبر من اسماء شلون تعدوها ماظنيت اخوي يوافق تتزوج الصغيره قبل الكبيره .
ام بندر – نسيتي ان عايشه لفارس ...
جود وهي تتذكر – يمه الكلام مو زي الفعل ... لو يبيها خطبها من زمان ...
بحنايا الروح جرح الكرامه مازال ينزف !
/
بيت ابو طـارق ...
قال ابو متعب لولده الي يحتريه ينطق برايه ...- الحين سالم خطب نجوى وخطب اسماء لولد اخوه شسمه
ابو طارق - اسمـه نايف ..
ابو متعب – طيب الولد ماقلنا عليه شي بس عمه مو كبير على نجوى ولاتنسى انه متزوج
ابو طارق – لاتنسى يبه البنت مطلقه والرجال مو كبير مره عمره يا اربعين ياواحد واربعيـن وحرمته لها سنين عند اهلها ماطلقها
ابو متعب – اشوفك متحمس له
ابو طارق وهو يتنهد – يبه هم البنات كبير ابي ازوجهن وارتاح بشوفتهن مستقرات انا مدري وش بين نايف وزوجته بس الي اعرفه عنه ان رجال طيب وسيرته زينه بين ربعه ...
ابو متعب – اذا تشوفه مناسب الله يقدم الي فيه الخير انت اخذت شور البنت ...
ابو طارق – قلت لامهن تقول لهن اهم شي نجوى بعد طلاقها من ماجد فرص زواجها قلت وهي الي تهمنـي حاليآ ...
بنفس الوقت... قال تركي لامه بالصاله داخل البيت – يمه خليها توافق بالطيب احسن الرجال طيب وماعليه خلاف لاننسى انها مطلقه ومحد بجايها كل يوم يخطبها ...
ام طارق وهي تهمس – اسكت لاتسمعك وتعاند ونصير بمشكله انا بخليها توافق بطريقتي اختك صح فيها صفات شينه تعرف مصلحتها
تركي – زين زين .. الناس مستعجلين يبون رد ...
- طيب رح انت لابوك وجدك وانا اتفاهم معها ...
دخلت نجوى الصاله معها صحون حلا – اليوم فيه شي غريب صاير وشو..!
امها – تعالي اجلسي واعلمك
نجوى – اوه الموضوع فيه ان لحظه اجيب دله القهوه
رجعت بعد ثواني وصبت لامها فنجال – خير شصاير
امها – كل الخير جاك معرس امس .. وخطبك من ابوك
نجوى – معرس من اعرفـه
امها – من معارف ابوك هو من جماعتنا بس من بعيد
نجوى – اكيد متزوج
امها – ايه بس زوجته تاركته من زمان .........
نجوى – تاركته ولا لا مابي اتزوج واحد متزوج بيصير زي حاله البتول جحدها ورجع بالنهايه رجعها
امها – يمه انتي عارفه ان وضعك الحين غير قبل لا تتزوجين وماراح تنخطبين كل يوم
نجوى بعناد – مابي اتزوج واحد عنده مره ابداااااااااا
امها – بس
نجوى بضيق – يمه قفلي السيره ولارحت لبوي وقلت رايي بوجهه
مجنونه وتسويـها !
امها بخبث وهي تقهوى – سمعت ان ماجد يدور له عـروس ...
نار الحقد على ماجد مازالت بقلبها ماخمدت .. – يتزوج عساه مايتهنا ...
امها- ايه قولي كذا واجلسي عندي لين تعنسين وهو يكمل حياته ولاى كأن شي صـار .
نجوى بتردد لما اصابت امها فيها وتـر حساس – انا مو ضد الزواج انا ضد ان يكون لي ضره .
امها – قلت لك الرجال حرمته تاركته لها سنين بس ماطلقها لو يبيها رجعها يمكن تاركها عشان بناته .
نجوى – مدري ...
امها – الفرصه ما تتفوت والرجال عنده حلال ومال ومركز وهو يبي بنت عاقله متعمله ومزيونه وكل هالصفات فيك بالله بيناظر في زوجته الاولى الي ماتعلمت وانتي على ذمته ..
تعرف امها شلون تخليها تغتـر بنفسها ....والاهم عرفت تستغل ترددها وضغطت عليها لين وافقت .
باقي الحيـن اسماء ...
والي كانت معنده ... اسماء – يمه مابي واحد فقران يعيشني بهم طول عمري
امها – يابنت الناس ذولا تجار ولهم مركز وهيبه
ناظرتها اسماء – جد
امها – أيـه جد العب عليك يعني ...
اسماء بحماس مفاجئ – طيب حلو هو كشخه
عصبت امها عليها – اسموه ..
اسماء بفشله – يوه حرام الواحد يسأل
امها – لا موحرام بس يسأل اسئله سنعه ... شوفي الرجال تارك بنات عمه وراه جيش وجاي يبيك انتي شقلتي موافقه ولا لا .
اسماء – ايه موافقـــــه بس لي شروط ...
امها – وشهي شروطك
اسمـاء – مهري مية الف وابي سواق وشغاله وسياره تحت تصرفي
انصدمت امها – تبين تحطيني بمشكله مع ابوك
اسماء شوي وتبكي – يمه ذي حياتي وانا حره بعدين انتي قلتي انه غني يعني ماراح يعجز
امها بحيره – يمه تعرفين طبع ابوك زين وانتي بـهالشروط كأنك تنباعين مو تتزوجيـن ...
اسماء – هذي شروطي وانا حـره .
امها – انا بقول له وانتي كيفـك .
راحت اسماء طيران لنجوى – ماني مصدقه اننا انخطبنا في يوم واحد بس تعالي وعايشه غريبه ابوي وافق اتزوج قبلها
نجوى وهي تفكر – ابوي ماغير عوايده اكيد انه ضامن لها معرس
اسماء وهي تجلس قدامها – صدق من تتوقعين
نجوى بابتسامه مافيها فرح كلها حقد – اكيد فارس مافيه غيره
اسماء – يو تتوقعين
نجوى – ميه بالميه تشوفيـن ...
/
بالمجلس تحت ...
قال ابو طارق لابوه – البنات وافقن زي ماقالت امهن ..
ابو متعب بابتسامه جعدت وجهه الوقور – اجل على البـركه ...
ابو طارق – عسى بس فارس يتلحلح ويخطب عايشه لاينكسر خاطرها بخطبه خواتها .
ابو متعب – بيخطبها الرجال يبيها اليوم ولابكره مصيره جاي .
ابو طارق – الله يقدم الي فيه الخير الحين بكلم على نايف وابلغه ..
ابو متعب وهو يوقف ... – اجل انا طالع
وقف متعب – على وين يبه بدري
ابو متعب – وراي مشاوير
وطلع من البيت ...
رجع ابو طارق وكلم انسباءه المستقبليين واتفقوا بكره يجتمعون ويناقشون التفاصيـل ....
/
/
/
/
{بيت ابو متعـب}
دقت جود على عمر ... لانه تاخر وماجا
عمر – اهليييييييييين جود
جود – ويتك تراني من العصر عند اهلي
عمر – هذاني ادخل سيارتي بالبيت ...
جود – اجل بجيك برا ...
سكرت الجـوال ...
كانت امها تصلي بغرفتها والبتول فوق في بيتها وندى تكلم بالجوال حبيب القلـب الي عنده دوام مده 24 ساعهـ
طلعت برا .. وشافت عمر يقفل سيارته
شافها وابتسم لها سلمت عليه وشبكت يدها بذراعه – ياشينك لي كم ساعه هنا انتظرك
عمر – ههههههههه شسوي كنت مع اخوياي اليوم مسوين لي عزيمه غداء مبطي عنهم
انتي شخبارك شمسويه ..
جود – انا بخير الحمد لله مشتاقه لك وربي لك وحشـه ..
سحبها عمر المجلس البراني – تعالي نسولف هنا قبل لا ندخل ...
ابتسمت جود – طيب ..
دخلوا المجلس ملست تنورتها البيضاء الي ستايلها غجري وفيها تطريزات تدرجات السماوي ولابسه بلوزه سماويه لابقه لها وشعرها مخليته مفكوك على طوله وطالع حلو بالقصـه الي مسويتها فيه ..
جلسوا قال عمر – انا بستقر في جده
ناظرته جود بصدمه – وشو تستقر ليش
عمـر – هناك ببدا حياه جديده وشغلي زين وبترقى والراتب بيزيدونه بصير مرفه بحياتي
جود على قد ماهي فرحانه ضايق صدرها مو متخيله عمر يسافر ويعيش بمدينه ثانيه
جود – امي درت ..
عمر – لمحت لها وشكلها متقبله الموضوع مادام خير لي ...انا بصراحه مرتاح نفسيآ لـ هالتغيير
جود بغصـه – وتسكن هناك بلحالك ماعندك اهل ولاقرايب ...
عمر – لي اصدقاء وزملاء هناك
جود – هالاصدقاء ماراح يخدمونك يطبخون لك يغسلون لك ملابسك ترى الوحده شي مو سهل على الاقل خل امي تخطب لك
ابتسم عمر وقال – ايوه جينا لبيت القصيد انا جبتك هنا ابيك تختارين لي بنت
جود – انا
عمر – جود انتي اقرب خواتي لي وتعرفين الي تصلح لي من الي ماتصلح هاه شقلتـــــــــــــي ..
جود بابتسامه – وذي فيها قول اكيـد موافقـه
عمر – في بالك احد معيـن ...
يااااااااارب يااااااارب توفقني في مسعآي ..ابتسمت بخبث
ناظرها – هههههههههههههه هالابتسامه مو عبث منهي ...
جود – صديقتي اريـج ..
عمر – اريـج
جود – ايه اريـج اسمع يا عمر تبي تعرف اريج تراها نسخه عني انا نتشابه بكل شي .. بنت اخلاق وعلم وجمال ..بس اخاف ابوي مايوافق عليها
عمر – ليـه ؟
جود – لانها مو من جماعتنا
عمر – اذا بنت ناس واصل وفصل مو قايل شي اكيد بيكون له تحفظات بس انا ادرى بمصلحتي ...
كملت جود بتردد – اسمع ياعمر اريج لها ولد عم لك عليه شوي مو صاحي ولاخطبها احد يفركش خطبتها وهي ماتبيه
رفع عمر حاجب – امممم
جود حست بتراجع اخوها – هي ماتبيه الي تحتاجه رجال يقدر يتزوجها غصب عن هالانسان المريـض انسان مصر انه ياخذها رجال بكل معنى الكلمه ترى هو ماعنده الا الدجه صوت عالي وتهديد على الفاضي لو لاقي من يوقفه عند حده ترك الضعيفه تشوف نصيبها طول سنين صداقتنا وهو زي الشوكه ببلعومها ابيك تفكـر بالموضوع زين والله اريج مامثلها واسأل امي وخواتي عنها .
عمر – يصير خير الليله بفكر واقلبها براسـي وبشوف
جود – زيـن
سمعوا صوت سياره تدخل البيت قال عمر – هذا يا بندر او الوليـد ...
بس الي دخل يزيد شاف جود وتوهج وجهه من الوناسه ...
جود – شخبارك يزيدوه واخبار الجامعه ...
يزيد – وناسه الجامعه انتي وش اخبارك من زمان عنك
جود تستهبل – خلاص انا الحين حرمه متزوجه مو فاضيه ابدا
يزيد – هههههههههههههههه تكفين يا حرمه اقولي انقلعي بس
جود – هههههههههههه وجع يوجع عدوك احترمني اكبر منك ..
وجلسوا يتناقرون مثل عوايدهم ...
مـر الوقت الحلو كالعاده بـسرعه الصاروخ....
وبعد العشا طلعوا العيال برا البيت كلن بحاله وندى وجود والبتول جلسن بالصاله يسولفن ...
قالت البتول لجود – شفيك كانك تعبانه ان ملاحظه عليك هالشي من اول مادخلتي علينا شرايك ندى
ندى – أي والله خير
جود بابتسامه فيها لمسات حزن – عندي زوج موسوس يبي عيال
البتول وندى انصدمن قالت ندى وهي شوي ويغمى عليها – درى انك تاكلين موانع
جود – ههههههههههه درى وبغى يذبحني
البتول – يو يو يو وش سويتي
جود – ابد خناق وهواش واخذني غصب لمستشفى وعطوني منشطات عشان احمل
ندى بعصبيه – مجنونه انتي
جود – بلا فيصل مو زوجك ولا شفتي شي عمرك ماشفتيه ..
البتول – ياحياتي ...بس يوم جيتي كنتي مبسوطه
جود – بدينا نتفاهم واليوم كان مره معي متسامح
ندى ماقدرت تمسك نفسها – هههههههههههههههههه متسامح خير ان شاء الله
جود – ههههههههههه يعني مو زي قبل انا ما اقصد انه متكبر بس هو جدي بقوووووه واليوم كان غير احس حياتنا بدت تتعدل وبديت افهم عليه وهذا الي خلاه يتغير .
البتول بلسانها الطويـل والي يسبق تفكيرها –العيال مايجي من وراهم الا تعقيد و......
رفعت عيونها وطاحت بنظرات بندر المحتقـــــــــــره شب وجهها ضو يا الله لااااااااااااااااااا مو للدرجه ذي حظي يكون شيــــــــــــــــــــن مو على ذا الكلمه يسمع الي قلت .. حياتي مو ناقصه حواجز جديده ..
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك