رواية ويبقى خالد -10
فهد : مسكيها ماختني انام ، خليها عندج
(خذت اسيل جنان من عند فهد ) اسيل : فهد انا بطلع الحين
فهد استغرب : وين ؟
اسيل : بعد عمري نور داعمتها سياره و اهيا الحين بالمستشفى
فهد : اووه ! لا حول ولا قوه الا بالله ، اوكي روحي
اسيل : انزين بخلي جنان عندك مابيها تدوخني هناك حرام البنت تبي راحه
فهد : خلاص اوكي خليها هني
اسيل : يلا بروح اغير ملابسي
المستشفى :
راحت اسيل المستشفى و لقت هناك اسماء و ام عبدالعزيز ، و شافت نور المسكينه نايمه و شكلها يكسر الخاطر ، كانت شاريه لها هديه حلوه و مغلفه و منسقه بـ الوان حلوه ، دخلت و حطت الهديه على طاوله صغيره كانت موجوده ،
اسيل : السلام عليكم
الكل : وعليكم السلام
اسيل : شلونج اسماء ؟ و شلون بنتج ؟
اسماء تنهدت حيل : الحمدلله على كل حال
اسيل : بعد عمري تكسر الخاطر ، قربت اسيل من نور و باستها على خدها ،
وبعد دقايق وصل بو عبدالعزيز ،
بوعبدالعزيز : السلام عليكم
الكل : و عليكم السلام
بوعبدالعزيز : سلامات ماتشوف شر
اسماء : الله يسلمك يبه من كل شر
بوعبدالعزيز : عيل وين نواف ؟
اسماء : راح البيت اييب حق نور ملابس
بيت بو عبدالله ، تحديدا بغرفه خالد :
خالد : يلا حبيبتي تبين تروحين الحين ؟
اسراء : اي
خالد : يلا لبسي ، انا بنزل تحت على ماتخلصين
اسراء: اوكي حبيبي
فتحت اسراء الكبت لبست لها بنطرون جينز مع قميص طويل شوي ، وحطت مكياج خفيف حيل و لبست شيلتها و خذت جنطتها و نزلت الصاله ،،
اسراء: شلونج خالتي ؟
ام عبدالله : هلا اسراء، الحمدلله بخير
خالد : يلا مشينا ؟
اسراء : يلا
ام عبدالله : وين ؟ قعدوا معاي شوي
اسراء: بروح المستشفى حق بنت اختي
ام عبدالله : وي شفيها !
اسراء: داعمتها سياره
ام عبدالله : سلامتها ماتشوف شر ، سلمي على اختج
اسراء: الشر ماييج ، الله يسلمج
خالد : يلا حبي ،
ومسك خالد ايد اسراء و مشى معاها لي السياره ، و ركبوا السياره و شغل خالد الرادو و حط مرينا اف ام و لقى اغنيه و عجبته و خلاها ، لفت انتباه خالد اسراء الي كانت حاسه بضيقه
خالد : حبيبتي شفيج ؟
اسراء: ضاق خلقي يوم سمعت الخبر
خالد : الله يشافيها ان شاء الله
اسراء: خالد سكر الاغنيه ضايق خلقي مابي اسمع شي
خالد : ان شااء الله على امرج ( وسكر الاغنيه )
اسراء: خالد قبل لا نروح المستشفى مر على محل العاب علشان اشتريلها هديه
خالد : حاااضر
و وصلوا عند محل العاب كبير ، شرت منه اسراء لعبتين كبار حلوين و غلفتهم و زينتهم بالشرايط و البالونات ، وطلع شكلها وايد حلو ،
وعقب دقايق وصلوا المستشفى ،
دخلت اسراء مع خالد و سلموا ع الكل ،
اسراء: سلامات ماتشوف شر الحلوه
اسماء بضيق : الله يسلمج ، الشر ماييج
اسراء: بعد عمري تكسر الخاطر ، يعور القلب شكلها
و بعد دقايق ، صحت نور من نومها ،
نور بتعب و بصوت واطي يكاد ينسمع : ماما
فزززت اسماء و قربت من نور : نعم حبيبتي ؟
سكتت نور و شافت ناس وايد حوالينها و خافت بالبدايه ،
نور : ماما ابي ماي
اسماء : ان شاء الله حبيبتي ، ( يابت لـ نور ماي وشربتها لانها ماكانت تقدر تمسك شي بروحها )
نور بصوت طفولي ممزوج بالحزن : ماما انا ليش هني ؟ ليش حاطين في ايدي شي ابيض ؟
سكتت اسماء و ماتكلمت ، وبدت دموع نور تنزل ببطء ، مسحت اسماء دموعها وحبت تنسيها، قامت اسيل و خذت الهديه و حطتها جدام نور ،
اسيل : شوفي نور شريتلج هديه حلوه
نور شافتها و عجبها الشكل الخارجي للهديه ،
اسيل : افتحها حقج ؟
نور هزت راسها بالايماء ، فتحت اسيل الهديه و كانت عباره عن باربي مع غرفه و اغراض واايد ، شافت نور الهديه و ابتسمت ابتسامه صغيره ،
استانست اسماء يوم شافت بنتها تضحك ، و ارتاحت اسراء شوي و تطمنت على نور و عطتها الهدايا الي يابتهم
اسراء: شوفي نور شريتلج هدايا حلوه
نور ابتسمت لـ خالتها
قعدت اسراء مع نور لفتره قصيره و استانست معاها و رسمت البسمه على وي نور ، و بعدين طلعت مع خالد ،
و بالسياره :
اسراء : حبيبتي نور كاسره خاطري ، بعد عمري ماتستاهل
خالد رفع حاجب واحد : شنو هذا ترا انا بديت اغار ، كل كلمه و الثانيه قلتي حبيبتي و حياتي و بعد عمري ،
اسراءابتسمت : حبيبي تغار ؟
خالد يسوي روحه زعلان : اي اغار
اسراء: و انتا بعد حبيبي و عمري
خالد : صج والله ؟
اسراءاستحت و نزلت راسها : اي صج
خالد : ياقلبي انتي ، اقول حبي ؟
اسراء: قول حبيبي
خالد : شرايج نتمشى ع البحر
اسراء: الله ، يالله نتمشى ليش لا
ابتسمت خالد و شغل اغنيه و زاد من سرعه السياره شوي و راح البحر
اسراء: خالد حبيبي شوي شوي لاتسوق حيل
خالد : شسوي مستانس
اسراء : انا اخاف عليك ، اخاف يصير فيك شي اسم الله عليك
خالد : تخافين علي ؟
استحت اسراء و نزلت راسها و سكتت ، و بصوت ناعم : اذا ما اخاف عليك ، اخاف على منو
خالد : وماتخافين على نفسج ؟
اسراء: انتا اهم حبيبي
خالد : فديتج والله ، الله يخليج لي
اسراء بحيا : و يخليك لي :$
ابتسمت اسراء و حست نفسها محظوظه لان عندها زوج مثل خالد ،،
و عقب كلام حلو و غزل وصلوا البحر ،
خالد : الله الجو روعه و البحر اينن
اسراء: اي وايد حلو
خالد : تعالي نقعد على الرمل
و قعد خالد مع اسراء على الرمل ، بدت اسراء تتأمل منظر البحر الي جدامها و نست نفسها و نست خالد ، اما خالد الي كان مشغول باللعب بالرمل ، حركت راسها و لفت انتباهها الرسمه الي سواها خالد
اسراء: خالد شنو هذا ؟
خالد : قلب الحب و عليها حرفي و حرفج
كانت الرسمه عباره عن قلب الحب كبييير ، وعليها حرف الـ k و E، طلع خالد من القلب 4 اسهم ، استغربت اسراء و ماترددت ابد في سؤال خالد عن الاسهم
اسراء : قلب الحب و عرفتها ، و الاحرف عرفتها بعد ، الاسهم شنو ؟
خالد : شوفي ، راح نييب عيال ، صبيين و بنتين
اسراء ابتسمت : ان شاااء الله حبيبي
خالد : اول ولد راح نيبه بنسميه وليد
اسراء: ان شاء الله بو وليد ، بعدين ؟
خالد : ثاني ولد نييبه نسميه بدر
اسراء : حااضر حبيبي ، و البنات ؟
خالد : عاد البنات عليج انا مالي شغل
اسراء: اممم ،
خالد : اسورة حبيبتي
اسراء ضحكت : هلا حبي ؟
خالد : قربي يمي شوي
اسراء : حاضر حبيبي ، ( وقربت شوي منه ) ، كاني قربت ؟
يوم قربت اسراء من خالد طبع خالد بوسه على خدها و ابتسم ، استحت حييييل و تلون ويها لـ اللون الاحمر ،
اسراء : خالد حبيبي انا مو قلتلك لاتسويها جدام الناس ؟
خالد : بعد قالتلي الناس ؟ حبيبتي انا شكو بالناس ، انا علي منج انتي و بس ، ( تنهد خالد ) وقال : الحمدلله انج صرتي من نصيبي
حطت اسراء عينها بعين خالد و ابتسمت ، لفت ويهها لقت ريال يبيع برد و تشوقت
اسراء: خالد ؟
خالد : آمري حبيبتي ؟
اسراء: ابي برد
خالد : بس برد ؟ حاضر حبيبتي ، اي نوع ؟
اسراء : لولو
خالد : انتي بروحج لولو بعد تبين لولو ؟
اسراء بحيا : بس خالد ترا استحي :$
خالد : آآآخ ع الحيااا ،
وراح خالد يشتريلها برد،
خالد : تفضلي حبيبتي
فتحت اسراء البرد و بدت تاكله ، خالد حب يلطف الجو و قالها :
خالد : عطيني البرد مالج شوي
استغربت شوي وعطته ، خذا خالد البرد بـ ابتسامه عريضه و مرر البرد على خدها ، انصدمت من الي سواه خالد و عصبت شوي
اسراء: خااااااااااالددد شسوييييت !!
خالد الي كان ميت من الضحك : اوقفي اوقفي لاتتحركين ولا تسوين شي ، بس خليني آخذ لج صوره ، بحركه سريعه طلع تلفونه من جيبه و صورها
اصطنعت الزعل و طلعت من جنطتها ورقه كلينكس و مسحت البرد و نظفت ويهها بـ كلينكس مرطب ،
خالد : زعلتي
اسراء( لفت ويهها الصوب الثاني يعني زعلانه )
خالد : يالله عاد كنت العب معااج
اسراء: تلعب معاي تسوي جذي ، مابي مابي زعلت
خالد : يلا عاد ضحكي عندي لج مفاجأه
اسراء: مابي
خالد بضحكه : ماتبين ؟ انزين يلا مع السلامه
و قام خالد و ركب السياره و حب يشوف رده فعلها
حاولت اسراء تتغلى و تقعد بمكانها و ماتتحرك ، فتحت جنطتها و خذت فونها و شغلت نفسها بـ اللعب و المسجات ، اندمجت مع مسج حلو كان من خالد و قطع اندماجها صوت راشد الماجد اغنيه [ الحب خالد ] المتصل ( حبيب قلبي ) سمعت الاغنيه و اندمجت معاها لما لقت خالد واقف يمها ،
خالد : عاجبتج القعده بروحج ؟
اسراء لفت راسها يمين و يسار يعني لا
خالد : يلا عاد قومي مخليتي بالسياره بروحي
اسراء : ان شاء الله بقوم ، مد خالد ايده و مسك اسراء و راحوا مع بعض السياره ،،
كان الجو هادي بالسياره اللهم صوت الاغاني الي مسويه جو شوي ،
خالد : اسراء؟
اسراء بسرحان : نعم
خالد : تحبيني ؟
اسراء انتبهت : اي
خالد : صج تحبيني ؟
اسراء شافته و حطت عينها بعينه و نزلت راسها ، فهم خالد من هالحركه انها تحبه ،
خالد : تدرين ؟
اسراء : شنو ؟
خالد : اني ما احبج ؟
انصدمت اسراء شوي و ارتاحت يوم سمعت باجي الكلام
خالد : انا ما احبج ، انا اموووت فيج
اسراء : يا بعد عمري يا خالد ، و انا بعد
بيت جاسم :
جاسم : ايي يا خالد ، تزوجت و خليتني ، لكن مقيوله من لقى احبابه نسى اصحابه ، ماتردد و رفع الفون و اتصل على خالد ،
خالد كان بالسياره و معاه اسراء قطع سوالفهم صوت فون خالد
خالد بـ ابتسامه : هلا هلا والله
جاسم : هلاا باللي ناسيني
خالد : شسوي بعد ، تدري معرس
جاسم : الله يتمم عليك ، شلونك شخبارك ؟
خالد : بخير الله يسلمك ، انت شلونك شـ الدنيا فيك ؟
جاسم : بخير الحمدلله ، اقول خلود
خالد : هلا
جاسم : شرايك تمرني و نطلع ؟
خالد لف ويهه و شاف اسراء : امم وين بتروح ؟
جاسم : نتمشى ، ولا نروح الدوانيه
خالد : اوكي صار
جاسم : يلا انطرك عيل
خالد : اوكي ،
خالد : حبيبتي
اسراء: نعم حبي
خالد : الحين بوديج البيت و بطلع مع رفيجي
اسراء زعلت شوي: خالد ، بتخليني بروحي ؟
خالد : من قال بخليج بروحج ، انتي مو بروحج بالبيت قعدي مع فطوم ولا مع امي ، و ان شاء الله ماراح اتأخر
اسراء سكتت شوي : اوكي
بيت بو عبدالعزيز :
عبدالعزيز الي كان توة ياي من الطلعه ودش البيت مالقى احد ،
عبدالعزيز بصوت عالي شوي : يمه ، يبه ، وينكم ؟؟
دش المطبخ لقى ميري سألها : وين ماما و بابا ؟
ميري : ماما بابا روح مستشفى
عبدالعزيز انصدم : مستشفى ! ليش شصاير !
ميري : ما في معلوم
عبدالعزيز : انزين انزين ،، و بسرعه طلع فونه من جيبه و اتصل على ابوه ،
وفي المستشفى :
بوعبدالعزيز : هذا عبدالعزيز ، الو ؟
عبدالعزيز : شلونك يبه
بوعبدالعزيز : هلا يبه
عبدالعزيز : يبه وينك و وين امي ؟
بوعبدالعزيز : احنا بالمستشفى عند نور ، داعمتها سياره
عبدالعزيز انصدم : اوووخ ! ماتشوف شر
بوعبدالعزيز : الشر ماييك
عبدالعزيز : انزين اقدر ايي الحين ؟
بوعبدالعزيز : لا احنا الحين بنطلع ، ممنوع الزياره ،
عبدالعزيز : امم ، اوكي عيل
عبدالعزيز : مسكينه ماتستاهل والله ، الله يكون في عون امها ،،
بخطوات سريعه ركض على الدري و راح غرفته غير ملابسه و انسدح على السرير و غمض عيونه وحس بالراحه ، و عقب ربع ساعه سمع صوت امه و نزل تحت ،،
عبدالعزيز : قوه يمه
ام عبدالعزيز و التعب باين عليها : هلا يمه
عبدالعزيز : شلون نور و اسماء ؟
ام عبدالعزيز : الله يكون في عونهم
بيت بو عبدالله :
وصلت اسراء البيت و راحت شقتها ، فصخت شيلتها و غيرت ملابسها و حطتهم بالكبت و رتبت اغراضها ، قعدت ع السرير و حاولت تسلي نفسها بشي على ما يوصل خالد ، خذت لها كتاب من كتب الجامعه و قرته ، بعد ربع ساعه حست بالملل ، خذت خصله من شعرها و لعبت فيها ، تحركت من مكانها و راحت جدام المنظره و شافت شعرها ، حركته شوي يمين و يسار ، نفشته شوي و صار روعه ، فتحت الدرج و طلعت علبه المكياج و بدت تحط لها لمسات المكياج ، رسمت فوق عيونها خط من الايلاينر الاسود و داخل عيونها خط من الكحل الاسود الغامج و كثفت رموشها بـ ماسكرا سوده حيل ، وخطت شفايفها بـ محدد الشفايف و حط حمره خفيفه و غلوس لمعه ، و اخر شي احمر الخدود الخفيف ، شافت شكلها بالمنظره و ابتسمت ، وخذت عطر نسائي حلو و رشت رشتين و ابتسمت ، اختفت بسمتها لما شافت الساعه ، لقتها تشير 11 الليل ،
في الدوانيه :
جاسم : شدعوه خالد ، تزوجت و نسيتنا
خالد : شسوي بعد ،
جاسم : الله يهنيك
خالد : ها بو جويس ، ماتفكر تتزوج ؟
جاسم : والله بصراحه ما افكر بالزواج
خالد : ليش ؟
جاسم : شلي بالمصايب و عوار الراس ، خلني جذي احسن
خالد : هههه ،
علي : يالله شباب عشا
جاسم : يلا خلوود قوم
خالد : يلا
في المستشفى :
اسماء : يلا نور حبيبتي نامي
نور : ماما ليلي تعولني
اسماء : حبيبتي نامي و تصير زينه ريلج
نور و الدمعه بطرف عينها : ماما بنام بدالي
اسماء : ان شاء الله حبيبتي لي طلعتي من المستشفى بتنامين بدارج
و زادت الدموع و تحولت لـ بجي ، حاولت اسماء تنسيها الالم و قالت لها قصه و مسحت دموعها لما هدت و نامت
اسماء : الحمدلله لك يا رب !
بيت بو عبدالله :
اسراء : تأخر خالد ، تنهدت و قعدت ع السرير،[ تذكرت ان وراها جامعه و لازم تنام مبجر لان محاضرتها مبجر ] ،
و بعد عشر دقايق دش خالد الغرفه ، لقى اسراء منسدحه ع الفراش
خالد : حبيبتي نايمه ؟
اسراء بصوت ناعم واطي : لا حبيبي مو نايمه ، انطرك
خالد : قلبي انتي
اسراء: خالد وين كنت ؟ تأخرت
خالد : كنت بالدوانيه
اسراء : متعشي حبيبي ولا اسويلك عشا ؟
خالد : لا متعشي الحمدلله ،
راح خالد غرفه الملابس و فصخ الجماغ و الدشداشه و كانت تشوفه اسراء و تبتسم ،
اسراء بقلبها : روعه بـ الجماغ و الدشداشه
و عقب ما غير ملابسه قعد انسدح بالفراش ،
خالد : آي بطني
اسراء : سلامه بطنك حبيبي ، شفيك ؟
خالد : شربت ماي و عصير و انتفخ بطني
اسراء و النوم باين عليها : اممم
خالد : دايخه صح ؟
اسراء: صح
خالد : سوري حبيبتي خليتج تنطريني ، مره ثانيه اذا تأخرت نامي لا تنطرين
اسراء : ان شاء الله ، يلا حبي تصبح على خير
خالد : و انتي من اهله
و بعد دقايق نامت اسراء بهدوووء تام ، اما خالد ماكان في النوم ، يت عينه على شعرها و بدا يلعب بشعرها ،
خالد : ماشاء الله شعرها روعه ، و لونه اروع بعد ، و ظل يلعب فيه مثل طفل صغير لما داخ و نام ،،
و ليل هادي الكل فيه نايم و مرتاح ، الا شخص واحد كان قاعد و يفكر بـ شي يخرب حياه احلى شخصين [ خالد – اسراء ] ، شهد
شهد : بدق عليه الحين ، ( كانت الساعه 3 الفير )
( رنه - رنتين - 3 – 4 .. المشترك لا يرد ) !
عصبت شهد ، اكيد نايم ، ما ترددت و اتصلت مره ثانيه ،
( رنه – رنتين – 3 - 4 .. )
خالد والنعاس مبين عليه : اووه منو الي داق هالحزه ؟ مايدري ان الناس نايمه ؟ خذا الفون و من غير ما يشوف الاسم رد بصوت نعسان : الو ؟
شهد : اهلا
خالد ماعرف الصوت : منو ؟
شهد : نسيت صوتي !
خالد عصب : منو
شهد : نستك اياه بنت الـ ...
خالد بصوت عالي شوي : استحي على ويهج ! ( و سكر الفون )
خالد : صج ناس ماتستحي ! ، وكمل نومه ،،
شهد و الدموع تنزل من عينها : حتى صوتي ماصار يعرفه ! كله منج ! كله منج ! لكن هين ، ان ما خليته يركض وراي و يكرهج ماكون انا شهد !
الساعه 8 الصبح في بيت بوعبدالعزيز :
ام عبدالعزيز كانت بالمطبخ تجهز الريوق لـ بوعبدالعزيز و عبدالعزيز ،
عبدالعزيز :صباح الخير يمه
ام عبدالعزيز : صباح النور هلا يمه
عبدالعزيز : شلونج يا الغاليه ؟
ام عبدالعزيز : الحمدلله بخير
عبدالعزيز : ليش متعبه نفسج مسويه كل هالاكل ؟
ام عبدالعزيز : ليش بعد اكيد حقكم
عبدالعزيز : يلا بتريق بسرعه و بروح قبل لا اتاخر ،،
ام عبدالعزيز : عوافي
عبدالعزيز : الله يعافيك
ام عبدالعزيز تتنهد : اي ، وينج يا اسراء ،
عبدالعزيز : اي صج ، شخبارها ؟ من تزوجت ماشفتها ؟
ام عبدالعزيز : الحمدلله ، مستانسه
عبدالعزيز : الحمدلله ، يالله يمه انا تأخرت بروح ن تبين شي ؟
ام عبدالعزيز : لا يمه سلامتك ،
عبدالعزيز : الله يسلمج يمه ،
في كليه الهندسه :
اسراء: اففف صارلي نص ساعه انطر الدكتور ماصارت ليلحين ما وصل !
دلال بـ ابتسامه : احسن
اسراء: والله شكلي برجع البيت بنام ، دايخه مانمت عدل ،
دلال : ليش خالد مو مخليج تنامين ؟
اسراء: لا بعد عمري ، نمت قبله و خليته ،
دلال : اممم ،
اسراء: امشى نتمشى شوي
دلال : يلا
و تمشوا دلال واسراء حوالي نص ساعه و عقبها ،
دلال : اسور شوفي الريال من مساع يلحقنا مادري شيبي
شافته و حست انه شكله مألوف شايفته من قبل : امشي بعيد
دلال : تعرفينه ؟
اسراء: ها ؟! لا لا ما اعرفه ،
دلال : اوكي
اسراء بقلبها: بالكليه بعد مره ثانيه !! ياربي شيبي هذا ، الله يستر
من صوب ثاني خالد ، الي كان بالدوام و مشغول حيل ،
خالد : واي مليت ، تعبت ، ماكو راحه شوي !
جاسم : احمد ربك زين
ورن فون خالد
خالد : رقم غريب ، طاف ، (و عقب دقيقتين رن و نفس الرقم )
خالد : جسوم تعرف هذا الرقم ******** ؟
جاسم : لا ما اعرفه ، رد يمكن احد يبيك ضروري
خالد : الو ؟
صوت انثوي : و اخيرا رديت !
خالد استغرب ؟ : منو معاي ؟
الطرف الثاني : انا وحده ، انت تخليت عنها بسهوله
خالد حاول يمسك اعصابه : شتبين
الطرف الثاني : انت تدري شنو ابي
خالد : ترا انا وايد معطيج وي ، باي ! ( و سكر الفون )
البارت التاسع :
جاسم : خالد شفيك ؟ منو هذي ؟
خالد حاول يتمالك نفسه : مادري
استغرب جاسم ، تضايق خالد و عصب و طلع من جيبه زقاره و بدا يدخن ،
جاسم : خالد و بعدين ، لي متى يعني ؟ كل ماتضايقت بديت تدخن !
خالد : قولي يا جاسم شسوي !
جاسم : بس عاد قطها و استغفر ربك
خالد غمض عيونه و فتحها بالبطيء ، وطفى الزقاره وحط فونه سايلنت و كمل شغله ،
عند شهد :
شهد : ليش يا خالد تسوي فيني جذي ليش ! حرام عليك والله ، لكن الظاهر الطيب ما ينفع وياك ! نهايه حياتك على ايدي !
كليه الهندسه :
اسراء: ياربي شيبي هذا لاحقني و يشوفني بنظرات غريبه !
دلال : شفيج اسور ؟
اسراء : لا ماكو شي
دلال : لا في شي ، قولي شدعوه عاد ، ترا اسرارج كلها عندي
تنهدت اسراء: ماكو شي صدقيني ، دقيقه بكلم خالد
دلال : اوكي
طلعت اسراء فونها من جنطتها و اتصلت على خالد ( رنه – رنتين – 3 – 4 .... المشترك لا يرد ! )
اسراء : مايرد ! شفيه حبيبي مايرد علي ؟
دلال : يمكن مشغول ؟
اسراء : يمكن ،
دلال :انزين .. يلا اخليج ، الحين عندي محاضره
اسراء : اوكي ، انا شكلي برجع البيت و بكشت بالمحاضره الي بعد ساعتين ونص
دلال : ههه ، كيفج
اسراء : والله شكلي بسويها و بروح اكمل نومتي
دلال : روحي كملي نومتج و بعدين تعالي
اسراء : ههه ، لا ان نمت ماراح ارد مره ثانيه ، يلا روحي محاضرتج و انا برجع البيت
و بالدوام عند خالد :
خالد : اخيرا خلصت شغلي
جاسم : ههه
خالد : بشوف حبيبتي ، تصدق اشتقت لها ؟ بكلمها يمكن ارتاح شوي
جاسم : ياعيني ع الحب
ابتسم خالد ابتسامه صغيره ، و طلع فونه من جيبه ،
خالد : 1 missed call [ حبيبه قلبي ] ، بعد عمري دقت علي و كنت حاطه سايلنت ، يلا بدق عليها ،
و بالسياره عند اسراء ،
صوت راشد الماجد [ الحب خالد و حبي خالد و باقي للي احبه ... ]
اسراء : اوه خالد ! ، الو
خالد : هلا بحياتي ، هلا بقلبي ،
اسراء بحيا : هلا فيك حبيبي
خالد : حياتي مارديت عليج فوني كان سايلنت
اسراء : امم ، خرعتني قلت اخاف صار فيك شي اسم الله عليك
خالد : بعد عمري والله ، شبغيتي ؟
اسراء : ها ؟ لا بس .. كنت بسمع صوتك
خالد : فديتج والله ، حبي وينج ؟
اسراء : راده البيت
خالد : خلصتي محاضراتج !!
اسراء: لا ماخلصت ، بس بكشت بوحده
خالد : نعم ؟ ردي ردي
اسراء : خالد مالي خلق انطر ساعتين و نص برجع البيت بنام
خالد : روحي اي مكان و لما تبدي المحاضره ردي
اسراء : خالد مالي خلق ، كفايه اني قاعده من الصبح و رايحه و الدكتور مو ياي
خالد : اي لازم هالدكاتره ، انزين ، ماتكشتين بالمحاضره وتروحين اوكي ؟
تنهدت اسراء : ان شاء الله
خالد : شفيج ؟
اسراء: ولا شي
خالد : انزين ، يلا اخليج
اسراء: اوكي
جاسم : شفييه روميوو :p يا عيني علييك ، طلعت رومانسي والله
خالد : تعلم تعلم
جاسم : لا يبه خلني بعيد عن الرومانسيه
خالد : مو كفوو انتاا :p
اسراء : بالله الحين وين اروح ؟ كله مني ليش اقول حق خالد اني بروح البيت ؟ ماكو الا اروح حق امي ، بعد عمري فاقدتها والله ،،
و عقب 10 دقايق وصلت ،
دخلت اسراء البيت لقته هدوووء ماكو صوت ، قربت من المطبخ سمعت صوت امها ،
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك