رواية سرقتك بالزمن لحظه وعشتك بالفراق اوقات -36
ريووف بفرحه صادقه – وااااو شي حلو ان شاء الله ماتكون اخر مره نتقابل فيها
ابتسمت نوره – بصراحه دخلتي قلبي ولايهمك بنشب لك ماصدقت القى صديقه هنا
ريووف – هههههههههههههه وانتي اكثر والله ...
التفتت ريووف بعد ماهجد المجلس وماعاد فيه حس ..لقت اسماء دااخله بكل غرور وجلست قدام جود شكلها مو ناويه على خير سالت نوره ريووف – شفيها بنت عمك معصبه
انحرجت ريووف – مدري عنها بصراحه ...
قالت نوره تغير السالفه – انتي موظفه ولا بيتوتيه
ريووف – تخرجت من الجامعه وجلست بالبيت بس مقدمه على وظيفه بمدرسه وان شاء الله انقبل
نوره – يارب ونكون بمدرسه وحده
ريووف من قلب – ياليت ..
كانت اسماء تفور من جوا ودها تطب ببطن جود تكرهها .وهالتالق والكشخه ما خففوا من حقدها الا زادوها مثل النار لا انزادت حطب ! اختي تتطلق وانتي متزوجه ومستانسه ...
قالت البتول تستهبل على جود – يالله شدي الهمه نبي فصول صغير
جود بدلع – يو توني متزوجه الدور عليك
ابتسمت البتول – لا ياحلوه الحين دورك ..
حلو ان هالشهور الي مضت غيرت بنفسيه البتول اشياء واشياء وتمنت اليوم الي يسامحها فيه بندر عشان تعوض الي فات وتكون له زوجه وام عياله واخت وصديقه يعني تكون محور حياته ...
قالت اسماء تدق – ناس يخربون بيوت غيرهم ويستانسون بحياتهم .
سكتوا البنات ودقت قلوبهم يعرفون جود ماراح تسكت وماكذب توقعهم قالت جود بهدوء – اذا عندك شي قوليه بدل الدق
ناظرتها اسماء بحقد وقالت بعصبيه – لا تسوين فيها بريئه
قالت ندى تهدي الاوضاع – يابنات وش ذا اسماء عيب حنا عماتك اكبر منك
صرخت اسماء – ما اتشرف تكونون عماتي لو انكم عماتي ماخربتوا بيت اختي
قالت جود وهي شوي وتصفقها كف – من قرب صوب اختك اجل حنا شفناها طول هالشهور
اسماء – انتي السبب بطلاقها
شهقت جود – انااا
اسماء – اييييييييه انتي لا تحسبيني جيت الليله عشان اجلس معكم يالعقارب انا جيت لان نجوى تقول خذي ماجد اشبعي فيه
هنا اريام ضرب براس اريام عرق – لا ياقليله الادب عز الله اخوي ماعرف يربي استحي على وجهك تتكلمين عن عمتك كذا ...
اسماء وهي توقف – أي عمه انا ما اعتبرها عمه لي وما ادانيها جعلك ما تتهنين زي ما كنتي السبب بتعاسه اختي قولي امين
وطلعت من المجلس بسرعه لان البنات كانن فايرات الدم بسببها وخافت لا تنضرب .. اما الضيفات كانت وجيههن ما تنتفسر ...
قالت اريام لجود – هدي اعصابك انتي تعرفين نجوى مريضه نفسيا وخواتها يصدقنها ..
التفتت ريووف ترقع السالفه مع البنات – هذي بنت اخو البنات مطلقها زوجها الي هو اخوي وزعلانه علينا لاتشرهين على اختها صغيره وبزر
نوره ابتسمت وقالت – ولايهمكم يابنات انا مدرسه ومر علي مراهقات زي كذا الحين لو اختها تمدحكم جت والبسمه ماليه الوجه
ابتسمت ندى غصب – ايه صح صادقه
قامت ريووف واخذت جود معها وراحن للمطبخ قالت ريووف – يافضيحتنااااااااااااااااااااااا
جود منقهره – اه بس كان ودي اربيها بس مابغيت ننفضح زود على فضيحتنا الحين وش بيقولن عنا
ريووف – هدي اعصابك وانا اختك يعني بالله ذي اول مره يفضحنا بنات متعب بخلق الله
جود وهي تتنهد – لا الاولى ولا بتكون الاخيره الله يقطعها من يوم ماشفت خشتها جايه وانا قلبي ناغزني
قالت جود بصوت متهدج – كله كوم ويوم قالت خذي ماجد كوم ثاني مو للدرجه ذي تتجرا علي نست اني متزوجه ولا هالشي ماله حرمه عندها
ريووف – خلاص جود بتاخذين على كلام هالجاهله الغبيه تعالي بس نشوف عمتي شتسوي بالمطبخ
دخلن المطبخ قالت ام بندر – شفيكم يابنات و اسماء ليه دخلت معصبه المجلس
قالت جود لامها – اه يمه ماتدرين شقالت الي ماتربت
ضربت ام بندر على صدرها – خير ان شاء الله
علمتها جود بكل كلامها قالت ام بندر – ماهي بجايبته من بعيد بنت شيخوه طول الجلسه تلطش في ماجد وامه جالسه
انفجعت ريووف – من جد شقالت امي ؟
ام بندر – عطتها رد قوي وقالت بنات هالزمن فيه الي ماتربن منهن
جود – هههههههههههههه كفو خالتي
ريووف – ههههههههههه تستاهل شقالت طيب
ام بندر – ماعاد تكلمت عقب رد ام ماجد
ريووف – احسن .
ناظرت ام بندر في بنتها –تعالي زوجك وينه ماجاتوني مكلمه الوليد ابي اغراض وقال ماجا
جود – ماادري عنه يمه قال عنده شغل بالقسم وبيجي للعشا
دقت ام بندر على بندر – هلا يمه شف نسيبك وينه ماجا
بندر يستهبل –أي واحد
امه – ههههههه بندر ماني رايقه لك اقصد فيصل
بندر – على خشمي الحين ادق اشوفه
وسكرت الجوال ...
قالت جود – لايتعب نفسه انا اتصل فيه وجهازه مقفل
امها – طيب دقي على العمل
شهقت جود – تبينه يذبحني
ريووف – شدعوه عاد
جود – سويتها مره ورجع البيت عشان يهزئني وجه لوجه
امها – متى هالكلام ماقلتي لي
جود في نفسها لو بقول لك كل شي ما خلصت يمه ...
جود – هههههههههههه عادي يمه مو انتي تقولين ان الرجال عليه ضغوط برا البيت ولازم نصبر فيصل كذا يعصب وبعدين يروق ويصير ما احسن منه ..
ريووف -عقب شصار
جود – جلس يهزء ليش لان رد علي واحد من اخوياه وبس
ريووف – عشان كذا
جود – ايه ...يغار علي فديته
ريووف – هههههههههههه ياشين السرج على البقر
رمتها جود بالجريده الي على الطاوله – شقصدك
ريووف – مالك داعي لاسويتي رومنسيه
جود – طيب اشوفك فيك يوم حلو مو شين هههههههههه شفتي قلبي ابيض
ريووف - تجننين ..
جهزن البنات العشاء ورتبن كل شي بصاله الرجال ...بقي المويه عيت البتول تخليهم يودونها ..عمتها تحاول فيها وهي رافضه وجلست تتميلح عليها لين طاعت ..^_^
جود – دله القهوه وعرفنا سالفتها المويه شتبين فيها ..
البتول وهي تغمز – توك بزر مالك بحركات الكبار
جود – ههههههههههه ياشيخه
ناظرت بامال الي وصلت متاخره وماجلست معهم لانها جالسه بالمجلس مع الحريم – يسلمو على هالجريش يجنننننننننن
امال – جعله صحه وعافيه ...ماضبط معي كالعاده رهف الله يعافيها مزعجتني ماخلتني اشوف شغلي
جود – مالك حق تنومينها
امال – خليها ترتاح وتريحني بنومتها ..الا المدام البتول وش عندها هي والمويه الي محجره لنا ماتبينا نقرب لها
جلسوا البنات يضحكون البتول اليوم مضيعه من قلب ...جلسوا حول الطاوله يسولفن اخذت البتول الجوال ودقت على بندر – هلا بندر العشا بالمجلس روح شوفه اذا نقص شي علمنا
بندر وده ماتسكر الخط وفي نفس الوقت وده يكون جاف معها اخر شي قال – طيب الحين اشوفه
وسكرت الخط ..وجلسن البنات ضحك عليها بعد دقيقتين دق الجوال قال بندر – وين المويه
قالت البتول –الحين اجيبها
وغمزت للبنات وراحت للمجلس معها المويه ...
ريووف – هههههههههههه اختي اليوم مو صاحيه
ندى – خليها تستانس سبحان الي يغير و لا يتغير
راحت البتول للمجلس معها صينيه فيها المويه وكانت ثقيله يالله كله يهون عشان خاطر بندر دفت الباب ودخلت لقته يرتب الصحون الي بالسفره ...شافها شايله صينيه اثقل منها فز من مكانه واخذها وقف يناظرها ووقفت تناظره وطال الوقت فيهم همست وعيونها مدمعه – سامحني يا بندر لا تزعل مني ..
حن قلبـه حـن بقوه ...سمع اصوات اخوانه يزيد والوليد وقال – الرجاجيل بيقلطون على العشا ادخلي ..حست بصده لها طعنه ..ودخلت تجر معها خيبتها ...
آه متى ينتهي هالعشاء ويختلي فيها ويحلون مشاكلهم تعب من معاقبته لها من قسوته خلاص هو ماصار احسن منه طول هالشهور ما يسال فيها تعبت ودخلت مستشفى ولا سال فيها عاقبها بقسوه هي اكبر من تحملها ..الصفح صعب بس مو مستحيل وهو يحبها ..يحبها ماعاد ورى هالشعور والاحساس شي والحب اكبر شفيع لها ...
دخل يزيد والوليد ...يشوفون اخوهم محتاج شي ..قال بندر – كل شي زين بروح لابوي اعطيه خبر عشان يقلط ضيفه
وطلع من صاله الاكل وعلى المجلس على طول جلس جنب ابوه وهمس – يبه العشا زاهب
ابوه – فيصل ماجا
بندر – لا ماظنيته بيجي ادق عليه مقفل جهازه
ابو متعب – دق مره ثانيه
بندر – ابشر ...
دق دق ومقفل ...
بندر – مقفل يبه والعشا نزلوه بيبرد
ابو متعب بصوت جهوري – حياك الله يا ابو وافي وحياك يبو احمد اقلطوا جميع على العشاء
وقلطوا ...
في نفس الوقت جهزن البنات عشا الحريم ...وجلسن يتعشن والبنات خلن الوضع ايزي قدام الضيوف ولاكان شي صار ...
قالت اريام للبتول – هاه شسويتوا بالمجلس
شرقت البتول بلقمتها وجلست جود الي جنبها تضحك ...قالت اريام تهزئهن – وجع وش هالتفكير قصدي بريء
جود – ههههههههههه بالحيل
اريام – يالله بس هاه البتولوه ماقلتي
البتول – ههههههههههه شقول جوا اخوانك وخربوا الجو
اريام تستهبل – مسوين جو بعد الله يخلف
جود – ههههههههه والله انك اليوم مضيعه
البتول – هههههههه كلنا الله بالخير ...
كان اسماء تشوف همس البنات والضحك وميته قهـر توقعت تقلب الجلسه نكد في نكد بس للاسف خاب ظنها ...
قالت ريووف لصديقتها الجديده – لحين انتم ثلاث بنات وولد
نوره – هههههههه لا عاد شدعوه فينا بركه لي اخوان متزوجين وعندهم عيال وعندي خوات اصغر مني متزوجات
ريووف – اجل شكلهم متزوجين وهم صغار بما انك وافي الكبير وماعنده ولد
نوره – وافي باخر الثلاثينات كبير مو صغير بس طوال زواجه من بنت عمي ماجابوا عيال واخر شي رزقهم ربي باحمد وصارت مشاكل وتطلقوا ,,
ريووف – يالله
نوره – الدنيا مليانه مشاكل تخيلي زواج عشر سنوات واخر شي طلاق فيه حريم مالهن قلوب ولاعاطفه مو عشان اخوي والله اقول هالشي بس صدق ماتستاهله ..
ريووف – الله يخلي له احمد ويعوضه خير
نوره – الله اميـن
ريووف – الا صدق البنات خواتك ليش مو مندمجات بالجو
نوره – هم كذا يستحوون مره
ريووف – ياحليلهم ..
بعد العشا قالت ام وافي لام بندر الي تبخرهم – الله يكثر خيركم ويطول بعمر ابوكم
ام بندر – الله يسلمك والله نورتونا
ام وافي – الله يسلمكم يارب ..
دق ماجد على ريووف – هلا ريووف يالله خلصتوا برجع البيت ولا ترجعون مع مشاري
ريووف – امي بدت تنعس بنرجع معك
ماجد – زين انتظركم برا
ريووف وهي توقف – يمه ماجد ينتظرنا برا
تاففت اسماء بصوت مسموع ناظرتها ريووف باحتقار من جد هالبنت ماتنطاق ياصبر الارض عليها ...
سلمت على بنات ام وافي وعلى امهن ..قالت نوره – ان شاء الله نلتقي قريب
ابتسمت ريووف – باذن الله
وطلعن ...وبعدهن على طول دق ابو طارق وطلعت زوجته وبنته الغثيثه ...
قالت جود يوم طلعوا – افففففف مابغن
ام بندر – يالله يابنات بروح انام من الصبح وانا صاحيه
البنات – نوم العوافي يارب ..
قالت البتول – وانتم ياحلوات تصبحون على خير
ندى- على وين تونا
جود تستهبل – سؤال غبي ندوش ...
البتول – ههههههههههههه تفكيرك دايم غلط يالله سلام
وطلعت من الصاله على ضحك البنات وتعليقاتهم كانت دقات قلبها هستيريه ويدينها معرقه الله يعين بس
دخلت البيت وشغلت النور حلو ع الاقل ماطلع فوق ويمديها تستجمع قوتها وتنتظره بعزيمه واراده .
/
>>بيت ماجد
قالت ريووف لامها وهي جالسه معها بالغرفه – يالله يمه مو صاحيات اليوم مرة متعب ولابنتها
ام ماجد – مو شي جديد وانا امك ..ما اقول الا الله يعطيهن على قد نيتهن ...
ريووف – ماقلنا شي يمه بس مو لدرجه انها تهين جود وتقول لها نجوى تقول اشبعي بماجد
- من الي يقوله؟
تمنت ريوف تنشق الارض وتبلعها ...قالت ام ماجد بعد ماشافت نظرات جود تتوسلها تصرف الموضوع مو من عوايد ريووف نقل القيل والقال ..قالت ام ماجد – سوالف حريم يمه مالك فيها
ماجد – من الي يقوله يمه لا تلفين السالفه
انحرجت ريووف – تصبحون على خير .
مسكها ماجد – ريوف ماحب اكرر كلامي تعرفيني
ناظرت ريووف في امها وقالت – يا ماجد ماحب النميمه
ماجد – اصلا فهمت الزبده ولا تخافين يا ريووف ماراح تخرب زود على خرابها الي هي فيه
سكتت ريووف شوي ثم قالت – يعوضك خير وانا اختك ..
وطلعت غرفتها ...ناظر ماجد في امه وقال يغير الموضوع – شخبار البتول عسى مرتاحه
امه – ايه واضح انها مرتاحه الله يهديهم ويوفقهم ويعوضك خير .
حب على راسها – تصبحين على خير
وطلع من غرفته ..جلست امه تدعي له من قلب –يارب احفظه من كل شر وارزقه بالي تستاهله ...
...<> دخل ماجد غرفته ..ونزل شماغه وجلس على الصوفا وشبك اصابعه ببعض ..تنهد بقوه – ااااااااااااف..
رجع ظهره وسنده وجلس يفكر طلاقه من نجوى ما عطاه وجه ولا راح يخلص اوراقه وهذي مو زينه بحق ابو طارق بكره ان شاء الله من الصبح بيروح يخلصها ..ويطوي هالصفحه من حياته للابد ..وبلا زواج وبلا هم ..هو جرب حظه مره ومايحتاج يكرر الخطا مرتين ..
ناظر بالساعه بتقارب وحده وقف عشان يبدل ملابسه وينام ..على انه بكره خميس بس جاي وفد من برا ولازم يقابله عشان الشغل رغم ان له تحفظات على وجود بنت بينهم بس مايقدر يعترض وان ماعجبته الصفقه ممكن يكنسلها كلها ولايهمه ...البنت هذي قابلها مرتين وماعجبته لا نظراتها ولا طريقتها رغم انها تتكلم العربيه بطلاقه بس تبقى بالاول والاخيـر غربيه..لادينها ديننا ولا عاداتهم عاداتنا ...
سما بالله ونام ....
/
/
/
>>بيت ابو متعب
جلست جود تناظر في ساعتها
قالت ندى – هاه شفيك بس تناظرين بالساعه لايكون مليتي منا
امال – تلقينها مشتاقه لحبيب القلب
جود بالها مشغول – حبيب القلب على قولتكم لاحس ولاخبر وجواله مقفل ..
اريام – دقي على البيت يمكن تلقينه
جود – لو هو بالبيت كان دق او جا اخذني اممممم بدق على مها
ولا فكرت تتصل بنوف ماتبي تختم هالامسيه على شي شين ...
دق الجواااااال رنه ثنتين ثلاث ...كانت مها عند امها والجوال بالغرفه عند نوف شافت رقم جود وردت – نعم
جود – السلام عليكم
نوف – نعم
جود بعصبيه – يومنك ماتبين تكلميني ليه تردين على جوال مها
نوف بعصبيه اقوى – انتي مستانسه عند اهلك واخوي منصاب وبين الحيا والموت بالمستشفى مالت ياوجه المصايب ماشفنا من يوم مادخلتي بيتنا يوم حلو ...
طلعت عيون جود قدام ماسمعت الا كلمه منصاب ...قالت بهستيريا – فيصل شفيه تكلمي ...
نوف – ماظنه يهمك ليش تسالين .؟
وسكرت الخط بوجه جود ...التموا البنات حولها ... ندى وهي تهزها – بنت فيصل شفيه
جود بكلمات متقطعه وهي ترجف – م مدري ت تقول نوف انه بالمستشفى
اريام – وشو
امال – يارب جيب العواقب سليمه ...
دخل بندر وقال لندى – مشاري برا ينتظرك ، ناظر فيهن ، خير شفيكم جود شفيك
قالت امال – ماندري دقت على المقروده اخت زوجها وقالت انه مصوب وبالمستشفى
بندر تفاجأ – متاكدين
امال – ايه متاكدين
طلع بندر جواله – انا لي معارف بستوضح الموضوع منهم اليوم بالاخبار مطلعين خبر عاجل عن هالعمليه بس ماذكروا اسامي ......الووو السلام عليكم
::وطلع برا الغرفه ..
جلسن البنات جنب اختهن يهدنها جلست جود تمسح دموعها – يارب نجه يارب ...
ناظرت اريام في ندى وقالت بهمس – قسم بالله اخته ذي يبيلها كف على وجهها
ندى – كف قليل فيها انا مدري جود وش مسويه لها تكرهها كنها ذابحه احد من اهلها ..الله بس يخلي لها زوجها وينجيه
اريام – يارب ..
بعد نص ساعه رجع بندر وقال – انصاب من فريق فيصل هو وعسكري واصاباتهم مو خطيره فيصل بالكتف والرجال الثاني انكسرت رجله ...
جود من قلب – الحمد لله ...
بندر – اليوم نامي هنا وبكره اوديك بيتك
حاولت تعترض بس ماعطاها مجال ..يالله احسن بعد عشان ماتقابل خشة نوف وتكمل .
من حسن الحظ ان امال واريام كانن مخططات العطله الاسبوعيه ينامن ببيت ابوهن وندى بترجع بكره ...
اخذت عبايتها وطلعت بعد ماهدت جود وتطمنت انها مو بلحالها .
:
ركبت السياره واستغرب مشاري من هدوئها مو بالعاده ..قال يستفسر – ندوش فيك شي
ندى وهي تتنهد ومتضايقه على الاخر – فيصل زوج جود انصاب في عمليه من عملياته
انصدم مشاري – لا حول الله عسى اصابته مو خطيره
ندى – يقول بندر مو خطيره ..
مشاري – اذا بندر يقوله ف ان شاء الله خير .
ندى – يارب ..
/
طلع بندر بيته يتسحب تسحيب وده وماوده ..السماح صعب وهو مو كريم للدرجه ذي ..
فتح باب بيته تأجيل المحتوم شي مو حكيم ...
سمعت البتول الباب يفتح ويسكر .. واخيرا مابغى يطلع شوي وتصدق ظنها انه بينام تحت التفتت بسرعه تبي شي تتسلى فيه عشان مايعرف انها طول هالساعتين محترق دمها تنتظر اخذت مجله وفتحتها وجلست تقرا وكانها من حماسها ما درت انه في احد معها بالغرفه ^_^
دخل بندر الغرفه وشكل البتول ما انتبهت له ...نزل مفتاحه وجواله بقوه على الطاوله تنبيه لوجوده رفعت البتول راسها بعفويه وقالت بصوت كنها هديل حمام – جيت ..
بندر قرب منها وشاف الموضوع الي تقراه قال وهو يطلع باقي اغراضه من جيبه – ياسلام من متى يهمك فن النحت على الخشب .
تورطت البتول وحمر وجهها لازم القى تصريفه لازم ..!!!
البتول – ا ا شدني الموضوع طريقه بحثهم شيقه
بندر مسايرها في كذبتها – شي حلو طيب وش يتكلم عنه الموضوع .
البتول تورطت اكثر ...- ابد يجيبون خشي ويحفرون عليه ناس هذا هو ..
ضحك لاول مره – ان كانوا كاتبين كذا قاطع يدي ان كان احد يشتري هالمجله ...اتركي عنك حركات النص كم واعترفي لو مره بالصدق
قالت بصوت فيه صيحه – اعترفت لك بالصدق وانا بالمجلس بس ماعبرتني
جلس جنبها – ماكان الوقت مناسب ارد
البتول – ومتى يجي هالوقت
بندر – الي يحب مايكره حبيبه والعتب دايم بين الاحباب والي سويته فيني مو بسيط
نزلت راسها – اعرف ..ومعترفه بخطاي
بندر بابتسامه – بدايه حلوه
البتول بلهفه – سامحتني
بندر – عمري مازعلت منك عشان أجي أسامحك
ابتسمت وقالت وهي ترجف – بندر احلف لك بالله اني ماتعمدت اسقط
حط يده على فمها – لا تطرين هالموضوع
البتول – بس
ناظرها نظره تحذيريه وسكتت يالله ع الاقل الي صار الحين تطور كبير في علاقتهم وشي ايجابي ..ومع الوقت لاعرف انها صادقه لا تعلم يثق فيها بيعرف انها مستحيل تقتل ظناها مهما صار وتم .
/
/
<>><>
اليوم الثاني .
صحى ماجد بدري ولبس ثوب ابيض وغتره بيضاء تعطر وطلع بسرعه الاجتماع بعد ساعه وقبل لازم يجتمع مع موظفينه تحضيرا للاجتماع ...
نزل الدرج بسرعه ...ماعنده وقت يفطر او يسوي شي طلع برى البيت وركب سيارته وراحت لشركته الخاصه .
نزل وسلم على الامن الي على البوابه ودخل داخل ...طلب له فطور سريع وبين حوسة الاوراق والفطور وبعدين اجتماع الموظفين وعمل التشطبيات النهائيه على شغلهم ..اعلن السكرتير ان الوفد تحت وبيطلعون لغرفه الاجتماعات الحين
قال ماجد للسكرتير – البنت الي معهم تحجبت ولا كالعاده
السركتير- لابسه عبايه كتف وطرحه على كتوفها
ماجد وهو جالس على كرسيه الدوار وسكين الرسايل بيده يحركها – زين الله يعطيك العافيه لا وصلوا ودهم لغرفه الاجتماعات
السكرتير – ان شاء الله وطلع ..
عدل ماجد ظهره وهو يتنفس بملل ..شتبي جايه هالمتخلفه مايكفي انه مشترط ماتحضر اجتماع الا متستره ولما شافته مصر وافقت واحبط ساعتها لانه توقع بترفض بما انها مو مسلمه .
بعد عشر دقايق دخل غرفه الاجتماعات وجلس على الطاوله الزجاجيه الشفافه شاف جانيت جالسه تناظره بقله حيا سببت له اشمئزاز ..هي جايه هالاجتماع مع صديق ابوها والي متشاركين سوا بهالشركه ولما شافت ماجد صار بكل فرصه اجتماع ترز وجهها وهو مو مرتاح لها الوضع .
خلص الاجتماع على خيـر بعد ثلاث ساعات نقاشات ومحاورات ...وقف لما الوفد قام بيطلع بعدين جلس يستكمل شغله والاوراق المبعثره حوله ...وهدت القاعه فتوقع ان الكل طلع ...بس حس انه مو مرتاح رفع راسه ...وشاف جانيت واقفه تناظره وشعرها الاشقـر الفاتح يتمايل على وجهها باغراء متعمد ..
ماجد بلا مبالاه – انتهى الاجتماع اقدر اخدمك بشي ..
جانيت
- yes you do
ماجد ببرود – تكملي عربي
جانيت تفاجأت
– what?
ماجد – الي سمعتيه تكملي معي بالعربيه
اعترضت –
Why?
وقف وقال وهو يسكر قلمه – للاسف ماعندي وقت للنقاشات الخارجيه ..بالاذن ..
جا بيمر ووقفت بوجهه وهي قريبه منه قالت بعربيه سليمه فيها لكنه واضحه – حسنا ساتكلم بالعربيه ماجد لماذا تعاملني هكذا ...؟ كل من عرفتهم من الرجال لم يصدوني مثلك ..
ماجد باشمئزاز وين عايشه فيه ذي– لا تنسين نفسك انتي هنا بالسعوديه بلد مسلمه من اول شبر لاخر شبر من جنوبها لشمالها ومن غربها لشرقها
دخل السكرتير يبي ماجد وشاف هالنقاش الحاد لقاها ماجد فرصه حتى تنسحب لكن خاب ظنه ..لان ببساطه مابوجهها حيا ...
جانيت – سنة كامله لم اظفر فيها منك ولو بابتسامه واحده بحق الله ماذا تظن انني افعل في وسط تلك الاجتماعات الباعثه للملل
انصدم ماجد والسكرتير حمر وجهه جا بيطلع وماجد هز له راسه مايتحرك من مكانه .
ماجد بعصبيه – الي يجمعنا العمل ولاشي غيره . وانتي ما تهميني ماتفهمين عربي قوليلي اترجمها لك بكل سرور للانكليزيه .
فار دمها منه – واخيرا ستتنازل وتتحدث الانكليزيه التي تمقتها .. انك مخيب للامال ..اتعلم انت مجرد بدوي متخلف لاقيمة لك .
لاول مره في حياته تمنى يهشم وجه حرمه تهشيم حتى تختفي معالمه ...صرخ فيها – انا حفيد محمد بن عبدالله (اللهم صلي وسلم عليه) خير من مشا على وجه هالمعموره ..انا ابن هالارض الي اصطفاها الله وكرمها بالبيتين الحرام ..الارض الي يستقبلها في صلاتهم مية مليون انا حفيد حاتم الطائي الي مضرب مثل في لجود والكرم ..انا حفيد عنتره بن شداد مضرب المثل في القوه والشده ..انا حفيد الملك عبد العزيز بن سعود الي وحد المملكه مضرب المثل في الاراده والشجاعه والعزيمه والاصرار..حنا اهل الاصاله والفخر والكرامه حنا اهل العلم والادب والاخلاق العاليه اذا بعد هالكلام الي سمعتيه تعتبريني بدوي متخلف فأفتخر اني بدوي متخلف ...
تفاجأات بقوة رده .. تفاجأت بقوه فخره بعروبته ودينه ..انلجم لسانها ماعاد تدري شتقول بالاخيــــر قررت الهروب من هالوضع الي حسسها بقله قيمتها ... بتفاهة مجتمعها ..وبفراغه من الفخر والاصاله.
قال سكرتيره بعد ماطلعت –ياخوفي لا تكنس الصفقه كلها
ماجد بابتسامه فيها استهزاء – شف لو اقطع راسها وارميه بالشارع ما اهتموا هذولا ناس زي الالات معدومين من المشاعر اهم شي المصلحه الشخصيه ماعليك منها وان شاء الله ماعاد نشوف خلقتها هنا
السكرتير – ههههههه بعد الي سمعته ماظن بتعيدها .
ابتسم ماجد- لعل وعسى ... خذ هالاوراق وخلهم يسوون لها نشخ ويرتبونها بالملفات.
السكرتير – ان شاء الله .
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك