رواية جواهر -24
تظل علاقتنا مع بعض واكثر من الاول اللى راح فات ما نقدر نرجعه واحنا الحين عايشين
مساعد: تصدق محمد انا مو كل زعلي على اللى صار بس على انه خسرنا انسان شرواك والله ظني ابد ما خاب فيك وكنت اعرف وقلت لابوي انه اللى صار اكيد انت ما تدري فيه ولا راح ترضى فيه ابد
محمد: شوف ترى قول تم
مساعد: تم بس على ايش
محمد: طلبتك بكره غداكم عندنا الكل انت والاهل وابيك ما تردني انت قلت تم ترى
مساعد: بس محمد انت عرفت باللى صار اشلون تبينا بعد هالسنين
محمد: ما عليك وان شاء الله بيرجع كل شي مثل الاول .....
سلم عليه محمد وراح من عنده ...لاول مره حس محمد بالراحه انه قدر يواجه الالم لما يشوف احد من اهل لبنى
********
نرجع لسلطان اللى دايم الدوم لما يرجع غرفته يكون تفكيره في اول مره شافها فيه ... شاف بنات من قبل ويمكن مره اللى تعرف لانه ما عنده هالسوالف ولا يحبها لكن هذي غير اخذت عقله وقلبه بنظره من عيونها ... بديت اضعف من اسمع صوتها ليه انا كذا والكل يعرفني اني قوي وما تعجبني هالسوالف ..بس هذي غير اخذ رسمة وجهها اللى رسمه وابتدا يرسم من خياله بورقة ثانية جانب من وجهها
..........
جواهر كانت ويا امها يسولفون
جواهر: ايوه ماما تبين شي
امها: بغيت اعرف عن هذا ولد عمك سلطان يعني انتي وافقتي بس ما اشوف بعيونج الشوق والوله اللى اعرفهم في أي وحده تنخطب او جاها احد
جواهرانحرجت : يعني اشلون ماما
امها: انتى مغصوبه عليه
جواهر: لا
امها: طيب ليه مو فرحانه
جواهر هنا بدا الحزن يتجمع بعيونها ونزلت دموعها من غير ما تحس قربت منها امها وضمتها لها
امها: حبيبتي شوفي ولا مخلوق يقدر يغصبج على شي انتي ما تبيه فهمتي
جواهر ارتاحت بحضن امها ...بس امها رفعت راسها بايدينها
امها: فديتج ليه البكا طيب علميني قولي اللى بخاطرج ترى من يوم ما جيتي ما حبيت انى افتح وياج السالفة زين واتحرى شو اللى صار معاج هناك
جواهر: انا احب بدر بس مو معطيني ويه لا وبعد قالي مبروك
امها انصدمت: بدر ولد عمج سالم ما غيره
جواهر: من يوم وانا صغيره وانا متعلقه فيه دوم يهم فيني ولا فكرت اكون لحد غيره ..بدت تبكي لكن هو مو مهتم لو اهتم كان زعل وعصب وقال لي ليه وافقتي ويعني من هالكلام والله كنت في يومها بفسخ خطبتي بس هو ما اهتم ما اهتم وصاحت مره ثانيه بحضن امها
امها: شوفي جواهر ادرى انه بدر شخص ممتاز بس هذا ما يخليج تتعلقين فيه لهالدرجه انتي تدرين المرات اللى يجون فيها اشلون امه تعاملنا وما تحبكم تتقربون من اولادها لكن مع كذا ظليتوا اخوه واولاد عم والحين يت هالسالفة اللى صارت وعرفتي اهلج بعد ورحتي لعندهم لكن لو فعلا بدر يحبج كان علمج صح ولا انا غلطانه
جواهر: اشلون انساه وافقت صح لانه شفت كل اهلي واخواني موافقين عليه هم صح ما ضغطوا علي بس كن وقتها بابا يبيني اقرر قبل لا اسافر ومدرى ما حبيت انى افشل ابوي برفضي فوافقت وقلت يمكن لو عرف بدر راح يلمح لى واقدر وقتها افسخ الخطوبه
امها: اللى سويتيه مو صح
جواهر: ادرى بس هذا اللى كان بايدي وقتها والحين متورطه بهالشي
امها: انتى تعرفتي على ولد عمج عرفتي شي عن اسلوبه وحياته
جواهر: كله كلام وبس مرتين تقابلنا وكم مره رد بالجوال بس مدرى خايفه اشلون اربط حياتي بانسان ما اعرفه ولا احبه
امها: طيب ليه ما تسألين عنه من اخته مو تقولين انها بنت حبوبه وطيبه واعتقد انها ما راح تغشج بشي
جواهر: استحي اسالها اشلون يعني
امها: انتى بعدج تفكرين في بدر انه ممكن يجي ويتكلم
جواهر: مدرى من بعد ما بارك لي ولا اهتم والله انى انقهرت زود حسيت انى ولا شي بحياته
امها: طيب حاولي تتعرفي على ولد عمج يمكن مثل ما قلتي يكون الانسان اللى تمنيتيه وانتى ما تدرين
جواهر: تمنيت شخص وبس وسرح فكرها في بدر ..آه ماما بروح اشوف غدوووه وبرجع
امها: لا تغيرين السالفه غدووه ويا ابوها بغرفته لو ما يبيها بيجيبها لهنا
جواهر: طيب ماما بسأل عنه اممم ايه وبعد نوفا عزمتني اجي بعد اسبوع لهم يعني ويك اند اروح بيروحون للمزرعه كلهم عمامي والاهل
امها: زين والله فرصه يمكن وقتها تعرفين اسلوب حياتهم اشلون وتعرفي عن ولد عمج
جواهر وهي تنظر لامها: يعني اروح
امها: ايه روحي بالمره يمكن تلقين جواب لاسئلتك
...............
الجزء الثامن عشر
الفصل الاول
دخل محمد للبيت عندهم وعلى طول سأل عن الوالد
امه: للحين ما جوا لا هو ولا سلطان قالوا بيتأخرون شوي بالشغل
محمد: انزين يمه بغيتج بموضوع
امه: خير ياولدي صار شي ... جلس جنبها وطالع وهو يكلمها
محمد: يمه ليه اهل لبنى ما صرتوا تطرونهم ولا بمره احس انكم رحتوا لهم او هم جوا لهنا
امه ردت عليه وهي معصبه: وش جاب طاري هالسالفه الحين على بالك احنا ما صدقنا انك نسيت وراح ترد لنا
محمد: يمه صح الكلام انكم رغتوهم من البيت طيب ليه مو حرام عليكم
امه: والله الحرام هم اللى سووه فينا ...يخلونك تاخذ بنتهم وهي مريضه وعارفين هالشي لا وبعد عيال ما تجيب واخر شي ..
محمد: انا عارف بكل شي من البدايه وما حبيت اقول لكم
امه متفاجأه: وشهو اشلون عارف وما علمتنا ليه خبيت علينا ..... ليه طيب يا محمد اخذتها مع انك عارف ما راح تجيب لك العيال الاعمار بيد الله لكن ليه
محمد: يمه انا حبيتها وما كنت اقدر استغنى عنها هي رفضتني بالاول بس انا اصريت عليهم مو ذنبها اللى صار مريضه وما تقدر تجيب العيال عشان صحتها كان لكن الحين ...وتنهد بقوة الله يرحمها الحين اللى ابي منكم يرجع كل شي مثل ما كان ..انا عزمت الجماعه بكره عندنا الكل وارجوكم لا تفشلوني قدامهم
امه: انت من صجك عزمتهم من غير ما تشاور ابوك قبل
..... وهذا ابوه داخل المكان
ابوه: السلام عليكم كيف احوالكم الجميع
الك: وعليكم السلام ..الحمدلله
ابوه: ها محمد اشوفك جالس ويا امك عسى خير
محمد: بويهك ابوي ان شاء الله ...
جا ابوه وجلس جنب الوالده
محمد: اشوف الوالد ما شاء الله ما يحب يجلس جنبي الا بجنب الغالية
ابوه:هههههههههه تبينى اقابل ويهك واخلى ويه الغالية
امه عاد هني استحت
محمد ضحك:ههههههههههههه اشعليه الوالد يتغزل فيج قدامنا
امه: عن طولة اللسان الحين بروح اجيب القهوه
مسكها ابو تركي: خلي القهوة الحين انا قلت للشغالة تجيبها
محمد: الله لنا ههههههههههه
ابوه: وش معاك محمد
محمد: تفهمني يابوي من قبل لا احكي
ابوه: اذا انا ما فهمت اولادي من عاد راح يفهمهم ...
محمد: يبه اللى صار ويا اهل لبنى ابيكم تنسونه
ابوه هني عصب ووقف: وش جاب طاري هالسالفة الحين
محمد: يبه الله يهداك اجلس انت بالاول افهمك
ابوه جلس: ما احب هذي السالفه اللى كانت سبب في هجرانك لنا وديرتك وتجلس بالغربه طول هالسنين كلها ولا حتى فرحتنا فيك
محمد: يبه صلي على النبي
ابوه: اللهم صلي وسلم عليه
محمد: يبه انا كنت اعرف بكل اللى كان مع لبنى ومع هالشي ما كنت ابي اتزوج غيرها توكلت على الله والواحد لو بيعرف عمره متى بيموت كان ما عاش بهالحياه .. وانت عايشت لبني الفترة القصيرة بدر منها شي يزعجكم او شي غلط
امه: وانا اشهد كانت بنت ولا كل البنات من خلق وادب وحتى عديتها شراة وضحه ونوفا
محمد: طيب مو ذنبها المرض او اللى فيها ..الله اراد لها وانا كنت بعلمكم بعدين بالسالفة بس ما حبيت انى ازعجكم بالبدايه ولا والله اهلها كانوا بيعلمونكم وانا حلفت عليهم
محمد: يبه انا اليوم شفت مساعد وعلمنى باللى صار ما هقيتها منك تقول عنهم هذاك الكلام
ابوه للحين يفكر بكلامه : انا ما قلته الا من حرقة قلبي على ولدي اللى ما عاش متهني ولا شي
محمد: ومن قال لك انى ما عشت متهني ومبسوط وربي الشهرين اللى عشتهم معاها كنهم 200 سنة بكل يوم ما شفت فيهم الا فرح وسعادة ...صح هي راحت لكن تركت لى سعاده الدنيا حتى لو انا اتألم .....
ابوه: اشلون يبه تبينا ننسى اللى صار انت هاجرت عنا وتركت لنا حسرة بقلوبنا على اللى صار ونشوف اهلها ولا كأنه الذنب ذنبهم باللى استوى
محمد: انت قلت من قهرك وحرتك باللى صار ...يبه انا رحت لمساعد وعزمتهم بكره على الغدا يبه لا تفشلني طلبتك قول تم وانسى اللى صار وخلنا نرجع اهل على الاقل كان بينا عيش وملح من قبل ما نبي اللى صار يفرق بينا وانا اشهد ناس طيبين ما وجدت مثلهم ابي لما اروح عندهم ويشوفوني يكونون مرتاحين مني وهم بعد لما انتوا تشوفونهم
ابوه سكت ولا رد
امه: والله يابو تركي الحين جا وعلمني بالسالفة ...لبنى الله يرحمها كانت مثل وحده من بناتك وانت مره قلت لي الحمدلله انى شفت محمد ولدي ماخذ بنيه خوش ادب واخلاق واهلها ناس طيبه
محمد: ها يبه طلبتك .... انسى اللى صار والحين انا رجعت لكم خلاص ولا تبون الفكه مني وارجع مثل اول
ابوه وامه بوقت واحد: لا
ابوه: يا ويلك ان رجعت باول مره انا ما وقفت بويهك الحين بوقف
ابتسم محمد ذيك الابتسامه : عساني ما اخلى منكم يارب
ابوه وامه: ولا منك ياولدي
ابوه: ولا يهمك محمد وكلمتك ما راح تنزل ان شاء الله وبكره ان شاء الله راح اقول بعد لعمامك يجون يتغدون عنا وش رايكم ؟
محمد ابتسم من خاطره وفرح: زين بالمره نجتمع ونستانس الجميع
جا وسلم على راس ابوه وامه وطلع من عندهم
امه: الله يخليك لنا الجميع وعسى عمرك طويل ان شاء الله
باليوم الثاني كان وقت العزومه والكل مجتمع بمجلس الرجال والحريم في مجلس الحريم
ابو تركي: يا هلا والله بمن جانا حياكم الله ... يا جماعه الخير ابي اعلمكم ترى بسالفة
محمد خاف من الكلام اللى بيقوله ابوه وطالع بمساعد اللى بعد يراقب الوضع
ابو تركي: من قبل هالعزومه كنا زمان اهل احنا وابو مساعد ...بس الزمن فرقنا بسبب اللى صار وانا اللى ابيه السموحه من ابو مساعد لو غلطنا بحقه ونسيناه ونرجع ان شاء الله شراة الاول واحسن
محمد ارتاح من كلام ابوه حتى مساعد ..
ابو مساعد: مسموح يالغالي وما بينا شي ان شاء الله ولو الزمن فرقنا مثل ما تقول هذا الزمن ورجعنا على خير ومحبه ان شاء الله ونظل اخوه ما نفترق ابد وقام وسلم عليه واستانس محمد ومساعد من اللى يشوفونه قدامهم ..... كانت العزومه حلوه وضحك وسوالف مثل اول وخصوصا محمد اللى كان طول الوقت ويا عبدالعزيز وعمه
عمه ابو عبدالعزيز: ها محمد ولدي والله اشتقنا لك يعني بنشوفك معنا بالشركه ولا لا
ابو تركي: ابو عبدالعزيز الله يرضى عليك تبي تاخذ الولد مني انا ما صدقت انه رجع لنا اكيد بيشتغل معنا بالشركه
عمه: هههههههههههههههههههههه محمد ولدي وانا مربيه من زمان انت اطلع منها وشركتكم ياخوي ما راح تتأثر هذا تركي ما شاء الله مكفي فيها هو واخوه سلطان وش تبي بعد
عبدالعزيز: محمد محجوز معنا يعني لا تقربون صوبه هو بس يقول ايوه وراح يشوف
محمد:هههههههههههههههه لا والله صرت بضاعه وانا مدرى
ضحكوا الكل من كلامه .......
محمد: للحين ما فكرت باللى راح اسويه لكن ان شاء الله اشتغلت وياعمي وهذا كان حلمي من زمان او انى اشتغلت ويا ابوي راح تظلون هلى وربي يخليكم لي بس خلوني ارتاح واشم هوا من زمااااااان وانا احلم بالوقت اللى ارجع فيه لهنا على طول والحمدلله هذا هو صار ..... عن اذنكم ,, وطلع من عندهم بيروح للمطبخ وطبعا لازم يعدي من الصالة الرئيسية اللى قريب الدرج وبالصدفه شاف وانصدم ....مو معقوله مو مصدق بدا قلبه يدق بسرعه يحس انه الدنيا تدور فيه وش اللى اشوفه قدامي ... حس انه الزمن توقف وانه كل شي صار جامد الا دقات قلبه اللى تزيد بكل مره
*************
جواهر: اشلونك يبه عساك طيب
ابوها: الحمدلله بخير وانتي اشلونج واشلون الاهل عساهم بخير
جواهر: الحمدلله يسالون عنكم اشلونها الريم واخواني اشلونهم فديتهم تولهت عليهم والله خصوصا العيار هههههههههههههههه
ابوها: العيار بخير هههههههههههههههههه تعرفينه فاضي كلام وبس
جواهر: ربي يخليهم ان شاء الله واشلونها البندري ويا العيال شهوده وتركي
ابوها: الحمدلله ما عليهم ...انتى طمنيني عنج بديتي الدراسه ولا بعد
جواهر: الا بديت يبه الحمدلله
ابوها: عسى ربنا يوفقج ان شاء الله يارب ابي منج ترفعين الراس وتيبيبن نسبه حلوه
جواهر: ولا يهمك ان شاء الله
ابوها: واي شي تبينه لا تحاتين اوكي ما عليج الا تتصلين وتلقين اللى تبينه ان شاء الله
جواهر: ما تقصر يبه
ابوها: تعرفين اشتقت لحسج بالبيت والله يابوج لا تتاخرين علينا خلينا نشوفج قريب ان شاء الله
جواهر تأثرت من كلام ابوها: ان شاء الله يبه ولا يهمك
جواهر: اقول يبه انا نفسي بشي
ابوها: امري يابنتي وش تبين
جواهر: ابي اسافر معاك لأي مكان انا وانت وبس
ابوها: غالي والطلب رخيص ان شاء الله قريب جهزي روحج عشان معي شغله بره وبسافر لها وباخذج وياي
جواهر: بس يبه ما اقدر اغيب اكثر من 3 ايام بعذر
ابوها: ولا يهمج بس اذا انتي عادي تقدرين تعوضين الدروس اللى طافتج ..معاج مدرسين
جواهر: ايوه يبه معاى انا والعنود صاحبتي ندرس سوا مع بعض
جواهر: خلاص اذا كذا يصير خير .... بس ممكن بعد شي
ابوها: عيوني وقلبي يا الغاليه
جواهر: تسلم عيونك ويسلم قلبك .... لو علمتهم بيزعلون اكيد بيقولون ليه تسافر بروحها وياك يعني
ابوها: اصلا لو ما طلبتي كنت بطلب منج تسافرين وياي بيوم كم جواهر عندي
جواهر: ربي يخليك لي يبه ... انزين الحين انا بخليك طولت عليك وايد سلم عليهم كلهم
ابوها: ان شاء الله وانتي بعد سلمي مع السلامه
جواهر: مع السلامه ..احبك والله مووووت
ابوها: وانا بعد احبك وانتبهي لدراستج زين
جواهر: ان شاء الله مع السلامه
سكرت من عنده وهي مرتاحه ..تحس انها تقربت من ابوها كثير بهالفتره بس ليه طلبت تروح وتسافر معاه بروحها هذا اللى ما تدري فيه ..حست انها تبي تكون ويا ابوها اكثر ماحد بينهم تبي تعرف عنه كل شي هي واياها وبس ..... طلعت من غرفتها وراحت لغرفة اخوها ابراهيم
طقت الباب ... فتح الباب ابراهيم: تعالي بشويش ما صدقت انها نامت
جواهر: فديتها وهي تطالع بغاده اللى نايم وبايدها الرضاعه سحبتها منها بشويش ولحفتها
جواهر: انت بتروح مكان
ابراهيم: ايه وراي شغل الحين لازم اروح لها انتبهي عليها اوكى
جواهر: ان شاء الله ولا يهمك بس وينها روز
ابراهيم: مدرى اكيد بغرفتها لو تبينها دقي عليها بالغرفه انا يمكن اتاخر لبعد العشا اوكى يالله مع السلامه
جواهر: الله يسلمك
... راحت جواهر لغرفتها وخذت كتاب العربي تراجع فيه وهي جالسه ويا غاده .. انسدحت على السرير بجنبها وتقرا بالكتاب ما حست بروحها الا حد يفعص بعيونها قامت والا تطالع بغاده جنبها وهي تضحك شلتها وهي تضحك وتتفداها
جواهر: فديتج غدددوه تفعصين لي عيوني تبين عمه تكون عميا هههههههههههههه
غاده: واهر
جواهر: فداج الجواهر والحلى كله وجلست تبوس فيها يالله تعالي بنروح عند يدووه يالله
واخذتها بعد ما بدلت ملابسها وراحت لعند امها .........
***********
بدا اول يوم دراسي بالجامعه كان احمد يدور على كلاسه ويا سلمان طبعا سلمان جا لكامبريدج بالقطار اللى بالليل استقبله احمد وعلى طول راحوا لشقتهم
احمد: حلوه الجامعه بس الله يستر من اللى فيها تعرف متى المحاضرة تبتدي
سلمان: ايه عندك بالجدول على الساعه 8 ونص
احمد: كم عندك محاضرة انت
سلمان: نفس الشي اليوم اربع محاضرات بس ابي اتعرف على الجروب اللى بكون وياهم
احمد: يعني بس انا وانت راح نكون بمحاضرين مع بعض وباقي الوقت
سلمان: العب فيهم ههههههههههههه يعني وش راح تسوي اكيد بيروح كل واحد كلاسه
احمد: اللى خلص قبله ينتظر الثاني بالكافي ها وش رايك
سلمان: خلاص ولا يهمك المهم يالله خلنا ندور على الكلاس ما نب نتأخر ونجلس باخر الصفوف
خلصوا محاضراتهم وطبعا سلمان خلص قبل احمد اللى تاخر بعده بساعه
سلمان شاف من بعيد رجاوي ويا شلة بنات ومعهم واحد قرب صوبهم
رجاوي من شافت سلمان ابتسمت: هلا سلمان حياك نورت الجامعه
سلمان وهو يبتسم هلا اختي اشلونج واشلون الدراسه
رجاوي: الحمدلله تمام ماشي حالها ... دفتها صاحبتها على كتفها
رجاوي وهي تطالع بهلا: هههههههههه اووه نسيتكم هذا سلمان رفيق اخو اختي عاد انتوا افهموها ههههههه هذي هلا وهذي رندا وهاي منصور وهاي خطيبته روضه اللى استحت وطالعت بالارض
سلمان: هلا بكم الجميع انا جديد هنا كنت ادرس قبل ببرايتون وحولت على هالجامعه يعني قريب شوي على الاهل
جلسوا يسولفون شوي اما منصور هذا واحد من الامارات يدرس هو وخطيبته بنفس الجامعه وناس طيبين رجاوي طبعا كانت جالسه ويا هلا بنفس الشقة لانها من نفس البلد كويتيه وطيبه وحبوبه حتى لو انها فري شوي اما رندا وروضة جالسين بالشقه اللى مقابلها ... ودوم يطلعون مع بعض الجامعه وبالليل لو ما عندهم مذاكره يجلسون بمكان واحد ويسولفون ويستانسون
***************
.... كانت الشله ضحك وسوالف مع بعض وسلمن وياهم عجبه الشلة وحبها وتذكر ياليت اللى في بالي هنا بتكون الجامعه احلى واحلى .... سرح خياله بعالية
شوي ويدق جوال سلمان: هلا احمد اشخبارك خلصت انت
سلمان: تعال طيب لهنا احسن بالكافيه ترى انا جالس ويا الاخت رجاوي وشلتها
رجاوي من سمعت اسم احمد ما حبت تعطي أي اهتمام
رجاوي: اقول سلمان ما له داعي للاخت احنا اخوه كل واحد ينادي باسم الثاني عادي يعني انا اسمي رجاوي
سلمان: وانا اسمي سلمان ضحكوا الكل وبعد دقايق وصل احمد اللى تفاجأ بوجود الشلة وخصوصا رجاوي اللى كانت تضحك على شي قالتها لها صاحبتها باذنها
احمد: السلام عليكم هلا احمد ها خلصت الكلاس
احمد: ما بغينا غثتنا الدكتورة لا واخر شي الهو وورك يابوك صفختين نكتبهم وبكره نعطيهم اياها حشا لو بكل يوم بنكتب كذا راح نألف كتب على اخر السنة
ضحكوا منه الجميع .....
منصور: هلا احمد حياك انا منصور وصافحه
احمد: هلا منصور حياك الله
وبعدين عرفه على الجروب اللى معاه وهذي رجاوي
احمد حس بالغيره ليش انه منصور يعرف رجاوي: اعرف رجاوي هي اخت اختي
منصور: اها الحين فهمنا اخو اختي ههههههههههههه وضحكوا الجميع ما فهم احمد بس علموه لما كانت رجاوي تعرفهم على سلمان وش قالت لهم
احمد: اشلونج رجاوي
رجاوي: الحمدلله بخير طيبه وانت اشلونك
احمد: الحمدلله
هلا: احمد يعني انت من السعوديه
احمد: ايه طال عمرج
هلا: حيا الله باهل السعوديه عمي عايش هناك وانا مرات ازورهم
احمد طالعها وهو مو عاجبه شكلها وايد متحرره على اللزوم
هلا: الا اقول وش رايكم نروح نتغدا سوا يعني بمناسبة هالتعارف الحلو
هلا اللى بقلبها تقوله بلسانها ما تحب انها تخفيه وهي اول ما شافت احمد حست باعجاب ناحيته لكن اللى ما تدرى انه احمد ما بادلها هالشعور الا مو عاجبه طريقتها وطريقة لبسها بعد
سلمان: خلاص خوش فكره
منصور: انا اعرف مطعم لبناني بالشارع 34 قريب من سيتي سنتر المدينه وش رايكم اكله حلو وهادي
رجاوي: اوكى خلاص نروح ليش لا مو بكل مره بنروح نتغدى سوا وبعدين احسن من مرقة هلا اللى راح تغثني فيها
هلا: اصلا شغالة اهلج وانا مو عارفه احمدي ربج اسوي لج ذاك المرق ولا انتي وحده دلوعه ما تفهم شي بالمطبخ
ضحكوا من كلامهم
رجاوي: انا يالله اقصقص البصل اللى ذبحتيني فيه بكل يوم غيره ما افتهم تبين بيض طماط بسوي لج ولا يهمج
هلا: لا يبه مابي تبين تسمميني بتجيبن لى انفلونزا الطيور
الكل: ههههههههههههههههه
منصور: يالله خلونا نروح ومسك كتب روضه اللى انحرجت بس منصور طبعه كذا وما يخفى حبه قدام الناس
كلهم راحوا للمطعم وطبعا احمد كان يطالع رجاوي من حين لاخر ولما تتلاقى نظراتهم ياهو يبعدها لأى مكان او هي تنزل نظراتها بالاكل اللى قدامها..استانسوا ومن بعد وصلوا البنات اللى شقتهم وتفاجأوا انه منصور بالعماره اللى جنبهم ساكن واعرفوا انه منصور دايما هو اللى يجيب البنات للجامعه ليش انه معه سيارة فيمر على خطيبته والكل يروحون معاه نادر ما تجي الوحده منهم بتاكسي للجامعه
****************
بعد اسبوعين
وبالتحديد في مجموعة شركات ابو عبدالعزيز كان ويا ابوه بالمكتب جالسين يناقشون بعض الاعمال وبعد ما خلصوا اللى معاهم
ابوعبدالعزيز: اقول عبدالعزيز جهزت كل شي عشان المزرعه هالاسبوع بنروح لها ان شاء الله
عبدالعزيز: اكيد يابوي ...شوي ويجي عندهم محمد
محمد: السلام عليكم الجميع
الكل: وعليكم السلام هلا اقلط
دخل المكتب عندهم
محمد: اشلونك عمي واشلون الشغل وياك
عمه: الحمدلله تمام فكرت ولا بعدك
محمد: لا ياعمي جاي بعد ما فكرت خلاص انا قررت اصفي الشركه بالخارج ان شاء الله واجيب راس المال مع الارباح بعطي ابوي ارباحه والباقي بدخل فيه شراكه بنسبة بسيطه ويا مجموعة شركاتك هذا لو وافقت
عمه ابتسم ووقف وقربه وسلم عليه: والله هذا اللى اتمناه انت مخك وتفكيرك مثل تفكيري وتمنيت انه تكون وياي مع اخوانك عبدالعزيز وفهد ان شاء الله لما يخلص واحمد
عبدالعزيز: تعرف محمد وش كثر كنا مع بعض زمان وانا بعد تمنيت اشوفك بكل يوم يابوك ويهك يرد الروح ...ينسيني اسمي الا طبعا ما اقدر انسى ام العيال
ضحكوا منه واستانسوا بالخبر وخبروا فيه ابوه اللى صح فرح له بس كان في نفس الوقت حاب انه يشتغل معاه بالشركه .... واخيرا رجع محمد وكله امل انه يبتدي حياته من جديد بين اهله وبين ......... (ياترى اقدر مره ثانيه ولا لا ؟ ) هذا اللى كان يدور في مخيلة محمد هالوقت
..................
مر اسبوعين على الدراسه وعلاقة احمد برجاوي مثل ما هي ما فيها شي جديد يتلاقون مرات الجميع مع بعض بالكافيه ويوصلونهم للشقه الا بيوم وصلهم احمد لانه منصور كان عنده كلاس متاخر.. استحت تركب قدام فركبت هلا قدام عند احمد اللى ما عجبه هالتصرف منها واما هلا فبدت تتعلق باحمد بينها وبين نفسها
في يوم كانت رجاوي تقطع الطماطم والبقدونس وتحط كل اللى تسويه على جانب اما هلا فكانت تقوم بالطبخ
هلا: هالمره بتاكلين اصابعج ورا هالكبسه المحترمه
رجاوي: هههههههههههههههه ايه اخاف بعدين احط لي ايد صناعيه
هلا:ههههه تتغشمرين ويا ويهج والله اخذت هالطريقه من كتاب الطبخ عسى بس ان شا ء الله تطلع احسن منها ...اقول رجاوي اش رايج باحمد
رجاوي تفاجأت وما حست انها قصت اصبعها الا والدم تشوفه
هلا: رجاوي ايدج
رجاوي: لحظه بجيب بلاستر قطع بسيط صبت عليه الماي وبعدين راحت حطت عليه بلاستر خفيف
هلا: ايوه رجاوي ما سمعتيني اشرايج باحمد ..؟
رجاوي: من ناحية ايش يعني .؟
هلا: شاب حبوب مو ..؟ ليته بس يعطينا ويه احس دوم متزمت وعصبي مرات صح تلاحظين هالشي ولا لا ...مره حسيته لما رد علي بعصبيه
رجاوي: والله هذا طبعه العصبيه ما عليج بس انتي ليش تسألين عنه ..؟
هلا وهي تستحي: ها لا ولا شي .. بس مجرد سؤال , تعرفي مرات الاحظ نظرات الاعجاب بعيونه لما يطالع فيج وفجأه ينقلب حاله مدرى ليه لما يجون الشباب صح ولا لا ...؟
رجاوي: يوووه راح بالج بعيد احمد يعجب فيني شوفي هذا زين لو يرد على ..
هلا: طيب ليه..
رجاوي: الله يسلمج حكايه صارت من قبل
هلا: ممكن اعرفها يالله سولفي كلي آذان صاغيه هههههههههههههه
رجاوي: امحق أذون كلي آذان صاغيه يالله عاد اقلبي ويهج وكملي الكبسه ولا تحرقينها علي بروح اتسبح وابدل ملابسي وبعدين بسوي الكيك والحلاوه
هلا: هذا اللى انتي فالحه فيه كيك وحلاوه ...بذمتج بتأكلين ريلج كيك وحلاوه كل يوم
رجاوي: اصلا هو يتحمد ربه انه اول شي خذاني وثاني شي انى انا الحلوه تسوي له الحلاوه طلعت لسانها لها وطلعت وهي تضحك منها ..
هلا وكملت طباخها اليوم بيجون رندا ويا روضة ويتغدون سوا مرات هم يتغدون عندهم او مرات يطلبون لهم شي على الخفيف من المطعم
اقول وش رايكم هالويك اند ننزل لندن
روضة: طيب باخذ اذن منصورقبل
رندا: ياربي على هالمنصور يعني يتدخل بامورج قبل لا يصير ريلج
رجاوي: اوووه لا تخربين البنت علينا زين اللى تسويه اسمعي كلام خطيبج
هلا: طالع من يتحجى الحين من يسمعها والله انتي بالذات ما راح تستأذنين ريلج بشي
رجاوي طالعتها بنظرة: ليش من قال هالحكي
هلا:ههههههههههههه يبه ادرى فيج شخصيتج قويه ولازم الرجل هذا قبل لا يتقدم لج ينتصر بالمعركه الاولى ولا ما راح يكمل معاج مشوار الزواج
روضة: حرام عليج رجاوي مو طبعها كذا حتى لو هي قوية بس تعرفين احسها غير من داخلها
رجاوي طالعتها بنظرة ( انتي الوحيده اللى قدرت تفهمني )
رندا: طيب ايش الرهان لما رجاوي تنخطب ونسمعها تقول بستاذن خطيبي قبل
ضحكوا الجميع منها ههههههههههههههههههههههه
رجاوي: يعني لازم رهان عيل من الحين ترى خسرانين الجميع
الكل :هههههههههههههههههههههههههههههههههه
.........
ليال بغرفتها تكتب خواطر .....
كل ما مر بخيالي طيفك .... زاد هواه وزاده تعاليل
..... وقفت الكتابة وسرح تفكيرها باللى صار هذاك اليوم معقوله هذا محمد زوج اختها ياربي اشكثر تغير صح هي شافته كم مره بس الحين صار غير يمكن لانه كبر شوي بالسن
ليال اللى تذكرونها اخت لبنى الحين صارت من اعز ربع نوفا ...اللى ما يعرفون انه ليال ونوفا ظلت صداقتهم حتى بعد ما ابتعدت العايلات كانت بينهم اتصالات او مرات يروحون عند وحده من ربعهم يدرسون سوا ليش انهم ثانويه ادبي حتى لو المدارس مختلفة..ليال تتمني تخش جامعه ادب انجليزي
تكملة الجزء الثامن عشر
الفصل الاول
...صح اكيد الحين بتعرفون ليه انصدم محمد لما طلع من مجلس الرجال بالصدفه كانت ليال نازلة مع نوفا بالدرج هو انصدم لانه شاف قدامه لبنى مو معقوله لبنى قدامه وهي حيه ....
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك