رواية الدمع من عيني مترضفا ع الخدين ولا لقى مسعافي -11
ماقدر اتحمل هالشي موليه .. كنت خايفه
بطي رص ع يدها اكثر وخذ يدها الثانيه وحطها مع يدها الثانيه وتم ظامنهن في يديه
بطي: ليش حكمتي ع شي انتي ما اتعرفينه ؟؟
ميثه : بطي اقرب الناس اليه اقرب الناس عمرهم ما اهتموا انا عمريه ما حسيت بالاهتمام غير من اخويه حمدان وحمدان الحينه وين .. بعيد عنيه ماليه حد اهنيه
بطي: ميثه انتي مستحيل اتهونين عليه لو انيه ما اهتم عشانج انتي بييب كل الاهتمام اللي في هالدنيا بس لعيونج انتي
ميثه صخت وما عرفت شو اتقول بس تمت اتصيح
بطي: ودي امسح هالدموع اللي ما يهونن عليه .. ممكن ؟
ميثه ما ردت عليه وما مانعت هالشي
رفع بطي غشوتها لكنه ما ركز ع ويهها ومسح دموعها بيديه .. وميثه من الصدمه ما رامت اتقول شي
ميثه : بطي
هاللحظه صد بطي واتطالع ميثه .. صح انها كانت متحجبه لكن خصل من قصتها الطويله كانن نازلات ع ويهها رفع بطي يديه وخوزهن عن ويهها
بطي: امري عيوني لج ؟
ميثه : بطي ما جنا ابطينا .. عمتيه بتسويلنا سالفه
بطي توه انتبه مسكها من يدها ونزلها من الموتر وسكر الباب وراها .. ما كان وده يفج يدها بس غصبن عنه
بطي: ميثه والله ما كنت اتوقع انه شكلج جيه .. والله انه انحفر في داخليه ومستحيل تنمحي صورتج من بالي
ميثه ما قالت شي تمت تمشي وهيه موخيه لكن هالمره حذاه
بطي: هاي احلى ذكرى بتكون اليه وانا هب فالبلاد انا ورى باجر مسافر
ميثه : ليش ؟
بطي: بس بتخلص اجازتيه .. وانا ابا اتخرج شهر سبعه مابا ابطي
ميثه : الله يحفظك وين ما اتكون
بطي استانس على كلمتها هاي وابتسم
ميثه : بطي تدري انه خالتك اتقول انك تشبهنيه
بطي: قالت اليه
ميثه : هههه بس منوه احلى
بطي: اكيد انتي
ميثه : ههههههه ما بقول شي
اهنيه قب لا يوصلون الحجره باشويه يتهم البشكره وهيه تمشي بسرعه واتوجه كلامها لميثه : انتي وين روووح انا كل مكان مني يمشي دور دور وبطي قول انتي مافي مني راس مال انا دور
ميثه : هههههههههه
بطي: يعلنيه ما خلا
البشكاره وهيه اتكلم بطي: انته سو سوي ها ؟ قوول
بطي: جب يله مايخصج زين عاطينج ويه
اشويه ولا عمتها طالعه
ميثه دحت البشكاره بالخفيف وبصوت واطي جب ان نطقتي يا ويلج
العمه : بطي وينك انته وبنت عمك كل ها حق كيمره ؟
توها البشكاره بترمس .. بس هالمره بطوي ما خلاها ورمس بسرعه
بطي: ظاعن عنيه فالممر يمشن شرات الحمس شو اسويبهن
ميثه اتسير هياه : ما جنك انته الا اتقول مركب توربو .. اتطيييييير وانا ريت مكينة بيبسي قلت خلنيه اشتري
العمه: ياها البيبسي اللي ما اتيوزين عنه
البشكاره تمت تطالعهم بنص عين (( هب هينه هالبشكاره ))
العمه : يله يله هبابنا نوصل بوظبي .. وايد ابطينا .. احدروا سلموا عشان انروح
بطي: ان شا الله
حدروا داخل .. وايلسوا ربع ساعه ... وعقب نشوا كلهم سلموا وظهروا جدا بوظبي .. بس هاي المره كانت السياره حشره ميثه وبطي يتغايضون وعمتهم محتشره عليهم
العمه : وبعدين يعني .. وانتي يا ميثه شو ما تستحين
بطي: شو ثرني واحد غريب شو تستحي بعد ما باكلها انا
ميثه : هههههههههه يوم انك قلت ما تاكل يعني صدق تاكل لا لا خلاص ما يخصنيه فيك هب رامسه
العمه : لا اله الا الله
ميثه وبطي: محمد رسول الله
الكل ضحك الا العمه : هههههههه
العمه: صه صه مره اقطوعها الرمسه انتوا الثنينه .. انته سوق وانته صاخ وانتي تراج بتحوّلين اهنيه فالبر
ميثه : ابركها من ساعه جانكم بتخلوني فالبر ياللللله العوووووووق بيلس شعليه بموت يعني فليل باكل يراذي والنهار حمام وحلج شو فيها ؟
العمه : دومه ردج زاهب
ميثه : ههههههه اترومين ؟اترومين
العمه : انا اشهد انه محد ايروملج
بطي : شو محد ع كيفكن هو
ميثه : الحينه انته شوووه يخصك فالموضوع انا يالسه اكلم عمتيه ما كلمتك الشيخ بطي
بطي: كيفي انا اليه خص في كل شي يستوي فالدنيا
ميثه: يالله عليك مادري منوه جورج بوش وانا مادري؟
بطي: يهبي الهرم انا تشبهيني ع ها ؟
العمه : ردينا ردينا هب بسكم ؟
بطي: هيه اللي تبتدي انا ما يخصنيه
ميثه : هيييه رده كله عليه
بطي: ما رديته بس هذا هو الواقع يا بنت عميه
ميثه : بس خلاص مابا اتكلم معاك
بطي: يالله عليج يالبزيا
ميثه: عمووووه قوليله شي
العمه : انا الحينه ما يخصنيه انتي اللي يبتيه لعمرج
ميثه: بتشووووووووووف انته ان ما خبرتك عليك يدتيه انا براويك بخليها اتعلمك المذهب
بطي بخقه: هه بنشوف مع منوه بتوقف
صخوا كلهم لين وصلوا حدروا كلهم داخل البيت .. اما ميثه يلست اشويه معاهم ومن عقب ظهرت خاري ( كانت الساعه 12 ) هيه اتوقعت انه عمتها تمشي مع مرت عمها خاري لكنها يوم ظهرت خاري ما لقت حد كان الفريج مظلم .. وبيتهم قريب فقالت بمشي ورب العالمين معايه ما بييني شي .. مشت اشويه ما حست غير بيد تمسك يدها من ورى افترت بسرعه اتشوف
ميثه : حسبي الله ع بليسك
بطي: ههههه خوفتج؟
ميثه : لا ما اخاف بس اتحريت حد غريب
بطي: هههههه يهبي الا هو
ميثه : اشوفك وايد خذت عليه الحينه شو تبا
بطي: حشا بلاج انتي
ميثه : ما بلايه شي بطيي
بطي: يا ويلي .. تعالي ابا اقولج شي
ميثه : وين ايي بعد
بطي : الا اهنيه
ميثه : لا لا ماقدر وين شوف الساعه كم بروح البيت
بطي: دخيلك عشاني لا ترديني انا ورى باجر مسافر
ميثه : حمدان لو يدري بيذبحنا رباعه
بطي: دام انا رباعه برايه
ميثه : بطووي عن هالرمسات يله بروح
بطي: يالله اهون انزين خلاص اوقفي وبقولج وبعدين روحي
ميثه : هيه ويوم حد بيخطف اهنيه وبيشوفنيه ؟؟
بطي: خلاص احدري احدري حويكم
ميثه : انزين
حدروا الحوي من عقب الدروازه ع يمينها شي جيه تله وكلها حشيش .. بطي قبض يد ميثه ويرها صوب التله بس ما كانوا ينشافون لانه البشاجير يسكرون كل الليتات تقريبا فليل عقب الساعه 11
ميثه :بطي اخاف حد يشوفنا مابا
بطي: اتخافين وانا معاج عشان خاطريه قلت لج انيه بسافر
ميثه وهيه تتنهد ما اتعرف شو اتقوله وطبعا طول هالوقت كانت متغشيه عنه
بطي ير ميثه بالخفيف وخلاها تيلس .. وهو تم واقف مجابلنها
بطي: طلبتج قولي تم
ميثه صخت اشويه وبتردد: تم
بطي: عقي غشوتج اشويه دخيييييلج
ميثه تشهق : بطيي شو جيه حرام عليك
بطي: انتي قلتي تم
ميثه : افففففف
عقت الغشوه لكنها كانت منزلها عيونها ولا رفعتها .. مستحيه منه
مد يده بطي ورفع راسها
بطي: شوفيني
ميثه رفعت عيونها اشوي اشوي : همم ؟
بطي:
غمض عيونك حبيبي غمض عيونك ... بقولك لك شي .. بس .. اسمعني بقلبك
محتاج لك في حياتي ما اقدر بدونك ... أو بختصر لك .. وأقول: أحبك .. أحبك
مجنون بك أعترف لك صرت مجنونك ... لا الذنب ذنبي ولا ذنب الهوى ذنبك
لو كل هالناس بعيوني يشوفونك ... ان كان ذاب بغلاك العالم وحبك
أموت فيك .. وفوادي ينبض بكونك ... واوقف واحس بغرامي يمشي بدربك
وان جيت افكر في نفسي كني اخونك ... يا كيف افكر في نفسي دامني قربك
أحلف بربي .. أحبك موت وأصونك ... واحس أنا بنبض قلبك يحلف بربك
يا كل عمري خلاص .. وإفتح عيونك ... ما قلت لك شي .. واللي قلته لـْ قلبك
ميثه وخت ولا قالت له شي موليه
وبطي تم صاخ يترياها تنطق لو بحرف
ميثه بصوت واطي وهيه تتطالعه: بطي انته تستاهل وحده اخير عنيه
بطي: شو هالكلام وليش هالحزن اللي في عيونج ؟
ميثه: بطي انا بقولك الصراحه انا غلطت وايد وايد وهب اشويه وانته اسمع اللي بقوله واذا ما كنت راضي ع كلامي اظهر من اهنيه ولا اتقول شي مووليه واذا كنت راضي تم اهنيه اوكيه ؟
بطي: اوكيه قولي وانا اسمعج
ميثه : لا اتعصب عليه
بطي: ما بعصب
ميثه : وعد ؟!
بطي : وعد
ميثه : بطي انا اهنيه في هالبيت هب لاقيه الشخص اللي ممكن يفهمنيه ولا يحس باحساسي ولا يقدر من مشاعريه من استويت وانا هب لاقيه الاهتمام صح حمدان اقرب انسان اليه لكنه ما ايعوض حنان الام ما ايعوض اشيا وايده .. والاشيا كلها كانت قاصرتنيه ( واهنيه بدت تدمع عيونها ) بطي انا غلطت مره لكني ما بقولك هاي الغلطه انزين لانيه اعرف انها غلطه وماريد اسمع أي لوم او عتاب المهم عقب هاي الغلطه وعقب ما اكتشفوها هليه ابويه اغلى انسان عنديه قام يبتعد عنيه ويصدنيه ولا يكلمنيه وانته روحك اتعرف علاقتيه فابويه كيف قويه ... وغير ها امايه اللي عمرها ما التفت اليه ولا جد شافت شو في خاطريه ابتعدت اكثر عنيه وعمرها ما حسستني بالحنان عمريه ما حسيت بالاهتمام منها هيه يا بطي هالشي كان محسسني انيه بلا معنى في هاي الدنيا وفي الحزه اللي كنت احتاي فيها حمدان ومحتايه لقربه سافر يدرس وانا مستحيل ابين له شي بالعكس شجعته على انه يسافر ويدرس وهب بس ياخذ البكلريوس شجعته ياخذ الماجستير .. عقب ها كله تميت انا دوم احس بالوحده فالبيت لو انه امايه اتسولف معايه مرات لكنه ما يغني عن الحنان والاهتمام .. فدورت هالشي انا في مكان ثاني وما بغبي عليك انا كلمة واحد لكنه هب أي واحد يا بطي لا تتحراني بعق عمريه على واحد هتلي ولا من هاللوث انسان عمره ما غلط عليه ولا جد ريت منه شي شين او يعيبه والله لو انه بعيد لكنه عوضنيه عن كل شي لو انيه ما ارمسه كل يوم يا بطي انا اقولك هالشي لانيه ماريد اخدعك وماباك اتقول في يوم من الايام اذا اكتشفت هالشي روحك انيه انا غبيت عليك او سويت شي من وراك ( طول هالوقت بطي كان يتسمع وصاخ ولا قال الها شي ولا عصب كان هادي بعكس اللي اتوقعته ميثه )
يا بطي اتمنى انك تفهمنيه ولا اتلومنيه على شي انا سويته بس شو تباني اقولك ها كل اللي عنديه والحينه اتريا الرد من عندك
ها شو توقعاتكم ؟؟
شو بتكون ردة فعل بطي ؟
ارقب ردودكم واكيد ابا رايكم فالجزء
تحياتي وتقديري الكم
ويا مرحبا السااع
.. الجزء الثامن ..
ميثه : يا بطي اتمنى انك تفهمنيه ولا اتلومنيه على شي انا سويته بس شو تباني اقولك ها كل اللي عنديه والحينه اتريا الرد من عندك
افتر عنها بطي وعطاها ظهره ومشا بخطوات بطيئه صوب الدروازه شكله كان يوحي انه بيروح بس فجأه افتر مره ثانيه بسرعه صوبها
بطي: والله انيه بغيت اجفيج وبعدت هالكمن خطوه لكني ما رمت اكثر يا ميثه والله ما رمت انتي صارحتيني بكل شي ولا جذبتي بس في شي واحد ابا اعرفه
ميثه وهيه موخيه ودموعها لهاي الحزه ما وجفن: شو هالشي ؟؟
بطي: انتي اتحبينه ؟
ميثه : هيه حبيته ولين الحينه احبه يا بطي لكني انا هب ضامنتنه ماعرف شو اللي في خاطره هب شرط يقول كل اللي في خاطره
بطي: وانا شو بالنسبه لج يا ميثه ؟
ميثه : بطي انته ولد عميه وانا ماليه بد منك يشهد الله بغلاتك عنديه
بطي وهو يرفع راسها : فديتج بس ذبحتيني بدموعج ( كان يقول هالكلام وهو يمسح دموعها ) بس والله ما اتحمل اشوفج جيه
ميثه صاحت اكثر: بطي انا ما اتوقعتك اتسامحنيه وعمريه ما اتخيلت انك تغليني حتى كنت اتحراك بس جيه تبا اتخطبنيه لانه عمتيه تبا هالشي
بطي: لا والله هب بس جيه انا اولا بج وانا مستحيل اخليج لاي واحد غيري .. تبين اليه الموت هاذيج الحزه ؟
ميثه : لا والله يعل هالطاري بعيد عنك يا ولد عميه .. لكن هليه حتى ما شاوروني هاللي خلاني احاول ابين لهليه اني ماباك ولا اطيجك .. كانت هاي السالفه تذبحنيه انهم ايسوون كل شي ع كيفهم ( بعدها ميثه اتصيح )
بطي: انزين ممكن ما تهلين دموعج اكثر دخيلج طلبتج يا ميثه
ميثه : هب بيديه والله
بطي: ميثه ما ودي افارجج لحظه بس انتي لازم اتحدرين الحينه عن يدورنج ولا يتصلون بيت يدتيه ولا يحصلونج
مسكها من يدها ووقفها لكن وهو ما سكنها انفج حيلها ( اسوارتها ) وطاح في يده
بطي: هب رادنه عليج بخليه عنديه
ميثه : كل شي عنديه مره من صوبك ما يحتاي اتخبرنيه
بطي : ميثه اباج اتعرفين شي واحد قبل لا تروحين انيه انا اباج من خاطريه ولا ابا وحده غيرج ولو ماخذتج انتي مستحيل اخذ وحده غيرج اعتبريني ميت هاذيج الحزه
ميثه كانت كالعاده منزله راسها
بطي: احبج .. واتقرب منها هاي اللحظه ميثه رفعة عيونها بس
حبها بطي ع يبتها وغمض اعيونه وهد يدها والتفت عنها عشان ما ايشوفها
ميثه : اتحمل على عمرك يا بطي وانا ارقبك
بطي: وانتي مابا دمعه من دموعج ينزلن بسبة أي شي اوكيه
ميثه : ان شا الله
بطي : اترييني سنه بس
ميثه : من عيوني
وسارت تربع بسرعه داخل البيت .. بطي تم واقف محله يسمع صوت خطواتها لين حدرت وبندت الباب عقب تحرك من محله
حدرت ميثه البيت بسرعه ما تبا حد يشوفها واول ما وصلت حجرتها سكرت الباب واتساندت عليه وغمضت اعيونها .. ولا بطلتهن الا يوم سمعت دق ع الباب .. افترت وبطلت الباب
شيخه : ميثووه متى ييتي من الصبح اترياج الا ابتخبرج عن علوم العين
ميثه : فالج طيب بقولج كل شي بس تعالي باجر اليوم انا مابا اكلم حد موليه ممكن اتخليني ارقد لانيه تعبانه
شيخه : دخيلج ميثوه
ميثه : ماريد اعيد كلامي
شيخه : اليوم شكلج ترمسين جد خلاص برايج بخليج عسى بس ما تنحرق اعصابي لين باجر
ميثه : لا اتخافين ما استوا شي غريب اوكيه
شيخه : اوكيه باي
ظهرت شيخه عنها وحدرت ميثه غرفة الملابس وقفت جدام المنظره وتمت تذكر كل موقف استوالها اليوم مع بطي من يوم ما كانوا في بيت يدتهم لين المستشفى فالعين واخر شي اللي استوا من دقايق وهالموقف اللي وقفت عنده فتره اتفكر فيه
رفعت عيونها تطالع عمرها فالمنظره من عقب ما كانت حاطه يديها في ثبانها وفاجه جفوفها وتطالعهن كنها تحاول تستوعب انها هاي اليدين اللي مسكهن بطي ما كانت رايمه تتحمل هالوضع اكثر .. بدلت ثيابها وسكرت كل الليتات وانسدحت في فراشها واتلحفت بكبرها حتى راسها لحفته .. كانت شرا اللي تبا تندس عن شي
ميثه هب قادره اتفسر كل اللي استوا هب عارف شو اتسمي ها كله
ميثه تكلم عمرها: وخليفه كيف يهون عليه خليفه .. خليفه اللي ملك كل شي في حياتي ليش ليش ليش يستوي كل ها ليش شفت بطي وعطيته المجال وخليته يكلمنيه وغيره ليش يا ربي ليش ليش ليش ليش كل هالعذاب في حياتي انا ماصدق افتك من سالفه تظهر اليه غيرها شو اسوي يا ربي شو اسوي انا احب خليفه لكن ولد عميه بعد ما ايهون عليه اسوي الي كنت بسويه من عقب ما سمعت كل اللي سمعته شو اسوي يا ربيه ترشدنيه يا ربيه
حاولت ميثه ترقد هاذيج الليله لكنها ما رامت
اما بطي كان طول الوقت يالس خاري فالحوي .. يفكر في كل اللي استوا ويقول في خاطره صح اللي سويته ولا؟!
بطي في خاطره : انا ليش سامحتها ؟ ليش ما طنشتها وروحت؟؟ ليش رديت الها ؟؟ ليش انا هالكثر ماروم اتحمل فراقها ؟؟ لهالدرجه انا ضعيف جدامها .. لدرجة انها تخطي وبكل سهوله انا اسامحها ؟ انا اللي الكل يعرف عنيه انيه شديد وماداني هالحركات ولا احب اشوف الغلط ولا اقدر اشوف قصور فالحشمه اصخ عنها واسامحها ؟! بس في نفس الوقت هيه قالت اليه الصراحه وما غبت عليه اللي سوته وقالت اللي في خاطرها هل اقدر اجازيها عقب صراحتها بالزعل والصد والجفا شرا ما سوو كلهم
لا لا بنت عميه ما تستاهل هيه غلطة صح .. لكنها اعترفت بغلطتها هب انها انكرت وطنشت الموضوع ولا غبت كل شي عنيه .. وبعدين انا ماقدر الومها لانها ما لقت الاهتمام من هلها وتصرف طبيعي منها انا متاكد 100% انها تعبت نفسيا من وضعها اللي كانت عايشتنه .. الله يعينها ويصبرها والله ما اتهون عليه والله لو كانت أي بنت مكانها جان من زمان سوت شي بعمرها شي اكيد انه أي حد ممكن يطفر لو كان محلها
تم بطي يفكر فالموضوع ويعيد ويزيد فيه ويحاول يقنع عمره انه ما غلط يوم سامحها والحمدلله اقتنع
نهار ثاني نشت ميثه من رقادها .. وسوت شغلها اللي كانت اتسويه .. نزلت ميثه ع الدري وهيه شاله الصينيه وقبل لا توصل الدجه الاخيره اتعلقت الكندوره فريلها واتخرطفت وطاحت ع الارضيه اللي كانت كلها سيراميك تمت يالسه محلها تطالع مكان الطيحه
ميثه : انا قاصره طيحات .. شو هاليومين غاديه سكراب كل يوم والثاني اتعوّق
سارت ميثه بسرعه فوق وشلت الجريده ويابت الها قلم وورقه وتمت تتصل في مكاتب البشكارات مكتب مكتب طفرت من هاي الحاله ..اتصلت وكانت تسال كل مكتب اذا عندهم بشكاره موجوده فالبلاد وما حصلت غير هنتين وحده اندونيسيه والثانيه سيلانيه قالت الهم انها بطرش الهم الدريولي العصر ياخذهن ايربونهن كمن يوم واذا ما يازن الهم بيردونهن
عقب ما خلصت خبرت امها .. وامها ما مانعت هالشي لانها روحها تعبت من حالتهم .. بيتهم كبير ومستحيل يرومن ع شغله .. ميثه طول عمرها ما جد اشتغلت فالبيت دوم البشكارات يسون الهم كل شي لكن مع هذا ميثه كانت اتعرف اتسوي كل شي وحتى الطبخ اتعرف تطبخ لو انه عندهم طبابيخ بدال الواحد ثنينه
اتغدوا وخلصوا
وردت ميثه حجرتها ويلست ع الشبريه .. متربعه
هب عارفه في شو اتفكر بالضبط .. ولا من وين تبتدي .. حياتها كانت معتفسه من اولها لتاليها
ما ابطت وهيه يالسه جيه نشت من محلها وسارت صوب الصاله .. اتصلت في حمدان .. سولفت معاه اشويه وخذت علومه .. وسكرت عنه .. تمت يالسه محلها فالصاله
ميثه في خاطرها: افف والله ملل وان يلست فالحجره بتم اشغل بالي فالموضوع اللي مابا افكر فيه الحينه ماليه مزاج ... مممم ليش ما اسير اسوي شعريه بدال هاليلسه ع الفاظي .. بسويه كيرلي
حدرت ميثه الحجره وكملت طريجها لين غرفة الملابس .. بطلت السده وظهرت الفير وركبته ع الكهرب .. وشغلت المسجل ... حطت السيدي المفضل عندها .. كانت مسمتنه ظبياني ( على خليفه )
شلت ميثه الفير عقب ما حر .. وابتدت اتسوي شعرها وهيه متاكده انه ما بيتم كيرلي غير لساعه بالكثير بس قالت برايه بسلي عمريه
تمت اتسوي شعرها لين يا الوقت اللي كانوا لازم بيسيرون فيه لبيت يدتها .. ميثه كانت متردده اتسير ولا ما اتسير اتخاف ولد عمها يكون هناك وهيه ما تبا اتشوفه وغير جيه كان راسها وايد ايعورها لانها ما ارقدت عدل فليل
امها ما خلتها تيلس فالبيت لانهم كلهم بيسيرون .. ومحد بيتم معاها .. فسارت ميثه .. لكنها من وصلت هناك حدرت داخل ولا يلست خاري فالحوي معاهم اتخاف انه ايي عندهم لانه باجر بيسافر
تمت ميثه يالسه داخل البيت فالصاله .. عقب اشويه ظهرت يدتها من حجرتها ويلسن مع بعض يتقهون ويسولفن ..
وحده من ربيعات يدتها اتصلت في يدتها وتمت اتسولف معاها .. اما ميثه من شدة ويع الراس انسدحت ع الغنف نهاية الصاله وبدون لا اتحس غفت عينها
وهيه غافيه حدر بطي الصاله سلم لكنه ما انتبه انه ميثه راقده .. هيه كانت راقده ع ينبها و صاده صوب المسند وكان شعرها متناثر ع الكرسي وصاك الدعنه لانها كانت فالتنه اونه عشان ما يخترب الكيرلي
ميثه اول ما سمعت حس ريال .. نشت ويلست محلها وتمت اتلفت .. هاللحظه انتبه بطي الها وانتبه انه شكلها هب طبيعي شي فيها .. ميثه اول ما ركزت وشافته وقفت بسرعه وسارت داخل
اليده : اقرب بو سهيل اقرب فديتك
يلس بطي يتقهوى لين سكرت يدته عن صالحه ربيعتها
بطي: اشحالج امايه عساج الا بخير
اليده : الحمدلله بخير ونعمه فديتك اشحالك انته علومك؟
بطي:ايسرج حاليه الغاليه
اليده : ها متى السفر ؟؟
بطي: باجر لا خليت منج
اليده : الله يحفظك
بطي: بلاها بنت عميه ؟؟
اليده : بلاها؟
بطي: من ويهها حسيت انه شي فيها
اليده : هيه اتقول ما ارقدت عدل البارحه ومن اصبحت هيه وويع الراس رباعه
بطي: هيييه
اليده : وينها احيدها منسدحه اهنيه
بطي: يوم انتبهت وشافتنيه اربعت داخل
اليده : ههههه ما يندرابها وين سارت
بطي: حليلها خربت عليها الحينه بيزيد عليها الويع
اليده : ما عليك اكيد بتسير داخل بتكمل رقادها .. متى بترد البلاد ؟
بطي: ان شا الله شهر ثمانيه
اليده : هيه زين يعني ما بتبطي علينا
تموا ايسولفون مده طويله وسار يصلي المغرب ورد مره ثانيه يكمل سوالف مع يدته .. بس قبل لا يظهر بطي من البيت .. راح داخل .. تم يدور ميثه واخر شي حصلها .. طلع ورقه من مخباه كان مزهبنها من قبل .. شاف ميثه راقده وحاطه الشيله ع ويهها والحجره مظلمه اشويه .. راح صوبها .. كانت هيه هب مسكره جفها ولا فاتحتنه حطها في جفها وهوس اشويه على صبوعها عشان ما اتطيح الورقه .. وظهر من الحجره
ركب موتره .. وظهر من الفريج بكبره .. هب عارف كيف بيتحمل فراق ميثه من عقب ما شافها .. سار عند ربعه فالكوفي يحاول يقزر وقته بدون لا يشغل باله فيها
انرد لميثه اللي كانت راقده فالحجره .. حست بحد يشل الشيله من على ويهها يوم بطلت عيونها .. شافت احمد ولد عمتها ( اللي هيه مربيتنه ) ما صدقت انه ياينهم كانت صدق متولهه عليه من خاطرها فما انتبهت انه شي كان في يدها وبطلت يدها وشلت احمد ولوت عليه هو روحه ما صدق يشوفها تم خاتل وهيه لاويه عليه
احمد : تيته
ميثه : لبيييه
احمد ما قال شي بس باسها على خدها
ميثه : لا خليييييت منك فديت روحك انا ( وتمت اتبوسه ) حبيبي خشمك خشمك
احمد على طول خاشمها
ميثه : يا ويلي منك انته يعلنيه ما خلا من هالويه فدييييتك يا ربيه
يلسته في ثبانها .. احمدوه وهو يوخي يبا يشل الورقه الي كانت ع الارض مفروره .. هالحزه انتبهت الها ميثه فوخت تتناولها
بطلت الورقه اتشوف شوفيها
انصدمت ميثه على طول قرت الرساله
::
الغاليه .. بنت عميه ( ميثه)
غيرك في قلبي ما سكن شخص ثاني .. وما رام قلبي في غيابك يخونك
ميناك قلبي وانته اليه مواني .. ارسي على بحرك واهيم بفنونك
عانيت منك وانته مني اتعاني .. اشكي فراقك وانته تشكي شجونك
حبك حبيبي فالضماير كواني .. وكل الجوارح تشتكي من طعونك
لو باختياري ما افترقنا ثواني .. ولا عشت لحظه يا حياتي بدونك
الحال عقبك صار ناحل وداني .. لو شفتني بتسيل دمعة عيونك
في غيبتك اشرب مرارة زماني .. وقلبي وعقلي في غيابك يشتكونك
يبغون منك عطف ولا حناني .. عطف المحبه يعل ربي يصونك
ادمنت حبك واستحل بكياني .. ولا اقدر اعيش العمر لحظه بدونك
يا ميثه اتمنى انج اتقدرين حبيه .. شرا انا ما قدرت ظروفج وسامحتج لو انه غلطتج ما ينغفر الها يا ميثه لكن في وضعج انتي يختلف الشي ولا تتحريني ممكن اكون راضي لو كنتي مسويه هالشي وظروفج غير عن اللي انتي اتعيشينهن الحينه .. يا ميثه انا اخترت لج هاي القصيده لانيه اشوف انها اتعبر عن اللي في خاطريه .. اتمنى انج تسمعين الغنيه وتعدينها اول غنيه اهديها لج انتي .. يا ميثه ماباج اتضيجين بعمرج لو شو ما استوا واباج اتكونين قد الثقه اللي بعطيج اياها وانا ادري وواثق انج بتكونين قدها
انا البارحه طول الليل ما رقدت افكر في هالموضوع يا ميثه الغيره ذبحتنيه انا لو كنت ادري بوضعج ما خليتج دقيقه وحده لكن الله العالم انيه ماعرف شي عن الموضوع .. واتمنى انيه ما اخذلج من اليوم وساير يا ميثه
انا اعرف انه معدنج طيب وانج هب شرا كل البنات .. لو ما كنتي انتي جيه جان ما تعلقتج انا .. الطيب يبين من عيونج والصدق حتى يا ميثه .. اللي يخسرج انسان هب صاحي وخبيل
ما شا الله عليج انتي كامله والكامل الله .. واتمنى انه فيوم من الايام يكون اليه مكان فقلبج شرا ما لج مكان عنديه هب شرط كثره لانه حبي انا لج ابد ما له حدود وانا يكفيني لو انج اتعزيني وتغليني بس
ادري انيه طولت عليج بالكلام وايد .. بعيد لج كمن كلمه وباختصار
(( غيرك في قلبي ما سكن شخص ثاني .. وما رام قلبي في غيابك يخونك ))
فداعة الرحمن
بطي
::
ميثه ما كانت متوقعه هالشي موليه .. ربعت الورقه وحطتها في مخباها بسرعه عن لا حد ايي ويشوفها .. وشلت احمد وظهرت من الحجره .. وسارت خاري عند الحرمات .. وكانت تتريا اللحظه اللي بترد فيها البيت عشان تقرا الورقه مره ثانيه وتستوعبها اكثر
يلست معاهم لكن بالها ما كان عندها كان عند بطي اللي شغل بالها .. هب لانها اتحبه بس هيه مستغربه منه هيه كانت تتوقع انها يوم بتقوله الكلام اللي قالته هاذيج الليله توقعته يطنشها ويغير رايه فيها لكن للاسف صار العكس واتعلق فيها اكثر واكثر وهيه هب عارفه كيف اتخلص عمرها من هالموضوع اللي متعبنها وخليفه من كمن يوم ما كلمته
كانت حالتها شرا اللي معقوقه في طوي وهب لاقيه حل يخليها تظهر منه .. ما انتبهت ميثه الا يوم نش احمد من على ريولها
ميثه : احمديّه ( كانت تزقره جيه لانها تعتبرها ولدها وملكها هيه ) .. حبيبي تعال وين بتروح
احمد ركض وحدر داخل تم اشويه ورد مره ثانيه وفيديه صحن
احمد وهو يكلم ميثه : اناب ( عنب)
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك