رواية انقلبت الموازين -9
الناس...تصدق كل الكلام الي انقال عني ..وكل الناس الي بعدوا عني ...ونظرة الناس لي...ابدا ما اثروا علي ..كثر ما اثر علي كلامك..شكك فيني...دمرني...اذا انت الي تربيت معاك ..شكيت فيني ..فاشقايل اللوم الغرب...صعب اسامحك يا حمد..صعب
حمد:جمان ..انا اسف...سوي اي شي ..عاقبيني باي طريقه..بس لا تبعدي عني...انتي الهواء الي اتنفسه..انتي روحي...القوة الي استمد عليها طول عمري..كل شي سويته ..علشانج...علشان اوصلج...لا تبعدي ...اترجاج يا جمان...
جمان:ما اقدر يا حمد...ما اقدر ..
سكرت التلفون ...ويلست اصيح بصوت عالي ...والله احبك..واموت عليك...بس ما اقدر اعيش معاك ..شكيت فيني مرة ..معناته بتشك فيني مرة ثانية...مب قادره اسامحك..بنفس الوقت متاكده اني ما اقدر اعيش من غيرك...ومن غير ما اجوفك بالدنيا ...اه يا حمد...لا تروح عني...
شو ها الازعاج..ومنو ها المزعج..الي يجوفني ما ارد عليه ..وبعده يالس يحاول يتصل...جيكت على تلفوني ..وجفتها سارة ...والله ما فهمت ولاكلمة منها...شو اختطافه...وشو شقته..الي فهمته..انها تباني ضروري اسير صوبها...بس المريض الي عندي..ولي حالته حرجه...سرت صوب مكتب الدكتور المناوب معاي اليوم..وطلبت منه اذا يقدر يغطي على مرضاي لحد ما ارد...وقلتله مب متاخر ان شاء الله...شو ها الزحمه ...بتاخر عليها ...سمعت صوت مسج من تلفوني..هاي جوري...الحمد لله انها وافقت من نفسها...والله يوفقها ويعوضها عن الي جافته مع زياد...نفسي اعرف سعود ليش مستعيل جي...طرشت مسج لجوري ..وبلغتها عن طلب سعود...واخيرا وصلت ...جيكت على ساعتي ..حشى مر نص ساعة وانا عالق بالزحمه...بركنت سيارتي ...اتصلت على سارة بس ما ترد ..هذه وينها ..لا وتقول تباني ضروري...بنفس اللحضه وصلني مسج منها...تقول سير صوب الكافتريا وانا بيك....شو ها المصخرة الي يالسه تصير..هاد شغلي ..على بالي مستوي فيها شي ..وهي تباني اسير صوب الكافتريا..شوطت ..بس ما باليد حيله..دام وصلت بكمل..حصلتها يالسه على الكرسي ..شكلها تترياني..اول ما جافتني يت ركض صوبي ويودت يدي بقوة ...ولولا الناس كنت متاكد بتحضني ...وعيونها متروسه دموع....اول ما يلسنا على الكرسي..طلعت موبايلها ...منو ها الاثنينه ..لحضه هاي شيخه اخت نادية...بس منو ها الريال...الي فهمته من كلامهم انه شيخه تطلب من وحده ترافجها بمكان ...ومنها توديها لشقة الريال الي يالسه تكلمه...بس منو هاي الوحدة...صراحة مصدوم ..ما توقعت يطلع كل ها منها ..في ناس بها الدنائه...والخسه...في ناس من بره منتهى الطيبه ..ومن داخل ..منتهى النياسه...جفت على سارة ...نظرتها توحي لشي ..مستحيل اصدقه ..بس هي هزت راسها...شو ..مستحيل ..قمت من على الطاولة بقوة ..لدرجة ان الكرسي طاح من وراي...كنت ياي اسالها وين مكاتبهم هم الاثنينة..بس جفتهم بويهي...ومن غير تفكير حتى..يلست اضربه بوكسات ...جفت السكيورتي ياين...فكونا من بعض...قلتله قبل من ايود يد سارة ونمشي..تفلت عليهم هم الاثنين ..وقلتلهم ...بجوفكم بالمخفر باجر ..
شو ملجه وانتقل مرة وحدة...ها شو فيه جي مستعيل...
جوري:اسوم ..لحقي ناصر مطرش مسج يقول انه سعود يبى الملجه وبالمرة انتقل لبيته
اسوم:شكله الريال رايح فيها...رحميه امي وسير بيته
جوري:عن السخافة..قولي شو اسوي
اسوم:خل نظهر من الدوام ..ونسري صوب المول ..ونتشرى اغراض..وباجر نكمل الباقي..اهم شي الاشياء الاساسيه..
جوري:ما فيني صراحة...بقول لناصر ..بس ملجه ..وبعدين عاد انتقل...
اسوم:وليش كل ها المماطله...اذ الريال جاهز
سمعنا صوت الباب ...ودش سعيد..وطلب من اسماء تلم اغراضها ...استغربت ..حتى ويه ما يتفسر ..اكيد مستوي شي ببيتهم...اكيد عمها درى بسالفة شغلها...
اسوم :سوري جوري ...جان نفسي اكون معاج ..بس شكله عمي درى بسالفة شغلي..الله يستر
جوري:فديتج اسوم ..ادري ما تقصرين...الله يستر من عمج ...طمنيني عليج..ولد عمج ويه ما يبشر بالخير
اسوم:ان شاء الله خير..بينا اتصال..اذا طلعت منها سليمه
جوري:لا تقولي جي ...لا تخليني احاتيج ...
اسوم:بينا اتصال
يا ربي من ها العم ...عدم ويوده احسن..بدل ما يكون لها سند..مبهدلنها..وماخذنها بذنب غيرها...وحليلها اسوم...هي وين وسوالف اختها الاوليه وين...هي اذا واحد من الشباب رقمها..تيلس تصيح طول اليوم...سمعت تلفوني يرن...جيكت عليه ..وجفتها سارة ...تقول انها تنتظرني بالباركنج ..شو ...استاذنت من مديري..شكله موده رايق اليوم...وصلت صوب السيارة...شو ها الي بويه ناصر
جوري:بسم الله..شو مستوي ..شو فيه ويهك غادي جي
ناصر:مب شي مهم ..بس تصفية حسابات
جوري:شو تصفية حسابات..سرت المستشفى
سارة:اخوج عنيد...من ساعه احن على راسه ..ويقول انا دكتور وبعالج روحي
ناصر:سكروا الموضوع...سيروا صوب المولات وتشروا اغراض جوري...
اول مرة اجوف اثنيه متناسبين لبعض ..شرا ها الاثنينه الي بالكوشه...اقصد جوري وسعود...الي يجوفهم يقول..انهم انخلقوا لبعض...ربي يهنيهم..ويعوضهم عن الي جافوه بالدنيا...احس كل واحد منهم يكمل الثاني...يلست اتخيل نفسي على الكوشه ..وسيف يالس حذاي...يا ترى بنطلع شرا سعود وجوري نناسب بعض..وجنا مخلوقين لبعض...ماادري ليش احس انه في مصيبه بتصير الاسبوع الياي...تاجيل يوسف للعرس اسبوع ..مخوفني..رد من السفر امس...ويقول انه حجز القاعه اتلغى لانه ما اكدلهم الحجز ولا دفع العربون...وانه حصل حجز الاسبوع الياي...ربي ستر اني مب قايله لحد عن عرسي ..محد يعرف غير اهلي...والبطاقات ما وزعناهم...بس الموضوع مب مريح...قلبي قابضني ...الله يستر
يا ربي ..احس عمري بطيح من الربكه..حد يجوفني يقول هاي اول مره تعرس...مب جنه ثاني مره...بس هاي المره احس غير ..احس عمري فرحانه ..ومرتبكه ...وارتجف..يمكن لاني خايفه انه التجربه الاولى تنعاد...طول الدرب وسعود يلعب حور ..ناصر حاول يقنعه انه حور ترقد عندهم الليلة..بس سعود رفض..
الحمد لله هاي بداية خير...اول ما وصلنا البيت ...حور كانت راقده...سعود حملها ووصلها لغرفة ...وقال هاي غرفة حور...كانت غرفة بنوتيه ...كل شي فيها بنك...
سعود:جوري..ممكن تيلسي..اباج في موضوع
يتني رعشه...عندي احساس انه ها الموضوع يخصنا انا وهو
سعود:جوري...هاي غرفتج ..وهاي غرفتيه...حياتنا ما راح تكون شرا غيرنا من الازواج..على الاقل بهاي الفترة...بس في شي اهم من ها كله...انا ما احب حد يدش غرفتيه...لانه كل اوراق شغلي بالمكتب الي بغرفة نومي...فرجاءا خلوكم بعيد عن غرفتي..وباقي البيت كله تحت امرج...تصبحي على خير...
لا تسالوا عني...احس عمري طحت من سابع سماء....شو غرفتي وغرفته..شو يعني ما اباج تدشين غرفتيه...يعني كل الي كنت اتامله منه راح...انه يعوضني عن الي جفته مع زياد ...ان بنحوي بعض ..كل واحد يحاول يعوض الثاني عن الي جافه بدنياه...ليش يعاملني جي ...بس تعامله مع حور غير...نظرة الحنان الي بعينه لما يجوف عليها...ليش انا حظي جي بالدنيا...كل ما اقول فرجت ..ضاقت
الجزء(25)
الله يسامحك يا عمي حرمتني احضر عرس اغلى وحده على قلبي...ومهددني اذا طلعت من البيت...انا شو ذنبي..شو سويت بدنياي..من وانا صغيرة..وانا اتعاقب على ذنب غيري...في البداية كلام الناس...وبعدين الغربة...مرورا باخوي..واللحينه عمي...يبى يحرمني من شغلي ...ليتني ما رديت ..ليتني كنت عايشه بغربتي...صورة يدتيه مب راضيه تروح من بالي ...يت عندنا قبل ثلاثة ايام...وترجت عمي ..اسير معاهم واعيش بيت عمتيه..عمي ما رضى..لدرجة انه ما رضي حتى اسلم عليها...وقالها سيري مكان ما يتي...حاكرني بالغرفة..جنه فيني مرض معدي...ولا جني عار بهالدنيا...وكل الي بالبيت كارهيني ...اختهم الجبيرة تطالع علي بنظرات عتب ولوم..جني الا قلت لسامي اتركها...شكري ربج انج ما اخذتيه ..ها الواحد ما يامنه...اشقايل بتعيشين وي واحد سكير ..ولا يخاف على محارمة..بس شو اقول..لما الواحد ما يأمن..بان الي الله كاتبه هو الخيرة...ولا اختهم اميرة..هاي بروحها قصة...ما ادري على شو جايفه نفسها..لما تجوفني ترفع راسها لفوق وتعطيني نظرة من فوق لتحت..وانا بداخلي اقول الحمد لله والشكر...ناس غريبة صراحة..بس معذورين ..اذا انا صارلي اسبوع مع عمي ..وبحس عمريه بتعقد...وبتيني حالة نفسيه ...والله حالة...الوحيد الي يتعامل معاي اخوهم سعيد ..ليروح فكركم بعيد..علشان خاطر يدتيه بس..لاني سمعتها توصيه وتقوله خل بالك عليها..ليذبحها ابوك...سمعت دق على باب غرفتي...دخل عمي..غريبة عمي مشرفني بغرفتي..اكيد وراه مصيبة ..يلست اجوف علية..تصدقون وايد يخوف...كل القسوة الي بقلبة ..وكل الكرة الي بداخله صوبنا..ظاهر على ويه...قالي جملة وحدة وظهر من الغرفة مثل ما دخلها...شو ها الانسان ..الي الرحمة رايحه من قلبه...تصدقون قال ..يدتج مرقده بالمستشفى بين الحياة والموت..وتبى تجوفك...وظهر...وقالها بمنتهى البساطة ..ولا جنه الي بالمستشفى امه...اذا ما فيه خير لامه بيكون له خير لي...يلست اصيح ...هي الي مهونه علي الوضع ..اذا راحت..ما ظنتي بقدر اتحمل...
هاي شو ما تمل..ما تتعب..كل يوم تتصل..تراج تجوفين اني اسفهج ...يعني فهمي مب طايقتنك...طول اليوم تطرش مسجات...وتقول انتي الي دمرتي حياتي..وخطفتي خطيبي مني..ناس ما تستحي...شين وقواة عين...ما كفاها الي سوته فيني..ضيعت سمعتي..لو وحده ثانية بمكاني..جان ورتها الويل..فضحتها بالدنيا كلها...خليت سيرتها على كل لسان..بس محتسبتنها عند ربي..هو الي يقدر ياخذ حقي منها...عمري ما جرحتها....كنت وايد اوكي معاها...نفسي اعرف شو سويت لها..كل ها بسبب حمد...تبى حمد يخطبها...يختي في طرق اسهل لكل ها ..ومن غير ما تضرين حد...وبعدين ها نصيب ..اذا كان نصيبج بتاخذينه ..واذا مب من نصيبج ...ربي يكون كاتبلج واحد احسن منه..اللحينه شو استفدتي دمرتي حياتنا كلنا ...واولهم انتي...واللحينه تباني اتصل بحمد واطلب منه يردها...تباني ادوس على قلبي..تباني اقطع شرايين حياتي ...تباني اسحب روحي من جسمي...واقدمه على طبق من ذهب لها...اذا تركته لج المرة الاولى..فاللحين مستحيل...مستحيل اعيش الماساة مرة ثانية...مستحيل اعيش بعد حمد عني مرة ثانية...بادبه شويه..بعلمه قيمتي ..وبعدين بسامحه...سمعت ناصر يزقرني
ناصر:جمان..لي ساعه ازقرج وانتي سرحانه
جمان:سوري ما سمعتك...
ناصر:ما سمعتيني..ما علينا...اباج بموضوع ..واباج تفكرين قبل ما تردي علي
جمان:ما طلبت ..بس افكر
ناصر:حمد ...يى يخطبج مني
جمان:وانا مب موافقه
ناصر:اللحينه ..شو قلت ..اباج تفكرين ...وما ابى قرار سريع ..وبعدين ردج السريع معناته انج موافقه بس تعاندين
بققت عيوني عليه
جمان:احلف انت ..ومن وين يبت هاي النظرية
ناصر:جني ما سمعت شي...جوفي جمان...انتي ما تبين تسافرين لكورسج الي برة البلاد ..
جمان:واخيرا اقتنعت..فديت اخوي المتفتح يا ناس
ناصر:قري مكانج..وايد ماخذه مقلب بعمرج..متى قلت اني موافق...تبين اوافق ..وافقي على حمد...هو ساير ساير للكورس..فاذا ملج عليج..لج الحريه تسيرين الكورس
جمان:يعني يالس تلوي يدي
ناصر:ثمني رمستج..مب انا الي اغصب خواتي على شي..فما على بالج بزواج...انا ابى مصلحتج...اعرف محد يستاهلج شرا حمد...ادري انه غلط..بس انتي تقدري تاخذي حقج منه ..سوا كنتوا مالجين..او لا...بالعكس اذا مالجين ..تقدرين ترديله الصاع صاعين ...يعني على قولتج تلوين يده ..وتعاقبينه بطريقة يستاهلها...وانتي فاهمة علي
جمان:ما ادري..بفكر يا ناصر...احس بضيقة ....كثر ما كنت انتظر ها اللحضه..بكثر ما انا متخوفه اني ما اقدر اسامحه ...صج اني احبه ...واحلم فيه كل ليلة بس اخاف التجربة الي صارت تضل حاجز من بينا...لحضه انا شو يالسه اقول ..لفيت صوب ناصر وجفته منزل راسه...احترق ويهي يا ناس..نسيت نفسي ..على بالي اكلم جوري..وافضيحتاه..
جمان:انا..انا ..بطلع فوق ..عندي شغل كثر شعر راسي...
اسميني ضحكت من خاطري عليها...وياها غدا شرا الطماط...مستقصد انزل راسي...ما اباها تجوفني اضحك عليها..والعثرة ...هاي البنية ما راح تت...بس الحمد لله انها تغيرت عن قبل ..صارت تعبر عن شعورها...وتيلس معانا وتسولف..يعني ردت جمان الاوليه ...ما ابى اغصبها على حمد..بس ما راح اعطيها مجال ترفضه..ادري انه غلط..بس في الف طريقة للعقاب..غير عن هاي الطريقة..هم الاثنينة يستاهلوا بعض..والحب الي من بينهم ..قادر انه يصفي القلوب...
اول مرة اجوف شخص غريب شرا سعود...في شي مخبينه عن الكل..انا من اول شاكه انه في شي..من يوم ما تغيرت ام سالم عليه...ومن نظرته لما قلتله انه حور بنت زياد...اللحين مر على عرسنا 5 ايام...طول ها الخمس ايام ..وهو نادرا ما يكلمني ...جني الا كرسي بالبيت...بس جم مرة صدته وهو يطالع علي بنظرات غريبه..نظرات اقرب للحب..بس مستحيل ..اذا يحبني ليش جي يعاملني...يتعامل مع حور جنه ابوها ...مب مقصر معاها ابدا..كل يوم ملاهي ..كل يوم هدايا..ارقدها كل ليلة بسريرها ..ولما اصحى الصبح ما احصلها بغرفتها...اول يوم لما ما حصلتها بسريرها ...صرت شرا المينونة..لفيت البيت بكبرة ..من الطابق الارضي..لطابقه الفوقاني..بس ما حصلتها ...دقيت باب غرفة سعود..والي يصير يصير..ابى بنتي...بطل الباب وهو حامل حور...نقزت عليه وخذيت حور..يدي يت بالغلط على يده..سحبت يدي بسرعه..صح تكهربت وحسيت قلبي يرقع...ما بغيته يكشف غلاته عندي..لانه لو دقق بعيني بيعرف مقدار حبي له...لويت على حور ..ويلست ابوسها...خفت تضيع مني ..بس حسيت انه ما تحرك من مكانه..لما لفيت راسي صوبة..جفته ميود يده مكان مسكتي...ومقربنه عند صدره...شو يعني ها الشي ..بس لما انتبه اني يالسه اطالع عليه ..ارتبك ...وقال انه حور صحت بالليل ويلست تصيح..واني كنت بسابع نومة..غريبة اول شي انا رقاد مب ثقيل ..والشي الثاني ..حور رقادها متواصل ما تصحى الا الساعة سته ...يمكن المكان متغير عليها...بس تكرر ها الشي كل ليلة....قلت براقبة في ليلة من الليالي ..واكتشفت انه هو الي كان ياخذها ويرقدها عنده ...يا ربي لهاي الدرجة يحب اليهال...شكله ما يبى حور تحس بنقص الحنان..ما يبها تحس نفس شعوره....حتى لما نتعشى مع بعض..ما يرمسني غير جمين كلمة..وكل الكلام عن حور..اسميني صرت اغار من بنتيه..والله حالة ...كل يوم ارد من الشغل ..اقوم انظف غرفته ...اصلا من اول يوم لي بالبيت طلبت من البشكارة ..ما تدش غرفته واني انا الي انظفها بروحي..قصورج تنظفين غرفة ريلي...طول ما انا انظف ايلس اشم اقمصته...وايلس اكرفس ملابسه كل يوم..بس علشان اتخيله وهو لابسنهم...لدرجة اني ما خذه قميصه عندي بالغرفة ..شكله كل مشاعر المراهقة ظهروا..ولا ها مفعول الحب الاول...ويا ليته يحس فيني... ولا يفيسني ...جني شرا اللوح..حتى الي بالدوام ما يدرون اني حرمته...طلب مني ما اقول لحد..في البداية عصبت ..ويت احتج..بس طنشت ..فرقت يعني ..اذا ويودي بالبيت شرا عدمه..راح يتاثر بالدوام يعني...حتى الدوام كل واحد يسير بسيارته...شو اقول بس...نطلع بنفس الوقت..انا اكون ماخذه حور معاي ..اوصلها للحضانه الي بشركتنا...اول ما توظفت نقلتها لهاي الحضانة..على الاقل وقت البريك اقدر اسير صوبها...وسعود طول الدرب وراي لحد ما اوصل ..اتذكر مرة دست على البترول..وخذيت الشارع اليسار ابى اجاوز الريال الي جدامي ..تقولوا راقد بالدرب..ورانا دوامات..وهو رايق من الصبح..مصدعنا بالاغاني ويسوق على مهلة..الا واسمع تلفوني يرن..وطلع سعود ويقولي ردي للشارع الوسط....عندج طفلة..شو يعني هو كل يوم يراقبني ويوصلني للدوام..ومب بعيد يوصلني للبيت...مب مشكله بي اليوم الي يقولي شو فيه..وبيعترف بالي داخله لي..انا متاكده انه يكن لي مشاعر ..يمكن مب حب..بس اكيد اعجاب على الاقل..ومع العشرة بيتحولوا لحب...اليوم ملجة ميعاد...اكيد هي وايد مرتبكة..ومحتشره بالبيت..امس كنت عندهم..وجفتها اشقايل تامر وتنهي...وحليلي حتى عرس شرا الاوادم ما سويت...يا الله ان شاء الله حور بسويلها...بسير الم اغراضي واغراض حور...ما ابى اخذها معاي للقاعة ..بتبهدلني..كنت ناويه اتركها عند البشكارة وبخليهم عند خالتيه ام سارة...لانه سارة ناويه تحط يمان عند امها..لانها ما تحب تسير اعراس...بس سعود ما رضى قال يا تاخذينها العرس يا تخلينها عندي ...بس لحد ما هو ييى من الملجه يكون الوقت متاخر ..وانا مب متعوده اتركها مع البشكارة... مضطره اخذها معاي..سمعت صوت تلفوني..منو الي يتصل علي بها الوقت ...جفته سعود
سعود:ظهري بوصلج بيت اهلج
جوري:ها
سعود:شو ها ...اقولج اترياج بالسيارة ..لا تتاخري
شو يوصلني..ما احيدنا اتفقنا على جي..ولا قالي انه بيوصلني...ما اقولكم انه يكن لي مشاعر ..صبري يا جوري ...وبيظهر كل شي ..وكل شي بوقته حلو
يا ربي ..مب راقده من امس..قلبي قابضني بدل ما افرح..حاسه بشعور غريب..والي زاد علي ..اتصال يوسف..حافظه رقمه ..اتصل فيني قبل شهر..في البداية ما رديت..لاني ما ارد على الارقام الغريبة..بس هو ظل يتصل طول اليوم..وبعدين قررت ارد ..ليكون مستوي شي ..ويوم رديت طلع يوسف..هلكني مع تهديداته..يقول ودري سيف..وانا بي بخطبج..قبل ما يفوت الفوت...سكرت التلفون بويه..هلكني كرهني بحياتي..قلتله لو انك اخر شخص بالويود ما خذيتك...متصل من الصبح على الساعة 8 ..وصوته كان غريب..شكله شارب ..لانه صوته كان ثجيل..ويالس يخرف بالكلام...سكرت التلفون بويه..ناقصتك انت بعد...سمعت جمان تزقرني...فتحتلها الباب...
جمان:عروستنا الحلوة..مب يايه تسير الكوافير
ميعاد:ناصر بعده يالس بالصالة
جمان:وانتي وش لج بناصر..وي لتكوني تستحين منه
ميعاد:شو قالولج عني ..مضيعه الحيا
جمان:يختي ..ها اخوج...وبعدين ليش جي مرتبكه...
ميعاد:ما ادري يا جمان..احس بالخوف..وقلبي يرقع
جمان:ها ..الله يسلمج يسمونه ..ربكة العروس...وان شاء بيروح مع الوقت
طالعت عليها بنص عين...يعني لعبي على غيري
جمان:ما علينا..خل نمشي ..ترى جوري وسارة بيحصلونا بالصالون
نزلنا انا وهي بالطابق الارضي وجفت ناصر يتريانا..اول ما جافني يى ولوا علي...وباسنا على يبهتي...ويلس يدعيلي..تصدقون انترسوا عيوني دموع...ناصر طول عمره طيب ..ويحبنا كلنا..قلبه وايد طيبب..وربي معطنه على قد نيته...يكفيه انه حرمته سارة ...اطيب وحدة بالدنيا ..وعلى نياتها ...
ناصر:افا ..ليش الصياح ..كل ها علشان تفارقينا
ميعاد:ناصر..غيرت راي ما ابى اعرس..ابى اكون معاكم..ما ابى اسير بعيد عنكم...منو بيحبني شرا ما انت تحبني
جمان:شو ذا المنكر بعد..توج بس ما تبين تعرسين..جان قلتي قبل ...وطفشنا المعرس...
ناصر:سكتي انتي..يا ام لسانين..محد يعرفلج غير حمد
جمان:ناصر
شو دخل حمد بالسالفة ....ما فيني اسال بروحي احس راسي بينفجر من الصداع ..مب راقده يا ناس ...
ناصر:سمعي يا غناتي..مب من بعد بيت سيف عن بيتنا..كل ما اشتقتيلنا ..بنيج او تيينا ...ويله نمشي تاخرنا
شو ها تعبتني حور من كثر ما تتحرك...وتصيح ...ظهري عورني..ليتني ما يبتها ...كله من سعود...زين بعد اني بديت اول وحده...تجهزت ..ويلست اترياهم..بس صراحة حور طفرتني..شكلي بسير البيت اترياهم هناك...ما فيني على حشرة حور ..هاي ثاني مرة راعية الصالون تعدل شعري..من كثر ما حور تشدهم..لعوزتني...المشكله كلنا مب يايبين سياراتنا الا سارة...فايشقايل اخذ سيارتها ...بنفس الوقت ..سمعت رنة تلفوني ...بس وينه تلفوني...يلست ادور عليه ..بس جفت سارة يايه ..وبويها ابتسامه
سارة:ها عمرج يدق عليج..اقول مداه يشتاقلج
احترق ويهي ...مسجله اسم سعود عندي ..باسم عمري...ما يى ببالي انه حد يجوف النيك نيم
جوري:الو
سعود:هلا جوري...خلصتي ..لاني جريب من عندكم..اذا تبين تردين البيت
جريب مننا..شو الي يابه صوب صالونا..مب اقولكم انه مب طبيعي...
جوري:انا جاهزه ..بس خواتي بعدهم مب جاهزات..المشكله حور ميننتي...
سعود:انتي وحور ردوا البيت ..ولما هم يجهزون بوصلج عندهم بالقاعة ...اترياكم بالسيارة
جوري:تمام...فداعة الله
تصدقون اشتقتله...من الصبح مب جايفتنه...صج انه حياتنا مب شرا غيرنا من الازواج..وصج انه يعاملني معامله غريبه..بس شو اسوي بقلبي ..مب راضي يكرهه ..ولا يعاتبه ..قبل ما ادش السيارة ..حاولت اسيطر على مشاعر اللهفه الي فيني ...يلست حور بكرسيها..لانه سعود مركب كرسي بسيارته وكرسي بسيارتي...اول ما يلست حذاه..شميت ريحة العود ..والبخور...كنت ابى اجوف عليه ..شكله متكشخ بضمير حي..يبالي انزل شيلتي عن ويهي..كنت متغشيه لاني مسويه فول ميكب ...ربي ستر ما طحت اول مرة اتغشى
سعود:نزلي شيلتج..السيارة مخفيه ..مب ياي حد يجوفج...والدنيا ظلام..
نزلت الشيله..حشى اختنقت...يمكن لاني مب متعودة...ابى اجوف عليه بس مستحيه اجوف صوبه ...اما هو كان ساكت ..ومشغل موسيقة رومانسية هاديه...كل ما اركب سيارته وهو مشغل هاي الموسيقى ..شكله وايد يحبها...مرة هاديه تريح الاعصاب...يلست اقرا عليه المعوذات بداخلي ..وادعية التحصين..اخاف يصكونه بعين...ما شاء الله عليه وسيم وجميل ...بس لون عيونه غريب..من وين يابهم ..رمادي مرة وحده...ريم تقول ..انه يدته من صوب امه كان جي لون عيونها...قبل ما انزل قالي ..
سعود:جوري..اترياج ..جهزي حور ويبيها اجوفها بفستانها
جوري:ان شاء الله ..بس اخاف تبهدلك
سعود:حلال عليها تبهدلني...
وعطاني ابتسامه ...اول مرة سعود يبتسم بويهي ...سرت شرا الربوت الي خلص بطاريته..يا ويل حالي..ناوي يذبحني ..ويطلع كل المشاعر الي بداخلي...
سعود:في شي جوري...
جوري:ها ..لا ..بس اول مرة اجوفك تبتسم
شكلي خربتها على الاخر..احسن شي اشرد قبل ما انفضح...حملت حور وسرت صوب غرفتي ...بدلتها ولبستها فستانها..صايره وايد تشبه ابوها ...خسارة انا الي هست ...وبدل ما تشبهني ..صارت تشبه ابوها ...بطلت باب الحوي ..وجفت سعود حاط ايدينه الاثنينه فوق راسه ...ومنزل غترته...وساند على بونت السيارة ...حد يشوفه يقول هموم الدنيا فوق راسه...قلبي عورني عليه..ليتك تشاركني همومك..ليتك تشتكي وتطلع الي بقلبك ..يمكن ترتاح...
جوري:سعود..فيك شي ..تشتكي من شي...مصدع
سعود:لا تستهمي...شوية صداع ..وبيروح
جوري:تبى ادول
سعود:اذا ما عليج امر
جوري:ثواني وبيبه...
سرت ركض للمطبخ ...ويبت الادول...وركض للحوي..بس تعثرت مع عبايتي ..وطحت جدام الباب...ييت اقوم بس جفت سعود يالس على مستواي ماد يده..رفعت راسي اطالع عليه...
سعود: سلمتي....وليش يايه ركض
شو ها الرنة الغريبة الي بصوته...اول مرة اسمعها ...ونظرة الاهتمام الي بعيونه..شو السر الي مخليك تبعد عني...
جوري:ما تعورت ...
كنت يايه اقوله...ركضت علشان اعطيك الادول..بسرعه ..ويخف الالم عنك بسرعة..بس يودت عمري..ويا كثر ما ايود عمريه..ييت اقوم ..بس ما قدرت ..ريلي تعورني...انترسوا عيوني بالدموع...ما ظنتي بسبب العوار...بسبب الي اجوفه بدنياي ...شكله انتبه لدموعي...مسح على شعري وقال..
سعود:ليش تصيحين..تبين تسيرين المستشفى..شكلها الا رضه
ما قدرت ارد...كنت يايه اصيح بقوة...بس هو قال
سعود:ترى بيختربوا مكيبك..وبعدين بتحصلين كلام من خواتج
تخيلت ويه جمان لما تجوفني مخربه الميكب...بتبلعني بلسانها ..يود يدي وساعدني امشي ...ويلسني على الكرسي..وقال
سعود:اقدر اجيك عليه
جوري:على منو
ضحك وقال:على ريولج طبعا
جوري:ما يحتاي..الا رضه..يبالها وقت وبتصير زينه
سعود:ما قاللولي انج دكتورة...
جوري:ولا قالولي انك دكتور..
سعود:خذيت كورسات مكثفه بالاسعافات الاولية..واللحينه ممكن اجوفها
والله استحي..مديت ريولي ..وهو اول ما لمسه يتني شرا الكهربة ..وقال
سعود:مجرد رضه..يبالها وقت ..وبتصير اوكي
سمعت اصوات خواتي ..هذوله متى يوا...المفروض يسيروا القاعة..شو الي يايبينهم هنا....
جوري:شكله خواتي بالصالة....بسير معاهم القاعة ...
سعود:سيري..بس اذا تعبتج حور..دقي علي بي اخذها
جوري:ان شاء الله
قمت اطلع..واسحب ريلي الي تعورني ..اول ما وصلت عند الباب سمعت سعود يقول..
سعود:جوري ...قريتي المعوذات
هزيت راسي بمعنى ..ايوا..ورديت داخل البيت وانا حامله حور...بس الصراخ الي سمعته..خوفني ..
واخيرا خلصت العروسه...دخلت عندها الغرفة ...طالعه قمر..من يوم يومها...ميعاد حلوة..فما على بالكم وهي لابسه فستان العرس..والميكب ...يلست اقرا عليها المعوذات واحصنها..اخاف يصكوها بعين..شكله والله اعلم ريلها بيغمى عليه لما يجوفها. ...المفروض نسير للقاعة دايركت ومن اهناك نصور كلنا بغرفة العروس..بس البشكارة اتصلت ..وقالت في واحد يايب اغراض لميعاد ..وقايل انه امانة ولازم تصل لميعاد قبل الملجة...منو ها الفاضي..كنت يايه اطنش السالفة...بس ميعاد اصرت انها تسير وتجوف الامانة...حاولت اقنعها بس هي اصرت ..وتقول شي وايد وقت ..المشكله مب بالوقت ...المشكله بالفستان...ما اقدر ارفضلها طلب ...خاصة وانها عروس...اتصلت على جوري ..وقالت انها بعدها بالبيت ...لما وصلنا صوب البيت ..جفنا ريل جوري سعود...يالس بسيارته ...شكله ينتظر جوري...عاد ما حب ...واشتياق...اول ما دخلنا الصالة ..جفنا البشكارة يالسه تتريانا ..وماسكه بيدها علبة...وقالت هاي الامانة...
اول ما سمعت جمان تقول للبشكارة اي امانة ..يتني رعشه..وقلبي بدى يرقع ...عندي احساس غريب..كنت ناويه اتصل بسيف ..واطمن عليه...طالبه من عنده ما يكلمني قبل العرس بيومين...يعني مب جايفتنه من يومين...جمان حاولت تقنعني نسير دايركت للقاعه..بس انا ابى اجوف الامانه..شي بداخلي يقول سيري البيت...لما وصلنا البيت ..وعطتني البشكارة العلبة...ارتجفت ..ريولي ما شالتني...نفس العلبة ..نفس التغليف ..مخمل ماروني...ما ابى افتحها ..انا متاكده في مصيبة داخلها...
سارة:ميعاد..شو فيج..ليش جي ترتجفين..ودري العلبة..اذا مسبتلك جي رعب..بطليها باجر
اشرت عليها براسي..لا بفتحها اللحينه..مب قادرة اتكلم...صوتي راح..من الصدمة...فتحت العلبة..وجفت داخلها رسالة وصورة...اول ما رفعت الصورة ...صرخت بصوت عالي..مستحيل
ميعاد:مستحيل..اكيد ها الصورة مب حقيقية ...اكيد تركيب..ها اكيد يوسف ..يبى يخرب علي كل شي..هو قال..بخليج تندمين ..صح سارة ...مب حقيقية
سارة:ميعاد...اهدي حبيبتي..ليش تصارخين..وشو هاي الصورة...يبيها اجوفها
سارة وبشهقة:منو هذه الي مع سيف ومنو البيبي...لحضة في كلام ورى الصورة...
جمان:شو مكتوب
سارة:توصل لميعاد...بيوم ملجتنا...جربي شعور فاطمة يا حلوة...شو رايج اللحينه بتكون سمعتج على كل لسان
شو ...شو ها الكلام...لفيت راسي اجوف ميعاد..جفتها تصارخ بصوت عالي ...وتقول...
ميعاد:كان يقص علي...كان يبى ينتقم مني...كل السنوات الماضية وهو يقص علي...وفي النهاية طلع معرس وماخذ وحده اجنبيه وعنده ولد...وانا ...وانا ...سارة ..جمان...جوري..انا ضعت..مستقبلي ضاع..كل شي ضاع..ضاع
وصلت الصالة وانا اتنفس بصعوبة ...من الركض..جفتهم ميودين صورة..وميعاد تصرخ وتصيح...وتقول كلام غريب..منو الي يبى ينتقم منها..منو الي دمر مستقبلها...صرخت عليهم
جوري:شو في ...فهموني
يرت الصورة من يد سارة ..واول ما جفتها شهقت ..ولما قريت الكلام المكتوب..صرخت
جوري:النذل ..الحقير...يبى ينتقم منج...
وفجاة ..طاحت ميعاد..الله ستر وما يى راسها على البلاط..لانه سارة كانت حذاها ويودتها...جمان يلست تصارخ ..
جمان:اختي راحت...الله ياخذك يا سيف..الله ينتقم منك...
سارة:شو نسوي اللحينه...القاعة مليانه ناس..ومب باجي شي على الملجة...اشقايل نتصرف
جوري:ناصر..لازم نتصل بناصر...
جمان اتصلت على ناصر...سارة يابت عطر ..يلسنا نشممها ..والحمد لله صحت..بس ضلت ساكته ..ودموعها ينزلوا...وعيونها ثابته على الباب...بسم الله ..شو ياها ..يلسنا نقرا عليها ..يمكن تهدى ...
حشى حتى بعرسي ما هست جي...من العصريه انا وسالم..نراقب التشطيبات النهائيه...والاخ سيف ما جفناه لحد اللحينه..والله اني مب مرتاح من ها الريال..شاك فيه صراحة ...الله يعدي ها اليوم على خير..وبعرف اتصرف معاه بعدين...
ناصر:سالم..شو رايك..نسير نجهز مب باقي شي على الملجة
يى يرد بس ..تلفوني رن..اشر علي رد..جيكت على تلفوني ..وكانت جمان..اول ما ضغطت على الزر الاخضر..سمعت صياحها ..وصراخ الي معاها ...خفت صراحة ...اكيد مستوي شي بخواتي...حاولت اهديها ..ابى افهم شو تقول..هي تصيح ..اكثر من تتكلم..مب فاهم عليها..الشي الوحيد الي فهمته انه ميعاد اغمى عليها ...وسيف معرس ...لذبحك يا سيف لو صار شي لميعاد..صدقني بشرب من دمك..ولو انسجنت..كله الا واخواتي...شو مسوي الخسيس..من اول مب مرتاح له ...سرت ركض لسيارتي ..اول ما ييت اسكر باب السيارة ... جفت سالم ميودنه..ارجوك يا سالم ..قوم عني..ما ابى اغلط عليك..شياطين الدنيا ترقص بويهي...
سالم:وين ساير يا ريال..نشفت ريجي..من الركض وراك..
ناصر:ما ادري شو مستوي بالبيت ...اكيد مصيبة صايرة
سالم:خير ان شاء الله...لا تتفاول يا ريال...وبعدين اشقايل تسوق وانت حالتك جي
بالفعل مب رايم اسيطر على عمري من العصبية ...صوت صياح جمان ...وصراخ سارة يرن براسي...قمت من مكاني وسرت الصوب الثاني...طول الدرب وانا ساكت ..وشكله سالم محترم سكوتي ..لانه ما قال ولا شي..شو صاير عندهم ..وشو الي مودينهم البيت اصلا..المفروض يسيروا القاعة ...الله يستر ..اول ما وصلنا بيتنا..طلعت من السيارة ركض ..لدرجة اني نسيت انه سالم كان معاي ...اول ما بطلت باب الصالة ...تصنمت بمكاني...قلبي بدى يرقع بصوت عالي...لدرجة اني حسيته بيظهر من مكانه...يلست ابلع ريجي..احسه ناشف ..جني ماشي مسافه طويلة...جفت ميعاد وعيونها زايغه...هذه مب اختي ..هاي وحده مسحوب منها الروح...وسارة وجمان وجوري..يالسات يصيحوا بصوت عالي..وكل وحده تهدي الثانية ...شو مستوي هنا ..يا رب سترك..اول ما جافتني جمان يت ركض لعندي وهي تمسح دموعها شرا اليهال...لويت عليها...وانا عيوني على باجي خواتي ...
ناصر:شو فيكم ..شو مستوي..ليش كل ها الصياح...ميعاد شو فيها
يودت يد جمان...وسرت صوب ميعاد..لويت عليها...شكلي بنجلط اليوم...
ناصر:ممكن تفهموني..شو مستوي..ليش ميعاد حالتها جي...
ولا وحده منهم راضية تتكلم...سارة عطتني صورة ورسالة ...يرت الصورة والرسالة منها ...وانا ادعي بداخلي انه مب شي كبير...يا رب الا خواتي ..هذوله امانه برقبتي ...جفت على الصورة ...ها سيف بس منو هاي الاجنبة الي معاه بالصورة والبيبي..قريت الكلام الي خلف الصورة...يلست على الكرسي...اخر شي توقعته يصير بحياتي كله ...يا الله ..شو ها الي يستوي...شو هاي الفضيحة..سمعة اختي بتضيع جي...بنضيع كلنا...رفعت راسي اجوف عليهم...ركزت نظري على ميعاد...بتروح من يدنا ...تذكرت الملجة ...والحريم الي بالقاعة...يعني فضيحة على مستوى البلاد...قمت من مكاني ...
ناصر:والله لذبحه...النذل ..الحقير ..الواطي...
وطلعت ركض من الصالة ..سمعتهم يصارخوا ..بس سفهتهم..كنت شرا الاسد الثائر ...طلعت من باب الحوي ..وجفت سالم بويهي ...
سالم:بسم الله ...شو فيك ناصر ..ليش جي حالتك...شو مستوي عندكم
ناصر:ذابحة اليوم ..يعني ذابحة..ولو انعدمت ...ما باقي غير ها النذل ..يضيع سمعة اختيه
سالم:منو الي ذابحه ولو انعدمت..جي سايبه هي...
ناصر:عطني سويج السيارة ...لا تخليني اغلط عليك يا سالم...كل شي راح..خواتي ضاعوا ...وسمعة العايلة راحت
سالم:فهمني ..ممكن تفهمني ..المواضيع ما تنحل جي
ناصر:بقى فيها حل اصلا ...عطني سويج السيارة يا سالم...
كنت ناوي اهجم عليه واخذ المفتاح...مب يالس اجوف جدامي شي غير سيف ..ابى اذبحه ..الحقير...
سالم:لو تذبحني..ما راح اعطيك السويج...اصلا انت بتذبح نفسك قبل ما توصل لسيف..اشقايل تسوق جي...
يلست على الارض...مب قادر يا ناس...احس كل شي يضيع جدامي وانا مب قادر اتصرف ...كل شي بنيناه راح...سمعتنا الي حافظنا عليها طول عمرنا ضاعت..سيرتنا بتكون على كل لسان..انا ريال ما بيصيبني شي..ولا بهتم بشي..بس خواتي ..حرمتي ..ما راح يستحملوا الي بيهم...يا رب سترك
ناصر:قلبي مب كان مرتاح له من البداية...من الاول وانا مب مرتاح له ..تصرفاته ما كانت طبيعية ابدا...
سالم:شو سوى يا ناصر ...طلعتني من طوري ...خلنا نحاول نلم الموضوع ونحله قبل ما يكبر اكثر
ناصر:اشقايل نلمه..واشقايل نحله...ماله حل...يا سالم...
سالم:شو ماله حل...شو مستوي فهمني...
ناصر:الحقير..مطرش صورته هو وحرمته وولده...وراسل ورقة طلاقها...
سالم:شو ..طلقها..لا حول ولا قوة الا بالله..لا حول ولا قوة الا بالله..
ناصر:بطلعه ..وبحصله لو كان تحت الارض..
سالم:وشو بتستفيد ..لو حصلته...خلنا نلم الموضوع اللحينه..وبعدين بنتصرف معاه..
ناصر:شور علي شو اسوي ...راسي مصدع ومسكر..مب عارف شو اسوي ...
سالم:اسمعني يا ناصر..سير تجهز ..وحصلني بالمسيد
ناصر:شو اتجهز...تبانا ننفضح بالمسيد ..تخيل عرس من غير معرس
سالم:ومنو الي قال من غير معرس...انا الي بملج عليها ...
الجزء(26)
لبست عبايتي على ملابس البيت ..ما فيني ابدل...ابى اوصل للمستشفى باسرع وقت...نزلت الطابق الارضي ...جفت عمي وحرمته وسعيد واقفين عدال الباب..شكلهم يتريوني..بس وينهم البنات...وانا ليش اسال..هذوله من ينتظر منهم خير ...غريبه عمي وحرمته سايرين يزورون يدوه ...طول عمره مقصر بحقها...يمكن الله هداه..بس ما ظنتي...قطع علي افكاري صوت عمي وهو يقول
العم:مطوله وانتي تجوفين علينا
شكلي كنت اجوف عليهم وانا افكر...شو فيها يعني...ما فيني احتك معاك يا عمي..ركبنا السيارة ...واول ما وصلنا المستشفى نزلت اول وحده ..ابى اوصل ليدوه..ابى اطمن عليها..قلبي ناقزني ...سمعت حرمة عمي تقول..شويه شويه على عمرج..ترى ما تطير يدتج...شو ارد عليج ..بسكت ...مب ضعف لا احترام..تراج في النهايه حرمه جبيره بالعمر...ولا انا لساني متبري مني...واذا على قلبي فهو تعود على الكلام الجاسي ...وعلى المعامة القاسية..لدرجة اني احيانا احس اني ما عندي قلب شرا الاودام...كنت امشي حذا حرمة عمي ..وعمي وسعيد كانوا جدامنا ...وصلنا غرفة يدوة ...اول ما جفتها على السرير والوايرات الموصله عليها...حسيت قلبي وقف...سرت ركض صوبها ..ويلست احضنها...واصيح...جفتهم مشغلين القران..بس هي كانت مبطله عيونها ..يعني هي ما فيها شي..عيل ليش كل ها الوايرت ..ليش حاطين جهاز الي يقيس نسبة الاكسجين حذاها ..وليش جهاز تخطيط القلب...يعني جنه نودعها ...جنه غرفة وحدة تستحضر ...اول ما يت هاي الفكرة ببالي يلست اصيح بصوت عالي...
العمة:لا تتفاولين عليها...
اسماء:يدوه...كلميني ..يعورج شي...
اليدة:يا بنيتي ما فيني شي ..ليش جي تصيحين
اسماء:يدوه وعديني انج ما تخليني..لا تروحين..
العمة:استغفري ربج..شو يالسه تخرفين
اليده:يا بنيتي ...ما بقى من العمر كثر ما راح..خلينا نرتاح من الدنيا..جفت فيها الي ما جافه غيري..وانتي يا بنيتي لج رب فوق...ما راح ينساج
بنفس اللحضه يى عمي وحرمته يبون يسلمون على يدوه..هو مد يده يبى يسلم عليها..بس يدوه ما مدت يدها ..وقالتله..سير يا محمد قلبي مب راضي عليك...ولا ابى اجوفك...انصطدمت صراحة....صج انه عمي كان وايد جاسي معاها..بس هي كانت تسامحه وتسير تزوره ...ودوب تقولي انه ولدي ..لو هو ما يباني انا اباه..فشقايل تقوله جي اللحينه...يا الله يا عمي اشقايل تجابل ربنا وانت امك مب راضيه عليك...اشقايل تجابل ربنا وانت طول عمرك مقصر معاها...اشقايل ما فكرت انه الدنيا دواره...ومصير الي سويته فيها بييك...عاجل ام اجل...بس حنا البشر دوبنا جي...الدنيا تعمينا ...تشغلنا بمشاكلنا ..بعيالنا ...فننسى صلة ارحامنا...جفت عمي صخ ويلس جريب منها وهو منزل راسه...معقوله حس انه كان مقصر بحقها...وانه وايد غلط عليها..ما ظنتي ...يمكن ها تاثير قوم ساعه ويزول...سمعنا صوت الباب وكان الدكتور يبى سعيد ..شو يبى الدكتور بسعيد..اكيد شي يخص يدوه...طلعت من الغرفة ..بسيراجوف شو يبى الدكتور...بس اول ما بطلت الباب ...جفت سعيد واقف حذال الباب ..وعيونه حمر...خفت ...وقلبي بدى يرقع...بس لما رفع راسه وجافني..
سعيد:خير..وين سايره
اسماء:شو كان يبى الدكتور
سعيد:وحضرتج ظاهره من الغرفة تبين تكلمين الدكتور
اسماء:ما علي انا منك..قول شو قال الدكتور
سعيد:لولا المكان مب مناسب جان عرفت ارد عليج...يى يسال اذا وقف التنفس عندها..يتخذوا اجراءات التنفس الصناعي
سالته وانا دموعي ينزلوا: وها يباله سؤال بعد...اكيد نبى يسولها
سعيد:يدتج موصتني انه ما يسولها شي اذا وقف التنفس عندها ...
قلت وانا منفعله:وليش ما تبى...حنا نباها معانا
سعيد:جوفي يا بنت عمي...لا تصدعيني بروحي مستهم عليها..هي حرمة عيوز تبى ترتاح بدنياها...لا تسيري وتساليها ...خليها على راحتها
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك