رواية عهدي مع الايام -25
عادل دخل وغنيمه ادخلت معاه:يما اها جم خدامه عندهم كل الشوي اشوف وحده غير
غنيمه :اي عندهم وايد خدم حق كل واحد فيهم شغاله حتى بنت جراح عندها وحده
عادل:بيه هذيل خدمهم ابروحهم يبيلهم بيت
خالد وهو ياي:هلا عادل شفيك رديت
غنيمه:والله ياخوي قلت له خل انزورهم وقت ذاني بس اهو الله يهداه اصر الا يرجع
خالد:لا شدعوه هذا بيتكم وتشرفونه بأيوقت
عادل:خالي بدون مقدمات وخرابيط انا ياي اخطب دانه شقلت
خالد تفاجأ من طلب عادل :دانه اي بس
عادل يقاطعه:خالي والله احطها بعيوني وحافظ عليها بعدين انا تربيتك يعني عارفني عدل
خالد وهو يبتسم:انا ماقلت شي ..ومثل مايقولون لو هي ذبيحه ماعشتك ..ولو الموضوع بيدي اعطيك ياها بعباتها مابي منك شي
عادل:يعني موافق
غنيمه:عدول يننت اخوي جذي الواحد يخطب عط الريال مجال خل يتكلم
عادل:يما حبيبتي انتي طلعي منها الكلام بين ريايل
غنيمه بعصبيه:الحين اطلع منها هين يا عدول ادواك عندي وزواج ماراح تتزوج
عادل :والله يمه مابي اكدر خاطرج بس الزواج شر لابده منه ابي اكمل نص ديني
خالد وهو يبتسم:عادل اول مره اكتشف انك مطيور
عادل:مطيور مطيور بس اتزوج دانه
خالد كان يشوف عادل بنظرات مليانه فرح
عادل:خالي انا اولى فيها من الغريب ووعدك احطها بعيوني وحافض عليها
خالد:اي بس انت عارف ان الراي الاول والاخير حق دانه
عادل:طيب واحنا فيها ليش ماتاخذ رايها الحين...يعني حار بحار
خالد:لا يا عادل خلها وقت ثاني ...هذا زواج مو لعبه وبعدين اهيا توها طالعه من تجربه قاسيه ابيها تاخذ راحتها بالتفكير
عادل وهو يحك راسه:ماعليه خالي بس لاطول بتفكير يعني خلها تستعيل برد انا لازم ارد ابسرعه
خالد:اي ماعليه اشكثر بتقعد بالكويت
عادل:بالكثير اسبوع
خالد:خلاص انت روح ورد وبعدها يصير خير
عادل بجديه:خالي شي نطرني لي ذاك الوقت وبعدين انا بسافر ومرتي معاي وبعدين الموضوع مايبيله تفكير وايد ...يا موافق هاو موافقه مافي حل ثاني
خالد بحزم:عادل هذا زواج وابي بنتي تقرر على راحتها بدون اي ضغوط
عادل:على راحتكم
بيت صالح
صالح بعصبيه:هذا مينون صاحي في احد يكفل واحد بهل الزمن
سعود:هذا الي صار الحين المشكله لازم اندبر المبلغ عشان يطلع ولا بيضيع مستقبله
صالح:وجم المبلغ الي عليه
سعود:80 الف
صالح بدهشه:جم ..80 الف ...لا حول ولا قوت الا بالله ...وشلون بتدبرون المبلغ
محمد الي كان متضايق وايد على الحاله الي وصل لها اخوه:ماضنتي نقدر اندبر المبلغ الانه كبير وايد
صالح:ابوك عرف بالموضوع
محمد:لا ليلحين ماقلت له
صالح:الله يستر بس ...وليال اشلونها الحين
محمد بحزن :ليال ...عمي ليال بروحها سالفه ثانيه
صالح:لاتقول رد على سوالفه القديمه
محمد:وزود ياعمي ..المشكله انه معها ضيق بالتنفس وابوي ولا هامه يقول خل اتموت وتريحني من مشاكلها
صالح:لا ابوك صج يين وقعد ...اذا البنت حظها جذي شنو ذنبها
محمد:والله مادري شقولك ياعمي ...فواز كان معصب وايد على هل موضوع وكان ياي عشان ياخذها معاه البيت بس القو القبض عليه
سعود:انتو ماتترقعون ابد
صالح:قول الحمدالله على كل حال والي مكتوب على الجبين لازم تشوفه العين
محمد:الحمدالله ياعمي بس اهم شي الحين لازم انحل مشكلت فواز ولا بتضيع حياته كلها
صالح:اهله عندهم خبر
محمد:لا ماقدرت اقول لها لين افهم السالفه
صالح:لازم تعطيهم خبر الانه باجر ولي عقبه عطله ...يعني بضل يومين بالحبس علما يتحول المحكمه
محمد بدهشه:محكمه ليش
صالح:اي لازم يحولونه المحكمه اهو عليه قضيه
بفيلاة خالد
غرفت دانه
خالد قال حق دانه موضوع عادل وكان ينتضر منها الجواب:انا قلت لج الي عندي والراي الاول والاخير لج انتي
دانه:بس انا قلت له ياخذ ليال ...ليش خطبني انا ليال تصلح له اكثر مني
خالد:بس عادل شاف انج انتي الي تناسبينه اكثر من ليال وبعدين هذا ولد عمتج ومنج وفيج يعني مهما صار بينكم مستحيل يظلمج او يجرحج
دانه:مو شرط..ياما بنات خذو من الاهل وبنهايه تبهدلو
خالد:بس عادل غير عادل انا الي مربيه واعرف اخلاقه عدل ...شقلتي
دانه:بابا ابي مهله افكر بالموضوع
خالد:اخذي راحتج
ونطق الباب
خالد:تفضل
ادخلت اريام :بابا انت اهني
خالد:اي يبا بغيتي شي
اريام:بابا ملوكه اليوم ماري شفيها ماتتحرك ولا تبي تاكل وجسمها حار
دانه:ليكون مريضه
اريام:مادري
خالد :لا حول ولا قوت الا بالله ...خل اقوم واشوفها ...وكلم دانه...وانتي فكري بالي قلته لج
دانه:ان شاء الله
خالد طلع مع اريام وراحو غرفه ملاك
خالد دخل وقعد عندها حط ايده على يبهتها :هذي حرارتها مرتفعه وايد...وكلمها...ملوكتي بابا ...ملوكه
اريام:بابا صارلي ساعه اكلمها ماترد علي
خالد شالها :يبي مفتاح السيارتي وموبايلي ولحقيني
اريام:ان شاء الله
بالمستشفى
الدكتور:من متى وهيا على هل حاله
اريام:من الصبح
السستر وهيا تشوف حرارتها:حرارتها 41
خالد بدهشه:جم
الدكتور:انتو شلون مخلين حرارتها ترتفع جذي زين ماماتت عليكم البنت
خالد:لاحول ولا قوته الا بالله...من شنو مرتفعه حرارتها
الدكتور وهو يفحصها: احتقان باللوز
ملاك بدت تتأذى من الدكتور وبدت تبجي
ملاك:ابي ماما..وتبجي
الدكتور:انتي مو امها
اريام:لا انا عمتها
الدكتور:عيل وين امها
خالد واريام:لاتعليق
الدكتور :البنت حرارتها وايد مرتفعه ولازم انسوي لها دخول ....لازم تنزل حرارتها ولا راح تتشنج
خالد:الي تشوفه...اريام دقي على جراح وقوليله
اريام:ان شاء الله .....وخرت عنهم اشوي ودقت على جراح
جراح:هلا
اريام بنفسيه:بنتك تعبانه وايد وبنومونها بالمستشفى
جراح بخوف:شفيها
اريام:حرارتها مرتفعه وايد
جراح:اي مستشفى
اريام:مستشفى .....تعال ابسرعه انا برد البيت باجر عندي دوام ويب معاك ام السعف والليف خل اتجابلها
جراح:اريام ترى مو وقتج
اريام:المهم لاطول
جراح:مسافت الطريج ..وصكه
ملاك صعدوها غرفتها وركبو عليها مغذي بعد مابجت بحرقت قلب والم كانت تبجي ودور بعيونها الصغار على امها ليال ومافي كلمه على السانها غير ابي ماما ...جراح ماقدر يتحمل المنضر طلع بره الغرفه لين خلصو وحطو الابره بأيدها ولفوا يدها بشاش ومن تحت حطو خشب عشان تثبت وماتتحرك الابره...ضلت فتره طويله تبجي من الالم ومن التعب لين هدت ونامت
اريام:بابا منو بنام عندها اليوم انا ماأقدر اضل هني
خالد:الحين ادق على طلال اي ياخذج ويب امج تقعد عندها
اريام بضيق:لو ليال موجوده جان ماصار كل هذا
خالد:كل شي نصيب
دخل جراح بعد اختفى صوت ملاك:سكتت
خالد:نامت
اريام :بابا دام جراح موجود انت ردني مالي خلق انطر طلال
جراح:وين بتروحين ...خلج معاي انا ماعرف لها
اريام بنفسيه:انا ماني ملزومه فيها وعندي اشياء اهم منها
جراح بعصبيه:في شي اهم من بنت اخوج
اريام:اشياء مو بس شي ..عن اذنك
خالد واريام اطلعو من المستشفى وبعد نص ساعه وصل طلال ومعاه هنادي
هنادي:شلونها الحين
جراح:ليلحين نايمه
هنادي:وحرارتها ..مانزلت
جراح:ليلحين ماشافو حرارتها اخر مره كانت 41
طلال:وايد ...الله يعينها انا تصير 38 ماأقدر اتحرك وطيح بالفراش
جراح:يما لمن سافرت جم مره صار معاها جذي
هنادي:ولا مره ...آخر مره ادخلت المستشفى يوم ملجتك
طلال:يمكن تبي امها
جراح:وليش اهيا متى عرفت امها عشان تبيها الحين
طلال:اقصد ليال ...الياهل لي بتعد عن الشخص الي يحس عنده بالحنان وراحه يتعب وايد...ويصير فيه جذي
جراح:مالا شغل ...اهيا عندها احتقان باللوز...واذا على ليال مردها بتنساها
طلال:في احد ينسى امه
هنادي بستهزاء:اي فيه ابوها نسه امه وجابل العيوز الي عنده...بعد تبي بنته ماتنسى وحده اهتمت فيها سنه
جراح انحرج ونزل راسه
بهل وقت وطل مسج حق طلال ...كان من سعود يبلغه انه باجر ماكو دوانيه ولا الي عقبه
طلال:اكيد صاير شي
هنادي:منو
طلال:لا يما هذا سعود ..خل ادق اشوف شصاير ...ودق على سعود
سعود:الووو
طلال:هلا سعود
سعود:هلا بيييك
طلال:ها وينك
سعود:بالبيت ..انت وينك
طلال:انا بالمستشفى بنت جراح شوي تعبانه
سعود:لاااا عسى ماشر
طلال:حرارتها مرتفعه ...فوق الاربعين
سعود:لالا من شنو
طلال وعينه على جراح:اضاهر تبي امها
سعود:وليش ماتيبون لها امها
طلال:صعب..زالانها تبي امها الي ربتها اقصد ليال
سعود :لا حول ولا قوت الا بالله ..كل شي نصيب وانا خوك
طلال:الا ماقلت لي ليش مافي دوانيه هل يومين
سعود:شويت ضروف
طلال:سعود صاير شي
سعود:لا ليش
طلال:الاني اعرفك من نبرت صوتك
سعود:لا تحاتي
طلال:ليال فيها شي
سعود:لا مافيها الا العافيه
طلال بحزم:سعود يعني انت ماتعرف تتكلم لازم الواحد يسحب منك الحجي
سعود:طلال محد قالك انك حنان اخس من الحريم
طلال :لا محد قالي .....بتتكلم ولا اي الحين بيتكم
سعود:لا يبا خلاص بتكلم ...وقاله السالفه كلها
طلال:هذا مينون ولا صاحي الحين مافي واحد يكفل اخوه هال مره غريب
سعود:المشكله انه ماستشار احد قبل لايسوي جذي
طلال:اي بس اهو مو ياهل عشان يستشيركم
سعود:على قولتك
طلال:والحل
سعود:يفرجها ربك
طلال:سعود ترى انا اعين واعاون ولا تنسى هذا اخو الغاليه الي ماقصرت معانا
جراح بطل عينه وكان يخز طلال بنضرات غريبه
طلال:يكفي انها جابلت بنتنا طول الفتره الي طافت
سعود:مشكور وماتقصر بس باجر بكلم اهله وشوف شيصير
طلال:واذا مارد من السفر
سعود:لي ذاك الوقت الله كريم
طلال:ماشي بس خبرني بالي يصير معاك اول بأول
سعود:ماشي ..تامر على شي
طلال:سلامتك
سعود:في امان الله
طلال:حياك...وصكه
هنادي:ليال تعبانه
طلال:لا بس اخوها فواز كافل واحد والحبيب مسافر ومودافع القصد الي عليه
هنادي:لا حول ولا قوت الا بالله
جراح:وجم المبلغ الي عليه
طلال:80 الف
جراح بستهزاء:ماعندهم ياكلون يكفلون العالم بمبالغ كبيره
طلال بعصبيه:جراح ثمن كلامك الريال ماقالك تعال ادفع
جراح:اشوف قلبك محترق عليهم
هنادي:طلال ..جراح بس خلاص انتو مو بالبيت عشان تتهاوشون
طلال:حسافه عليك ياخوي تغيرت وايد ...وقام طلع بره
هنادي: لا حول ولا قوته الا بالله
رن تليفون جراح وكانت المتصله غرور
جراح بنفسيه:نعم
غرور:حبيبي وينك
جراح:بجهنم الحمره
غرور:هيهي مليق صج وينك
جراح :اقسم بالله اذا ما عدلتي اسلوبج بتشوفين مني شي عمرج ماشفتي
غرور بدلع:حبيبي ليلحين زعلان
جراح:اللهم طولج ياروح خلصيني شتبين
غرور:وينك
جراح:بالمستشفى عند ملوكه
غرور:شفيها بعد
جراح:حرارتها مرتفعه
غرور:انزين متى بتيي
جراح:نعم ...تستهبلين حظرتج اقولج بنتي تعبانه تقولين متى بتي
غرور:حبيبي انا ماقلت شي غلط وبعدين المستشفى مليان دكاتره وممرضات يعني بيهتمون فيها عدل وانت ماراح تسوي لها شي ....حياتي انا محتاجتك اكثر منها
جراح :انتي الكلام ضايع معاج...وصك ابويها قبل مايسمع ردها
هنادي:صج لي قالو الله خلق وفرق ...لو ليال جان ما فارقتها ثانيه ...بس الواحد شي قول
جراح بضيق:يما ولي عافيج صكري الموضوع
ثاني يوم المغرب بيت احمد
احمد عرف بالي صار حق فواز وردت فعله ماكانت غريبه على تصرفاته
احمد:والله محد طقه على ايده وقاله يكفل العالم
حصه ودموعها:مو لهدرجه ياأحمد حرام عليك هذا ولدك البجر ليش اتقول عنه جذي
احمد:هذا مو ولدي فاهمه ...ومره ثانيه مابي اسمع سيرته جدامي
محمد:يبا بس جذي مستقبله بضيع
احمد:بطقاق
حصه بصوت واطي:حسبي الله ونعم الوكيل
محمد:يبا احنه عيالك مهما صار ...يعني لي متى بعاملهم جذي ...شنو ذنب فواز وشنو ذنب ليال
احمد:انطم ولا كلمه هذول عصوني والي يعصيني ماهو ولدي
محمد:دام جذي عيل بتفقد كل عيالك ...وخلاه وصعد فوق...راح صوب غرفت ليال وطق الباب عليها
محمد:ليال ...ليال
ليال من داخل الغرفه :نعم
محمد:شلونج الحين
ليال:على حطت ايدك
محمد:كليتي شي
ليال:لا
محمد:ليش
ليال:مومشتهيا
محمد:ليول لازم تاكلين عشان تاخذين علاجج
ليال:وليش آخذ العلاج خلني جذي لين اموت وارتاح من هل العيشه
محمد:لاتقولين جذي ...انتي لازم تتغذين عدل ...واذا على وضعج اوعدج كل شي بيتغير هل يومين
آلاء الي توها واصله من الجامعه :مساء الخير
محمد:مساء النور
آلاء:ليال فيها شي
محمد:لا بس ابي اتطمن عليها
آلاء :شلونها الحين
محمد بصوت واطي:الله يستر مو قاعده تاخذ عليجها
آلاء:شي طبيعي ماراح تاخذه لو انا مكنها انتحر ...المهم كلت شي اليوم ولا كل عاده
محمد:لا ماكلت شي
آلاء:امممم ...تعال بغرفتي ابيك اشوي
محمد:ليول راجع لج
بعد مادخلو الغرفه
محمد:شفيج
آلاء:حمود لازم ناخذ المفتاح من ابوي بأي طريقه يعني بالله صار فيها شي وهو باره البيت ...ماتقولي شلون نتصرف
محمد:شلون ناخذه
آلاء:شوف انا فكرت بفكره بس يبيلها سرعه بالتنفيذ ولازم امي اتساعدنا
محمد: وشنو فكرتج
آلاء:ابوي يحط المفتاح بمخبات دشداشته الي يلبسها صح
محمد:ما أدري ولا مره شفت
آلاء:انا مثبته عليه اكثر من مره المفتاح مايفارق مخباته
محمد:انزين وبعدين
آلاء:اقول حق امي اتخليه يفصخ دشداشته على اساس بتغسلها بس تستعيله شوي عشان يعتفس ومايثبت على المفتاح...وبعدين انا اكون بغرفت الغسيل اخذ المفتاح واعطيك ياه ...وانت روح ابسرعه صب عليه من الجمعيه الي يمنه ...وبعدين انرد المفتاح مكانه وبجذي صارت عندنا نسخه وهو مو عارف شي
محمد:والله خوش فكره ...بس اذا سأل عن المفتاح بنفس الوقت الي اكون فيه انا بره البيت
آلاء:اممم ...مومشكله انا الهيه بأي شي ..او اقوله اني ابي مدرس وبجذي يعصب وينسى سالفت المفتاح شوي
محمد:دام جذي روحي كلمي امي وانا انطرج بسياره
آلاء:صار...وراحت قالت حق امها السالفه وعلى طول حصه يابت دشداشه ثانيه عشان لايقول بصعد فوق
حصه:احمد بدل دشداشتك خل اغسلها الحين
احمد:ليش الحين ..زانتي عمرج ماغسلتي هل وقت
آلاء:يبا ساعه 9 بيقطعون الماي عن البيوت لي باجر بليل
احمد:شلون جذي ...مايصير يخلون الناس بدون ماي يوم كامل
حصه:اهما يقطعونه من الرئيسي وبتضل التوانكي مليانه ...يالله بسرعه خل اغسل عشان اذا فرغ التانكي يمديه يدرس مره ذانيه لي التسع
آلاء:يمه خل ايبلج ملابسي بعد ابيهم حق باجر
حصه:بسرعه ماكو وقت وانت يالله بسرعه بدل
احمد وهو يفصخ دشداشته:انزين انزين ...غير شغله هذي بعد
حصه بداخلها مستانسه الانه خطتهم انجحت...وفعلن آلاء خذت المفتاح من الدشداشه بعد ماخذت الملابس لي غرفت الغسيل ..وبسرعه ودته حق محمد
غرفة ليال
كانت منسدحه على فراشها مثل كل مره ..ولامه مخدتها ودموعها مثل النهر الحزين الي تلاشت كل الاشجار الي حوله وكل العصافير الي تغرد وتشرب من مايه....تلاشت معها كل الاحلام والامنيات
ليال :ليش ياجراح ..شلي غيرك علي ..ليش غبت عني كل هل مده وبعدها رديت ومعاك ...ونزلت ادموعها بغزاره وهيا تشاهق من حرقت القلب الي بداخلها...آآآآآآآخ يايما تعالي شوفي بنتج شصار فيها ...ريلي غاب عني ولمن يرجع طعني بقلبي ...وطق على قلبها ...جراح حرام عليك ليش سويت فيني جذي انا اعشقكك واعشق التراب الي تمشي عليه...والله كنت مستعده احطك بعيوني انت وملوكه طول العمر....آآآآخ ياملوكتي الله العالم بحالج ...ياترى البنات يطلعونج كل يوم ...يلعبونج يوكلونج عدل ..يدلعونج ولا يناشبونج مثل كل يوم ...ياقلبي انتي والله مشتاقتلج وايد ...وضلت تبجي لين نامت وهيا على لحم بطنها من الصبح
الساعه 12 بليل ...بعد ما نامو كلهم
محمد:بصوت واطي:الوء يالله
آلاء:اوكي بس شنو يايب
محمد:عشا امي تقول مو ماكله شي طول اليوم ..بعد عمري اتلاقينها ميته من اليوع
آلاء:بس اهيا بعد عمرك وانا شنو
محمد يطقها على الخفيف على راسها ...:ترى مو وقت سخافتج امشي جدامي
آلاء:اوكي..
طبعا محمد سواه ثلاث نسخ للمفتاح ولمن رد البيت حط المفتاح بدشداشة ابوه الي بغرفة الغسيل ...واحمد ماحس ابشي
راحو غرفة ليال ...وشوي شوي بطلو الباب ..ودخلو وصكو الباب وراهم....واول مادخلو شافوها نايمه على جنب اليمين ولامخدتها وماكانت متغطيه
آلاء بصوت واطي: نايمه
محمد :عادي لازم تقعد عشان تاكل...ورح قعد عندها على السرير وبكل حنيه وخر شعرها من على ويها وشاف الدموع حول عينها وعلى جنب..مسح ادموعها بصبعه
آلاء:باجيه
محمد بضيق على وضع اخته:اممم...وكل حنيه...ليال ...ليولتي ...قومي
ليال افتحت عينها الي ورمت من كثر البجي وشافت محمد وآلاء يمها
محمد:يالله قومي ...يايب عشا لنا ...انا وآلاء ماكلينا وقلنا ناكل معاج
ليال ارفعت نفسها وقعدت :انت شلون دخلت
محمد:قدرت ادخل من افكار اختج الجهنميه
آلاء راحت وقعدت عندها ولمتها حيل :الله عشانج مستعده اسوي المستحيل
ليال:ماتخافون ابوي يشوفكم
محمد :لاتحاتين ابوي نايم وانا موصي الوالده انها تقفل عليهم الباب ...ههههه
آلاء:بسكم سوالف انا يوعانه ابي آكل
محمد وهو يطلع الاكل من الجياس الي يايبهم:يبيلنا صفره او صحن
آلاء:مايحتاج انحط الاكل فوق الجياس وناسه
ليال :حمود تليفونك معاك
محمد:اي معاي
ليال:حمود عفي هابي اكلم البنات ابي اتطمن على بنيتي
محمد ببتسامت :من عيوني بس بشرط تاكلين بالاول وبعدها ادقين
ليال:حمود والله آكل بعدين بس ابي اتطمن عليها
محمد كان عارف بمرض ملاك عشان جذي ماعطاها التليفون واجبرها تاكل :والله ماكو تليفون الا اذا كليتي كل اكلج
ليال:حمود بلا مصاخه ابي اكلمها اخاف ابوي يقعد وماأقدر اكلمها
محمد:لاتخافين ماراح اطلع من الغرفه هذي الا وانتي مطمنه عليها ...بس اكلي بالاول
ليال بقلت الحيله:انزين ...عطني الاكل
محمد كان يايب باستا وشبس وعصير وهم يايب من ساب وي ...عطاها الباسته وهم الساندوج ..زوليال بدت تاكل بسرعه ..بس عشان اتكلم ملاك
آلاء:ليول شوي شوي الحين اتغصين
ليال:مومهم ...وتاكل بسرعه ...ولمن خلصت الباسته...الحمدالله حمود عطني التليفون
محمد:باقي الصمون
ليال:بس شبعت...يالله عطني
محمد:طلع التليفون من مخباته ...وقبل مايمده اخمطت ليال التليفون من ايده بسرعه ...ودقت على اريام ..رن ورن ماشالته
ليال:ماترد
محمد:الانه رقم غريب والوقت متأخر ..طرشي لها مسج وبعدها دقي
ليال:اوكي...وطرشت لها مسج...ردي بسرعه انا ليال...وبعدها بشوي دقت مره ثانيه ومن اول رنه ..ردت عليها
اريام:الووو
ليال:ريوم شلونج وشلون بنوتي
اريام:هلا ليول الحمدالله بخير انتي شلونج..وشلون اخوج طلع ولا بعده
ليال بستغراب:اي اخو
اريام:فواز طلع من السجن ولا بعده
ليال اشهقت وحطت ايدها على شفايفها وكانت اتطالع محمد:فواز بسج
محمد هز راس بأي:بعدين اقولج ..خلصي بسرعه
اريام كانت تسمع صوت محمد وهيا مستغرب وجود ريال يمها وبهل وقت:ليال هذا من رقمه
ليال:هذا رقم حمود اخوي
اريام:ليش وين تليفونج
ليال:عند ابوي...المهم قوليلي ملوكتي شلونها ويينها الحين نايمه ولا قاعده.
اريام:مادري عنها
ليال:شنو ماتدرين عنها ليكون قاطينها عند الخدم
اريام:لا
ليال بلهفه:ريوم قوليلي تهتمون فيها توكلونها عدل ...تبجي ولا لاء عفيه ريوم ابي اسمع صوتها
اريام بعصبيه:ليال على شنو حارقه نفسج لو انا منج ماأسأل عنها خل اتولي كافي انها بنت واحد حمار ومايساهل والي سوا فيج مو شويه
ليال بدت تبجي:لاتقولين عنها جذي ملوكتي مالها ذنب بكل الي صار ..واذا الكبار اغلطو ليش انحمل الصغار الغلط...ريوم وينها قوليلي ابي اسمع صوتها مشتاقتلها ...ريوم هذي بنتي تدرين شنو يعني بنتي
اريام بحزن:ليول بس والله قطعتي قلبي ...ياربي شلي قاعد يصير لنا ...ليال ملاك تعبانه وايد
ليال بخوف:يما بنتي ...شفيها قوليلي
اريام:حرارتها وايد مرتفعه ومو راضيه تنزل والحين منومينها بالمستشفى
ليال بخوف:اي مستشفى
اريام:مستشفى....
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك