رواية لنحيا الحياة بامل -2
بسخرية :مو أسهل من هاي الشغل وارخص
مدكلي شكد تكره نفسك انت حتى تأذيهة هشكل
ابني مراح اكلك (اقلك)اترك السجارة لا روح دخن بس وي التدخين حب نفسك
وتركته لا يعرف ما يقول
وغارت الكلمات التي قلتها في داخلي لانها كانت فعلا موجهة لي
فهل انا احب نفسي
*****************
لا ادري الى متى يبقى هذا الاخ عازف عن الزواج لاهو عاشق فيرتجي وصل لحبيبة ولا هو عاجزماديا ويرتجي وصل المادة , حياته متوقفة وكلمة لا لاتغادر فاه
ونحن واقعون تحت ضغط مطرقة الناس وتساؤلاتهم
صحوت على كلمة منى
همام :منى وين وصلتي
اجبته بصبر :يعني وين يم مناف واحوالة يعني محد يكدر يأثر عليه محد يحجي وياه شدعوه
اجاب بطريقتهه الغير مبالية :منى الي يريد يزوج محد يمنعه والي ميريد يزوج محد يجبره
هذا اني كدماج عشت بعد وافاة المرحومة 5 سنوات وي اطفالي وحدنة وخواتي على قد ميكدرن يساعدن
ابدا ما فكرت ازوج وهن ابدا ما ملن حجي بس ترة مو حجيهن هو الي خلاني ازوج
لا
اني اختاريت ازوج بعد ما قررت ازوج وحددت شنو اريد بالضبط من الزواج
كنت اصغي له بروح شاردة لو اصغيت له اكثر لوضعت معول على ما بينت وحطمته
اجبته : بس بالنهاية ازوجت هذا اذا ماكنت في حالة زواج دائما حتى قبل لاتتزوجني
لان اني بالنسبة الك ام اطفالك واخت وشريكة حياة
اجاب بضحكة رائعة :مو هو هذا الي ردت بالزواج ردت شريكة افكار الا زوجة الفراش مسألة يمكن واحد يدبرهة (بمعنى سهلة )اما شريكة الافكار صعب الواحد يلكاها (يلقاها )
ثم ركز نظره على استكان الشاي وقال
احيانا ً اشعر اتجاهك بتأنيب ضمير هل ظلمتك بهذا النوع من الزواج لو جان القرار بيدج جان قبلتي مثل هيج زواج
زين قبلتي ليش؟
لان هاي الوضعية مريحة بالنسبة الج الف فكرة تجي براسي بيني وبينج امحيهة لان اشوف نفسي سعيد وانتي هم سعيدة
عندها قاطعته :همام احنه من البداية كان اتفقنة انو احنه نعيش خوان ليش تقلب اوراق قديمة
انت ما فكرت تزوج الا بعد ان قررت نوع الزواج الي يريحك وانته تعرف ظروف قبولي بالزواج الا اني جنت (كنت) رافضة الزواج كمبدئ بعد وفاة سلام الله يرحمه
يعني على كولتك (قولتك)المهم احنه سعيدين واهم شي صحتنة بخير لايروح فكرك لبعيد
ليجيب بتساؤل يطرحه بين فترة واخرى :منى اذا في يوم ردتي تغيرين حياتنا اني ماعندي مانع
عندها لم اتملك نفسي وضحكت من اعماقي :همام البارحة اكيد شايف حلم موزين
روح يمعودة الله يسهلك
ثم اردفت بقولي :بعدين اكو شغلات عمرها متكون مخطط الها لانها ببساطة محكومة بمشاعر مستحيل نقدر نمثلهة
همام حبي راح أتاخر اومأت له بأشارة بيدي وارتديت عبائتي وتوجهت الى مدرستي
ابعد زواج اول دام 6 سنوات وزواج ثاني دام 7 سنوات يريد ان اكون زوجة بكل معنى الكلمة ويكون الوضع من اختياري وانا من اقرره
ضحكت على نفسي من نفسي
لا يهم انا فعلا سعيدة ووجود فحل في حياتني لا يضيف لسعادتي شيئا
على الاقل على حد علمي
**********************
انظر الى الجدران فتترائا لي صورته
هنا جلس وهنا اعتكف بصمت وهنا أسمعته مختلف الألفاظ وصمت
وهنا نفثت بوجه سموم الماضي فتجرعها وخرج
ذكريات ذكريات كلها اريد منها ان تلوذ بالفرار وتأبى الانفلات وتحكم الأغلال
كيف أخرجك من رأسي وإنا من أقيد ذكراه فيه
لماذا لم اسامح؟
لماذا لم افتح صفحة جديدة عندما اراد ان يفتحهها ؟!!!!!
لماذا ولماذا الالف الصور تزورني ومليارات الحلول تلوح لي
وبالنهاية اكتشف انها كلها سراب لايمكن تطبيقه على ارض الواقع
الفهم برداء حزن اريد ان أعوض فيه عن قسوتي معه
فأقسو ا عليهم وتكون أمتداد لقسوتي عليه
الاهي منك ارتجي الفرج فلقد سئمت ما يحوي رأسي
امرأة بالعدة انا الناس تزروهم الأشباح بالمساء وانا تزورني الأشباح عندما تنبلج شمس الصباح بضيائها ويخلو البيت من سكانه وأبقى أتوسل رنين الهاتف
الذي يأتني منقذا من قبل ام علي
وجاء المنقذ بموعده في الساعة التاسعة صباحا
فتحته مباشرة لانه لا يبارح يدي لاهو ولا مسبحتي وكأني اجد بهما الأمان وهما فعلا اماني
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
فاصل إعلآني ^_^ / ..
لا احلل مسح اسمي مع على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
جائني صوت ام علي وهو يقول :صباح الخير اشلونج اليوم
اجابتها :الحمد لله والشكر الله يفرجهة من عنده
لتجيبني كعادتها مؤنبة لي :تدرين صدمتيني ما جنت اتوقعج تنهارين من يموت ماجد
شنو قصتج كوليلي (قوليلي) يعني على الناس وكلنة ميخالف الناس تريد مظاهر وتريد ناس ادك وتلطم بس عليه شنو القصة
اجبتها بأنكسار لم تعتده روحي :ما ادري شنو قصتي ما اعرف شنو أجاني بس افكر بيه بس يجي على بالي حتى سفرتنة اول ما ازوجن لسوريا بكل تفاصيلهة اول مرة تزورني
ثم قلت بجزع على روحي :
اني احزن على ماجدد هشكل!!!!!!!!!!!
ولج ما مصدكة روحي ليس دا اسوي هشكل ليش منغصة على ابني وبتي هشكل ليش وليش
كلهة اسئلة بلا اجوبة
كوليلي شسوي بروحي
مليته والله مليته هاي الروح
وبدأت العبرات تنسكب والروح من الداخل تتمزق
ليتاني صوت ام علي قائلا :تعوذي من الشيطان الله يرحمه وروحي اقري قرأن
اجبتها بأنفاس متقطعة :كليلي لو ما مدخلة الكبرياء بحيتنة جان عشت حياتي سعيدة ؟؟
هاجر اني عمري ما عشت حياتي ما عشت السعادة حياتي كلهة كضيته(قضيتها) واني افكر ماجد يضحك عليه ويستغل راتبي انا 30 سنة مزوجة وصار 20 سنة اني وماجد ياريت اكدر اكول خوان لامو خوان احنه كنا اعداء
لا اني جنت عدوتة هو ما جان يحجي
لا هو جان ميحبني ويحب اطفاله فلوسه كلهة لبيت اخوه
لاا
لتقاطعني قائلة :كافي انتي متملين رجلج راح وخسرتي شبابج وحياتج وسعادتج الزوجية كافي بعد عيشي حايتج ام وجدة وانسي سامحي سهاد جربي مرة وحدة اتسامحين بحياتج انتي عمرج ما سامحتي احد كل وحدة تختلفين وياهة تجنبيه عمرج ما منحت نفسج فرصة للتسامح
جربي اتسامحين وابدي من نفسج وسامحي نفسج
كافي رحمي نفسج
لم استطع ان اجيبها
ولكني اكتفيت بقول :مع السلام كعادتي
توجهت الى حيث ركني الذي اجلس فيه الذي يبعد بعددة أرائك عن ركنه الذي اعتاد الجلوس فيه
وفتحت صفحات كتاب النور القرأن الكريم
لتكون مخلصي من وساوسي ومهدئا لثورة ذكرياتي
******************
اراقبهن وهن يتهامسن ابنة اختي وزميلتها شابتان في اول تعين لهما يرفلن بالنشاط والحيوي وحب التعلم والتعليم كما انا فخورة بهما
حسن اخلاق زاد جمال الشكل وترتيب المظهر
اقتربن من الاريكة التي اعدت الجلوس عليها
اقتربت ابنة اختي وهي تدنوا من اذني قائلة :خالة سؤدد تريد تاخذ رأئيج بموضوع وتستحي
التفت الى تلك الصديقة التي تسورت بصمت خجل :سؤدد لاتستحين خالة انتي مثل منار
كليلي شتردين
ثم قلت بمرح: اخاف تردين اسدلج شاغر ترة من عيوني ادليلي
لتجيب بضحكة :لا ست منى اني اريد استشريك بشغلة بس والله مستحية
اجبتها بمرح :اذا مستحية روحي الله يسهلج الي يستحي اتروح عليه النصيحة
اجابت بتوتر :اكو واحد متقدم الي
لا ادري لما شعرت بالحزن والفرح معا الحزن لتلك التي تراقب صديقتها بعيون مرحة وهي لا تعرف ما يدور حولها
وبفرحة لان سؤددفتاة تستحق كل خير
قلت :ماشاء الله .الله يتمم بالخير
اجابت بخجل :ست اني مترددة
عندها قلت قبل ان تتفوه بكلمة :شوفي منار الزواج خطوة اذا ماتكون فيها اضافة الج لاتقدمين عليه
رئيت الحيرة والارتباك في نظرها
عندها قررت ان أزيل حيرتها واقلل ارتباكها
فقلت :شوفي سؤدد البنات من يفكرن بالزواج بس يردن يزوجن وبس واهم شغلة شكل الرجل وفلوسه واخر شغلة اتهمهن اخلاقه
بس والله يا سؤدد اهم شغلة الاخلاق الفلوس تجي لان الرزق بيد رب العالمين مو بيد البشر
والشكل بالعشرة ينتهي ويصير براد بيت مثل شعبان عبد الرحيم
لتنطلق ضحكات الفتيات
اجبتهن بمرح :ها منو عجبجن شعبان لو براد
لتجيب منار :لا خالة عمي همام عاجبنة اكثر
اجبتها :ابن عمج انتي اولى به
لتجيب بعد ان وضعت يدها على كتفي :بالعافية عليج صاحب الطول الفارع شطبة الريحان
ضربتها على يدها التي تحيط كتفي :تتغزلين برجلي كومي ولج
كانت نظرات سؤدد تراقبنا وعيون هيام تحدق بكل مايدور حولها
لتخرج سؤدد من خجلها بقولها :هو اخلاقه زينة بس احولهم المادية اشوي تعبانة وهو موظف وعنده امه واخوه لازم يصرف عليهم
اجبتها بثقة :تدرين شنو المشكلة احنه عمرنه ما نظرنة للاشياء وقلنة خير من الله دائما ننظر انو الشي ميكفي ونبني افكارنة على هذا الشي
في حين خير رب العالمين يكفي كل مخلوقاته وكرم فاق حدود الكرم
بعدين
قول رسول الله صلى الله عليه واله وسلم { خذوهم فقراء يغنيهم الله من فضله }
اعتقد معنى الحديث واضح
احنه لو بس نبطل نفكر بالقليل ونفكر انو كلشي بحياتنة خيره هواي جان حياتنة ادغيرت
لتدخل هيام بموضوع لم يأخذ رأيها فيه احد كعادتها التي لم تكف عنها
هيام :شوفي زنكين (غني) واخلاقة زفت احسن من فكر(فقر) واخلاقه زينة
على الاقل الفلوس اتضيع سوء الاخلاق بس الفكر يتعس الاخلاق ويضيع الحب ورى اسبوع من الزواج
الحمد لله ان الجرس اعلن عن قدوم الحصة التالية لأتخلص من تلك المناقشة التي لاجدوى من الخوض فيها
سوى قلقلة في الرأس
أستغفر الله واتوب اليه
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
فاصل إعلآني ^_^ / ..
لا احلل مسح اسمي مع على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
سبحان الله والحمد لله ولا اله الا الله والله آكبر
الجزء (1)
اقلب الجمر وأحرك الهواء حوله بقطعة كارتون سميكة لكي يزداد اتقاد الجمر ويستوي لحم السمك الذيذ
بطريقة شواء يبرع العراقيون بها
انه السمك المسكوف الذي أرى تأثيره واضح في عيون من تراقب استوائه
يراقبون وأنا أراقب تلك الزوجة الصديقة التي تختلي بها أختها زوجة عمي كل أسبوع في حديث أجدها تطرق رأسها فيه بين حين وآخر
وتارة تنظر اتجاهي بنظرة أغظ الطرف عن تفسيرها
كنت في أول الزواج ترهبني هذه الجلسة ام اليوم فأصبحت روتين أسبوعي او شهري لا يعني لي شيئا
سوف تنعتوني بالأناني تمهلوا قليلا
هذه رغبتها فهي من عزفت عن الزواج وقالت القلب ملكه واحد وأخذه معه الى مثواه الأخير
وكل الرجال بعده إخوتي
عرفت عنها هذه الجملة فسارعت بخطبتها و وهبتها حرية القلب والجسد لتبقي ذلك الذي تحت الثرى بين أضلعها ويبقى جسدها مخلصا له
فهل انا مخطئ في تحقيق رغبتها
هذا المفجوع لا يكف عن الثرثرة
هو يلح كعادته
على :ابو خالد مو ترستنة دخان يمعودة كافي اتهف ارحمنة راح ننكتم من الدخان وننسة طعم السمج
هذا المفجوع دائما
ما ان يأتي من صلاة الجمعة حتى يفقد عقله أمام مائدة الغداء ويفقدنا صوابنا من كثرة سؤاله متى ينتهي الغداء
أجبته بامتعاض :علي دخيل الله ودخيلك مو كل أسبوع هاي الاسطوانة يستوي السمج ودولمة امك وانخليهم (نضعهم)فوك (فوق)راسك واسبح بالأكل الى أن تشبع
اجاب :ابو خالد أعصابك عيوني هسة يستوي وتكلون (تقولون) انتظروا مناف ومناف ورى الصلاة يقرأ سورة الكهف والبقرة يالة يجي
الله يهدي ويغفرله ويصبرنة على الجوع
همام بنرفزة :اكلك(اقلك) هذا خالك ما ادري شنو قصته و لوين(الى متى) هشكل وضعه مؤمن النهار عاصي الليل هو لو هاي لو هاي
اجاب علي بأعتراض كعادته :لاااا ابو خالد عوفه (اتركه) بلكي (لعلَ) في يوم من الايام الصلاة تهدي والقرأن ينور كلبه (قلبه)خالي خوش انسان تدري اني عمري ما سمعتة حجة على احد لو جاب طاري احد حتى من نسافر عيونة ميشيلهة على البنات
نظرت الى هذا المعجب بأخلاق خاله
وقلت :اكلك(اقول لك) رحمة على ذاك الابو الطيب كافي تمدح بخالك هسة تسوي احسن واحد بالعالم وهو تجيه بالليل اتشوفه حالة حال الحيوانات لا وعي ولا شعور بهيمة
بعدين محد يعرف مناف بكدي(بقدي) يعني كل الي ذكرته اعرفه ماكو دعي تكتب بيه قصيدة
أجاب بعيون غاضبة :ابو خالد كافي ترة اذا فتشنة(بحثناعن) العيوب هسة نطلع بيك اكثر من البيه
خالي الي بيه مرض الله يشفيه منه المهم هو يحاول والله يسهل امرة
وحتى من يشرب يقفل بابه عليه حتى لا يأذي غيره
اجبته بأعتراض :صح ميأذي غيره بس شوف وضع امك وشوف وضع منى وحدتهن تطلع روحه الى أن يطلع الصبح ويدكن عليه التلفون حتى يطمأن عليه ميت لو عدل
با الله هذي مو اذذية
لم يجب
رئيت نظراته تتجه باتجاه باب الرئيسي
فعرفت سر قوله :كافي بعد
اجبته :اج البعبع
دخل مناف بطول فارع وبهيئة مرتبة وبعطر يفوح من على بعد امتار طوال
قال :السلام عليكم
ردننا بصوت واحد :وعليكم السلام
ذهب ليحظر مقعد يجلس عليه
ونحن نراقبه بصمت
وما أن جلس حتى قال علي :الله بالخير
ليجب بصوت عميق :الله بالخير (عادة عراقية يتبعها الرجال )
ليقول :شكلكم جنتوا (كنتوا)مندمجين وقطعت عليكم
اجبت بثقة :لا والله جنة نحجي عليك
ليرمقني علي بنظرة مؤنبة تجاهلته هذا ما ينقصني
اجاب :احسن تخفيف ذنوب كثروا من الحجي عليه
ليقول علي بطريقة فكاهية مدافعة :خالي اني ما احجي عليك لو اموت
ليجب بلا مبلاة :خالي احجي كل مدفوع الثمن بالآخرة
لا يوجد من لايهمه ان تتكلم الناس عنه مثله
اجبته بحدة :انت االوين(الى متى) تظل على هذي الوضعية
اجاب :الى أن ربك يفرجهة
اجبت :انت فرجهة على نفسك وربك يفرجهة عليك رجال صار عمرك 45 سنة وكاظيه عبادة بالنهار وعربدة بالليل
الوين (الى متى) تظل على هذا الوضع وخواتك عايشات ارهاب تالي الليل يخاف يصبح الصبح وانتة ميت من السم الي تطفحه
كانت نظرات علي مرعوبة من كلامي
اما وجه صاحبنة فلقد تحول الى قطعة صفراء ما أن ذكر اسم الموت امامه
فهو يعيش برعب اسمه الموت وهو سكران
ليقذف بالكرسي وهو يقول غضبا :شنو القصة ترددون اتسون الاكل زقنبوت اليوم
اجبته ببرود كبروده :لا على شنو اكعد ونغير الموضوع كم خال للولد عدنه
ليجب بطريقة يبدع بها :والله من اصير خال ولدك عود كول خال الولد
لنتبادل نظرات يعرف كلانا معناها
****************************
اعرف جيدا نظراتها هي تنظر الى الجزء الذي لا تمسه يدي
لو قلبت البيت رأسا ُ على عقب لما نظرت الى الجزء النظيف لقلبت البيت بعدي بحثا عن ذلك الجزء الخفي الذي لم تصل اليه يدي
هكذا هي حتى مع والدي رحمه الله
كانت تنظر للجانب المقصر عنده فقط
عشنا في بحبوحة مادية يحسدنا الناس عليه في ظروف اكل العراق فيه تراب الارض ونحن كنا نأكل الذ ما تنبت الارض
كانت لاتنظر الى هذا الجانب بل تنظر الى ماكان يجود به والدي على بيت اخيه المتوفي
وتحرص على راتبها من عين والدي ابن العائلة التي تشتهر بغناها
ومنعت نفسها من اخذ المال منه حتى لايأتي يوم ويطلب المال منها ان نفذ ماله من اجل اهله
هذا كان تصورها ولم يحصل هذا ابدا
هاهو ذهب الى خالقه وترك خلفه أموال وأملاك لاحصر لها نحن فقط ورثته فيها
اما ارثه الشخصي لها
ندم يشع من عينيها والم يتجسد في تصرفاتها التي تؤلمنا نحن سكان المنزل
اعرف بأن عينيها تراقبني وانتظر بشغب ملاحظاتها
ليأتي صوتها يقول
سهاد :ماما سنا شوفي التحف الي بالمعرض صار فترة ما نظفتيهن
حسننا لألبي لها كل ما تريد دون نقاش
سنا :حاضر ماما هسة اسويهن
وفعلا توجهت الى حيث المعرض وبدأت بالتنظيف
هل تعتقدون سوف ينتهي الامر انتظروا قليلا
سهاد :مصرف البيت اني راح اتكفل بيه من راتبي وكل الي يجي من اجارات نشتري بيهن أملاك
هل سمعتم بمن يبحث عن تعبه ان لم تسمعوا فأنا أخبركم انها امي
اجبتها بهدوء :وليش هشكل نتقاسم كل شي بالشرع ونخصص جزء من أجارات المحلات لمصرف البيت وبنفس الوقت نطلع صدقة لبابا
ماما راتبج حقج الشخصي ليش تصرفي على البيت ماما سافري روحي عمرة ماشاء الله خالة ام علي وست منى دائما يرحون بس تخلصين عدة روحي وياهم وعمي همام ميقصر
هو يعزج لخاطر المرحومة خالتي
كان امتعاض معالم الوجه جوابها
هي لاتريد ان تسمع مثل هذا الكلام تريد ان تكون مظلومة ومجني عليها لاتريد ان تكون في موقع تكون فيه غير مظلومة
اجابت بحدة متوسطة سوف تثور بعد دقائق حفظت الخطوات صم
سهاد :انتي ليش كلما احجي لطيتيني على حلكي (بمعنى اسكتتني )
اني امج مو انتي امي حتى اذا عمرج 25 ابقى امج وكلامي هو الي يمشي
بعدين شنو هذا موديل السفر الي كل ما احجي كلتي سافري ليش ابوج مات اني افتر بالدول
تعوذت من الشيطان وقلت :ماما انتي على عيني وراسي والي ترديه يصير
ماما اني ماكلت(ماقلت) تفترين بالدول واذا افتريتي ياماما عيب لو حرام الواحد بحشمة وشرف وين ميريد ايروح ايروح
لتتحول الى مرحلةالغضب فوق المتوسط وتقول :لا عيب بنات الاصول مو تخلص العدة يسافرن يبقنة بيتهن وبحشمتهن سنة سنتين هو هذا الحزن
لتنطلق الكلمات من فمي دون شعور :ماما هذا باي شرع يا امي رب العالمين ميرضة بهيج شي
لتجيب بحدة :هذا شرعنة احنه ميعجب وحدة مثلج لابسة التراجي والمحابس ولا جن ابوج صار اله اسبوعين من ميت
اجبتها بهدوء :ماما هاي السوالف ما اله علاقة بالحزن ودخليج لاتخلين افتح مواضيع ما اريد افتحه
تدرين ماما شنو المشكلة
المشكلة انو احنه ما عدنه مشكلة ناس مات ابوهم الي يحبهم وميحبوا وخلفلهم ملاين بلا عد
وتدرين شنوا تذكروا هسة لازم يحزنون عليه ما ادري اكتشفوا يحبو لو تأنيب ضمير
لتقلب الحديث رأسا على عقب وتقول :هذا الموظف الي وياج بعد يلمح الج
اجبتها :مو احنة حزان شلون نعرس
لتجيب :القسمة اذا اجت محد يوكفه
اجبتها وانا استغفر بداخلي :انا اوقفها لانها لاتعجبني وهذا الموضوع تحديدا انا احدده
اجابت بحدة :ليش تردين تبقين علة على كلبي(قلبي) ليش ميعجبج شتردين من رب العالمين كليلي شنو شايفة نفسج .............
وتكلمت وتكلمت
وانا انظر حتى قالت :ابقي عنسي احسن
وتركتني حيث انا وانصرفت
اما انا فأكملت عملي
وتوجهت لغرفتي فتحت جهازي
وتوجهت الى صفحتي في الفيس بوك كتبت في حائطي رحماك ربي
وانتبهت لوجود رسالة
عندما فتحتها كانت من الدكتور الذي أرسلت له اسأله عن حالة والدي رحمه الله
أرسلت له شكري لاهتمامه وقلت له ان يدعوا لوالدي بالرحمة
وأغلقت الصفحة وبدأت بتصفح بعض الكتب التي تهمني
هذا هو جزء من يومي
*****************************************
اي حنين هذا الذي يقتحم روحي بعنف
في يوم الجمعة لو اجتمعت بكل العراقين بالغربة وفي أروع مكان في لندن لما كان بروعة الجلوس على شاطئ دجلة حتى ولو كان في الجزء الموحل منه
اه دجلة هل كان الجواهري يعنني عندما قال
يا دجلةَ الخير يا نبْعاً أفارقُهُ
على الكراهةِ بين الحين والحينِ
إنّي وردْتُ عيون الماءِ صافيةً
نبْعاً فنبْعاً، فما كانت لترويني
آه أه دجلة يتغزلون باالتاميز نهرهم الذي يفتخرون به
اه دجلة هل رؤوا جمالك في عيوني هل تنفسوا نسيمك في انفاسي
آه دجلة هل ارتوي يوما من شاطئك آه دجلة هل سوف تتلذذ رئتاي بعبق نسيمك
آه وآه دجلة
لكي أخدر الشوق وأعطيه جرعة امل
اجلس في مطعم عراقي يشتهر بعمل الكباب العراقي ذو الرائحة العطرة التي تسلب اللب وتعطي للمعدة أيعاز بالتلذذ بوجبة شهية
ولكنه في العراق مختلف بلحم أغنام العراق مختلف
رئيته يقترب ببسمته المسالمة بهيئة عامة تصرخ انها عراقية
اقترب مني قائلا :دكتور شنو القصة وين رحت اذا رحت للعراق يمعودة اخذنة وياك
كان هذا صوت حسن العامل الذي يعمل بالمطعم
أجبته بحنين :أيدي بيدك ماكو باص يوصل للعراق
أجاب بضحكة
حسن :شنو هاي الوسيلة البطيئة دكتور الظاهر مو مشتاق انته
اجبته بآه خرجت من اعماق اعماق قلبي المشتاق :لا والله مشتاق ومشتاق بس اقبل حتى اذا باص المهم اوصل مو مهم اشلون وشوكت (الوقت)
اجاب بحزن
حسن :اي والله دكتور الله يسهلك ويسهل النة
انتة هانت كله شهر واتخلص دراستك
بس اني ما أصور(لاعتقد) ارجع العراق هسة خل اخذ الجنسية وربك يحلهة
نظرت له يريد اخذ جنسية غير العراقية لا اريد ان اخيب ظنه واخبره ان فرحة الحصول على الجنسية يقابلها حزن عميق لانك فقدت جزئا من العراقية
اجبته بود :الله كريم تخلص صدكني(صدقني) هاي اني كدامك(امامك) صار الي 8 سنوات
اذا عليه ما بيقيت يوم بس الوالدة الله يحفظه كل ما اريد اروح للعراق تنصب مناحة تخاف عليه
تعرف ام وابنه اخطف والله نجاه في وقت الي ينخطف اهلة ينصبون فاتحته قبل لايجيهم خبر موته
اذا عليه
اكدر اكلك (اقلك) الي كال (قاله) الشاعر محمد سعيد الحبوي
لا، والذي سمك السماوات العلى وأقامَهُنَّ- وما أقامَ عِمـــادا
لا أرتضي غيرَ الأكارمِ معشـراً يوماًَ، ولاغيرَ (العراق) بـلادا
بس شسوي والعراق اجته فترة الاراذل اكلت الاكارم
الحمد لله على كل حال
جائني صوت حسن متردد بسؤال :اكلك(اقول لك) ابن عمي بس لاتزعل انتة سني لو شيعي(كلمة ابن عمي مو ضروري ابن العم حقيقي لا كلمة تقال لتقارب والتودد بالكلام )
نظرت له نظرة مؤنبة وقلت له بصدق نابع من شعور غربة قاتل
عندها لاترى العراق سني وشيعي وكردي بل ترى العراق عراقك وانت سني وشيعي وكردي
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك