رواية من أعماق أحضان مجنونة -26
لفت ام وليد لنسايم اللي ماانتبهت لوجودها يوم تدخل مع مريم وسكتت لانها ماتحب احد يسمع بسوالف عيالها..
نسايم مريم قالت لي عن اللي صار...انا اقول...انتي زعلي منه وبيني له انك متضايقة يمكن يحس شوي..اما اذا تركتيه على راحته وانتي قممتي تلاحقينه غسلي يدك منه؟
سكتت ام وليد وقامت تناظر بمريم بضيق معناته حسابك بعدين....
نسايم هو بيني وبينك ياعمتي انتي بعد مادافعتي عن وليد قدام ابوه...كان بينتي ان الغلط من ريم ليش داخلة الفيلا بروحها؟هناك مو فلتهم.....
ام وليد بحدة أي بس كانت فلتهم قبل لاتجون انتوا وينتقلون للفيلا الثانية..يعني غرفة احمد هنا لسه مثل ماهي ماتغيرت ومفتاحها لسه مع احمد وريم لانهم بليالي العيد يبيتون هنا.....
سكتت نسايم وماعلقت بشي...
وقفت ام وليد وقالت انا رايحة اشوف الطباخ وش سوى على غذى اليوم...
نسايم أي خذي راحتك ياعمتي...
ام وليد كانت تاْشر لمريم انها تقوم تلحقها بعد شوي لانها تبيها ضروري.بس بدون ماتنتبه نسايم.
وبعد ماراحت بشوي..
مريم انا بروح اجيب جوالي وجاية....
نسايم اجل انا بصعد لااروى بغرفتها على ماتجين وركبي لنا..
مريم أي يالله.....
ركبت نسايم وام وليد تناظرها من المطبخ وبس غابت فوق طلعت وسحبت يد مريم واخذتها لغرفة الطعام وسكرت الباب..
ام وليد بقهر غبية انتي؟؟وش له تروحين تتكلمين عندها؟
مريم يمه..انتي رحتي قلتي لخالي ان وليد متزاعل مع ابوي وقلتي له يصلح بينهم؟
ام وليد أي بس انا ماقلت له وش اللي صاير بينهم!!!
مريم وش فيها لاعرفت نسايم ماهي غريبة عنا ودايم تنصحنا و..
ام وليد بقهر قلت لك الف مرة اسرار بيتي ماتطلع فاهمتني ولالا؟.وبعدين انتي متى بتكبرين ان شاءالله وبظل افهم فيك؟
مريم اوه ه ه..يمه وش فيك..اصلا حتى مشاري يدري؟
ام وليد بصدمة قلتي له يالمجنونة؟
مريم ناظرت امها وسكتت..
ام وليد انتي من وين طالعة انتي!!وحدة تقول لزوجها شي مثل كذا عن اخوها؟ياربي الهمني الصبر على ماحملتني يارب....
احمد انتي للحين نايمة؟
ريم وهي بعدها بالفراش لاتقول رحت الدوام ورديت!!
احمد وهو يبدل ثيابه لاوالله!!امزح معك يعني!!حلفي ماقمتي من طلعت؟
ريم والله..
احمد ناظرها شفيك؟
ريم بنعس مافيني شي بس مانمت البارح يااحمد!!
احمد وهو يضحك وليه مانمتي!!
ريم احلف بس؟؟
احمد وهو يضحك أي..
ريم اعتدلت بقعدتها ومن اللي قال طلعي ثوب العرس ولبسيه وخل نعيدها ليلة زواج انا ولاانت!!
احمد مااعتقد انا...يجوز فكرتك انتي!!
ريم لاوالله؟
احمد ههههه
ريم ظريف...
احمد ادري..دايم الربع ينادوني يالظريف..
ريم أي...والبنات وش ينادونك؟
احمد احم احم...يالوسيم....
ريم يجاملونك؟
احمد مسوي مقهور نعم وش قصدك بالله؟
ريم يعني وش بيكون قصدي بالله!!!انت لاانت وسيم ولافيك من الوسامة شي؟؟بيكونون يجاملونك اكيد؟
احمد ماابي اعطي اسماء المعجبات علشان لاتنصدمين من كميتهم!!
ريم هههه اقول تصبح على خير يالوسيم...والله...
احمد خلاص زعلت ومو متحرك من مكاني بعد!!
ريم وهي تشيل الغطاء من عليها تكون يعني شخصية لمى تزعل؟
احمد شوف بنت ال...ماهمها زعلي وقامت!!
ريم وهي توقف وش تبيني اسوي لك؟
احمد تعالي راضيني؟
ريم انت كل يوم تجي من الدوام تحط راسك وتنام وشعندك اليوم مع الاخذ والعطاء؟
احمد علشان اليوم صباحية عرسي فااكيد بكون رايق وسوالف مع زوجتي؟
ريم اها....طب يالله خذ لك منو بيراضي الثاني....
جلست على حافة السرير وقالت بزعل مصطنع انا عروس....وزوجي تركني من اول يوم وراح للعمل يصير كذا!!!
ناظرها وقام يضحك...
كان الصمت عام سفرة بيت ابو احمد اليوم..
هو مالمس صحنه اصلا وظل شارد طول الوقت..
ودارين تفكيرها كان رايح بمطلق وام وليد فضلت الصمت لانها مفكرة ابو احمد ساكت علشان وليد فماحبت تفتح أي سيرة والبنتين اللي موجودين كل وحدة تفكيرها رايح لبعيد..
وحدة قالت لها نسايم رجعي تقربي من دارين وسوي الامور طبيعي علشان تعرفين وش يدور هناك وشنو هم قاعدين يدبرون لكم من وراكم!!!
والثانية بعد كان التخطيط من نسايم فهمها انها لازم تزور مشاري في بيته ولافي الشركة وتشوف حياته بدون مايدري وتطلع على جواله والارقام الصادرة والواردة؟؟
نسايم كانت تخطط للثنتين وهم عليهم بس يفكرون متى وقت التنفيذ,,,,بس من ورى امهم طبعا!!!
دارين كانت سرحانة بمسجات مطلق اليوم وكلامه عن نفسه وحياته وكيف انه يبي يبدى معها علاقة جديدة وهل ها الشي ممكن يصير ولالا؟
ام وليد كانت تفكر بوليد وكيف تخليه يكسب قلب ابوه من جديد وبدون مايعتذر من ولد العراقية!!والقضية تستلزم بيت بو مشاري لازم تكلمه وتكلم زينة وتقول لها ان وليد معجب فيها وتدخل الفكرة براسها على انه يبي يتقدم لها بس بدون ماتقول لاابو احمد وماراح تعطيه خبر الا لمى تضبط كل شي؟؟؟
ابو احمد بروحه كانت افكار بكلام زينة؟؟؟
معقولة زينة تبي احمد؟؟؟
طيب واحمد هل يبي زينة؟؟؟
مايبيها هو بروحه قايل له انها وحدة ماتنفع لااخوه ها الساعة بتكون تنفع له؟؟
لاوفوق هذا كله ريم ؟؟؟
ماراح يرضى يتزوج عليها اكيد؟؟؟
أي بس انا وعدت زينة انها مدام اختارت احمد بنفسها ماراح يصير خاطرها الا طيب....
بس المشكلة اللحين احمد شلون افاتحه بموضوع العرس؟؟؟
بكورنيش الدمام...
كانوا جالسين على الكراسي ثنتينهم والصمت لاف حوالينهم...
الجوهرة ماجيتي علشان تسكتين ياهالة اكيد عندك شي تبين تقولينه..قوليه انا اسمعك؟
هالة مدري يالجوهرة حياتي متخربطة وماني عارفة شسوي...
الجوهرة استجد شي من بعد امس...
هالة كل شي حولي تاعبني ومنرفزني ومضايقني..
الجوهرة ليه عاد....
هالة المجنون جراح..
الجوهرة شفيه بعد؟
هالة اليوم الصباح كان ورانا ويوم تعطلت سيارتي نزل وعرض خدماته؟
الجوهرة طيب وين المشكلة؟
هالة مدري بس بكل المواقف الاقيه بوجهي..
الجوهرة صدفة...
هالة يمكن....
الجوهرة اذا حطيتي في بالك انها صدفة راح تكون صدفة....اما اذا حطيتي في بالك العكس فراح يكون العكس...
كان جراح طبعا موجود وقريب وجالس مع فطوم على الرمل القريب منهم وعاطيهم ظهره علشان يسمع كلام هالة..وجالس يلعب مع فطوم لعبة ماتتكلمين ولاكلمة لين اقولك انا وبعطيك اللي تبين وعلشان تضيعين وقت العبي بالرمل!!!
هالة وش بيكون يعني غير الصدفة ياالجوهرة؟
الجوهرة مدري بس اخاف تحطين في بالك السلسال اللي بليلة عرسك عطاك اياه وتبن
هالة بحدة لا...
ضاق خلقه يوم قالتها بها الطريقة...
هالة انا ماعمري فكرت برجال ثاني وانا على ذمة رجال وماراح اسويها...اصلا حتى لو انفصل عن علي ماراح يكون وجود لرجال ثاني بحياتي وانتي عارفة ها الشي...
نزلوا دموعه على خده بها اللحظات....
تنهدت وقالت همي كبير يالجوهرة وانتي عارفته...
الجوهرة هالة انتي قاعدة توقفين حياتك...
هالة بدموع محد بيحس بللي فيني يالجوهرة محد...
الجوهرة بحنان حبيبتي كلنا معك....
هالة وهي تبكي براحتها اليوم كنت اتكلم مع دارين....وفتحنا السيرة...الكل ينتظر ياالجوهرة الكل..ابوي واحمد وغسان ودارين وانا مستحية اقولهم حياتي ماراح تكمل مع علي وبننفصل...
الجوهرة انتي وين رحتي بعيد بس..انتي حطيتي في بالك انك بتنفصلين طيب ماحطيتي في بالك ردة فعل علي!!!وهل بيرضى يطلق ولالا؟
هالة ضحكت من بين دموعها يرضى يطلق هههه...نزلوا بعدها دموعها حارة لاتخافين علي بيطلق وماعنده أي مانع.....
تلاقينه بنى حياته خلاص ورتب كل اموره,,,
الجوهرة لا ياهالة العشرة ماتهون ابدا ولازم..
هالة اه ياالجوهرة تعبانة.....
الجوهرة وش رايك تروحين بيت الله عمرة يومين وتغيرين جو وتستخيرين هناك وتردين؟
هالة انا قدمت اجازة استثنائية يالجوهرة؟
الجوهرة ليه؟
هالة وهي توقف وتمسح دموعها لاني ببلغ علي قراري بها اليومين واذا تطلقت بكون بالعدة و...وانتي عارفة تكملة القصة؟
كل ها الكلام كان يدور على مسامع جراح اللي يمسح دمعة تنزل منه كل ثانيتن...
هالة..تبكي...وتبكي من قلب بعد!!!
هالة راح تتطلق!!
هالة ماتبي رجال ثاني بعد زوجها يدخل حياتها!!!
هالة شفيها بس وش اللي متعبها؟
تحب زوجها وهو مايحبها ويخونها مثلا وها الشي ماْثر على علاقتهم؟؟؟
اه لو ادري وش فيك بس يالغالية...
بس سالفة السلسال لسه ذاكرتها وقالتها لصاحبتها يعني هي كانت عارفة انا منو؟؟
فطوم تاْشر له بيدها بمعنى شفيك؟
جراح انتبه لها وهو يسمح دموعه وقال باسى حياتي تعبانة...
فطوم تاءشر له انها عادي تتكلم,,
جراح لا..خليك ساكتة...مالي خلق اسمع لوم ولاتعزية ولامواساة من احد؟لامنك ولامن غيرك؟
ماابي احد يسالني شفيها حياتك ومدري بشنو اجاوبهم!!
ماابي احد يقول لي أي شي.....
تعبان يافطوم تعبان...كانت تبكي...مقهورة ومتضايقة....وش بيدي اسوي لها وافرحها واغير حالها بس قولي لي!!!
فطوم حطت يدها على خدها وهي تاْشر له انها ماتدري وش ممكن تسوي وهي ساكتة لازم تتكلم علشان تقوله؟
راحت تفتح باب الفيلا بما ان مافي غيرها وغير ابوها...
يوم فتحت وقف قلبها لان اللي جاي كان مطلق....
ظلوا يناظرون في بعض..
مطلق بهمس ماراح تقولين لي تفضل ادخل؟
دارين بحدة انت مجنون؟
مطلق برواق انا جاي اشوف ابو احمد....حرام ولاصار نوع من الجنون؟
دارين بعدت شوي وقالت تفضل...
مطلق وهو يتقرب منها الله يسلمك,,,
دارين المجلس على يدك اليسار وبنادي ابوي..
مطلق لسه بدري على انك تنادي ابوك..دخليني وضيفيني....وبعدين يصير خير,,,
لفت له بحدة وكانت بتغسل شراعه بس لقته يبتسم لها وسكتت..
مطلق بهمس على اهبة الاستعداد للهواش!!!ولامتحفزة للقتال!!!
دارين بهمس انت شتبي مني!!
مطلق برواق قلت لك....
دارين أي بس ما اخذت رايي بالنهاية؟
مطلق ليه..عندك اعتراض ولاعندك حبيبي؟
دارين تاْدب عني فاهمني....
مطلق انا متاْدب والله متاْدب وماسك نفسي انتي بس تبين تنرفزين وتزعلين و...
دارين لاتنسى اني بنت العراقية؟
قالتها وهي تشدد عليها.....
مشت ومشى وراها بسرعة ومسك يدها لفها له وصارت قريبة منه حييل..
مطلق وهو ياكلها بعيونه علامك انتي!!خايفة مني ولاتتهربين؟
دارين بهمس خايف ابعد عني بلاجنون....
مطلق بقرب اكثر وش بتسوين يعني؟
دارين لا...
توه بيتقرب سمعوا صوت ابو احمد وابعدوا عن بعض بسرعة..
ابو احمد من المطبخ منو يادراين؟
اشوفكم بكرة على خير يالغلا,,,,
اجل بارت امس كان يقهر ههههه يالله ماعليه خيرها بغيرها ان شاءالله هههه
البارت الرابع والثلاثون
دارين بارتباك هذا مطلق يبى جاي يبيك..
قالتها وهي تناظر بمطلق اللي كان يضحك على ارتباكها..
ابو احمد خله يدخل يبى مطلق ماهو غريب..
اشرت له يروح الصالة وبقت هي بمكانها عند الباب..
ودخل مطلق لاابوها وقعدوا بالصالة...
ناداها ابوها بعدين وجت تركض..
دارين بارتباك خير يبى..
ابو احمد بعتب يبى وين الضيافة؟
دارين أي طيب..
مطلق سوي لي شاي اخضر مااحب الشاي العادي؟
رفعت راسها بتعطيه كلمتين بس تذكرت ان ابوها جالس وشافته يبتسم انه انتصر عليها...
ابو احمد ووين معرضكم؟
مطلق بالضاحية,,,,
اخذت نفسها ومشت يوم شافتهم يتكلمون بالعمل....
ريم بهمس احمد..هالة فيها شي؟
احمد لا..
ريم من جت من دوامها ماطلعت من غرفتها...اخاف تعبانة ولاشي...
تنهد احمد وقام يناظرها..
ريم بتشجيع ادري ماراح تتقبلني لو رحت انا لها بس انت غير..قوم شوفها يااحمد؟
احمد أي بس انا قلت ماابي ادخل واتدخل بحياتها؟...
حطت يدها عليه وقالت بحنان لو كنت اخوي وقلت لي ها الكلام صدقني بزعل منك؟انت الكبير ويظلون دايم بحاجتك يااحمد...
قال تهقين فيها شي..
ريم منت خسران لو طليت عليها..هي من يومين مع ابوك يعني ماشفتها ولاتدري وش فيها...
تنهد وقام واتجه للمجلس اللي صار غرفة هالة..
دخل الباب الفاصل وبعدها دق باب غرفتها وماجاه جواب...
شاف النور مشغل والباب مو كله مسكر وسمح لنفسه يدخل....
كانت نايمة....
تقدم منها وابتسم..
مايدري ليش نزلت منه دمعة وهو يشوفها نايمة...
يمكن لان هالة مو سعيدة؟
وهو عارف ها الشي؟
بس ليش السعادة متزاعلة مع اختي ومو رايحة لها بس؟؟؟
غطاها بحب وباس جبينها وظل يتاْملها...
اخته حلوة ومثقفة ومو قاصرها شي..بس ليش ماهي سعيدة؟
هل بحياة علي انسانة ثانية؟؟؟
الفكرة بس ارعبته وحسسته بالضيق..والله لو هي كذا ماتعيش على وجه الارض ياعلي وانت مزعل الغالية؟؟؟
انا الليلة لازم اتكلم معك ياهالة وافتح الجسر بينا ونتواصل لين اعرف وش اللي مزعلك وشو اللي مضايقك ونوصل لحل؟
تنهد وقام بعد ماطفى النور لايضايقها...
ريم يوم شافته جاي رديت!!
قال وهو يقعد جنبها نايمة...
ريم اممم
احمد بهمس تهقين علي مزعلها؟
ريم يمكن..
احمد بحمية اذا فعلا مزعلها لايلوم الا نفسه؟
ريم طيب يمكن هي مزعلته؟؟وش بتسوي ساعتها؟
سكت احمد ومارد..
قالت وهي تصب له شاي احمد الحياة الزوجية شراكة..
ولازم الطرفين يتسامحون ويتساهلون ولا مابتدوم بينهم الحياة؟
احمد بس في اشياء ياريم نوصل لعندها ومانقدر نسامح؟
ريم مثلا يعني؟
احمد يعني مثلا لو انا اخونك مع وحدة ثانية ترضين؟
ابتسمت وقالت أي بس انت ماتسويها حبيبي..
احمد بجدية أي بس احنا اللحين نحطها فرضية..ترضين؟
ريم ماراح ارضى..بس هل ماراح اسامحك علطول..مدري..فيها صعوبة الاجابة لاني مااقدر احكم على الظروف اللي بتكون محيطة يااحمد؟
احمد بعصبية الا الخيانة ياريم هاذي مافيها سماح!!المفروض تقولين لي لا حتى لو شرحت لك ظروفي...لاني لحظتها مافكرت فيك وهذا الغلط؟اني اشيلك من بالي واسمح لغيرك يحتل مكانك؟
ريم تقربت منه وحطت راسها على صدره وقالت اشش لاتسولف كذا مااحب ها السوالف انا!!
هاذي الخطوة وسويتيها يازينة....
طيب وبعدين!!!
مافكرتي وش بيصير؟
على شنو بيرسون وهم خاطبينك لااخوه مو له؟
طيب واذا مشت عندهم هل بتمشي عند احمد ولالا وانتي تعرفينه عنيد ..لاويحب مرته بعد!!!
سالت دموعها غزيرة على خدها...
خله يحب مرته انا مامنعته من حبه لها؟بس يتركني احبه؟؟
حرام انا قلبي بعد يحبه ومايعيش الا علشانه لايعذبني ويبعدني عن طريقه؟
ماابي منه أي شي...ابيه بس يدري اني احبه ومايمنعني!!!
والله ياعالم الحب مو بيد البني ادم!!
يجي غصب مو بالكيف؟
مانقدر نختار اللي نحبهم بارادتنا هم يدخلون قلبونا بدون مانحس ونشعر؟
سمعت باب غرفتها يندق ومسحت دموعها هذا اكيد ابوها جاي يسولف معها...يالله قوي قلبك يازينة بيجيك اللحين اكيد خبر مابتحبين تسمعينه...
دخل ابوها واول ماناظر بوجهها لقى اثر دموعها لسه باقي...
تنهد وحس بضيق وجلس جنبها..
حاولت تبتسم له وماتبين له شي بس قال بتاْثر ليش كنتي تبكين يازينة ياعمري..
زينة وهي تحاول تخفي باقي الاثر ماكنت ابكي يبى...
ابو مشاري وش مزعلك؟
زينة احمد ماكان خاطبني!!!
تنهد ابو مشاري وهي كانت تناظر بالارض...وقال بنفسه ياترى هل انا فعلا ماقلت لها ان غسان يبيها وهي فهمت احمد هو اللي جاي ولا شلون؟
ابو مشاري اللحين انتي وافقتي عليه وتقولين ماكان جاي خاطبك؟
رفعت راسها وقالت ودموعها بعيونها مدري..حسيت انكم انصدمتوا من شي؟
ابو مشاري يجاريها ماكنا متوقعين توافقين علشان انه متزوج؟
قالت بسرعة ودموعها طاحوا بس هذا الشي مايعيب احمد يبى؟
تنهد وقال ادري مايعيبه,,,بس تدرين حرمتين يعيشون مع رجال واحد هاذي تسوي هوايل ومصايب يايبى...
زينة انا راضية بكل اللي يبيه احمد يبى..ان شاءالله يخليني خدامة تحت رجله!!
قالتها بعجلة ولهفة خلت ابوها يناظرها وهي حست انها تسرعت...
ابو مشاري قومي غسلي وجهك وتعالي ابيك..
زينة ان شاءالله يبى..
اول ماقامت تغسل وجهها لفت انتباهه اسم احمد المكتوب بالدفتر اللي كان قبالها وبالقصيدة اللي تحت اسمه واللي كلها لهفة وحب وتنهد...
زينة بنته تحب احمد!!
واحمد يحب زوجته؟
واللحين ابو احمد بيكلم احمد عنها ياترى وش بيصير؟
عمري ماتخيلت اني بنحط بموقف مثل كذا وازوج بنتي بها الطريقة بس هي اللي اختارته وانا بسلمها اياه وانا مغمض؟؟؟
بس ياترى هل هي فعلا اختارته لانها تحبه؟؟وهل هو ممكن يسعد بنتي ومايزعلها؟؟؟
(زينة خلونا نتكلم شوي عنها (وادري كلكم ماتحبونها)
عمرها ثلاثة وعشرين سنة...
بنت عز بحق وحقيق لاسيما انها مدللة ابو مشاري اللي ماعنده غيرها وغير اخوها ومشاري اللي هو اخوها وصديقها ومايرضى بزعلها,,
رغم حياة الرفاهية اللي هي عايشتها بس قلبها ابيض..ومتواضعة وماتحب تتلاسن مع احد الا اذا شدت شدايدها..
ماعندها أي متطلبات ولا يهمها ملذات الدنيا...
حياتها هادئة جدا وبسيطة..
والدلع والرقة منها وفيها وماعمرها تصنعتهم,,,
حياتها من شافت احمد صارت كلها باسمه...
عندها مرض بالقلب وهذا اللي كان قالق ابوها عليها وعلى مستقبلها ومايخليها تبعد عن نظره ابدا!!
مشاري دز لبشاير مسج ادري مابتردين علي بس طمنيني عنك لو بمسج؟
تنهدت وماعرفت شتسوي...
متعبها تعبه وضيقة خلقه وزعله عليها..بس متعبها بعد موقفها هي لو مجرد شخص عرف وكيف بينظرونها وهل بيصدقون انها على علاقة سابقة فيه قبل لايتعرف على مريم ويخطبها؟؟؟
تنهدت بقوة..
شي بداخلها يبي يسمع صوته..يبي حنانه يمتص تعبها وزعلها وبنفس الوقت فيها قوة تبي تفارقه وتبعد عن المشاكل اللي بتجيها؟؟؟
احتاروا الصوتين مع بعض بس تغلب فيهم واحد على الثاني ورفعت الجوال وباصابع مرتعشة هي دقت له..
وهو ماصدق خبر شاله بسرعة....
مشاري بلهفة هلا حبيبي..
بشاير مشاري..
مشاري بتعب امريني..
بشاير مو قلت لك خلاص؟
مشاري مو بكيفي...كله من قلبي!!لوميه وعاتبيه هو مو انا؟
بشاير بتنهيدة انا ماحبيت اخليك على اعصابك واحقرك..بس انا بخير ولاتدق مرة ثانية لانك بتحرجني!!
تنهد مشاري وقال بظل احبك صدقيني....
بشاير انا مضطرة اسكر لان عمتي هنا..
مشاري طيب باي...
ماكانت عمتها هنا بس ماكانت تبي تطول معه اكثر واكثر وتعلق السالفة بينهم وتكبرها...
تنهدت وحست بضيق..
ودها تتكلم مع احد يفهمها ويطبطب عليها وماكو غير اثنين يامطلق ولاجراح ومدام مطلق بالمعرض خل تقوم تروح لجراح,,,,
بشاير شفيك؟
جراح وهو منزل راسه لاتشوف دموعه ولاشي....
بشاير سكرت وراها باب غرفته وقالت شلون مافيك شي....
من رديت الامس وانت حابس نفسك بدارك وماطلعت منها ؟؟
جراح فيك شي ياخوي؟
جراح بضيق متضايق شوي...بس انتي لاتشغلين بالك؟
بشاير جلست على فراشه وقالت كنت جايه اسولف معك واشكي لك بس الظاهر انت بتشكيلي وبسمعك؟
جراح بحزن ماعندي شي اقوله يابشاير,,,
فضلت انها تسكت بس شافت بيده البوم صور والظاهر كان يناظر فيه....
قامت من الفراش وصارت وراه وكان شبه شارد وماهو ماسك الالبوم بالقوة لانها يوم سحبته من يده سلمها اياه...
قامت تشوف الصور اللي فيه وراحت على الفراش تشوفه براحتها ويوم انتبه هو من غفلته انها اخذت الالبوم من عنده لف لها بسرعة لقاها تناظره بصدمة ,,
جراح بضيق بشاير..
بشاير جراح....هاذي الصورة قديمة حييل...من يوم كنا صغار...من اعمارنا سبع وثمان سنين!!
جراح أي وخير يعني..عطيني الالبوم؟
بشاير سكرت الالبوم ومدت له وقالت وهي بعدها مصدومة والصور اللي في الالبوم كله لشخص واحد بس!!!
مارد عليها واخذ منها الالبوم ودخله دولابه وقفل عليه ووقف قبال الدولاب عاطيها ظهره..
بشاير بصدمة وذهول هي ياجراح!!!معقولة هي اللي انت كنت تبيها؟؟؟
في شقة احمد....
وتحديدا عند الباب كان علي واقف وقباله هالة,,,,
علي اعتقد انك وصلتي لقرار .....
هالة بهدوء اممممم....
علي بعجلة أي....
هالة وهي ماسكة نفسها.... ماحنقدر نكمل مع بعض....
علي بتمتمة يعني تقصدين ان احنا ننفصل؟
هالة أي..
علي طيب.,....هالة..انتي طالق...طالق..طالق...
وورقتك بتوصلك...
قالها بكل برود وطلع....
تسندت على الجدار اللي وراها وانفجرت بالبكي....
طلقها بكل برود وماهمه اصلا يقول كلمة يجبر فيها خاطرها ولا يقول أي شي!!
اصلا هي مو متوقعة منه أي شي لانها عارفته....
ياالله ياهالة هذا انتي تطلقتي وهذي رغبتك يالله فرحي...ليه بعد ها الدموع؟؟؟؟
وش يعني انك مطلقة ياهالة؟ماراح تعني ابدا انك انكسرتي!!!
عندك اهل يحبونك ويخافون عليك.....علي مو مهم..اي شي ثاني بالدنيا مو مهم....
يالله قومي شوفي شلون بتخبري ابوك بطلاقك!!!
قومي شوفي شلون ام وليد اللحين بتكلمك وبتناظر فيك؟؟؟
قومي شوفي شلون المجتمع بيتقبلك وبيستقبلك؟؟؟
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك