رواية عندما تضئ الشموع بيد الحزن -14
الجزء الثامن و العشرون
رأسها راح ينفجر من هـ الثنتين طول الوقت وهم في ضحك و لعب فجر كانت محتاجه لصديقه و لقت ريم الي قدرت فجر تغير جوها بشكل جذري و تنسيها عادل و كل الي صار صاروا 24 ساعة مع بعض حتى النوم بغرفه وحده و أريج الي أكلتها منهم كل ما دق مشعل عملوا لها سالفه
أريج و الي كانت بالمرسم مقفله على نفسها لجل تقدر تكلم مشعل براحتها عنهم لكن وين يا عالم الباب أتكسر
ريم طيب أفتحيه
مشعل شكل أختك خبلة بريم ما كانت كذا
أريج لا والله بس ما كان عندها نفس الجو في بيتكم
مشعل أخاف ينقلون العدوى لمرام كمان
أريج رأسي بينفجر منهم مشعل
مشعل سلامة رأسك يا قلبي
أريج و هي تصرخ عليهم فجر والله لأدق لأبوي
فجر و هي تطنز عليها و بنفس نبرتها لا خبري مشعل
مشعل ههههههه رجه أختك
أريج فوق ما تتصور
مشعل زين خليك منهم و أهتمي بنفسك أنتِ ما أبي أرجع أحصل وزنك نازل مثل أول
أريج أنت بتطول أكثر .؟
مشعل لسى أريج مالي إلا ثلاث أيام تعب الطيارة وربي لسى فيني
أريج يعني بتصوم رمضان هناك ؟
مشعل لا يا روحي بجي قبل رمضان كم باقي له ؟
أريج سبعه أيام أو ثمانيه
مشعل لا إن شاء الله أكون عندك قبلها و لا يهمك....
**************
جالسه معها و هي محتارة فيها من فترة و هي ما هي طبيعيه العاده ما تخبئ عنها شئ لكن من رجعوا من السفر و هي ما تكلمت لها بشئ
مها يا بنت الناس أنا متأكدة إن فيك شئ
مرام و أنا أقولك ما فيني شئ
مها منتي مرام الي أعرفها
مرام ما فيه شئ يبقى على حاله خلاص سكريها سالفه
مها طيب براحتك
مرام قالت لك أمك وين بتروح هي و أمي ؟
مها لا
مرام اووف ملل
مها طيب نطلع مكان تغيرين جو
مرام بتفكير تروحين معي بيت مشعل ؟
مها ريم هناك صح .؟
مرام إيه
مها اوكيه أروح.....
***************
بإحدى الممرات كان يمشي و هو ضام الملف لصدره و يتنفس بصعوبه كان داخل المستشفى على أمل ضيئل و الأن بكلمة وحده تغير كل شئ في خاطره كان يحمد ربه أنه ما خبر أريج و لا عشمها في شئ و إلا صدق كانت نفسيتها بتنتكس دخل الغرفه و رمى الملف على الطاوله و جلس
سلطان بشر شو النتيجه ؟
مشعل بتنهيده بهذي الفحوصات ما فيه أمل
سلطان ليش شو قالوا ؟
مشعل العميله خطرة و ما بتستحملها هي و الدكتور يقول ما يظمن النتائج ممكن تفقد النطق او البصر
سلطان ليش من متى هـ الفحوصات ؟
مشعل يمكن سنتين
سلطان طيب سهله جيبها تعمل فحوصات من أول يمكن يوضح شئ تغير للأحسن مع الوقت
مشعل بتقول لا أكيد و بتتأثر نفسيتها و أخاف أقنعها و يقولوا كمان نفس الكلام وش يفكني من عمي بعدين
سلطان اهاا الحمدلله على كل حال
مشعل الحمد لله إني ما خبرتها بس
سلطان إي والله أول مرة تخطط صح تغيرت يا أخي
مشعل هههههههههه روح زين
سلطان لا والله غيرك الزواج صراحه
مشعل عقبال عندك
سلطان لا شعوريا جاء طيف مرام بعيونه الله كريم بس ما راح أخذ مثل بعض ناس وحده أصغر مني بعشر سنوات
مشعل أحلا شئ تكون أصغر منك.....
****************
مبسوطه في الجلسه معهم جمعتهم خلة في البيت حركة و روح حلوه تفتقدتها بعدم وجود مشعل بالبيت دخلت عليهم مع ناني الي كانت شايله صينيه فيها بيتزاء و بيبسي
ريم أنا بقول لمشعل يربطك قبل يسافر المره الثانيه
فجر تكفين إي والله متعبه نفسها
أريج لا تعب و لا شئ لا تبالغون
مرام لا جد إحنا مو ضيوف نعرف المطبخ الي تبي شئ تروح تأخذه
مها بقهر من أول ما شافة إهتمام مرام بالذات عادي لا تكبرونها الشغاله الي سوته
فجر من قالك يا قلبي الشغاله تطبخ و إلا تحط يدها بالأكل لا هذا طبخ أريج فديتها
مرام أي مو طعم طبخ ناني
ريم ما تشوفين مشعل كيف وزنه راح حلو من أكل أريج
أريج أصلا أخوك ما يحب أكل الشغالات
مها الرجال يأكلون أي شئ ما يفرقون
فجر بغيض الي تعود زوجها على أكل الشغالات بيأكل أي شئ لإنه بدون نفس
أريج كبرنا و أمي الي تطبخ لأبوي و الشغاله مالها يد
ريم أصلا خالتي طبخها روعه فيه نكهة كويتيه كذا مميزة
أريج بضحكة الأن بعض الناس قلوبهم وصلت الكويت
فجر يا زينك ساكته
مرام راح تتزوجي قريب فجر ؟
فجر لا باقي سنه عشان يتخرج
مها ما كانت تعرف بخطبة فجر أنتِ مخطوبه ؟
أريج إيه لولد خالي من زمان
ريم الله يعينه تخبل
فجر بنظرة أحلفي بس
أريج و هي تشوف جوالها هدوء برد
ريم هو مشعل جرعات بساعة يدق عليك
أريج بحياء هذا عمي.....
دخل و بخاطرة البيت بدون حركة البنات ما يسوى أريج و خلاص تمرهم مثل الضيفه كم ساعة و تطلع و الأن فجر عندها من كم يوم و بكرة راح تتزوج مثل أختها و تطلع يتمنى اللحظة الي يدخلون عليه البيت بعيالهم
أبو أريج البيت بدون حس البنات معاد له طعم
أم عبدالله والله صادق يا ولدي تعودنا على حسهن
أم أريج بكرة يجينك بعيالهم و تقولهم صدعتوا بي
أبو أريج خلهم يجون هـ العيال
أم أريج بإذن الله
أم عبدالله هي أريج ليش ما تجي تنام عندنا لين رجلها يرجع بدل ما تأخذ أختها عندها
أم أريج عاد ترتاح هناك أكثر و الحين حتى ريم تنام عندها
أم عبدالله أجل خلي فجر ترجع دام ريم عندها
أم أريج ما تبي يا خالتي مستانسه على الجلسة فجر تحب السواليف و الجلسات....
*******************
بحديقة المستشفى جلس على كرسي خشبي تحت شجرة يتأمل الناس و حركتهم شده منظر بنت كانت تمشي على عكازات من قدامه تمنى لو كانت هي أريج معه تتعالج ما كان قبل يعيش معها يفكر بأمر علاجها و إنه يشوفها توقف على رجولها لكن الأن صارت هي أمنيته الوحيده صار لما يسافر ينعش ذاكرته بأريج الطفله بنت التسع السنوات تقريبا هو أخر عهد له بشوفتها بعدها بداء هو يسافر و معاد يشوفها حتى أيام الحادث ما يذكرها و لا يذكر أنه زار عمه بالمستشفى كان مبتعد عن الكل لكن الأن لا يا مشعل لأزم كل شئ يتغير...
*****************
بالمجلس كانت فرحانه بجيته بيتها و زيارته الأولى لها كانت تتمناها من زمان لكن الخير ما يندرى وين
أريج حيالله عمي
أبو مشعل الله يحيك يا يبه أستريحي
أريج و الي كانت تصب القهوة مستريحه عمي واجبك هذا
أبو مشعل الله يخليك يبه طمنيني وش أخبارك أنتِ و مشعل شخباره يدق عليك ؟
أريج الحمد لله عمي ما علينا إيه يدق كل يوم
أبو مشعل متى جأي قالك ؟
أريج والله لسى ما حجز بس قالي قبل رمضان إن شاء الله
أبو مشعل على خير
في هـ اللحظة دخلت ريم و هي مؤطيه رأسها أبو ما قصر معها طول عمره يشتغل و يتعب نفسه لجلهم صحيح تقصيرة كان عاطفي لكن في أشياء أغناهم عن مجرد الحلم فيها كل تفكيرها لو عرف عن فعلتها شلون بتقابله
أبو مشعل هلا بالريم
ريم بعد ما سلمت عليه هلا بابي وحشتني كثير
أبو مشعل ما هو أنتِ قاطعه البيت مدري وش جأيك علينا ؟
أريج هذا بيتها بعد عمي
ريم أريج لوحدها كمان ننام عندها أنا و فجر
أبو مشعل و جوالك كيف حرق ؟
أريج بضحكة ما عليه عمي أنا حرقته لها بالخطاء
ريم كانت تطالع فيها بإمتنان و عشان كذا قلت غير هي تطلع لي رقم
أريج خلاص بطلع ذليتنا
أبو مشعل الله يخليكم لبعض يا بناتي.....
*******************
في الفندق دخل و فتح شنطته و أبتسم و هو يطلع أكثر فرشاه تحبها أريج و ترسم فيها أخذها معه من غير ما تحس لإنه متأكد أنها بتهلك نفسها بالرسم في غيابه ( الظاهر لسى ما أفتقدتها و إلا ما خطر ببالها أنها معي خل أدق عليها و أسحبها بالكلام من غير ما تحس )
مشعل و أول ما أنفتح الخط أروجه حبيبي وحشني صوتك .... لكنه أنصدم بالخط الي تقفل بوجهه بخاطرة أستغرب ( معقول إنحرجة لذي الدرجة لا أريج مو كذا ما تقفل الخط يمكن من الشبكة او تقفلة البطاريه خل أتصل فيها مره ثانيه )
رجع مشعل أتصل لكن هـ المره محد فتح له الخط فحس أنه تنرفز و رمى الجوال بغيض.....
***************
بغرفتها و بعد ما رجعت من عند أريج فتحة الكبت تبي تبدل ملابسها و تغلغلة ريحة عطره داخل صدرها مستحيل تقدر تنسى هـ الإنسان الي غيرها و فتح عيونها على الحقيقة الي كانت مغطأه بوهم نسجته الفلوس و أمها و أحلام مها الي إنبنة على أنانية و حب تملك اليوم جلسة مع فجر و أريج بدت تعرف معدنهم الأصيل و قلوبهم البيضاء و طعم الضحكة و راحة البال بينهم وين كنتِ عنهم يا مرام كل هـ الوقت أخذة الفستان و ضمته بمشاعر كانت تجهلها لكنها رغبه من الأعماق إمتزجة بدموع ندم على كل شئ.....
***************
بالسرير أتمددت و هي تستنشق ريحة مشعل الي صارت تعشقها من كم يوم مكالماتهم قصيرة و ما تشبع شوقها له و السبب وجود ريم و فجر معها طول الوقت أخذة جوالها و أتصلت فيه
مشعل هلا
أريج هلا فيك شخبارك ؟
مشعل بخير
أريج حست أنه يكلمها بدون نفس فستغربة منه شو فيك مشعل ؟
مشعل و لا شئ
أريج ليش تكلمني بدون نفس ؟
مشعل أسالي نفسك
أريج بستغراب شو سويت ؟
مشعل بغضب واضح تقفلين الخط في وجهي و طنشين مكالماتي و كمان تسألين وش مسويه
أريج بهتت متى صار كذا مشعل أنت ما دقيت اليوم إلا الظهر و كلمتك
مشعل طبعا تتناسين يعني
أريج أستغربت أكثر مشعل متى دقيت ؟
مشعل المغرب عندكم
أريج و هي تتذكر المغرب كان عمي عندنا و جالسين معه في المجلس .. و فتحة السجل للجوال شافته فاضي حتى السجل للجوال ما فيه مكالمة لك
مشعل و هو واصل حده أكذب أنا يعني ؟
أريج و صوتها بداء يروح من البكاء محشوم بس وربي ما شفت لك مكالمة غير حقة الظهر و المغرب جالسين مع عمي حتى جوالي مو معي و مستحيل الشغالات يردون
مشعل كان فعلا معصب و نفسيته عدم و ممكن السبب الرئيسي لعصبيته هو تركه نهائيا لتدخين من أسبوع زين بقفل أنا كمان الخط و أشوف كيف السجل يمسح نفسه
أريج حضنت مخدته و هي تبكي بقهر ...
أطلقت لقلبي العنان في سمأك
دون أن أحميه بجناحين تقاوم كسرك
***************
الجزء التاسع و العشرون
رفعت رأسها عن المخده بعد موجة بكاء إستمرت لساعات مشعل أول مره يعاملها بهـ الطريقه كانت تظن أنه بيقفل الخط لين يهداء و يرجع يتصل فيها و يعتذر لكن إنتظارها طول رمة نفسها على الكرسي و طلعت تبلل حلقها الناشف و هي تدعي ربها إنها ما تشوف لا ريم و لا فجر .. حركتهم ضحكهم مع بعض أسعدها ريم و فجر ثنيناتهم محتاجات لصداقه الي تملئ حياتهم و تحميهم من الغلط تبسمة لهم بفرحه و رجعة للخلف ما تبيهم يشوفون أثار البكاء بعيونها لكن سؤال فجر لريم و إجابتها وقفها و شل حركة نفسها و رجعها لموجة بكاء أقوى من السابقه....
**************
تأفف بقهر و هو يطالع ساعته الي يحس أنها متوقفه عن الحركة من ساعات قسى عليها و قلبه عوره لكن ما أحب يرجع يتصل و هو معصب بينتظر لين يهداء و يتصل فيها طلع له ملابس على السريع و أتصل في سلطان
سلطان هلا
مشعل نائم ؟
سلطان لا
مشعل أجل قوم البس و بنطلع
سلطان وين في هـ الوقت ؟
مشعل أي مكان مخنوق أبي أشم هواء
سلطان تعالي الغرفه زين
مشعل أقولك مخنوق ما أتنفس
سلطان زين خلاص بلاك معصب دقائق البس
مشعل أنتظرك تحت.....
****************
بالمرسم قلبت الأغراض فوق تحت بدون جدوى مالها أي أثر ( افف و أنا ناقصه وين راحة هذي كمان هذا وقتها تختفئ أحس أني راح أنفجر من كل شئ مشعل و مها و الحياه و الدوامه الي دخلت نفسي فيها بسبتهم يالله كيف ما أنتبهت لها من أمس أكيد وحده من الشغالات داخله ترتب و عافسه لي الأغراض أكيد حطتها في الكبت ) تحركة أريج ناحية الكبت فتحته بقوة بدون ما تنتبه و أرتفعت صرخة ألم في البيت....
***************
بشوارع برلين كانوا يمشون بدون هدف من وقت طلوعهم من الفندق الوقت أخر الليل و الجو كان بارد و الصمت لازال ثالثهم
سلطان و هو يمسك يد مشعل وقف هنا ترى هلكة من المشي
مشعل زين تعال نجلس عند الجسر
سلطان شو فيك معصب أنت كذا ؟
مشعل و لا شئ
سلطان قول لواحد غيري و لا شئ
مشعل و هو يتأمل النهر تحتهم أحس بضيق يمكن سببه الدخان
سلطان كم لك ما دخنة ؟
مشعل أسبوع
سلطان لا تطور و الله
مشعل مالي خلق لطنازتك سلطون
سلطان و هو يطالعه بنص عين أكرهك
مشعل هههههههه أحبك
سلطان إيه كذا أضحك الدنيا ما تسوى زعل
مشعل أي والله ما تسوى.....
****************
بالمستشفى كانوا مجتمعين حولها و هي شبه فاقده الوعي من البرواز الخشبي الي طاح على رأسها و سبب لها جرح نزفة منه كثير
أم أريج أريج يمه
أريج بهمس هممم
أم أريج يمه يعورك شئ تبين شئ ؟
فجر يمه خلاص خليها ترتاح كم مره تسألينها
أم أريج خليني أتطمئن عليها وش عليك أنتِ
ريم خالتي أصلا هي مخدره الحين ما تحس فيك
أم أريج فديتها كيف طاح على رأسها و ما نتبهتوا لها ؟
فجر هي كانت نائمه مدري شو صحاها الفجر ترسم مجنونه بنتك
أم أريج و هي تمسح على رأسها بحنان الله يصلحها
ريم خالتي تعالي أجلسي تعبتي من الوقفه
فجر و هي تعدل شيلتها أنا بروح أشوف أبوي
أم أريج خليه يجئ يطمني شو قاله الدكتور
فجر أبشري...
***************
بالفندق أرتمى على السرير بعد ما هلك نفسه بالمشي مسافه طويله بس لجل ينسى لكن تفكيره و عينه كانت طول الوقت على الجوال ( و الله قسيت عليها اففف أكيد الحين جالسة تبكي يا رب طول بالي أنتظرها تدق بس أنا الي قفلة الخط أريجوه مستحيل تدق و أنا معصب ) أخذ مشعل جواله و دق و بخاطرة يتمنى إنها تكون صاحيه و ينسيها الي صار لكن خاب ضنه لإن محد رد عليه فظن أنها نائمه......
**************
بالسرير تحركة بتعب و صداع كان يخترق كل شعرة في رأسها تحس بالإختناق بس لمجرد تتذكر إنها بالمستشفى و ذكرى الأيام الي قضتها فيه
أم أريج يمه تبين شئ ؟
أريج البيت
ريم الله يهديك شو البيت الحين أنتِ لسى تعبانه
أريج غصب عنها شافة في ريم صورة ناس خاليه من المشاعر و لا تعترف فيها كانت هي أكبر ضحية في طريقهم و طريق مشعل بالذات دمعة عينها غصب يمه خذيني عندك البيت وينه أبوي أنا ما أبي أجلس هنا تكفين
أم أريج أخذتها بحضنها أبشري يمه بس أهدي الحين لين نشوف الدكتور يكتب لك خروج
أريج بضيق أنا ما فيني شئ أبي أطلع
ريم خلاص عمي برى أنا أكلمه لك.....
*****************
النوم ما هو راضي يغلبه بداء يقلق و ما يستوعب الي يصير مستحيل أريج ما تكون صاحيه الحين قريب الظهر صاير داق عليها خمس مرات بدون جدوى حتى جوال ريم مقفل ما يدري ليش ( خل أدق على خط البيت ) أتصل مشعل و جأه صوت ساتي الي ما كنت تعرف عربي كثير
ساتي هاي مستر
مشعل وين مدام ؟
ساتي ما فيه
مشعل وين يروح ؟
ساتي ما يعرف أنا
مشعل طيب ريم ؟
ساتي ما فيه
مشعل كمان طيب أعطيني فجر و إلا ناني
ساتي كله ما فيه
قفل مشعل الخط و هو ما هو فاهم شئ و القلق بداء يسيطر عليه.....
***************
بالغصب أجبرة الكل إنها تطلع تكره المستشفى و يومه و بدت تكره حياتها من بعد كلام ريم الفجر دخلت غرفتها و أتمددت على السرير بمساعدة فجر راحتها هنا غير ما تبي ترجع البيت و تحس بالضيق خلاص لازم تترك كل شئ لهم مستحيل تعيش حياتها بذي الصورة
أم أريج أرتاحي يمه
أريج وين راحة ريم ؟
فجر راحة مع ناني البيت يجبون لك ملابس
أريج خلي ناني تبقى هنا يمه إذا جأت لا تروح
أم أريج أبشري يمه
فجر يعورك الجرح ؟
أريج بتعب لا بس أحس بدوخه
أم أريج ما بقى فيك دم خليني أروح أسوي لك أكل و عصير يعوضك
أريج مو الحين يمه أبي أنام
فجر كلي و بعدين تنامين.....
*************
على الغداء كان يتأملها بصمت تغيرت كثير و بداء يخاف عليها من هـ الصمت و الشرود و جلسة البيت الغريبه عليها ( مرام من وقت رجعوا من اسبانيا ما طلعت من البيت إلا مره وحده عند أريج و سمعة منها كيف مشعل يقولها إن سلطان بداء تتعب نفسيته من الجلسه هناك و من وقتها صار يسيطر على تفكيرها بشكل أكبر )
أبو مشعل مرام يبه
مرام هلا يبه
أبو مشعل و هو يطالع صحنها الي ما نقص من وقت جلستها ليش ما تأكلين ؟
مرام شبعت حمد لله
أبو مشعل صحنك على ما هو عليه
مرام لا والله أكلت حمدلله
في هـ اللحظة دخلت عليهم ريم و رمة شنطة ملابسها على الكنبة و جأت تسلم على رأس أبوها
أبو مشعل هلا يبه نور البيت
ريم منور بوجودك
أبو مشعل أجلسي تغدي معنى
ريم والله مالي نفس الحين مصدعه و أبي أنام
أبو مشعل رجع مشعل ؟
ريم لا
مرام و خليتي أريج لوحدها ؟
ريم أسكتي من الفجر و إحنا بالمستشفى أريج طاح برواز على رأسها و أنجرحة و الحين راحة بيت أهلها
مرام يا قلبي كيف ما أنتبهتوا لها إنها تبي شئ من فوق ؟
ريم هي كانت نائمه قبلنا و إحنا تو ندخل الغرفه بنام إلا و نسمع صرختها
أبو مشعل و عمك الي وصلك هنا ؟
ريم لا السواق لإني رحة أجيب لها ملابس من البيت و عمي راح الصيدلية يشتري لها الدواء
أبو مشعل أجل العصر لازم أمرها أتطمئن عليها
ريم بتردد أمي موجوده .؟
مرام لا معزومه على الغداء....
****************
بالغرفه رايح جاي خلاص بداء يقلق بجد من دقائق رجع أتصل بالبيت و ردت عليه ساتي و أصدمته بإن ريم أخذة ملابسها و ملابس لـ أريج و طلعت من البيت مشعل ما عرف شو يسوي إلا أنه يدق على بيت عمه و يعرف منهم جأه صوت فجر الي كانت مواصله و رايحه لغرفتها بتنام تعبان و مبحوح فخاف أن أريج صاير لها شئ
فجر الوو
مشعل السلام عليكم
فجر و عليكم السلام هلا
مشعل أريج عندكم جوالها ما ترد و الشغاله في البيت تقول ما هي فيه ؟
فجر ما عرفت كيف تخبره إيه هي عندنا لإنه....
مشعل بنرفزة شو يا فجر تكلمي ترى أعصابي تعبت من الفجر أتصل فيها
فجر الفجر طاح برواز خشبي على رأسها و أنجرحة بس هي الأن بخير خلاص نظفوا الجرح و خيطوه
مشعل حس بضيق ما ينوصف و أنتِ و ريم وش خانتكن جالسين عندها .؟
فجر بالإصل هي مقهورة منه من أول ما سافر عن أريج و تركها مع جدتها لوحدهم و مقهوره أكثر من كلام ريم عن مها و الله عاد ما قلنا لك كمان سافر عنها كل أسبوعين و خلها لوحدها هي كانت نائمه وش صحاها ترسم مدري بس الي أعرفه إنها إذا كانت متضايقه ما تنام....
***************
الجزء الثلاثون
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك