رواية يا لبيه يا الدنيا العجيبة -20
ام فيصل:بروح اعطيه قرصه صغيره وبجي
ابو فيصل يضحك:عزالله راح فيها دحيم
راحت المجلس اللي كان مفتوح بأوامرها ودخلت:السلام
قام عبدالرحمن حب راسها:وعليكم السلام هلا خالتي
ساره:هلا يمه تبين قهوه
ام فيصل:مابي شي.. وقعدت
عبدالرحمن ساكت يطالع ساره بمعنى وش
فيها امك وساره تهز اكتافها بمعنى ما ادري
ام فيصل: سويره ابكلم عبدالرحمن
قامت:ان شاءالله يمه.. وطلعت
عبدالرحمن:آمري خالتي
ام فيصل:حددت الزواج
عبدالرحمن:هاااه لا ا
ام فيصل: لاهاه ولاغيره شف انت لازم
تحدد الزواج ماهيب حاله كل يوم مبسطين
انت وياها
عبدالرحمن:لابس قلنا عشان نعرف بعض و.....
ام فيصل:خل عنك هالخرابيط لو شهر مايخالف..
شهرين وتأشر على بلعومها ينبلع..
اما 4 شهور لا ..
وش قاصرك والا تبي تطول شعرك والا
تنحف عشان الثوب يجي قوسك
عبدالرحمن غرق ضحك يبيها يسكتها ماقدر .
مسك ايدها ويأشر بيده لحظه
ام فيصل توخر ايده وتمسك اذنه:وش تبي
وبعد تضحك هاه
عبدالرحمن فاقع ضحك عليها:طيب طيب
ابشري يالغاليه انا بكلم اهلي وش تبين بعد آمري
ام فيصل تبتسم: والله من حلاة هاللسان
اللي ضيع الخبله سويره
عبدالرحمن:هههههههه الله يحلي ايامك ياخاله
ام فيصل:وايامنا جميع الله يرضالي عليك
يمه تراني اشد لمصلحتكم
عبدالرحمن:داااااري والله ولاعمر واحد في
العايله زعل منك لانك ماتقولين الا الحق
باس ايدها وقام
ام فصيل:وين؟
ابتسم: طالع
ام فيصل:لا اقعد الليله تعشى مع ساره.. وقامت طلعت ورجعت ثاني مره:لاتروح يمه والا بزعل
عبدالرحمن يأشر على عيونه
دقيقتين ودخلت ساره:وش صار
عبدالرحمن:والله امك ذي اندر تيكر تخوف
ضربته:دحوم عيب عليك
عبدالرحمن حط ايده مكان الضربه: ماشاءالله كلكم مصارعين ياحظكم
ساره:ههههههه استهبل على راسي ..جد
عاااد وش قالت لك امي
عبدالرحمن: ابد اتفقنا على شي
ساره:وشو
عبدالرحمن: حاجه حلوه تعرفينها بعدين
بيت ابو تركي
رجع تركي من مشواره
واهله من الزياره
بدل وصلى وتمدد على السرير بيسترخي
شوي.. جت عينه على شي خلاه يغير رايه
عن الاسترخاء..نزل كان لابس برمودا ابيض
وتيشيرت احمر ورابط شعره كالعاده
تركي: انا طالع تبون شي
ندى ظلت تطالع فيه بدون ماتتكلم
تركي:ليه تطالعيني كذا فيه شي غلط؟؟
ندى تأشر له على شعره
تركي مافهم:وشوو
ام تركي طالعت ندى :على بالك ما اشوف
ندى كتمت الضحكه
تركي حس ان فيه شي احسن شي ينحاش:يلا انا طالع سلام
ام تركي: تعال
تركي''الله يستر'':سمي
ام تركي:اقرب عندي اشوف
تركي تذكر''اووووه نسيت نبهتني مااربط شعري'':شفيك
ام تركي:تعال هنا وتأشر على مكان جنبها
تركي''يااااااالله'' وجلس جنبها
مسكت شعره: الحين انا كم مره اقولك لاعاد تربط شعرك
وخر ايدها ويبوسها:هههههههه والله اسف اسف ويفك الربطه
ام تركي: اناسكت قلت يمكن يلتفت لنفسه
تركي: اسف يمه ماراح اربطه ثاني مره
ام تركي:وش اسف تتشبه بالحريم هذا
طبعك من رجعت من برا دايم انهيك وانت
اذن من طين واذن من عجين..شف انت لازم تقصه
ندى:اف هههههههههههههه
تركي: لا لا لا لا يممه تكفين اطلبي اي شي
ام تركي تضحك:زين اوعدني ماعاد تربطه
تركي:يمه حر
ام تركي:اجل قصه مايبيلها
حط راسه في حضنها:والله يمه لو تطلبين
هذا حلالك.. بس!!!
ندى تكمل عنه :والله حرام يقصه
ام تركي:والله دام ندى وراك اتوقع السنه
الجايه واصل ظهرك وحاط فيونكه بعد
تركي:ههههههههههههااااي يمه الله يهداك وش قالوا لك
ام تركي:قالوا لي انك سيد الرجال.. بس
ربط الشعر ماهوب من عوايدنا وانا امك..
اثرت عليك العيشه برا
تركي: طيب احاول لعيونك
ام تركي:الله يصلحكم جميع ياعيالي
تركي: اللهم آمين.. يلا تبون شي
ام تركي: وين تبي تروح
تركي: ابد جوري ناسيه ادويتها بروح اوديها
ام تركي: اسم الله عليها وش ادويته؟؟
تركي : هاه لا بنادول و .. انا ماشي
ام تركي: تعال تركي
وتسحب الكيس اللي بيده
طلعت الحبوب منه.. قلبت فيها..:هذي مو بنادول وش ذي
ماجاوب عليها
ام تركي: ندى مو نفس الحبوب اللي ياخذها ابوك
ندى: اشوف.. عرفت انها حقة الضغط
لفت رقبتها باقصى سرعه تدور اجابه عند
تركي اللي كان منزل راسه: جوري عندها الضغط؟؟
ام تركي:يااااويلي ضغط بهالعمر
تركي: ايه بس مو حاد يجيها وقت الانفعال
وان شاءالله تطيب
ام تركي: وش سويت للبنت
ماقدر يكذب وينكر كل اللي قاله: بتعدل..
ورجائي لاحد يفتح هالموضوع تكفين يمه
ماحبت تكبر الموضوع وبتتصرف بطريقتها
شال نفسه وطلع
ركب سيارته وقعد يدور شوي مايبي يروح
بيت عمه وهو متضايق كان متوقع ان محد
بيدري عشان مايحطون اللوم عليه لانه بدون
شك هو السبب
ارسل لها رساله: انا في الطريق بجيب الادويه حقتك نسيتيها..
مادق عليها لانه عارف بتسمعه كلمه تسم بدنه
شافت رسالته دمعت عيونها" اجل هذا وقته
افاتحه بالموضوع"
دقت عليه شاف رقمها: هلا جوري
جوري: اهلين فاضي
تركي:ماشفتي الرساله
جوري: الا بس اقصد ماعندك شي بعد كذا
تركي: مليون شغله
جوري: اهااه طيب
تركي: ليش؟
جوري: كنت ابي اكلمك في موضوع وجها لوجه قدام اخواني
خاااااااف: وليش قدام اخوانك؟!
جوري: هذا المفروض
تركي مايبي ينصدم: لامشغول تبين اجي
اخذك واذا فضيت تكلميني
جوري: لا تعال بيت اهلي
خاف: وش السالفه طيب؟
جوري: موضوع مايحتمل التأجيل ياليت تأجل اشغالك
تركي: بشوف
..............
اليوم الثاني
بيت ابو فيصل
ساره: بتروحين؟!
دانه: مدري بشوف..
نوف: دندون خل نروح نستانس ماصدقت
على الله وانا خلصت من الزفت المذاكره ومقابل الكتب
دانه: بشوف..
ساره: خلاص خليها على راحتها مع ان جمانه بتزعل
نوف: اول مره تسوي حفله حرام نكسر بخاطرها
دانه:قلت لكم بشوف
نوف: براحتك.. عندك من الحين لين العشاء تفكرين
دانه: يصير خير.. طيب ممكن تخلوني بروحي
طلعوا البنات من غير مايتكلمون هم
شايفين وضعها عقب رفض نادر لها
دق جوالها رقم غريب ماردت
رجع دق عليها:الو
دانه: هلا مين
- :ماعرفتيني
دانه: بلاسخافه مين
- :وحده
دانه: ترا اكره ماعلي هالحركات ياتقولين
من انتي والا بليز قفلي
-: لا تكفين طيب شوفي بلمح لك وانتي قولي
دانه: بسرعه
-: رشة عطر
دانه: لااااااااااه انتي رشا والله ماني مصدقه
رشا: بشحمها ولحمها شلونك
دانه: بخير وينك قطعتيني وادق عليك يردون علي ناس
رشا: مين
دانه: مدري يقولون شارين هالرقم
رشا: اي والله بعت كل ارقامي وطلعت جديد
دانه: انا صديقتك ماطرالك تسألين عني وتعطيني رقمك الجديد
رشا: والله كان عندي ظروف نستني
دانه: نستك اعز صديقاتك!!
رشا: لاتدققين اهم شي دقيت عليك وسجلي رقمي عندك
دانه: بس اختفيتي فجأه عسى ماشر
رشا: تزوجت
دانه:تزوجتي؟؟؟
رشا:هاه اإاي..اإايه
دانه:يالئيمه ولاعزمتينا
رشا: جا الزواج بسرعه وكان عائلي
دانه: خساره والله.. وين كلامك انتي بتزفيني
لو افكر اتزوج.. وماراح اتغير.. وهالكلام
رشا: معليش لاتزعلين بس كان مقتصر على اهلي واهله
دانه:لا عادي مو مشكله
رشا: وانتم وش مسويين
دانه مقهوره من حركتها: الحمدلله
رشا: ها اشوفكم اليوم عند جمانه
دانه: عزمتك؟
رشا: ايه بتروحين
دانه: باقي ماقررت
رشا: تعالي وحشتيني
دانه: الحين وحشتك.. لو وحشتك صدق كان
قلتي عندي صديقه واخت اسأل عنها مو كذا
تقطعين وتفاجئيني بزواجك
رشا: يعني شايله
دانه: لاوالله بس مقهوره على نفسي مامر
يوم الا افكر وين اختفت هالبنت
رشا: كنت بزورك والله
دانه: كنتي!! عموما اسفه مالي حق احاسبك
رشا: لاعادي ومالك الا يرضيك
دانه: سلامتك
رشا: اوك خلينا نتقابل الليله.. وبكرا بجيك
دانه: على راحتك
رشا بتردد: كلكم بتجون
دانه: والله مدري
رشا: اذا جيتي مثلا من بيجي معك؟؟.. >>تبي تتأكد ان جوري بتجي
دانه: خواتي وندى وجوري وريم
رشا: اهاا طيب حبيبتي نتقابل الليله باي
.............
بيت ابو تركي
امس مانام زين عقب اللي قالته جوري..
دموعها أججت بداخله نيران مشتعله..
مايدري شلون يطفيها..
سكت عن الموضوع بس خلاص هو كان
متخذ قرار في باله ولايمكن يتراجع عنه..
انتزعته ندى من افكاره:السلام
تركي: هلا عليكم السلام
ندى: وش مقعدك هنا لوحدك
تركي: شوفة عينك.. ابوي سافر وخلى كل شي علي
ندى: ادق عليه مايرد
تركي: لاتخافين توه كلمني قال ايام ويرجع..
وخلى الشغل دبل علي ودي اطلع واستانس
ندى:زين اطلع لاحق ع الشغل
تركي: والله عاد الشركه يبي من يداريها في ظل غيابه..
واي تسيب مو في صالحنا.. يعني لازم
امشي الامور مثل ابوي
ندى: وعبدالرحمن؟؟
تركي: والله ماقصر ذيب اغلب الحمل عليه بس يد وحده ماتصفق لازم اضاعف جهودي
ندى:عسسسااااكم ع القوه
تركي:آميييين
بتردد: ومتى بتروح الشركه
تركي: خمسه وبرجع على عشر اغلب
الشغل خلصته الحين
ندى: طيب اليوم معزومه وابيك توديني
تركي:وين؟
ندى: عند جمانه
تركي: عادي بس المشكله ماني فاضي..
ندى: تكفى تركي كل البنات بيروحون
تركي:نداوي ياحبيبتي مانيب فاضي والا وديتك
ندى: والله كنت متأمله نروح الحفله
ماتتعوض حاول تروك
تركي: كلمي نادر والا دحيم
ندى: نادر راح مع اخوياه وعبدالرحمن
بيرجع تعبان والله مايودينا.. فمالي الا انت
تركي: والسايق
ندى: مع امي..
تركي: اجل مالك نصيب
ندى: لا تكفى الله يخليك ماصدقت على الله
وتجي هالفرصه ابي استانس شوي
تركي: لاتزنين على راسي لو فاضي تبشرين
ندى: ترووووك والله نفسي اروح
تركي: لا اله الا الله طيب انا
ميم
شين
غين
واو
لام
م ش غ و ل
ضحكت عليه يجزأ لها الكلمه حسسها انها
ماتفهم:فاااهمه فاااهمه طيب وش الحل
تركي بتريقه وعيونه ع الملفات: تشربين الحليب وتنامين بدري
ندى:يووووووووووووه
تركي :يووووووووه منك انتي.. اشد شعري يعني
ضحكت على شكله:لاتشده خلاص ودني بعد ماترجع
تركي:ياااااكثر ماتزنييييين
ندى:هههههههه والله متلهفه ع الروحه
تركي: صدق من قال كثر الزن يفك اللحام
ندى:يسسس يعني موافق
تركي: ايه وياويلك تزنين مره ثانيه بالطريقه
هذي والله لأشوتك مع وجهك
ندى:هههههههههههههه
تركي:ههههههههههههه قسم بالله عله انتي..
الله يعين اللي بياخذك.. المهم اذا رجعت
القاك جاهزه والا والله اروح عنك
ندى: من عيوني ولاتنسى جيب جوري
تركي: ليش
ندى: مو بتروح هي
تركي : مدري يلا انا طالع الشركه
ندى: توافيق
................
المساء الساعه 8
جاها صوت من وراها.. خافت
بس حمدت ربها انها توها ضاغطه ع الزر
الاحمر.. انهت مكالمتها بسلام
جوري:بسم الله وشفيك
ريم:وو ولا شي
جوري على نياتها: مو زين توترين كذا ان
شاءالله كل شي بينحل
ريم: ايه.. ان شااءالله
جوري: نسيتيني وش كنت بقول.. ايه بتروحين عند جمانه
ريم: والله نفسي وانتي
جوري: مدري متردده
ريم: مافي وقت قرري من الحين
جوري: اللبس موجود بس ما ابي اروح بيدي فاضيه
ريم: مو لازم هي حفله عاديه جمعة بنات بس
جوري:لا فشله
ريم: كلمي تركي يجيب لك شي
جوري: لالا ما ابي
ريم: يعني ماراح تروحين
جوري: ويدي فاضيه لا
ريم: اوك براحتك
طلعت جوري
دق جوالها:الو
منذر: كلمتك اختي
ريم: ايه توني قفلت منها.. والله مدري وشلون ارد لك هالجميل
منذر: اهم شي تنبسطين وينحل موضوع ابوك
ريم: الله يخليك لي
منذر: على ماقالت لي بتقابلك في مستشفى ال.....
ريم: ايه اختي عندها موعد وشفتها فرصه ماتتعوض عشان محد يشك
منذر: اوك.. يلا انا اخليك الحين بروح اسحب
الفلوس من الحين
ريم: طيب.. وقفلت والكون مو سايعها من سعادتها
ودها تسوي اي شي
دقت على ندى: ندى
ندى:هلا ريم
ريم: باختصار جوري ماتبي تروح ويدها
فاضيه خلي تركي يشتري اي شي
ندى: ليش ماتقول له
ريم: مدري.. خل نفاجئها ونحطها قدام الامر
الواقع .. نبي اليوم نجتمع كلنا ونستانس ونعوض ايام النكد
ندى: ابشري الحين اقول له
ريم: مشكوره ياندى
ندى: بدينا بالسخافات.. اتركي عنك
هالرسميات حنا خوات مو بنات عم بس....
ريم:هههههههه فديتك انا.. يلا مع السلامه
قفلت ندى
توها بتدق عليه شافته يفتح الباب
ندى: وش مرجعك بدري
تركي:عشانك يالهطفاء لايكون غيرتي رايك
ندى: لاااااا ماغيرته وحلو جيت بوقتك
تركي: شعندك
ندى: امش نروح ناخذ هديه وحده لي و
وحده لجوري بناخذها معنا
تركي:ياحبك للمشوره
ندى: ها وش قلت
تركي: الله يصبرني عليكم
ندى: اجل اصبر بروح اجيب عبايتي
تركي: تعالي تعالي انا بروح لوحدي
ندى: بس....
تركي: مررررررره لاتحاولين والله
ماتروحين ناقص غثاك بعد هناك
ندى: هههههه طيب.. وقالت له وش ياخذ
طلع وراح لمحل عارفه شبر شبر.. كان
يشتري منه هدايا لرشا
دخل المحل كلم العامل يضبط له هديتين معتبره
..... بسرعه ياتبن انا غلطان جبتك هنا.......
التفت لمصدر الصوت وضحك في سره"
بايعها الرجال قدام هالأمه يهزئ"
...... اعوذ بالله ماتنعطين وجه.......
رجع التفت له وكانت اللي معاه لابسه عبايه
راس رحمها تهزأت قدام الناس.. كانت تكلمه بهمس
....... امشي بس خل نحاسب......
تركي سوى نفسه ماكأنه سمعهم وعطاهم
ظهره مايبيها تنحرج منه
قرب الرجال يكلم المحاسب: شوف حساب هالاغراض
والمحاسب كان عنده كومة اغراض سأله: احاسب هذي؟
الرجال التفت للي معه وبعصبيه: هذي اللي تبينها
الحرمه: ايه هذي وهذي
حالة جمووووووووووووود..
عقل يقاوم اعصار اجتاحه ..
لسان متلعثم يتحدث به في سره مع نفسه..
تركيز متشتت فكره وحده مو قادر يجمعها
على بعض لان كل فكره في فلك تدور..
"هذي رشا والله العظيم رشا بس ماخبرتها تلبس عياية راس "
التفت كان الرجل حائل بينها وبينه يبي
يشوف منها اي شي عشان تصدق ظنونه
بس هو متأكد مليون بالميه انها رشا .. تفرس في ملامح الرجل مايعرفه وماقد
شافه قبل كذا "هذا اكيد زوجها"
انتحى الرجل شوي.. شافها
تكلمت: لاخلاص رجع هذي ما ابيها
"ياااااااااه وربي هذا انتي!!"
اخذوا الاغراض وطلعوا
صمت.......
حيرة احزان......
دمعة وكتمان.......
سافر بعيداً نحو الأفق البعيد......
يجهل المكان........
تستحوذه عبارات وتخنقه آهات.......
الى أين؟؟؟
والى أي مدى؟؟؟
لايعلم ؟؟؟
>>مقتبسه
...................
قراءه ممتعه
توقعاتكم لكل من الابطال
*رايكم بتغير منذر؟
*تتوقعون ريم تنكشف؟
*وش تتوقعون قالت جوري لتركي قدام اخوانها؟
*وش رايكم بزوج رشا هل بيطلقها عقب ماتسديله الخدمه؟
*هل تركي راح يتأثر ويرجع يحاول يتقرب من رشا وهي على ذمة رجل؟
*وش راح يصير بالحفله؟
هذي تلميحات عشان تستنبطون منها التعليقات ياكسالى
موعدنا الاثنين ان شاءالله
البارت 15
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك