رواية عودتني كل يوم اسمع انا صوتك -32
سالم تم في الخيمة وهو مسدوح ....ودخلت عليه اليازية والعنود .....
اليازية:السلام عليكم ....
سالم اللي كان حاط الغترة على ويه و نايم ...وما رد عليها .....
العنود:شو فيه ليش ما يرد
اليازية:ما دري عنه ...خلينا نرجع داخل ...
العنود وهي تتقرب من سالم ......
اليازية:عنوووووود شو تسوين
العنود أشرت لليازية تسكت علشان ما يحس بها سالم .......
العنود و تيلس عدال سالم ...ورفعت الغترة من ويه سالم ....
سالم من سمع صوتهن ما تكلم بس يوم شلت العنود الغترة عن ويه تم يطالع العنود ويبتسم لها ....العنود ما تحركت تمت تطالعه و تبتسم له ....
اليازية تمت مصدومة من حركة العنود ....
اليازية:حووووووه شعندكم الواحد يطالع الثاني ويتبسم
سالم كان يتخيل اللي قدامه شمسة ...شو كان راح يسوي لها .. يالله ليت اللي نقوله في خاطرنا يتحقق ...أاااااااااااااااااااااااااااه يا شمسة وينج تشوفين حالي حتى تروفين عليه ....ويحن قلبج عليه ....والله أني أحس أني وحيد في هالكون ....
العنود قمت وقفت ....بس كان سالم يطالع فوق يتبسم ....
اليازية وهي تتقرب من سالم وتأشر بأيدها قدام عيونه :سالم ....
سالم وهو ينتبه لليازية :شعندج
اليازية وهي تضحك :أنا شعندي ولا أنت اللي اطالع فوق وتوزع أبتسامات
العنود تم قلبها يدق بقوا ((وعلى بالها أن سالم بدأ يحس فيها))...
سالم وهو يصلب عمره : أنتن شو تسوين هني
اليازية:ما شيء.... داخل ضيج وقلنا بنيلس في الخيمة ....
سالم وهو يفتر للعنود:أهليين العنود ....أشحالج
العنود وهي بتمووووت من الفرحة لأنها تحس بشعور غريب و غـــــــــــــيــــــــــــــر :مرحبا ...الحمد لله ...أنت أشحالك
سالم وهو يقوم من مكانه :أنا بخير ....استرحن أنا بروح عنكن
العنود لا اراديا:وين رايح خلك عندنا
سالم وهو يحط الغترة على كتفه :أنا تعبان بروح...أفكك رأسي عند الشباب ....
العنود:على راحتك
من طلع سالم من الخيمة ...واليازية من نزلت عينها من العنود....
العنود وهي طالع اليازية : شو فيج اليازية ...ليش أطالعيني جذي
اليازية:يونج ما تدرين شو سويتي
العنود:ما سويت شيء غلط ...
اليازية وهي تتقرب من العنود أكثر : العنود تحكم في تصرفاتج ...تراج وايد مبينه أنج تحبين سالم والكل قام يلاحظ هالشيء
العنود طلعت لسانها لليازية
اليازية:اللهم اللي عليه سويته... والباقي عليج .....
العنود :حرام عليج اليازية أنا شو سويت ....
اليازية:أقولج تصرفاتج واضحة مثل الشمس ....أن تحبين سالم .....
العنود:أففففففففففففففففففف ...راح أحاول أضبطها يا اليازية ......
اليازية: ناقمة ليش
العنود وهي تحب اليازية :والله أني أحبج ياليازية.....
اليازية :حتى أن أحبج وأتمنى كل يوم لج الفرحة والسعادة ......
وتمين العنود واليازية ترمسن في الخيمة ......
سالم تم يحوط في سيارته الرنج سبورت الذهبية وهو مشغل الراديو وكانوا حاطين غنية حسين الجسمي **ضيعتني وياك**
سويتها فيني وخليتني أهواك ....
أسهرت لي عيني وأحرمتني لقياك .....
كان العشم والله أنك تخاف الله حسبي عليك الله ضيعتني وياك....
ترتاح وأعاني وتحب لك ثاني تجفى وتنساني و أشلون أنا أنساك ...
كنت أحسبك خلي روحي أنا وكلي أهديت لك وصلي وأهديتني فرقاك ...
سالم من سمع هذي الغنية تذكر شوق ........
وتم يسمع الغنية بهدوء وصمت ويقول في خاطرها ((هذي الغنية تحكي معاناتي ....يالله هذي الغنية ذكرتني بشوق ...يا ترا شو أخبارها هل هي مرتاح في حياتها ....أطلقت ولا بعدها عند منصور .....فقال في خاطرها ليش ما أتصل بها وأتخبرها عن أحوالها ....لا شوق الحين على ذمة ريال ثاني ممكن تزعل اذا اتصلت عليها .. ما أريد خلي المشاكل تصير بينهم ....بس راح أسلم عليها شو يعني .والله أني أشتقت لصوتها ....تراني الحين بالنسبة لها وجودي والعدم واحد ...صدق أن الدنيا غدارة ...))
راح سالم ودور رقم شوق و ضغط على إرسال .....
صاح التلفون .....وسالم كان مرتبك .....
سالم:ألووووووو...
منصور:مرحبا ....
سالم:أهليين ...أشحالك عساك بخير
منصور وهو مستغرب :بخير يسرك الحال ....أشحالك أنت
سالم:الحمد لله أقول الطيب وين شوق ....
منصور:منو يبيها....
سالم:أنــــــــــــــــــــــا
منصور:منو أنت
سالم:أنا سالم واحد من اللي دارسين عندها في لندن .....
منصور:أهليين سالم ....لحظة ....طويل العمر ....
شوق:منو
سالم فهاللحظة ... قلبه يتقطع ويتمنى أنه ماااااااااااااااااااااااات ولا أتصل بشوق .......
يوم سمع منصور يقول لشوق حبيبتي ...ويه تغير وصار شاحب يعني منصور يحب شوق وشوق تحب منصور والحين عايشين في أحلى أيام العمر ....بس أنا اللي خسرت كل شيء .....الله يكون في عوني ....
شوق من سمعت منصور يقول لها أن سالم يباها في التلفون ....
تمت مرتبكة وخذت السماعة من منصور وراحت ويلست على الكرسي .....
شوق و عيونها في عيون منصور:ألوووووووووو
سالم من سمع صوت شوق غمض عيونه وحس بشعور غريب .....من زمان ما حس فيه .....
شوق:ألووووووو
سالم:هلا وغلا بالغالية اللي مهما صار يبقى مكانها بين الضلوع ....
شوق وخانقتها العبرة:أهليين سالم ....اشحالك
سالم:الحال من عقبكم ....
شوق وقاطعت سالم وهو يتكلم :أخبار الدوام
سالم :فيج تقولين أني عشت بدونج .....مثل الجسم بلا روح ....
شوق:وأخبار الأهل ....عساهم مرتاحين
سالم:الحمد لله ....ولو أنج تتهربين مني بأي طريقة ....
شوق تمت طالع منصور واللي حاس بشيء مب طبيعي في شوق يوم تكلم سالم ...
سالم:أخبارج .....وأخبار الزواج اليديد من منصور عساج مرتاحة وفرحانة
شوق:ما تتصور اشكثر أنا فرحانة مع حبيب قلبي منصور........عن مخلا منه .....
سالم انصدم من رد شوق وبرود أعصابها تجاهه .....
.....وسكت ....
وتم يقول في خاطره ( فهالسرعة يا شوق نسيتيني يـــــــــــــــــــــــــــــــــــــــالله خسارة 5 سنين اللي راحت من عمري وضيعتهن عندج )....
شوق:وأنت أخبارك سالم تزوجت ولا بعدك
سالم :لا .....ما تزوجت حتى الحين يا شوق الجرح اللي في قلبي ما طاب ............
شوق :الله كريم يا سالم ....
سالم:..............
شوق:أوكيه سالم شيء في خاطرك .....ترا نحنا طالعين ......وأخرت منصور وااااااااااااااااااااااااااااااااااايد ...
سالم:سلامتج ......وسكر في ويها ...
شوق من سمعت أن الخط انقطع ....
حزت في خاطرها ليش أنا أعامل سالم جذي ....هذا قبل كم من شهر كان زوجي وحبيبي ...بس الحين أنا على ذمة ريال ثاني ....سالم سامحني تراني عذبتك عندي والله أني إنسانه بلا رحمة وحرام سالم يحب شرات ..الله يعوضك يا سالم بوحدة أحسن عني بمليون مرة .....أااااااااااااااااااااااااااااااااااه صدق أن الرياح تجري بلا تشتهي السفن...
سالم تم يطالع عمره في المنظرة...يالله مو أنا اللي أتعب قلبي على سبت وحدة ما تسوى نظرة مني ...
أنا اذا أشرت بس تين البنات صوبي ...
والله يا شوق اللي خلقج خلق مليون وحدة شراتج وأحسن عنج ......
راح سالم وتسفر وتعطر وراح صوب محمد الكعبي ......
في ميلس محمد الكعبي ....
محمد: سالم ليش شكلك يقول أنك ما نمت من فترة
سالم:من قالك أني أنام ....والله من كم من يوم وأنا فيني إرهاق وارق مش طبيعي ما أقدر أنام
محمد:من شو
سالم:شدراني
محمد:ممكن تفكر ....
سالم:لا تخبر من التفكير ....باجر بيصير شعري كله أبيض .....من كثر ما أفكر ....
محمد:حرام عليك يا سالم مو زين اللي تسويه في نفسك ....
سالم:والله أحس أني راح أمووووت من الضيج....والهم اللي في صدري ...
محمد: خبرني شو صاير لك أمكن ترتاح شوي ....
سالم:اتصلت بشوق ...
محمد وهو معصب على تصرف سالم :أففففففففففففففففففف...كم من مرة وأنا أقول لك أنساه يا ريال ...عيش حياتك ...
سالم:مو بيدي يا محمد
محمد:سالم أنت ما ينعرف لك .. ...كل يوم بحال ......أستقر يأخي ...أنزين بتخبرك
سالم: تخبر ....
محمد:مو أنت الحين بينك وبين شمسة علاقة ليش تتصل بشوق ...هذا يعتبر خيانة في قانون الحب ..
سالم وهو يرد شعرها على وراء :أاااااااااااااه أشتقت لها .....وهذا مو يعتبر أني ما أحب شمسة بس شوق غير يا محمد تخيل من فترة أصبح وأمسي على ويها... أشوفها كل يوم.... اذا ما شفتها أسمع صوتها ....صعب الواحد ينسى في يوم وليلة ......الله يكون في العون ....
محمد:أذكر ربك ...والله بيعوضك بأحسن عنها ....
سالم:أن شاء الله ...
محمد:سالم
سالم:هلا ....
محمد:أقولك اليوم رحت المول ....
سالم:غريبة ليش شو مطري على بالك ...لا يكون ترقم من وراي ....
محمد وهو يضحك :لا والله بس راحت أخذ لي عطور ....
سالم: وأنا شو لي خص في السالفة تبي تقهرني على الفاضي ...
محمد:لا والله ....
سالم:عيل
محمد:شفت اهلك في المول ...
سالم:علومهم أشتروا شيء ولا يطالعون شو نازل يديد ....
محمد نقع من الضحك على سالم ...هذا اللي كان من شوي حزين و تعبان ينكت بعد .....
سالم:ضحكني عندك والله أني أحتاج للضحك أكثر منك
محمد وفيه ضحكه: أضحك عليك يوم تعلق على خوانك ...
سالم:أمااااايه فيه ....
محمد:لا خواتك وسيف أخوك ....
سالم:حرام خواني ما يطلعون وايد دوم يالسين في البيت .. خلهم يستأنسون شوي ....والله الحياة صايرة مملة .....
محمد:صدقك ....الناس الحين صاير ما تتواصل .....وحتى الأهل ما يتوصلون مثل أول ....
سالم: الواحد مشغول في دنيته ولاهي في حلاله ....
محمد:اسميه صدقك يا بوغنيم
سلامة وسارة واليازية والعنود يالسات في الخيمة .....
اليازية:سارة الحين أنتي بدخلين أدارة مثل سلامة
سارة:هيه ....أحس أن الإدارة واااايد صعبة ..
اليازية:بالعكس حلوة ...درستها كلها على الكمبيوتر ....
سارة وهي طالع سلامة: أشوف سلامة داخلتها تبي لاب توب ...
سلامة:لا والله............ مشكله يوم يكون تفكيرك غلط ...
سارة: صدقتج أنا ....
العنود: سارة أبا أقولج شيء بس مستحيه منج
سارة:افاااا عليج خذي راحتج
العنود:عادي عندج اذا تخبرتج من شيء ...
سارة وهي تضحك: أكيد عادي رمسي تراج خليتيني أتوتر ...
العنود:لا توترين حبيبتي بس ابا أقولج أنتي مخطوبة .....
سلامة من سمعت سؤال العنود نقعت من الضحك عليها ....
سارة وهي طالع سلامة :ليش تضحكين سلامي
سلامة وهي تصلب عمرها: ما شيء ذكرت سالفة...
اليازية:خبرينا شو هي السالفة ....
سلامة:ما شيء .... سالفة تخصني ....أوكية سار ة جاوبي على سؤال العنود...
سارة:لا محد خطبني ...بس اذا عندج حد أنا ما عندي مانع ...
العنود بعفوية :خلاص بخطبج لمبارك ولد عمي ....
سارة من سمعت طاري مبارك أحمر ويها ....
سلامة وهي تغمز لسارة:حووووووووووووه سارة لا تصدقين عمرج ....ترا هذا كله كلالالالالالالالالام
سارة وهي تضرب سلامة على كتفها :الله يخسج يالبقرة لسانج متبري منج..
سلامة تم تغمز لسارة بعينها وتضحك ......وتمت على بهالحالة أمكن 5 دقايق ...
سارة وهي تقوم مكانه تبي تطلع من الخيمة :غمزي حتى الصبح .....أنا بروح البيت
سلامة تمت ميتة من الضحك ....
اليازية: حوووووووووووه سلامي صدج أنج ما تستحين البنت بتروح بيتها ....زعلت
العنود:بسم الله منج .....سلامي قومي ربيعتج بتروح البيت .....
سلامة وهي تربع برع الخيمة ....
سلامة كانت اطالع سارة اللي تلبس نعاله علشان تروح البيت ....
سلامة:سارة والله أني أمزح عندج حرام عليج
سارة وتمثل أنها معصبه:وخري عن طريقي ....
سلامة:ساروووووووووووووووووه حرام عليج ....
سارة:أوكيه تبيني أرضى عليج
سلامة:هيه ...
سارة:حبيني في أيدي ....
سلامة:تموتين قدامي ما أحبج على أيدج ....
سارة :أوكية وخري عن طريقي ....
سلامة:أوكيه استثنايا بحبج على رأسج ....
راحت سلامة وحبت سارة على رأسها .....
فهاللحظة دخل مبارك الحوش ومطول للمسجل على الاخر وكانت غنية حمد سالم العامري**مليك الفؤادي** .....
والله أني أحبه حـــــــــــــــــيل مو لعبه
وأنه اللي تمكن وسط لفـــــــــــــــــؤادي
كم ليله ســـهرت ومنه الســــــــــــــــــبه
وعفت ذوق الشراب ولذت الـــــــــزادي
كاملا بالجـــــــمال وكمــــــــــــله ربـــــه
هو ملـــــــيك الفؤاد و غـــــــايه مرادي
ســـــــــحره اللي يتل الـــــــقلب من لبه
أشــــــــــهد أنه ســــــحرني زد لعبادي
بس ليته ترفق ما قــــــــــــسى قلـــبه
ولا تعمد عليه صــــــــــــــــد وعــنادي
لك شــــــــــــــعور المحـــبة لا تلـــــعبه
ولا تســــــــــــــمع حبيبي قول حسادي
نزل مبارك من السيارة وتم ايوول قدامهن ....سارة من شافت مبارك داخل الحوش تخبلت كان لابس كندورة بيضاء غترة حمرى ومتسفر حمدانية كان شكله عجيب ....
سلامة وهي تيبس عند مبارك: يعيش مبارك ....عليه أنه ما فيك حيله ....
مبارك وهو يغمز لسارة : ترا هاليوله أهداء خاص لعرب يعرفون عمارهم ......
سارة استحت ونزلت رأسها ......
فهاللحظة طلعن العنود واليازية من الخيمة من سمعن الربشه وتصفيق .....
من طلعن راح مبارك وقصر على المسجل .....
العنود وهي تربع صوب مبارك :حرام عليك مبارك من شفتنا قصرت
مبارك:أنا حر ....سيارتيه مو سيارتج ....
اليازية وهي تسير صوبهم :يا سلام حلال على سلامة و ....سكتت وطالعت في سارة ......
مبارك:ايوه حلال على سلامة وسارة وحرام عليكن ...
العنود:هذي الغنية أول مرة أسمعها ....يديدة ...
مبارك:ايوه....
العنود وهي تدز مبارك من عند الباب وتركب السيارة وتشغل المسجل وطول على الاخر ......
مبارك تم يطالع العنود بنص عين :صدج أنج ما تستحين
العنود تمت تضحك على حركة مبارك ....
مبارك:عنبوه ريال عرضي وبطولي تدفريني وتركبين سيارتي بالغصب ....بنات أخر زمن ....
العنود:أنت اللي بديت ...
مبارك:أنزين نزلي بوقفها في المظلة ...
العنود:والله ما قوم حتى أسمع الغنية كاملة ....
مبارك:عنوووووود قومي ....
العنود:حرام عليك مبارك...
مبارك: نزلي ترا عندي ريال في الميلس ...
العنود وهي تنزل :عطني الشريط ....
مبارك:على شرط ...
العنود:شنو
مبارك:تسوين العشاء أنتي
العنود:أوكية موافقة ....
مبارك:عنووووود ترى اللي يكذب يطيح النار....
العنود:قالوا لك ياهل ....عطني الشريط بسوي لك عشاء عمرك ما بذوق مثله ....
مبارك وهو يطلع الشريط من المسجل :تفضلي ....وترى وعد الحر دين وأنتي اللي وعدتني أنج تسوين العشاء ...
العنود وهي تشل الشريط من مبارك:راح أوفي بوعدي ....
سارة ما نزلت عينها من مبارك (يالله ...شو هالريال اجتماعي وحبوب والكل يحبه ويحترمه ...والله أنك يا مبارك كل يوم تكبر في عيني أكثر ...يالله عسى يسعدك ويفرحك فهالدنيا ....والله أني تقول توني مولوده ..... من حبيتك يا مبارك )...
في ميلس محمد الكعبي ....
محمد قاعد يرمس في التلفون ....
أما سالم عايش في عالم ثاني ...يفكر في وضعه لين متى وأنا مادري وين أمشي ....أنا خلاص ما أقدر أصبر أكثر من جذي أنا لازم أعرف منو هي شمسة ...ابا أكون عند انسان يهتم فيني... يحبني... يشتاق لي ,,,,يالله يا شوق ليش سويتي فيني جذي
محمد وهو يقطع أفكار سالم:حووووووه سالم وين وصلت
سالم وهو يلتفت لمحمد:تصدق يا محمد
محمد:شنو !!
سالم: توني صدقت أن الحريم تنجرفن وراء عاطفتهن .....
محمد:ما فهمت عليك ...
سالم:أنا....ما توقعت أنه في يوم من الأيام بفارق شوق وبحب غيرها .... بس ...شوق أنجرفت وراء عاطفتها ..وما فكرت بعقلها شو أنا بنسبة لها ....وشو راح يصير لي بدونها ...
محمد:قسم بالله ....اذا ما غيرت الموضوع يا سالم لا أروح وأخليك بروحك في الميلس
سالم وهو يقوم من مكانه :خلاص أنا أترخص ....عنك
محمد:سالم وين رايح....
سالم:ياخي أنت انسان ما تحس بغيرك ...أقولك أنا تعبان نفسيا وأنت تقول لي غير الموضوع ....أنا ابا أطلع اللي في خاطري والله أنك رايق .....
محمد وهو يضحك على سالم ويروح صوبه: السموحة يا سالم ...بس والله أنك طفرتني بهالسالفة ...
سالم:محمد..... وخر عني ...تراني مال من عمري ...
محمد:ليش أنت معصب.....
سالم: والله يحق لي التعصيب .... برايك أنا بروح البيت ...
محمد:أيلس بتعشى عندنا ....
سالم:ما أبا أعشى ....أبا شيء يطفي النار والقهر اللي في صدري ....
محمد:أذكر ربك يا سالم...
سالم وهو يطلع من الميلس : أشهد أن لا آله الا الله وأن محمد رسول الله ....
راح سالم من عند محمد .....أما محمد تم يالس في الميلس ويتذكر الموقف اللي صار له في العين المول ....ويتذكر خت سالم ..... ويقول في خاطرة (((هذي أخت سالم ....عنلالالالالالالالالاتها محلى عيونها.... .. أسمه *اليازية* يدل على أنها حلوة ....بس لاحظت في عيونها لمعة الحزن ...نفس اللمعة اللي في عيون سالم......أاااااااااااااااااااااااااااااه يا سالم والله أني راحمك .. صدج أنه متعب نفسه على الفاضي ...بس والله من حقه بعد قصة حب وبعدها زواج تنسه شوق الله يكون في عونك يا سالم ...الله يعوضه بوحدة أحسن من شوق))
سالم وقف سيارته في المظلة وراح صوب الخيمة وحصل أمه وأبوه ومحمد يالسين .....
سلام:السلام عليكم ...
بو محمد و أم محمد ومحمد :وعليكم السلام ورحمة الله وبركاته ....
وراح وسلم على أمه وأبوه ومحمد .....
وأنسدح على ريول أمها ......
بو محمد:علومك يا بوغنيم
سالم وهو مغمض عيونه:طيبة الحمد لله .....
أم محمد وهي تمسح على رأس سالم :سالم
سالم:لبيه أمااااايه ....
أم محمد:عني أفداك ليش سواد تحت عيونك ...
سالم:ما أدري
أم محمد:يأبوي لا تسهر ....لا طالع في مبارك اللي ينام حتى باجر العصر .....
سالم:أنام ....منو قالج ما نام
أم محمد:والله لو تنام بتشوف شكلك غير .....يوم يات من لندن كان شكلك أبيض وحلو ... شوف الحين ويهك صاير تعبان و أسود...
سالم في خاطره في لندن وضعي غير والحين .....
بو محمد:هذا وأنت توك في أول شبابك تعبان والله لو صار عمرك سنة 30 شو راح يصير لك بتصير شيبه ....
محمد وهو يضحك : أماااااااايه سالم دواه العرس....أنا أعرفه ...
أم محمد:شو سالم ...اذا أنت تفكر في العرس ...أمره ما عليك... أنا بيوزك العنود .....
سالم ما رد على أمه ....وقام بيروح داخل
أم محمد:الله يهديك ...
سالم وهو يكلم عمره ((أفففففففففف يا من كره العنود ....والله أنهم طفروبي بها ......))
سلامة واللي كانت طالعة من المطبخ وعندها سارة والعنود واليازية
سلامة:هااااااااااااي سالم ....
سالم واللي وقف مكانه:أهليين سلامة... ويلتفت صوبهن ..مرحبا ملالالالالالالالالالايين بالشابات
سلامة راحت وسلمت على سالم:أشحالك
سالم:بخير....أشحالكن عساكن بخير .....
الكل :بخير ....
سالم وهو يطالع سارة: سلالالالامي منو هذي
سارة أستحت ونزلت رأسها .......
سلامة:هذي سارة بنت سيف ....
سالم وهو مستغرب:هذي سارة ....اشحالج سارة ...وأشحال أهلج
سارة:بخير يسرك الحال...
سلامة:......هذي سارة تعرفها ....
سالم:لا والله بس أسمع عنها ..... شفتها كم من مرة...... وأذكرها يوم كانت تي تذاكر عندج في الثانوية ........
وتم يقول في خاطره((ما نك هين يا بروووووووووووووووووووووك تعرف تختار....صدج وااااااااايد حلوة ....ليتني خليت مبارك يدور لي وحدة ....وأبتسم ))
سالم:....أوكيه شيء في خاطركن ....
سلامة:سلامتك .....
وراح سالم فوق في قسمه وشغل التلفزيون وتم يالس يطالعه ......
الساعة 10 ونص ....
تموا مبارك وأحمد يالسين في الميلس يرمسون ....
أحمد يالس على أعصبه يبي يعرف الرد....
بس مبارك مكيف على الاخر وكان يقلب في القنوات وكل شوي يحط غنية .....
أحمد:مبارك
مبارك: هلا...
أحمد:أقولك سمعت خبر مني ولا مناك
مبارك:لا حشى ...
أحمد:اهااااااا ...
مبارك يقول في خاطره ((أدري أنك تدور علشان تسألني عن موضوع الخطوبة بس والله لا أحرق أعصابك يا بو شهاب))
أحمد تم يطلع التلفزيون ويدعي في خاطره على مبارك ((يعني هو الحين ما يدري أني على أعصابي يالس ...صدج أنك نذل وما تستحي ))
مبارك:أحمد ...
أحمد وهو متحفز:هاه ....
مبارك:ابا أرمسك عن السالفة اللي كلمتني عنها من كم من يوم...
أحمد ويبين أنه مو مهتم بالسالفة:أي سالفة
مبارك وفيه ضحكه :السالفة اللي خبرتني عنها يوم كنا في السيارة
أحمد وهو يخلي عمره غبي وما يذكر بسرعة بس (هو من داخل قلبه يقول أرمس تراني قاعد على أعصابي) ...
أحمد :أي سالفة ....
مبارك:أوكية أنسى الموضوع ....
أحمد:لا والله ما أنسى ...خبرني شو في خاطرك ....
مبارك:..................
أحمد:حووووووه شعندك ...ليش ساكت
مبارك: نسيت شو بقول...
أحمد:عنلالالالالالاتك ...أنا بذكرك
فهاللحظة مبارك نقع من الضحك على أحمد ......
أحمد:شو فيك تضحك
مبارك:ليش تسوي حالك أنك ناسي الموضوع ..بس أنت داخل صدرك تبي تعرف الرد الحين.....
أحمد وفيه ضحكه :عنلالالالالاتك ....المشكلة أنك أنت تقرأ أفكاري ...المهم خبرتها ..
مبارك وهو يلعب بجهاز التلفزيون :هيه ....
أحمد: شو قلت لك
مبارك:ما قلت لي شيء
أحمد:ليش
مبارك وهو مستغرب :شوووووو
أحمد:قصدي ليش ما ردت عليك
مبارك:تقول تبي تفكر في الموضوع ....
أحمد:شكلها بتوافق أو لا ....
مبارك: شو دراني عن قلبها...
أحمد:أنت شو تقول راح توافق أو لا...
مبارك:تبي رأيي
أحمد:هيه ...
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك