رواية الله يسامح اثنين جابوني للدنيا و راحو و خلوني -35
بشايرإبتسمت له:الله يعافيك ياروحي يلا نمشي نايف ينتظرنا بالسياره
عبدالعزيز:يله تراني ماحسبت على الله يكتبون لي خروج مشتاق للبراء لي فتره عنه
بشاير:ياقلبي أكيدهو بعد مشتاق لك
طالعها عبدالعزيز بحب ومد يده لها
هي طالعته وحطت يدها بيده عشان يستند عليها
قام من السرير وهو ماسك يد بشاير أخذ الشنطه الصغيره اللي فيها ملابسه
بشاير أخذت شنطتها وجوالها
وطلعوا
ريتان وحاتم وإبوراكان وإم راكان
كانوا ينتظرون راكان ودانا على العشاء
عند (دانا وراكان بجناحهم)
دانا كانت لابسه حجابهاوعند المغسله تستفرغ(الله يكرمكم)
تعبت وهي تستفرغ
كل الي فبطنها طلعته
أنفاسها سريعه
وتعبانه
وجهها أصفر
وتحس بحراره داخليه
دخلت غرفتها وهي تتهأوه
راكان فز من السرير ونزل الجريده
وجاء عندها وسندها عليه:خير حبيبتي شفيك؟
دانا:آه ماأدري ياراكان تعبانه موت خلاص أنا بنام موب مشتهيه عشا أنت روح تعشى
راكان:لا ياتنزلين معاي أو ماأنزل
دانا فسخت حجابها ونزلته على الكومدينا وجات عند السرير إنسدحت وتلحفت وعطته ظهرها :لا ماأقدر والله تعبانه
راكان جاء عندهاوباس كتفها وهي معطيته ظهرها:دانتي شفيك ياعمري؟
أوديك للمستشفى؟!
دانا:إيه ياليت والله تعبانه بموت ياراكان بموت
راكان :بسم الله عليك ياقلبي يله قومي إلبسي عباتك
دانا قامت وهي تتأوه:طيب
فتحت الدولاب طلعت عبايتها
لبستها
ولبست صندلها
راكان:يله خلصتي
دانا :إيه
راكان :يله مشينا
طلعو من جناحهم ونزلو تحت
ريتان أول ماشافتهم نازلين
جات عندهم:خير راكان شفيكم مانزلتو تتعشون؟
راكان:دانا تعبانه بوديها للمستشفى
ريتان مسكت يد دانا الحاره:سلامتك دنو ماتشوفين شر
دانابتعب:الله يسلمك فديتك
ريتان:راكان لاتنسى طمني على دانا لاوصلتو هناك طيب
راكان:زين
وطلع هو ودانا
ريتان راحت لإمها تخبرها إن دانا تعبانه
عند العرسان خالد وريم
كانو بالفندق
حاطين لعبة من الألعاب الزوجيه
على الطاوله وشاعلين الشموع
ومطفين الأنوار كلها بس ضوء الشموع
وكل واحد جالس على كرسي
واللعبه عباره عن أوراق يسحبونها
واحد منهم يسحب السؤال
والثاني يسحب الجواب
واللي يجاوب بكل صراحه يلبي طلب الثاني
وطبعا أسئلتهم كانت عباره عن
الأشياء والصفات اللي الطرف الثاني مايحبها بالطرف الأول
وعن أشياء كثيره تخص حياتهم
جاء الدورعند خالد وسحب ورقه من أوراق الأسئله
وطالع ريم وإبتسم لها:السؤال يقولك يامدام ريم وش أكثر شي تكرهينه بشخصيتي؟
ريم عضت شفايفها وبدون تفكير قالت:تسرعك وعنادك
خالدضحك:ههههههههههههههههه أنتي للحين مانسيتي!
ريم:لا بس ترى بجد مابيك تتسرع بأي شي عشان ماتندم ترى دايم يقولون بالعجله الندامه وبالتأني السلامه
خالد مسك إيديها وباسها:حاضر من عيوني
بس ممكن طلب؟
ريم:فديت عيونك آمرني؟
خالد:ممكن بوسه هنا! ومسك يدها وحطها على شفايفه
ريم إستحت وسحبت يدها منه وجات بتقوم
خالد:وووين وين تعالي لاتتهربين من اللعبه
ريم رجعت وجلست:طيب لاتحرجني
خالد :مالي شغل فيك هاذي قوانين اللعبه
ريم:إيه وأنت مستانس على هالقوانين
خالد ضحك ورفع حواجبه:هههههههههه أكيد يله هاتي بوسه
ريم :مابي وقامت
خالد لحقها
ريم راحت تركض وهو يلحقها وميت ضحك عليها هالبنت خجوله وتصرفاتها تصرفات طفله
((راح أتركهم على راحتهم ونروح لدانا وراكان بالمستشفى))
بالمستشفى
راكان مو سايعته الفرحه لماقالت له الدكتوره إن دانا حامل
بس تضايق
لأنها قالت إن دانا مهمله صحتهاولها شهرين حامل وموداريه عن نفسها
الدكتوره وصت دانا على شوية فيتامينات
وقالت لها إنها لازم تحافظ على صحتها وتنام زين
وتاكل زين
ومن هالنصايح اللي صدعت براس دانا
طلعو من المستشفى
وهم بالسياره
راكان طاير من الفرحه:مانيب مصدق إني بصير أب
دانا :ياقلبي أنت لا صدق إن شاءالله كلها كم وقعدت تحسب بأصابعها8 شهور والبيبي بحضني
راكان سحب يدها وباس أصابعها:فديتك أنتي والبيبي وفديت حضنك بعد
دانا طالعته وقعدت تتأمل بعيونه
راكان:شلون يعني أصفط على جنب؟
دانا:ههههههههههههههههه لا كمل سواقه كمل
راكان طالعها وهو كاتم ضحكته
دانا:يوووه راكان عاد خلاص
راكان لف وقعد يطالع قدام وهو مبتسم
دانا دنقت وقعدت تلعب بدبلتها وسرحت بأفكارها
كلها شويات ووصلو البيت
دخلو الكراج ونزلو من السياره
أول مادخلو كانت ريتان جالسه بالصاله
جات تركض:هاا وش صار؟
راكان إبتسم:عن قريب بتصيرين عمه
ريتان قعدت تصرخ وهي مستانسه:واو ونااااااااااااسسسه ضمت دانا وهي فرحانه مبروك
داناباستها مع خدها:الله يبارك فيك
ريتان باست راكان:مبروك ركون واو وناسه ماني مصدقه
راكان:الله يبارك فيك
ريتان:لحظه خلوني أروح أبشر إمي وإبوي
راكان طالع دانا وهو يضحك:مرجوجه هالبنيه
دانا:هههههههههه حرام عليك فرحانه فديتهاا
خالد وريم
رجعوا من شهر العسل
وبعد ماسلموا على أهلهم ووودعوهم راحو يسكنون بالشرقيه
وراح يستقرون هناك
وخالد بيشتغل بوحده من شركاتهم اللي بالشرقيه
دانا الكل عرف عن حملها وإنبسطو لها حتى ريم حيل فرحت لها
وكانت دانا تقول بنفسها إنها مستحيل تتخلى عن هالطفل اللي ربي عوضها فيه
فقدت طفلها اللي من عساف
بس ماراح تفقد طفلها من راكان
لأن راكان هو حاضرها ومستقبلها
لاكن عساف من ماضيها
والحين قلبها ينبض لراكان لأنه هو الشخص الوحيد اللي يستاهل حبها
عوضها عن الحنان والأمان اللي فقدته
مسح دموعها
نساها آلامها وأحزانها
حياتها معاه حيل حلوه
مليانه حب وحنان وأمان
وهي ماتبي شي غير كذاا
فبيت إبو وليد
كان مسوي عزيمه بسيطه فبيته لإم سلمان
لأنهم إجو لـ الرياض
عند البنات
بيادر:يالله يابنات ماتصدقون أنا شكثر مستانسه بجيتكم
مي:ياقلبي وإحنا أكثر وربي
بيادر:هاا كيف أيهم أحلى جو جده وإلا جو الرياض؟
مي:لاجو الرياض أحلى مع إنو الجو حااااااار بس أرحم من جده لأنو جده مرااااااا رطووووبه فظيعه
بيادر:إي والله صادقه
سكتت وقعدت تطالع بروان
وقالت:هيييه يالأخت شفيك متنحه بذا الجوال وتطقطقين سولفي معانا
مي ضحكت بسخريه:هه سيبك منها هيا كذا طول الوقت على البي بي
بيادر:ابد هالبي بي مادخل مزاجي
روان طالعتهم بإحتقار وفيها الضحكه:مالت عليكم
بيادر:مالت عليك أنتي يلا بس كملي طقطقه وأنا ومي بنسحب عليك وبنروح عند عمتي وإمي
روان:يكون أحسن
بشاير كانت تنادي جولي تبيها تفتح الجرس
بس جولي شكلها مشغوله لأنها ماسمعتها
قامت وهي تتحلطم :من هاللي أحرق الجرس أوف
طلعت برى
وفتحت باب الشارع
وإنصدمت:أنتي؟ ومن الصدمه جات بتصك الباب
أم وفاء:أبوس إيديج لاتصكين الباب
بشايررحمتها:وش تبين؟؟
أم وفاء بكت بحرقه:أبي بنتي اللي إنفطر قلبي عليها
بشاير:بنتك جاها نصيبهاوتزوجت وراحت وإذا تحبينها صدق لاتخربين عليها تراها عايشه مرتاحه ومبسوطه خلاص خليها لازم كل شوي تطلعين بحياتها وتذكرينها بالماضي؟
أم وفاء كتمت شهقتها الي تحس روحها بتطلع مع هالشهقه:أنتي عندج عيال؟
بشاير بإستغراب:إي عندي ولد اللي يحفظه بس ليش تسئلين؟
أم وفاء :الله يخليه لج يارب بس لو أحد خذاه منج وحرمج منه بذمتج موب بيتقطع قلبج عليه؟تكفين أبوس إيدج حسي فيني تعبت والله تعبت وأنا أحلم باليوم اللي ألم بنتي فيه بس الظاهر بموت وأنا ماحضنتها ولا شميت ريحتها
وبكت بحرقه
بشايررحمتها:خلاص ياخاله أنا بعطيك عنوان بيت زوجها بس تكفين إذا ماتقبلتك هالمره خلاص إطلعي من حياتها
أم وفاء إبتسمت بين دموعهابفرح:مشكوره يعل عينج ماتبجي ضناج
بشاير:آمين تعالي تفضلي داخل على بال ماأكتب لك العنوان
أم وفاء:إنزين
بيادر ودعت بنات عمتها والفرحه موسايعتها لأن زوج عمتهاإتفق هو وإبوها إنهم يسافرون جميع
لماليزياا
لمدة إسبوع ويرجعون
لأن رمضان مابقى عليه شي
فطسسست ضحك على خبال عيال عمتها بسام وعزام
عمتها ومي وروان راحو بسيارة إبوهم
وعزام راح مع بسام على سيارته
ولما مشو
كانو صاكين شنطة السيياره اللي ورى على سراويل السباحه حقتهم
لأنهم فيهم رطوبه ويبون الهواء ينشفهم عاد هم على طول إجو من الإستراحه لبيت خالهم إبو وليد سلمو عليه ومشو مع أهلهم
ههههههههههههههههههههههههههههههه
وياما وياما راح نشوف من هبال هالإثنين هذول ^_^
سلطان دق على خالد وقاله إنه راح يجيه يتعشى عنده
خالد دق على المطعم وطلب عشاء
راح فتح لسلطان الباب ودخله وإستاذن منه
قال لريم تسوي إثنين كابتشينو
ودخل يآخذ شاور
ريم كانت ترتب البيت أخذت المكنسه بتروح تكنس المجلس
عشان تسوي الكابتشينو وماكانت عارفه إن سلطان فيه
أول مادخلت المجلس
شهقت وطاحت منها المكنسه
حست بقشعريره تسري بكل جسمها موب مصدقه إنها شافته على الطبيعه
هو قعد يتأمل فيها وتذكر الماضي
هالوجه نفس الصور اللي كانت ريم ترسلها له أيام علاقتها معه
جات بتطلع
إرتبكت ماتدري وش تسوي
سلطان قام وجاء عندها
هي لصقت بالجدار وهي تبلع ريقها
مسح على شعرها:هلا والله وأخيرا شفتك مادريت إن خالد ماخذك أنتي
ريم ساكته وتطالع فيه وميته خوف
سلطان قعد يطالع وجههاا ويتفحص ملامحها:ليش تكذبين وتقولين إنك مو من الشرقيه هاه؟
ريم دفته عنها وبسرعه أخذت المكنسه
وراحت وهي ماسكه نفسها لاتبكي
نزلت المكنسه بالصاله
ورمت نفسها على الكنب وهي تاخذ نفس عميييق
وماهي مصدقه إن اللي تو شافته سلطان
((هذا أول موقف يكون بين سلطان وريم والله يستر من المواقف الجايه))
البارت الثامن والثلاثين
عساف كان جاي عند إبو راكان
مد إبو راكان فنجان القهوه لعساف :سم
عساف أخذ الفنجان:سم الله عدوك بس ماني شارب قهوتك لين تلبي طلبي
إبو راكان:أفا عليك إعتبر طلب ملبى قبل تقوله
عساف:تسلم أنا ياإبو راكان طالب القرب منك على سنة الله ورسوله
إبو راكان:هاذي والله الساعه المباركه أنا من ناحيتي ماعندي مانع بس أبشوف عن رأي البنت وإخوانها
عساف شرب من قهوته:الله يكتب اللي فيه الخير إن شاءالله وأنا جاهز باللي تطلبونه
إبو راكان :ماتقصر والله
عساف نزل فنجانه وقام:يله أجل أنا أترخص منك
إبو راكان:وين توك جاي
عساف:والله عندي شغل بس حبيت أمر عليك وأطلب القرب منك
إبوراكان:أجل درب السلامه
عساف:الله يسلمك عاد ياليت ترد لي بأسرع وقت
إبوراكان :إن شاءالله بعد يومين أبرد لك
عساف:على خير يله مع السلامه
إبو راكان :وداعة الله
يوم طلع عساف
قام إبو راكان وهو يهلل ويسبح ولسانه ماوقف عن ذكر ربه
سكر المكيف
وطفى الأنوار
وأخذ صينية القهوه والشاهي والحلى
وراح لـ الصاله الداخليه
قعد وحط الصينيه على أقرب طاوله
وجلس يتقهوى
ونادى وحده من الشغالات وقالهاتنادي له راكان
كلها شويات وجاه راكان
راكان جلس:آمر يبه وش بغيت
إبو راكان:مايامر عليك عدو ياولدي بس بغيت أشاورك بخصوص إختك
راكان إستغرب :شفيها
إبو راكان:جاء عساف اليوم وخطبها
راكان وهو يحاول يتذكر:عساف من؟
إبو راكان:عساف ماغيره
راكان تغيرت ملامحه :اها إيه إيه ذكرته
,اخذ الفنجان من إبوه وصب له قهوه ومدها له
إبوراكان أخذ الفنجان رشف(شرب) منه شوي وقال:إيه شرايك فيه تر أنا من ناحيتي موافق بس باقي رايك انت واخوك والراي الأهم اللي هو راي إختك
راكان قام وهو معصب :لا يبه أنا ماني موافق
إبوراكان :ليه علامه الرجال خلوق ومتوظف وماناقصه شي
راكان:بس يبه انا ماني موافق وراح
إبو راكان إستغرب منه كمل قهوته
ونادى إم راكان وحاتم بيشاورهم ويشوف شرايهم
راكان صعد لجناحه وهو مقهور ومتوتر
دانا كانت بغرفة النوم تكوي ملابسها هي وراكان
شافت راكان جاي وهو معصب
جلس على السريروحط يديه على وجهه وتنهد بقوه
دانا إستغربت منه
قامت بتعب وجات عنده
حطت يدها على كتفه :ركوني شفيك
راكان بعد يدها:شفيني بعد فيه غيرك لاعب بحسبتي!
دنا مافهمت عليه:ليه وش سويت أنا!
راكان لف عليها ووجهه أحمرباين إنه معصب ومخنوق:عساف خطب ريتان وانا متأكد إنه عشانك موب لله خاطبها بس يبي يكون بالمكان اللي أنتي فيه
دانا إنصدمت وتذكرت مسج عساف وعرفت قصده من المسج سرحت شوي وقعدت تفكر صحت على صوت راكان وهو يناديها
دانا بفهاوه:هاا
راكان:شفيك تذكرتي الحب تذكرتي ماضيك معاه صح
دانا:راكان وش هالكلام لاتقولني شي ماقلته
راكان:لا ياقلب راكان أنتي أنتي صح ماقلتي بس باين من عيونك
دانا:راااااااااااااكااان
راكان مسك كتوفها بكل إيديه وقعد يهزها:للحين تحبينه للحين والله يستر لاتكونون متفقين على هالشي بس والله مايتزوج اختي وراسي يشم الهوا
رماها على السرير وطلع
دانا بكت وهي تطالعه لين طلع ضمت رجلينها لصدرها قالت بهمس وهي تبكي:لا ياراكان عساف بيتزوج ريتان عشان ينتقم مني وريتان مالها ذنب وأنا أحبك أنت ياراكان ماأحبه ليه ياراكان مصر تذكرني بالماضي ليش ماتساعدني على نسيانه ليش
ياربي ليش كل ماأرتاح يرجع لي العنا من جديد
راكان نزل بسرعه مع الدرج يوم جاء بيطلع سمع حاتم وهو يتكلم بنفس الموال
جاء عندهم وقال بعصبيه:عساف ماياخذ ريتان لو على جثتي فهمتو؟
حاتم لف عليه:بسم الله من وين طلعت أنت شفيك معصب
راكان:ماهو شغلك من وين طلعت المهم إنكم فهمتو اللي قلته
إبو راكان بعصبيه وأول مره يعصب كذا:طيب لو كنت أنا موافق بتعصاني وتمشي رايك انت
راكان طالع إبوه ثووووووااااني بعدين راح بدون ولاكلمه
إم ركان غمضت عيونها من صوت الباب لأن راكان صكه بقووووه
إبو راكان تنهد:مدري شفيه شب ضو من أول ماكلمته عن هالرجال مدري وش بينه هي وياه
حاتم:باين يبه إنه كارهه ومايبيه يتزوج ريتان مع إني أنا أشوفه ونعم الرجال صراحه وطعسسس بقوه بعد يعجبني وضحك
إم راكان:ياحليلك والله إنك رايق ياحتوم
حاتم:إيه وش وراي يمه تحسبيني نفسيه مثل ولدك ذاك
إم راكان دفته على خفيف مع كتفه :وجع عيب عليك هذا اخوك
حاتم:شفيك يمه أمزح
إبو راكان قام:يله بس خل عنك القرق وروح توضأ وإسبقني للمسجد قبل لاتفوتك صلاة المغرب
حاتم:طيب يبه
حنان كانت تبكي وماسكه يد فهد وتقوله بصوت مبحوح:فهود خلاص الله يخليك تكفى يكفيييك نوم الله يخليييك فهد قووووم فهوووووووود إذا تسمعني حرك يدك سو أي شي طمن قلبي وقلب إمي ترى قلبها محترق عليك وإبوي بعد تراه تغير للأحسن وإمي سامحته وأنا سامحته وأنت بعد سامحه
تحس لسانها إنشل عن الكلام
لأن فهد حرك يده الي هي ماسكتها
تركت يده وحطت يديها على فمها تكتم شهقاتها كانت زي المجنونه تضحك وتبكي بنفس الوقت موب مصدقه
طلعت برى العنايه بسرعه
وقالت بصوت متقطع من البكي:يمه فهد صحى والله صحى حرك يده يمه حركها
إمها جات عندها وضمتها وهي تهديها:ياحبيبتي أمس لما زرته حرك يده بس ماصحى إن شاءالله يصحى قريب
حنان رجعت تبكي وتحس بسمتها ماتت بشفايفها وفرحتها ماإكتملت
ضمت إمها بقوه وهي تبكي:يمه قولي له يصحى خلاص عاد ماصارت إلى متى وهو نايم إلى متى
إمها تحاول تهديها:بس ياقلبي بس إستغفري ربك هو مابيده شي كل شي بأمر الله وإلا هو لو على كيفه كان صحى من أول يوم صار له الحادث فيه
حنان:يمه أنا تعبت من البكي والحزن بيتنا له شهر ونص وهو كئيييب حيل كئييييب والحزن مغيم على وجوهنا حتى نومي ماأتهنى فيه
إمها نزلت دمعه حاره على خدها:الله كريم ياقلبي
حنان:يمه أنا خايفه فهد يمو
قاطعتها إمها:أوووص لاتقولين كذا إن شاءالله ربي راح يطول بعمره
حنان شهقت:إن شاءالله
دانا قامت وغسلت وجهها
ورجعت وأخذت جوالها
ماتدري وش تسوي رقم عساف ماسحته موب عندها
راحت لـ السجل
وحمدت ربها إنها مامسحته
وكان رقم عساف موجود من آخر مسج أرسله لها
بسرعه حفظت الرقم
وأرسلت له
"عساف تكفى إذا بقلبك شوي رحمه إترك ريتان بحالها حرام البنت مالها ذنب باللي صار بيننا
تعوذ من إبليس ولاتخلي الحقد والإنتقام يعمون قلبك
صدقني ماراح تستفيد شي"
بسرعه مسحت المسج ومسحت الرقم
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك