رواية ويبقى خالد -12
ام عبدالله : ايي ، سلامتك ، لاتحاتي يوسف عندي
وظل يوسف مع يدته يسولف و يضحك و يلعب ،
ودخلت فاطمه ،
فاطمه و التعب باين عليها : السلام عليكم ،
ام عبدالله : وعليكم السلام
فاطمه : شلونج يمه ؟
ام عبدالله : بخير يمه ، شفيج ؟
فاطمه : وااي يمه حررر ، جو الكويت ما يرحم
ام عبدلله : اي والله صدقتي ،
فاطمه : انا بروح ارتاح فوق شوي ، لي حطيتوا الغدا نادوني ميته من اليوع
ام عبدالله : وييه شفيكم كلكم دايخين ؟ ، يلا يلا روحي ارتاحي و بعدين اناديج
كليه الهندسه :
دلال : يلا اسور انا خلصت ماعندي شي بروح البيت
اسراء: وااي حظج انا بعدي ماخلصت ،
دلال : الله يعينج ، يلا مع السلامه
اسراء: الله يسلمج
سمعت صوت راشد الماجد و عرفت ان خالد المتصل ،
اسراء: الو
خالد : هلا ، شلونج ؟
اسراء: تمام ،
خالد : ترا انا اليوم بتأخر شوي
اسراء: انا بعد بتأخر ، احتمال ارجع البيت على الساعه 3
خالد : اممم ، انا ان شاء الله على الساعه 2ونص اكون بالبيت
اسراء: امم ، اوكي
خالد : يلا عيل باي
اسراء : باي
بيت بو عبدالعزيز :
عبدالعزيز : تسلم ايدج يمه على هالطبخه الحلوه
ام عبدالعزيز : بالعافيه
عبدالعزيز : الله يعافيج
وعقب الغدا ،
بوعبدالعزيز : شخبار اسراء؟ من زمان ماشفتها ؟
ام عبدالعزيز : قبل جم يوم كانت عندي ،
بوعبدالعزيز : اممم
بيت بوعبدالله :
ام عبدالله : الساعه 3 ليلحين ما وصل خالد ولا اسراء ؟ اخاف صار فيهم شي ؟ رفعت السماعه و اتصلت على خالد ،
خالد : الو ؟
ام عبدالله : هلا خالد ، وينك يمه ؟
خالد : يمه انا بالدوام
ام عبدالله : متى بتوصل ؟ قاعدين ننطرك ع الغدا
خالد : لا يمه تغدوا مالكم شغل فيني انا بتأخر اليوم
ام عبدالله : انزين و اسراء؟
خالد : حتى اسراء بتتأخر اليوم ، تغدوا يمه
ام عبدالله : كيفك ،
البارت العاشر :
ام عبدالله :يوسف يمه روح ناد امك و ابوك و عمتك
يوسف : ان شاء الله
و نزلت فاطمه و ريم و عبدالله و تغدوا و عقب الغدا كلهم راحوا غرفهم ،،
وعقب ما راحوا الكل دخل خالد البيت وماكان له خلق شي ، دخل و راح غرفته و حط راسه و نام على طوول ، بعده بربع ساعه وصلت اسراء ، وصلت و كان التعب من الجو واضح عليها ، وراحت غرفتها و شافت خالد نايم
اسراء : خالد نايم ، انا اقعد شسوي بعد ؟ انام احسن لي ،
غيرت ملابسها و لبست ملابس خفيفه و قطت نفسها على الفراش و عقب دقايق نامت ،
وعقب 3 ساعات ،،
صحى خالد من النوم و كان مرتاح ، خذاله شور سريع و لبس بنطرون جينز و بلوزة من ماركه ارماني و كاب ارماني ، وقف جدام السرير و شاف اسراء نايمه ،
خالد : ماصارت نوم ؟ يعني اذا كانت نايمه عقبي المفروض شبعتي نوم الحين ؟
خلاها تنام زياده نص ساعه و قعد يشوف تلفزيون ، و عقب نص ساعه ، قرب منها و قعدها من النوم
خالد : اسراء ؟ اسراااء ؟ يلا قومي ماصارت نوم ؟
اسراء بنعااس و تعب : خالد خلني شوي ابي اناام
خالد : يلا عاد انا مليت قاعد بروحي قومي قعدي معاي بسج نوم
اسراء : خالد تعبانه خلني اناام ، ( حطت على ويهها المخده و غمضت عيونها حييل )
خالد : متى رديتي ؟
اسراء: 3وربع .. تكفى خالد روح عني خلني انام
تنهد خالد : انزين ، انا بروح مشوار قريب بيي بلقاج قاعده
اسراء: انزين ( وكملت نومتها )
نزل خالد تحت و قعد مع امه شوي ،
ام عبدالله : خالد وين رايح ؟
خالد : عندي شغل شوي وراجع
ام عبدالله : تغديت ؟
خالد : يلا يمه ماتغديت ، مو مشتهي
ام عبدالله : مو زين يمه تغدا قبل لا تطلع
خالد : لا يمه مشكوره ، يلا عشان لا أتاخر ،
لبس خالد نظارته الشمسيه و طلع ،و اول ماركب البورش رن فونه رنه مسج
فتح خالد المسج ، المسج : [ الروح حنت لك و العين مشتاقه ، والي يحبه القلب مو هين فراقه من : معجبه ]
استغرب خالد ؟! : منو داز هالمسج ؟ اخاف بالغلط ؟
ما اهتم خالد وشغل اغنيه و علَ الصوت و مشى
و عقب 5 دقايق مسج ثاني و من نفس الرقم
المسج : [ احببببك ، احبك انت في بالي تعبتني او غيرت احوالي اقرب منك تبعدني وانت تدري انك غالي مدري ودك تعذبني ولا تبقى حبيبي ، من : معجبه ]
خالد عصب : منو هالمينونه الي قاعده تدز هالمسجات ؟
انشغل بال خالد بالتفكير ، و انصدم يوم سمع الفون يرن ، قرا الرقم ولقاه نفس الرقم الي دز المسج !
خالد بصوت رجولي : الو ؟
الطرف الثاني : اللله ، فقدت هالصوت والله ، من زمان ما سمعته
خالد استغربت : !!! منو انتي ؟
الطرف الثاني : منو انا ؟ من صجك تتكلم ؟ ماتدري منو انا ؟
خالد ين و استخف : خلصيني تكلمي قوليلي منو انتي و شتبين ؟
الطرف الثاني : آسفه ، ماراح اقولك منو انا ، فكر عدل و بتعرف منو انا ! ( وسكرت الفون )
انصدم خالد من الي صار !! وقعد يفكر ، منو ممكن تكون هالبنت ؟
خالد : استغفر الله ، نسيت وين بروح ؟ الله يقطع ابليسج يارب !
ونسى خالد وين كان بروح و رجع البيت مره ثانيه
خالد استغرب و عيونه طلعت : اسوورة! ليلحين نايمه !!
اسراء بصوت نعسان : اي
خالد : يلاا عااد انا رحت و ييت وانتي ليلحينج نايمه ، قومي ترا مليت من القعده بروحي
اسراء بتعب : خالد تعبانه ما اقدر اقوم
قرب خالد و قعد يمها : شفيج ؟ تعبانه من شنو ؟
اسراء: بطني يعورني و احس بـ لوعه و جني برجع
خالد : سلامتج حبيبتي ، تبين اوديج المستشفى ؟
اسراء: لا مابي المستشفى ، خلني نايمه احسن
خالد : اي بس حبيبتي مايصير جذي انا ابي اقعد معاج ، اليوم كله ماقعدت معاج !
اسراء تنهدت: انزين ، كاني بقوم
خالد : شوي شوي بالعدال
بيت شهد :
شهد : هذا من صجه ولا شنو ؟ يستغبى ولا شنو بالضبط ؟ شلون نسى صوتي ! معقوله هذي ثالث مره ادق عليه و مايعرف صوتي !! حسافه بس حسافه على السنين الي ضيعتها معاك يا خالد ،
احمد : لقيتلج حل شلون تاخذين شي من خالد
شهد مو مصدقه نفسها : صججج والله ! شنوو قوول ؟
احمد : ...... ، ( و قالها السالفه )
شهد : خوش شي ، ومتى التنفيذ ؟
احمد : بعد جم يوم
شهد : وليش مو باجر يعني . ترا مافيني صبر
احمد : باجر بسافر عندي بضاعه لازم اييبها ، و عقبها ان شاء الله يصير خير
تنهدت شهد : انزين ، بصبر جم يوم ،،
المستشفى :
نواف كان ياي من غرفه الدكتور و الفرحه باينه على ويهه : اسمااء ، نور ان شاء الله بتطلع من المستشفى باجر
اسماء بفرح : صج والله ، الحمدلله يا رب
نواف : الحمدلله ، ( و لف ويهه و شاف نور ) نور حبيبتي ، باجر بتطلعين من المستشفى و تستانسين
نور ماكان لها خلق شي ، سمعت الخبر و نزلت دمعه من عينها ،
اسماء : يمه حبيبتي بسج لاتبجين ، قطعتي قلبي والله ،
مدت اسماء ايدها و مسحت دمعه نازله من عيون طفله بريئه ، ومسحت على شعرها ،،
نواف : يلا بس نوور انتي شاطره ماتبجين ، لما تطلعين من المستشفى بسويلج حفله كبيره ، و بنييبلج هدايا و كيكه حلوه و كل اليهال بيون عندج
فرحت نور شوي و ابتسمت يوم سمعت كلام ابوها ،،
بيت بوعبدالله :
ارتاحت اسراء من بعد ماحست بلوعه و الم في بطنها ،
اسراء: خالد تغديت ؟
خالد : لا
اسراء: اكيد يوعان ، تبي اسويلك شي ؟
خالد : لا لاتعبين عمرج ، قومي لبسي بنطلع ناكل بره
اسراء: يلا اوكي
غيرت ملابسها و لبست تنوره سوده غامجه حيل مع قميص مخطط ابيض بـ رمادي و فوقه جاكيت احمر ، وحطت لها مكياج خفيف ، خطت عينها بـ آيلاينر اسود و حطت شدو خفيف رمادي دمجته مع الاسود الدخاني و حددت شفايفها بلون احمر وحطت حمره لونها احمر مثل لون الجاكيت و آخر شي بودره خفيفه بـ اللون الاحمر و لمسه الماسكارا السوده الغامجه ، و لبست خاتمها الالماس ، و اخيرا لفت شيلتها
اسراء : يلا خالد خلصت
خالد دقق على ويهها و شافها بنظره غريبه : مكياجج اوفر ترا
اسراء: خالد مافي شي خفيف
خالد : وحمرتج غامجه
سكتت اسراء
خالد : مسحيها
تنهدت اسراء و خذت ورقه كلينكس و مسحت الحمره
تنهد خالد : يلا امشي ، ( ونزل معاها تحت و ركبوا السياره )
خالد : وين تبين تتعشين ؟
اسراء ومالها خلق شي : اي مكان
خالد لف ويهه و شافها وحس ان فيها شي : شفيج ؟
اسراء : مافيني شي
ما اهتم خالد و سكت شوي .. شرايج نروح فندق نتعشى ؟
اسراء نزلت راسها و زعلت شوي وماكان لها خلق شي : كيفك
خالد حس ان فيها شي ، و عرف انها متضايقه من سالفه المكياج ،،
تنهد خالد : اسراء حبيبتي ، لاتزعلين ، يمكن ضايقتج يوم قلتلج مسحي الحمره ، بس صدقيني هذا من مصلحتج !
سمعت اسراء كلام خالد و نزلت راسها و ظلت ساكته ، وكمل خالد كلامه ،،
خالد : اسراء انا احبج ، و من كثر حبي لج اغار عليج ، ومابي اي احد يشوفج ويطمع فيج ، انتي لي ، لي بروحي و ما احب احد ياخذج مني ولا يضايقج بشي ، و اذا قلتلج خففي من مكياجج ولا مسحي حمرتج هذا من حقي ، لاني احبج و اغار عليج ، عدل ولا مو عدل ؟
اقتنعت اسراء بكلام خالد شوي و رفعت راسها و بصوت ناعم : خالد ؟
خالد بـ لين : عيونه
بحيا كبيييرر و بصوت ناعم حيل : احبك
ابتسم خالد : وانا احبج اكثر
و بالمطعم ،
جو رومانسي ورعه كان الجو عند اسراء وخالد ، الموسيقى هاديه كانت ماليه المكان ، و لغه العيون كانت متبادله بيناتهم ، نظرات حب من خالد موجهه لـ اسراء و نظرات حب ممزوجه بحيا من اسراء موجهه لـ خالد ،
ابتسم خالد ابتسامه صغيره و قال : تصدقين ؟
اسراء: امم شنو ؟
خالد : اني احبج ؟؟
اسراء : هههه ، اي اصدق
ظلت عين خالد على اسراء و اسراء نزلت راسها و حاولت تتجاهل نظرات خالد ، وبعد دقايق رفعت راسها لقت عيونه عليها ، استحت و انصبغ ويهها بـ اللون الاحمر ،،
اسراء : خالد ؟
خالد : آمري
اسراء: انت مو يوعان ؟ يلا اطلب
خالد : بس شبعت ، شفت ملاك جدامي و نساني الدنيا و مافيها ، و نساني اليوع وكل شي
اسراء: خالد بس عاد ترا والله استحي
خالد : فديتج والله
الساعه 9 الصبح في بيت شهد :
كان احمد مشغول و موفاضي لاحد ، كان ماسك الفون و يتكلم ،
احمد : يلا ابراهيموو خلصت كل شي ؟
ابراهيم: اي ، بس ناقص وجودك
احمد : صار ، مسافه الطريج و اكون عندك ،
سمعت شهد صوت اخوها احمد و دخلت الدار عليه ،
شهد : احمد وين رايح ؟
احمد : مسافر
شهد : والخطه ؟؟
احمد : شفيج انتي ؟ مو قلتلج انا اليوم بسافر ؟ ولما ارجع من السفر يصير خير ، مداج نسيتي؟
شهد تذكرت : اييي ، تروح و ترد بالسلامه
احمد : الله يسلمج ، تبين شي ؟
شهد : ابي سلامتك
احمد : الله يسلمج ، يلا انا ماشي ،،
تنهدت شهد : حافظك الله ،،
و بعد دقايق ،،
شهد : يصير خير يا خالد ، بتشوف شبسوي فيك ، ان ما خليتك تصير مثل المينون و تدورني دواره ، ما اكون انا شهد ،،
سحبت تلفونها من جيبها و طلعت مسج و دزته لـ خالد ،،
بيت بو عبدالله :
كانت اسرء قاعده ع الكرسي و تعدل شعرها و تحط لها مكياج خفيف صباحي ناعم ، وخالد نايم بالفراش ، سمعت صوت نغمه مسج صادره من فون خالد
اسراء بصوت ناعم : خالد حبيبي قوم ، صارت 9 ونص وانت ليلحين نايم
خالد بصوت نعسان حييل : خليني انام
اسراء : قوم في احد يبيك ضروري دزلك مسج
خالد سمع كلمه مسج فززز من مكانه
خالد : مسج !!
اسراء استغربت : اي مسج ؟ ليش ؟
خالد : لا لا ولا شي ، وين فوني ؟
اسراء : يمك بالدرج
خالد فتح الدرج و خذا الفون بسرررعه و فتح المسج وكان طبعا من رقم غريب و اهوا رقم شهد الثاني ، المسج [ ادري انك تحبني و تموت فيني بس خايف تقول .. من معجبه ! ]
خالد قرا المسج و عصب حييييل و عقد حواجبه وقط الفون ع السرير ، استغربت اسراء من تصرف خالد ، و قامت من الكرسي و قعدت يم خالد وسألته : خالد شفيك ؟
خالد بعصبيه : مافيني شي ،
اسراء بهدوء : خالد شلون مافيك شي ؟ شوف ملامح ويهك شلون تغيرت ؟
خالد حاول يمسك اعصابه : قلتلج مافيني شي
اسراء قربت منه اكثر و حطت ايدها على شعره و قعدت تمسحت عليه بهدوء ، حس خالد بشعور غريب ،
اسراء: حبيبي مايصير مافيك شي ، اكيد في شي بس انت ماتبي تقولي ، ماعليه حبيبي يمكن اذا قلتلي هالشي بضايقني ،، ظلت ايدها على شعر خالد و تمسح عليه و قربت اكثر و طبعت بوسه على خده واستحت حييل و قامت بسرعه من مكانها ، خالد الي حس بشعور غريب و هداا واايد و انطفت النار الي بداخله و راحت العصبيه ، و تحولت حق راحه بال ،
خالد قال في قلبه : سحر وربي سحر مو بنت ! الله يخليج لي يا رب
اسراء: خالد حبيبي ؟ وين رحت ؟؟
خالد صحى : هاا ! ( ابتسم ) ، معاج
اسراء: يلا خالد قوم ننزل عشان نتريق
خالد : لاااااا
استغربت اسراء: ليش لاا ؟
خالد : قعدي معاي لاتنزلين ، انا مابي اتريق ابي اقعد معاج ومابيج تتحركين
اسراء :\ ، ( حطت ايدها على بطنها و مثلت دور اليوعانه الي تبي تاكل ) خالد انا يوعانه واايد و لازم اكل ، و نسيت اني حامل ؟ لازم اكل عدل
خالد : لا مانسيت ، بس انا ابيج تقعدين معاي وماتنزلين ولا تتحركين ، يلا جدامي قعدي هني
اسراء :خاالد من صجك ؟ تبي تحبسني ؟ ماتبيني اروح مكان ؟
خالد : اي ، اخاف عليج ، اخاف احد يسوي فيج شي
اسراء: بذمتك منو بسوي فيني شي ؟ خالد يلا عاد امش ننزل نتريق
خالد : مابي ! غصب ؟
اسراء : انزين لاتنزل ، انا بنزل
خالد : انا قلت لا يعني لا
تنهدت اسراء: حاضر ماراح انزل بقعد عندك
ابتسم خالد و كان كل هذا تمثيل عشان يبيها تدلعه و تقعد معاه ،،
وبعد ساعه ،،
اسراء حست بالملل ، كانت قاعده بمكان واحد و ماتتحرك و خالد حاط عينه عليها و يلعب بشعرها و بأضافرها ،
اسراء : خالد حبيبي ؟
خالد : هلا ؟
اسراء : ممكن اطلع ؟
خالد : لا طبعا
اسراء : اي ليش عاد ؟ حرام عليك
خالد : بس ، انا ابيج تكونين هني ماتطلعين
تنهدت و سكتت و حاولت تسوي اي شي عشان تطلع من السجن الي حابسها فيه خالد، وفجاه سمعت صوت عبدالمجيد صادر من فونها ، فرحت حيييل وتحركت شوي
خالد : وين وين ؟
اسراء : باخذ فوني
خالد : لا ماتاخذينه ، خلينه يرن لما يمل
اسراء حست انها صبرت على خالد وايد و عاندته و بحركه خفيفه وسريعه قامت و خذت فونها وردت ،
اسراء : الو ؟
ام عبدالعزيز : شلونج يمه ؟
اسراء : هلا يمه هلا حبيبتي
ام عبدالعزيز : شلونج يمه شخبارج ؟
اسراء : الحمدلله يمه انا بخير ، انتي شلونج شخبارج ؟
ام عبدالعزيز : الحمدلله بخيير ، وينج يمه ماتبينين ؟
تنهدت و شافت خالد : شسوي يمه ،
ام عبدالعزيز : يلا عاد اليوم ابي اشوفج تعالي عندنا ، خواتج بيون اليوم
فرحت اسراء : صجج والله ؟
ام عبدالعزيز : اي ، و نور طلعوها من المستشفى بعد ، و بتيي ان شاء الله
اسراء بفرح كبييرر: ان شاء الله يمه بيي
ام عبدالعزيز: خلاص عيل نشوفج بعدين
اسراء : ان شاء الله يمه
ام عبدالعزيز : يلا يمه مع السلامه
اسراء : الله يسلمج يمه
وعقب ما سكرت الفون ،
اسراء بـ ابتسامه عريضه : خالد بطلع بعدين بروح عند امي
خالد شافها و ظل ساكت ، و بعدين قال : لا
عصبت اسراء شوي : خالد ! شنو كله لا لا ؟ حرام عليك من زمان ما شفت امي ولا ابوي ، و لا ادري عن اخبارهم ولا يدرون عن اخباري ، تدري ان امي ليلحين ماتدري اني حامل ؟
تنهد خالد : انزين انزين كليتيني! ، روحي بس لاتتاخرين
اسراء : ماراح اتاخر
بيت بو محمد :
اسماء : يلا نوري حبيبتي بنطلع
نور : ماما وين بنلوح ؟
اسماء : بنروح عند ماماعوده و باباعود
نور : خالتي جولي هناك ؟
اسماء : والله ما ادري عنها خالتج ، من تزوجت ماشفتها الا مرتين يمكن ،
نور : ابي خالتي جولي
اسماء : ان شاء الله ، بس قومي معاي يلا عشان تلبسين و نروح بسرعه ،،
بيت فهد :
اسيل : واي واي جنوووويه بسج بجي خلاص صدعتي راسي
فهد : بنتج هذي فيها شي ، مادري شصاير لها بس تبجي
اسيل : والله مادري شفيها ، يلا فهد بلبسها و بروح عند امي
فهد : اوكي ، انا بروح الدوانيه و يمكن اتاخر
اسيل : اوكي ،
بيت بوعبدالعزيز :
ام عبدالعزيز و بوعبدالعزيز كانوا قاعدين بالصاله و معاهم عبدالعزيز ،
بوعبدالعزيز : والله البيت صخه و يبيله حركه ، يهال و شطانه ،
ام عبدالعزيز : هههه ، لاتحاتي ، الحين بتييلك جنوويه و بتبجي و يصير في البيت صوت
بوعبدالعزيز : يحليلها هالنمله هذي ،
ام عبدالعزيز : يلا ان شاء الله عبدالعزيز يتزوج و يترس لنا البيت يهال
عبدالعزيز : لا يمه وين تو الناس ، انا ما افكر بالزواج الحين ، الزم ما علي دراستي ، و الزواج لاحق عليه ،
( و دخلت اسماء مع نور و محمد )
بيت بو عبدالله تحديدا غرفه اسراء :
اسراء : يلا خالد انا بطلع الحين
خالد لف ويهه و شافها ، خالد : لبسي عبايه وطلعي
اسراء تنهدت : خالد انا رايحه بيت اهلي مو سوق
خالد : ميخالف ، عشاني
تنهدت اسراء : ان شاء الله
خالد : لا تتاخرين
اسراء : ان شاء الله ماراح اتاخر
بيت بو عبدالعزيز :
بعد ما وصلت اسماء و اسيل تيمعوا كلهم بالحديقه ، كان الجو واايد حلوو ، و الكل مستانس بـ الجو الحلو و اليهال لاهين بالالعاب ماعدا نور الي كانت قاعده على الكرسي و ماتقدر تتحرك ، بس تأثير الجو و السوالف خلاها تستانس ، ووصلت اسراء ،
اسراء : السلام عليكم
الكل : و عليكم السلام
بوعبدالعزيز : اووه من وين طالعه اليوم ؟؟
اسراء بحيا : شسوي يبه صدقني ما عندي وقت
ام عبدالعزيز : معذوره معذوره ، توج عروس
اسماء : شلونج اسور شخبارج ؟ شدعوه ماتبينين ؟
اسراء : شسوي والله ماعندي وقت ، خالد ماخذ كل وقتي ، و الدراسه بعد
اسيل : بعد ماعندج ياهل الي ماخذ كل وقتج ؟
ابتسمت اسراء و حطت ايدها على بطنها : انا حامل
الكل استانس يوم سمع الخبر و اكثر واحد استانس بوعبدالعزيز لان يحب اليهال وايد ، و خصوصا ان بييله حفيد من اغلى بناته " اسراء " ،،
و عقب 3 ساعات رجعت اسراء البيت ،
بيت بوعبدالله :
دخلت اسراء الشقه و كانت هاديه، دخلت شوي شوي الغرفه لقت هدوء و انصدمت يوم لقت الغرفه مرتبه و خالد مو موجود ،!
اسراء : وين راح خالد ؟ سيارته موجوده ؟
سمعت صوت ماي ياي من بعييد و عرفت ان خالد قاعد ياخذله شور و ارتاح قلبها ،، غيرت ملابسها و انسدحت على الفراش و عقب دقايق طلع خالد ، كان شكله روووعه لاف الفوطه على جسمه و ريحه الشور جل الرجالي معطره جسمه ، و قطرات ماي تنزل منه ، شافته بنظره حلوه و ابتسمت له ،
ابتسم لها ابتسامه عجيبه و راح غرفه الملابس و لبس ملابس للنوم و قعد يمها بالفراش و حط ايده ورا ظهرها و لمها ،
خالد : فقدتج وربي ، اول مره تطلعين بروحج وتخليني
استحت اسراء حييل و دفنت راسها بصدره ، وعقب ثواني رفعت راسها ، وقالت بصوت انثوي ناعم : وانا بعد حبيبي ، فقدتك
و الصبح في بيت شهد :
دخل احمد غرفه شهد بقوووه و ملامح الفرح باينه عليه
احمد : شهوووود
شهد بصوت نعسان حييل و مالها خلق تنهدت وقالت : هاااا
احمد : ويعاااا ، قولي نعم
شهد استوعبت و فززت من مكانها : احمممد ! وصلت ! الحمدلله على السلامه
احمد بـ ابتسامه: الله يسلمج
شهد : هاا شتبي مقعدني من الصبح وانا المفروض انام اليوم ؟
احمد : قومي معاي يلا نكمل الخطه
شهد : اووووه ، واي مالي خلق اقوم الحين
احمد : يلا يلا بسرعه ولا بروح
شهد : لااا يلا يلا كاني دقايق و عندك
بيت بو عبدالله :
البيت كان فاضي ، ماكان في احد غير ام عبدالله و الخدامه ، الكل مشغول بدوامه و شغله ،، سمعت الخدامه صوت الجرس بره و طلعت تشوف منو ، و فتحت الباب :
احمد الي كان متنكر بـ لبس هندي يشتغل بمصبغه ، و بلهجه هنديه : السلام عليكم
ميري : وعليكم السلام ، شنو يبي ؟
احمد : انا مال مصبغه ، بابا خالد يقول في فوق ملابس مال اهوا جيبي
ميري : اوكي دقيقه ،
و راحت ميري المسكينه و دخلت غرفه خالد و فتحت الكبت لقت جدامها دشداشه سحبتها و حطتها في جيس و ركضت للريال ،
و عقب دقايق ،،
ميري : تفزل ( تفضل )
احمد : مشكور واجد ،،
استانس احمد حيييل و نجحت خطته و قدر ياخذ شي من اثر خالد ، ركب السياره و طااار بسرعه عند المشعوذ ، و عطاه الاثر و رجع البيت ومعاه السحر المطلوب ، فرحت شهد حيييل و نطرت متى يصير الصبح علشان يتحقق الي تبيه ، و طلعت في ساعه متاخره من الليل مع احمد و راحوا لـ بيت بو عبدالله و كتت السحر عند باب سياره خالد ، و ضحكت ضحكه خبيثه و غمضت عينها و بدت بـ احلامها الورديه ،،
بيت بوعبدالله :
قعد خالد الصبح مبجر و قعدت معاه اسراء و لبست و قعدت تحط لها لمسات مكياج خفيف ،
خالد : اسراء وين دشداشتي البيضه ؟
اسراء : اول ما تفتح الكبت تلقاها
خالد : ماكو شي ؟
اسراء استغربت : انا حاطتها بنفسي ،
خالد : وينها ماكو شي ؟
اسراء قامت من مكانها و شافت و صج مالقت شي ! ، اسراء : مادري خالد ، بس انا متأكده اني حطيتها اول وحده
تنهد خالد : اوكي مو مشكله ، بلبس غيرها ،،
ولبس خالد غيرها و تعطر و لبس ساعته و خذا بوكه و نظارته الشمسيه و نزل تحت بسرعه ، و اكل ريوق سريع و طلع ، ومشى لما وصل للبورش كايين و حط ريله على حبيبات بودره وماحس فيها ولا انتبه لها ، وركب الكايين و راح الدوام ،
بيت شهد :
شهد بضحكه قويه شوي : و اخيييرا يا خالد بيتحقق الي ببالي ، و اخيرا بتصير لي !
و سرحت شوي ، مسكينه والله يا اسراء ، اقولج سوووري ، سوري سوري لاني باخذ خالد منج و بتعيشين بتعاسه و بتنتهي حياتج ،
كليه الهندسه :
دلال بفرح كبيير و الضحكه شاقه الحلج : شلووونج ؟
اسراء شافت دلال فرحانه و ابتسمت : الحمدلله بخيير ، وانتي شلونج ؟
دلال : الحمدلله بخييير
اسراء : شكلج مستانسه ؟ هاا قوليلي شصاير ؟
دلال ابتسمت : قوليلي مبرووك
فرحت اسراء و ابتسمت : الف مبروووك ، بس على شنو ؟
دلال بحيا : انخطبت !
اسراء : صجج !! مبرووووك حياتي الف الف مبرووك
دلال : الله يبارك فيج
اسراء : ما الومج عيل ، ان شاء الله دووم مستانسه
دلال : اجمعيين ، شوفي اسراء ، ترا الملجه بعد اسبوعين ، وابيج تكونين موجوده مو تقوليلي حامل و ما اقدر ترا ما راح اقبل اعذارج
اسراء: افا عليج ، اكيد بكون موجوده و ماراح اطوف مناسبه حلوه مثل هذي ، اتني ماقصرتي معاي و ان شاء الله ماراح اقصر معاج بشي ،،
دلال : تسلمين حبيبتي ،
بيت شهد :
احمد : الخطوه الاولى و خلصنا منها ، الحين الخطوة الثانيه ، دور اسراء الحين ان ماخليت خالد يشك فيها ما اكون انا احمد !
شهد غمزت له و قالت : تعجبني والله ،
و بالدوآم عند خالد ،
كانت السوالف تدور بين خالد و جاسم ، فجاه نزل خالد راسه و حطاه ع المكتب ، استغرب جاسم و ماتردد ابد و سأل خالد عن السبب ،
جاسم : خالد ؟ عسى ماشر شفيك ؟
خالد : مادري ، احس بصداع غريب
جاسم : سلامتك ماتشوف شر
خالد : الله يسلمك
جاسم : تبي تروح المستشفى ؟
خالد : شدعوه ، كلها صداع عادي شوي و يروح ، لا تحاتي
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك