رواية انا الضحية وانا الجلاد -6
عبدالمجيد :هع.. بسوي إحتفال إنك رديتي.. رد الماء بحلقك إن شاء الله...
ماتسمعين..؟؟؟؟
نجود :وش تبين أقول قاعد تطنز؟
عبدالمجيد :سنه أسلم وما رديتي!!
نجود:إلا رديت.. بس ما سمعتن...
عبدالمجيد :والله ما شفتس ..إلا إن كان ردتس لا سلكي
و بدون تحريك شفايف هذا ممكن
من خلال تقنية الماثل بين يديكم..
نجود :تبي شي ولا إذلف...
منب فاضية لخرابيطك لازم أسلم المشروع بكرا...
عبدالمجيد :لا... من زينتس..
_تدخل نورة وتصرخ_:
مجيد هنا يا لسعدي وفرت علي مشوار العنية لغرفتك... تقول أمي هاه..
عبدالمجيد :وش تقول أمي بعد؟
نورة :تقول درس محمد...عنده تقييم
وأنتي يا نجود درسي سلمان عنده امتحان رياضيات بكرا...كان الله بعونك...
عبدالمجيد :وأنتي يافتاة الغلاف من بتدرسين...
نورة :أنا أخاف أدرسهم ويطلعون الأوائل.. وتصكهم عين ويقعدون به..
ياخي حرام أتذمم هالمساكين تبيهم يدجون أنا يالله أدرس نفسي وبمؤازرة من هالحاسوب اللي مقابل الحاسوب...هع
عبدالمجيد :هههههه.. إذكري الله ترا عينتس حارة...
نجود: نورة عندي بكرا تسليم مشروع.. درسيه أنتي..
نورة: ولا مشروع ناطحة سحاب.. أنا بذاكرمع نجلاء.. مع السلامة
عبدالمجيد: شلون يذاكرن هالثنتين جميع... أنواع الدجة!!
نجود :وأنت مصدق إنهن يذاكرن.. بس مطامر فوق هالشجر...
إممممممممم.. مجيد حبيبي تكفى درسهم كلهم واللي يرحم والديك..
عبدالمجيد:إيه الحين صرت حبيبتس وتو إذلف.. ماشي
بس شوفي إذا أحدثت إصابات بليغة ترا تتحملين تسكيت أمي نورة..
ما لي خلق فزعته مع هالمبزرة..
في منزل سعد"
تركي يدخل ونواعم_أخته_ تقلب القنوات... أمامها كم هائل من المجلات والكتب..
تركي:رماااااااااااااااااااااااااااااااانه...وينها ذي؟
نواعم: بسم الله .. ترووك قل السلام.. قل شي!!هبلتني..
تركي: بسم الله على قلبك.. إلا وين رمانة ذي..
_تأتي رمانة وتقف بجانبه_
زين جيتي يجون الحارة كلها وأنتي ما تجين!!
أبي غداء تراي ميت جوع...بسرعة وش تناظرين...؟
نواعم: تناظر هالقذلة وهالبدلة الراصة... ياخي عيب والله عيب...
أنت ما تستحي .. فشتلنا مع كل الناس..
إلبس لبس رجال...
تركي يتجه لمرآة كبيرة بجانب الباب ويقف متأملاً شكله.. شعر مسترسل
على كتفيه ومقصوص الأطراف ...
وجه أملس و شارب قصير ..
قميص قطني ضيق.. بدون أكمام...
بنطلون جينز ضيق جدا..
مرر يده على رأسه ثم على وجهه..
عدل من ثنيات قميصة وإلتفت لنواعم قائلاً:
وش فيه شكلي؟؟؟
عسى تبين أصير عربجي زي مجيدوه.. ولا عمي فيصل...!!
لا قولي إنك غيرانه من شكلي الحلو
وأكيد الناس يقولون واااااااااااااو تركي ما كأنه أخو نواعم..
صح إعترفي...!!
نواعم: يا تركي يا روح نواعم أنا أفشل من شكلك..
يا خي إلبس ثوب خلني أحس إنوا عندي أخو..
تركي: نسيتي بالعيد اللي راح لبست ثوب...
نواعم: وه بس الكلام معك ضايع... من زين الثوب اللي أنت
لبسته... ضيق ومنقش أطرافه...
ليتك ما لبسته.. فشلتنا..
تركي: روحي يالله يالبزر...إلا وين رمانة ..
تدرين هذي المفروض أهلها مسمينها تينه...
بس بالغلط صارت رمانة.. تدرين ليه...؟
نواعم: لا.. ليه؟
تركي: شوفي شكلها وتعرفين...هههههههه
نواعم: يا مصلك بعد...
_تدخل أم تركي الدكتورة منيرة ...
أم تركي: السلام... وش فيكم تضحكون؟
نواعم: هلا يمه .. تراي ما تغديت أتحراك تجين نتغدى جميع..
تركي: إي والله يمه..
أم تركي: وي يا قلبي .. والله أنا بعد ودي أتغدى وياكم, بس حيل تعبانة..
فيج تعذريني ... اليوم حالات الولادة أغلبها متعسرة
تعبونا ... من حالة لحالة..
تغدوا أنتم ولا نطروا أبوكم تغدوا وياه..
مع السلامة.._وتذهب تنظر نواعم لتركي بأسى بالغ_
تركي: خلاص نواعم.. نتغدى أنا وياك...
نواعم: لا .. خلاص إنسدت نفسي...
تركي: أنت ما تأيسين...أنا من عرفت أمي وهي
دايم عندها مناوبة ... ولا تقرا في الكتب...
ولا نايمة... هذي شغلتها.. طبيبة...
يعني ليش تنسد نفسك...
نواعم: هي أم بعد...ولاهي أول طبيبة ولا آخرهم..
وش يضرها يعني لو تخفف شي من شغلها..
تركي: كل الطبيبات والأطباء كذا...
نواعم: لا حبيبي .. مو كلهم كذا...
هذي فرح الله يرحمها يوم جت هنا تركت شغلها ..
بعد ما حست إن بيتها محتاج لها...
تركي: متخلفة .. يعني أدرس إثناعش سنه وباللآخر
أترك كل شي عشان بزرين...
أصلا كل ذيك العايله مظروبين...
نواعم: والله مو المضروب إلا أشكالك
ربايه رمانه وطقتها..
هم اللي يستاهلون من يسمهم أسرة ...
تركي: أقول خلصينا منهم ...إلا صدق إن عمي مريض؟
نواعم: لا زين وصلك الإرسال...إيه..مريض
تركي: طيب إذا مات وين بيروحون البنات؟
يجون عندنا؟
نواعم: فال الله ولا فالك إن شاء الله ما يموت..!!!
ووش يجيبهم عندنا يقعدون ببيتهم..
تركي: ليه ... خلي ليلى وعذبة والجنيه الصغيرة يجون عندنا..
البيت كبير..وهم حرام يقعدون بالبيت بدون رجال..
نواعم: أمممممممممممم .. أجل تبي ليلى تجي..
لا حبيبي... حامض على بوزك...
تركي: أقول إنطمي...رمااااااااااااااااااااااااااااااااانة!!
وين الغداء...؟ خلاص بطلع أتغدى برا...
نواعم تقفز وتمسك بيده: والله ماتروح لمين تآخذني...
بروووووووووح معك أتغدى...
"في منزل الجدة"
تدخل ليلى ونجلاء.. الجدة تسقي حديقتها الصغيرة, تنظر الجدة بحدة نحو البنات
ليلى ونجلاء: السلام عليكم..شلونتس يمه؟
الجدة: هـــــــــــــــــَــو ... وش حزن عذبة ماجت..؟
ولا عنده إختبارات..؟
نجلاء: لا... يمه.. عذبة ما تجي من عند أبوي ناصر أبد..
بس تطلع لامن جاء وقت الزيارة وحنا نروح..
تجي للبيت تحمم وتاخذ ملابس وتجمع دروسها..
الجدة: هـــــــــــــو ... ورا عيال عمتس ما يقعدون عندوه؟
ليلى: عذبة عيت كلش... تقول أبوي وأنا اللي بجلس عنده..
الجدة: طيب ودراسته؟
نجلاء: يمه هي بنفس قسم نجود..وهي تساعدها وتجيب لها دروسها..
وهي أحياناً تروح للجامعة بعد ما تكلم حدا عيال عمي يجون عند جدي..
ليلى: يمه وشيفيك ضاق صدرك.؟
الجدة: ضيقت صدري هالبنيه...إيه لو يجي وليدي ما تبذلهت هالبهذلة...
ليلى: الله يرد أبوي ... بس والله هي اللي أصرت ترافق جدي..
والله فيصل ومجيد وبو عبدالعزيز قصروا وهم يترجونها تروح للبيت
بس هي راكبة راسها...
نجلاء: يمه يقول جدي إن عذبة تشبه طبعتس...يعني عنيدة وقوية
صدز يمه..؟
الجدة: وين بتروح من العناد أمه فرح عنيدة وأبوه عنيد وقوي ما يهزه شي..
ولا جدتس مابوه من العناد شي...
ليلى: وأنتي يمه منتي كذا؟
الجدة: يا بنيتي يوم أنا بعمرتس كنت عنيدة بس مانب قوية..
لكن بعد الصكات اللي شفته.. صرت أقوى من الحجر...
نجلاء: قلبك هو اللي صار أقوى من الحجر..؟
_صمتت الجدة قليلاً ثم همست_
ليت يابني قلبي صار أقوى من الحجر كان ما تعبت...ياليلى هم يقولون
الصكة اللي ما تموت تقوي..وأنا أقول الصكة اللي ماتموت تعلم..
تعلم شلون الواحد يقوى قلبوه ولا يلتفت لوه.. ولا اللي قلبوه رهيف
يبتل قلبه رهيف.. بس يتعلم وشلون يدقم خوفه وحبوه.. ولا يبينه..
إيـــــــــــــــــــــــه الله يعين عذبة ويرد أبو عذبة..
نجلاء وليلى: آآآآآآآآآآآآآميــــــــــــن
الجدة: وعذبة الحين وش بتسوي بدراسته؟
نجلاء: معطينه المستشفى إجازة مرافق.. بس الله يعينه عنده مشاريع وواجبات
كثيرة لازم تسلمها والإمتحانات بعد ثلاث أسابيع...
مادري متى يمديه تسلمهن؟
الجدة: طيب جدتس متى بيطلع؟
ليلى: بعد يومين بيكتبون له خروج.. وهذا فيصل وأبو عبدالعزيزببيتنا
يجهزون الغرفة اللي بيصير به..
الجدة: الله يطلعوه بالسلامة ويخليه لعينن ترجيه..
******
"في منزل مها"
مها تصب القهوة لفهد ومساعد, ناصر يقفز ليصل للكورة التي أبعدها مساعد عنه
مها: إركد يا نصور..تعال كل حلا سويته يجنن..تعال ترا مساعد بينظف الصحن..
مساعد: أنا اللي بنظف الصحن.. أصلا ما أكلت منه إلا قطعة!!!
تعال يا ناصر ترا عمتك بتاكله هي ورجله وبيخلونا..
فهد: الحين أنت ومها تهاوشون ليش تدخلن بالموضوع؟
ناصر: عثان أنت وماما مها الفريق الأثفر..
وأنا ومثاعد الفريق الأذرق..
_يقفز ناصر بقوة ويرمي الكرة , يقفز مساعدويلتقطها, يهجم عليه فهد
وينتزعها منه ويرميها على ناصر_
فهد: هج... هج.. قبل لا يلحقك مساعدوه... يالله بمسكه عشان تهج..
ناصر: إمثكوه ذين... بهد... ياااااااااااااااااااااااااااي
مساعد: فهد خلن ... نويصر تراي اخذه آخذه... ماراح ينفعك ذا ومرتوه..
فهد ويخر..
_ينطلق مساعد من يدي فهد ويركض خارجا للحاق بناصر_
مها: ناصر ... ناصر... هوه هوه...
يا حبيله والله... تدري رغم الفرق الكبير بالعمر إلا إنهم منسجمين..
يوسعون الصدر .. حتى مساعد طلع صوته منول هادي..
_تنزع الجلال من على رأسها وتهف بيدها على وجهها_
وه حر...وأنا لابستن هالطربال..
فهد: كلمتي عذبة عشان ناصر...
مها: والله ما قدرت.. جده تعبان وحالته حاله..تصدق عاد ما تقول إلا ولده
تخيل ما تطلع من عنده أبد..بس تناظره وتحبب إيدينه... تقول بيموت هالحزه..
فهد: الله يكون بعونه.. مها..لو بيموت العود وين بيروحون بنات أخوك
ونجلاء توقعين أهله يآخذونه؟
مها: تصدق ما فكرت بهالنقطة..والله مادري بس البنات يمكن أمي تجي عندهن..
ولا يروحن لبيت عمهن..ونجلاء...أممممممم مادري خوفتن...
فهد: وناصر؟
مها: مادري بس لا تامل واجد ترا عذبة متعلقه فيه مرة .. وأمه يوم تموت
وصت عليه وعلى نجلاء أكثر شي..
بس بحاول به ..
فهد: أقنعيه... قولي له أن ناصر أفضل يعيش بينا حياة طبيعية ..
وهي مو قاصره مشاكل.. هي عليه مسؤليات ولا هيب متفرغة تربيه..
حاولي به من هالحكي...
مها: بحاول ...والله يرزقنا من يغنينا عنوه...
فهد: يالله مها أنا بروح عندي شغل.. مع السلامة..
مها: طيب.. إصبر بجيب عباتي.. بروح لأمي قبل ماتروح للقصيم...
فهد: خلي مساعد يوديك أنا مستعجل...
أمام منزل الجدة أم ماجد"
مها: الله يجزاك خير مساعد... أخوك صايرن ما ينقضب..
والله أحس إني بخيس بالبيت لو منتب موجود
يا خزياه أبلشتك.. وأنت بتروح للنادي..
مساعد: لا والله يا مها.. أنتي حسبة أمي ..
من عرفتس وأنتي صايرتن لي الأخت والأم..
الله يجزاتس خير ويرزقتس..
مها: نصور حبيبي قل لعمو مساعد شكرا..
ناصر: ثكرا... بث ودي أروح للنادي معوه..
مساعد: لاحبيبي ما فيه صغار بالنادي...
ناصر: تعرف أمي فرح؟ كانت تخلين أروح مع ندلاء عصبن
عليه... وهناك ألعب كراتيه...
مساعد: عجيب!!.. مها معليش أبي الحمام..شوفي
إذا فيه أحد بطريقي..
مها: يا خلاف من بيصير بوه إلا أمي..
إدخل ما لمك أحد..
_يدخل مساعد الحمام ومها تتجه مباشرة للمطبخ لتعد القهوه..
فيما كانت نجلاء وليلى يتابعن فيلم بشغف بغرفة المقلط_
نجلاء: أح ليلى حســــــــــــــــــرانه!!!
ليلى: قومي للحمام.. !!
نجلاء: مابي يفوتن...
ليلى: قومي هه هذاهم قطعوه فاصل إعلاني يميديك تروحين وتجين..
قومي حمام الرجال
قريب.. بســــــــــــــــــــــــــــرعة
قفزت نجلاء بخفة ووقفت أمام الباب سمعت صوت الماء
فصرخت وهي تضرب الباب بعنف_:
ستــــــــــــــــــــــــــي بسرعة...
بســــــــــــــــــــــــــــــــــــــرعةإطلعي بـ...... على روحي
والله ماقدر ...
_أخذت تضرب الباب بعنف في تسمع الفيلم وتحس بشعور من اللا سيطرة _
يا ه ما صارت سـتيوه يا كــ..........واااااااااااااااااااااااااااااااااااا اااااااااي
_إنفتح الباب وإذ بمساعد يقابل نجلاء وجهاً لوجه, صرخت بقوة وهربت,
وإرتمت عند ليلى و(......) على ملابسها, وهي تضرب بكفيها على وجهها_
نجلاء: ياخزياه... ياخزياه.... إيـــــــــــــــــي وين أودي وجههي ..؟
ليلى: أنت يا وصخة وع... هي وش سويتي.. وخري عني!!..
هـــو نجلاء وش بك؟ياويلك من أمي عذبة.. نجستي السجاد..!!
ياخزياه من مين...؟
نجلاء: مســــــــــــــــــاعد... مســــــــــــــــاعد!!
ليلى: إيه أشوا بزر...مساعد!!حسبته من خوالي اللي بالقصيم!!
هـــــــــــــــــــــــــانــــــــــت
نجلاء: لحية والله لوه لحيه ... يمه عيونه تخوف .. أنا ... فشيله...
_تدخل مها عليهن وهي تضحك_
مها: وش سويتي ؟ وع يالبزر...هبلتي أخو زوجي العزيز...
فشله من رجلي وأخوه يقولون عاد أهلي مهبل..
_يطل ناصر ويضحك بقوة قائلاً_:
أعلم ... يا دادا يا ندلاء... وع يالوثحه!!
_ويهرب منادياً لمساعد_
نجلاءوليلى بصوت واحد: نااااااااااااااااااصر تعال!!
_يقف مساعد عند باب الشارع ويلتفت لناصر_
مساعد: سم نويصر وش تبي؟
ناصر: ثفت ندلاء وع ثوت على نفثه...ههه
ثح لاذم نلبثه حفاطة..؟
مساعد: لا نلبسك أنت أول حفاظة.. صح؟
ناصر: لا... أنت إلبث حفاطة...مب أنا ...
_ وقفت نجلاء وليلى يولولن خلف الباب ومها مستغرقة بالضحك_
*****
"في المطعم"
تركي: أممممممممم ... لذيذ!!
نواعم: إيه والله ليت أمي وأبوي معنا كان تصير وناسه...
تركي: شوفي ذيك... اللي بالزاوية...شوفي..
نواعم: وينها..؟ وبعدين وشلون تشوفها من الستارة؟
تركي: من كبر هالستارة زي قلتها...شوفيها اللي ماسكه الجوال وتشر علي..
نواعم: إخس .. من زينك تشر عليك.. إي والله وش تبي...؟
تركي: هذي دايم تجي هالمطعم وتمرمر بهالشارع...
عاد فارس رقمها وعلطول ما بغت لزقت ...
نواعم: هيه.. أنت قاعد ترقم بنات خلق الله...؟
تركي: والله ما طقيت بنت على يدها وقلت لها خذي رقمي..
اللي تبي تاخذ واللي ماتبي تروح وتخلينا...
نواعم: وأنت الحين لك علاقة فيها.. ؟
تركي: كاااااااااااااااااااانت... بس ياهي ثقيلة دم...
ماتطيقين تكلمينها... ومسكينه آخذه بنفسها مقلب..
نواعم: لا يا شيخ!! وأنت فاج لها هالكشرة وتوزيع إبتسامات..
وهذا وهي ثقيلة دم... طيب لو شفتني مكانها وش بتسوي؟
تركي: قص رقبة... إلا مادريتي؟
نواعم: يا سلام حلال عليكم حرام علينا...
تركي: يعني ماتبين تدرين وشو الخبر...؟
نواعم: وشــــــــــــو؟
تركي: تراه يبط الكبد...
نواعم: أدري ما يجي من وراك أخبار مفرحة...وشو؟
تركي: مشاري...ولد عم امي الدب.. رجل عذبة أو طليقها بمعنى أصح...
نواعم: وش فيه ؟ بيرجع عذبة...؟
تركي: هه لا... بيتزوج خالتي هيفاء...
_تسقط الملعقة من يد نواعم وتبصق الشوربة وتصرخ_: وجع!!!
تركي صادق انت ولا تستهبل... شلون؟
تركي: أص فضحتينا... قالي خالي يوم جيت من البحرين أمس ومريتهم...
وعرفت الخبر... بس ترا أمي عارفتن من زمان...
ولا قالت لنا...
نواعم: شلون ... هذولا مهبل...كله من تحت راس خالي محمد...
ولا شلون هيفاء تنرمي هالرميه...
هو للحين يحب عذبة...
تركي: يا شيخة طيري...!!
قال يحب عذبة ... لو يحب عذبة ما طلقها..
هو كذاب ولعوب.. مل منها قام طلقها..
وقال طلقتها عشانها تبي...
شفتي البنت لامن حبت وشلون تصير لعبه؟
نواعم: مستحيل...وشلون يمل منها ومالهم حتى شهرين
متزوجين... مستحيل..
تركي: أقول روحي يالبزر.. أنا أمل من البنت وأنا مالي شهرين متعرف عليها..
نواعم: هذولي بناتك بنات الشوارع...
بس عذبة غير... عذبة تزوجته..
بدون ما يجمعهم علاقه هابطة زي بناتك...اللي تقول...
بس وين بتروح هيفوه مني... تنخطب وتوافق
ولا تقولي...أوريها...
تركي: أنا بخطب ولانب قايلن لك...
أنتي تخرعين وتخانقين وما يعجبك أحد...
نواعم: بالله تأيد هالزيجه...
تركي: لا... بس وش دخلي فيهم...
في غرفة الجد"
تدخل عذبة وهي تمسك بيد جدها, فيصل يدف العربة, وأبو عبدالعزيز وعبدالمجيد
وإخوانه يحيطون بالجد, الجد ظهرت عليه علامات السعادة,
يدخل تركي مع كاميليا تقوده_
تركي: هلا والله عمي ... الحمد لله على السلامة...
رحت للمستشفى انا ونواعم بس لقيناكم سبقتونا وجيتوا للبيت...
شلونك ياعم ..؟
عبدالمجيد: الله من الدلاخة الحين توك تذكر؟
الجد ناصر: هلا والله بوليدي ... مير زين تذكر احسن من ابوه...
وينه نواعم ... يا حبيلكم والله يا عيال سعد أحسن من أبوكم..
فيصل: عساك مرتاح بالغرفة عجبك السرير ووالله تراو أحسن سرير
بالسوق كلـــــه... بس أنت شف كانوه مريح ولا نغيروه...
أبو عبدالعزيز: إي والله يا عم... ترا لو تنام على ظهورنا
حنا جاهزين... بس أنت إرضى عنا...
الجد ناصر: عيالي والله... بس اللي يرضين أنكم ترضون بناتي...
وتحافظون عليهن... وما تزعلونهن...
مب يا عذيب...
عذبة: إيه أكيد يبه ... فيهم الخير والبركة..
أبو عبد العزيز أبونا...الله يرد أبوي بالسلامة..
_فيصل يضرب كتف عذبة بلطف , تلتفت عذبة
وتنظر بنظرة حادة نحو فيصل الذي إنتهك حرمتها في بيتها_
فيصل_هامساً_:مو وقته..
_تنظر عذبة بنظرة إستحقار وتلتفت على تركي_
عذبة: تركي وين نواعم؟
تركي: بتسلم على جدتي وبتجي تجلس عندكم لليل...
فيصل: لا .. عمي تعبان وشوله تصير بيتهم مجمع بنات..
عذبة: وش دخلك أنت ؟
_فيصل ينظر بإستغراب نحو عذبة فيما أشاحت عنه_
الجد: ولو يا عذيب.. فيصل رجل البيت...
بس البنيات نور البيت.. والله لامن سمعت ضحكهن نسيت همومي..
فيصل: خلاص لامن صرت تبيهن يجن .. يجن..
أبو عبدالعزيز: والله ياعم بناتنا لجتهن بالسماء.. يفقعن الراس...
أقول اليوم يجتمعن ببيتنا أحسن...
الجد ناصر: ما تفهم أنت يجن عندي ويقعدن بغرفتي...
فيصل... وش صار على العمارة الغربية..
فيصل: ماشي الشغل زين....المشروع شهرين وهو مخلص..
ونسلم كافة المباني.. بس باقي عقد التأثيث للحين ماتوقع..
كان توقعه...
الجد ناصر: علم عذبة.. وخله توقع على كل شي..
مايمشي الشغل إلا بتوقيعه..زين!!
فيصل: تآمر أمر ياعم..
عذبة: ريح بالك يبه.. وش قال الدكتور .. خذ إجازة
الجد ناصر: لا يابنتي... انا بآخذ تقاعد...وبسلمتس الزند والفتيله..
مب تسذا يا عبيد؟
أبو عبدالعزيز: هه ... إيـ...ـــه ... لازم ترتاح وتعطي عذبة
تدير الحلال.. بنتك الله لا يخليك...
الجد ناصر: بنتي وأنا رافع راسي به.. بتشوفون وشلون
ترفع راسكم هالبنت... تحسبون مايرفع الراس إلا العيال..؟
مب يا عذيب؟
عذبة: إلا يبه ... إن شاء الله برفع راسك.. وبنفعك...
*******
"في صالة الجد"
يقف فيصل وتركي وعبدالمجيد, يتحدثون...
تركي: شباب... عمي وش فيه؟
فيصل: والد قيصيرية...وش فيه يعني تعبان قلبه..
تركي: يعني عقله ما فيه شيء؟
عبد المجيد: يالطيف... إلا ضاربه فيوزه عشانه ما شافك لانت ولاأبوك...
مابوه شي ماسمعته يحتسي عادي!!!
تركي: بس فيه شيء مب طبيعي...
فيصل: اللهم طولك ياروح ... وش بوه بعد؟
تركي: ما خانقني على شعري... وصار يمدحني... شكله بيموت ويبينا نذكره بالخير..
فيصل: يالنذل حرام عليك... هذا وهو يمدحك!!
تركي: لا ... بس أول مرة ما يهاوشني...
عبد المجيد: النوبة الأخرى إن شاء الله يتمردغ ببطنك!!
إلا فيصل ياويلك من عذبة... والله يا هي تفتفت معه منك...
تركي: تدري انا مرة سويت بوحده مغزلجية بالسوق كذا,
تدري وش سوت؟
فيصل: وش سوت؟
تركي: شالت اللثمة وتفلت بوجهي تفله يحبها قلبك...
عبدالمجيد: مرة(إمرأة) والله... مزديتن بك...
فيصل: أنا قصدي شريف والله.. بس عمي تعبان تقعد تذكره بولده..
طلعت بلا شعور
عبدالمجيد: بصراحة ياعم ماتوقعتها تسكت
أنا دسيت راسي بكتوفي... توقعت يجيك طراق
هذي عذبة مب ليلى تهز دميجته وتسكت ...
فيصل: أقول خلاص والله مو قصدي...
تركي: عم للحين تحب عذبة عشان كذا تغتنم أي فرصة..هاه؟
فيصل: أقول ترا بنتف قذلتك شعرة شعرة إن ما إنطميت...
تحسب كل الناس مثلك؟
عبدالمجيد: بس والله قوية ..إطلاقاً ما اتوقعه تمر مرور الكرام...
ياهي بتغسل شراعك غسل...
تركي: ياااااويلك ياعم!!
إلا يا عم قل لي للحين تحبها؟
فيصل: مجيد وش رايك تجلدوه... ولا انا حسافة أجلد أشكاله...
تركي: إيه يا عم... يالله قل لي...
عبدالمجيد: إخس يا تروك والله وطالعن لك لسان وصايرن تمون..
فيصل: شباب توقعونها ما تسكت عالموضوع...
تركي: شف لو كانت غير عذبة... ولو كان مو أنت
كان يمكن نقول مرت بهدوء مع بعض الإحتقار..
لكن بالظروف الحالية... توقع أي ردة فعل...
عبدالمجيد: كلام تركي صحيح...
يا ويـــــــــــــــــــــــــــــلك ويا سواد ليلك...
والله شكل عيونه ناويه على نيه...
تركي: وناوي لك على نيه ... بس إنت إصبر شويه... وناويلك علــ...
هس.. جت الغولة ..بسم الله شكل الحين بتجي التفلة علينا كلنا...
_تقف عذبة على بعد بضعة أمتار , يتشنج الموقف, فيصل لا يلتفت,
فيما تركي يعض على شفتيه, وعبدالمجيد يشير لفيصل ليحسسه بتشنج الوضع
تكتف يديها وتقول بصوت حازم_:
فيصــــــــــــــــــــــــــل!!
_أغمض فيصل عينيه , وأخرج تركي صوت خافت يشبه
الصافرة, وابتسم عبد المجيد, يرد فيصل دون أن يلتفت_:
ن..نعم؟
عذبة_تمسك طرف شرشفها_: تبون القهوه هنا ولا بالحديقة..
أحس إنوا بالحديقة أحسن عشان البنات بيجون هنا...
ولا..وشراي الشباب؟
_يتنهد فيصل , وينفجرعبدالمجيد وتركي بالضحك, يتمالك فيصل نفسه ويرد_:
عاااادي... أي مكان بس أبي القهوه بدون هيل..وتمر سكري بيجون
ربعي.. و...
تركي: عم ترا ما تنعطى وجه عاد... وأنا أبي كوكتيل باااااااااااارد...
خليهم يحطون فيه ثلج...كثير... كذا..._ويضم يديه_..خليهم يقحشون قحش
ثلج...أوكي..
عبدالمجيد: هع هع ... تروكي وشلون نطقته هالكلمه...يقحشون قحش...
تراه مو لايقة عليك..
تدري وش معناه مير؟
عذبة: تركي وين نواعم..؟
تركي: أوهوه.. قلنا عند جدتي.._ويلتفت على عبدالمجيد_وراه مادري وش معناها...
قحش يعني غْرف ..صح عمو...
فيصل: إيه صح.._وهو يراقب عذبة من طرف عينه وهي تنصرف_
فيصل: وه مرت بسلام...
وأنتم يالحمير ليش تضحكون؟
عبدالمجيد: والله شكلك يضحك..وبعدين هي متقصده شكلها تخوفك..
تركي: إي والله يا عم... يوم شافتك دخلت راسك بين كتوفك عرفت إنك منتهي خوف..
فيصل: تخسى!! ما بقى إلا فيصل يخاف من عذبوه البزرة..
تركي: خلونا نطلع الحديقة.. أنا أخاف يجينا تهزيئه محترمة...
عبدالمجيد: إيه تراه طردتنا بطريقة لبقة .. ولو ما فهمناه بننطرد بالقوة..
خنطلع بسرعة.. قبل لايجون البنات...
*******
"في الباص المدرسي"
نجلاء ونورة في رحلة مدرسية إلى مجمع تجاري, نورة تضحك بقوة
وهي تضرب على يد نجلاء, المعلمة منال تغضب وتطلب منهن الهدوء,
يصمتن قليلاً ثم ينفجرن ضاحكات وينفجر معهن الباص ضاحكاً بجميع طالباته,
المعلمة منيرة: وبعدين معكم أنتو الثنتين؟
نورة: هع..وواااللللله ماااققددرههههههههههههه..
نجلاء: وش سوينا يا إستاذة؟ بنضحك ولا الضحك حرام؟
المعلمة: لا مو حرام بس نسيتي إن فيه رجل أجنبي..؟
نورة: طيب بس بكمل السالفة ذي والله وأسكت...
المعلمة : غدير... تعالي مكان نورة ..ونورة روحي مكانها يالله..
_تتذمر نورة وهي تقوم ,نجلاء تمسك بيدها وهي تقلد المسلسلات المصرية:
ماتتركنيش... بت عمي دنت حياتي أُماااااال...
يتبع ,,,
👇👇👇
اللهم لك الحمد حتى ترضى وإذا رضيت وبعد الرضى ,,, اضف تعليقك