رواية من أعماق أحضان مجنونة -46
نسايم مالك شغل فيني بطلع وابوي يدري اني طالعة..
وقف قبالها ومسكها من كتفها وقال بحدة انا الرجال هنا طالما ابوي غايب واقولك ردي ومافي طلعة وانقلعي غرفتك لاني ماابي اشوف وجهك قبالي...
نسايم بهمس علشان بنت العراقية..
مطلق بنفس الهمس بعدك ماشفتي شي..مدام حطيتك في بالي والله بخليك تعضين اصابعك ندم وبتشوفين وانا مطلق...
ضحكت نسايم وماكان مطلق قدامها وحطت شيلتها بتطلع لين جرها من شعرها وطاحت شيلتها وقال بحدة خلت امه ماتتحرك من مكانها قبل نسايم انا اذا قلت اني رجال والي كلمة فهذا يعني اني رجال ولي كلمة...مافي طلعة يعني مافي طلعة ...صعدي غرفتك خلصيني...
زينة ممكن اعرف وش فيك؟
دارين اللي كانت مو على بعضها وشوي وتبكي قالت ولاشي...
جلست جنبها زينة وقالت احنا بنات ونفهم على بعض...
تنهدت دارين وبانت دمعة بعيونها وقالت بهمس متضايقة..
زينة بنفس الهمس من شنو؟
دارين لاني حبيته...
تنهدت زينة وسكتت...
دارين بالم تتوقعين يوفي لي!!
زينة شقال لك...
دارين بدموع انه يحبني ومتعلق فيني...
زينة أي...وانتي شفيك...
دارين سمعت امس كلام من اخته ضايقني...
زينة وليه تسمعين للناس وهو عندك؟
دارين بتعب مدري....
زينة انتظري شوفي هو شبيسوي علشان تتضح لك الامور....
دارين بتنهيدة طويلة طيب واذا ماصار أي شي ها اليومين..
زينة ظلي ساكتة لين تجي منه هو ردة فعل....
ترفع جوالها وترده مكانه...ترفع جوالها وترده مكانه...
هاذي كانت حالتها...فوق الخمس مرات تسوي ها الحركة وترجع تلغيها...
ياربي ابي اتطمن واشوف وش اللي صار له بسبتي؟؟
كيف ...مو قادرة اكلمه واسمع صوته...احس اني بعطيه امل من الحب اللي هو زارعه بنفسه..اه ياهالة ...كيف تدرين وش صار له وتتطمنين عليه....
احمد...مالي الا احمد...ادق له واقول له السالفة كلها وهو بيتصرف....
أي..كذا السالفة تكون تحت المجهر وابعد عن نظرات جراح اللي تجرحني....
دقت على احمد وقالت له السالفة كلها ووعدها يدق على جراح ويشوف وش صار له ويطمنها ويشوف وين وليد انقلع فيه,,,
كانوا قاعدين بالحوش ونسايم العزيزة ماتفارقهم يوم تطلع زينة من قسم بيت العراقية....
ام وليد بهمس شرفت بنت الاكابر..
نسايم بارتياح الحمدلله مطلق طلع علشان ماافوت على نفسي شوفة زينة وانتي تذلينها يامريم...
ابتسمت لها مريم...
ودعت دارين اللي دخلت قسمهم بس يوم شافت الشلة متجمعة اصرت تكمل معها وتطلع....
ام وليد شدعوة يازينة ماتسلمين...
زينة هلا ام وليد...
ام وليد خوب السلام ماهو لي للي بتكون معك بالبيت؟
زينة خير...
سكتت ام وليد..
مريم يمه انا قايلة لكم مو ساكنة مع اهله ابي بيت بروحي؟
ابتسمت زينة ومعها دارين وهم يناظرون في بعض....
نسايم خير ان شاءالله يابنت العراقية وش له تبتسمين...
دارين كلمة ضحكتني...صدق الدنيا قسمة ونصيب...
ام وليد وش تقصدين...
دارين ولاشي....
مريم لاقولي وش عندك...اكيد غيرانة من اني بتزوج وبقعد في بيت بروحي؟
زينة بثقة مريم...الدنيا قسمة ونصيب ومشاري اليوم راح لاابوك المكتب وفك الخطوبة وكل واحد فيكم راح بنصيبه..بيجيك الخبر اكيد اليوم لانه توه داق لي وقال انه ارتاح من ها الرباط اللي كان متعبه وقال الله يوفق الجميع وهذا راي ابوي وابوك....
يالله الله يوفقك مع غير اخوي ان شاءالله...
قالتها وطلعت وقالت دارين وهي تشوف الصدمة بعيون الكل الدنيا قسمة ونصيب...
قالتها وراحت...
البارت الثامن والخمسين,,,,,,,,,,,
ام وليد شلتها الصدمة و وماتكلمت ولانطقت بحرف..
واروى جلست تستوعب السالفة ونسايم كانت تضحك شماتة من اعماقها,,
هي بروحها قامت بركان ثاير وقامت تسب وتلعب بدارين اللي دخلت وبزينة اللي مشت
مريم بكل عصبية انتي اصلا غبية وحاقدة وغيورة ليش اني بتزوج اخوك وانتي مابعد تزوجتي!!!
لكن ها الدعوى مابعديها لك وبقول لمشاري عنها..انا ادري فيك امنية حياتك ان اخوك ماياخذني لكن حريمتك اخوك يحبني وبيتزوجني والليلة بقوله يحدد موعد العرس ويبط عيونك ياجعلك مرضة ماتقومك الا على القبر؟
وانتي يابنت العراقية ميتة ومنذبحة غيرة اكثر منها لاني بتزوج واختي بتتزوج بعدي وانتي بعدك جالسة عند ابوك واختك تطلقت وردت البيت من جديد يللي مو متربين لاانتي ولااختك؟؟
حسابك عندي يادويرين وين بتروحين جايتك وبطلع ها الضحكة من عيونك...
ام وليد بقهر وهي محاولة تمسك نفسها بس سكتي واللي يعافيك..
مريم بعصبية وصراخ انتي ماسمعتيها وش قالت؟تقول مشاري راح لاابوي الكذابة وفك الخطوبة؟؟اعرفها انا ماتحبني...وجالسة يوم مع بنات العراقية دخلوها في راسها..
ام وليد وقفت وسحبت مريم من يدها وقالت لها بهمس سكتي فضحتينا كل اللي بالبيت بيسال وش عندك تصارخين؟
مريم اتركيني اروح ااْدبها بالاول...
ام وليد وهي تجرها تعالي بس خل ندعي تكون السالفة مزحة ثقيلة من زينة وماهي صدق...ولو ان قلبي حاس ان طلعة مشاري ذاك اليوم مابتجيب فوق راسنا الا المصايب؟
كل هذا صار تحت نظرات بشاير اللي كانت طالعة لهم بتقعد معهم وسمعت الكلام من بدايته لين نهايته وقامت تبكي بدون ماتحس لنفسها واحساس الذنب ذابحها وقاتلها
مشوا ونسايم بلعت ضحكتها وحطت يدها على يد اروى اللي رفعت راسها لها
نسايم اروى..علامك...وش فيك سرحتي يابنت العمة؟
اروى تتوقعين انه صحيح؟
نسايم لاطبعا مشاري يحبها ومابيتركها هم بس غيرانين منها؟
اروى تنهدت وقالت لابلى شكلها السالفة صحيحة ..مريم ضيعت مشاري من يدها وهو مايتعوض.....
نسايم لاتقولين كذا بس...وقربت نفسها منها وهمست انتي بس خلي بالك على جراح وتحمدي له بالسلامة شكله متعور اشوف يده ملفوفة الصباح ومامداني اسئله وش فيك؟
احمد السلام عليكم..
جراح وعليكم السلام والرحمة...
احمد جراح...
جراح منو معي...
احمد انا احمد....ولد..
جراح أي احمد...عرفتك....وش الاخبار؟
تنهد احمد وقال بخجل اسئل عنك؟سلامات
جراح سلامات؟وش عليه؟
ماجا على باله ان هالة قالت له...
تنهد احمد وقال بخجل مو عارف شقولك..بس انت بالاول طمني ماتعورت؟ماصار فيك شي؟
جراح ...........
احمد اختي دقت علي وقالت لي عن اللي صار البارح كله وكانت تبي تتطمن عليك بصراحة لانها حاسة بالذنب من اللي صار لك بسبتها؟
تنهد بخنقة وهو متحسر...وقال بنفسه(ليه ياهالة ماتبيني اسمع صوتك وانتي تساْلين عني ليه!!ليه تتركين احمد يتولى ها المهمة بدالك؟ليه حرمتيني شعور بيتركني فرحان ومبسوط ليه بس ياهالة ليه)
احمد جراح انت معي....
جراح بشرود أي....انا بخير.....
احمد هالة قالت انه ضربك بسكين؟
جراح وهو يناظر بيده عقموه لي اياه وخيطوه...مافي شي محرز اهم شي سلامتها هي...
تنهد احمد وماعلق وقال جراح بشراسة بس وينهم الاثنين مابيطلعون منها بسلامة وراسي يشم الهوى؟
احمد شنو؟
جراح تدارك نفسه وليد واطي ولازم يتاْدب...هاذي اخته ولازم يفهم انها اغلى من عيونه اللي يشوف فيها وذاك الثاني باعها برخيص فلا يحلم بقربها ثاني.....
سكت احمد وهو مستغرب من حمية جراح الثايرة على هالة وهو اللي من كانوا صغار مايطريهم الا عيال العراقية وقال سبحان الله..دنيا ماتدوم على حالها...بس رجح الموقف لسواد وجه وليد اللي دايم مخربها....
شيخة تكلم عايشة وهم يناظرون في فطوم في وحدة كذابة قالت بتجيب رقم غسان وماجابته؟
عايشة هذا لانها ماتقدر تجيبه وكله تكذب وتقول اقدر؟
فاطمة وقفت وتخصرت وقالت جبته؟انا مااكذب..
شيخة وينه....
عايشة انتي تصدقين فطوم؟هاذي دايم تحلم وتصدق احلامها بعد!!!
فاطمة اقولكم جبته..والله اني جبته وكلمته بعد...
شيخة هههه فطوم روحي بعيد واللي يعافيك...
فاطمة بقهر والله كلمته ومن جوال عمتي بشاير بعد والرقم خبيته بغرفة ابوي في مكان سري محد يدله....
عايشة انتي من عطاك الرقم؟
فاطمة بانتصار مو صعبة؟
عايشة ومن منو اخذتي اذن انك بتكلمينه؟
فاطمة محد اتصلت فيه لاني ابي اتصل؟
قامت لها شيخة وضربتها وقامت فاطمة تبكي ياغبية يازفتة بقول لاابوي ضربتيني؟
شيخة وانا بقوله انك كلمتي غسان وانتي مااْستئذنتي من احد كبير؟
فاطمة قامت تبكي بصوت اعلى..
وقامت عايشة كتقليد لشيخة وضربتها بعد غبية انتي؟كم مرة ابوي قال لنا مانكلم احد مانعرفه الا اذا قلنا لااحد كبير؟شبيقول غسان اذا عرف انك مااستئذنتي قبل تكلمينه؟
فاطمة فتحتها مناحة وقالت مااحبكم انتوا ماتحبوني؟
شيخة انا بروح اجلس بالحوش وبس اشوف ابوي جاي بقوله علشان يضربك وياْدبك ..
راحت تركض وراحت وراها عايشة وظلت هي تتراجف من الخوف وتفكر في مكان تتخبى فيه....
هالة بصدمة متاْكدة..
دارين هزت راسها وقالت اممم
هالة يعني هم كان المتوقع انهم مايتوافقون بس...
دارين بس شنو؟
هالة تنهدت الله يعين رؤسنا من اللي جاي من ام وليد..احنا وبنتها بتاخذ مشاري مو سلمانين كيف اللحين يوم فكوا؟مابتطيح الا علينا؟
دارين واحنا شكو؟بنتها ماقلبت الرجال..مريم انتي عارفتها مثلي تماما فشخرة على الفاضي ولا العقل مافيه غير العرس!!كلمتين على بعض ماتعرف تقولهم للرجال؟يااخي ماهو متحملها..ماهو ملزوم يتحملها اصلا!!!
هالة شتتوقعين يصير؟
دارين ماادري...يكفي ابوي مابين للحين..وهاذي بروحها ماهي بشارة خير...
هالة ابتسمت راحت على ابوي من الجهتين مع بو مشاري...
دارين بتنهيدة كل شي قسمة ونصيب كلنا نختار بس مو كلنا نقدر ناخذ اللي اخترناه؟
تنهدت هالة وشردت...تفكيرها بجراح معتم عليها كل شي...اصلا هي بروحها تعبانة من البارح وهي مانامت وللحين وهي منتظرة اتصال من احمد يطمنها واحمد مااتصل...
ماغير كلام جراح اللي يتردد في بالها كل شوي من البارح(هالة انا احبك..من زمان من كنا صغار وجامعنا ها البيت...حياتي توقفت يوم انك تزوجتي؟)
تنهدت بقوة وغمضت عيونها وسط نظرات دارين اللي ماكانت فاهمة اللي يدور بعقلها ها اللحظات,,,,,
بغرفة بشاير..
دق الباب ودخل وكانت هي تمسح دموعها اللي ماوقفوا...
تسند على الباب وهي تناظر فيه بحزن وقال كنتي تبين تكلميني قبل شوي؟
هزت راسها وماقالت شي..
جراح كنت مشغول وماعرفت ارد عليك.....شفيك؟
قالت ببحة جراح...
تقرب منها وقال بشاير شفيك؟
دمعت عيونها وهي اللي مو قادرة توقف دموعها لحظة وقالت بياْس طلقها اليوم...مريم تطلقت ياجراح وانا السبب؟
جراح لاحوول ولاقوة ألا بالله...بشاير وش ها الكلام؟
رمت نفسها على صدر اخوها وقامت تبكي بحرقة وهي تشاهق..
جراح اذكري الله يابشاير ترى اللي صار قسمة ونصيب...هو مايبيها وقالي انه اخذها علشان ابوه ولاانتي مالك شغل...وجودك بحياته ماهو مغير من نصيبهم شي يابشاير ,,
لو انك مكتوبة له بتكونين له ولو انها مكتوبة له بتاخذه وبيكملون حياتهم مع بعض...
كل الدنيا ماتمشي الا وارزقها موزعة لو شسوينا يابشاير..
بشاير رفعت راسها وهي غرقانة دموع بس انا...انا احبه وهو خلاها علشاني!!!انا ماتمنيت ها الشي يصير ياجراح؟
جراح برجع اقولك ماهو ها الشي اللي خلاه يتركها...هو مايبيها..ماهم متفقين مثل ماسمعت..
بشاير برجفة جراح انا خايفة..خايفة مووت...مدري وش بيصير بالايام الجاية...
جراح مشاري رجال احنا نشتريه ونفتخر فيه يابشاير...انا من قلتيلي عن اللي بينكم وكلمته حسيته فعلا محترم ووعدني يترك المكالمات بينك وبينه لين ترسون على بر وتتفقون على شي ويترك هو خطيبته...
تصدقين كل يوم اشوف سيارته واقفة عند مكتبي واحس انه يجي يبي يساْلني عنك بس يتراجع...
يوم قطع اتصاله فيك مثل ماوعدني كبر بعيوني زيادة....
انا وعدته مثل ماوعدتك اذا بترتبطون بظل واقف جنبكم وبدعمكم بكل مافيني لين تاْخذون بعض؟
دخل البيت وكله ضيق وتعب...
كان بيدخل قسم العراقية بس قال اول يرمي حمل مريم ويبلغها الخبر وبعدين يريح بوجوه بنات العراقية....
دخل البيت اللي كان مقلوب ساحة معركة من مريم وهي ترمي بالاغراض كل مادقت لمشاري ولقته مقفل وامها اللي كانت تدق على ابو احمد ومايرد..
اول ماشافته وقفت وجته تركض وقالت بنرفزة انت وينك يارجال ليه ماترد علي؟
قال وهو يطالع بمريم وش بغيتي؟
سكتت وهو ماعلق بشي....
تنهد وقال مريم..
مريم يبى...دق لمشاري وقوله يحدد موعد العرس ترى اخته مصختها ولازم ينكسر راسها الغبية الدلوعة..
قاطعها وقال بحزم مريم..مافي عرس يبى...
وقفت مكانها وقالت بغباء شلون يعني؟
ام وليد قالت بحدة يعني صحيح..
قال بتنهيدة مافي نصيب....
مريم باانفعال بكيفه هي مافي نصيب؟
ناظرها ابوها وقال بحدة بنت وش ها الحكي الماصخ؟
مريم اصلا مو هو اللي مايبيني انا اللي ماابيه ..هذا واحد ماتملي عينه بنت بالعالم ويبي يلف ويدور ويلعب بكيفه ولاالزواج اخر همه...يوم شاف ان العرس بي
مامداها كملت الا وجاها كف من ابوها سكتها مرة وحدة وقال بعصبية انتي ماتقولين لي كيف تبينه يتحملك وانتي لسانك متبري منك؟لكن مو غريبة هاذي تربية امك خلها تشوف وش ربت...طالعي شوفي اللي تقولين وين عيالي ووين عيال العراقية؟بنتك المحترمة لسانها قدامي ماهي ماسكته مالوم مشاري فيها ابدا....والله اني اعذره....
ام وليد مريم روحي غرفتك...
راحت وسط قهرها وهي للحين مو مقتنعة بان مشاري طلقها...
ام وليد بانهيار مو من صدقه يابو احمد..
ابو احمد بضيق لامن صدقه واصلا لو ماهو طلب ها الشي بعد اللي سمعته من بنتك انا مابتركه معها دقيقة وحدة...هذا ولد عز وخير وشايف الدنيا بس انه رجال محترم ليش تظن فيه ها الظنون...هي ماسكة عليه شي؟
ام وليد من ضيقها ياابو احمد ومن زعلها سمعت ها الكلام بالمسلسلات وقالته,,,بس انت قال لك بترك مريم وقلت له أي ما..
قاطعها بحدة انا مااساوم على بنتي وخصوصا اذا كانت هاذي لهجتها بالحكي؟اكيد انه مو سالم من حكيها وسامع الامر من هذا ولا ماقال كل واحد بيروح بنصيبه....
بو مشاري اكد لي انه بالمستشفى شافها وشاف عدم احترامها لولده...تفشلت وماعرفت شقول..هو بنفسه يعايرني يقولي ياابو احمد وين عيال العراقية وتربيتهم ووين عيال ام وليد؟
يالله قولي شي ياام وليد...يلللي تدورين الزلة على عيالي وتعايرينهم باامهم العراقية؟
كانت لابسة وبتطلع ولف لها وقال بحدة رغم وجود امه وابوه وبشاير وين؟
لفت وماقالت شي وناظرته بس...
لف لها بهدوء ورجع سئلها وسط نظرات ابوه سئلتك وين رايحة؟
يوم شافت ابوها يناظرها قالت له بيت عمتي؟
مطلق وش عندك هناك....توك رادة منهم العصر ليه بترجعين لهم اللحين؟
نسايم ضايق خلقي وبقعد مع البنات...
لف واخذ له تفاحة من سلة الفاكهة وقال مافي طلعة شيلي عبايتك وروحي دارك نامي الساعة صارت فوق الثمان ونص؟
فتحت عيونها وقالت بنرفزة انت شقاعد تقول...
قال بصوت عالي تسمعين الكلام على مااعتقد,,,,
ابو مطلق سمعتي اخوك شقال...روحي غرفتك بلا طلعة..
نسايم باعتراض بس يبى انا بروح بيت عمتي.,..بقعد مع بنات اختك....
ابو مطلق اخوك قال لك لاتطلعين يعني تسمعين كلامه...
تاءففت وركبت لغرفتها....
يوم سمعوا صفقة الباب بقوة قالت ام مطلق مطلق...علامك مع اختك انت...واقف لها بالطلعة والدخلة...
مطلق ببرود مافيني شي...بس قلت لكم زوجوني مازوجتوني قلت اشغل حالي بااختي لين تفكرون تزوجوني؟
سكت ابو مطلق وفهمها بعدها قال بناْجل الموضوع كم يوم...
مطلق ماعلق بس ناظر في ابوه..
ابو مطلق اللي سمعته ان بنته اليوم فكت خطوبتها فماهي حلوة نروح نخطب بنته الثانية بنفس اليوم..حتى هو ماله خلق....ثلاث اربع ليالي يايبى يامطلق ونكلمه...ها وش قلت؟
قال وهو يقطع التفاحة لبشاير اللي ابتسمت له وهي ماطلبت منه و اللي كانت جنبه مني لذيك الليلة خل نسايم تتحمل اللي يجيها؟
ظل واقف قبال البحر وهي وراه...
كان ساكت وشارد ومهموم...وهي محترمة سكوته وتنهيداته...
لف لها وناظرها وانتظرها تقول أي شي بس ابتسمت له بتعب..
مشاري ماتبين تقولين شي...
زينة بهدوء ارتحت اللحين؟
تنهد تنهيدة طويلة وقال نوعا ما...
زينة ليه يعني مو راحة كاملة....
مشاري بتعب باقي نص المشوار...واللي جاي اصعب يازينة....
زينة سكتت وكمل بتعب وهو يقول مدري شلون بتقدم لها...وهل بيوافق ابوها يعطيني اياها وانا كنت خاطب بنت اخته؟
زينة اذا لكم في بعض نصيب بتاخذون بعض...
سكت وقالت له بتشجيع اهم شي تتمسكون برايكم وماتتخلون عنه لااي شي.....
تنهدت وهي تقول ها الجملة وكانها تقصد نفسها...
يوم لف لها لقى بعيونها دموع سايلة كانت تمسحهم...تقدم منها واخذها بحضنه وابتعدت عنه بسرعة وكانها مو مهتمة وقالت تمسك برايك اذا كنت تحبها يامشاري لاتتركها تضيع منك....
لاتضيع حبك لها بالهوى ترى بتظل تعاني كثير يااخوي....
احمد مالبستي..
ريم بدلع حبيبي ماودي اطلع..
احمد تعبانة ياقلبي
ريم لا...
احمد طيب.ليه؟
ريم انت يعني وين بتروح؟
احمد بيت اهلي انا قايل لك بروح اشوف جراح....
ريم طيب كلها روحتك بجيتك مابتاخذ لها ساعة ماتسوى وانا امس كنت معهم...
احمد طيب وش بتسوين يعني؟
ريم بظل هنا بجهز لك جو حلو نسهر عليه لارجعت؟
احمد قام يصافر وغمز لها بعيونه وقال بخبث أي قولي كذا مشتاقة لي وتبين تسوين اجواء رومنسية...طيب مو متاْخر عليك ياقلبي ولايهمك...
قالت بدلع وهي تضحك احمد.....اذارجعت و لقيتني نايمة لاتصحيني؟
احمد مسوي مصدوم افا؟؟؟وشو يعني ها الحكي؟
قامت تضحك بقوة وقال بجدية مصطنعة معناته مافيها طلعة يااحمد اجلس جنب مرتك لاتسويها...
ريم ماتنعطى وجه روح بس روح...
تقرب منها وقال بهمس ملهوف ترى احلى شي اني ارد والاقيك نايمة بجد قمة الجنون لاني بصحيك غصب؟
قالت وهي تناظره بدلع ماراح اقعد لو شتسوي؟
احمد بهمس مو بكيفك قلت لك غصبا عنك....
كان جالس بخيمته واروى وام وليد جايين
سلمت اروى وقالت بدلع سلامتك ياجراح....
مارد عليها....وناظر بعمته وقال ياحرام اجل مريم تطلقت؟
ماردت عليه وقالت شفيها يدك؟
جراح ناظر بيده وقال بشماتة اصابة....من شخص ما...
ام وليد الله لايسامحه ان شاءالله...
جراح رفع يده للسماء وقال يارب....امين....
جت الشغالة ورى ام وليد وقالت ماما هذا في شرطي يبي بابا وليد؟
ام وليد شنو...
ضحك جراح بقوة...
والشرطي دخل بعد الشغالة...
الشرطي هذا بيت وليد عبدالله ال...
ام وليد ناظرت في اروى وسكتت...
الشرطي في بلاغ ضده من السيد جراح محمد ال....ياليت تبلغينه يجينا بااقرب وقت ولابنعرف شلون نجيبه....
ام وليد بصدمة شفيه وليد؟
جراح بصوت عالي انا جراح محمد سئليني انا؟
انسحب الشرطي منهم بعد كلمة جراح ولفت له وقالت بصدمة شنو..
جراح بحدة انا مشتكي عليه....
بها اللحظة طلع ابو احمد واحمد معه...
جراح بلامبالاة وقال ضاربني بسكين وسط بيتي...هنا بها المكان اللي انتي واقفة فيه ياعمتي يالغالية؟انا عاد قلت لازم اخذ حقي وابلغ الشرطة واعرف الاسباب اللي خلته يضربني...وقلت لااحمد عن السالفة وقال لي لاتقصر فيه ادبه مثل ماتحب لازم ياخذ جزاءه..
لفت ام وليد لااحمد وكانت بتتكلم بس يوم جراح قال لاابو احمد بعد اذنك عاد ياابو احمد...مافيها زعل على مااعتقد...
قال ابو احمد بحدة جراح.....لاتتنازل عن ها السالفة...وخله بالحبس لين يتعفن ويتاْدب....وياخذ جزاءه...
جراح بضحكة انا عاد لاقيه ياعمي....خله يجي وين بيروح من يد جراح بس...انا له والزمن طويل؟
توقعاتكم للبارت الجاي....
ووين بتتخبى فطوم لايشوفها ابوها؟ووليد وش بيصير فيه؟؟ومشاري وبشاير هل بيلتقون بعد الطلاق وشنو بتسوي مريم لمشاري وجراح ليه بيكلم هالة؟
اشوفكم بكرة على خير,,,,
البارت التاسع والخمسين,,,,,
جراح بشماتة انا عاد لاقيه ياعمي...خله يجي وين بيروح من يد جراح بس..انا له والزمن طويل..
ابو احمد بقهر ودي بس اعرف ليه هو سوا كذا؟؟
جراح بحدة جاهل ياعمي جاهل....مايتحمل احد ينصحه ويعلمه اغلاطه...الشره مو عليه على اللي ربته بدلع وماطلعته رجال؟
احمد تحمحم انا ماشي..تبي شي يبى..
ابو احمد بتنهيدة لايبى سلامتك...
مشى وحط يده على كتف جراح وقال ماتشوف شر...والسموحة مرة ثانية..
جراح ولو يااحمد....الغلط يتعداك ...
احمد تصبحون على خير.....
بعد مامشى احمد قال ابو احمد لجراح انا بعطيك فكرة عن الاماكن اللي ممكن يتواجد فيها...وخل الشرطة تدوره...يطلع يعني يطلع....
جراح بشماتة يعني وليد وين بيكون بس ياعمي...بها القهاوي ناقع ولا.....
زفر ابو احمد وقال بقوة عسى الله لايوفقك وين ماتروح كانك موطي راسي؟هذا ولد خالك ماسلم منك...مو غريبة بكرة يقعد من النوم ويذبحني وانا ابوه؟
جراح بشماتة اكبر وموجهة خصوصا لعمته ماتزعل مني ياعمي ياابو احمد بللي بقوله...انت مو ابوه؟يعني اللي يشوف احمد وتربيته ورجولته ويشوف وليد اكيد مايقول انهم اخوان؟
ابو احمد بتنهيدة عاد امسحها بوجهي ياولدي ياجراح..
جراح بسرعة تمون ياعمي ولو....مو لهدرجة تتحمل غلاطات عيالك؟بس انا بحاسبه عليها علشان يتاْدب...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك