رواية الدمع من عيني مترضفا ع الخدين ولا لقى مسعافي -13
ميثه : بطي احدر احدر وفكنيه من الصدعه يله
بطي: يالله الحينه انا سويتيني صدعه يام لسانين
ميثه تشهق : انا ام لسانين زين ما عليه بطوووووي بتشوووووووووف
بطي: شو بتسوين حضرتج
ميثه وهيه اتشد ع الحروف: ما يخصك يله داخل
بطي: ما بعطيج البيبسي
ميثه بغياض: شو يعني بموت يعني؟
بطي: لا ما بتموتين موته طبيعيه بتموتين من الغصه ههههه
ميثه ما سوتله سالفه وحدرت عنه الحمام عزكم الله رفعت النقاب وعدلت الجحال او نقدر انقول زادته وظهرت مره ثانيه لكنها ما حصلت بطي ( وهيه سوت هالشي بس عشان اتغيضه زود )
حدرت الكبينه اللي كانوا يلوس كلهم فيها
عمتها مديه : وينج انتي ليش هالكثر ابطيتي ؟
ميثه : عموه حدرت الحمام عزج الله
مديه : هيييه
بطي يالس ويتطالعها بقهر لانه لاحظ اللي سوته في عيونها
ميثه وهيه تفتر صوبه تطالعه بنظرة غياض بدون لا اتقوله أي شي .. ويلست حذا عمتها موزهعن الدريشه اونها ما تبا اتفوت أي منظر حلو
مر الوقت ووصلوا النمسا .. وحلوا كلهم من القطار .. وساروا للفندق مشي لانه الفندق كان وايد جريب من المحطه يباله بس 4 دقايق مشي
حدروا الفندق حطوا اغراضهم وحولوا مره ثانيه لانه الوقت كان بعده .. كانت الساعه 5 ونص العصر
ساروا كلهم جدا البحيره وركبوا فالقوارب وتم يتحوطون .. وعقب ما اشبعوا من الحواطه فالقوارب ساروا صوب الشارع اللي فيه محلات ومطاعم تموا فتره وردوا للفندق .. فليل ميثه كان ظاهره من السويت مالهم ( كان فيه 3 حجر وصاله ومطبخ وثلاث حمامات عزكم الله ) ظهرت سايره صوب سويت قوم عمتها وهو واجفه فالمدخل مال السويت .. كانت حجرة بطي بابها هب مسكر ملايم .. ميثه ما كان قصدها تتصوخ بس هو كان حسه عالي اشويه
بطي: فديت روحج لا لا ما ببطي اهنيه يمكن حتى ارد قبلهم البلاد .. هههههه وين اتشوفينيه ؟ خلاص ان شا الله اول ما ارد البلاد بنتفاهم على هالموضوع اجليه الحينه اشويه .. غناتي .. الحينه انا بخليج بسير ايلس مع هليه اوكيه ؟
ميثه يوم سمعته بيسكر .. اتحركت من مكانها وكانت توها بتحدر الصاله وقبل لا اتحدر شافها بطي
بطي في خاطره : لا يكون سمعتنيه وانا اتكلم ؟
مشى بسرعه وحدر الصاله .. اللي ما كان فيها حد موليه .. لانه عمته كانت تتسبح والثانيه في شقة عمهم اما اليده فكانت فالحجره اتصلي .. تم يتلفت ما حصل ميثه .. وشاف حركه فالبلكونه فظهر خاري
ميثه اول ما سمعت صوت حد يحدر .. افترت اتجوف ما كانت متغشيه .. اول ما التقت عينها بعين بطي
بطي انصدم بالدموع اللي كانن مازرات عينها .. وعرف انها سمعته
ميثه كانت تبا اتحدر داخل .. لكن بطي ما خلاها ووقف عند الباب
ميثه بصوت واطي : خوووز عنيه
بطي: هب خايز
ميثه: خوووووز هب كيفك
بطي: شو فيج ؟
ميثه : ما يخصك فيه
بطي: يخصنيه ويهمنيه
ميثه : هيه صح وايد يهمك .. خوووز
بطي واجف محله
ميثه : يعني ما بتخوز
اتقربت اكثر صوبه .. وحطت يدها عند جتفه ودفرته وطافت
بطي وهو منصدم من حركتها اللي ابدا ما اتوقعها : تعالي
ميثه ما ردت عليه وظهرت من الشقه سايره صوب شقتهم .. بغت تفتح الباب لكنه مقفول .. عرفت انه هلها ظهروا واكيد ساروا تحت يتحوطون
يلست خاري فالممر .. ظهر بطي من شقتهم يدورها .. وحصلها يالسه
بطي: ميثه
لكن ميثه سوت عمرها ما تسمعه وتمت صاده عنه الصوب الثاني ولا سوت له سالفه مووليه
بطي: ردي عليه
ميثه : .......
بطي: ممكن اتفاهم معاج
ميثه وهيه توقف من مكانها : هب ممكن وخلااااااص اوكيه تعرف شو يعني انساني ؟؟ اباك تنساني تنسى انه عندك بنت عم اسمها ميثه .. انا هذاك اليوم صارحتك بكل شي وخبرتك عن كل شي وهاي الخايسه اللي انته اتكلمها شكلك هب من اليوم ولا البارحه اتكلمها
بطي ما قال شي وخلاها اتكمل
ميثه : انا خبرتك عن كل لانيه ماعرف اجذب وقلت انك ولد عميه وما بلقى حد اخير عنك عشان جيه سويت كل شي عشانك وقلت ما عليه بصبر سنه عشانك .. لكنك انته ما تستاهل وانته من الحينه هب صريح معايه شو بتسوي بعدين ؟؟! الله يعلم !!
بطي: بس انا احبج انتي ما احبها هيه
ميثه : ما ايهمنيه هيه اللي بتنفعك هاي الحزه .. اتحبنيه انا واتكلمها هيه شو الفايده؟؟ قلت لك خلاص انساني خلاااص دور لك وحده غير ( وهيه شرا اللي تتمصخر ) ولا ليش اتدور تراها موجوده عندك اياها بتنفعك الشيخ بطي تسمع بتنفعك وايد
ما عطته مجال يتكلم ولا يقول شي وراحت عنه
طافن الايام وميثه مطنشه بطي ولا كنه موجود معاهم هب مسوتله أي اعتبار .. وبطي ميت هب قادر يتحمل جفاها كم مره حاول يكلمها كنها مووول ما تعطيه مجال
أول ما ردوا ميونج تم بطي معاهم يومين ورد البلاد
هاذيج الليله ميثه مانت يالسه فالحجره اتفكر فالموضوع واتكلم عمرها بصوت واطي: هه اكيد راد البلاد عشانها .. انا برويك يا بطي اللي بسويه
نشت ميثه من محلها .. بطلت الكبت وظهرت الها بيجامه .. بدلت ثيابها وانسدحت بترقد
ردوا البلاد عقب اسبوعين من الاحداث اللي طافن
في يوم من الايام قررت ميثه اتسير مع عماتها جدا قرية التراث .. سارت هيه ومعاها عماتها الاربع و حريم عمومتها هنتين وولد عمها راشد اخو بطي ( عمره 15) لانه صغير ميثه ما كانت تتغشا عنه ومعاهم وحده مصريه يعرفونها
اتحوطوا فالقريه ويلسوا ع السيفه يتطالعون الشباب اللي كانوا يلعبون بالجتسكيات
ميثه : يا حيهم انا ابا العب .. متى بس بروح العزبه
موزه عمتها : شو رايكم انسير فالطراد جدا يزيرة اللولو؟؟
ميثه : هيه نبا انسير شو ورانا ؟؟
نشوا كلهم ساروا جدا الطراريد اللي يودن اليزيره .. كانت ميثه واقفه عند الوارش تتطالع اللي يلعبون يو ثنينه عند السيفه قريب من ميثه .. خلوا سكوتراتهم ع السيفه وردوا يتسبحون فالبحر .. واحد منهم كان لابس لبس احمر .. يالس الا ويتطالع ميثه اللي كانت كاشخه هذاك اليوم .. كانت لابسه عباه على يدها من صوب الجتف لين جفها جيه خيوط بيض مسوايات شرا الدواير وفنصهم كرستاله بيضا كبيره حتى من تحت اليد لين نهياة العباه كانت مسويه شا هالدواير وكانت لابسه النقاب اللي ايي من تحت العيون ومن فوقه الغشوه لكنها كانت رافعتنها عشان تتطالع .. وكانت شاله شنطة ديور بيضا وتنورتها بيضا وفيها بالاسود
حولت ميثه صوب الطراد ركبت اول شي عمتها .. ومن عقب ميثه .. ناولت عمتها الكيمره وركبت بكل سهوله .. وقفت ميثه في نص الطراد كانت اتعدل الغشويه .. وهذاك بعدها يتطالعها ما شل عينه من عليها
افترت ميثه صوبه وردت تطالع عماتها اللي كانن يركبن فالطراد .. يلست ميثه وعطت ها اللي يتطالعها ظهرها .. ما كانت متقبظه لانها متعوده تركب الطراد
اول ما اتحرك الطراد
الريال الي كان يتطالعها : اتحملن اتحملن
صخ اشويه ورد يقول : اتيودن عن لا اتطيحن
عماتها تمن يضحكن عليه حرك الهندي الطراد اشوي اشوي
ميثه: جلدي جلدي كرووه باباه ( كانت اتكلمه بالهندي واتقوله دهديه اتحرك )
ساروا صوب اليزيره واول ما حولوا صلوا المغرب واترين القطار ايي واركبوا كلهم فيه .. كملوا ساعه وشي من يوم ودروا القريه .. ردوا مره ثانيه فالطراد صوب القريه .. وكان هذاك بعده يالس الا ويرقب ردة قوم ميثه .. ميثه ما انتبهت انهم موجود لانهم كانوا يلوس تحت ع السيفه وهيه يايه من صوب الفرظه وبتسير فوق عند القريه .. وهيه تمشي طاحت شنطة كيمرتها تحت ع الرمله
وهو لانه كان يتطالعها انتبه .. فز بسرعه ويا يشل الكيمره عشان يناولها
الريال: الشيخه ... اندوج
لكن قبل لا تاخذها من عنده انتبه انه كان مكتوب ع شنطة الكيمره اسم موقع
الريال: موقع شو هذا ؟
ميثه : موقعيه
الريال : ما شا الله
ميثه خذت من عنده الشنطه : مشكوور
الريال : ما يحتاي تتشكرين
سارت عنه ميثه .. ويوم وصلت فوق .. وقفت تمت اتصور قصر الامارات وسارت مع راشد ولد عمها اللي كان واقف يترياها .. لكنه ما انتبه للي استوا بين ميثه والريال لانه كان يالس يطفر بالهندي اللي كان يسوق الطراد
ردت ميثه البيت وهيه هب رايمه تمحي صورته من بالها
والريال ( حميد ) على طول حدر النت وفتح الموقع حصل ايميلها فيه فطرش الها رساله
لكن ميثه ما شافته لانها هالايام ما كانت اتروم اتحدر النت
وعقب ما مرن شهرين ع الموضوع هذا رامت ميثه اتحدر النت .. كانت تبا اتشوف شي ضروري فسمحت الها امها اتشغله
فتحت ايميل الموقع وحصلت ايميلين من ايميل غريب .. فتحت اول ايميل واللي كان مكتوب فيه
شو تتقعون حميد كاتب فالايميل ؟
وهل تتوقعون ميثه اتسويله سالفه واتكلمه ؟؟
و اذا اتطورت العلاقه بينهم شو تتوقعون نهياتها اتكون ؟؟
ارقبكم وارقب ردودكم ومثل كل مره اكيد ابا رايكم فالجزء
تحياتي وتقديري الكم
ويا مرحبا السااع
.. الجزء التاسع ..
فتحت ايميل الموقع وحصلت ايميلن من ايميل غريب .. فتحت اول ايميل واللي كان مكتوب فيه
::
السلام عليج
اشحالج عساج الا بخير وسهاله ؟؟
اسمحيليه الغاليه لانيه ضفتج عنديه بدون لا استأذن منج اول لكن انا من يوم ما ريتج قبل كمن ساعه ع السيفه وانا موول هب رايم اشلج من بالي وودي اعرفج اكثر .. ارقب ردج ؟!
والسموحه منج مره ثانيه الشيخه
فداعة الله
::
ردت ميثه بذاكرتها لقبل شهرين غمضت عيونها لانها في هالشهرين محد شغل بالها غيره
لكنها ما ابطت وانتبهت بسرعه .. وكانت متلهفه تبا اتعرف شو مكتوب فالايميل الثاني .. فتحت الايميل ما كان مكتوب فيه شي غير
::
لبيه يا لبيه روحي تلبي
في كل نبضي في شراين وعروق
مجنون شفتك شوفتك جننت بي
كن السما تحتي وهالارض من فوق
مرسال شوقك ياشتياقي لعبي
كأنك سرقت العقل ماعطيتني حقوق
ياليت تدري كم مسافات حبي
ماشفت حالي من محبتك مسروق
شرقي اشوفك وانت قبلت غربي
ماغيرك انته ذوق بعروقي يروق
اشتاق لك واشتاق شوفك بقربي
انته هنايه يابعد كل مخلوق
ان قلتلي مشتاق ريقي شرق بي
وش عاد حالي كيف صاير من الشوق
حبك حبيبي ماخذن كل حبي
امر عليه لو على قطع العنوق
::
شافت تاريخ الارسال .. وكان مطرش الايميل قبل 10 دقايق بس .. سكرت ميثه بسرعه هاي الصفحه .. وشغلت المسنجر .. ولقت طلب اضافه من ايميلات وايد لكنه كنسلتهن كلهن لين وصلت لايميله قبلته
تمت تتطالع صفحة المسنجر .. تترياه يبين الها اذا هو موجود ولا .. اتريت خمس دقايق ولا بين شي اشويه ولا يظهر الها انه حد دخل .. وكان حميد اللي داخل .. فتحت ميثه الصفحه بسرعه لكنها ما قالت شي اتريته يقول شي
حميد : السلام عليج .. مرحبا مليوووووون نور المسن والنت كله بوجودج
ميثه : وعليك السلام والرحمه يا مرحبا بك زود
حميد : اشحالج الغاليه عساج بخير ؟؟
ميثه : الحمدلله بخير وسهاله ربيه ايسلمك
حميد : عساه مديم هالحال
ميثه : اشحالك عساك بنعمه ؟
حميد : حالي من حالج الغاليه
ميثه : يعله مديم
حميد : هياج
ميثه : ^_^
حميد : وينج انتي من متى اعديبج وين ما اتحدرين ولا شي
ميثه : انا هب راعية نت وهالايام ماقدر احدر هليه ما ايعيبهم ولو انيه اتمنى اتابع موقعيه
حميد: يا حيج والله
ميثه : ريت الموقع ؟؟
حميد : هيه دوم الا احدر واتطالع تصويرج .. ما شا الله عليج شاعره ومصوره محد يروملج
ميثه : تسلم والله من طيبك .. بس اسمحليه انا ماقدر ابطي ع النت ولازم اظهر
حميد : انزين الغاليه ممكن اتكلم معاج دقيقتين بس ابا اعرف شي وعقب سوي اللي تبينه انزين ؟
ميثه : اوكيه بس دقيقتين
حميد: بتكلم بسرعه وبصراحه واتمنى انج تعطيني اللي اباه
ميثه : قول
حميد : الشيخه انا لا اعرفج ولا شي بس انا من يوم ريتج هذاك اليوم وانا هب رايم اشلج من بالي موليه واللي عيبنيه اكثر انج حشيمه هب شرات بنات هالزمان واللي باين عليج انج بنت عرب وجبايل واي واحد يتمناج .. وانتي دخلتي خاطريه اتمنى انج اتخبرينيه انتي من بنته ومن وين عشان اخلي هليه ايونكم
ميثه منصدمه من كلامه ولا عرفت شو اتقول
حميد : ليش صخيتي .. ادري انج بتستغربين من كلامي واسلوبي ومن حقج ما توثقين فيه بس والله وربيه شاهد عليه انيه اقول الصدق وانه ها اللي في خاطريه
ميثه : مصدقتنك ما يحتاي اتحلف
حميد ارتاح : ^_^
ميثه : انا بنت احمد بن ....... ال ..........
حميد : ونعم والله
ميثه : ينعم بحالك وانته منوه
حميد : انا حميد بن سيف بن ........ ال ........
ميثه : يا مرحبا بك
حميد : وعمريه 23 واشتغل في ...................... وانتي كم عمرج ؟
ميثه : انا 19
حميد : العمر كله
ميثه : هياك
حميد : عطيني رقم بيتكم وبخلي ختيه الحينه تتصل اتكلمج انزين
ميثه : لا لا وين مستحيل
حميد : خلاص برايه هب لازم انا متاكد انه هليه ايعرفونكم وان شا الله بتصرف
ميثه : ع راحتك .. المهم انا ظاهره الحينه
حميد : يعل ربيه ايحفظج
ميثه : ويحفظك .. مع السلامه
حميد: مع السلامه
ظهر من النت وسارت حجرتها وهيه مستانسه انها خلاص بتفتك من كل شي ومن الوضع اللي عايشتنه
وحميد على طول سار جدا امه وخبرها بكل شي وامه ما مانعت لانها اتعرف هل ميثه
فكلمت بو حميد فالموضوع .. وابوه وافق لانه يعرف يد ميثه والعرب كلهم يتعارفون
اتصلت ام حميد في ام حمدان وسلمت عليها
ام حمدان : منيه الحرمه ؟ اسمحيليه ما عرفتج الغاليه
ام حميد : ان سلامه مرت سيف بن ..... ال .......
ام حمدان : يا مرحبا والله
ام حميد : مرحبا بج زود الغاليه
ام حمدان : اشحال هلج وتواليج ؟
ام حميد: بنعمه ربيه ايسلمج الغاليه
عقب ما سولفن فتره طويله
ام حميد: الا بغيت اتخبرج متى نقدر ني جداكم ؟
ام حمدان : يا مرحبا بج الغاليه فاي الوقت بيت بيتكم
ام حميد : خلاص عيل ان شا الله بنييكم ورى باجر
ام حمدان : البيت بيتج الغاليه متى ما تبين
ام حميد : خلاص عيل بينا اتصال
سكرت عنها ام حمدان عقب ما سولفت معاها وهيه مستغربه من الموضوع وحاسه انه في شي فالسالفه
طافن اليومين ويا اليوم اللي كانوا بيوون فيه هل حميد .. من الصبح وميثه وامها يرتبن ويآمرن ع الطبابيخ وطلبوا معجنات واشيا وسويتات من المطاعم والمحلات
رتبوا كل شي وعقب سارت ميثه تتلبس .. لبست تنوره بيج وعليها دانتيل كحلي .. مع قميص لونه بيج كانت شارتنه من الطاير الاخضر من المارينا .. كان القميص شرا التنوره من ورى فيه بيج وعليه دانتيل كحلي .. وكانت حاطه أي شدو لونه بين الوردي والبيج ( لون طبيعي ) واتجحلت وحطت اشويه بلشر وقلوس لونه طبيعي ولفت شعرها وحطت فيه كلبات صغيره لونهن بيج وفيهن كرستال
واخر شي لبست شيله كحليه وفيه اشويه بيج ووردي
سارت مع امها تحت فالميلس .. ما ابطن يالسات ووصلن الحرمات ام حميد ومرت ولدها ( عليا ) و اخت حميد ( شما ) اللي معرسه اما خواته الثانيات فما ين
ايلسن الحريم وسولفن معاهم وعقب يتهم شيخوه ( اخت ميثه ) ويلست معاهم
ظهرت عنهم ميثه وسارت صوب حجرتها
فالميلس عند الحريم عقب ما سارت ميثه بثلث ساعه
شما ( اخت حميد وعمرها 20 سنه وكانت توها معرسه الا من كمن شهر ) : شيخه حبيبتي ممكن اتوديني صوب ميثه ؟
شيخه : ان شا الله
وصلتها شيخه صوب حجرت ميثه وردت مره ثانيه عند الحريم اللي كانن يسولفن
شما دقت ع الباب ودخلت : ما شا الله شو هالحجره الحلوه؟
ميثه وهيه تبتسم : عيونج الحلوه
شما : منوه مصممنها؟
ميثه : ممم انا
شما : قولي والله
ميثه : ههه والله من فتره بسيطه مخلصه
شما : ما شا الله عليج صدق صدق حلوه
ميثه : تسلمين فديتج كله من ذوقج
عقب ما سولفن فتره
شما : ميثه انا اليوم يايه اكلمج في موضوع
ميثه : .....
شما: الصراحه انا متولمه فيج لكن شو اسوي بحميد خويه حلفني اقولج
ميثه ما قالت شي مستحيه
شما: ممم اليوم امايه يايه اتخطبج لحميد
ميثه : .............
شما : والله لو اتشوفين حالة حميد من يوم ما شافج هذاك اليوم وهو متخبل حشرني حشره فديته وماله طاري غيرج .. اتمنى انج اتفكرين فالموضوع عدل لانه حميد حالف ما ياخذ أي وحده غيرج
ميثه انصدمت عقب ما قالت الها شما هالكلام ولا قالت شي
شما: انا ما بقولج شي عن حميد ولا بمدحه لانيه اخته لكن انتي استخيري ربج .. وانا مالوم حميد ما كنت اتوقعج جيه موليه كنت اتحراه يبالغ ولا شي وهو هب شايف منج شي غير عيونج .. لو يشوفج جيه مادري شو بيسوي والصراحه ما كنت اعرف انج انتي اللي هو يباج وانا شايفتنج كمن مره فالجامعه
ميثه : ما قالت شي بس ابتسمت الها
** اللي ما خبرتكم عنه انه شما كانت تدرس مع ميثه في نفس الجامعه لكن ميثه ما اتعرفها عدل شايفات بعض كمن مره بس
كملن سوالفهن عقب يت شيخه تزقرهن للعشا نزلن وتعشن .. وعقب ما خلصوا يلسوا ساعه وردوا لبيتهم مره ثانيه
فليل الساعه 11 .. يت ام حمدان عند ميثه وخبرتها انهم يبونها لحميد ولدهم .. وميثه ما قالت شي لامها ولا عارضت
ام حمدان : اشوفج صخيتي
ميثه : امايه اذا ابويه وافق انا موافقه
ام حمدان : خلاص عيل انا برمس ابوج واصلا نحنا وين بنلقى اخير عنهم وانا ادريبج ولد عمج انتي ما تبينه
ميثه ما قالت شي وامها اظهرت عنها عقب فتره نشت ميثه من محلها وسارت الصاله اتصلت في حمدان وسولفت معاه وخبرته عن اللي استوا اليوم
حمدان : فديتج ميثوه الريال انا اعرفه ولا ينعاب الشور شورج جانج تبينه وافقي واذا ما تبينه قولي انج ما تبينه
ميثه : انا رايي من رايك قول انته
حمدان : اذا عليه انا موافق
ميثه : اوكيه خلاص عيل شورك وهداية الله .. بس عنديه سؤال
حمدان : قولي غناتيه
ميثه : بطي راعي بنات وهالسوالف؟
حمدان : ليش تسالين؟
ميثه : بس ابا اعرف
حمدان : الصراحه هيه وانا ماباه ياخذج وها سبب من الاسباب اللي يخلني اوافق على حميد
ميثه : اها
حمدان : شكليه الا برد البلاد عشانج
ميثه : ودراستك ؟؟
حمدان : يالله ثرها ميثا كل يوم بتنخطب؟
ميثه : لا
حمدان : خلاص عيل
تمت اتسولف معاه لين يت امها وخذت التيلفون عنها وكلمت ولدها وقالت له انها باجر بتتصل فيه وسكرت عنه
فالليل الساعه 12 رد بو حمدان من الميلس .. وخبرته ام حمدان باللي استوا اليوم .. وبو حمدان ابدا ما بين انه هب موافق ولا عارض موليه
ام حمدان : انزين انته ما بتتخبر عن الريال واذا يصلح ولا ؟
بو حمدان : ما يحتاي اعرفهم عدل ما عليه قاصر ريال والنعم فيه واي بنيه اتمناه
ام حمدان : هاي بنتك وانته حر فيها
بو حمدان : خلاص انتي باجر المسا اتصلي وقوليلهم انيه موافج وخلي الرياييل ايون
ام حمدان :والبنيه ما بتنشدها
بو حمدان: مالها شور عقب اللي سوته انا بسوي اللي اشوفه صح
ام حمدان : الي اتشوفه
اليوم الثاني الصبح اتصلت ام حمدان في حمدان ولدها وخبرته عن الموضوع .. كانت تبا تتطمن اكثر
ام حمدان: حمدان انته اتعرفه ؟
حمدان : هيه امايه اعرفه .. تراه ريال وما يعيبه شي
ام حمدان : خلاص يعني ارد عليهم خبر ؟
حمدان : هيه ردي عليهم واول ما تتفقون ع الخطبه الرسميه خبرينيه عشان ارد البلاد بس خلوها يوم السبت عشان اقدر أيي يوم الجمعه البلاد احظر الخطبه وعقبها ارد لندن يوم الاحد فليل
ام حمدان : هب تعب عليك ؟
حمدان : امايه هاي ميثه اذا انا ما كنت موجود منوه تبينه ايي عشانها انتي اتعرفين غلاتها عنديه
ام حمدان : خلاص ع راحتك الغالي
سكرت عنه ام حمدان .. ويوم عدا المسا اتصلت ام حمدان في ام حميد واتفقوا انه الخطبه الرسميه اتكون يوم السبت الياي يعني عقب 5 ايام
بو حمدان .. خبر كل هلهم .. عشان يحظرون الخطبه .. و منهم اللي احتشر بالذات بطي اللي كان برع البلاد ساير يكمل دراسه
رد حمدان يوم الجمعه فليل البلاد ... وسار عند ميثه وبارك الها وتم يالس معاها يسولف ويغايضها
وحميد فرحته ما تنوصف موليه .. هب مصدق انه حلمه بيتحقق اخيرا عقب ما اتريا شهرين صح انهن هب وايد لكن بالنسبه له هو ما كانن شهرين بس كانن دهرين
يوم السبت ( يوم الخطبه ) عقب الغدا
كان كل حد فالبيت محتشر اللي يزهب واللي يرتب واللي يعطر ويدخن الميلس .. كانوا مسوين عزيمه للرياييل بس وبيسوون عزيمه للحريم عقب اسبوع يوم بييبون الزهاب والمهر
يو الرياييل وتمت الخطبه .. واتفقوا على انه العرس بيكون عقب شهرين .. ولا اتكلموا فالمهر لانه بوحمدان ما يهتم لهالاشيا موليه
ميثه من يوم ما ردوا هلها على قوم ام حميد .. امها ودتها صوب المصمم اتسوي فسات حق الزهاب لانها تدري انه ما شي وايد وقت
وافق يسويه الها المصمم خلال 12 يوم لانها من زمان اتفصل عنده .. سوالها فستان لونه بيج دانتيل وكله شغل باللون البطيخي والذهبي كان هاي نك بس بطريقه انه عند الحلج يكون مفتوح عشان تقدر تلبس عقد
يوم الخميس .. الساعه 7 المغرب
كانت راعية الصالون مخلصه ميك اب ميثه ويالسه اتسويلها شعرها .. رفعته الها ونزلت منه خصل فتم شعرها لين نهاية ظهرها ما يبين طوله الاصلي
كانوا مسوين العزيمه فالحوي .. لانه حويهم وايد كبير .. وامها اصلا كانت مكلمه المهندس يوم سووا الحديقه عشان يسويلها في نص الحوي ارضيه من الحجر وكلها ليتات حق العزايم .. وكان في نصها نافوره بس نافوره هب عاديه كانت حجر شرا الارضيه بس اللي يفرق انه فيها فتحتات يظهر منها الماي وحول النافوره حطو طاوله زجاج داخلها ورود بطريقه حلوه وع الورود زجاجه فيها اوراق شير منثر وعليها الذهب والعقود واكيد زجاجه فوقهن
كانوا حاطين بوفيه ع الطرف والطرف الثاني كل الطاولات والبدر الثاني مسوين شرا الكوشه الصغيره حق ميثه صح انها كانت صغيره لكنها وايد وايد فخمه ورقيقه في نفس الوقت
عقب ما خلصن الحريم واتعشن ( ما كانوا عازمين وايد ناس الا اهلهم والناس اللي وايد قراب منهم ) يابوا ميثه وهيه يايه كانوا حاطين قصيده كاتبنها حمدان لميثه وكان مسونها شله .. ويوم خلصت ابتدت قصيده ثانيه بصوت حمدان لكن هب هو اللي كاتبنها .. كانت كاتبتنتها وحده من العيايز ربيعة يدتها اول ما انولدت ميثه
ميثه يوم سمعت حس حمدان دمعت عينها لانه هب موجود فالبلاد سافر مره ثانيه .. يلست ميثه اشويه وروحن الحريم عقب ما شافنها ما تم حد غير هل البيت وعماتها وخالاتها وهل حميد امه وخواته وحرمة اخوه
سلموا عليها وروحوا
::
طول الشهرين وميثه من مصمم لين مصمم ومن محل لين محل ما خلت عباه ما فصلتها ولا خلت شنطه يديده فالسوق ما اشترتها .. كانت تاخذ كل شي يديد ومميز وحلو وفي نفس الوقت يناسبها
ميثه طول عمرها من يوم هيه صغيره ولازم يكون عندها من كل شي وايد .. امها من اول ما انولدت وهيه مبزيتنها من هاي الناحيه وحتى يدتها كانت دوم تنعتها بالزهاقه ( لانها اتحب كل شي غالي ومميز ولا يعيبها أي شي)
خلصت ميثه من زهبتها كانت امها مفظيتلها حجره من حجر البيت .. وكانت حاطتلها فالحجره معاليج حق تعلق العبي والجلابيات واللبسات اليداد والفساتين
كانت الحجره ممزوره اغراض بس رتبوهن بطريقه عشان يوم اين الحرمات يقدرن يشوفن كل شي
والحجره الثانيه كانوا يغيرون ديكورها حق الزفيه .. كانت مختاره ميثه اللون البيج كلون اساسي للحجره ومدخله معاه اللون البنفسجي والتركوازي والذهبي
طلعت الحجره من اروع ما يكون .. لانه ديكورها كلاسك .. فتامه جنها من حجر القصور الجديمه الفخمه
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك