رواية انا الضحية وانا الجلاد -8
شوق يدفعني لأراها
أمي ذكرى لا أنساها
طيف أنقى من زبد الأيام
همساتها باتت نجوا
لا تنس أخاك ترعاه يداك
لو سرقت منا الأيام
قلباً معطاء بسام
لن نستسلم للآلام..
لالا
لن نستسلم للألام
ناصر: عذوبي ليه تثيحين...
ليه كلكم كل يوم تثيحون..
أنتي تثيحين ...
ندلاء بالحديقة دايم تثيح
ليلى بالمرثم تثيح
ماما مها تثيح
خلاث ملينا ثياح
أنا ما أحبكم ... أنا أحب ماما فرح وثعود..
ما يثيحون..
أمي فرح ما تثيح..
أمي بطلة...
عذبة أبي أروح لأمي فرح
أبي أروح..
قولي لربي يخلين أروح للدنة
ودي أروح وأنام مع ماما فرح..ودي
_عذبة لأول مرة لم تتمالك نفسها, ضمت ناصر
وبكت بحرقة شديدة_
عذبة: ماما فرح قوية ماتصيح...!!
آآآآآآآآآآآآآآآآآآآآآآآآآآآآآآآآه
يا فرح.. من غبتي عن وغاب معنى إسمك بدنياي
آآآآآآآآآآه يمه لو تشوفين حالي بعدتس...
_تدخل ليلى تحمل لوحتان خشبيتان وكاميليا تحمل العديد من علب الألوان_
ليلى: وش فيكم أنتم تصيحون...؟
كاميليا: عذبة تعبانة ؟ أنتي في لازم نوم الحين..
عذبة: لا مابي شي_وهي تمسح دموعها وتصطنع ابتسامة_ ورين
أشوف وش رسمتوا اليوم...
ليلى: إنحاس اللون.. بعيدها اليوم.. شوفي اللون الأحمر إنحاس بالأسود..
عذبة: إيه ليه اللون الأسود يغطي كل شي..
*******
الساعة السابعة صباحا ..في القصيم"
الجدة عذبة في بيت أخيها في القرية, الجميع مبتهج بهذه الزيارة, أبناء أخوتها
وبناتهم يتوافدون لمنزل الخال عبدالرحمن, ليلة البارح أقيمت وليمة كبيرة
على شرف زيارتها, لذلك هي ناعسة جداً, تسمع صوت جوالها يرن..
الجدة: حصيصة... واللي يعافيتس هاتي هالبليه.. شوفي منهو...
حصة: سمي ياعمة..هذا رقم من برا.. يمكن ريم..أرد عليه؟
الجدة: ريم!! لا أهوه.. أنا اللي برد.. بنيتي...ألوه..
ريم..ياحيى الله الصوت..وشلونتس يمه يا ريم الفلا..
والله الحمدلله بس ودي بشوفتس..عساتس طيبة..
إيه بنتس بخير.. هو!!وراه صوته ضايقن صدره؟
لا.. بس جده تعبان شوي .. لا ما بوه الله العافية..
والله ما بوه شي .. بس الكبر... منب جايه..
حرام عليكم...قلبي تقطع عليتس وعلى عييلتس..
ودي أملى عيني بشوفهم.. لا.. الصور ماتكفي..
ألوه..ريم.. ألو..راحت..الله ياخذهم وياخذ ديرهم.. الكلاب..
_وتنفجر باكية_
حصة: عمة!!.. وش به ريم؟
الجدة: ضايقن صدره على نجلاء تقول كلمّته وصوته مب زين..
حصة: مب جايه.. كم لهم هناك ماجو..أممم.. اربع سنين.. صح؟
الجدة: الله يتخذهم الكلاب.. لامن جوا يخافون ما يرجعونهم ثانيه..
الله حسيبهم قطعوا قلبي على بنتي... وقطعوا قلوب الضعوف..
الله يمحاهم محي.. الله يفتت قلوبهم من المغاث...
ياربي ياحبيبي إنك ترد بنيتي..
حصة: الله يردهم لكم سالمين غانمين...عمة يالله ورا ما تطلعين
نتقهوى حنا والعمة وأبوي وخالد..يالله تراهم يتحرونتس..
الجدة: يالله يابنيتي يا حصيصة.. روحي أنا الحين بجيب علاجي وبجي..
الله يزديتس ويرضى عليتس...
"في الجامعة"
تدخل د.سماح وتضرب بالأوراق على الطاولة , وتنظر للطالبات بإحتقار..
د.سماح: أنتوا لويش جايين الجامعة؟
المتوسطة المفروض مكانكم؟
إيش البروجكتات اللي جاتي أمس!!
معقولة هاظ شغل بنات مستوى خامس..لعمى..
طالبة: عفوا دكتورة.. لكن اللغة حقت البرنامج ما سبق وأخذناها..
عشان كذا لازم يكون فيه بعض الأخطاء.. زيادة على كذا الوقت مرة قصير..
د.سماح: أنا مابحب الهوص ... شغل الكسالى مابطقيه..
قال الوقت قصير.. هذا لو اعطيته لعاملة النظافة اللي برا كان عملته أحسن منكم..
ما أحد وخذ الدرجة كاملة .. بس أربع طالبات أخذوا 6من 10
والباقي تترواح مابين الـ4 والـ1
و كمان فيه طالبة ما سلمت..
وينها عذبة ماجد؟ جاييه اليوم ولا مستمرة بالإستهتار؟
عذبة_تأخذ نفساً عميقاً إستعدادا لتلقي سيل من الشتائم_: نعم..
د.سماح: الحمدلله .. لويش جاييه اليوم.. كان كملتي بالبيت ..
وينوا مشروعك..
عذبة: حصل ظروف وما قدرت أجيبه..وأمس الكمبيوتر إنكسر.. وراح كل شغلي..
د.سماح _تضحك بسخريه شديدة_: لا والله.. قولي إنك آمس تدوري بالأسواق
ويوم جيتي البيت .. ماتقدري تسوي شي.. تعبانه يا عمري...
عذبة: أنا أتكلم جد.. وأمس ما طلعت من البيت..
د.سماح: إنتي كذابة...إنتوا يالسعوديات عندكم أموال مضيقه عليكم..
لجل هيك أنتوا بتلعبوا فيها ... وأما الدراسة انتوا فيها صفر..
صح؟ أنتوا أصلا بدو وفلاحين... بتضلوا بدو.. ما بدكون تتعلموا..
لو بيجيبوا لكم جامعة إكسفورد لهون
_‘إحمرت وجوه الطالبات غضباً _
ضربت عذبة على الطاولة ووقفت: إيه حنا بدو.. وحنا عمى عين العدو..
لكن يا دكتورة أنتي ما سألتي نفسك سؤال..
كيف هالبدو بنوا كل هالحضارة اللي تشوفينها
واللي عايشه أنتي الحين من خيرها...
قبل خمسين سنه كنا بدو وفلاحين بس...
والحين حنا بدو وفلاحين...لكنهم بنوا وتعبوا
تعلموا ... وشقوا...
طلعوا كل شي من لا شي...
ما سألتي نفسك يوم...
المملكة كيف إنبنت خلال خمسين سنه بس..
وصارت من أفضل الدول
بالجامعات... والمستشفيات..
والمراكز...
صاروا أطباء و مهندسين ومعلمين
وتجار ومصنعين...
كل هذولا من جابهم ورباهم
وشجعهم إلا البدو والفلاحين اللي أنتي حاقرتهم..
_تلعثمت الدكتورة وظهر ذلك جليا على وجهها فأردفت قائلة:
أيه.. لو ما كنا إحنا ... كان ما صرتوا..
إحنا علمناكم.. وحضرناكم...
ليش بتنكري ..؟
عذبة: لا يا دكتورة ما انكر...
وليش أنكر... يشوفها العمى ذي..
أنتم يوم كنا فقرا ... الجوع يا كلنا والحروب تطحنا..
ما جبتوا خبرنا... لاهين بحضارتكم... ومدارسكم....زي ما تقولين...
ويوم توحدنا تحت أول دولة سعودية وبدينا نتعلم... ونتطور..
جيتوا لمنا..لكن مو عشان تعلمونا
ولا عشان تثقفونا...
جيتوا عشان تدمرونا.. وأنهيتوا وحدتنا...
وأرسلتوا إمامنا للقتل بتركيا...صح..؟
أنا الحين مو قاعدة الومك على شي مالك فيه
لكن حبيت اوضح لك الحقيقة الغايبة عن بالك..
ويوم طلعت عندنا هالبترول والفلوس .. اللي انتي الحين حاسدتنا عليهن..
جيتوا عشان تثقفونا وتعلمونا..!!
بس كل شي بمقابل..
أنتم تعلمون ... وحنا ندفع...
صح؟
يعني ما أظن لكم الفضل علينا...
أنتم تدفعون العلم...
وحنا ندفع فلوس... وأظن المعادلة صارت الحين متساويه..
وطبعا لو ماكانت؟_بعدالله_ عند الدولة ككل من الحكومة والشعب
الرغبة في العلم... ما إنقلبنا خلال أقل من خمسين سنه
من حال لحال
وكلامك هذا عن السعوديات يعتبر جريمة... بحقنا... وأنا وغيري من البنات
ما راح نسكت... وبنوصل الموضوع للعمادة.. وأنتي عارفة وش بيصير..
_وقفت الدكتورة واجمه , فيما ساد جو من السرور في القاعة
وصفقت طالبه من الخلف , فشاركها الجميع عدا نجود وزميلتيها_
****
عبد المجيد بالسيارة مع عمه فيصل"
فيصل: والحين أنت خلاص سحبت ملفك .. نهائي...
عبدالمجيد: إيه...
فيصل: انت يبيلك قران.. الحين مابقى لك إلا سنتين وتخرج.. وآخرته كذا...
عبدالمجيد:ياخي كم لي بالجامعة خيست..وكله كوم والدكاترة لمن يقولون أنت متأكد
إنك أخو عبد العزيز...
فيصل:ليه وشفيه عزيز...؟
عبدالمجيد: ما فيه شي ... بس شاطر... الأول على الدفعة ... والطالب المثالي للجامعة...
وأنا الطالب الكمخة بالقاعة...
يغثونن لامن قالوا ليش ما تكون زي أخوك...
فيصل:طيب ... والمهندس اللي أد الدنيا... وين الخرابيط اللي فقعت روسنا به..
عبدالمجيد: ياشيخ مليت ما حب هالقسم .. ما أطيقه..
فيصل: مو لو إنك داخل لغة عربية كان أنت الحين متخرج وبإمتياز...
عبدالمجيد: أبوي وأمي ... ما يبون... تقول أمي أبيك مهندس ولا دكتور..
أبي أرفع راسي بك...
منتب أقل من وعزوز وتركي وسعود..وفقعت راسي..
فيصل: يالله خله ترفع راسه بك...
عبدالمجيد: فيصلوه ترا اللي بي مكفين... لاتكمل علي...
فيصل:وش بك مجيد.. أنا أتكلم جد...
عبدالمجيد: بلا جد بلا عم... ياخي شايفن رايق... الله يعين عليه وعلى أبوي
فيصل: يا حبيبي ترفع راس أمك مو بس بالدراسة..
الله من أبو طبيب ولا مهندس ما طلع شي...
يا حبيبي إذا حطيت ببالك هدف بتحصله ... بس الأهم
إنوه يكون من داخل نفسك وأنت اللي راغبن بوه...
عبدالمجيد : أقول ذكرتن لماجد... الله يرده...
كنك طريقة كلامه.. لامن سمعتوه أقول هذا دكتور نفسي...
تدري.. قالي يوم أدخل علمي وأنا أحب الأدبي..
لا تدخل قسم بناء على رغبه أحد...
انت صاحب القرار والرغبة... والرغبة التي تنبع من داخلنا
هي اللي تدفعنا لنحقق ذواتنا...
فيصل: إيه.. والله إنه صادق.. بس تصدق مجيد...
عبدالمجيد: وشو... ؟
فيصل: مازال تأثيره واضح وبقوة على عايلته...
شف بناته كل وحده ميوله تختلف على الثانية
وكل وحده تعتقد إنه أفضل وحده...
وإن مافيه مثل رايه...
ياخي ذولا نفسي أعرف كيف يعيشون مع بعض..
عبدالمجيد: قصدك عنيدين من الآخر... بلا قرق زيادة..
فيصل: وش بك ... يا خي روق...مب كونه عناد..أكثر من كونه ثقة بالنفس...
يعني يتنازلون.. بس ما يحسون إنهم غلط ولا والله مادري..
بس هم غربين...
عبدالمجيد: ما إنشقت بس تخر... هم غربين عشان أمهم عايشتن طول عمره
بإمريكا.. وهم إنولدوا وعاشوا ببريطانيا...
وجو بتفكير يختلف شوي... صح؟
فيصل:لا.. ما تأثروا كثير... تشوف سعود الله يرحمه بالبر ما تقول
هذا ما جاء من برا إلا بالثانوي... والله ماتقول إلا رابي بمزرعة...الله يرحمه
عبدالمجيد: أقول فيصل... توقع أبوي وش بيسوي بي لامن دري إني فصلت من الجامعة..
فيصل: بيشنقك...
عبدالمجيد: أبيه يوظفن زيك... مليت من الدراسة..
فيصل: شف إذا على أبوك بتصير مصيبة... لاكن أنت كلم سعد..وأمي
وخلهم يخففون شوي من حدت الموقف...
عبدالمجيد: الله!!!! يعني الموضوع فيه شنقه...وش سوا لك يوم تركت الدراسة..
فيصل: سعد فكن منوه... بس أنت ترا يمكن غير... أنت ولدوه...
عبدالمجيد: بطني وجعن... لا إن شاء الله أبوي حليل...
******
"في الكافتريا"
عذبة تتكئ على أحد الطاولات, وتشرب قهوة داكنة , تراقب الطالبات
وتوزع إبتساماتها يمنة ويسرة, تدخل نجود ومعها زميلتيها خوله وأميرة,
ويتجهن صوب عذبة..
عذبة: هلا والله... طلعت الغثة ما أمدا!!
نجود_وهي تسحب الكرسي_: أنتي خلاص إنهبلتي... وش سويتي اليوم!!
أميرة: والله يا عذبةهذاوجهي إن إجتزتي هالمادة...
خولة: أنتي لو شفتي عيونها وهي تطالعك وأنتي طالعه ... يمه.. يمه ..
تخرع موت...
عذبة: صدز... زين خلها تعرف إن الله حق.._وترشف رشفة من القهوة , ثم
تشير لأحد العاملات بالكافتريا_ هلا .. تمام كيف حالك أنتي.. !!
أميرة: يااااااااااااااه يالبرود ... يابرد أعصابك... إحنا خايفين عليك ... وأنتي ماهمك...
عذبة: الله يجزاك خير... ماتقصرين بس لا تخافين علي...
أنا ما سوي شي إلا وعاملتله ألف حساب...
نجود: أجل إرسبي ... وخيسي بالحاسب..
عذبة: خير هي جامعة أبوه... جامعة إبن سعود فتحه للناس كله...
مب تجي وحدة ماتسوى وكمخة بعد... تقعدن...هي فوضى...
أميرة: لا يا حلوه هي دكتورة... يعني بيدها يخيسك بالجامعة ولا أحد يتكلم...
عذبة: بالله تحسونها دكتورة... جد والله أشك إنها شاريه الشهادة...
لعنبو داره الحين أجيب له كلام نفس المعنى بس يختلف السياق
وتقولي غلط...
أسألتها من النت... الواجبات اللي تعطينا... واضحه إنها كبي بيست...
ولا عاد هي تصحح... والله ريم ذيك اللي تجلس ورا, حاطتن له أي كلام ومشيه لها
ورنا مسويته شي جنان وحاطتن له ثلاثة من عشرة... وين العقل...
لمن أناقشها يبين ما عندك أحد...
خولة: إيه والله إنك جادة ... باين إنها خرطي ..
والغثة إنها دايم تحط قصورها بالشرح وفشلها على الطالبات ...
يعني كل الطالبات مهملين وأنتي الفالحة... شي يقهر..
نجود: وش بتسوين الحين؟
عذبة: أمممممممم.. تو رحت للوكيلة... وقلت لها السالفة..
نجود: طيب وش قالت...؟
عذبة: وش بتقول يعني... عصبت وقالت هذي نتفاهم معها... وقالت لي لا تخافين
ورقة إمتحانك أنا بصححها بنفسي... عشان ما تنظلمين...
نجود: حبيبتي ... كل القسم صديقاتها وبالذات الدكتورات...و اللي من ربعها...
يعني إذا مشوك من عندها بيتصلطون الباقين...
أميرة: لا ... مو كلهم كذا... د.سلوى مستحيل تظلم أحد وأ. رنا وأ. أشواق
وباقي المعيدات ما ظني يتعاطفون معها على حساب ظلم أحد أيا كان..
خولة: بس كلامها صحيح... فيه هنا دكتورات ما عندهم لا ذمة ولا ضمير...
عذبة:خلصتوا؟...
نجود: إيه يا الثلجة ... والله ما كنت أدري ببرود أعصابك هذا...
عذبة: والله يا أنتم عاملين مشكلة من لا شيء...
نجود: أقول بتخيسين بالدراسة وتقولوين لاشىء..
عذبة: لا نيب مخيسة ولا شي... أنا بحول أدب إنجليزي..
نجود:وشـــــــو!!!!
عذبة:لا تقولون حرام... مادري إيش... ترى راسي إنفقع من الوكيلة...
بحول قسم ممتع... أتعامل مع أوادم أحلل شخصيات ومواقف شخصية...
أبرتااااااااااااااااااح من هالقسم وأرقامه... أحس إني هنا نسيت إنسانيتي
من كثر ما أتعامل مع البرامج والأرقام..
أميرة: بس تراه صعب ماراح ترتاحين...
عذبة: أدري إنه مو سهل... واجبات وبحوث وشغل... بس يكون
أسهل من هالزفت اللي الحين ندرسه...
معي لغة... وأفنان مستمتعه وهي تدرس فيه... والله لامن قريت بحوثها
ووجباتها أستانس... أحسهم أوادم ويتعاملون مع أوادم...
نجود: بس حرام بعد هالكرف ما بقى لك إلا سنه ونص وتتخرجين...
الحين لك ثلاث سنين ونص تدرسين آخرتها تبدين من جديد!!
عذبة: أبدا بشي أستمتع فيه... وبعدين الوكيلة قالت لي بيعادلون المواد اللي درستها
هنا ويمكن أصير بمستوى ثالث... حلو صح...
خولة: عذبة أنتي فيك شي تتكلمين جادة ولا مازلتي متأثرة بالموقف...
عذبة: أتكلم جد... وقلت للوكيله مب جايه لإمتحاناتي... بس بجي للمادتين العامات
عشان بيعادلونهن لي بالإنجليزي...
في غرفة عذبة"
فتحت الدفتر المخصص لوالدها, أمسكت القلم وكتبت:
أبي...
أحتاج إليك الآن...
كل يوم يمر ينذرني برحيل جدي..
لم اعد أطرب بصوت العصافير صباحاً...
ولا تنعشني رائحة زهور الفل الندية المنبعثة من شرفتي..
لا تبهجني خيوط الشمس الذهبية..
حين تخبرني بمقدم يوم جديد...
وبعد قريب..
اليوم إتخذت قرار حاسماً..
غيرت تخصصي وسأبدأ من جديد...
قراري كان نابعاً من ذاتي..
شعرت برغبة ملحة بإتخاذ القرار..بدون أن أستشير أحد...
هذه ليست من عادتي كما تعرفني... ربما لأنني كبرت بما يكفي
أو ربما لأنه لا يوجد أحد أستشيره..بعد رحيلكم..
لا أحد.. وحدي يجب أن أتولى كل شيء..
يجب أن أتألم لوحدي... وأبكي لوحدي..
عذراً والدي فكلامي مقطع وركيك...
ولكنك أقرب الناس لي حتى في بعدك..
لذا لم ولن أخجل حين أشهدك على ضعفي الذي يرتدي قناعاً من قوة جوفاء...
أحتاج إليك الآن أكثر من أي وقت مضى...
أحبك... وأنتظر عودتك...
صحيح نسيت أن أخبرك... الآن سأكلم هيفاء
لأقنعها بقبول حبيبي حبيباً لها...
اليوم سأقدم أجمل وأقسى مشاعري...
أجملها تجاه من أحببت...
وأقساها تجاه قلبي المسكين....
أعذرني أبي العزيز... أعلم أنك لن ترضى بذلك...
ولكن...هو الحب والكبرياء حينما يجتمعان
يخلقان مزيجاً قاتلاً...
.........
_تدخل أفنان في هذه الأثناء_
أفنان: أهلين عذوب...شوفي هه ما تأخرت..
عذبة: شاطرة...
أفنان: الحين بيجبون لنا قهوة... عندك شكولاته...
عذبة: لا.. دقي على أليس... أكيد بالثلاجة... ولا مسويه حلا... تدبر عمرها...
أفنان: الطباخة!!
عذبة:لا الكوافيرة...وش رايك يعني
أفنان:ماعرف رقم المطبخ...
عذبة: انتي وش تعرفين...235
شوفي أفنان بسوي الحين شيء...
أفنان: وشو؟
عذبة: بدق على هيفاء...
أفنان: حرام عليك تقسين على نفسك كذا...والله حرام..
عذبة: شسوي... لازم.._وإتصلت على هيفاء_
أفنان: تقوين؟
عذبة: ألو... السلام عليكم...
هيفاء: وعليكم السلام والرحمة..
كيفك هيفاء عساك بخير...
تمام ولله الحمد .. مين معاي..
عذبة: أنا عذبة
هيفاء: عذبة!!! .........................هلا والله..
عذبة: أدري بتقولين ليش متصله لكن أنا عندي كلمتين بقولهم
هيفاء:هلا وش عندج...
عذبة: _وأخذت نفس عميق وأغمضت عينيها_
أنا بقولك إنواااا...إنوا مشاري رجل.. وما ينعاب... والشهر اللي أنا عشته معوه..
ما شفت منه إلا كل خير... خلوق ومحترم وحظ البنت اللي بتصير نصيبه...
وإذا كنتي أنتي هالبنت لا أوصيك عليه...
تراه ذهب ... ولو ما كانت ظروفي اجبرتني.. كان ما فرطت فيه...
بس تطمني... أنا ما يهمن كان معي ولا مع غيري الأهم إنه مبسوط..
و....إن شاء الله أشوفك بالزواج وأبارك لك...
و......................يالله مع السلامة...
هيفاء: عذبة...!! منو.....طوط طوط...
_رمت عذبة بالجوال على الجدار فانتشرت أجزاءه في أنحاء الغرفة_
أفنان: وش ذنب الجوال...
عذبة:خليه يتكسر ماهو أول شي لي ينكسر...
أنكسر كل شيء حلو بحياتي...
أهلي.. وحبي...وقلبي...
آآآآآآآآآآآآآآآآآآآآآآآآآآآآآآه ياقلبي...
_وإتكأت على الجدار ورفعت رأسها فيما أخذت دموعها تجري على
خدها وتنساب على صدرها من خلال رقبتها, شعرها الأسود المسترسل
والخصلات التي إلتصقت برقبتها البيضاء الطويلة, وحمرة خديها
وجلابيتها البحرية رسمت منها لوحة فاتنة ومبكية في آن واحد_
أفنان: بس قدرتي تكلمينها..مادريت إنك قوية... والله لو أنا بآخذ واحد وبتكلمني
حبيبته وبتقولي هالكلام ما وافقت عليه ,
لأن اللي يوافق يتخلى عن أحد يحبه كذا , ما يخلص لي أنا بعد..
ولا... وش رايك...
عذبة: ما تخلى عني بكيفه... والله يا فنو... والله هو يحبن..
أفنان: لا حبيبتي هنا ووقفي... قلنا فيه شي حده على الطلاق وطلق
بطريقة قليلة أدب وجبانه... لا كلمك ولا شرح لك ظروفه..
ومشيناها... وقلنا خايف يواجه...
بس مسألة إنه يقول كلمي خطيبتي.. هذي مقصود فيها مذلة...
يبي يذلك...بس أنتي دواه بينتي له إنه ولا شبشب الحمام...
عذبة: أه بس يا فنو ... والله مادري اللي قاعدة أسويه صح ولا غلط...
تايهه ومافي أحد يدلن... بس ترى هيفاء غبية شوي ...
على وجهه ماتفكر لبعيد... أكثر ما تسمينه سقيمة ومتبلدة..
والله شيء يقهر مشاري ياخذها..آآآآآآآآآآآآآآآآآآآى
_وعادت نوبة البكاء من جديد_
أفنان: يوه بدينا من الحين شغل الضراير...
مامدى تو تقولين لها مابي رجلك.. ومبسوطه إنه من نصيبك...
والحين مقهورة منها...
عذبة: إسمعي أنا عذبة بنت ماجد... عذبة حفيدة عذبة...
مادخل على ضرة... والصحن اللي يشاركن بوه غيري أعافه...
لو الموت ما رد لمشاري ومعه غيري..
مابي راسن للمخاليق مدواس...
وراسي لو ينحني لغير ربي ... بسيفي قطعته...
أفنان: شصاير يا عذبة... عمري ما سمعتك يوم تتكلمين بهالشكل ذا...
كلامك هذا ما يليق لك.. شوفي شكلك بالمرايه...
هالجمال والأنوثة وتتكلمين كلام رجال...
كلام قوي مالك فيه... حرام تراك ماتتحملين هالقسوة اللي
تجي على نفسك قبل الناس... والله مو لك هالكلام...
عذبة_تضرب على التسريحة وتتناثر أدوات التجميل وتصرخ_
ليه ما يليق لي... كلام الرجال!!!
لازم أصير رجال ... مادام ما وراي أحد...
لازم أصير رجال ... عشان أقابل قسوتهم...
أقسي على نفسي وعليهم...
خير ألف مرة من أني أتحمل قسوتهم علي وعلى خواتي... صح!!
أفنان: والله صايرة هاليومين ما أفهم عليك...
عذبة: إصبري... توك ما شفتي شي...أنا عذبة بنت ماجد...
وابن أبوه يوطى لي على طرف...
أفنان: يعني وش بتسوين بمشاري...
عذبة: مشاري...!!! لا ولا شي... مشاري ما تحداني تحدي رجال...
وقلبي لو قسيت على الكل ما يسمح لي أقسى على من أحبه...
أفنان: ياهوه... إلا هو الوحيد اللي يستاهل تأدبينه...
حقير ولا يسوى مب رجال...
قلبك للأسف حب رخمة...رخمة مو رجال...
عذبة_وهي تبكي_: خلاص يا أفنان تكفين لاتسبينه... خلاص...
اللي فيني مكفيني... لا تسبين قلبي ترى قلبي حبك قبل لا يحبه...
أفنان: ماتخلين عنك الشطانة... بس انا أحبك وهو ما...
عذبة: بس!!! لا تكملين ... مشاري يحبن ... والله يحبن...
بس أنتم حاقدين عليه...
آآآآآآآآآآآآآه يامشاري
جمعت الشوق واهديته عيونك
وكل الحب في دربك نثرته
وعطرت المشاعر من جنونك
وزفيت العمر لك لو خسرته
*******
"في غرفة ليلى"
ليلى تتحدث بالجوال, بصوت هامس وتنحني تارة على الزهور المزروعة بشرفة غرفتها...
ليلى: يالله عاد بلا دلع... وش رايك؟
أممممم ... يعني أزعل؟
..لالا لا تسوي فيها ثقيل...
حلوة!!!
لا مابي حلوة وبس...
حرام عليك كل هالتعب وآخرتها حلوة بس...
لا كذا والله بزعل منك...
ولا حلوة مرة... أبي تعليق جاد...
تستهبل... زين الشرهه علي اللي آخذ رايك
مع السلامة...
_تغلق الجوال وترميه على سريرها وتصرخ_:
زين مؤيد أنا دواك...
****
في حديقة بيت الجد"
مسطحات خضراء كبيرة, جلسات خشبية مترامية بشكل بديع في أنحاء الحديقة,
تضللها عرائش متقنة الصنع, وتحيط بها أشجار النخيل الباسقة, وأشجار متباينة
الأطوال, أصوات خريرمياه النوافير والشلالات الصخرية المتناثرة حول الجلسات
مع روائح الزهور الملونة وأصوات حفيف الأشجار تخلق جو من الارتياح والبهجة ,
مما جعل عذبة تتمدد وتضع رأسها على فخذ جدها , الجد يمسح على شعرها ,
وينشد بعض الأبيات التي حفظها عن ظهر قلب...
عذبة: يوه يبه.. ماشاء الله عليك تعرف القصيد؟
الجد: إيه يا بنيتي أنا أحب القصيد...والشعر...أمي كانت شاعرة...
عذبة: يبة ليش ما طلعت عليه...
ناصر: الله يرحمه ... مب بس شاعرة ومزيونه...
عذبة: يبه عاد ما قصرك زين... قمر ما شاء الله عليك...
ولو تسمع شوري وتخلين أخطب لك...
الجد: لا يا بنيتي...
أنا عندي ثلاث حريم... وش تبين أكثر..
عذبة: هو... يبه!! منين طلعن ذولي...
الجد: أنتي .. وليلى .. ونجلاء...
عذبة: يبه فقعت قلبي ... حسبتك متزوج وجاحدن عنا!!!
الجد: لا يا بنتي... ماتزوجت أول أتزوج تالي...
أنا من طلقت أمتس ... عفت الحريم...
إيه الله يسامح من كان السبب....
عذبة: من كان السبب يبه؟
الجد: أخوي...وأمي...
عذبة: ليه؟!!!!
الجد: ................ يقولون منب رجال اللي ما أوقف مرتي عند حده..
عذبة_تجلس وتقرب وجهها من جدها_: يبه...ليه هي وش سوت...
الجد: أمتس كانت صغيرة وسفيه... وعزوز كان حار ...
دايم يهاوشه ليش ما تشتغل مع مرته ولا ليش تلعب بالنخل مع البنيات
... ومره ضربه...
عذبة: ضربها!!!!!!!!!!!!
الجد: إيه جدتس عاد زعلت... وراحت لأهله...
وقالت لو أنا اللي ضربته ما زعلت بس أخوي لا..
ويوم جت أمي ترجعه قالت مرت أخوه
لو ولدكم رجال ما مد يده على بنتنا وهي ما تحل لوه..
عذبة: إيه وبعدين...؟
يتبع ,,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك