رواية جواهر -23
كان العرس رائع مسوينه في قاعة السلام ... رقصوا البنات على بعض الاغاني ونوفا طبعا وبنات عمها مها وعبير رقصوا في الحفل وكانوا يخبلون من الروعه نوفا كانت لابسه فستان عنابي ورافعه شعرها شنيون ...فتحة للفستان على جنب واصله لنصف الساق وفتحة العنق مرفوعه لفوق تبينها شوي طويله الفستان ما فيها تعقيدات بسيط على جسمها واكمامه صغيره تحت كتوفها بشوي اما مها لابسه فستان بيج علاقي عليه جاكت اخضر وباطرافه شك بيج ويا الاخضر وقصته فرنسية من تحت عليها طالع روعه ..وعبير لابسه جلابية من اليشمك كلها شك عبارة عن قطعتين اسود بالاحمر وعلى شعرها اللى صابغته احمر شوي من قدام طالعه تخبل
على الساعه 10 دخلت العروس على اغنيه قمر لعبدالمجيد عبدالله وكانوا حواليها خواتها وامها وجت ام سيف معهم ووصلوها لمكانها وجلسوا شوي يرقصون قدامها خواتها واهلها وعلى الساعه 11 دخل سيف ويا ابوه ..... كملوا العرس وعند الساعه 12 الكل بدا يروح اما المعاريس فراحوا لجناحهم الخاص وباتداو يصورون ويا الاهل بعدها طلعوا على الفندق وباليوم الثاني راح يسافرون شهر العسل الى ايطاليا ..
**********
نوفا بغرفتها بعد ما بدلت ملابسها وطلعت من الحمام جت بتسكر جوالها الا وتلقى 2 مسد كول ورساله فتحت اول شي الرساله يالدبه مشتاقه اكلمج لو صاحيه ردي مسج بتصل عليج
نوفا: فديتج جواهر وبعدها عرفت المسد كول منها ..طرشت لها مسج ودقيقه وتتصل عليها
جواهر: السلام عليكم ...ولهت عليج يالخايسه ياللى ما تتصلين
نوفا:هههههههههه وعليكم السلام هلا والله بناعم الصوت ..انا ولا انتى من رجعتي الكويت خلاص نسيتي انه اهلج موجودين هنا
جواهر: فديتكم والله لا ودوم انشد واسأل عن احوالكم .. اشلونج نوفا وش اخبارج عساج طيبه
نوفا: الحمدلله بخير تعرفي جايين اليوم من عرس ولد عمي سيف
جواهر: والله الف مبروك ها علميني شنو لبستي بالحفلة اكيد كنتي تخبلين
نوفا:ههههههههههههه ايه اصلا انا كنت ملكة جمال وانا مدرى
جواهر: تطنزين يعني والله حلوه وتخبلين يالله ابي اسمع سوالفج والله ولهت عليج وااااااااااايد لا تنسين شي
نوفا: اكيد ما راح انسى واول شي اخوى سلطان فديته
جواهر: يا ثقل دمج شنو جاب هالسيرة الحين انا ابي اعرف شنو سويتي بالعرس رقصتي ولا لا..؟
نوفا: شوي شوي علي لحظه بعلمج من البدايه ...هات يا سوالف
لهم اكثر من نص ساعه وهم يتكلمون
كان وقتها سلطان ماروسمع حس نوفا وهي تضحك
نوفا: ههههههههههه لا والله مو مصدقه احمد ...
سلطان الدم وقف بعروقه معقوله اختى تكلم حد من الشباب منو هذا ... ما تحمل يسمع المكالمه للأخر, وده لو يذبح هالشاب اللى يضحك على اخته ... وعلى طول فتح الباب من غير ما يدق عليه
نوفا: طالعت فيه باستغراب : ههههههههههه اقول هنا ناس حابه تسلم ... وعلى طول قربت التلفون بويهه.. هنا سلطان تفاجأ والغضب اللى كان يحس فيه تحول الى استغراب واندهاش
سلطان خذ الجوال من ايد نوفا
سلطان: الوووووو
جواهر ما ردت انحرجت: ........................
سلطان وهو يطالع بنوفا: ما تكلم قلنا الووووووووو ..وبدت اعصابه تفلت منه
جواهر: السلام عليكم مرحبا
سلطان: كن احد صب فوقه مويه بارده ... صوت جواهر هذا
سلطان: جواهر
جواهر: لبيه
سلطان: اشلونج جواهر واشلونج الاهل عساهم بخير
جواهر: الحمدلله يسلمون عليكم واشلون عمي وعمتي عساهم طيبين
سلطان: الحمدلله يسألون عنج
جواهر: ......
سلطان: جواهر
جواهر: لبيه
سلطان بدون ما يحس: لبى لج قلبي وعمري
جواهر من سمعت الكلام فرت التلفون على السرير مصدومه وما تكلمت ...اما نوفا فجت حلقها وبعدين ضحكت من خاطرها
نوفا:ههههههههههههههه الله الله كل هذا وانا هنا
سلطان طالع فيها : رايقه انتي اشوف يالله اقلبي ويهج تصبحي على خير
نوفا: وانت من اهله ...بس وين جواهر سكرت بويهها ليش ..؟
سلطان: ما سكرت بويه حد ... وهو يعطيها التلفون يالله كلميها...طلع من عندها وهو مبسوط بسماع صوت جواهر
بغرفته راح يشوف رسمة ويه جواهر... متى راح تكون بجنبي ..آه لو تحسين باللى صار من اول نظرة شفتج فيها ملكتي قلبي وروحي وعمري والله
اما نوفا فاخذت الجوال
نوفا: جواهر ..جواهر..ماحد رد عليها
جواهر: هلا
نوفا: وين رحتي
جواهر: طيب اراويج يالكريهه جذي تحطيني بموقف محرج ويا اخوج
نوفا:ما اسمح لج اول شي هذا مو اخوي وبس هذا بعد خطيبج وريل المستقبل اوكى
جواهر: اقلبي ويهج عطيتج ويه انا الحين بهالسالفه يالله كملي لى سالفة العرس
نوفا: ليه كلكم تبوني اقلب ويهي ...بس على أي صفحه..؟
جواهر: يا دمج ههههههههههههه يالله كملي فديتج والله ولهانه
نوفا: طيب تعالي لو ولهانه صج ...تعرفي بعلمج على شي وش رايج تسوينها مفاجأه
جواهر: ايش
نوفا: يمكن بعد اسبوعين بنروح ويك اند للمزرعه الجديده اللى شروها ابوي واعمامي وش رايج لو تيين وتروحين معنا وترجعين السبت يعني ويك اند وبس
جواهر: يا سلام ودروسي
نوفا: اووه ما راح تغيبين الا يوم واحد استاذني قولي أي عذر المهم تعالي فديتج ارجوج
جواهر: والله مدرى صعبه اشلون أي على يومين وارجع
نوفا: ما فيها شي وبعدين مسافة قريبه يعني مو بامريكا عشان تقولين صعبه الا كم ساعه ورجعتي يالله عاد فكري اوكى
جواهر: اوكي ان شاء الله بشوف ظروفي
نوفا: يالله عيل ما راح اطول عليج اوكى سلمي ..تصبحي على خير وترى ها لا تقطعين
جواهر: ان شاء الله يالله مع السلامه
نوفا: مع السلامه
كل وحده راحت تنام اما جواهر فظلت تفكر بكلام سلطان يا ترى يحمل لى اى مشاعر بقلبه طيب ليه انا للحين مو قادره احس فيه ... ياربي ابي ارتاح والله
*******
نرجع للندن
على الظهر جا سلمان للفندق وسلم على احمد وجلسوا شوي بالهول تبع الفندق
رجاوي اول ما صحت الظهر اخذت لها شاور سريع ولبست وهي ترجف
رجاوي: ارررررررررر شنو هالبرد اللى يقطع العظام ..انتي يا الدبه خلاص اصحي وتسحب الفراش من على عاليه
عاليه : حرام عليج رجووووي فكيني خلينى انام ليه صحيتي هالحزه بدري
رجاوي: شنو بدري طالعي الساعه وبعدين ابي اروح اشتري لى جم جاكت طويل على بلوفرات مافيني على هالبرد اللى يدش العظم يالله فزي وقومي بسرعه انا بنزل للهول تحت انتظرج ترى لا تتأخرين عشر دقايق بالكثير اوكي
...... كانت رجاوي لابسه بلوفر عنابي وطبعا تحته بودي مع تنوره جينز سودا وجاكت اسود قصير لخصرها واما حجابها فلونه عنابي فاتح شوي بدرجه من البلوفر حطت لها جلوس خفيف وكريم للنهار بويهها عشان هالبروده القارصه ونزلت لتحت الهول
جلست على احد الكراسي ومسكت لها وحده من المجلات تطالعها كان الفندق فيه حركه الناس اللى تدش او اللى طالعه منه وبعض الاجانب جالسين على بعض الكراسي القريبه منها وحواليها ... ولاحظت فيه اثنين شباب جالسين على جنب باين عليهم عرب لكن من وين ما تردي جلسوا يطالعون فيها طبعا كانت الوحيده المحجبه اللى حواليهم
شوي ما حست الا وواحد منهم تقدم
.... احم الاخت عربيه
رجاوي: ايه
الشاب بابتسامة: انا قلت كذا لما شفت الحجاب وشفت الويه اكيد من الخليج
رجاوي: ايوه الكويت
الشاب: هلا وغلا باهل الكويت كلهم انا نواف من السعوديه وجاي سياحه هني ومعاى اخوي
رجاوي: اها هلا فيك اخوي ... اوكى اخوى اسمح لي الاهل جوعن اذنك ..وتشوف من بعيد احمد ويا واحد على طول حطت المجلة ووقفت واتجهت له وتركت الشاب واقف بمكانه
احمد شافها وهي جايه صوبه وشاف الشاب اللى كان يكلمها حس بالغيره منه
رجاوي: السلام عليكم كيفك احمد وطالعت فيه وبعدين اتجهت نظراتها لا اراديا للشاب اللى شافته راح لاخوه وجلس جنبه
احمد: منو هذا اللى يكلمك تعرفيه
رجاوي: لا ما اعرفه
احمد: طيب وليه يكلمك
رجاوي طالعت فيه: وانت ايش دخلك يكلمني ولا لا ...بدا احمد يعصب ووقرب منه سلمان صاحبه لما شافه كذا
سلمان: عفوا احمد
احمد من شاف سلمان قريب منه : سلمان هذي رجاوي تدرس هني... هذا سلمان رفيقي من البحرين
سلمان: هلا رجاوي اشلونج
رجاوي: الحمدلله تمام وانت اشلونك.؟
سلمان: مع هالجو والله بردان هههههههههههههه
رجاوي: ابتسمت وعرفت انه يبي يغير الجو المشحون اللي صار بينه وبين رجاوي وشوي التفت احمد يطالع ورا رجاوي ..التفت رجاوي شافت بنت عمها عاليه جايه ولابسه بنطلون جينز ازرق ويا سويتر بيج مع جاكت طويل اسود وحجابها باللونين الاسود والبيج طالعه كشخه وحاطه بعد بس جلوز حفيف
عاليه لما وصلت لعندهم : مساء الخير مرحبا ..اشلونك احمد
احمد رد عليها بابتسامه: الحمدلله طيب وانتي اشلونج
عاليه: تمام ومستعده للشوبينج وهي تضحك ههههههههه
احمد: هذا رفيقي سلمان
عالية: هلا حياك اشلونك
سلمان: تمام الله يسلمج انتى اشخبارج ...
عاليه : الحمدلله تمام ..يالله رجوووي نبدا نروح السوق
احمد: نوصلكم بطريقنا
رجاوي: ما يحتاي بناخذ لنا تاكسي الفندق
سلمان: افااا اشله تاكسي سيارتي موجوده يالله
وتقدم احمد طالع برجاوي
عاليه: يالله رجاوي تاكسي ببلاش وابتسمت ومسكتها من ايدها وطلعت
مشوا الكل صوب المحلات التجاريه ووقفوا السيارة في باركينج قريب ومشوا برجولهم طبعا عاليه ورجاوي بدوا يلفون بالمحلات كان احمد ويا سلمان قريبين منهم لما يشوفونهم طلعوا من محل يطلعوا بعدهم لين ما تعبوا من الشوبينج وصارت الساعه اربع العصر تقريبا
سلمان: اقول احسن نروح نتغدى والله يعت وتعبان حشا حواطه بالسوق طول هالوقت ما يتعبون.؟
احمد: ههههههههه اوكي خلنا نشوف هذول خلصوا ولا بعدهم
سلمان: اقول احمد عذرا بس انت قلت الاهل هذول اهلك
احمد: وحده اخت اختي والثانيه بنت عمها
سلمان: اختك اللى ....
احمد: ايه رجاوي اختها وعاليه بنت عمها
سلمان: ما شاء الله عليهم بس شكلهم بنات محترمات
احمد: ايه
سلمان: الا صج بسألك منو هذا اللى كان يكلمها بالفندق حد من الاهل
احمد بعصبيه : وانا وش عرفني
سلمان: اوووووهو اشوف طيور الغيره بدت ترفرف على سماك
احمد: لا طيور ولا بجع يالله بروح اسألهم نتغدى وبعدين لو حبوا يكملون تسوق يكملون
راحوا وسألوهم
عاليه ابتسمت: زين والله اسفين ترى تعرفون شوبينج وبنات بينهم محبه متبادلة من زمان هههههه
راحوا مطعم الدار باجوا روود تغدوا هناك ومن بعدها كملوا شوبينج لغاية الساعه 7
سلمان: وش رايكم نروح سينما فيه فلم جديد اكشن توه نازل
عاليه بلا مقدمات: والله زين بنشوفه
رجاوي: انا ما فيني تعبت من الحواطه بروح ارتاح بالفندق
عاليه وبنظرة ترجي: رجووووي خلنا نروح نشوف الموفي بكره نرتاح
رجاوي وهي تطالع فيها: عالووووه بكره نجهز رواحنا عشان الدراسه ولا نسيتي وبعدين انتي ورانا سفرة بالقطار
عاليه: صج بس خلاص الدراسه تاخذنا تدرين فينا نادر ما ننزل الويك اند لندن
احمد: سلمان خذنا السينما نشوف الفلم احسن بدل الجلوس ساعات بالفندق من هالوقت
سلما: ها شو رايكم بنات .؟ وهو يطالع ورا بعاليه
عاليه نزلت نظرها : ياليت والله رجاوي يالله خلينا نروح نشوف الفلم اوكى
رجاوي: اوكى شورج
سلمان: بسمعكم اغنيه حلوه سمعتها من رفيقي اهداء لبعض الناس وهو يطالع لعالية ......عاليه قابلت نظراته وبعدها نزلت عيونها تحس بحرارة بويهها من نظراته يالله لا هذا انا مخطوبه ..
رجاوي من سمعته يقول اهداء لبعض الناس عرفت انه يهديها للى بيخطبها
حط لهم سلمان اغنيه ( حمد العامري )
...ليتني عرفتك باول العمر بدري
وشبعت عيني بالنظر من محياك
نادم على اللى راح من وقت عمري
اللى قضيته دون صوتك ونجواك
......
اشجيتني بمعانقة حب عذري
ليت الخيال اللى يلمك معي جاك
الوقت يتحكم بعذرك وعذري
والشوق اللى خذني بعشقك وداك
.......
امسي وتفكيري مع الشوق يسري
يسري الى جده متيم برؤياك
اشغلتني واشغلت قلبي وفكري
ولا اشوف فوق الكون غيرك ولا القاك
كان سلمان يغني ويا الاغنية ويطالع عالية من مرايه السيارة لانها كانت في الكرسي اللى وراه اما رجاوي فكانت بالكرسي اللى ورا احمد
حتى احمد سرح بتفكيره مع الاغنيه ويا رجاوي ....
ابتدت عاليه تصفق مع الاغنيه بهدوء عجبتها ودشت خاطرها
طالعتها رجاوي تبي تذبحها اما هي فضحكت وشوي حست رجاوي بهزة تلفونها ولا مع الاغنيه ما سمعت لانه سلمان كان كأنه في عالم ثاني مع الاغنيه اكيد يفكر في خطيبته ابتسمت من هالشي وطلعت تلفونها لقته الاهل متصلين
رجاوي: وعليكم السلام هلا والله فديت هالصوت يواهر الخليج
سمعها سلمان ووطى على صوت الاغنيه
جواهر: اووووه من هذا اللى حاط هالاغنيه الرهيبه
رجاوي: ماعندج سالفة انتي
جواهر:ههههههههههههه ولهت عليج يا لخايسه خليتني بروحي
رجاوي: اشلون بروحج ..وياج امي وابوي ايه فديتها غدووه اشلونها ولهت عليها والله
جواهر: فديتها لو تسمعين وهي تقولين واهر هههههههههههههه حذفت الجيم من الاسم شنو رايج فيه علمتها تقول اسمي
رجاوي: يالدبه والله لو ما علمتيها تقول اسمي ان اتواطى ببطنج لما ارجع الديره
جواهر:ههههههههههههه شو دخلني فيج لما تيين ساعتها تعلمينها اللى تبيه ..
رجاوي: طيب علميني اشلون ماما وبابا فديتهم والله شو اخبارهم؟؟
جواهر: الحمدلله تمام كاهي ماما قدامي بتكلمج اوكى
رجاوي: ماما فديت قلبج وروحج اشلونج الغاليه ولهت عليج والله
امها: الحمدلله بخير ..وشوي بدوا يتكلمون مع بعض بلغتهم شوي وتعطي السماعه عاليه
...سلمان قرب من احمد وبصوت واطي: أي لغه هذي يتكلمون فيها
احمد: بعدين اعلمك ....
رجاوي: ماما تبي تسلم عليج
عاليه: هلا وغلا خالتي اشلونج
ام ابراهيم: الحمدلله طيبه وانتي شو مسويه
عاليه: الحمدلله ...تعرفين خالوووه خمت السوق رجوووي ما خلت شي ما اشترته
رجاوي وهي تدزها بايدها
عاليه: ههههههههههههه لا وبعد ما تبينى اعلم
ام ابراهيم: والله شو نسوي رجوووي وعارفين سوالفها بالسوق المهم ديروا بالكم على رواحكم اوكى
عاليه : ان شاء الله خالتي ها كاهي رجووي معاج
رجاوي: فديتج ماما سلمي على بابا واااااااااايد وعلى ابراهيم وحسن اوكى ولا تنسين مرة اخوى الغاليه نورا لو كلمتيها
امها: ان شاء الله ديري بالج على روحج ودراستك وتدفي زين
رجاوي: ولا يهمج الغاليه ..ايه هذي جواهر ماسكتني تبيج لحظه
جواهر: رجوووي حبيبتي اشلون احمد من وصل ما كلمته شو اخباره
رجاوي بهدوء ترد: الحمدلله بخير لحظه وتقدم السماعه لاحمد... جواهر تبيك
جواهر: هلا احمد اشلونك عساك طيب
احمد: الحمدلله تمام وانتي اشلونج واشلون الاهل
جواهر: الحمدلله تمام ...انتوا وين اسمع ازعاج
احمد: رايحين السينما الحين
جواهر وهي زعلانه: ليتنى معاااااااااااااااكم
احمد: هههههههههههههه بس فيه ناس الظاهر انها ما تحب السينما
جواهر: رجاوي هههههههههههههههه تحب الشوبينج اكثر ههههههههه ما عليك بس لما تكون مع الفلم مندمجه ياويله اللى يكلمها او يقرب صوبها
لف احمد على رجاوي: اها طيب يالله بخليج هاج رجاوي
عطى التلفون رجاوي: طيب يواهر فديتج بخليج طولت عليكم
جواهر: اوكى ديري بالج على نفسج اوكى قبل عطني علوووه اسلم عليها بليز دقيقه
عاليه : هلا جواهر اشلونج يا الدبه
جواهر: دبه في عينج والله صار لكم وحشه متي بتييون
عاليه:هههههههههههههه قريب بس 4 اشهر لا تحاتين وايد
جواهر: طيب يالله بخليج انتبهي لنفسج اوكى وهالله هالله بالدراسه والعلامات الزينه
عاليه: ولا يهمج امتياز مع مرتبة الشرف يالله مع السلامه
جواهر: الله معاج ... مع السلامه
******
بعد السينما راحوا للفندق ....
باليوم الثاني جا سلمان واخذهم لمحطة القطار ومن هناك الكل اخذ قطاره طبعا رجاوي ويا احمد لكامبريدج وراحوا بعد قطارعاليه بنص ساعه اما هم على طول اتجهوا بالقطار الى كامبريدج ...سلمان ودعهم الجميع وراح
رجاوي تبي تفتح سالفة بالقطار وقدامها احمد في الكرسي المقابل
رجاوي: سلمان خوش ولد محترم ما شاء الله عليه
احمد وهو يخزها بنظرته: ايه وايد محترم
رجاوي: تعرفه من زمان
احمد: ايه ليش
رجاوي: لا بس اسأل
احمد حس بالغيره من سؤال رجاوي على رفيقه سلمان
احمد: بس ترى راح يخطب عن قريب وحده من اهله وملجتهم باجازة الصيف
رجاوي: والله قالتها بتأسف ...ليت بعض الناس يكونون مثله ذوق
احمد شاف نظرتها ... بديتي تعجبين في الولد لكن ما راح تشوفينه انتي لي انا وبس وياويله اللى يقرب صوبك ( فج عيونه وانصدم وش هالتفكير اللى يا في باله .... )
رجاوي: اوكى عن اذنك شوي بقرا وطلعت كتاب من الشنطة اللى جنبها
احمد: طالع هذي ولا كأني موجود قدامها زين طيب انا اللى مفروض ما اعطيج ويه ... غمض عيونه
وصلوا لكامبريدج طبعا رجاوي وصلها احمد لشقتها قريب من الجامعه اما شقته كانت بعدها بشارع
***********
محمد كان يتمشى بسيارته ومر من الشارع اللى فيه اهل لبنى زوجته ..تنهد بقوة وما حس بروحه الا موقف سيارته قدام البيت
بالصدفه كانت سيارة وراه وقفت
شاف واحد نازل من السيارة
.....: السلام عليكم
محمد: وعليكم السلام
....: عفوا تبي شي الاخو.؟
محمد: بس كنت ابي اسلم على مساعد والاهل
....: حياك الله اخوي بس ما عرفتك ..من انت.؟
محمد: انا محمد بن فهد بن عبدالله..
مبارك: والنعم اخوي حياك اقلط
مبارك: انا مبارك ولد عم مساعد
محمد: حياك الله اخوي
محمد: الله يحيك ..دق الجرس الشاب
شوي وفج الباب مساعد اللى من شاف مبارك ولد عمه ويا مين ..مو معقوله محمد بعد هالسنوات كلها وش يابه لهنا
مبارك: السلام عليكم اشلونك مساعد
مساعد: هلا مبارك وسلم عليه حياك الله
محمد: السلام عليكم ..اشلونك مساعد
مساعد رد عليه بدون اهتمام: هلا محمد حياك عاش من شافك بعد كل هالسنين
محمد حس بالفشيله من كلامه ...
مبارك: الله بتخلينا واقفين على الباب
مساعد: اقلطوا حياكم الله
محمد تردد انه يخش حاس انه روح لبنى بعدها بالمكان
**********
يتذكر لما كان مره جاي عند اهلها بيرجعها البيت وهي فجت الباب
لبنى: اقلط حياك بعد هلي وناسي
محمد: احم احم ممكن لو سمحتي تنادين على زوجتي وحبيبة قلبي تقولين لها بنروح
لبنى: الله ما يستوي لازم تجي وتسلم على الاهل وبعدين بنروح
محمد: ومن قال انج انتى بتروحين
لبنى طالعت فيه: الله مو انت قلت الحين
محمد: انا قلت زوجتي حبيبتي انتي مين تطلعين..؟؟
لبنى: انا اطلع كلهم وبعد قلبك
محمد: فديت قلبي لانج انتي فيه.. ذبحتيني بكلامج الحلو يالله البسي عباتج بنروح
لبنى استحت من كلامه : طيب لوين
محمد: روحي انا بسلم على عمي وخالتي
لبنى: زين دقايق وبس
......
دخل محمد ويا مساعد ومبارك كان محمد كل ماله ساكت يسمع مبارك وهو يسولف مع ولد عمه اللى يرد عليه حس محمد انه فيه شي ليه مساعد شايل منه ليش انه ما قدر يتحمل يكون بنفس المكان وهاجر له كم سنه ..بس غصب عنه مو بايده
مبارك: انا استاذن الحين عن اذنكم
مساعد: بدري
مبارك: من عمرك بروح عند الربع يالله اشوفكم على خير وراح مبارك وترك مساعد ويا محمد
محمد: مساعد انا آسف
مساعد: آسف بعد كل هالسنين زين والله عرفت تجي وتعتذر
محمد فاجأه رد مساعد: مساعد انا اعتذر لانى ما قدرت اجي ولا مره هالصوب بس والله مو بايدي احس كأنه احد يقطع قلبي لما اوصل عند بداية شارعكم فارجع على طول
مساعد: حتى الاتصال ما كنت تقدر تتصل ولا تسأل
محمد: والله اتصلت كذا مره بس كله تلفونك مسكر مدرى ليه
مساعد: مو عذر وانت تدل رقم البيت اعتقد
محمد: وش فيك مساعد هذا وانا قلت بشوف مساعد بعد هالغيبه
مساعد: ما قصرت وهذا انت شفتني
محمد من سمع كلامه وقف على طول ما حب انه يطول بالكلام وياه
محمد: مدرى وش اللى مغيرك علي انا محمد مثل ما انا لكن انت تغيرت
مساعد: هه من سمعك صح مثل ما انت يكفي اللى جانا من صوبك
محمد لما سمع هالكلام رجع وجلس
محمد: وش جاك ... تبي تقول الحين اني انا السبب بموت ما قدر يقول اسمها بموتها الله يرحمها
مساعد: مو السبب بالعكس انت ريحتها واسعدتها لكن ما كنا نظن انه اهلك ما يعرفون شي عن سالفة العيال
محمد: وش دخلهم اهلي الحين
مساعد: ما سألت روحك ليه اهلك قاطعونا الفترة الماضية
محمد: اصلا من يومها ما يحبون يتكلمون عن لبنى الله يرحمها ولا عن شي .. لانهم يعرفون وش كثر كنت اتعب لما يمر طاري لبنى ...( آآآآه يا لبنى ذكراج ما غابت عن بالي والله العالم)
مساعد: ليه حتى ما اتصلت علينا ولا سألت طيب قول مساعد اللى اعرفه اسأل عنه
محمد: لما وصلت امريكا كملت دراستي ووالله حاولت اشغل روحي فيها ما حبيت انى اتصل بحد حتى الاهل هم اللى كانوا يتصلون ويدوب ارد عليهم وبس كل همي انى احاول انسى المي واحزاني بهالشي ..وغيرت رقم جوالي
مساعد: اها من كذا انا حاولت كذا مره اتصل بس يعطيني تعذر
محمد: انا ما جيت للبلد بعد السالفة سنتين كملت فيهم دراستي وطلبت من الوالد اني اشتغل وساعدني براس المال والحمدلله شركتي ماشي حالها
مساعد: ربنا يوفقك
محمد: بس تعرف والله اتصلت عليك مرتين يتعذر ومره انت ما رديت
مساعد: ما اذكر بس يجوز كنت مشغول ولما جيت لقيت لا يوجد رقم اكيد مكالمه دولية يعني ما راح اعرف الرقم اللى اتصل
محمد: وش صار ..؟
مساعد: بعد سنة من الموضوع اهلك عرفوا انه كانت لبنى مريضه بالصدفه لما كانت الوالده مع والدتك وخبرتها
بعدين بيوم لما جيت انا والوالد لعندكم جا ابوك وسمعنا كلام انه احنا ضحكنا عليك عشان تتزوج لبنى وانه عارفين انها بتموت وانه احنا السبب في ابتعادك عن اهلك وبيتك وانه كنا طمعانيين بالنسب ....شوف محمد صح احنا مو لدرجه غناكم لكن انت عارف حالنا الحمدلله عايشين احسن عيشه ومرتاحين لكن والله ما وافقنا على زواجك من لبنى الا عارفين انك انت فرحان بهالشي وانك سعيد وتبي اختى تكون لك زوجة مع العلم انه ما خبينا عليك حالتها
محمد كل هذا ساكت وهو يسمع الكلام: مدرى وش اقول لك والله يا مساعد انا غلطت صح وما حبيت اعلم اهلي لانى اعرف انهم ما راح يوافقون على زواجي بس هذي حياتي وانا اخترتها ماحد كان يدري باللى راح يصير ووالله العظيم ما اهتميت متى يصير لى او لها لكن ربك اراد وخذ امانته قبلي والعالم الله انى كنت سعيد ومبسوط لاخر درجه وعشت حياتي اللى كنت احلم فيها معها وانتوا ادرى بهالشي
سكت شوي محمد وبعدها كمل: لو اهلي اغلطوا عليكم فترى عندهم عذرهم كل الاهل كذا وهذا انا اعتذر لكم عن اللى صار وترى انتوا بتظلوا اهلي اللى مالى غنىعنهم وان شاء الله تظل علاقتنا مع بعض واكثر من الاول اللى راح فات ما نقدر نرجعه واحنا الحين عايشين
مساعد: تصدق محمد انا مو كل زعلي على اللى صار بس على انه خسرنا انسان شرواك والله ظني ابد ما خاب فيك وكنت اعرف وقلت لابوي انه اللى صار اكيد انت ما تدري فيه ولا راح ترضى فيه ابد
محمد: شوف ترى قول تم
مساعد: تم بس على ايش
محمد: طلبتك بكره غداكم عندنا الكل انت والاهل وابيك ما تردني انت قلت تم ترى
مساعد: بس محمد انت عرفت باللى صار اشلون تبينا بعد هالسنين
محمد: ما عليك وان شاء الله بيرجع كل شي مثل الاول .....
سلم عليه محمد وراح من عنده ...لاول مره حس محمد بالراحه انه قدر يواجه الالم لما يشوف احد من اهل لبنى
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك