رواية ظل أسود للكاتبة أنـاهيـد -8
المها : اسكتي عادي بس تعالي انا احتاج احد معاي
اميره : طيب والهنوف ليه ما تاخذينها
المها : الهنوف صغيره وبعدين الهنوف نايمه
اميره بتفكير : طيب ليه ما تاخذين امي معاتس
المها : اميره تكفيين مابي احد يدري
اميره وقفت : طيب انا بروح معاتس ان شاءالله على كذا اجل لازم اسوي نفسي مضحيه واسوي الغدا
المها بقهر : انتي ذا همتس
اميره ضحكت : الصدق ايه
المها : اطلعي برا
اميره : زيين بنطلع
—
الساعه ٣ العصر ..
الجازي لابسه عباتها وفاتحه شعرها وتنتظر سند يخلص ابتسمت لمن شافت شكله : ماشاءالله وش هالكشخه وشعندك
سند ابتسم : بالله شكلي حلو
الجازي : ايه ماشاءالله حلو بالحيل انت وين رايح
سند بتوتر : صاحبي عازمني
الجازي ضحكت : وش هالصاحب ذا شكله ماهو بأنسان عادي
سند ابتسم : لا والله ماهو أنسان عادي
الجازي : تمام اجل ، يلا الوليد بنروح لجده
الوليد قام من الكنب هو وتميم ومشوا معاهم
بالسياره -
الجازي جالسه تناظر للطريق : اقول سند
سند ناظرها : هلا
الجازي بأبتسامه : انا حاسه اني حامل
سند وقف السياره بقوه : وشش
الجازي ابتسمت : وشفيك حسستيني اول مره احمل
سند بضيق : طيب بكره اجل نسوي اختبار حمل
الجازي : ايه لازم عشان اشوف وضعي من اللحين
سند بضيق واضح : ان شاءالله
الجازي بأستغراب : وشفيك مو مستانس شكلك طفشت من العيال
سند بهدوء : لا بالعكس هذول احباب الرحمن
الجازي سندت ظهرها على المرتبه : مدري احسك مو فرحان بس اكيد اذا كانت بنت بتفرح
سند ابتسم : ان شاءالله بنت
الجازي ناظرت للطريق وهي تحسه مو معاها ولا همه ذا الموضوع من الاساس..
-
اميره جالسه بغرفتها تجفف شعرها بالاسشوار بعد ما تسبحت
المها دخلت وهي لابسه عباتها : اميره وشذا توتس تتسبحين
اميره ناظرتها : لان جلست اسوي غداتس وعلى ما غسلت الصحون
المها : طيب استعجلي ياخي ، وطفي ذي الاغنيه ترا رايحين لعزا مو لعزومه
اميره ناظرتها بملل : خلاص ياختي وشذا التسلط انزلي تحت شوي واجيتس
المها : لا تتأخرين
اميره : انزلي
المها نزلت وهي معصبه وصفقت الباب بقهر اميره جلست تتأفف : متسلطه بس تبي تخرب جوي وتمشي
المها راحت تنتظرها تحت وما كان فيه احد صاحي الكل نايم وعشر دقايق ونزلت اميره وقبل يطلعون شافوا ام سند جايه : بنات وين رايحات
المها تكلمت بأستعجال : يمه عندي بنت بالجامعه امها ماتت وبروح اعزيها
ام سند : كيف تعرينها بروحتس انتي واختس وانتن كلكن بنات
اميره بملل : ترا اللي هناك حريم عادي مافيه شي
ام سند بزعل : ولو حريم الانسان اللحين ما عاد يأمن لحمته ودمه كيف بيأمن الغريب انتظروا بجيب عباتي وبروح معاكن
اميره ابتسمت وجلست : حلو حلو ماشاءالله كل العايله راحت بنسوي هجوم هناك ولا ايش
المها بعصبيه : انتي يالبارده ترا مو وقت ظرافتتس
اميره : ترا مو لازم اجلس اعصب وازعل وابكي عشان ترضين علي
المها ضحكت : من اللي يزعل ويبكي انتي ايه يصير خير
اميره انجرحت منها : اكليتبن زين خيراً تعمل تراب تلقى
المها : اسمها خيراً تعمل شراً تلقى
اميره : يليل الاستاذات فكيني تكفين
بعد نصف ساعه ..
ام سند دخلت : السلام عليكم
الحريم : وعليكم السلام
ام سند جلست تعزي عروب ووراها اميره اللي عزتها وجلست بجنب ام سند
المها حضنت عروب : عظم الله اجرتس الله يرحمها ويغفرلها ويجبر بقلبتس ياكريم
عروب تبكي : كيف يجبر بقلبي كيف
ام سند : لا يا يمه لا تقولين كذا الله قادر على كل شي ورحمته وسعت كل شي بيعوضتس العوض الزين ان شاءالله
عروب تبكي بصوت واضح : والله يا خالتي ما عندي احدد من بعد عينها بجلس بروحي طول عمري
ام سند بحزن : ليه يا يمه وين اهلتس
عروب : ما عننندي اهل ابوي متوفي وامي ماتت
ام سند بضيق : لا حول ولا قوه الا بالله
المها : عروب نفس ما قلت لتس فيه بيت بجنبنا بـ استجار لتس فيه شقه ما فيه الا عجوز وبناتها يعني أمان
عروب بحزن : والله مدري
ام سند ابتسمت للمها : وهي صادقه يا يمه انتي بنت المفروض ما تجلسين بروحتس
عروب : ان شاءالله
المها ان شاءالله اليومين هذي بخلص كل شي وبنقلتس هناك
عروب بأمتنان : الله يجزاتس خير يارب
اما اميره فـ كانت مختبصه ما تدري شتسوي اكتفت انها تناظر ليدينها بهدوء ..
ام سهم تنادي امجاد : امجاااد روحي افتحي الباب يطق
امجاد جت من المطبخ بعد ما خلصت من الصحون : يلا دقيقه وجلست تناظر لنفسها بالمرايه
ام سهم : افتحي الباب
أمجاد : يمكن ضيوف ترا اخواني كلهم بغرفهم وابوي رايح لعمي ومعه المفتاح اصلاً
ام سهم تكتفت بقلة صبر وسكتت ..
امجاد فتحت الباب شافت جارتهم ام عبدالله وهي تكره جياتها ماغير تنقل علوم وتنشد طول الوقت : هلا هلا والله يالله تحييها
ام عبدالله : الله يبقيتس وشلونتس
امجاد ودها تبكي : بخير يا خاله انتي وشلونتس
ام عبدالله : والله بخير امتس وينها
امجاد بأبتسامه صفرا : هذي هي
ام سهم قامت : حياتس الله ادخلي ما قدامتس احد
ام عبدالله : الله يبقيتس
ام سهم سلمت عليها : وشالعلوم
ام عبدالله : ستر الله يدوم وشلونتس ووشلون البنات والعيال
ام سهم : بخير ياربي لك الحمد انتي وشلون ععيالتس
ام عبدالله : والله ماعليهم طيبين
ام سهم : الحمدلله
ام عبدالله تضحك : وليدتس جاي عينت سياره عاد قالوا لي الورعان انهم شافوه
ام سهم ابتسمت : ايه جاء
امجاد : ماشاءالله ورعانكم ماعندهم شغله الا الوقفه ومراقبة الناس
ام عبدالله ضحكت : ورعان ما يدرون عن الدنيا
امجاد : لا لا بريئين الله يحفظهم
ام عبدالله طنشت امجاد : مرته وينها نبي نشوفها
ام سهم : عند اهلها
ام عبدالله : ياخيه مرت وليدتس هي ليه ما حملت
ام سهم بقلة صبر : ان شاءالله الله يكتب لها حمل قريب ويرزقها
ام عبدالله : امين الله يرزقهم والله الضنا غالي
ام سهم بضيق : عسى الله يرزقهم
-
سند شاف بيتهم من بعيد كان قصر دخل البيت بعد ما طق الباب وهو يذكر الله على جمال البيت جاه اخوها من بعيد : يالله تحيييه اقلط ياخوي حياك الله
سند جلس : الله يعافيك
علي : اقلط بالمجلس
سنذ دخل المجلس كان فخم بكل ما تحمله الكلمه من معنى ..
علي قام يصب القهوه : وشالاخبار
سند : بخير الحمدلله انت وشحالك
علي : ابشرك بخير ياخوي
سند : الحمدلله ، وبعد دقايق من المحادثات الرسميه .. انا جاي ياخوي اطلب يد بنتكم ومالكم الا اللي يرضيكم ويرضيها ان شاءالله
علي : انا علمني فيك نسيبنا ابو خالد ولازم ناخذ راي البنت تخبر بعد انت معرس ما انت عزوبي
سند : اكيد لازم واي شي تبي تعرفه علمني به ماني بغاشكم
علي : مبدئياً اختي موافقه لكن تطلب نظره شرعيه وهي من حقك وحقها
سند : لا اكيد لازم بس متى تبون
علي : تعال بكره اذا يمديك
سند : خلاص ان شاءالله جايكم بكره بمثل هالوقت
علي : حياك الله وان شاءالله ربي يكتب لكم اللي فيه خير
سند : ان شاءلله يالله يا اخوي انا استأذن وان شاءالله لنا جيه قريبه انا وابوي
علي وقف وهو يصافحه : حياكم الله
—
ودقايق وهي معدله جلستها لمن سمعت صوت سند يدق الباب وراحت تفتح له الباب ومدت يدينها بمعنى اتفضل : حي الله اخونا
سند دخل وهو مبتسم : الله يبقيتس وين امي
اميره دخلته وقفلت الباب : تصلي تعال تقهوى
سند جلس وهو ينزل شماغه ويحطه على الكنب
اميره مدت له الفنجال : سم
سند خذا الفنجال : سم الله عدوتس
المها جت : حي الله سند
سند : الله يبقيتس
اميره صبت للمها قهوه : وين المعزب
المها : منهي الهنوف
اميره : المفروض هي تقهوينا
المها ضحكت : وانتي رحتي ساعه من البيت جحدتينا
اميره : انا ضيفه ترا ، وجلست تنادي بصوت عالي ، الهنوف يا تبن تعالي
الهنوف جت وهي تضحك تدري اميره تكره تقهوي احد : شتبين
اميره عطتها ثلاجة القهوه : الله لا يهينتس يعني
الهنوف ضحكت : هاتي هاتي بس
ابو سند دخل هو وفهد : السلام عليكم يالله تحيي سند
الكل : وعليكم السلام
سند قام وحب راس ابوه : الله يبقيك يالغالي
فيصل جاء وهو مبتسم : يالله تحييه
سند ضحك : الله وش هالترحيب
فيصل : ما شفناك اليوم
فهد ناظره بطرف عين : انت اللي ما شفته من ذا النوم ولا حنا شايفينه
فيصل : والله ماهو ذاك النوم صبي قهوه يالهنوف
الهنوف : ابشر
ام سند جت وهي تعدل طرحتها : ماشاءالله متجمعين
سند ابتسم : الله لا يفرق جمعتنا وانا بعد عندي خبر ما ودي اخبي عليكم شي
ابو سند مبتسم : بشر
سند : انا اليوم خطبت وناوي اتزوج
الهنوف طاح الفنجال من يدها اللي مدته لفيصل وانكسر ..
أبو سند بغضب : وشتقول انت
سند بأستغراب : يبه وشفيك ليه مستغرب الموضوع ربي حلل لي اربع حريم وانا رجل وان شاءالله بعدل بينهم
فهد بقهر : بس ذي بنت عمك
سند : على عيني وراسي بقدرها وما بقصر عليها بشي ، كمل كلامه بحزم ، يبه اسمعني ولا عليك امر واسمعوني كلكم الجازي حرمتي وبيني وبينها عشره وعمي حامد ما اعده الا ابوي وعيال عمي حامد ما اعدهم الا اخوان لي وبنت عمي ما بقصر عليها بشي وتطلب اللي تبيه وتامر به
أبو سند جلس وهو حاط يده على التكايه : منهي بنته ذي
سند : يبه هم من جماعتنا بس بعيدين يعني ما نجي بعضنا
أبو سند : منهم منه
سند : حمد المحمد
ام سند بصدمه : لا يا يمه لا والله لا تاخذها يا يمه انا اعرفهن وابخصهن زين
المها متصلبه وفيها بكااااء يكفي بلد وتناظر فيهم بذهول
سند : يمه انا خطبتها وكلمت اخوانها لكن انتم اهلي ومالي عنكم غناه والرجال بدون اهله مايسوى شي
اميره بعصبيه واضحه : اسمع تبي تتروج اتزوج براحتك ذا شرع ربي لكن بنات حمد المحمد لا تاخذ منهن ترا اذا تزوج الواحد منهم يصير يمشي وراهن بدون عقل
سند : وانا ماني برجل قدامتس
ابو سند بعصبيه : لا تتكلمين عن البنات كذا
اميره : علمتكم باللي اعرفه والندامه والحسايف ماهي بـ ذلحين بعدين لا عينك شافت رداهم
الهنوف حاطه يدها على فمها وواقفه بمكانها والقهوه بيدها مصدومه وحزييينه حزيييينه جداً على الجازي الجازي ما تستاهل الا كل خييير
فهد : دامك تبيها الله يوفقك حنا اهلك وعلمناك بمصلحتك وانت كبير وعندك عيال وعقلك براسك ما انت بمحتاج من احد نصيحه
سند وقف وهو متضايق : ماعليه ولا تزعل علي يبه واللي بخاطرك تراه بخاطري لا تضايق ولا تشيل علي انا لو اني ادري اني ماني بمجبور اتزوج ما اعرست مابي اسلك طريق الحرام يالله اشوفكم على خير ، وطلع
ام سند حطت طرحتها على عيونها وجلست تبكي واميره محاوطه امها مع كتوفها : خلاص يمه لا تبكين عشان ذي السلقه انا هنا والله ما اخليها انا لها وانا بنت ناصر
ابو سند : انتي ما تتركين هالمشاكل
اميره ضحكت : يبه لا تنسى اني بنتك وناظرت لـ امها : خلاص لا تبكين والله لو تزوجها اني لا ابرد حرتس فيها ولا اوقفها عند حدها ماعليتس ما بتجرا لا عليتس ولا على الشيخات خواتي
المها بعصبيه : اميره انتي طبيعيه ؟ اذا الناس نفست روقتي ولا روقوا نفستي
فهد : ذي مرفوع عنها القلم
اميره ناظرتهم بطرف عين
الهنوف راحت تجيب منشفه تمسح السراميك وتكنس الزجاج وهي تبكي وتمسح دموعها ولا عاد تقدر تخبيها راحت لغرفتها تبكي براحتها وتطلع اللي بقلبها ..
-
عَصر اليوم التالي..
يوم حفلة اميره بمناسبة سلامتها الكل كان يحضر للحفله
في بيت أبو سياف ..
سيف دخل البيت شاف امه واقفه بالحوش : يالله تمسيها بالخير
ام سياف ابتسمت : الله يمسيك بالنور وش جايب
سيف ابتسم وهو مبسوط بالحفلة لانها لـ اميره: ريم وصتني علي اغراض وجبتها
ام سياف ضحكت : وانت ما صدقت اشوف وش جبت ، خذت الاكياس اللي كانت راقيه جداً وحصلت فيها بوكسات شوكلت وبيده الثانيه فيه بوكية ورد باللون الوردي: كم باقي من الفلوس
سيف ابتسم : ماعليه يا يمه والله فدا
ام سياف ابتسمت : اثقل يا ولد وخل شوي من فلوسك ملكتكم الاسبوع الجاي
سيف حك شنبه : الخير واجد يا ام سياف وانتي لا نقص عليتس شي علميني
ام سياف : ما تقصر يا وليدي عسى عمرك طويل
سيف حب راسها : الله يخليتس لنا بروح اتسبح
ام سياف : الله يحفظك
سيف دخل وشاف ريم واقفه بالصاله : هاتس
ريم خذت الاكياس : ولد سيف ترا طلبت بس علبتين جايب اربع علب ليه
سيف عطاها الكيس واخذ البوكيه معاه : وانتي شدخلتس
ريم : حيييوان كل ذا عشان اميييره
سيف : ايه عشانها وش براستس
ريم صفقت جبهتها بخفيف : طيب يا كلب عطني الورد
سيف جات بباله فكره : لا لحظه شوي واجيتس
ريم بقلة صبر : استعجل عز الله ما عاد به عقل
سيف راح لغرفته وجلس على سريره وهو يمرر أصابعه على الورد كان اللون مُريح للعين وناعم جداً ابتسم وهو يقرب الورد من صدره ويحضنه بهدوء ما يبي يجيه شي : الله يلعن الحب الواحد صار يتمنى يكون ورد
قام واخذ عطره الرجالية الثقيلة اللي يحبها ومعتمدها من سنين وبخ منها على الورد ثلاث مرات بأمكان متفرقة : خلي لو ريحتي تثبت فيتس على الأقل تصبرني هالايام لين ربي يجيبتس..
راح لريم واعطاها الورد : هاتس
ريم جلست تشم الورد بصدمه وفيها ضحكه : ياوصصخ مافيه خلاص ما ابيه
سيف بعصبيه : يازق خذيه ووديه لها وشوي شوي عليه لا تغصينه بيدينتس ذي
ريم بقهر : ترا مالي دخل بـ ردة فعل بنت عمك
سيف ابتسم : ماعليتس بوجهي بس وديه لها
ريم مشت : عزتي لك ياخوي
سيف : طسي بس
ريم راحت لغرفتها وحطت الورد على الطاوله اللي عند الشباك وهي مبتسمه : يارب تمم لـ سيف على خييير وحنن قلب أميره عليييه يارب ..
—
طلعت أميره من الحمام يكرم القارىء وهي تمشي متجهة لتسريحتها بجسدها الهزيل من آثار الحرارة والبرد والحزن تتمنى انها تحمل صلابة الارض او ثبات الجبال حتى تزيح عن نفسها ولو القليل من ثقل مُعاناتها جلست على الكرسي قدام التسريحة وهي تتأمل ملامحها الحاده اللي توحي بأنها انسانة قوية لا تستطيع الحياه هزيمتها لكن الحياه هزمت هَـذه الروح مراراً وتكراراً وحدها الحياه من تستطيع هزيمتنا بـ أعنف الطرق وأشدها وجعاً فتحت شعرها المُبلل من المويا وحركت راسها وانتثر شعرها الطويل على صدرها وظهرها تنهدت بـألم وهي تخفي دموعها لمن سمعت الباب يطق ..
ام سند دخلت وهي مبتسمه : اموره وشلونتس اليوم
اميره تشتت أنظارها بالغرفه وهي تحس بأرتباك من أقتراب ام سند منها ماتبي تسألها بشكل عميق عن حالها وتستثير دموعها ماتبي تبكي قدام احد ما تيي : بخير الحمدلله
ام سند خذت المشط وهي تمشط شعر اميره : احسبتس نايمه والله ما تغديتي معانا
اميره بهدوء : لا صحيت
ام سند ناظرت لـوجه اميره : علامتس متضايقه
اميره تنحنحت : لا
ام سند بشك : وشفيتس اجل
اميره نزلت راسها وجلست تطقطق بالجوال وهي تكذب ما عندها شي مهم بالجوال بس ما تبي ام سند تسألها اكثر : ولا شي
ام سند نزلت المشط : علميني
اميره وقفت وراحت للدولاب تبي تغير الموضوع : يمه وشقلتي لفهد البارحه
ام سند وقفت قريب من اميره : قلت انه يوديتس تجهزين لـ اغراض ملكتس
اميره كتمت غصتها ووقفت بحلقها : ملكتي
ام سند وقفت بجنبها بضيق ومسحت على ظهرها : ايه يا يمه وشفيتس بسم الله عليتس
اميره خذت الفستان اللي بتلبسه الليله ورمته على السرير : يمه مابي سيف
ام سند بضيق : ما عاد ينفع الكلام اللحين العرب جالسه تجهز اكيد
اميره بصوت يرجف : يجهزون لـ ايش وانا اجهز لـ ايش مسكت يدين امها وهي تبكي يمه تكفين كلمي ابوي كلميه يقولهم اني ما ابيه ما ابيه يمه تكفيين كلمي ابوي والله ما ابيه
ام سند مسحت دموعها : اهدي يا امي ابوتس عطى الرجال كلمه وانتي عارفه ابوتس كلمته وحده ما يثنيها
اميره بكت بصوت تعبان : ما فكر ببنته كلمته اهم من قلبي كلمته اهم من عذابي ليه يحذفني بالنار وهو داري انها بتحرقني تكفين يمه مابي اجهز لـ ملكتي مابي اذا ابوي يبي يعذبني انتم لا تعذبوني تكفين
ام سند بكت : والله العظيم لو بيديني ما خليت هالزواج يتم لكن والله يا بنيتي اني مجبوره ارضى فيه مثل ما انتي مجبوره
اميره بكت : يمه تحسين فيني وتسمعيني يمه انا ضايعه ما اعرف شي ولا ادري شسوي انتي دليني كيف امنع هالزواج مابي اكسر كلمة ابوي ومابي اوافق واجيب لروحي العذاب يمه انا لمن بكيت ما بكيت لاني بروحي انتي امي ومعوضتني عن كل شي انا بكيت لان قلبي جالس يحترق ومحد حاس فيني انا احترق احترق والله احترق حسي فيني الله يخليتس يمه تكفييين سوي شي
ام سند بعبره : والله العظيم ما بيدي شي والله ولا ما قصرت عليتس مستحيل اشوفتس تعذبين واتفرج عليتس واسكت
اميره مسحت دموعها وراحت للسرير : ما اقدر ارد كلمة ابوي لو على حساب قلبي وشسوي
ام سند : الجرح ما يتعالج بجرح يا اميره
اميره : اذا جرحي من غالي كيف اعالجه
ام سند : ماله علاج
اميره كتمت شهقاتها اللي تختلج صدرها بعنف : مابي اروح للسوق على الاقل هالشي ذا نفذوه لي
ام سند : خلاص خواتس يقضون لتس
اميره بألم : طيب
ام سند مسحت على شعرها : جففي شعرتس لا تبردين انا رايحه اشوف البيت ولا تبكين ارحمي نفستس شوي
اميره هزت راسها بـ إيجاب طلعت ام سند وقلبها مُثقل من الحزن على أميره امَـا اميره راحت للسرير وتخبت فيه وهي تبكي بصوت يجرررحح القلب : اهه يا يبه ما تدري شسويت ما تدري شسويت ذبحت بنتك ذبحتها كسرت قلبي وحطمته وانهيته
البارت الثاني عشر
سند بعد ما صلى العصر بالمسجد توجه لبيت أبو علي
وكان بأنتظاره أخوها علي اللي دخله ورحب فيه وبعد الحوارات اللي دارت بينهم راح علي وجاب أخته أماني حتى يشوفها سند وتشوفه ويعرفون عن بعض كل شي ..
أماني لابسه عبايه وطرحه وحاطه ميك اب ناعم جداً وشكلها حلو دخلت بكل ثقه وجلست : السلام عليكم
سند أستغرب من جرائتها : وعليكم السلام
علي : يالله اخليكم شوي وجاي ان شاءالله انا هنا قريب
أماني ناظرت له : طيب
سند ناظر لها : شخبارتس
أماني : بخير انت كيفك
سند للحين مصدوم من جرائتها متعود على الجازي من تزوجها وهي شهر كامل ما ترفع عيونها بعيونه : بخير الحمدلله وش حابه تعرفين عني
أماني بهدوء : الاشياء المهمة
سند : عمري 34 اشتغل بشركة ... راتبي 25 ألف متزوج وعندي ولدين
أماني بأستغراب : طيب ليه تبي تتزوج على حرمتك
سند بتفكير : ما تناسبني ، ايوه وانتي
أماني : انا عمري ٢٧ ومتخرجه من جامعة ...
سند : ماشاءالله حلو طيب عادي اسألتس سؤال
أماني : اكيد عادي اسأل
سند : ليه ما تزوجتي للحين
أماني ابتسمت : الزواج مو كل شي وانا انخطبت كثير واخر مره قبل شهر خطبني دكتور ورفضته
سند بأستغراب : ليش رفضتيه
أماني : ما اتزوج دكتور ادري بغار عليه كثير وانا ابي اجلس طول عمري مع الانسان اللي اختاره برغبتي مابي ارجع مطلقه رغم ان ما عندي مشكله مع الطلاق
سند بأستغراب : احترت والله المهم متى نسوي التحاليل
أماني : عادي انت حدد يوم
سند : بكره اذا يناسبتس طبعاً
أماني بعد تفكير : طيب تمام
علي فتح الباب بعد ما طقه : يالله خلصتوا
سند : ايوه
علي : يالله امون
أماني : ما اتزوج دكتور ادري بغار عليه كثير وانا ابي اجلس طول عمري مع الانسان اللي اختاره برغبتي مابي ارجع مطلقه رغم ان ما عندي مشكله مع الطلاق
سند بأستغراب : احترت والله المهم متى نسوي التحاليل
أماني : عادي انت حدد يوم
سند : بكره اذا يناسبتس طبعاً
أماني بعد تفكير : طيب تمام
علي فتح الباب بعد ما طقه : يالله خلصتوا
سند : ايوه
علي : يالله امون
أماني دخلت البيت بغرورها المُعتاد رمت طرحتها وعباتها على العامله وتكلمت بغرور : هاتي لي قهوه وجهزي ملابسي عندي حفله الليله لصاحبتي
جلست دقايق بعد ما شربت قهوتها راحت لغرفتها وهي تفكر بـ سند وزوجته وتتوعد الجازي بقلبها بكلمه وحده : اوعدتس خلال هالسنه راح ترجعين مطلقه لـ بيت ابوتس يا حرم سند ..
—
سند وقف السياره قدام بيت أهله : انزلي
الجازي ناظرت له لدقائق بصمت تام
سند ناظر لها : وشفيتس !
الجازي ناظرت لبيت أهله وبعدين رجعت تناظر له : سند فيه شي مخبيه عني
سند انصعق من سؤالها : شي مثل ايش !!
الجازي تنهدت بحزن : مدري احسك مو طايقني
سند بهدوء : مو لهدرجه انا بس منضغط هالايام
الجازي بتشتت : مدري بس حسيت كذا حتى ما فرحت بحملي انا متأكده فيه شي
سند بضيق : ما فيه شي وبعدين هذا طفلنا الثالث
الجازي بضيق : بس انا من زمان ما حملت تميم عمره خمس سنين ترا
سند ابتسم : ماعليه يروحي اعذريني هالايام ماني على بعضي تبين تنامين الليله عند اهلي ولا نرجع لبيتنا
الجازي : ايه بنام عندكم مشتاقه لخالتي والمها بعد
سند : والوليد كيف مع المدرسه
الجازي : ماعليه نخليه يغيب بكره هو ما غاب ذا الترم كثير
سند : خلاص اللي تشوفينه
الجازي نزلت : انتبه لنفسك
سند بهدوء : وانتي بعععد
الجازي ابتسمت ونزلت وهي متضايقه وقلبها يعورها ولا مرتاحه ابداً .
-
ريحة العود تفوح بكل أنحاء مجلس أبو سند الرجال الطيب اللي له صيت وثقل بمجالس الرجال وصدورهم راعي الذكر الحي والبيت العامر بالضيوف هو واخوانه كان المجلس مليان من الرجال واللحى الغانمه عيال الجد سلمان ( حامد ناصر وعبدالعزيز وعبدالله ) وعيالهم وأيضاً رجال من القبيله ورجال من أخوياهم سند فهد فيصل ما جلسوا هم وعيال عمهم يتداورون القهوه على الرجال
أبو سند بترحيب صادق : يالله تحيييكم يا رجال زارتنا البركه
أبو سياف : بارك الله فيك يا خوي
ابو محسن : الله يبقيك ويعافيك
ابو سهم : الحمدلله ع سلامة البنت يا اخوي
ابو سند : الله يسلمك ويحفظك
ابو محسن وبيده الفنجال : هي وشلونها الديار اللي جيتوها
ابو سياف ابتسم : ماشاءالله تبارك الله والله سيول وخير حنا رحنا لديره والديار اللي حولنا مريناها بهالسياره كلها ماشاءالله مليانه امطار وخير
سند : عاد ماشاءالله بتجي بعد إمطار هالاسبوع يقولونه
ابو سياف : الله يجيب الخير وينفع البلاد والعباد
الرجال : امين
ابو سالم : والله اني طلعت انا والاهل لديرة قريبه مننا ولقيتها مليانه سيول
ابو سند : وين محلها
ابو محسن : هي نفسها اللي جيناها حنا وابو بدر وابو سلطان
ابو سند : ايه هذي هي اللي رحنا لها والله ماشاءالله تبارك الله
سهم : ما رجعتنا الا هالدوامات والاشغال ولا ما طلعنا منها على الاقل جلسنا بها اسبوع
ابو سالم : اجل لنا طلعه لها ان شاءالله
الرجال : ان شاءالله
ابو نوره : هاللحين عاد زانت شبة النار
فهد : ابشر والله يا عم بشبة النار والعلوم الغانمه
ابو نوره : الطيب ماهو غريب من اهل الطيب يا ولدي
فهد : الله يطول بعمرك ياعمي تستاهل الطيب
—
بعد مرور ساعه ونصف
المها قامت وراحت للمطبخ لكن انصدمت لمن شافت نوره واقفه قدام مرايا المغاسل وتمسح دموعها بمناديل راحت لها بسرعه وهي مرعوبه : نوره بسم الله عليتس وشفيتس ياروحي
نوره توترت : ولا شي حساسيه
المها مسكت نوره مع كتوفها وحطت وجهها مقابلها ناظرت لعيونها لثواني وتكلمت بصدمه : انتي تبكين !
نوره بحزن : تضايقت شوي
المها ما تبي احد يشوف نوره بذا الحال ابد : مسحي دموعتس بسرعه بنروح لغرفتي
نوره مسحت دموعها : طيب
المها راحت هي ونوره لغرفتها وقفلت الباب بالمفتاح..
وجلست على السرير : تعالي هنا
نوره جلست
المها بخوف : وشفيتس علميني ليه تبكين سهم مهاوشتس احد قايل لتس شي
نوره ببكى : لا والله
المها بضيق : وشفيتس علميني
نوره مسحت دموعها : مو وقته
المها بتوتر : الا وقته تكفين يالله قلبي قام يوجعني
نوره : ما سمعتي خالتي ام سياف وشقالت قبل شوي
المها : قصدتس الحمل
نوره بكت : ايه
المها بمواساه : نوره خلاص لا تبكين تكفيين صدقيني راح تحمليين ان شاءالله وقريب بعد لا تتضايقين عشان ذا الموضوع ادري انه يضايق بس طنشي ياخي هذي سوالف الحريم
نوره ناظرت عيونها بتعب : بس انا مقدر احمل
نوره بأستغراب : كيف
نوره بصوت مبحوح من البكى : انا عقيم
المها تجمدت اطرافها اكتفت انها تناظر وجه نوره بذهول لسانها ثقيل ما قدرت ترفعه ماقدرت تقول كلمة وحدة وشتقول ؟ اي مواساة ممكن تنطقها وتريح قلب نوره اي جمله ممكن تختارها بعناية بهذا الموقف الأليم بترجع فيه أوصال الأمل لـ قلب نوره مشاعر كثيره صعبة لكن ايش اصعبها ؟ الحرمان !
تنهدت بـ ألم وحضنت نوره اللي بكت بتعب وبكسرة قلب للمرة الألف تخونها اللغة العربية للمرة الألف تعجز اللغة عن ترتيب مواساة تناسب قدر حزين حرم على قلب انسان السعادة للأبد
المها حطت يدها على يد نوره بضيق : وشبتسوين
نوره ناظرت لعيونها بضياع : مدري
المها : لازم تزوجينه انتي
نوره مسحت دموعها وناظرتها بصدمه : بس انا احبه
المها بضيق : اعرف انتس تحبينه بس هو اكيد يبي عيال صح يعني بدل ما هو يتزوج وحده ما تدرين من هي زوجيه انتي اختاري وحده تزوجينها له دامتس تحبينه وتبين تبقين معاه
نوره بدموع : ازوجه مين
المها جلست تفكر لدقايق وما لقت افضل منها : عروب
نوره بأستغراب : مين عروب
المها ناظرت لها : عروب اللي سولفت لتس عنها مره طالبه عندي بالكلاس
نوره بأهتمام : تذكرتها بس ما اعرفها
نوره : انا اعرفها طيبه صدق هالتها غريبه شوي بس صدقيني مناسبه افضل من يتزوج وحده وتطلع خبيثه وراعية سوالف
نوره بضيق: هي حلوه
المها ضحكت : بدينا
نوره ابتسمت
المها بتفكير : مملوحه عاديه يعني بس اكيد مو بـ اجمل منتس
نوره بحزن : بس اخاف لو تجيب من سهم عيال ينشغل معاها وينساني
المها ابتسمت : نوره كلنا ندري ان سهم يحبتس وانتي قلتي انه بنفسه قال ما يبي يتزوج عليتس وما يهمونه العيال
نوره : بس يمكن يكتم هالشي بقلبه ويظهر انه مو مهتم
المها مسكت يدينها : اسمعيني لا تفكرين باليوم وبس لا تفكرين بشعورتس ذا اللحظه فكري لـ بعدين للمستقبل
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك