رواية ما بعد الشتات -4
(( الجــــــــــــــــزء الســـــادس))
مها
ع الساعه 9 بالليل..ركبت السيارة انا وسالم..كنت طول الوقت افكر كيف نكنسل الروحه؟؟...كنت ساكته طول الوقت..فكرت اقول اني بنية...واني مها ومب محمد...لكن خفت...يتلي تخيلات انه عادي لو عرف يفرني في الصحرا ويروح....او.....او..يذبحني...او يعصب ويسوي حادث...!!..لالا سالم ما يسوي جي..بقول ..واللي يصير يصير..
مها: احم..احم...سالم..؟
طالعني..بدون ما يرد..
مها:ممممممم.ابي اقولك شي...بس اخاف تزعل..!
ابتسم لي يطمني...
مها: اول اوعدني انك ما تزعل...
سالم: ممممم....ماقدر اوعدك...يمكن اطلع من طوري وازعل؟
مها بوزت: عيل خلاص ما با اقول..
سالم: لا خلاص قول..
مها: مابا..اخاف عقب تضربني...أأأ(اخ غبية جني ياهل شو يضربني بعد؟؟)) لالا اقصد تعصب عقب تزعل مني و ما بترمسني عقب..
سالم ابتسم على براءتها: ليش يهمكاذا زعلت وما رمستك؟؟
مها قالت بسرعه: اكيييييييييييد.....( حمر ويهها.) احم..احم..اااا اقصد...ما حب اي حد يزعل مني....
سالم: ههههههههه...اوك..
شكله راايق....بقوله الحينة..
مها تنهدت: ادري اللي بقوله..صعب ..لكن...لازمــ
بس سكت لما وقف سالم برييييييك قوووي...تمسكت عدل..كنت بضرب في الجامه..
سالم بعصبية: اووف....شو هالحيوان اللي ما يجوف..؟؟!! كنا بنرووح فيها...
مسكت قلبي من الخوف....كنا بنرووح فيها..!! الحمدالله ما صار فينا شي..كانت سيارة مسرعه قطعت الاشارة..وكنا بندعم فيها.
مها: الحمدالله...ما صار شي..
سكت....وصلنا...سرنا نشتري تذاكر....وعقب قبل ما ندخل سرنا نشتري بوب كورن..ومن هالسواالف...عسب نعيش الجو ويه الفلم...
سرنا نطالع الفلم....كنت احس بنظرات سالم...مادري شبلاه....دوم جي...تجاهلت نظراته.اوني مب منتبهه له...طفرت..عقب طالعت فيه....بس يوم جافني جفته صد بسرعه وطالع الفلم...هزيت كتوفي باستغراب..وكملت الفلم...
خلص الفلم كااان واايد حلوو..طلعنا ورحنا نمشي الين الباركنات...
سالني سالم...
سالم: وييييييي...حموود....صح...شو كنت تبا تقول في السيارة؟؟
مها/ ليش شو كنت ابي اقول..؟؟<< استهبل..
سالم: فاللسيارة... يوم سويت حشرة اني بزعل..
حاولت اتهرب: ممممم ما ذكر...؟؟؟ شو كنت بقوول..ما ذكر؟؟
سالم: خلاص عيل يوم تتذكر قولي..
مها: خخخخ ان شاءالله..
ما كنت ابي اقوله....ولا بقووووله...خايفة يعصب...و لا يزعل مني....
ردينا البيت كانت الساعه 11 بالليل....زقرت سارة وردينا البيت ...سارة على طول سارت ترقد..قعدت شويه,,ع التلفزيوم عقب سرت ارقد..
نشيت الفير....سرت اصلي...وقعدت سارة بعد..تصلي..عقب تميت اقراا قران..ع السلع تسع سمعت حد يدق باب بيتنا...ظهر ت...طالعت من فتحت الباب جفت شرطي......ها شوو يبااا؟؟
مها: منوووو؟؟
الشرطي: الشرطه....مها...ال.... تسكن هنييه؟؟
هنييه طاح قلبي فبطني...انا شو مسويه؟؟
مها: ليش؟؟
الشرطي: بس كنا نبا نرمسها عن اللي كان ييبي يقتلها..
ارتحت..
مها: اوك لحظة شويه...
سرت بسرعه اييب شيلتي...
عقب سرت افتح لهم الباب..دخلتهم لصاله..
كانوا ثلاثة....
تكلم الشرطي...وهوما سك اورق..
الشرطي..: انتي مها ال.....
مها: هيه...
الشرطي: نحن كنا نحقق في محاولة القتل اللي انتي تعرضتي عليها...وامس عرفنا انج طلعتي من المستشفى..
اول شي كنا نبحث عن المشبوهين بهم...واللي كان اولهم(مبارك ال..... ومرته) بس في نفس اليوم اللي انتي تعرضتي فيه لمحاولة القتل هم كانوا مسافرين...وما لهم اي دخل في محاولة القتل ..
مها: كيييف....امبلا هو ريل خالتي هالحقير مبارك..هو اللي كان بيذبحني انا جفت ويهه...
الشرطي: يمكنكنتي تتزهمين انه هو.....لانه على حسب علمي كان ظلام...
مها: هيه كان ظلام بس هو كان قريب مني وانا جفته...
الشرطي: بس ما شي ادله...السلاح..ما له اثر...وما شي بصمات..
مها بانفعال: بس كلامي...اكبر دلييل..!!
الشرطي: اوك..وصلنا انج كنتي متنكرة بزي ولد..!!
بطلت عيوني...جن حد صب ع راسي مااي بااارد...
الشرطي: ابا اعرف السبب...
تلعثمت وقلت: لاني انا واختي هنيه بروحنا ...وانا اذا بظهر مكان..اتنكر عسب محد يي صوبنا....وووو..بس..
الشرطي بشك: بس...
مها: هيه بس..
الشرطي: انزين ما عندج اعدااء..او حد يكرهج..يمكن هو اللي حاول يقتلج..؟؟
مها: مممم لااا....بس مبارك وحرمته..
الشرطي: بس هذيلا...براءتهم وااضحة..
مها تنهدت بقهر: برايكم انا قلت اللي عندي..
وقف الشرطي واللي معه...عقب ظهرواا...
مت قهر...هاااا مبااااارك كييف سواا جي....شكله مدبرمن زماااااان....اوك..انا براااويهم..الين ما فريتهم في السجن هو حرمته الخسفه...مااكوون انا مهاا...
سرت غرفتي وظهرت الاوراق اللي يبتهن هذاك اليوم..
اليووم اليوم بسير المحكمة....وباخذ حقي منهم..
سرت اسوي ريوق..لين ما سارة تنش...نشت سارة..وانا بعدني اسوي الريووق...يت ويلست ع الكرسي...
مها: شو يقولون الناس؟؟
تمت تطالع فيني...عقب قالت..
سارة: هااه؟؟
لا... الحبيبة بعدها راقدة....خخخخخ
مها: سلامتج...ولا شي..
حطيت الريوق فوق الطاولة..
قعدت اكل...وهي بس تطالع الريوق..!!
سارة : مممم..امس كان كشخه..
مها: ليش؟؟
سارة: سرت احقق ويه كونان...!!
مها: ؟؟؟؟؟؟؟؟؟؟؟!!!!!!!!!
سارة: عقب عرفت المجرم..واستويت مشهورة....وصار اسمي...المحققة سارة توغوموري..
مها:عاااشوووو...شكلها صج بعدها رااقده؟؟ اقول سيري كملي رقادج..
سارة : هااه؟؟....
وقعدت تقول شو سوت...ومادري شو...وتقول كلام مب مفهوم..اشك انه حلم..حشااا استوا فلم...
سرت صوب المغسلة بهدوء..شليت قلاص ماي..ووقفت وراها...
مها: سارة...سارة..؟؟
التفت صوبي.......وعلى طوول..تششششششش....صبيت المااي كله ع ويهاا....
شهقت بصوت عااااااالي...خخخخ حليلها..
سارة تصارخ: مهاااااااااااااااااااااااااا...ياا ويلج مني....
طالعت حوليها تدور شي تضربني فيه..جفتها شلت الملاس....عااد انا ركضت براا في الحووش...وجفتها يااية صوبي..
سارة وشكلها معصبة: يالدبــــــــــــــه.....تعاااالي وين سااايرة؟؟؟
مها: ههههههههههههههه....
جفتها تركض صوبي...ما عرفت وييين اسيير بسرعه ركضت براااااااا في الشاارع...كنت لابسة كندوور..لاني كنت بروح المحكمة عقب غيرت راايي قلت بسر العصر....والغترة ما كنت لا بستنها يعني شعري كان طاالع...اووووه......ييت برد بسرعه دااخل البيت بس جفت سلامة اخت سالم تطالعني....بسرعه دخلت....اوووييييه..ياارب ما تكون انتبهت علي...بعد ما بندت الباب....صديت وراا جفت سارة فويهي....
سارة: هع...هع ...هع....
مها: اييييه..يمه....لا تضحكين جييييه..تخرعيني...!!
نزلت سارة ملاس اللي كانت بتظربني به....
سارة: اووف....انتي مملة...
راحت لداخل البيت....!!! شفييها؟؟ غريبة...يمكن علت صج عسب المااي....رحت داخل ابدل...لبست تنوورة وقميص...ظهرت سايرة اطالع تلفزيون...جفت سارة يالسة...سرت ويلست عدالها...
كانت طوول الوقت سااكته...!!!؟
مها: سااارة..؟؟
سارة:............
مها: بعدج زعلااانه؟؟
سارة:لااا..
مها: عيل؟؟ليش سااكته..
سارة: مااشي...
مها/ لا.. فييج..شي.عيل ليش ساكته؟؟
سارة: بس ملاانه.
مهاك تبين تسيرين عند نورة؟؟
سارة: لا...
مها:مممم انزين.شورايج..نظهر اما وانتي بروحنا نتمشى؟
سارة: بعد لااا..انا ملاااانه من عيشتنا...
مها: ليييش؟؟
سارة قالت بانفعاال: يعني..انتي الحينة عايبنج الوضع اللي انتي فيه؟؟...وااايد ما خذه راحتج مع ساالم... لا وبعد امس سايره معاه السينما..اانا الحينة ما اتفلسف علييج.....لكن اللي تسوينه الحينة غلط..
مها:............
اللي قالته ساارة كه صح...انا لازماجوف لي حل...
سارة: انا ما بييج تزعليين من كلامي.. انا بس انصحج...
مها: انا ما زعلت منج...اللي قلتيه كله صح..اصلا انا اليوم كنت بسير المحكمة...بس قلت عقب...بسير ويااج..وقريب بنرد البيت..ان شاءالله.
ابتسمت سارة: ان شاء الله..مممم شراايج نسير بااجر..الويم بنسير عند قوم نوورة...
مها: ممممم اوك...واليوم بستوي مها وبسير عند هااي..ممم سلامة ...صح..
سارة: هيه...
العصر ..الساعه 5....رحنا بيت قوم سالم...دخلنا عليهم وسلمت بيتهم وااايد متوااضع...بس حلوو
...وتموو يتعرفوا عليه...ام سااالم وااااااااااااااااايد...طيووبة..ارتحت لها واااايد....اله يخليها لهم....يلست شويه في الصاله عقب سرت ويه سلامة لحجرتها...
سلامة:انتي الحينة تشتغلين؟؟
مها: هيه..
سلامة: بس انتي بعدج صغيره..ليش ما كملتي دراستج؟؟
مها: تدرين امي وابوي متوفيين..ومحد غيري انا ومحمد الكبار ولازم نصرف ع البيت..
سلامة:اهااا.....انزين واخوج وين يشتغل..؟؟
مها: في شركة××××
سلامة: انزين كم عمره؟
اووووف..شكلها حاطه عينها علي..خخخخخ
مها بملل:انا وهو توام....
سلامة: هيه اعرف...قالي سالم...
عيل ليش تسال؟؟عبييطة...
سلامة: هيي....جفتج اليوم لابسة كندور....ليش؟
بل...هاااي ما تنسى شي...!!
مها: هيه...هههههه.كنت لابسة مالت اخوي محمد..وعصب عليه..وكان يبا يضربني وظهر براا..ما نتبهت...
سلامة: اهااا..
المووهيم...تمت ترمس وتسال عن( محمد) الشخصية الزائفة...عورني راسي منها ومن اسالتها...طفرت منها...
مها: اقوولج...انتي شو تبين من اخوويه؟؟
سلامة قفطت: لاااا عاادي بس اسال....اسفة ازعجتج..
مها: لااا.خلاص...بس عيب انج تسالين عن ولد..
سلامة: سوري...
مها: خلاص عادي...
ع الساعه 8 بالليل..تلاخصت وظهرت...جفت سالم..وسويت روحي ماجفته..
سالم: سااارة...ساارة..؟؟
سارة: هلا ساالم..
سالم: ممممم سالم موجوود....( ابتسم) .اذا موجوود ازقرييه...
سارة ابتسمت: اوك ويت بسير اجوفه...
دخلنا دااخل...
سارة: بسررعه...سييري بدلي..
مها: بس انا ما بي اسير...
سارة: يالخبلة..يمكن يبا يقولج كلام...او سيري قولي له انج بنية...
سكت افكر...
مها: بس..بس اخاااف اقوله..
سارة: عاادي..عادي...صدقيني ما بيعصب...بيعذرج..
مها تنهدت: اوك.....
بسرعه سرت ابدل...خلصت وسرت برع..جفته ينتظرني..
مها: هلا سالم..؟؟
سالم ابتسم: اهليين..شحالك؟؟
مها: تماام..وانت؟
سالم: يسرك الحاال..بتسير ويااي الدكاان..بسير مشي..
مها: اوك..مو مشكلة..
سارة كانت برع تجوفنا..
مها: ساارة....بتيين ويانا؟؟
سارة: مممممم...
سالم يغمز لسارة: هيه صح سارة نورة تتريااج...
سارة: عيل خلاص بسير عندها...
كان الدكاان مب بعييد بعييد..ولا قريب..قريب....ونحن نمشي تكلم سالم...
سالم:تخيل يا محمد...يكون عندك اعز صديق....بس عقب تكتشف انه ما يستاهل صداقتك...
مها: مممممم كيف يعني؟؟؟
سالم: يعني.....تعطيه ثقتك..واسرارك..ويطلع مناافق..وجذااب....
مها: ما فهمت..يعني وضح اكثر...
سالم: يعني مثلا...عقب اكتشفت انه بنية....!!!!!!!
\
/
\
((نهـــــاية الجزء الســــادس))
توقعاتكم..وردودكم...^^
انتظركم..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
فاصل إعلآني ^_^ / ..
لا احلل مسح اسمي مع على الرواية ..
تجميعي : ♫ معزوفة حنين ♫..
(( الجـــــــــــزء الســــابع))
مها
كنت افكر كيف الطريقة اللي اقوله فيها اني بنية؟؟ بس جني سمعت شي؟؟
مها: بنية؟؟؟؟؟
لحظة..لحظة...مب جنة يقصدني انا؟؟انا المنافقة انا الجذاابة؟؟...
جفته كان منزل راسه ...
عقب رفع راسه وطالعني هذيج النظرة اللي حسيت ان شعر جسمي كله وقف..
سالم: صــــــــح...يا.....................مها؟؟
هنيييه بطلت عيوني بوسعهن...بلعت ريجي بخوف..
مها: هااه؟؟
ريولي خلاص ما رامت تشيلني...ونظراته الحادة بعدها مصوبة عليّ..
سالم بنبرة ساخرة: شووو بعدج تنكرييييين؟؟؟ تحسبيني توني اكتشفتج؟؟ انا من زماااان وانا اعرف انج انتي (وقال باستهزاء اكبر)) ومحمد شخص وااااحد..بس كنت اتريااج تعترفيين لي...
مها : أأأأأ..توني كنتـــ ...
قاطعني: كنتي تروومين تقولين...انا اعطيتج كمن فرصة لكن انتي ما اعترفتي...تبين تقصيين عليّ زياادة..عقب...عقب تروحين وتختفين ولا جنه مسويه شي..
هنيه ما رمت استحمل اكثر انفجرت من الصيااح.. صرخت فويهه..
مها: انتي ما تدري بشي...انا مب جذااااااااابة ولا منااافقة....انا كنت بس ادور الاماااااااااان..انت ما تفهم؟؟؟ نحن نرقد ونحن خاايفيين لان...لانه ما نحس بالاماااان..نحن ما ورانا سند يحمينا..انا واختي ايتااااام...امي راحت وخلتنا وابوي..واخوي علي...حتى عمي لحقهم...انا....اناا.. ما كنت ابي اتقرب منك....بس انت اللي كنت تتقرب وتبي نستوي ربع....ما كنت اقدر اقووووولك..لان قبل الشرطة كانت تدورنا...ومباااارك وخاالتي مب مخلينا فحالنا...ويووم انك عرفت جااان ابتعدت عني...حتى انت قصيت علي...
صحت بقوووووووووووة بعد هالكلام....ورحت اركض بعييد عنه..
سالم \
اوييييه..ما كنت اقصد...صح اني كنت منقهر لانها الين الحينة ما قالتلي بس...كنت عاذرتنها عسب ظرووفها...تميت اطالع فيها وهي تركض...اروح وراها ولا لا؟؟ بس من جفته تقطع الشاارع.. رحت اركض ورااها...كانت في سيارة ياية مسرعه وهي مب منتبهه..
سالم بصرااخ: مهاااااااااااااااااااااااااااااااااا..
بس هي ما عبرتني..
ركضت وصلت عندها ودزيتها ابعدها بقووة والسيارة طافت عدالنا بسرعه وطاحت وطحت انابعد...
سالم: انتي غبية؟؟ كنتي بتموتييييييين...!!!!!
الغترة كانت مفروورة بعييييد...وهي يالسة ومغطية ويهها بايدها وتصييييييح...
تنهدت...وحمدت ربي انه ما صار فيها شي...وقفت وسرت اييب الغترة..وييت وغطيت شعرها اللي ظااهر..عقبها وقفت ومسكت ايدها وقفتها وياااي...يلستها ع الرصيف..ويلست قريب منها..
سالم: أأأأ..مممم....مها انا اسف...صح مفروض ما اقو...
قاطعتني وهي تكتم شهقاتها..
مها: لااا انا الغلطااانة لاني ما قلتلك..بس..بس صدقني والله كنت بقوووولك..اصلا الحينة قلت بسير ويااك عسب اقوولك...انا قبل كنت اخاااف...اخااف صج انك تزعل...عقب عاادي تفضحني..
سالم: اناااا؟؟...انتي تعرفييني عدل..اني مستحييل اسوي هالشي..يمكن من الصدمة ما رمسج...او ابعد عنج..بس مستحييل افضحج..واييب لج الاذى..لاني ربيعج ....محمد..!!
جفتها رفعت راسها وطالعتني..
مها: ويييييييي مال اول....هاا محمد...
سالم: خخخخ انتي الحينة تستهبلين ولا؟
مها:خخخخخ ادري مووقته...
سكتت..وانا سكت..
مها تنهدت: من متى عرفت؟؟....
سالم: ................؟
مها: من متى عرفت اني مها؟؟
سالم: من صار لج الحادث...لاني انا اللي شليتج ووديتج المستشفى..
مها: بس سارة قالت حد من ييرانا..
سالم: لالا انا قلتلها جي..قصيت عليها..ما كنت ابيها تعرف اني اعرف..
قلت هالكلام مابي مشاكل تستوي بينها وبين اختها..
مها بهدوء: تخيل..كنا كلنا مع بعض..انا وسارة وامي وابوي..وعلي....كنت احس اني اسعد انسانه في الدنيا...لكن...في هذاك اليوم..ابوي وامي وعلي كانوا سايرين يخطبون لعلي اخوي...وفيوم وليلة فقدهم كلهم مع بعض..كــــــــلهم..تخيل..!!( نزلت دمعه من عينها) وبعد يومين..عمي عرف بالخبر..وهوو يااي سوااا حادث هو بعد...وماااات..
صااااحت بصووت عااالي...ماكنت اعرف شو اقولها..انا حاسه بشعورها ..ابوي مااات وهو بس شخص وااحد...كيف زعلت عليه..اما هااي فقدت اربعه...مرة وحده!!!!!! اربعه هم سندها في الحياااااة..!!
سالم تنهد: مها...ما بينفعهم صيااحج الحينة...هم يتريوون دعواااتج لهم..ادعي ان ربي يغفر لهم..ويجمعج بهم في الفردوس الاعلى...
مسحت دموعها بظهر كف ايدها..
مها: آمين....(تنهدت..) عقب مر ع وفاتهم اسبوع...كانت خالتي وريلها طول هالاسبوع ويانا وكانوا يعاملونا زيين...لكن بعد هالاسبووع انقلبت معااملتهم لنا لعذااااب...كنا نش نروح المدرسة..عقب نسير نظف قبل ما ناكل...مع ان نحن عندنا خدم وااااااايد..بس الحقد يعميهم...واذا رفضنا عاد مبارك الحقير ما يقصر بالضرب...عقب..عقب قررت ان انا وسارة نشرد من البيت..كنت اقول بسير فندق...لاني شليت وياي بيزات تكفينا...عقب تعرضوا لنا شباب..وانا خفت على سارة...فتنكرت بزي ولد..اليوم الثاني كنت بسير فندق بس يوم جفت الشرطة تدور علينا ما سرت لانهم اكيد بيعرفون مكانا بكل سهولة..
وجفت هالبيت وسكنا فيه انا وسارة.....وجييي
هزيت راسي بتفهم..
سالم: انزين ليش ما تسيرين المحكمة..؟؟انتي عندج الاوارق المهمة اللي تقدر تفرهم بالسجن..
مها: هيه ان شاءالله باجر بسير..
سالم: مهااا..خلاص لا تتنكرين...دام اني بحميج انتي واختج..ما في داعي انج تتنكرين بزي ولد..
مها: .....................
سالم: انزيين؟؟
مها مترددة: ممم بس مابيك تتعب ويانا..
سالم: انتي ما يخصج فيني...اهم شي لا تتنكرين بزي ولد...اذا تبين شي انتي او سارة انا مستعد..
مها بحيا: مشكووور سالم...صرااحه انت واايد طيب...
سالم وقفت: يلا عيل بنرد البيت اتاخرنا...ورانا قومة من الصبح بنسير المحكمة..
مها : اوييه..اتاخرت ع ساارة..
وصلتها البيت عقب سرت بيتنا...
مها\
نشيت الفير وانا احس ان جسمي متكسر من الطيحة اللي امس...اوويه؟؟كنت صج بمووت...خبلة انا يعني ما جفت السياارة؟؟ توضيت وصليت..رحت اقعد سارةعسب اصلي..ورديت اقرا قران...عقب سرت ارقد..
.
.
نشيت ع صوت المنبه..بندته..جفت الساعه 9 الصبح..اليوم بنسير انا وسالم وسارة المحكمة..قعدت سارة..وتريقنا...عقب اتصل لي سالم..ظهرنا وسرنا وياه المحكمة..عطيناهم الاوراق وهالسوالف وشرحنالهم..وقالوا ان السالفه بطول..
.................
مر شهر ع السالفه ونحن دوم في المحاكم عسب يردون حقوقنا...وسالم مب مقصر ويانا....ورانا في كل خطوة..واخيرا ظهر الحق وزهق الباطل...خالتي..حكموا عليها بالسجن لمدة 13 سنة..اما مبارك فحكموا عليه بالسجن لمدة 25بسبب محاولة القتل...تذكرت اللقاء اللي كان بينا..
مبارك كان مقيد وكان في مركز الشرطة..قبل ما يحكمون عليه..
مبارك بعصبية: انتواا ايييه مو عكيفكم تطلعون عليّ كلام..انا ما سويت شي...البنتين هم شردواا..انا ما سرقت الورث ولا البيت...ولا حاولت اقتل البنية انتوو ما تفهموون؟؟
الشرطي وف ايده واير الكهرب يبي يعذبه..
الشرطي: شكله ما ينفع وياك الى بالكهرباا عسب تعترف...كل الادلة مصوبة لك..
دخلت عليهم..وكان ويااي سالم وسارة..
مها: لالا....لاكهربا ولا شي..انا بخليه يعترف..
مبارك منصدم: مهاااااااااااا؟؟؟ كييف؟؟انتي ما متي؟؟انا سالت جيرانكم قالوا انج انقتلتي..
سالم :احم..احم..تقصد انااا؟؟
مبارك منصدم: وانت من وين طلعت انتي الثاني؟؟
سالم:والله انا اذكر اني قلتلك انه الولد اللي انقتل ...كيف عرفت انه بنية بالاساس؟؟؟
مبارك بطل عيونه بوسعهن...انتبه بالغلطة اللي غلطها..
الشرطي: هااه؟؟ عندك اي اعتراض؟؟ يااا تعترف...ياا تتعذب...
وجذي...اعترف لهم مبارك..
اليوم انا وسارة نجهز اغراضنا بنرد البيت..مستااانسة حدي....اشتقت لبيتنااا..
لمينا كل قشارنا...كانت الساعه تقريبا 7 المغرب..ظهرنا انا وسارة وظهرنا قشارنا كله برااا..وقفنا تاكسي...وقلناله يحط الاغراض في السيارة..
ظهر سالم ف هالوقت...وجافنا وياا عندنا..
سالم:خلاص الحينة بتسيروون.....وبدون ما تودعونا..
مها: لااا والله كنت الحينة بسير اودعكم..
سالم ابتسم:ما في داعي تحلفين مصدقتنج...
ظهرت نورة ..
سارة صرخت: نوووووووووووورة..
وحضنواا بعض..وسووا منااااحه..مو كانهم بيتمون بنفس المدرسة..
دخلت البيت لقيت ام حمد وسلامة وسلمت عليهم وودعتهم..
ظهرت براا جفت راعي التاكسي...وشكله طفراااان...
مها: يلااا ساااارة..اركبي...
ركبت سارة ..وانا سرت عند سالم..
مها:ممم....سالم..اتمنى انك تسامحني اذا في يوم غلطت عليك...ولا تنسانااا...ودووم تعالواا بيتنا....
سالم: وانتي بعد سامحيني اذا غلطت عليج او ضايقتج..
مها ابتسمت: مسموح..يلااا مع السلامة...
سالم: فمان الله..
ركبت التاكسي...وانا فيني غصة ابي اصييح...بشتااق لهالمكان اللي لمنا ..وبشتاق لذكرياتي هنيي..
.
.
.
((نهـــــــــاية الجزء السابع))
انتظر ردوودكم..^،^
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
فاصل إعلآني ^_^ / ..
لا احلل مسح اسمي مع على الرواية ..
تجميعي : ♫ معزوفة حنين ♫..
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
(( الجـــــــزء الثــــــامـــــن ))
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك