رواية سرقتك بالزمن لحظه وعشتك بالفراق اوقات -37
قال سكرتيره بعد ماطلعت –ياخوفي لا تكنس الصفقه كلها
ماجد بابتسامه فيها استهزاء – شف لو اقطع راسها وارميه بالشارع ما اهتموا هذولا ناس زي الالات معدومين من المشاعر اهم شي المصلحه الشخصيه ماعليك منها وان شاء الله ماعاد نشوف خلقتها هنا
السكرتير – ههههههه بعد الي سمعته ماظن بتعيدها .
ابتسم ماجد- لعل وعسى ... خذ هالاوراق وخلهم يسوون لها نشخ ويرتبونها بالملفات.
السكرتير – ان شاء الله .
وطلع من الصاله وطلع ماجد بعده وراح لمكتبه ...لقى فارس جالس فيه .
ماجد – السلام عليكم
ابتسم فارس – وعليكم السلام ..
جا بيقوم عن كرسي ماجد لكن ماجد قاله يجلس وجلس هو بالصوفا الي عندها طاوله قهوه مستطيله ومعه اوراق جلس يتصفحها.
فارس – شخبار الاجتماع اليوم .؟
ماجد – زين انتهى باتفاق الطرفين
فارس – زين والبنت المزيونه جت معهم ...
خزه ماجد وجلس فارس يضحك وقال يحارشه – يقولون انك عطيتها محاضره عن تاريخ المملكه
ماجد وهو ينزل الاوراق – تحمد ربها بغيت انزل عقالي واميدنها به
فارس – هههههههههههههههه حرام عليك ماتستاهل .
ماجد – فارس تعرفني ماحب الحال المايل واصلن من يوم ماشفتها ماتقبلت وجودها .
فارس وهو يغمز – بس تتعامل مع حريم احيانا
ماجد – ما انكر لكن لا تقرن المسلمات العفيفات بالاوروبيات الوحده من الاحترام الي تفرضه بوجودها والستر الي هي فيه ودك تحطها على راسك من فوق المهم وش عندكم مشرفني بـ هالزياره من صباح ربي .
فارس يتمصلح –ابدا سيارتي يوم طلعت من الشغل لقيت بابها معدوم في احد صادمها ومنحاش وبما اني على الحديده .......
وغمز لماجد الي قال له – لاتنسى ان لك نصيب من هالشركه وكلنا متشاركين فيها ليش مامريت على المحاسب واخذت الي تبي
فارس – واتعداك ولايمكن .
ماجد حس بفخر وانشرح صدرهـ ,,,هذولا هم اخوانه تربية يده ..ماجد – اجل اطلع للمحاسب وخذ الي تحتاجه بس لا تكثر محتاجين سيوله عندنا صفقات جديده .
فارس – ههههههههههه الله يهديك بس كانك ماتعرفني (قالها يستهبل)
ماجد وهو مبتسم –البلا اني اعرفك ...
قام فارس بيطلع وتذكر شي ..-ايه صح نسيت اقول لك فيصل نسيبنا تصوب في عمليه امس وهو بالمستشفى..
انقبض قلب ماجد – وشو
فارس بارتباك – يقولون بخير جته بالكتف بيجلس بالمستشفى ايام ثم بيطلع
ماجد – تعرف باي مستشفى هو ...
فارس – ايه ..
ماجد – زين عشان نزوره العصر
فارس – على خير سلام .
ماجد – ماتشوف شر.
جلس على كرسيه ...مشغول البال وشاف الساعه تقارب عشر ..يالله كيف نسى معاملات الطلاق .راح للمحاسب وشاف فارس عنده
فارس –خلصت
فارس – ايه
ماجد – تعال ابيك تخاويني ..؟
طلع فارس معه وساله لما صار ماحولهم احد – على وين ...
ماجد – اخلص معاملات الطلاق
فارس – ااه طيب اوكي
وركب كل واحد سيارته ...
بعد ما انهوا المعاملات ووقعوها ...صار الطلاق رسمي ومابقي الا فتره بسيطه وتنتهي العده
قال ماجد لفارس – انا بروح لبيت ابو طارق واعطيه ورقة بنته
ناظر فارس بساعته – مابقي على الاذان شي
ماجد – احسن بعد عشان يكون لي عذر قوي عشان ما اقلط
فارس – زين اشوفك بالبيت اجل
ماجد – ان شاء الله ...
افترقوا ...وبعد كم دقيقه وصل ماجد لبيت ابو طارق وتو المؤذن ياذن ...
ومن حسن حظه ان الي فتح له الباب طارق والي ارحمه انه حليف له
قال ماجد بعد السلام – هذي يا طارق ورقه نجوى عطها لها
اخذها طارق وهو متفشل – على خير
ماجد – يالله استأذن
طارق – تقهوى
ماجد – بروح اصلي اذن مره ثانيه سلام
طارق – مع السلامه
ودخل البيت ودمه فاير مو من الطلاق لا من وجهه الي ضاع قدام ولد عمه وش بيقول عنهم ماعرفوا يربون اختهم ...ااااااااااااااااااااه يالقهر بس اااااااااااااااااااه
دخل البيت معصب ولقى امه والبنات نايمات كالعاده ...
قال لامه – وين بنتك
ام طارق – بناتي ثلاث
طارق مو رايق لاخلاق امه – نجيو وينها
امه – وش تبي فيها وبعدين وش ذا الورقه
رمى طارق الورقه على الطاوله وقال – ذي ورقت بنتك ارتحتن الحين ..
امه وهي تشهق – وعساااااه الساحق قليل الخاتمه
طارق بيموت ولا بيطق براسه عرق – قليل الاصل من يمه وقليل الختمه من ترى لو فكرتي فيها بنتك الي صغرتنا مع الرجال وهو صفحته بيضاء تدرين لو انا مكانه مافكرت اخذ وحده سوت الي سوته نجيو لو هي بنت عمي لو هم عطوني مال قارون ..
وطلع من الصاله معصب يارب يارب ريحني من الخزي الي حملته اختي على ظهري !!!
/
/
>> العصــر .
كانت جود على نار والي قاهرها انها ماقدرت تكلم فيصل رقمه مقفل والمستشفى ماينوخذ منهم لاحق ولاباطل ...
جا بندر وقال لها – الرقم معي خذي كلميه
جود بلهفه – بروح ازوره
بندر – انتي كلميه اول عقب يصير خيـر ...
جود – طيب
دقت عليه وبعد ما نفذ صبرها قدرت تكلمه قالت بصوت فيه صيحه – فيصل ...شلونك شخبارك
فيصل بصوت تعبان – انا بخير الحمد لله مافيني الا العافيه .
جود – جعل الي رماك تنشل يمينه ...اكيد انت بخير
فيصل – ايه الحمد لله زين انتي وينك
جود – ببيت اهلي وبجي ازورك للمستشفى .
فيصل بقوه روعتها – لاتجيـن كلمتي خلاص يكفي وكلها ايام وبطلع
جود وهي تحس ببروده بجسمها – ليه طيب
فيصل – المستشفى كله صحافه ورجاجيل وين تجين
جود انقهرت – انا زوجتك اولى من الناس كلهم
فيصل باصرار – قلت لك لاتجيـن
جود وهي تمسح دموعها– كيف يجي لك قلب اجلس هنا وانت تعبان وكيف يجي لك قلب تطلب هالطلب
فيصل – يعني لا جيتي بيتغير شي ..
ليه تجرحني بحدة كلامك ..
قالت بانكسار – لا ابدا مو متغير شي بالنسبه لك بس بالنسبه لي برتاح
جا بيقاطعها وكملت.......
- ماتشوف شر وانا ارجع اكلمك الليله
وسكرت الخط ..
قال بندر يواسيها – هونيها وتهون وكلمتيه مابه الا العافيه
قالت جود وهي تمسح دموعها وباين الجرح بعيونها – مايبيني ازوره ياقساوة قلبه
بندر ارتبك – الرجال مو بوضع يسمح لك بزيارته وامة لا اله الا الله محاوطته وين تجين
جود – هذا مو عذر انا زوجته لو يبيني اجي كان قاله اما انه يجرحني بهالشكل ولا يراعيني
جلس بندر جنبها – يا جود فيصل تربى على عادات قاسيه على البنات شوي وانتي يوم قبلتي فيه عارفه هالشي مو سوء نيه منه هالتصرف بس ذا طبعه .
وقفت جود – انا بقوم بواجبي معه عشان ارضي ربي ثم ضميري
وطلعت غرفتها تركض ورمت نفسها على الفراش وجلست تبكي من قلب ...ليه تسوي كذا يافيصل انا مو عدوه ولا ند لك انا زوجتك ليه البرود بيننا ليه ...!!
دق جوالها ماكانت تبي ترد وشافته رقم اريج – الو
اريج كانت تبكي – ياجود بيزوجوني المتخلف ولد عمي
جود مو ناقصه هم على همها – وشووووووو
اريج – وش اسوي يا جود تعبت نفسيا من الضغوط شكلي ببيعها ..
جود – مجنونه انتي ولاصاحيه ...لاتوافقين لا تفكرين توافقين اصلا
اريج – اااااااااخ بس الله ياخذه ويريحني منه ولا ياخذني عشان ارتاح واريح
جود ضربها راسها بقوه – قلت لك لا تستسلمين وين حنا فيه قوي قلبك تكفين يا اروج ماني ناقصه كارثه جديده
مسحت اريج دموعها وقالت بصوت مبحوح – هاه فيك شي زوجك فيه شي
ماقدرت جود تمسك دموعها وقالت السالفه كلها ...
اريج وهي منهاره – الله يقطعهم ماوراهم خير اااااه ياجود وين كنا ولوين وصلنا احد متخيل انه وضعنا بيكون كذا
جود وهي تتنهد وتمسح دموعها – نصيبنا عاد
/
>>بيت ابو وافي ..
قالت ام وافي لزوجها الي تقهويه – والله يا انهم ناس ماشاء الله عليهم
ابو وافي – ابو متعب رجال ما منه اثنين
ام وافي – الله عطاه عايله ماشاء الله مترابطين ويحبون بعض حتى حنا ماعاملونا زي الغرب وكانهم يعرفونا
ابو وافي – عشان تعرفين ان عيال الاصل مايتغيرون وانه مو عشانهم عايشين بالرياض هالمدينه المتطوره بينسون اصلهم وفصلهم ..
قالت نوره – و الله يبه حتى البنات يدخلن القلب ..
ابو وافي - هو كم بناته ابو متعب
ام وافي – بناته ان ماخاب ظني اربع بنات
ابو وافي – متزوجات ..
همس وافي باذن اخته الي جالسه جنبه – بدينا في الكلام الي مايصلح انا بهج
نوره – هههههههه ما راح يمديك اجلس بكرامتك ابرك
وافي – ههههههههه الله يعين بالله صبي فنجال قهوه خليني اعدل مزاجي قبل لا يبدون
نوره – هههههه ابشر
وصبت لاخوها فنجال ...
ام وافي – ايه متزوجات والله ياهن بنات ماشاء الله بس حتى اخوه المرحوم شفت له بنتين وحده ماخذه ولد ابو متعب بندر والثانيه ارمله .
ابو وافي – ارمله ليه كبيره بالسن انا اشوف اخوهن ماجد ماهو بكبير يقارب يمكن لوافي ولدي
ام وافي – لا هو اصغر من وافي ...البنت ماهيب كبيره نوره كم تعطينها
نوره – عمرها خمس وعشرين تقريبا
ابو وافي – لاحول ولاقوة الا بالله خمس وعشرين وارمله
ام وافي – الموت مايفرق بين كبير وصغير والله البنت زي العسل اخلاق وجمال وادب
وافي – هههههه وكل هالاشياء عرفتيها من جلسه
ام وافي تدق ولدها – تعرفني زين ظني في احد مايخطي ..
ابتسم وافي لان امه كانت رافضه زواجه من بنت عمه وبالنهايه تطلقوا بعد ماورته النجوم بعز الظهر
قالت تستهبل على وافي – لا وازيدك من الشعر بيت جامعيه بعد ومقدمه على وظيفه ...
وافي – الله الله ...
ام وافي – والله لو تطيعني وانا امك وتخطبها احسن ...
وافي – العرس شي شيليه من تفكيرك تبين تشوفين عيالي هذا هو احمد موجود خلي عينك تقر فيه
ام وافي – انت تعرف انا ابيك تتزوج ليه عشان نفسك وراحتك مو عشاني
وافي – انا مرتاح كذا الحمد لله ..
ابو وافي – خليه انا غاسل يدي منه
ام وافي – ياليتني اغسل يدي مثلك بس بظل وراه لين اشوف زوجته هنا معي بعيوني
وافي بقهر – ما كفاك الي شفتيه يمه تبين عله جديده
امه باصرار – اصابع يدك مو سوا وانا امك ..
ودخل احمد بجوه الحلـو وضيع السالفه كلها ..بس وافي يعرف امه تنسى يوم بس مو دوم !!!!!
/
/
الفصل الثاني والعشرون
*
الله يا قلبي تعبنـا ..!!
تعبنـا من الوقوف ...!
مابقى بالليل نجمـه ..ولا طيـوف ..
ذبلت الشوارع ...وانطفى ضي الحروف ...
يالله ياقلبي سرينا
ضاااااااااقت الدنيا علينا ..
*
*
من بيت ابو طارق رجع لمكتبه على طول ليه..ببساطه ماله نفس يتغدا ..دق تلفون مكتبه ..بعد الرنه الرابعه رد ..
- نعم
المتصل كان صديق لماجد تعارفوا من خلال تجارتهم ومع الوقت صار بينهم علاقه متينه وحلوه ...
حمود – السلام عليكم
ماجد – هلااااا ابو رنا شخبارك
حمود – مافي وقت للاخذ والرد اسمعني
اعتدل ماجد في جلسته وهو عاقد حواجبه – خير اللهم اجعله خير
حمود – ماظنيته خير كارثه كبيره
ضبط ماجد اعصابه – تكلم يارجال روعتني شفيه
حمود – صفقتك مع الوفد الاجنبي
ماجد – شفيها
حمود – بتتكنسـل
شهق ماجد – وشو ؟؟؟
حمود – انا سمعت ان هالشركه مسويه اجتماع قبل ساعتين مع شركه منافسه لك اظنك تعرفها شركة مشعل ..
ماجد مرتفع ضغطه من مشعل ذا صحيح انه انسان ذكي ومحترم بس شرس بالسوق جدا وماتوقع انه يطعنه بظهره لطالما كانت علاقة التنافس الي بينهم مبنيه على المنافسه الشريفه والاحترام ...
فقد ماجد اعصابه هالصفقه حاط فيها سيولته كلها وخسارتها معناها افلاسه ...وش هالكارثه .
حمود – ماجد انت معي
ماجد حس بإجهاد مفاجئ من صدمته لطالما كان حريص بصفقاته وماقد تهور .. ويوم تهور وغامر بكل سيولته تعرضت له هالمشكله الكارثيه ...
ماجد – معك معك
حمود – طيب وش بتسوي غريبه مو اليوم اتفقتوا على كل شي ...وش الي جد وخلاهم يتراجعون .
ماجد حس بنيران القهر تستعر بجوفه – الي جد شي ما يبيض الوجه ع العموم كل عقده ولها حلال بشوف الموضوع .
سكر الخط ...وضم وجهه بين يدينه وش هالمصيبه الكبيره ...ان راحت الصفقه منه معناه بيكون على الحديده ..مستحيل ولاممكن شقا هالسنين يروح بغمضة عين .
كلم سكرتيره وقال بعصبيه – الحين اجتماع مهم بسرعه .
سكر السكرتير السماعه برباشه مرتين والسماعه تخطي مكانها من خوفهوربكته علامه ماجد معصب كلم على المدراء والموظفين المهمين لاجتماع عاجل والي ببيته تم استدعاءه .
كان النقاش ومراجعه العقود حماسي وحامي جدا ... قال المحامي – العقود توقعت ومالهم أي مدخل يفضون هالاتفاقيه الا في حاله اذا جا تقصير من طرفنا وبما اننا بدينا اليوم هالسبب ماله اهميه لا تخاف يا ماجد قانونيا حني بالسليم ولو فضوا الاتفاق ووقعوا مع شركة ثانيه راح نرفع عليهم قضيه واضمن لك مليون بالميه اننا بنكسبها والاجمل بالموضوع ان رخصة عملهم هنا بالسعوديه بتنسحب منهم للابد.
كتم فرحته لين يتأكد انه بالبر
ماجد – ابي كل المعاملات القانونيه عندي هنا ..واهم شي ابي اتاكد هل فعلا اتفقوا باجتماعهم مع مشعل يعطونه الصفقه ولا وش سبب هالاجتماع .
- ان شاء الله ابشر عطني بس نصف ساعه وكل شي بيكون على مكتبك
وقف ماجد – زين الله يعطيكم العافيه تقدرون تروحون بيوتكم
السكرتير- وانت ؟
ماجد – انا بخلص كم شغله وبروح البيت اشوفكم السبت ان شاء الله
الجميع – ان شاء الله .
وكعادته بالاوقات الحاميه من الشغل .. يندمج بقوه .
دق التلفون مره ثانيه وش سالفه هالتلفونات اليوم نكد بنكد ...- نعم وعليكم السلام ...اكيد انا حاضر دايم .متى العمليه الليله الساعه ثنتين ان شاء الله تلقاني محضر بالقسم ...ان شاء الله وعليكم
سكر ماجد التلفون خير اللهـم اجعلـه خيـر ! اليوم فيه عمليه هجوم على ارهابيين وطالبينه يجي بما انه من ضمن فرقه القناصين !
قلبه مو متطمـ ن ولا هو مستريـح ...
خلص اشغاله بسرعه ...وهو طالع لحقه المحامي وهو يمشي بيطلع برا الشركه
-تكلموا بشركه مشعل عن الصفقه وانه بيكون بديل لنا في أي لحظه ممكن نخل فيها بالشروط بصراحه كلام فاضي وش هالتخلف مجتمعين مع شركه منافسه لنا عشان يركنونها احتياط لنا اذا خالفنا البنود الي بالعقد الله يصبرني على هالسنه الكبيسه توقعت انهم محترفين طلعوا أي كلام.
ماجد بابتسامه راحه – الله يعطيك العافيه انا اعرف الي ورى هالتصرفات كلها بس والله لادفعهم الثمن غالي وانا ماجد ، اسمع هالاوراق ابيك ترفع عليهم قضيه اخلال بالبنود ابيك تلعوزهم وابيك ترفع السعر تأديبا لهم طبعا ان كان في مجال نرفعه.
المحامي وهو يغمز – فيه مجال ولايهمك بنخيرهم يا يفضون العقد ويدفعون لنا تعويض او نستمر فيه بالشروط الجديده والبادي اظلم.
هز ماجد راسه ..وطلع من الشركه ..
وياللصدمـــــــــــــــــــــــــه ..
من الي ينتظره ومتسند على باب سيارته ؟؟؟؟؟؟؟؟؟؟
{كثرت صدماتك يا ماجد.................................
......................................../... ..وش بتكون نهاية هاليوم !!}
/
/
>>بيت ابو طارق ...
صحـت نجوى على ازعاج اسما وعايشه وهن يتهاوشن ...طلعت من غرفتها لابسه بيجاما بيضاء صارخت – وجــــــــــــع وش هالازعاج الواحد مايعرف ينام
اسماء وعايشه كل وحده تتشكى – هي الباديه لا هي الباديه
قاطعتهن وهي ترجع شعرها ورى بعصبيه – افففففففففففف منكن بزرااااااااااان خربتن نومتي
- ماصارت نومه النـــــــــاس الحـين المغرب
كان صوت طارق وشكله معصـب ..
التفتت نجوى – كملت ...
طارق – بدال منتي نـــــــــايمه لا شغل ولا نفعه روحي ساعدي امي بالبيت
نجوى – اليوم مو دوري لا تنسى فيه جدول يوم لامي ويوم لي ويوم للاخوات واليوم يومهن تفاهم معهن انا هلكانه مانمت زين .
طارق وهو يصـارخ على خواته الصـغار – انزلـن تحت ساعدن امي بسـرعه
ناظرن في بعض بخــــــــوف ونزلن يركضن ركـض ...
قال لنجوى الي بترجع غرفتها تكمل نومتها – تدرين ام ماجد جاب ورقه طلاقك اليوم
طار النوم من عيونها والتفتت قالت تستهزء – يوم مابقى من العده شي ارسلها
طارق – بقى ولا مابقى هي نفـس الحاله
نجوى بدون اهتمام – يرتاح ويـريح
طارق يأس من امه وخواته وكل شــــــــــي ب هالبيت الي يجيب النكد ...الحمد لله ان عنده رحلات وانه بيفتك من هالبيت ..دخل غرفته بعد ماعطاها نظره اشمئزاز وجمع اغراضـه ... عشان السفر..
دق جواله وهو نازل – هلا
مشـــــاري – السلام عليكم
طارق – ياهلا وغلا اخبارك
مشاري – بخـير الله يسلمك اسمع فيه جمعه الليله باستراحتنا تجي
طارق – والله ودي بس وراي رحلات وهذاني متوجه للمطار
مشاري – يوه خسـاره
طارق – يالله نعوضهـــــــــــــا مره ثـانيه ان شاء الله
مشاري – متى بترجع
طـارق – بحدود شهر ونص شهرين وراجع
مشاري – اجل مطول
طارق – ايه ..
مشاري – الله يرجعك بالسلامه
طارق – الله يسلمك
مشاري – يالله فمـان الله
طارق ..فمان الكريم...
وسكـــــــــــــر الخط !
/
بعد صلاة العشا ...>>
دقت جود على فيصل والرقـم مشغول مشـغول ....
سكرت التلفون بقوه بغت تكسره ...
دخل ابوها والوليد وهي جالسه بالصاله مكتئبه ...
قال الوليد – شفي الحلو معصب
ابتسمت جود عصب وقامت وحبت راس ابوها ...جود – لا ابد سلامتك ادق على المستشفى مشغول
ابو متعب – حنا تو جينا من عند فيصل
جود بلهفه – شلونه اصابته خطيره ولا لا
الوليد – ههههههههه على هونك الرجال طيب والاصابه مو خطيره بيجلس ايام بالمستشفى وبيطلع .
جود – زين
ابوها – والله يا عنده امه يالله قدرنا ندخل عليه ونسـلم
الوليد – ايه المستشفى مليان رجاجيل مافي مجال لاهله يزورونه
جود بقهر بقلبها – ايه هو قال لي لاتزوريني
ابو متعب مأيده – ماينلام حنا يا الرجاجيل يالله وصلنا له ..
الوليد – اهم شي انه بخير وطلع منها بس
ابو متعب – ما اقول الا حسبي الله على هالناس الي مايخافون الله والي بس يدمرون بـهالوطن الي كبرهم وغمرهم بخيره .
الوليد – ان ماخذوا جزاهم بالدنيا وين بيروحون من ربهم بالاخره .
ابو متعب صدقت وانا ابوك ...
طلع ابو متعب من الصاله وبعد شوي لحقه الوليد وجلست جود بلحالها تاخذها الوساوس وتجيبها ..رجعت دقت عليه وبعد الرنه الرابعه رد – نعم
جود – السلام عليكم
فيصل – وعليكم السلام والرحمه
جود – شخبارك الحين ان شاء الله احسن
فيصل – زين ماعلي هالحمى ساعه تجيني وساعه تروح
جود بغصه – الف لا باس عليك
فيصل – الله يسلمك وانتي شخبارك
جود – بخير ما دامنك بخير قلي محتاج شي تبي شي
فيصل – لا ابد سلامتك احتمال اطلع اخر الاسبوع ان رضى الدكتور
جود – لسى مصر ما اجيك
فيصل بنيره هاديه فيها قسوه – جود الي اقوله لازم اعيده يعني
جود وصلت حدها خلاص بكيفه – زين الي تشوفه تامر بشي
فيصل – لا سلامتك معك فلوس لمصاريفك ولا اكلم واحد من اخواني يجيب لك
انا ويـن وهو وين !
جود – ههههههههههههههه
فيصل – شفيك تضحكين
جود وهي مبتسمه – انا وين وانت وين ..
فيصل – مو معنى اني مريض خلاص منتي بلاقيه من يصرف عليك
انجرحت جود من كلامه – انا ببيت ابوي مو بيت غرب
فيصل – كنتي مسؤوله منه والحين مسؤوله مني
جود – فيصل شتقول ...
فيصل – انتي زوجتي
بسم الله شفيه معصـب ..هدت جود الوضع – طيب لا تعصب انا زي ماقلت لك مو محتاجه شي ولو احتجت بقولك
فيصل – زين يالله الحين بروح قسم الاشاعه يشيعون الكتف
جود – الف لا باس عليك يارب .
وسكرت الخط ...
سندت ظهرت ورجعت شعرها بيدها دلالة كآبه وملل ..
نزلت البتول من بيتها وشافت جود جالسـه سرحانه والهم كاسيها– الحلوه مكتئبه للحين
جود بابتسامه حزن – جيبيلي احد مرتاح
البتول بحزن – على قولتك محد مرتاح
قالت جود بتغير الجو الكئيب الي بينهم – شسويتي امس يا ام الخطط عسى اخوي رضا عليك
البتول شوي وتصيح – رضا ومارضى
جود – شلون ذي
البتول – خليها على ربك الضرر كبير ويبلي صبـر عشان ابني علاقه سليمه معه
جود بكآبه – على الاقل بندر فيه امل مو انا ياحظي زوج جاف بطبيعته جفافه يجيب الموت لروحي
اخذت جوالها ودقت على عمتها الي ماكلمتها ...
البتول – مالنا الا الصبر الشكوى لله ..
ردت ام فيصل على الجوال – الو
جود- السلام عليكم
ام فيصل – وعليكم السلام والرحمه
غريبه وش هالبرود!
جود بلعت غصتها – شخبارك يا عمه
ام فيصل – زينه
شفيها ذي؟
جود – شخبار عمي والكل
ام فيصل بعصبيه – زينين كلهم ..ماشبعتي من اهلك للحين
انصدمت جود – وشو ؟
ام فيصل – زوجك تعبان وانتي جالسه عند اهلك ومستانسه
جود بعصبيه مكبوته – وش اسوي يعني اذا هو مايبينا نروح له المستشفى وبعدين شدراك اني مستانسه
ام فيصل – هذا الواضح ماجبتي خبره
جود ببرود – مايعلم الي بالقلوب الا رب العباد انا حبيت اكلم واسال عنك والي اشوفه انك بخير مع السلامه
وقفلت الخط بوجهها خير شفيهم ذولا وكأنها هي السبب بالي صاب ولدهم الناس انهبلوا ولا وش مشكلتهم ..رحمتك ياربي ..
البتول – جود شفيك ...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك