رواية ايامنا الحلوة -10
روح لطفله ترى القطاعه ماهي زينه
طفله تقرب من فم امها تبي تسمع امها
وش تقول والام مستمرة وغرابة طفله تزيد
امي وش تقول ماني فاهمه ؟؟؟؟؟
ام طفله :بادي طفله ماتستاهل منك اللي تسويه فيها
را ضيها حرام عليك
ام طفله تنتفض وهي تقول : وديها يابادي وديها لا تيتمها
مايجوز خاف الله
طفله وهي تشد على يد امها وهي تناديها يمه
يمه وش تقولين مافهمت يمه اصحي الله يخليس
لا تخوفيني بس امها سكنت من دون حركه نايمه))
وبعد وفاة امي يوم سألتك عن اختك اللي هي امي
طفله انت تهربت من جوابي واستغربت
نقلت استغرابي لوضحى بنت ابو محمد
وهي اللي علمتني اني مو بنتك وان امي
هي طفله اختك
بادي كان يسمع وهو منزل راسه
وده يبرر لها بس مايبي صورة ابو مساعد تسوء قدامها
يبيها تسمع عذره منه هو
حب يشغلها عن سبب اخذه لها وتبنيها
تصنع الزعل : هي شلون تعرف ؟ من قالها ؟؟
طفله : وهي تمسح دموعها : ماأحد قالها
هي سمعت ابوها يعلم امها
من دون مايعرفون
بادي : يعني انتي لتس فتره عارفه ليه ما واجهتيني
طفله: وشلون شلون يبه تبيني اجي وأسألك
انت ابوي والا لا !!!
تصدق انا للحيين ماني مصدقه
حاسه نفسي عايشه بحلم
وممكن اصحى منه
بأي لحظه اصحى
والقى امي نايمه هنا
وهي تأشرعلى الزاويه
اللي كانت امها تنام فيها
ووانت جنبها تسولف علينا
وش سويت بيومك
وانا واقفه هنااك
عند المغسله اغسل الابريق
واجهز الشاي
بادي غصبا عنها تأثر وماملك نفسه
وبكى بكى مثل الاطفال
بصوت ودموع ومشاهم
طفله ركظت عليه وضمته : وهي تصيح
لا تبكي يبه لا تبكي واللي يخليك لي
ما استحمل دموعك وضعفك
بادي : يابنتي انتي خلاص عرفتي منهم
اهلتس بتروحين وتخليني
بتروووووحين وتخليني !!
تخليني بروووحي تخليني لحالي
طفله : يبه من يقول انا مستحيل اخليك
انا وانت واحد مستحيل احد يفرقنا
يبه تكفى تكفى يبه لا تصيح
**************************
صباح يوم الاربعاء
ابو مساعد اتصل بمساعد
وقاله يجيب الاهل ويجون عشان
يكشتون مع بيت ابو محمد
بيت ابو محمد الاستعدادات لطلعة البر
على قدم وساق كل شي جاهز
طفله اخذت عهد على نفسها ما تخلي ابوها
وبادي قرر يبلغ ابو مساعد انها عرفت
*************
مغرب الاربعاء
هند جالسه عند خالها : تكفى فهودي تعال معنا
فهد : يابنت الحلال وش يوديني انتم معزومين
اروح اقط وجهي ليش
هند : والله مافيها قطة وجه عادي
اابوي قال كلكم تجون
فهد :اممممم ماادري بس ما اظن
هند نطت عنده : تعاااال يمكن تشوف الحبايب
خبطها فهد على راسها : وجع منهم الحبايب اللي بشوفهم
هند : يعني مين بالله اكييد ابوي
ههههههههههههههه
فهد:ههههههه ابوتس شبعانن من خشته
ممكن اقدر اعيش يومين من دونها
هند: بالله ياخال لا تستحي انت ماودك تشوفها
مره ثانيه وغمزت بعينها له
فهد عدل جلسته وتنحنح : بنت عيب وش ذا الكلام
استحي لا يسمعتس احد قفلي على السالفه
انا الغلطان اللي عطيتس وجه
وقااام وتركهها
هند: اييه هج عشاااني اقول الصدق يالحبيب
تمغطت بكسل :بقوم انام بنمشي قبل الفجر
عشان يمدينا نوصل على الضحى
****************************
يوم الخميس الفجر
الجو كان بديع سبحان الله بررردخفيف بس برد لذيذ
والغيوم متفرقه وضوء النهار بدا يشق السما
نسمه نقيه ترد الروح
كان ابو محمد يتعاون هو وولده محمد على
حط اغراض البر بسيارة محمد الوانيت
ام محمد جاهزه هي وبناتها
دخل ابو محمد: يله يله اطلعن خلنا نلحق
النهار من اوله يله
ركب محمد سيارته ومعه نايف
ابو محمد بسيارته ومعه ام محمد والبنات
ابو عبد الله وابو نايف بسياره وحده
ابومساعد وبادي وطفله بسياره
وانطلقو متوجهين للبر
مسااعد : ماجد لاتناام تراك جبت لي النعاس
ماجد : ياااربي طيب نعسان وابي انام
هند : مساعد وقف وانا اجي جنبك
وهالعله يرجع ورى وخله يناام
مساعد : لاا انتي لا جيتي قدام قعدتي
تحوسين بسيارتي وانا ما احب
احد يلعب باغراضي
هند : كيفك انا راحمتك قلت اجي انشطك
بدل هالي كل شوي وهو فاتحن فمه
يتثااوب كيفك
ام ماجد : هههه هالحين انتي منتي مثل ماجد
كل شوي وانتي فاتحه فمتس
من النعاس
هند : يماااااه
مساعد ناظر على ماجد لقاه نايم
: يمه مزنه وش رايتس انتي اللي تجين عندي قدام
ام ماجد : طيب وقف وانا اتبادل مع ماجد
هند : الحين انا اللي اطلب وانتي اللي تروحين ياااسلااام
*******************
في سيارة ابو مساعد
كان الصمت رهييب
حاول ابو مساعد يخلي بادي يسولف معه
مالقى استجابه منه
وسكت بس كان حاس ان في شي
صاير معه بس مايدري وش هو
بادي ناظر فيه وتذكر محاولات طفله فيه البارح
((طفله : يبه تكفى لاتعلمه اليوم خلها لا رجعنا
بادي : لايابنتي دام انتس دريتي لابد هو بعد يعرف
انتي مااتعرفين قد ايش هو شفقااان عليتس
طفله :الله يخليك يبه وقعدت تصيح
ماأبي اخاف ياخذوني منك
بادي وهو يمسح على راسها
ويمسح دموعها : يابنتي ان ماقلت له
بكره اعرف نفسي بيتأجل الكلام
واستثقله ويصير علي بعدين اصعب ))
جمع شجاعته وقال:
ابو مساعد تراني البارح علمت طفله
ابو مساعد من فرحته اهتزت يده
وهو يسوق بس رجع سيطر على نفسه
:الله يبشرك بالخير
والله يابنتي وتغير صوته
والله يابنتي فرحتي اليوم مايساويها فرحه
طفله تسمعه ودموعها تسيل
بادي: اليوم بس اللي ارتحت هاذي بنتك وعندك
خفت اموت وانا ما علمتها
انا اخذتها منك وانا ارجعها لك
طفله شهقت : بسم الله عليك يبه لا تقول كذا
ابومساعد مسك كتف بادي : لا يا خوك
لا تقول كذا طفله بنتك قبل لا تكون بنتي
انت ابوها مالنا غناة عنك
طفله بقوة : انا ابوي بادي وبس
بادي :طفله عيب يمه هو ابوتس وانا تراني
اللي اخذتتس منه
سكت ابو مساعد وسكتت طفله
*********************
في سيارة ابو محمد
ابو محمد : جبتم الكبريت
وضحى : ايه يبه جبناه
ابو محمد : جبتم السكاتسين( السكاكين)
ام محمد : ايه يابن الحلال ان اللي حاطتها بنفسي
ابو محمد كم جبتم دله وابريق
ام محمد : يابو محمد جبنا دلال للرجال وللحريم لا تخاف
كل شي جهزناه وحطيناه
ابو محمد : بعدي والله لا تفشلوني مافينا نرجع على غرض ناقص
ام محمد : اصلا حلاوة البر باغراضه الناقصه
ابو محمد : هههههه وش افهم هالحين هذا تقديم عذر لأي غرض ناقص
ام محمد والبنات ههههه
وضحى يبه امي تراها خطيره تعرف لك
ابو محمد : الله يخليها لي
اشواق : يبه تكفى عطنا قصيده
ام محمد : أي والله سمعنا من قصيدك الزين اللي انت حافظه
ابو محمد : اول صبن لي كاسة شاهي
صبت له ام محمد كاسه وعطته اياه
ابو محمد : هذي القصيده يسمونها شيخة القصيد للشاعر
مقحم النجدي
يالله يالمعبود ياوال الاقدار:::انت اللذي مدات جودك لطيفه
يالله يالمعبود عاون هل الكار:::تحل شطات عليهم كليفه
اللي مجالسهم بها بن وبهار:::ونجر يصوت للهجافا رجيفه
ومكارم للضيف عدلات وكبار:::ومفطحات في صحون نيفه
يامزنة غرا من الوسم مبدار:::اللي جذبني من بعيد رفيفه
تومر على كل المفالي بالامطار:::وتصبح بها خدان قومي مريفه
صبح المطر فاحت بها ريح الازهار:::تخالف النوار مثل اللقطيفه
ترعى بحد السف قصاف الاعمار:::ترعى زمايلق الفياض النظيفه
قطعاننا مايرتعن دمنة الدار:::في ضل مروين الغلب والرهيفه
ترعا بها قطعاننا سر وجهار::: تقطف زهر مرباعها مع مصيفه
::::::::::::::::::::::::::::::::::::::::::
الجزء السادس عشر
************
مع اشراقة الشمس
وسطوع اشعتها
توقفت السيارات
كان المكان بديع
ارض بكر
بساط اخضر
زهور الربيع
على مد النظر
الوان تداخلت بشكل سبحان الله
تغريد العصافير يملى المكان
وريحة الشيح والخزامى والنفل
تنعش الخاطر
::::::::::::::::::::::::::::::::::::::::::
نزلو من السيارات وكلهم شوق للفضا
والسعه والراحه اللي من اقبلو على
هالمكان وهم حاسين به
الرجال جهزو المكان للحريم وفرشو لهم الزل
وراحو لجهه قريبه من ورى السيارات
عشان ياخذن الحريم راحتهن
بعد ساعه كانت ام محمد وام نايف
وام عبد الله وجدتهم والبنات
جالسين على فرشتهم مستمتعين
بالجو والسوالف تدور بينهم
طفله جالسه معهم بجسمها بالها
وتفكيرها باللي صار بالسياره
بكل سهوله يقولي بنتي
لاا انا بنت بادي مو بنته .
طيب ممكن تكون عنده اسباب
خلته يتركني ويتخلى عني!!
لا لا لا مافي اب يترك ضنااه ماااافي !!
وضحى كانت حايسه تقهوي الحريم
ولاحظت مزاج طفله
عطت المهمه لاختها اشواق
وجلست جنب طفله دفتها من كتفها : بخخخ
طفله وهي مفزوعه
لأن وضحى طلعتها من عمق تفكيرها
: بسم الله وهي تحط يده على صدرها
فجعتيني يا بايخه
وضحى : الحلووو وش فيه
طفله : مافيني شي
وضحى: الا والله ان فيتس شي وشي ماهو بهين
طفله تلفت حوالينها تشوف احد منتبه لهن
وبهمس : ابوي بادي علمني
وضحى تحفزت وقربت اكثر
: بالله وشلووون وش قالتس
طفله بتكشيره : ابد يوم جينا قبل البارح من عندهم
علمني قالها لي
قالي ان ابو مساعد ابوي
وضحى ولا زالت علامات الحماس
في وجهها : وش سويتي يوم قالتس
طفله نزلت نظرها وسكتت شوي
: وش بسوي يعني سكت
وضحى لو شفتي وجهه يوم قالها لي
حسيت الموت اهون عليه
ما حبيت ا ني اصعبها عليه
وضحى حزنت على طفله وابوها بادي
وحست بهم صديقتها
شدتها : قومي قومي تعالي نتمشى شوي
طفله قامت بسرعه ودها تطلع
اللي بخاطرها لصديقتها براحه من دون
ما احد ينتبه عليها
ام محمد : وضحى يمه لا تبعدين انتي وطفله
وضحى :ابشري يمه
***********
جى محمد وهو مشمر ثوبه
نادى امه : يمه ابوي يقول لا تأخرون
علينا بالفطور
ام محمد وهي تتناول منه قدر صغير
فيه الكبده وشوية لحم
لزوم المقلقل ((لحم مقطع صغير
محموس على النار مع بصل ))
:ابشر انت وابوك
جت اشواق عند امها
وهمست لها : يمه شكلنا نسينا ...
ام محمد التفتت لبنتها بقوه
ومن بين اسنانها : وش انتن ناسيات ؟؟
اشواق وهي كاشه من ردة فعل امها
: يمه والله ما قصدت حطيته على الطاوله
ام محمد بقل صبر : اخلصي علي وشهو
اشواق : الملح والخبز
ام محمد تفرك يدينها ببعض : لا حول ولا قوة الا بالله
هالحين وش يفكني من كلام ابوتس
اشواق : يمه تكفين لا تزعلين علي
هالحين انادي محمد واقوله يروح لاقرب
محطه ويجيبهن وفعلا هذا اللي صاار
*****
عند الرجال بعد ما ذبحو ذبيحتهم وشبو نارهم
تولى ابو عبد الله الدلال و القهوة
عنده مزااااج يقلب بالنار
ويزل القهوة بدلالها ويقهويهم
وكل شوي يجيب له سالفه والا قصيده
والجو بينهم من اروع مايكون
بس ابو مساعد وبادي كانو اغلب
الوقت مستمعين
المزاج معكر من الكلام اللي دار بالسياره
بادي شايل هم من روحة طفله مهما
كابرت ابو مساعد ابوها ومقدر
امنعها منه واصلن مالي حق
ابو مساعد حز بخاطره زعل طفله عليه
وخوفه من مواجهتها وانه تطلبه تفسير
وتوضيح شلون خالها هو اللي يربيها
وانا موجود
يااربي والله ان زعلها علي كايد
وان نفسي ضاقت ابيها ترضى علي
هذي ريحة الغاليه الله يرحمها
*************************
ابو نايف : يا الربع انا متولع بالرمايه
ولي كم مارميت
وولدي متحديني اني ما اقدر اصوب على الشاره
من اول طلقه
ابومحمد با ابتسامه : وتبينا نحكم بينكم
ابو نايف : أي والله هذا اللي ابيه
ابو محمد بعد يحب الرمايه والصيد
لدرجة انه معلم بناته كيف يستخدمن السلاح
وكيف التصوييب ودائما يتبارى معهن وولده محمد
ابو عبد الله : شف يا ابو نايف ابو محمد بعد
يحب الصيد والرمايه مثلك نبي التحدي بينكم
انت وابو محمد ونايف ومحمد
واللي يفوز هو اللي بيعشينا من طبخ يده
ابو نايف وابو محمد : تم
ابو عبد الله :خلاص بعد صلاة العصر الوعد
ابو مساعد : أي والله خل ولدي مساعد يجي
غير يغلبكم
ابو محمد بمزح : ما يهبى
ابو نايف مواصل المزح :أي والله هالحين هالبزران
بيغلبونا حنا يالخبره
وضحكو على مزحهم وهم بانتظار العصر
والمنافسه اللي بينهم
*********
بعد الفطور
انتشرن البنات يتمشن ويلعبن اللي تحفر لها حفره كبيره
واللي تركض ماتبيهم يمسكونها
واللي جالسه هي وصديقتها ويسولفن
عند الحريم ام محمد بدت بطبخ الذبيحه
وجاراتها يساعدنها
وكل وحده تحط خبرتها بهالطبخه
**************
على الساعه عشره وصل مساعد
واهله وداهم لمكان الحريم
كانت وضحى تمشي هي وطفله
وحاطه شرشفها على كتوفها
ماهي منتبهه للي جى بسيارته
تناظر بطفله تبي تضحكها
كانت تبي تعبي مويه من الجالون الكبير
اللي على حوض الوانيت
و تسوي حركات بوجهها
و تحيول عيونها تمد لسانها
وطفله تضحك عليها يالخبله
:والله لو اسوي مثلتس يصدع راسي
وضحى: وش عليتس عيوني والا عيونتس
مساعد بالسياره شاف وضحى وعرفها
وابتسم على خبالها
ام ماجد : خلاص مساعد وقف هنا
الحريم مهن متغطيات
هند المطيورة : مسااعد شف هذيك طفله
مساعد بخبث: بالله وينها
هند وهي تأشر على طفله اللي لابسه عباتها
مساعد بضحكه : اللي لابسه الشرشف
هند بسرعه وغباء : لاا لاا ذيك بنت جيرانهم
الظاهر اسمها وضحى الثانيه ذيك طفله
ام ماجد : مساعد يبه ما يجوز كذا
كان ظربت بوري نبهنا البنيه مسكينه
مساعد بمزااج رايق : وهو يظرب بوري
ولا تزعلين هه نبهناها
وضحى وطفله يوم سمعن صوت السياره
اندسن ورى الوانيت وتغطن
طفله : الله هذا مساعد اكيد
جايب خالتي ا م ماجد وهنوده
وضحى : وجع يوجع الظالم ليه اخوتس
كذا فجعني هو والبوري حقه
ويومنه وصل وتمقلنا نبهنا
يا عيني عليه والله
الله من قلت ادب اخوتس
طفله وهي تضحك : هههه حدتس
ما ارضى على اخووي
وضحى : هههه بالعدال لا تقطعين
وانتي تقولين اخوي
طفله : ههههههه يختي خليني
والله انها كلمه تونس اخووووي
سامعه اخوووووووي
وضحى تكش بيدنها على وجه طفله : كش عليتس
انتي واخوتس قليل الادب
طفله : ههههههه والله لا اوريتس تشوفين
ما اخطبتس له
وضحى : ووووعع انا وضحى على سن ورمح
اخذ اخوتس الشيفه
طفله : بسم الله عليه والله انه يجنن
موتي ماهو بحاصلن لتس
اصلن انتي ميته عليه
من يوم ما صكت جبهتتس الارض
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك