رواية توأمي لكن انا غير ومالي مثيل وراسي عنيده -29
يوسف بابتسامه تطمنها:أكيد لا تخافين راح أتولى هالموضوع بس خلي المحقق يجي وقولي له اللي تعرفينه وأنا راح أحاول اخذ القضيه وأتابع موضوعها
ألاء وهي تشوف يوسف يرفع جواله:مشكور يوسف ما ادري وش أسوي من دونك والله خفت كثير
يوسف ابتسم لها:لا تخافين وأنا موجود
ورد على خاله صافي اللي قاله السالفه كلها
قعدت تطالع الباب اللي يودي على الحديقة وقامت من مكانها
الشغاله:وين روه
مدى وهي تلتفت عليها:نعم لا يكون أنتي البودي قارد علي وأنا ما ادري يله اقلبي وجهك
الشغاله:هذا نعناع ما أبغى اشرب
مدى:صدق دلاخه ليه شايفين معاي مغص ولا نزله معويه الحمد لله والشكر
طلعت وطنشت الشغاله ونزلت البرقع علشان إذا صادفها عامل
مدى وهي تشوف المكان:اكشخ هالعجيز عايشه في هالبيت الشرح الوسيع لحالها والله حركات مو إحنا 3 عوايل في بيت واحد والله لو أجيب خيل بيركض في هالحوش
نزلت نظرها لرجولها شافتها حافيه:خلني أجيب زنوبتي
راحت ولفت على البيت وراحت جهة الباب ولبست زنوبتها ورجعت لفت حول البيت وهي تمشي لقت مراجيح حقت صغار
مدى:ما خبرت عندهم بزارين بس يا سلام والله زمان عن المراجيح يله نجرب وخلنا نسترجع المجد القديم خلني أفلها مدام محد حولي ههههه
في جهة ثانيه في البيت وقف عند باب بيتهم ونزل من سيارته وتوه بيدخل ورن جواله: هلا – إيه يوسف – وشو – ملف قضيه – باستغراب:بنت خالك – اسمع اسمع – شوي وانا جايك اوكي خلاص فمان الله
صك منه وهو مستغرب:بنت خاله الله يستر اغير ثيابي واشوف وش صاير معاه
دخل لبيتهم ولما وصل عن باب الدخول للبيت لقى جزمات كثيره ولمح بين الجزمات زنوبات خضراء:من جاينا
وهو يدخل تذكر النصابه صاحبة الجالكسي وضحك ولما دخل سمع اصوات حريم وبصوت عالي وهو يطق الباب بالمفتاح حق السياره:يا ولـــــــد
أم راكان وهو تقوم له:هلا يا وليدي
راكان وهو يبوس يدها ورأسها:هلا بك يالغاليه عندك ضيوف
أم راكان:ايه هذول أم صالح جدة يوسف
وبناتها وحفيداتها
راكان:إيه عرفتها
أم راكان:اصبر يا وليدي خلني أناديها تسلم عليها
راكان:طيب
دخلت أم راكان ونادت الجده وطلعت له وراكان وهو يبوس رأسها:وشلون يا جده عساك بخير
الجده: انا بخير جعلك بخير ما شاء الله تبارك الله صرت طويل
راكان وهو يضحك:أكيد يا جده الناس تكبر وتطول
الجده وهي تضحك:اذكره يوم انه توك صغيرور وأمك تركض وراك وأنت مطلع عيونها
راكان:ههههههههه
أم راكان:ههههههه إيه الحين بسم الله عليه شايلني شيل
الجده:وش أخبارك أنت والشغل معك
راكان:طيب وأموري طيبه طاب حالك
الجده:هجل ما أطول عليك قلت اسلم عليك وأنا جدتك
راكان:والله القصور منا ولا المفروض انا اللي اسلم عليك وأبوس راسك وأنتي في مكانك ما أخليك تتعبين وتجين عندي
الجده:تعبك راحه
أم راكان:اقلطي ندخل نكمل سوالف وأنت وأنا أمك بتقعد ولا بتطلع مره ثانيه
راكان:لا يمه برجع اطلع مواعد يوسف
أم راكان:طيب زين
مشى راكان وصعد الدرج بسرعه وراح غرفته وخذا له شور سريع وبدل ثيابه ونزل مره ثانيه ولما طلع لمح الزنوبات مو موجودات بس طنش ولما جاء بيطلع سمع ضحك استغرب الصوت ومشى باتجاه الصوت ولما وصل جهة المراجيح
طلعت عيونه وحس انه يتحلم وصار يرمش شاف بنت كبيره حاطه برقعها و تلعب في مراجيح أطفال وسمعها تكلم نفسها
مدى وهي تجلس ونشبت:امحق نشبنا يام الوهقه
حاولت تطلع نفسها وما قدرت:يا ربي وشلون اطلع الحين يا ربي والله لقافه فيني ولا انا عجوز وش له اركب حق بزارين
راكان وهو يتذكر الصوت:هي النصابه حقت الجالكسي
ركز وشاف الزنوبات اللي كانت عند الباب وابتسم على شكلها وهي ناشبه في الكرسي حق الارجوحه
مشى لحد ما قرب وبصوت عالي:وش تسوين
مدى طلعت عيونها وطالعته :اااا احم احم ااا
راكان:وش تسوين يا نصابه هنا
مدى بدفاع سريع:والله مو نصابه بس كان نفسي في الشوكلاته
حطت يدها على فمها وسحبت الغطا على عيونها
حس وده يضحك وبهمس وهو يمثل العصبيه:وش رأيك لو اخذ لمركز الشرطه الحين
مدى وهي ماسكه برقعها هزت رأسها يمين ويسار علامة الرفض وبهمس:والله ما اقصد
راكان:ولا اعلم احد من اهلك عن حركاتك الخايبه ها..
مدى اللي حست انه تفشلت من حركتها في المستشفى وفي المجمع والحين منظرها وهي ناشبه في اللعبه حست إنها بتبكي من الفشيله وقلبها يرقع من الخوف وبهمس:انا
وصارت تشاهق وصاحت بصوت عالي:اهئ اهئ والله ما قصدت حتى يوم نشبت بلا بغيت أجرب الارجوحه
راكان رفع حواجبه مو من ردها إلا من صياحها
سمع صوت قريب من المكان طالعها وعطاها ظهره ومشى من المكان وقبل ما يختفي من المكان سمع البنت تناديها:مدى
جات لها أسير اللي شهقت :وش تسوين
مدى وهي تبكي:أسوره طلعيني اهئ اهئ
أسير:مدو وش فيك يا قلبي ليش تبكين
مدى:طلعيني بعدين اسألي
ساعدتها أسير علشان تطلع من الارجوحه
أسير وهي تطالع مدى اللي تمسح دموعها:وش فيك يا قلبي
مدى وهي تمشي بسرعه علشان تدخل للبيت:ولا شي ويا ويليك لو قلتي لأحد عن اللي شفتيه
أسير:مدو
مدى بحزم وهي تطالعها:أسير قلت ما فيني شي
دخلت مدى وأسير بعدها وراحت مدى وغسلت وجهها ورجعت جلست مع الباقين
الجده:ها عسى بطنك أحسن الحين
مدى بهمس:إيه
أسير وهي تطالع مدى بخوف ما تدري ليه حاسه إن فيها شي بس ما حبت تضغط عليها وراح تخليها على راحتها
قاعده على السرير وتفكر وتتذكر الماضي
جالسه مع أمها وهي معصبه من الكلام اللي سمعته:وش قصدك يا يمه إن جدتي بتتزوج يعني بتأخذ رجال غير جدي الله يرحمه
أمها تنهدت:يا بنيتي لو ما الظروف كان ما تزوجت
سجيه وهي توقف وهي معصبه:يمه وش هالكلام أي ظروف جدتي بعد كل هالعمر تتزوج
أم سجيه:وش فيها لا تزوجت بعد هالعمر هي المفروض متزوجه من زمان بس رفضت كل اللي تقدموا لها علشان تربيني والحين انا وش كبري ولا راح أوقف في طريقها
سجيه:يمه أنتي من عقلك هي جده الناس بياكلون وجهنا
أم سجيه بحزم:الناس ما لهم عندنا شي وبعدين وين الناس يوم أبوك رماني وتزوج وحده يحبها وين الناس يوم إننا ما نلقى شي نأكله وين الناس يوم إننا ننام وإحنا جوعانين الحين بنهتم للناس
سجيه:بس يا يمه
أم سجيه وهي تقاطعها:لا بس ولا هم يحزنون
سجيه وهي تجلس وكأنها اقتنعت بكلام أمها:طيب من هذا اللي بياخذها
أم سجيه:وحد تاجر ينقال له خليفه الزايد
أم سجيه:هذا واحد كان يبغى يخطب جدتك يوم كانت توها صغيره قبل ما تأخذ جدك وأهله رفضوا وجدتك تزوجت ولما مات جدك جاء وخطبها بس هي رفضت علشان تربيني والحين لما عرف بظروفنا وان ما عندنا رجال رجع خطبها وهي وافقت وراح بيجب الخير لنا وراح نرتاح من هم هالعيشه ونعيش مرتاحين
سجيه:قصدك انه حب قديم لجدتي
أم سجيه:إيه حب دام 30 سنه تقريبا هو لحد الحين يحب جدتك ومتمسك فيها
سجيه:معقوله في حب كذا
أم سجيه وهي تبتسم:وفيه أكثر من كذا
رجعت لواقعها وتنهدت بصوت مسموع
أمجاد اللي موجوده وقاعده على الكرسي:تذكرتي الماضي
سجيه وهي تطالعها وبهدوء:إيه
أمجاد:إلا صدق أنتي عمرك ما قلتي لي وش صار بينك وبينه بعد وفاة جدتك
سجيه باستغراب:ما صار شي
أمجاد بابتسامه على الجنب:صدقتك
سجيه سكتت وهي ترجع بالذاكره ليوم بعد العزاء بأسبوع
كانت تقعد عند الجيران لان ما كان عندها احد وحتى عمها ما اعترف فيها إلا علشان الفلوس فما وثقت فيه وقعدت عند جيرانهم
في يوم جات زوجة جيرانهم:يا بنيتي زوج جدتك يبغاك
سجيه اللي عيونها حمر من البكاء لأنها بقت وحيده:طيب
طلعت للمجلس اللي قاعد فيها الجد:السلام عليكم
قام لها الجد:وعليكم السلام اجلسي
جلست سجيه:خير
طالعها الجد:اسمعيني زين انا أبغى منك شغله
سجيه:وش هي
الجد وهو يطالعها:ابغاك ما تعرفيني ولا أعرفك
سجيه باستغراب:كيف يعني
الجد:قصدي انا عندي عائله وإذا احد عرف إني متزوج جدتك راح ينهدم كل شي
سجيه:ما فهمت
الجد:يعني انسي انك عرفتيني أو إني زوج جدتك
سجيه اللي وقفت وبعصبيه:أنت تجحد معرفتك بجدتي الله يرحمها
الجد:الله يرحمها انا ما قلت كذا بس أنتي ما تعرفيني هذا اللي اقصده وخلص الكلام
وقبل ما يطلع وقفه صوتها:مو ببلاش
التفت لها:نعم وش قلتي
سجيه اللي بان الخبث في عيونها بعد ما حسبتها بسرعه في عقلها:قلت لك مو ببلاش علشان ما أعرفك ادفع
الجد باستغراب:وش ادفع
سجيه:ثمن نسياني لك وعدم معرفتك
الجد اللي ضغط على أسنانه:كم تبين
سجيه اللي تذكرت عرض أمجاد علشان يسافرون يدرسون:ادرس على حسابك
الجد:صار
وتوه بيلتفت ويطلع:بالخارج
التفت مره ثانيه عليها:وشو
سجيه:الدراسه وتكاليفها عليك والدراسه بالخارج
الجد اللي عصب:أنتي انهبلتي انا ادفع فلوس لك علشان تدشرين هناك
سجيه اللي ابتسمت بنذاله:هجل لا تطلب مني أنكر معرفتي بك
الجد وهي يضغط على عصاته:أنتي تهدديني
سجيه:لا اضمن مستقبلي
الجد وهي يطالعها ويحسبها بالعقل:صار بس لما تسافرين ما أبغى أشوف وجهك مره ثانيه
سجيه ابتسمت وهز رأسها بدون ما تنطق بولا كلمه
رجعت للواقع على صوت أمجاد:يا هووو وين سرحنا
سجيه تنهدت:ولا شي
أمجاد وهي تطالعها بنص عين:صدقتك
سجيه وهي تلوي فهما:كيفك
أمجاد:كأني ما أعرفك ما في احد يعرفك كثري
سجيه باستغراب:وش تقصدين
أمجاد:محد يعرف خبثك كثري
سجيه اللي حبت تقلب الطاولة على أمجاد ردت عليها بابتسامه :شفت أم راكان
أمجاد طلعت عيونها وبهمس:من
سجيه:أم راكان نسيتيها لا ما اعتقد تنسينها بها السهوله
أمجاد وهي تطالع سجيه بنظرة حقد:متى شفتيها
سجيه:بملكة أخت بنبون
أمجاد وهي تطالعها بحقد وبعصبيه:وليه ما قلتي لي
سجيه بدون اهتمام:ما اهتم هي ما تعرفني ليه اهتم لها
أمجاد سكتت وهي تفكر في أم راكان ومعرفتها فيها
سجيه تكمل:ما فاتني نظراتك لولدها
أمجاد وهي تطالعها ووجها متغير:نعم
سجيه:سمعتي وش قلت
أمجاد اللي تطالع سجيه بغموض وبصوت مكتوم:وش قصدك
سجيه:ادري بحسن
أمجاد:حسن وش قصدك
سجيه:انا مو غبيه وألاحظ وكل مره ألاحظ نظراتك له وذاك اليوم بالمجمع ما فاتني عصبيتك وكانت مو على الملابس إلا علشان شفتي حسن والصغيره اللي معاه
سكتت تطالع ملامح أمجاد المتفاجاه من المعلومات اللي عند سجيه عنها وبعد لحظات كملت سجيه:اعرف بسالفة النافذه واللي ساعد بانه والماضي اللي بين أبو بانه وعائلتكم وأخوك...
قاطعتها أمجاد بعصبيه:بس لا تكملين
سجيه سكتت وهي تطالعها بصمت
أما أمجاد قامت من المكان وقبل ما تطلع:لا تفكرين يا سجيه تستخدمين خبثك معاي لأني انا أخبث منك وممكن اطربق الدنيا على راسك وأقول لبانه إن جدها هو زوج جدتك وانك لهفتي منه كوش فلوس وغيره وغيره من فضايحك
واللي بيته من زجاج لا يحذف الناس بالطوب يا بنت العليان
طلعت وضربت الباب وراها وسجيه تطالعها خيالها وهي تفكر وبقهر:اوريك يا أمجاد اوريك
&&
قام من مكانه وبعصبيه:يا سلام هذا اللي ناقص مراكز الشرطه انا قايل ما يجي من وراها إلا المتاعب
ألاء اللي تبكي في حضن أبوها
أخوها لافي:ما اعتقد يا عمي إن هالكلام له داعي
صالح:أنت شب ولا كلمه
لافي عصب كيف رجال وش كبره يقول له شب وقدام أبوه وأخته وإخوانه وجده ويوسف
لافي وهو يضغط على يده:لا تقول لي شب مانيب بزر
يوسف اللي يبغى يهدى الموضوع:استهدوا بالله يا جماعه
نادر وهو يطالع عمه ببرود:ما له داعي هالعصبيه
صالح:لا والله الحمد لله على السلامه طلع لسانك
نادر:لساني موجود من زمان بس ما أطلعه إلا للي يتعدى حدوده
صالح بعصبيه:نعم وش قلت يالبزر أنتم لو فيكم خير كان قدروا تمسكون أختكم من الهيانه
وصلت صوته بعصبيه وهو يوقف:حدك عاد يا صالح كله إلا بنتي انا ممكن أسامح في كل شي إلا عيالي لو تمسهم بكلمه بيوصلك شي ما تتوقعه مني
صالح:تهددني يا صافي
صافي بعصبيه:افهمها مثل ما تفهمها
الجد بعصبيه:وبعدين بزران انتوا
صالح:عياله بيجيبون لنا الفضايح
صافي وهو يطالع أبوه وأخوه:اسمعوني زين ما لكم دخل في عيالي ولا في عائلتي تسمعون
الجد وهو يطالعه :وش تقصد
صافي اللي مل منهم:قصدي عيالي ما لأحد عليهم كلمه غيري وأنا عارفي تربيتي زين مو مثل يرمون عيالهم
الجد وصالح طالعوه بعصبيه
الجد وهو يوقف:وصلت فيك المواصيل تعايرنا يا صافي
صافي وهو يلف وجهه:انا قلت لكم كله إلا عيالي
صالح وهو يوقف:بيت مثل هذا ما يندخل
صافي:ما غصبت احد يدخل بيتي يا صالح واللي ما يشرفه عيالي ولا انا هو بعد ما يازمنا ولا يشرفنا
صالح طالع أخوه بحقد وطلع والجد طالعه بنظرات وقبل لا يطلع:لو مو أنت في هالظروف كان صار شي ما يعجب احد
طلع وصافي اللي شاف ألاء زاد بكاها لأنها حست إن هي أساس المشكله بهمس:يبه كله مني
أبوها وهي يأخذها بحضنه:ما عليك منهم ناس متخلفه
طالع ألاء:انا معاك وان أبوك وأنتي تربيتي وأعرفك ما تأذين نمله والله بيظهر برائتك ويوسف بيساعدنا ولا وش قولك وأنا خالك
يوسف وهو يبوس رأس خاله:أكيد يا خال ما يبغى لها كلام
لافي وهي يبوس رأس أبوه:السموحه يا يبه لان أعصابي انفلتت بس كلامهم يقهر
صافي:مسموح يا وليدي هذول يرفعون الضغط استغفر الله بس
نادر ببرود:ما عليكم منهم طنشوهم
صافي بابتسامه باهته:وهذا اللي راح يصير
جلسوا مع بعض يفكرون ويوسف يشرح لهم سالفة المحقق اللي راح يجي لهم في البيت ويسأل ألاء كم سؤال وعيونه على ألاء ما تزحزحت وصافي ملاحظ هالشي
&&&
راحت لبيت أبوها ودخلت الصاله وسلمت والكل رد السلام
غصون وهي تجلس:أخباركم
حصين وفواز وأمها:الحمد لله – بخير
حصين:غصون بغيتك بكلمة رأس
غصون بابتسامه:إن شاء الله
قامت معاه
دخلت غرفة المكتب وجلست قدام حصين:خير أمرني
حصين :اصبري
فع جواله واتصل وكلم وبعد ثواني نزل الجوال وهو ساكت
غصون بخوف:وش فيك يا حصين قول وش بغيت مني
حصين:اصبري شوي
سكتت لحد ما سمعت الباب ينطق
حصين:تفضل
دخل مازن:السلام
غصون وحصين:وعليكم السلام
مازن جلس وهو يطالعهم
غصون:بتقولون وش صاير ولا أقوم
حصين:مازن قل وش صار بذاك اليوم
غصون:وش يقول
حصين:ابغاك تسمعين وتسكين
غصون باستغراب:طيب
مازن:في ذاك اليوم كنت في كليتي و اتصل معاذ....
غصون وهي تقاطعه وتوقف :بس ما أبغى اسمع خلاص
حصين:اقعدي يا غصون
غصون بعصبيه:قلت ما أبغى اسمع
حصين وهي يقوم ويضرب الطاوله بيده وبعصبيه:قلت اقعدي وانطمي وخلي الولد يكمل سالفته
مازن طالع غصون اللي عيونها امتلت دموع وقعدت وهي مقهوره
حصين طالع مازن وجلس وبهدوء:كمل
مازن وهي يطالع غصون:اتصل معاذ وقال لي غصون تعبانه وهي عند صديقتها وقال لي لو انا اقرب له لشقة صديقتها أروح
غصون وهي تطالعه ومتفاجاه:أي صديقه
مازن:صديقتك
غصون:بس انا رحت لصديقتي في بيتها مو في شقتها
مازن:ما ادري عطاني العنوان وبعدها لما وصلت عند العماره وجيت بدخل كلمني وقال لي خلاص غصون بخير وما قال ولا كلمه زيادهو بس هذا اللي صار
غصون:هذي كذبه
حصين بهدوء:أنتي تشوفينها تدخل العقل اللي يفكر يخون يروح يكلم اخو زوجته حتى المجنون ما يسويها
غصون:بس انا وصلتني رساله وقالت لي انه هناك
حصين:ما تحسين انه مكيده
غصون وهي توقف: مكيده ليه شايفينا في لاس فيغاس وبعدين من ممكن يكيد لي
حصين:يمكن احد حاقد على معاذ
غصون وهي تلف وجهها:بس هذا ما يبرئه
حصين اللي مل منها وانقهر:شوفي عاد إحنا وضحنا الأمور قدام عيونك ما بغين عاد تصدقين عمرك ما صدقتي وروحي بغبائك دمري بيتك وضيعي واحد مثل الذهب من يديك وخلي بنتك تضيع بينكم وتتشتت
طلع من المكتب وهو معصب ومتنرفز من غصون اللي ما تسمع لأحد
مازن وهو يطالعها:تدرين انك تغلطين لأني انا لو شفته بنفسي مع وحده مستحيل اصدق إن معاذ يخونك
طلع وهي جلست على الكرسي وعيونها بدت تمتلي بالدموع وبهمس:يا ربي من اصدق عيوني ولا كلامهم ااااه محتاره محتاره
جالسه وهي مصدومه وتفكر :معقوله اللي سمعته جدة سجيه هي زوجة جدي اللي متزوجها على جدتي معقوله طيب هي تدري ليه ما قالت لي وهي عارفه من جدي وسجيه طالبه فلوس من جدي وأمجاد تعرف أبوي كيف كيف تعرفه ووش علاقة عائلتها به
يعني سجيه وأمجاد لما صادقوني كان علشان أبوي ولا علشان جدي ولا على شأني انا
مسكت رأسها :اااااااه أحسه بينفجر ما توقعت إن كل هالأسرار غايبه عني اعتبروني صديقه لهم وأخت بس ما وثقوا فيني علشان يقولون لي كل شي
بانه وهي توقف :أمجاد تعرف من أنقذني طيب ليه أنكرت وقالت ما تعرفه من يكون وأبوي أيش تعرف عنه وحسن وش علاقتهم فيه ااااه خلاص مو قادره أفكر خلاص
رن جوالها ورفعته:الو
دانه:الو حبيبتي أخبارك
بانه ابتسمت:بخير وأخبارك أنتي
دانه:الحمد لله بانه فيك شي
بانه:لا حبيبتي ما فيني شي
دانه بخوف:أكيد حاسه فيك شي
بانه بابتسامه:أكيدين
دانه:ها جهزتوا نفسكم للسفر
بانه:إيه
دانه:أقول دندون أنتي راح تحضرين
بانه:قصدك يوم زواجك
دانه وهي تبلع ريقها وقلبها يدق طبول كل ما تتخيل إن هاليوم يقرب وبهمس :إيه
بانه:إن شاء الله راح احضر
دانه:بس كيف
بانه:إذا جاء وقتها أفكر كيف بس أنتي خايفه
دانه:بصراحه إيه كثير
بانه وهي تبتسم:لا تخافين وقوي قلبك
دانه:الكلام أسهل من الفعل
بانه:لا تخافين راح أكون جنبك وان شاء الله كل شي ربي بيسهله
دانه:والنعم بالله امييين
كملوا كلام وسوالف وأحيانا بانه تتذكر اللي سمعته من كلام سجيه وأمجاد وتتضايق وتحس كأنها ما عرفتهم ابد
جالس معاهم في المجلس
طالع الاثنين:ها وش قلتوا
سلطان وهو يطالع مقعد:أسبوع ما يصير البنت لازم تأخذ وقتها
الجد:وقتها في وشو الرجال بيسافر ويبغى يخلص
سلطان وهو يطالع مقعد:وش رأيك يا اخوي
مقعد:إحنا خلنا نشوفه ولو كفو ما في أي مشكله
سلطان:بس لازم نأخذ رأي هبه
مقعد:معاك حق
الجد بعصبيه:وشو راية البنت ما لها رأي
سلطان وهو يوقف:أسف يا جدي بس هبه هي اللي بتتزوج وإحنا وعدنا خواتنا ما نغصبهم على شي هم ما يبغونه
الجد وهو يوقف:انتم بتغون تكسرون كلامي ولا وشو
مقعد:لا والله يا جدي بس وعد الحر دين وبعدين هذي حياه ما هيب لعبه
سلطان وهو يوقف هو الثاني:اخوي معاه حق
الجد وهو يحاول يطول باله قد ما يقدر:زين خلونا نشوف أخرتها معاكم
سلطان وهو يطلع من المجلس لحقه مقعد
طلعوا من المجلس وراحوا للصاله وبصوت عالي:يا ولــــــــــد
وشافوا هبه قاعده مع البنات
سلطان ومقعد :السلام عليكم
الكل:وعليكم السلام
مقعد:هبه تعالي بغيناك شوي
هبه وهي تقوم:إن شاء الله
طلعت معاهم وراحوا معاها للصاله الجانبية وجلسوا
هبه وهي تطالع إخوانها:وش فيكم صاير شي
سلطان:شوفي وأنا أخوك إحنا بنقول لك سالفه بس مهما صار رأيك هو اللي بيمشي
هبه بخوف:تراكم خوفتوني وش صاير
مقعد:لا تخافين وأنا اخوك مو صاير شي بس اللي خاطبك
هبه:وش فيك
سلطان:طالب يكون يوم الملكه والعرس في يوم واحد مع دانه
هبه اللي تفاجات:وشو
سلطان:إيه وأنا أخوك هذا طلبه لأنه بيسافر بعد العرس على طول هذا طبعا إذا صار نصيب
مقعد:وش رأيك
هبه وهي تفكر ومحتاره طالعت إخوانها:انتم وش رأيكم
سلطان:إحنا طلبنا إننا نشوفه بكره على الغداء هو معزوم
مقعد:ولو شفنا عليه شي كذا ولا كذا على طول الله يسهل له
هبه وهي تبتسم لإخوانها:اللي تشوفونه انتم فصلو وأنا البس
سلطان:يعني لو كان الرجال مضبوط ما عندك مشكله قصه العرس والملكه مره وحده مع دانه
هبه وهي مستحيه:لا ما عندي مشكله
سلطان وهو يبوس رأسها:جعلني ما أذوق حزنك
مقعد وهو يسوي روحه يزغرط:كلللللوو كح كح ول شلون تسوونها
سلطان وهبه:هههههههههههههه
&
قاعد مع أخوه توأمه ويفكر وبنفاذ صبر:وبعدين يعني لمتى وإحنا قاعدين كذا بيخلص الشهر وإحنا ما سوينا شي
مازن وهو معصب:وش تبغاني أسوي لك يعني
يزن:تصرف يا اخي مو تقول بتكلمهم
مازن:أنت شايف احد فاضي لنا المشاكل شاغلتهم من كل جهه معاذ ومشكلته مع غصون وعمي صافي ومشكلته مع بنته ألاء ونادر هالمفهي اغسل أيدك منه
يزن:طيب بنقعد كذا لحد ما يخلص الشهر وإحنا ما جبنا المهر بيطيرون منا
مازن وهي يفكر:امممممم
يزن بنفاذ صبر:ها وش وصلت له
مازن:اصبر خلني أفكر
يزن بضيق:فكر ورني يا أبو الأفكار
سكتوا اثنينهم
مازن يفكر بطريقه يجيب فيها المهر ويزن ساكت ويتمنى أخوه تكون عنده فكره جهنميه زي عادته
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك